د لاسرسي لېنکونه

تازه خبر
دوشنبه ۲۷ لړم ۱۳۹۸ کابل ۰۱:۳۳

افغانستان

"له جرمني اخراج شوي ۴۴ افغان پناه غوښتونکي کابل ته رسېدلي"

ارشیف

هغه ۴۴ افغان پناه غوښتونکي کابل ته رسیدلي چې له جرمني اخراج شوي دي.

د جرمني خبري اژانس "ډي پې اې" په یوه راپور کې ویلي، دا اته ویشتمه ډله افغان پناه غوښتونکي و چې له جرمني بېرته افغانستان ته واستول شول.

د ۲۰۱۶ کال له ډسمبره ۷۲۰ تنه افغانان له جرمني ایستل شوي دي.

په جرمني کې د افغان پناه غوښتونکو د اخراج په اړه بیلابیل نظریات موجود دي، ځکه ددې مسئلې مخالفین وایي چې په افغانستان کې لا هم جګړې روانې دي او د پناه غوښتونکو ورلیږل خطر لري.

شاوخوا ۲۵۰ زره افغانانو په وروستیو لږ تر لږه پنځو کلونو کې جرمني ته پناه وړې، خو له ډلې یې لسګونه کسان په دې را ایستل شوي چې په جرمني کې یې د پناه غوښتنلیکونه او قضیې رد شوي دي.

د ملګرو ملتونو د راپور په اساس د ۲۰۱۹ کال په لومړیو شپږو میاشتو کې ۱۳۶۶ افغان ملکیان په جګړو او چاودنو کې وژل شوي دي.

وروستی برید په ننګرهار کې وړمه ورځ وشو چې پکې د یوه ماشوم په ګډون ۱۲ ملکیان ووژل شول.

د کابل تیمورشاهي کې اورلګېدنې دوکاندارانو ته دروند مالي زیان اړولی

آرشیف

د کابل ښار په تیمورشاهي سیمه کې د تېرې شپې اورلګېدنې زیات مالي تاوانونه اړولي دي.

د کابل د امنیه قومندانۍ ویاند فردوس فرامرز ازادي راډیو ته وویل، په تیمورشاهي سیمه کې د پلاستیکي توکو دوکانونو اور واخیست او اور وژونکو په ډېرې سختۍ له څو ساعتونو وروسته اور مړ کړ.

د ښاغلي فرامرز په خبره چې په دې پېښه کې څوک مړه یا ټپیان شوي نه دي خو هټیوالو او مارکېټونو ته زیات مالي تاوان اوښتی دی.

د کابل د لومړۍ حوزې شاوخوا سیمو کې ډېر تجارتي مارکیټونه او دوکانونه موجود دي خو ویل کیږي چې ګڼ دا مارکیټونه او ودانۍ پخواني دي او سم محافظتي سیسټم نه لري.

په دې سیمه کې مخکې هم څو واره اور لګیدلی چې ګڼو دوکاندارانو ته یې درانه مالي تاوانونه اړولي.

د بشري حقونو کمیسیون: د نجونو د بکارت پردې ازموینه دې منع شي

د روغتيا نړيوال سازمان ويلي، د بکارت پردې معاينه علمي اعتبار نه لري او نه شي کولاى چې سل په سلو کې د نجونو پېغلتوب يا هم د جنسي رابطې ټينګول ثابت کړي.

د افغانستان بشري حقونو خپلواک کميسيون يو وار بيا له قيد او شرط پرته د نجونو د بکارت پردې د طبي ازموينې د ممنوعيت غوښتنه کړې ده.

دغه کميسيون پرون په يوه اعلاميه کې ويلي چې دا ډول ازموينه شکنجه ګڼل کېږي.

د کميسيون په خبره د ښځو د انساني کرامت د خونديتوب او د بشري حقونو د نړيوالو معيارونو د رعايت لپاره دې دا معاينه په زور او فشار نه ترسره کېږي.

د بشري حقونو خپلواک کميسيون دا هم ويلي چې له مدني او د بشري حقونو له مدافع ډلو سره يوځاى د بکارت پردې د ازموينې د مخنيوي لپاره د عدالت غوښتنې هڅو ته دوام ورکوي.

په افغانستان کې دا ډول ازموينې په داسې حال کې کېږي چې د روغتيا نړيوال سازمان ويلي، د بکارت پردې معاينه علمي اعتبار نه لري او نه شي کولاى چې سل په سلو کې د نجونو پېغلتوب يا هم د جنسي رابطې ټينګول ثابت کړي.

طالبانو سرپل کې د ټاکنو کمیسیون یو موقت کارکوونکی وژلی

پرون په همدې ولسوالۍ کې پولیسو د قاري ناصر په نوم د طالبانو د یوه قومندان د وژلو خبره کړې وه او ویلي و چې نوموړي غوښتل د هغو کسانو ګوتې پرې کړي چې ټاکنو کې یې رایه ورکړې ده.

د افغانستان په شمالي ولایت سرپل کې سیمه ییز چارواکي وایي، د انتخاباتو د خپلواک کمیسیون یو موقت کارکونکی په سانچارک ولسوالۍ کې طالبانو وژلی دی.

د سانچارک ولسوال نقیب الله ازادي راډیو ته وویل، وژل شوی کس علي نقي نومېده او طالبانو د ټاکنو له کمیسیون سره د کار کولو او په انتخاباتو کې د خپلې رایې کارکولو په خاطر په خواجه سرخ سیمه کې نن په ډزو وواژه.

هغه زیاته کړه چې طالبانو د هغه مړی سیند ته اچولی چې وروسته دوی وموند او کورنۍ ته یې وسپاره.

طالبانو تراوسه په دې اړه څه نه دي ویلي.

پرون په همدې ولسوالۍ کې پولیسو د قاري ناصر په نوم د طالبانو د یوه قومندان د وژلو خبره کړې وه او ویلي و چې نوموړي غوښتل د هغو کسانو ګوتې پرې کړي چې ټاکنو کې یې رایه ورکړې ده.

د فراه پرچمن ولسوالۍ کې د طالبانو لخوا ۷ تښتول شوي ملکیان خوشې شوي

چارواکي وایي، طالبانو د میزان په ۶مه دغه کسان له ځان سره نامعلوم ځای ته وړي وو.

د افغانستان په لویدیځ کې د فراه امنیتي چارواکي وایي، په پرچمن ولسوالۍ کې د طالبانو له لورې ۷ تښتول شوي ولسي وګړي خوشې شوي دي.

د افغانستان د کورنیو چارو وزارت ویلي، دغه کسان تېره شپه د دولتي ګډو ځواکونو په عملیاتو کې خوشې شول.

د فراه د امنیه قومندانۍ ویاند محب الله محب آزادي راډیو ته وویل، خلکو هم ددوی په خوشې کېدو کې همکاري کړې ده.

طالبانو د میزان په ۶مه دغه کسان له ځان سره نامعلوم ځای ته وړي وو.

امنیتي چارواکي وایي، تښتول شوي کسان د طالبانو لخوا ځورول شوي او ناسم چلند ورسره شوی دی.

طالبانو تر اوسره په دې اړه څه ندي ویلي.

سرپل کې پولیسو یو طالب وژلی چې غوښتل یې د رأی ورکوونکو ګوتې پرې کړي

د سرپل د پولیسو ویاند وویل، قاري ناصر پوسته جوړه کړې وه او غوښتل یې له خلکو پیسې واخلي او د هغو کسانو ګوتې پرې کړي چې په ټاکنو کې یې رأیه ورکړې ده.

د افغانستان د شمالي ولایت سرپل په سانچارک ولسوالۍ کې پولیسو د طالبانو یو سرګروپ وژلی چې د چارواکو په خبره غوښتل یې په ټاکنو کې د ګډون کوونکو کسانو ګوتې پرې کړي.

د سرپل د پولیسو ویاند نورآقا فیضي د دوشنبې (میزان ۱۵مه) په ورځ ازادي راډیو ته وویل، قاري ناصر په ټاکنو کې د ګډون کوونکو کسانو پېژندلو لپاره د سانچارک ولسوالۍ په توپخانې سیمه کې پوسته جوړه کړې وه.

ښاغلي فیضي وویل، دغه طالب سرګروپ غوښتل له خلکو پیسې واخلي او د هغو کسانو ګوتې پرې کړي چې په ټاکنو کې یې رأیه ورکړې ده.

د پولیسو ویاند وویل چې د دولتي ځواکونو په عملیاتو کې قاري ناصر ووژل شو او دوه نور ملګري یې ټپيان شول.

طالبانو تر اوسه په دې اړه څه نه دي ویلي.

د سرپل د مرکز او سانچارک ولسوالۍ ترمنځ لاره له تېرو شپږو میاشتو راهیسي ناامنه ده او داسې راپورونه هم خپاره شوي چې کله ناکله د طالبانو غړي د لارې په اوږدو کې له خلکو باج اخلي.

جلال اباد کې د پرونۍ چاودنې د وژل شویو شمېر ۱۲ ته لوړ شو

د ننګرهار د والي ویاند ازادي راډیو ته وویل، چاودېدونکي توکي په یوه زرنج ډوله ریکشا کې ځای پرځای شوي وو.

د افغانستان په ختیځ ولایت ننګرهار کې چارواکي وایي، په جلال اباد ښار کې د دوشنبې ورځې په چاودنه کې د یوه ماشوم ګډون ۱۲ ملکي کسان وژل شوي.

تېره ورځ شااوخوا ۴:۳۰ دقیقو د جلال اباد ښار په درېیمه ناحیه کې د ملي اردو د جلب او جذب سرتېرو یوه کاسټر موټر ته څېرمه چاودنه وشوه.

د ننګرهار د والي ویاند عطاو الله خوګیاڼي ازادي راډیو ته وویل، په دغې چاودنې کې د وژل شویو کسانو شمېر ۱۲ ته لوړ شوی او ۳۲ نور ټپيان دي.

د ښاغلي خوګیاڼي په خبره، چاودېدونکي توکي په یوه زرنج ډوله ریکشا کې ځای پرځای شوي وو.

تراوسه چا ددغې چاودنې مسئولیت نه دی منلی.

د افغانستان ولسمشر محمد اشرف غني دغه برید غندلی او هغه یې د بشریت ضد جنایت بللی دی.

جلال اباد کې د ملي اردو پر موټر چاودنې ۱۰ کسان وژلي او ۲۷ نور ټپیان کړي

د ننګرهار د والي ویاند وایي چاودېدونکي توکي په یوه زرنج کې ځای پرځای شوي وو.

د افغانستان د ختیځ ولایت ننګرهار په مرکز جلال اباد ښار کې د ملي اردو پر یوه کاسټر موټر چاودنه کې ۱۰ کسان وژل شوي او ۲۷ نور ټپیان دي.

د ننګرهار د والي ویاند عطاو الله خوګیاڼي رسنیو ته ویلي چې په دغه موټر کې د ملي اردو د جلب او جذب سرتېري سپاره و چې د پوهنتون روغتون سره نزدې پرې نن مازدیګر څلور نیمې بجې چاودنه وشوه.

د هغه په وینا په چاودنه کې د یوه ماشوم په ګډون ۱۰ کسان وژل شوي او ۲۷ نور ټپیان دي.

ښاغلي خوګیاني وویل چې چاودېدونکي توکي په یوه زرنج کې ځای پرځای شوي وو.

د ننګرهار ولایتي روغتون چارواکي وایي چې ددغې پېښې یو مړی او ۲۹ ټپیان دوی ته وروړل شوي دي.

تراوسه چا ددغې چاودنې مسئولیت نه دی منلی.

د پکتیا ډنډ پټان ولسوالۍ کې "پنځه" سیمه ییز پولیس وژل شوي

د پکتیا د پولیسو ویاند سردارولي تبسم وايي چې طالبانو او سیمه ییزو پولیسو ترمنځ جګړه د ډنډ پټان ولسوالۍ په کارېز سیمه کې شوې ده.

د افغانستان په جنوب ختیځ کې د پکتیا امنیتي چارواکي وایي، تېره شپه په ډنډ پټان ولسوالۍ کې له طالبانو سره جګړه کې درې سیمه ییز پولیس وژل شوي دي.

د پکتیا د پولیسو ویاند سردارولي تبسم ویلي چې جګړه د ډنډ پټان ولسوالۍ په کارېز سیمه کې شوې ده.

خو یوې بلې سرچینې ازادي راډیو ته وویل چې د تېرې شپې په جګړه کې پنځه سیمه ییز پولیس وژل شوي.
تراوسه طالبانو ددغه برید په اړه څه نه دي ویلي.

پوځي چارواکي په لوګر، کندهار او ارزګان کې د ۱۳ طالبانو د وژل کېدو ادعا کوي

په لوګر کې پوځي سرچینې وایي، د مرکز پل علم اړوند کمال خېلو سیمه کې د نړیوالو ځواکونو هوايي برید ۸ طالبان وژلي او څلور نور ټپيان کړي دي.

د افغانستان پوځي سرچینې وايي، په لوګر کې د نړیوالو ځواکونو هوايي برید ۸ طالبان وژلي او څلور نور یې ټپيان کړي دي.

په لوګر کې د ۲۰۳ تند قول اردو څلورمې پلې لوا په یوې خبرپاڼې کې ویلي چې طالبان د مرکز پل علم اړوند کمال خېلو کې په نښه شوي دي.

په خبرپاڼه کې ویل شوي چې وژل شوي کسان په لوګر کې د طالبانو مهم غړي وو.

په ورته وخت کې د کندهار د ۲۰۵ اتل قول اردو چارواکي وایي، څلور وسله وال په میوند ولسوالۍ کې په داسې حال کې ووژل شول چې موټر یې پر خپل ښخ کړي ماین وخوت.

د اتل قول اردو ویاند خواجه یحی علوي ازادي راډیو ته وویل، چاودنه د دغې ولسوالۍ په چشمو نومې سیمه کې رامنځته شوې ده.

ښاغلي علوي همداراز وویل چې د ملا داود په نوم یو بل وسله وال د ارزګان په ګیزاب ولسوالۍ کې له دولتي ځواکونو سره په جګړه کې وژل شوی او پنځه نور وسله وال ټپیان شوي دي.

طالبانو تراوسه د دولتي چارواکو د دغو ادعاوو په اړه څه نه دي ویلي.

طالبان: د ١١ طالبانو په بدل کې ۳ برمته شوي هندي وګړي خوشې شول

شماری از جنگجویان گروه طالبان در ولایت غزنی. 01 May 2019

افغان طالبان وايي چې د ١١ طالبانو د ازادۍ په بدل کې يې درې برمته شوي هندي وګړي خوشې کړي دي.

د دوى په خبره، په دغو خوشې شويو طالبانو کې د دوى ځيني مهم غړي هم شامل دي.

د طالبانو دوو مسؤلانو پرون ازادي راډيو ته وويل، دا تبادله پرون وشوه، خو دوى د دې تبادلې د ځاى په اړه څه ونه ويل.

د طالبانو دغو مسؤلانو د موضوع د حساسيت له کبله د نوم نه ښوولو په شرط دا خبرې کړي دي.

دوى نه دي ويلي چې دغه طالبان له افغان چارواکو سره بنديان وو، که په افغانستان کې له امريکايي ځواکونو سره؟

د افغانستان يا هندوستان چارواکو سم د لاسه په دې اړه کومه تبصره نه ده کړې.

په بغلان ولايت کې اووه تنه هندي انجنيران چې د برېښنا په يوه پروژه کې يې کار کاوه، د ٢٠١٨ میلادي کال په مې مياشت کې وتښتول شول.

د هغې تښتونې مسؤليت چا نه و منلى.

له هغې ډلې يو برمته شوى انجنير خوشې کړاى شو، خو د نورو د برخليک په اړه معلومات نه وو.

په بدخشان کې شهدا او بهارک لپاره د طالبانو پوځي مسؤلان وژل شوي

ارشیف، بدخشان

د بدخشان ولايت چارواکي وايي، د شهدا او بهارک ولسواليو لپاره د طالبانو پوځي مسؤلان وژل شوي دي.

د بدخشان مطبوعاتي دفتر تېره شپه په يوه اعلاميه کې ويلي چې د شهدا ولسوالۍ لپاره د طالبانو پوځي مسؤل مولوي محمد داود خالد او د بهارک ولسوالۍ لپاره د طالبانو پوځي مسؤل برکت الله ارشد په هوايي حمله کې وژل شوي دي.

د اعلاميې په حواله، د افغانستان هوايي ځواک د طالبانو دغه دوه پوځي مسؤلان په بلې ولسوالۍ وردوج کې په نښه کړي دي.

د بدخشان مطبوعاتي دفتر ويلي چې د طالبانو دغو دوو پوځي مسؤلانو له کلونو راهيسې پر خلکو ظلمونه کړي دي.

وسله والو طالبانو په دې اړه څه نه دي ويلي.

عبدالله عبدالله: د بهرنيو چارو وزارت وياند خپل کار ته دوام ورکوي

د افغان حکومت اجرائیه رئیس عبدالله عبدالله

د افغانستان اجرائيه رياست وايي، صبغت احمدي د بهرنيو چارو وزارت د وياند په توګه خپل کار ته دوام ورکوي.

دغه رياست تېره شپه د احمدي د لېرې کېدو په تړاو په يوه اعلاميه کې وويل: په دې وخت کې انتصابونه او برطرفۍ کېداى شي له انتخابات سره ارتباط ولري.

په اعلاميه کې ويل شوي چې صبغت احمدي د سولې د پروسې په ملاتړ د بهرنيو چارو وزارت موقف بيان کړى دى.

د افغانستان جموري رياست پرون ماسپښين په يوه اعلاميه کې ويلي وو چې احمدي په رسنيو کې د غير مسؤلانه څرګندونو په خاطر له دندې لېرې کړاى شوى دى.

صبغت احمدي په وروستيو کې پاکستان ته د طالبانو د هيئت تر سفر وروسته په خپل ټوېټر کې ليکلي: د افغانستان د حکومت او طالبانو ترمنځ د مستقيمو خبرو د زمينې برابرېدو لپاره د سيمې او نړۍ د هېوادونو د هڅو هرکلى کوي.

وروسته د جمهوري رياست وياند صديق صديقي په خپل ټوېټر کې وليکل چې د طالبانو او پاکستاني چارواکو ترمنځ د کتنې په اړه د بهرنيو چارو وزارت د وياند وروستۍ څرګندونې د هغه شخصي نظر دى او د حکومت ليدلورى نه څرګندوي.

خو ښاغلي احمدي په ځواب کې وويل، د بهرنيو چارو وزارت رسمي دريځ يې بيان کړى دى.

د کوسوو په ټاکنو کې د اپوزيسيون دوه ګوندونه تر واکمن ګوند مخکې دي

Kosovo: Elections in Kosovo, 6 October 2019

د کوسوو په پرونيو تر وخت مخکې انتخاباتو کې د اپوزيسيون دوه عمده ګوندونه تر واکمن ګوند مخکې شوي دي.

پر ځايي وخت د شپې تر يوولسو بجو او ١٦ دقيقو پورې د ٨٠ فيصدو شمېرل شويو رأيو له مخې د کوسوو ډموکراتيک واکمن ګوند چې له يوې لسيزې يې پر پالېسيو واکمني کوله، په سلو کې يوازې ٢٢ رأيې ګټلي دي.

خو کيڼ اړخي ملتپال ګوند ويتي وين دوسې په سلو کې ٢٦ او ښي اړخي د کوسوو ډموکراتيګ ليګ په سلو کې ٢٥ رأيې خپلې کړي دي.

تمه کېږي چې د اپوزيسيون دغه دوه عمده ګوندونه يو ائتلافي حکومت جوړ کړي.

د دغو پارلماني ټاکنو نهايي نتيجه به نن دوشنبه اعلان شي.

په کوسوو کې ١ ميليون او ٩ لکه کسان د رأيې ورکولو پر شرايطو برابر دي.

خلکو د ١٢٠ وکيلانو د غوره کولو لپاره په انتخاباتو کې خپله رأيه وکاروله.

دا له کله چې په ٢٠٠٨ میلادي کال کې کوسوو له صربيا خپله خپلواکي اعلان کړه، په دغه هېواد کې څلورم پارلماني انتخابات دي.

جرمني یو شمېر نور افغان کډوال هم خپل هېواد ته را ستنوي

جرمني په پام کې لري چې یو شمیر نور هغه افغانان چې دې هېواد د کډوالو په توګه نه دي منلي، افغانستان ته راستانه کړي.

DPA خبري اژانس د افغانستان د کډوالو او راستنېدونکو چارو د وزارت د یوه چارواکي له قوله چې نوم یې نه دی یاد کړی، خبر ورکوي چې جرمني به دا ډله افغان پناه غوښتونکي د چهارشنبې په ورځ افغانستان ته را واستوي.

د احصاییو له مخې، د ۲۰۱۶ کال له ډېسمبر میاشتې راهیسې ټول ۶۷۶ افغانان له جرمني را ایستل شوي دي.

په همدې حال کې د جرمني د کورنیو چارو وزیر ویلي چې اروپايي ټولنه که ګډ کار ونه کړي، نو د ۲۰۱۵ کال په پرتله د زیات شمېر غیر قانوني کډوالو له بهیر سره به مخامخ شي.

هورسټ سیهوفر نن یکشنبه د جرمني بېلډ ورځپاڼې ته وویل، اروپايي ټولنه باید د خپلو بهرنیو سرحدونو د کنټرول لپاره هڅې چټکې کړي.

ټاکل شوې چې د اروپايي ټولنې د کورنیو چارو وزیران د سې شنبې په ورځ په لوګزامبورګ کې اروپا ته د غیر قانوني کډوالو د ننوتو پر ستونزه خبرې وکړي.

پوليسو په کندهار کې د ۳۳ ميلیونو کالدارو غله نيولي

چارواکي وایي چې پوليسو په کندهار کې د ۳۳ ميلیونو کالدارو غله نيولي ذي.

د کندهار د پوليسو ویاند جمال ناصر بارکزي ازادي راډيو ته وويل چې دواړه غله نن د کندهار د درېيمي حوزې د پوليسو له خوا نيول شوي دي.

بارکزی وایي چې يادو دوو کسانو نن د کندهار د صرافۍ له مارکېټه د سوداګرو ۳۳۰ لکه کالداري چې غزني ولایت ته لېږدول کېدلې، غلا کړي وې چې وروسته د پوليسو له خوا ونیول شول.

د پوليسو ویاند وایي چې له غلو ترلاسه شوې پېسي خپلو څښتنانو ته سپارل شوي دي.

د دې ترڅنګ پوليسو د کندهار په ډنډ ولسوالۍ کې هم څلور غله نیولي چې په دې ولایت کې به یې له خلکو څخه په زور موټرسایکلونه ايخستل، نيولي دي.

"لښکرګاه کې د طالبانو برید کې شپږ پولیس وژل شوي"

پولیسو یوې سرچینې د نوم نه خپرېدو په شرط ازادي راډیو ته وویل، جګړه د لښکرګاه ښار د سره ګودر سیمې په مربوطاتو کې شوې او شپږ پولیس پکې وژل شوي

د افغانستان په جنوبي ولایت هلمند کې چارواکي وایي، د لښکرګاه ښار په نهمه حوزه کې د طالبانو په برید کې شپږ پولیس سرتېري وژل شوي او د یوه افسر په ګډون دوه نور ټپیان دي.

د هلمند والي ویاند عمر ځواک وویل، په جګړه کې دواړو لوریو ته تلفات اوښتي خو دقیقه شمېره یې په واک کې نه لري.

د تېرې شپې د برید په اړه حکومتي چارواکي جزئیات نه ورکوي، خو د پولیسو یوې سرچینې د نوم نه خپرېدو په شرط ازادي راډیو ته وویل، جګړه د سره ګودر سیمې په مربوطاتو کې شوې او شپږ پولیس پکې وژل شوي او دوه نور ټپیان دي.

طالبانو تراوسه په دې اړه څه نه دي ویلي.

دوه شپې وړاندې هم په دغه سیمه کې د طالبانو په یوه برید کې اته پولیس وژل شوي وو. په دغه سیمه کې د طالبانو بریدونه په دې وروستیو کې ډېر شوي دي.

د فاریاب شیرین تګاب لپاره د طالبانو نومول شوی ولسوال هوايي برید کې ووژل شو

د فاریاب د پولیسو ویاند وايي، نورآغا وثیق او څلور نور ملګري یې په یوه موټر کې سپاره و چې په نښه شول.

د افغانستان په شمال کې د فاریاب ولایت چارواکي، د شیرین تګاب ولسوالۍ لپاره د طالبانو نومول شوی ولسوال په یوه هوايي برید کې وژل شوی دی.

د فاریاب د امنیه قوماندانۍ ویاند عبدالکریم یورش آزادۍ راډیو ته وویل چې نورآغا وثیق او څلور نور ملګري یې په دغه برید کې وژل شوي دي.

هغه وویل: "دا ملا نور آغا وثیق د شیرین تګاب لپاره د طالبانو نومول شوی ولسوال و. نوموړی له ملا شاه ولي سره چې په سعادت مشهور و او د عشر او ذکات د ټولولو مسوول و، د ملا هدایت الله په نوم د طالبانو د سرې قطعې له یوه سرګروپ او دوه تنه ساتونکو سره یوځای ووژل شو."

د ښاغلي یورش په وینا دا کسان د کشفي معلوماتو له ترلاسه کېدو وروسته په داسې حال کې چې په یوه سراچه موټر کې شش‌پر نومي کلي ته روان وو، له الوتکې په نښه شول.

دولتي ځواکونو د تخار بهارک ولسوالي له طالبانو بېرته نیولې

په دې وروستیو کې په تخار کې د طالبانو فعالیتونه ډېر شوي دي.

د افغانستان دفاع وزارت وايي، افغان دفاعي او امنیتي ځواکونو په تخار ولایت کې لږترلږه ۸۹ وسله وال طالبان وژلي دي.

د افغانستان د دفاع وزارت مرستیال ویاند فواد امان نن (یکشنبه) ازادي رادیو ته وویل، د تحار ولایت په وروستیو تصفیوي عملیاتو کې د ۸۹ طالبانو د وژل کېدو ترڅنګ تر ۶۰ ډېر نور ژوبل شوي دي.

امان وویل چې د دغو عملیاتو په لړ کې د تخار ولایت بهارک ولسوالي له طالبانو بېرته ونیول شوه.

ده د عملیاتو په لړ کې د افغان امنیتي ځواکونو د مرګ ژوبلو یادونه ونه کړه.

وسله والو طالبانو تراوسه پورې د دفاع وزارت د ادعا په اړه څه نه دي ویلي.

په وروستیو ورځو کې په تخار کې پوځي تحرکات ډېر شوي دي.

دولتي ځواکونو د تخار خواجه غار ولسوالي له طالبانو تصفیه کړې

۲۰۷ پامیر قول اردو ویلي، په دغو عملیاتو کې لس طالبان وژل شوي او پنځه نورټپیان شوي.

د افغانستان په شمال کې د ۲۰۷ پامیر قول اردو وایي، د تخار خواجه غار ولسوالۍ یې له هغو طالبانو تصفیه کړې چې په دې وروستیو کې له ګاونډي ولایت کندوز څخه دې ولسوالۍ ته ورغلي وو.

د دې قول اردو په خبرپاڼه کې ویل شوي چې د امنیتي او دفاعي ځواکونو د ګډو عملیاتو په نتیجه کې چې له هوایي ملاتړه هم برخمن وو، پرون مازدیګر مهال په خواجه غار ولسوالۍ کې د مخالفان سخت وځپل شو.

په خبرپاڼه کې ویل شوي چې د لومړنیو راپورونو له مخې لس طالبان وژل شوي او پنځه نورټپیان شوي او طالبان د دې ولسوالۍ له مرکز او شاوخوا سیمو یې په شا تمبول شوي دي.

طالبانو تراوسه په دې اړه څه نه دي ویلي.

"طالبانو غزني کې لسګونه یرغمل کړي کسان خوشې کړي"

چارواکي وايي، د خواجه عمري ولسوالۍ ۴۳ اوسېدونکي چې طالبانو د پنجشنبې په ورځ (میزان ۱۱مه) له ځان سره بیولې و، پرون بیرته خوشې کړل.

د غزني د خواجه عمري ولسوالۍ هغه لسګونه اوسیدونکي چې د پنجشنبې په ورځ طالبانو له ځان سره بیولې و، پرون بیرته خوشې شول.

د غزني د والي ویاند محمد عارف نوري پرون ماښام (میزان ۱۳مه) ازادي راډیو ته وویل، "د غزني ولایت د خواجه عمري ولسوالۍ ۴۳ اوسیدونکي چې دوه ورځې مخکې طالبانو یرغمل کړي او یوه نامعلوم ځای ته یې بیولي وو، د دې ولسوالۍ د قومي مشرانو په منځګړیتوب بیرته خوشې او خپلو کورونو ته ستانه شول."

ښاغلي نوري په دې اړه دغه کلیوال ولې طالبانو له ځان سره بیولي وزیات جزییات ورنه کړل خو زیاته یې کړه چې په دې اړه څیړنه کیږي.

طالبانو لا په دې اړه څه نه دي ویلي.

افغان ولسمشر په هېواد کې د ملکيانو مرګ ژوبله د خواشينۍ وړ وبلله

افغان ولسمشر محمد اشرف غني

د افغانستان ولسمشر په هېواد کې د ملکيانو مرګ ژوبله د خواشينۍ وړ وبلله.

محمد اشرف غني چې نن يې په کابل کې امنيتي او دفاعي ځواکونو ته د زرو اپارتمانونو د وېش په مراسمو کې خبرې کولې، وويل: ملکي تلفات واقعاً د خواشينۍ وړ دي، خو زموږ امنيتي او دفاعي قوه متعهده ده چې د ملکي تلفاتو مخه ونيسي، د خداى په فضل زموږ امنيتي او دفاعي ځواکونه په بشپړ ډول قانونمند دي چې که خداى کول په مطلق ډول به د ملکي تلفاتو مخنيوى وشي.

تر دې مخکې په افغانستان کې په بېلابېلو حملو کې د ملکيانو د مرګ ژوبلې پر زياتېدو اندېښنه ښوول شوې وه.

په کابل کې د ملګرو ملتونو سياسي دفتر يا يوناما ويلي چې د روان ميلادي کال په لومړيو شپږو مياشتو کې ١٣٦٦ افغانان وژل شوي او نږدې ٢٥٠٠ نور ټپيان شوي دي.

بل خوا سره صليب نړيوالې کمېټې په اګست مياشت کې ويلي وو چې د روان ميلادي کال په لومړيو شپږو مياشتو کې ٥٩ داسې پېښې شوي چې پر روغتيايي مرکزونو او روغتيايي کارکوونکو حملې هم په کې شاملې دي.

بلخي: د لوړو زده کړو وزارت په مرسته به د ١٠٠٠ ښوونکو ظرفيت لوړ شي

میرویس بلخي

د پوهنې وزارت سرپرست وايي سږکال به د لوړو زده کړو وزارت په مرسته د ١٠٠٠ تنو ښوونکو ظرفيتونه لوړ شي.

محمد ميرويس بلخي نن په کابل کې د ښوونکي ورځې په مناسبت په غازي عالي لېسه کې د وينا پر مهال دا خبره وکړه.

ښاغلي بلخي وويل، د ښوونکو د معاشونو لوړولو او کورونو ورکولو پر طرحه کار روان دى.

دی وایي: د استوګنې د سرپناه طرحه مو داسې جوړه کړې چې په اوږد مهال کې د قسطونو په ډول وکړاى شو د سپينې نومرې پر ځاى د يوه ابتدايي کور کيلي خپلو ښوونکو ته وسپارو، طرحه بشپړه شوې او د خپلې بودجې په مرسته به دا پروګرام پيل کړو.

د ښوونکي ورځ په داسې حال کې نمانځل کېږي چې افغان ښوونکي وايي، زياتې ستونزې لري.

وى د معاشونو له کموالي او د سرپناه له نشتوالي شکايتونه لري.

د پوهنې وزارت وايي، په افغانستان کې دوه لکه او ٢٩ ښوونکي تدريس کوي چې ٨١ زره يې ښځينه دي.

چارواکي: د غزني په ده یک ولسوالۍ کې ۹ وسله وال طالبان وژل شوي

د غزني چارواکي وايي، نن د ورځې په اوږدو کې د دغه ولایت په ده یک ولسوالۍ کې ۱۴ تنه طالبانو ته مرګ ژوبله اوښتې ده.

د والي ویاند محمد عارف نوري نن په دې اړه رسنیو ته په لېږلي صوتي پیغام کې ویلي، په دې ولسوالۍ کې د افغانستان د ځانګړو ځواکونو پوځي عمليات اوس هم روان دي.

ده وویل: په دغو پوځي عمليات کې تر اوسه ۹ وسله وال طالبان وژل شوي او ۵ تنه ټپیان شوي دي.

نوري زیاتوي، په دغو عملیاتو کې افغان ځواکونو او ملکيانو ته زیان نه دی اوښتی او عملیات اوس هم روان دي.

وسله والو طالبانو تر اوسه په دې اړه څه نه دي ویلي.

د فوټسال ۲ افغان لوبغاړي د لبنان د فوټسال غوره ليګ سیالیو کې لوبېږي

د افغانستان د فوټسال د ملي ټيم دوه لوبغاړي د لبنان د فوټسال د غوره ليګ سیالیو ته غوره شوي دي.

د افغانستان د فوټبال فدراسيون په خپله رسمي فېسبوک پاڼه کې دا افغان لوبغاړو فرزاد محمودي او سيد حسين موسوي ته ښه زېرى بللى دى.

د فوټبال فدراسيون د معلوماتو له مخې، دواړه افغان لوبغاړي د لبنان الغبيري ټيم ته د يوه کال لپاره انتخاب شوي دي.

دوى به د اسيايي ټيمونو تر شل کلنۍ د کم عمره لوبغاړو د فوټسال په هغو مسابقو کې چې په جون مياشت کې په ايران کې ترسره کېږي، برخه واخلي.

نور راوښيه

XS
SM
MD
LG