د لاسرسۍ وړ لېنکونه

تازه خبر
شنبه ۵ سلواغه ۱۳۹۸ کابل ۰۴:۰۲

افغانستان

د افغانستان د ملي امنیت ځواکونو ۶ تنه ترهګر نیولي

ارشیف، نیول شوي ترهګر

د افغانستان د ملي امنیت ریاست وايي، ځواکونو یې د نوي کال په درشل کې د دوو انتحاریانو په ګډون ۶ تنه ترهګر نیولي دي.

د دې ریاست په وینا د داعش دغو غړیو غوښتل د نوي کال په لومړۍ ورځ په پلازمېنه کابل کې تروریستي حملې وکړي.

د ملي امنیت ریاست همدا راز وايي چې د خاصې قطعې ځواکونو یې په وروستۍ یوه اوونۍ کې په زابل، هرات، فراه، پکتیکا، بدخشان، غزني، هلمند، بلخ او سرپل ولایتونو کې ۴۴ وسله‌وال مخالفان نیولي دي.

د دولت وسله والو مخالفو ډلو تراوسه پورې د ملي امنیت د ریاست د دې ادعا په اړه څه نه دي ویلي.

د کابل د سخي زیارت په سیمه کې د چاودنو مسؤلیت داعش ومانه

د کابل په پېښه کې یو تن ټپي کس

د کابل د جمال مېنې د سخي زیارت په سیمه کې د نن ورځې د چاودنو مسؤلیت داعش یا اسلامي دولت سختدریځې ډلې په غاړه واخېست.

په‌دې حملو کې چې د څرنګوالي په اړه یې ضد و نقیض راپورونه ورکول کېږي، لږ تر لږه ۶ تنه وژل شوي او ۲۳ نور ژوبل دي.

د کابل د عاجلو خدماتو رئیس محمد عاصم وايي چې په ټپیانو کې ۲ ماشومان هم شامل دي.

د کورنیو چارو وزارت سرپرست ویاند نصرت رحیمي وايي چې په جمال مېنه کې د سخي زیارت ته څېرمه درې چاودنې شوي خو دفاع وزارت وايي چې پر سیمه ۳ توغندي لګېدلي دي.

د افغان ولسمشر په ګډون په مزارشریف کې د نوروز جشن ترسره شول

په مزارشریف کې د نوروز د جشن او د حضرت علي د جنډې د پورته کولو مراسم پیل شوي دي.

افغان ولسمشر اشرف غني چې په‌دې مراسمو کې ګډون کړی اوس د خلکو یوې لویې غونډې ته وینا کوي.

په مزارشریف د نوروز جشن او د ګل سرخ میله د حضرت علي پر مزارد جنډې په پورته کولو سره پیلیږي.

د ازادي راډیو خبریال وایي چې د افغانستان له ګوټ ګوټ څخه په زرګونو کسان په‌دې مراسمو کې د ګډون لپاره مزارشریف ته ورغلي او د بلخ امنیتي چارواکو هم د دغو مراسمو لپاره کلک امنیتي تدابیر نیولي دي.

محمد اشرف غني وویل انتخابات به نور نه ځنډېږي

د افغانستان ولسمشر محمد اشرف غني نن په مزارشریف کې وویل چې انتخابات به نور نه ځنډېږي.

ښاغلي غني په مزارشریف کې د جنډې د پورته کولو په مراسمو کې ګډون کړی و.

له مزارشریف څخه د ازادي راډیو خبریال وايي چې لسګونو زرو خلکو په‌دې مراسمو کې ګډون کړی دی.

د وروستیو راپورونو له مخې، مراسم په امن کې او د نورو کلونو په پرتله د زیاتو خلکو په ګډون ترسره شوي او د کومې امنیتي پېښې راپور نه‌دی ورکړل شوی.


د لغمان والي هیله‌ لري چې د روغتیایي مرکزونو د بندېدو ستونزه هواره شي

د لغمان والي اصف ننګ

د لغمان والي هیله‌مند دی چې په‌دغه ولایت کې به د روغتیایي مرکزونو د بندېدو ستونزه په لنډو ورځو کې هواره شي.

اصف ننګ ازادي راډیو ته وویل:

"موږ په درېیو ولسوالیو کې له دې ستونزې سره مخامخ شوي یو، په بادپښ کې، الیشنګ او الینګار کې، په دولت شاه کې خبرې روانې دي چې ستونزه به هواره شي، په یو دوو ورځو کې کیدای شي چې اصلي ستونزه د افهام او تفهیم له لارې حل شي."

په لغمان کې له تېرې څه باندې یوې اوونۍ را په‌دې خوا روغتیایي مرکزونه بند دي.

له نژدې درې میاشتې راهیسې د لغمان د روغتیایي مرکزونو چارې سویډن کمېټې د هېلټ نیټ په نوم موسسې ته انتقال کړي دي.

نوې موسسې یو لړ امتیازات کم کړي دي او وایي چې علت یې په چارو کې شفافیت دی، خو کوم کسان چې پردې خوښ نه‌دي هغوی د طالبانو په مرسته په لغمان کې روغتیایي مرکزونه تړلي دي.

نن په افغانستان کې د ۱۳۹۸ کال لومړۍ ورځ ده

نن په افغانستان کې د ۱۳۹۸ کال لومړۍ ورځ ده. د نوروز ستر مراسم په مزارشریف کې د مولانا علي پر مزار د جنډې له پورته کولو سره پیلیږي.

د افغانستان ولسمشر اشرف غني پرون په ارګ کې د نهال کښینولو پر مهال هیله وښوده چې دا کال د سولې کال شي:

"نوي کال درته مبارک وایم، خدای دې د سولې کال کړي، خدای دې د سوکالي کال کړي او خدای دې د برکت کال کړي."

د بلخ نوي امنیه قوماندان عبدالرقیب مبارز ازادي راډیو ته وویل چې په مزارشریف کې یې د نوروز د لمانځلو لپاره جدي امنیتي تدابیر نیولي دي.

ارګ د انتخاباتو د کمېسیون د وروستۍ پریکړې درناوی کوي

د ولسمشر ویاند هارون چخانسوري

د افغانستان د ولسمشرۍ د انتخاباتو د ځنډېدو په اړه ولسمشرۍ ماڼۍ ویلي، سره له دې چې حکومت تمه کوله چې انتخابات په خپل وخت ترسره شي، خو د افغانستان د انتخاباتو د خپلواک کمېسیون د دې پریکړې درناوی کوي.

ټاکل شوې وه چې دغه انتخابات د روان ۱۳۹۸ کال د سرطان په ۲۹مه ترسره شي خو اوس د میزان د میاشتې ۶ نیټې ته وځنډېدل.

د ولسمشر ویاند هارون چخانسوري په خپله ټویټرپاڼه کې ویلي چې د انتخاباتو خپلواک کمېسیون د دغو انتخاباتو د ځنډېدو پریکړه له سیاسي ګوندونو او د انتخاباتو د څار له بنسټونو سره له سلا او مشورو وروسته کړې ده.

ښاغلي چخانسوري دغه راز ویلي چې حکومت به له ټولو امکاناتو په استفادې د انتخاباتو له خپلواک کمېسیون سره همکاري وکړي چې افغانستان روان کال د دغو انتخاباتو د ترسره کېدو شاهد وي.

دا دوهم ځل دی چې د افغانستان د ولسمشرۍ، ولایتي شوراګانو او د ولسي جرګې لپاره د غزني انتخابات ځنډیدېږي.

تراوسه د ملګرو ملتونو په ګډون د انتخاباتو نړیوالو ملاتړو د انتخاباتو د خپلواک کمېسیون د دغې پریکړې په اړه عکس‌العمل نه‌دی څرګند کړی.

د بلخ چارواکي: د نوروز لمانځلو لپاره جدي امنیتي تدابیر نیول شوي

د بلخ نوی امنیه قوماندان عبدالرقیب مبارز

د بلخ نوی امنیه قوماندان عبدالرقیب مبارز وايي، د نوروز د لمانځلو لپاره‌یې جدي امنیتي تدابیر نیولي دي.

عبدالرقیب مبارز نن چهارشنبه د مارچ ۲۰مه ازادي راډیو ته وویل:

"هېڅ د اندېښنې ځای نه‌شته، موږ د سیمې د اوسېدونکو سره په دوامدار ډول په تماس کې یو. هر څوک چې دلته راځي موږ امنیت ورته نیسو، هېڅ امنیتي مشکل دلته نه‌شته."

د یو شمېر سرچینو په حواله، د افغانستان ولسمشر محمد اشرف غني به سبا په بلخ کې د نوروز د جشن د پیل په مراسمو کې برخه اخلي، خو د بلخ امنیه قوماندان دا خبر نه‌دی تأیید کړی.

د ازادي راډیو د خبریال په حواله، د افغانستان د کورنیو او دفاع سرپرست وزیران نن بلخ ته ځي.

غني: پوهنې وزارت او ښاروالۍ دې د ښوونځیو زرغونولو لپاره کار وکړي

ولسمشر غني

د افغانستان ولسمشر محمد اشرف غني نن د ۱۳۹۸ هجري لمریز کال په مناسبت په وینا کې د پوهنې له وزارته او ښاروالۍ غوښتنه وکړه چې د ښوونځیو د زرغونولو لپاره کار وکړي.

غني چې د ملي امنیت د سلاکار حمدالله محب په ګډون یو شمېر لوړ رتبه دولتي چارواکي ورسره وو، وویل چې سږ کال داسې باران او دومره واوره شوې چې په تېرو پنځو کلونو کې ساری نه‌لري.

هغه وویل چې دا به د وچکالۍ له کمولو سره مرسته وکړي او په افغانستان کې به د دوه فیصده اقتصادي ودې ته زمینه برابره کړي.

د فوټبال په سیالیو کې عمان افغانستان ته ماتې ورکړه

د فوټبال د ایرمارین مالیزیا جام سیالیو په لومړۍ لوبه کې عمان افغانستان ته ماتې ورکړه.

دغه سیالۍ چې په مالیزیا کې ترسره شوه، افغانستان له عمانه پنځه د صفر په وړاندې ماتې وخوړه.

د دغه سیالیو بله لوبه اوس‌مهال د مالیزیا او سنګاپور ده چې ګټونکې لوبډله به‌يې د درېیم مقام د ترلاسه کولو لپاره د راتلونکې سې شنبې په ورځ د افغانستان په وړاندې د سیالۍ ډګر ته ځي.

په‌دې سیالیو کې د افغانستان تر څنګ عمان، مالیزیا، او سنګاپور برخه لري.

د ملي امنیت شورا د حمدالله محب د استعفا راپورونه رد کړل

د افغانستان د ملي امنیت سلاکار حمدالله محب

د افغانستان د ملي امنیت شورا دفتر د افغانستان د ملي امنیت د سلاکار حمدالله محب د استعفا راپورونه رد کړل.

د دې شورا مرستیال ویاند عبدالکبیر واثق ازادي راډيو ته وویل چې په‌دې اړه خپاره شوي ټول خبرونه تشې اوازې او ښاغلی محب خپلې دندې ته دوام ورکوي.

نوموړي زیاته کړه:

"د محب د استعفا خبرونه یوازې فېس‌بوکي اوازې دي چې هېڅ صحت نه‌لري."

تېره شپه داسې راپورونه خپاره شول چې ګوندې د افغانستان د ملي امنیت شورا سلاکار حمدالله محب له خپلې دندې استعفا ورکړې، خو د ولسمشر اشرف غني له لوري نه‌ده منل شوې.

داسې هم ویل کېدل چې د ښاغلي محب پر ځای ښايي د افغانستان د سولې د عالي شورا د دارالانشاء رئیس محمد عمر داوودزی وټاکل شي او ښايي حمدالله محب هندوستان ته د افغان سفیر په توګه واستول شي.

دا په‌داسې حال کې ده چې تېره ورځ روېټرز اژانس د یو شمېر امریکايي چارواکو له قوله راپور ورکړی چې د امریکا یوه جګ‌پوړي ډيپلومات ولسمشر محمد اشرف غني ته ویلي چې امریکايي چارواکي له دې وروسته له ښاغلي محب سره اړیکې ختموي.

یو پخوانی افغان چارواکی چې د موضوع د حساسیت له وجې نه‌غواړي خپل نوم افشا کړي، ویلي چې له څرګندونو د امریکايي چارواکو هدف دا دی چې ولسمشر غني د ملي امنیت د سلاکار لیرې کولو ته اړ کړي.

دا ناندرۍ وروسته له هغې راپورته شوې چې د تېرې اوونۍ د پنجشنبې په ورځ د افغانستان د ملي امنیت سلاکار حمدالله محب په واشنګټن کې په یوه خبري کنفرانس کې د افغانستان د سولې په چارو کې د امریکا د بهرنیو چارو وزارت پر ځانګړي استازي زلمي خلیل‌زاد تور ولګاوه چې طالبانو ته مشروعیت ورکوي، خو برعکس د افغان حکومت مشروعیت اخلي.

يونېسف راشد خان په افغانستان کې د ښه نيت د سفير په توګه ونوماوه

د کرکټ وتلى ستورى راشد خان

د ملګرو ملتونو د ماشومانو د ملاتړ ادارې يا «يونېسف» د کرکټ وتلى ستورى راشد خان په افغانستان کې د ښه نيت د سفير په توګه ونوماوه.

دغې ادارې نن په يوه اعلاميه کې ويلي له دې سره به ۲۰ کلن راشد خان د نجونو د زده‌کړو د ودې، د خوارځواکۍ او ګوزڼ ناروغۍ په له‌منځه وړلو او د واکسين د پراختيا په برخه کې مرسته وکړي.

راشد خان د يونېسف ادارې مننه کړې چې د روغتيا، تعليم او تغذيې په برخه کې د همکارۍ لپاره‌يې ورته زمينه برابره کړې ده.

په افغانستان کې د يونېسف ادارې استازې ادېل خضر د راشد خان مننه کړې چې تر دې مخکې هم د ماشومانو حقونو ته ژمن و.

د «يونېسف» په اعلاميه کې ويل شوي چې په افغانستان کې ٧ میليونه او ٣ لکه ماشومان له زده‌کړو بې‌برخې دي او شپږ لکه ماشومان چې عمرونه‌يې تر پنځو کلونو کم دي، په شديدې خوارځواکۍ اخته دي.

په کندز کې د طالبانو د ځپلو په هدف تصفیوي عملیات پیل شوي

د پامیر د ۲۰مې فرقې درستيزوال سید قربان موسوي

افغان ځواکونو په کندز کې د وسله‌والو طالبانو د ځپلو په هدف پسرلني تصفیوي عملیات پیل کړي دي.

په کندز کې د پامیر د ۲۰مې فرقې د چارواکو د خبرو پر بنسټ، له دوو ورځو راهيسې دغه پوځي عمليات لا هم روان دي.

د پامیر د ۲۰مې فرقې درستيزوال سید قربان موسوي په‌دې اړه نن ازادي راډيو ته وویل:

"په روانو عملیاتو کې ۳۰ تنه وسله‌والو طالبانو ته مرګ ژوبله اوښتې او د دښمن یو شمېر مرکزونه هم تخریب شوي دي."

په کندز کې د پامير د ۲۰مې فرقې چارواکي خلکو ته ډاډ ورکوي چې ټولې سیمې به د وسله‌والو طالبانو له شتون څخه تصفیه شي.

وسله‌والو طالبانو تر اوسه پورې په‌دې اړه څه نه‌دي ویلي.

بدخشان ته د برښنا رسولو او شیوه‌بند د جوړولو تړون لاسلیک شو

په ارګ کې بدخشان ته د برښنا رسولو او شیوه‌بند د جوړولو تړون لاسلیک شو.

د ۶۳۱ میلیونه ډالرو په ارزښت به بدخشان ته د برښنا رسولو او شیوه‌بند د جوړولو تړون لاسلیک شو.

جمهوري ریاست نن په یوه بیان کې ویلي چې د جمهور رئیس محمد اشرف غني په حضور کې بدخشان ته د برښنا رسونې او شیوه‌بند د جوړولو تفاهم لیک تېره ورځ ناوخته لاسلیک شوی.

د دغه تفاهم‌لیک هدف د اغا خان اقتصادي پراختیا صندوق او د دوی انکشافي شریکانو د ۶۳۱ میلیونه ډالرو پانګونې په ارزښت د بدخشان خلکو ته د برښنا تولید دی.

د بدخشان ولایت د برښنا انرژۍ د اړتیاوو رفع کولو په خاطر د دغې پروژې د تړون موده ۳۰ کاله وړاندیز شوې چې په څو پړاوونو کې تطبیقېږي او هر پړاو به‌یې اووه کاله وخت ونیسي.

رستمي: په بلخ کې د چرګانو د روزنې لپاره ۵۰ فارمونه جوړېږي

د چرګانو فارم

د افغانستان د کرنې، اوبو لګونې او مالدارۍ وزارت په بلخ ولایت کې د غوښنو چرګانو د روزنې لپاره د ۵۰ فارمونو د جوړولو چارې پیل کړي.

د کرنې وزارت ویاند اکبر رستمي نن ازادي راډيو ته وویل چې دغه فارمونه هر یو یې د ۵۰۰ چرګانو د روزنې وړتیا لري.

یاد فارمونه د بلخ ولایت په نهر شاهي او بلخ ولسوالیو کې د اقتصادي ودې په هدف هغو اړمنو کسانو ته جوړېږي چې مخکې له مخکې سروې شوي دي.

د چرګانو د فارمونو له جوړولو څخه هدف د چرګانو د بې‌کیفیته غوښو او هګیو د واردولو مخنیوی او د کورنیو اقتصادي پیاوړتیا ده.

نور راوښيه

XS
SM
MD
LG