د لاسرسۍ وړ لېنکونه

تازه خبر
سه شنبه ۸ سلواغه ۱۳۹۸ کابل ۰۹:۱۹

افغانستان

غني: په نوي کال کې د حکومت یوه مهمه مسئله د سولې هڅې دي

افغان ولسمشر وايي، په نوي کال کې به د افغانستان د حکومت یوه مهمه مسئله بیا هم د سولې روانې هڅې وي.

محمد اشرف غني دا څرګندونې نن په ارګ کې د نوروز په منابست مراسمو کې د لنډې وینا په لړ کې وکړې.

ولسمشر غني وویل حکومت يې په دې برخه کې هر ډول قربانۍ ته چمتو دی.

ولسمشر غنې دا خبرې په داسې حال کې کوي چې نوموړي درې اوونۍ وړاندې د کابل د پروسې په دوهمه غونډه کې طالبانو ته د سولې پیشنهاد وکړ.

ولسمشر غني په ننیو څرګندونو کې سږ کال د ولسي جرګې او ولسوالیو د شوراګانو د انتخاباتو پر کیدو هم ټینګار وکړ.

نور: جمعیت ګوند او ارګ موافقې ته رسېدلي

د بلخ مخکیني والي عطا محمد نور نن وویل چې د جمعیت اسلامي ګوند او حکومت تر منځ نوی هوکړه لیک به ژر اعلان شي.

ښاغلي نور په بلخ کې د نوروز په مناسبت په جوړو شویو مراسمو کې وویل چې د جمعیت ګوند او ارګ په ډېرو برخو کې د دغه ګوند د غوښتنو په اړه موافقې ته رسېدلي دي:

"زه له هغې موافقې چې په اساس یې د جمعیت اسلامي او د دې ګوند د متحدینو غوښتنې پر ځای کېږي هرکلی کوم، له جمهوري ریاست او د هغوی محترم مرکچي پلاوي څخه هم قدر داني کوم."

درې میاشتې مخکې د افغانستان جمهوري ریاست اعلان وکړ چې ولسمشر اشرف غني د بلخ د والي استعفی منلې ده.

ارګ ماڼۍ د بلخ لپاره محمد داود د نوي والي په توګه وټاکه خو عطا محمد نور دا پرېکړه ونه منله.

که څه هم محمد داود خپله دنده نه ده پیل کړې، خو شاوخوا لس ورځې مخکې یوې حکومتي سرچیني وویل چې د ولسي جرګې غړی او د عطامحمدنور یو نېږدې کس اسحاق رهګذر به په نېږدې راتلونکي کې د بلخ د نوي والي په توګه معرفي شي.

په کابل او بلخ کې د نوروز په مناسبت د جنډۍ اوچتولو مراسم روان دي

په کابل کې مزارشریف ښارونو کې د نوروز په مناسبت د جنډې اوچتولو مراسم روان دي.

هر کال په همدې مناسبت په مزارشریف ښار کې د حضرت علي په روضه کې د جنډې اوچتولو مراسم د زرګونو کسانو په ګډون ترسره کېږي.

په کابل کې هم چې د مزارشریف ښار په څېر کلک امنیت نیول شوی دی د جنډې پورته کولو مراسم په سخي زیارت کې روان دي.

په کابل کې په همدې مناسبت جوړو شویو مراسمو ته د کورنیو چارو وزارت مرستیال مراد علي مراد خبرې وکړې او د امنیت د نیولو ډاډ یې ورکړ.

هغه همدراز وسله والو مخالفینو ته خبرداری ورکړ که سوله ونه کړي وبه ځپل شي.

پاکستانۍ ملېشې بیا پر کونړ راکټي حملې کړي

د کونړ امنیتي مسؤلین وايي، په تېرو ۲۴ ساعتونو کې د پاکستان پوځ د کونړ پر خاوره د توپونو ۸۵ ګولۍ را ویشتلي دي.

د کونړ د امنیه قوماندانۍ ویاند فریدالله دهقان د چهار شنبې په ورځ ازادي راډیو ته وویل په تېرو ۲۴ ساعتونو کې د پاکستان پوځ په ناړۍ او دانګام ولسوالیو د تو پونو ۸۵ ډزې کړي چې په دانګام کې یو کور ویجاړ شوی او ۵ سره څاروي پکې وژل شوي دي.

دغه بریدونو له تېرو ۷ کالو په وقفه يي ډول دوام لري.

په سمنګان کې ټرافیکي پېښې څلور تنه مړه کړي

په سمنګان ولایت کې تېر ماښام څلور کسان په یوه ټرافیکي پېښه کې وژل شوي دي.

د سمنګان د امنیه قوماندانۍ ویاند منیر رحیمي ازادي راډیو ته وویل چې د کابل – مزار په لویه لار د سمنګان په څلور لاري کې یوه واړه موټر له باروړونکي موټر سره ټکر وکړ او دا څلور کسان پکې ووژل شول.

هغه وویل د پېښې علت د موټر چلوونکو بې احتیاطي وه او وژل شوي د واړه کرولا موټر سورلۍ وه.

د نوي کال د جشن د لمانځلو لپاره زرګونه افغانان مزارشریف ښار ته ځي چې له امله یې د کابل – مزار په لویه لار له حده زیات ګڼه ګوڼه وي.

چارواکو له دې مخکې خبرداری ورکړی چې په دې ورځو دې تر بل هر وخته د موټر چلولو پر مهال له احتیاط کار واخلي.

افغان کرکټ ټیم د اماراتو له ټیم څخه نننۍ لوبه وګټله

د افغانستان د کرکټ ملي ټیم د متحده عربي اماراتو له ټیم څخه نننۍ لوبه وګټله.

د افغانستان ټیم په ۳۵ اورونو کې د پنځو لوبغاړو په سوځېدو د ۱۷۸ منډو هدف چې د متحده عربي اماراتو ټیم ورته ټاکلی و، پوره کړ.

افغان توپ وهونکو ګلبدین نایب او نجیب‌الله ځدراڼ ښه لوبه وکړه، نایب ۷۴ او ځدراڼ ۶۳ منډې وکړې.

دا لوبې په زېمبابوې کې روانې دي او افغانستان په‌کې د شپږ غوره ټیمونو مرحلې ته لار موندلې ده.

د شپږ غوره ټیمونو په لومړۍ لوبه کې افغانستان وتوانېده چې وېسټ انډیز ته ماتې ورکړي.

د افغانستان د کرکټ ملي ټیم بله لوبه له ایرلنډ سره ده چې د جمعې په ورځ ترسره کېږي.

دا د ۲۰۱۹ میلادي کال کې د کرکټ د نړیوال جام لوبو ته د رسېدو سیالۍ دي چې ټاکل شوې د انګلستان په وېلز کې تر سره شي.

بلخ چارواکي: د نوروز جشن لپاره شدید امنیتي تدابیر نیول شوي

د بلخ امنیتي چارواکي د نوروز جشن لپاره په مزار شریف کې د شدیدو امنیتي تدابیرو خبر ورکوي.

د بلخ امنیه قوماندان سید کمال سادات نن په مزار شریف کې په یوه خبري غونډه کې وویل چې د امنیت د ټینګښت لپاره څلور زره امنیتي ځواکونه ګومارل شوي او هېڅ یوه چارواکي ته اجازه نه‌ورکول کېږي چې له وسلې سره د مزار شریف ښار ته داخل شي.

سادات دغه‌راز وویل چې د ښار په څنډو کې د تالاشۍ ګرځنده پوستو هم فعالیت پیل کړی او ټولې هغه لارې چې روضې ته غځېدلي د ټرافیکو پر مخ تړل شوې دي.

هر کال په زرګونه کسان د حضرت علي د جنډې د اوچتولو او نورو مراسمو لپاره مزار شریف ته ځي.

سبا د ۱۳۹۷ کال لومړۍ ورځ یا نوروز د بلخ په ګډون په ټولو ولایتونو کې د یو لړ مراسمو په ترڅ کې لمانځل کېږي.

د نوي کال په مناسبت د حکومت اجرائیه رئیس عبدالله عبدلله په یوه خپاره کړي پیغام کې د افغانستان ټولو خلکو ته د نوروز مبارکي ویلې او هیله‌یې څرګنده کړې چې نوی ۱۳۹۷ کال د افغانستان د ټولو خلکو لپاره د سولې او امن کال وي.

په کابل کې د امریکا سفیر جان بس هم ټولو افغانانو ته د نوي کال مبارکي ورکړې.

د افغانستان لپاره د ملګرو ملتونو ځانګړي استازي تدامیچي یاماموتو هم په یوه خپاره کړي پیغام کې هیله ښودلې چې نوی کال افغانانو ته چې له شخړو پرته او له هیلو ډکې یوې راتلونکې مستحق دي، سوله راوړي.

اروپایي اتحادیې د افغانانو په مشرۍ د سولې له پروسې ملاتړ وکړ

اروپایي اتحادیې د افغانانو په مشرۍ د سولې د پروسې ملاتړ وکړ او په دغه بهیر کې یې د مرکزي اسیا د هېوادونو ونډه مهمه وبلله.

د اروپایي اتحاديې د بهرني سیاست مشرې فدریکا موګرېني پرون د منځنۍ اسیا له هېوادونو سره د اروپایي اتحادیې د اړیکو په اړه ځانګړې شوې د اروپایي پارلمان غونډې ته وویل:

"موږ اروپایي اتحادیه او د مرکزي اسیا هېوادونه ګډې ګټې لرو چې د بېلګې په توګه د افغانانو په مشرۍ او د افغانانو په مالکیت د سولې د پروسې ملاتړ وکړو، ازبکستان به په ګډه د روانې مارچ میاشتې په پای کې د افغانستان په اړه د یوه سیمه‌ییز کنفرانس کوربه وي، دا زموږ د خپل امنیت لپاره هم مهم دی، زه به د افغانستان له حکومت، له خپلو د مرکزي اسیا له شریکانو او خپلو ټولو نړیوالو لوبغاړو سره په خپله په دې کنفرانس کې ګډون وکړم."

په تاشکند کې د افغانستان د سولې په اړه دغه کنفرانس په داسې حال کې جوړېږي چې د افغانستان د جګړې مهم لوري وسله‌والو طالبانو تر اوسه د افغانستان د حکومت د سولې وروستیو وړاندیزونو ته ځواب نه‌دی ویلی.

د ازبکستان په ګډون د منځنۍ اسیا هېوادونه دې ته اندېښنه لري چې په افغانستان کې د امنیت خرابوالی یې د خپلو هېوادونو پر امنیت ناوړه اغېز کوي.

رحیمي: په ورزشي ادارو کې به د پام وړ اصلاحات راشي

د افغانستان د بدني روزنې رئیس وايي، د حکومت رهبري د هېواد ورزش ته ځانګړې پاملرنه لري.

حفیظ ولي رحیمي نن د افغانستان د فوټبال فدراسیون له مسؤلینو سره د لیدنې پر مهال وویل چې ورزش د حکومت په کاري لومړیتوبونو کې ځای لري او غواړي چې په ورزشي ادارو کې د پام وړ اصلاحات راشي.

ښاغلي رحیمي ټولو ورزشي ادارو او لوبغاړو ته د هر راز همکارۍ او ملاتړ ډاډ ورکړ او د افغانستان د ورزش د ودې او پرمختګ لپاره‌یې د لازمو اقداماتو او هڅو خبره وکړه.

د بدني روزنې رياست د معلوماتو له مخې د افغانستان د المپیک ملي کمېټه چې اوس‌مهال د يوه سرپرست باور هوتک له‌خوا اداره کېږي، ډېر ژر به‌يې انتخابات ترسره شي.

د افغانستان او د اماراتو د کرکټ ټیمونو ترمنځ لوبه روانه ده

د افغانستان د کرکټ ملي ټیم نړیوال جام ته د لار موندنې په سیالیو کې نن د متحده عربي اماراتو سره د لوبې ډګر ته وتلی دی.

دا لوبې په زېمبابوې کې روانې دي او افغانستان په‌کې د شپږ غوره ټیمونو مرحلې ته لار موندلې ده.

د متحده عربي اماراتو ټیم اوس بېټنګ کوي.

متحده اماراتو په ۳۰م اور کې د پنځو لوبغاړو په سوځېدو ۸۶ منډې جوړې کړې دي.

د شپږ غوره ټیمونو په لومړۍ لوبه کې افغانستان وتوانېده چې وېسټ انډیز ته ماتې ورکړي.

تمه ده چې له متحده عربي اماراتو سره له لوبې وروسته به د افغانستان د کرکټ ملي ټیم له ایرلنډ سره لوبه ولري.

دا د ۲۰۱۹ میلادي کال د کرکټ د نړیوال جام لوبو ته د رسېدو سیالۍ دي چې ټاکل شوې د انګلستان په وېلز کې تر سره شي.

فاریاب: په خواجه سبزپوش او خان چهارباغ کې یو شمېر طالبان وژل شوي

د فاریاب چارواکي د دې ولایت په خواجه سبزپوش او خان چهارباغ ولسوالیو کې د یو شمېر وسله‌والو طالبانو د وژل کېدو او نیول کېدو خبر ورکوي.

د فاریاب امنیه قوماندان عبدالکریم یورش ازادي راډیو ته وویل، درې وسله‌وال طالبان پرون دوشنبه د ورځې ناوخته په خواجه سبزپوش کې د پولیسو او د ولسي پاڅون کوونکو په کمین کې ووژل شول او دوه تنه‌یې ټپیان شول.

د یورش په وینا د پولیسو په یوه بل کمین کې د دې ولایت په خان چهارباغ ولسوالۍ کې څلور وسله‌وال طالبان ونیول شول چې د ملا محمد صالح په نوم د هغوی سرګروپ هم په‌کې شامل دی.

د امنیه قوماندان په خبره دغو وسله‌والو غوښتل چې له جوزجانه خپل ټپیان د دې ولسوالۍ لور ته ولېږدوي.

وسله‌والو طالبانو تر اوسه په دې اړه څه نه‌دي ویلي.

دفاع وزارت کابل ته د جوزف ډانفورد سفر ګټور بولي

د افغانستان دفاع وزارت کابل ته د امریکا د لوی درستیز سفر د ترهګرۍ پر وړاندې د مبارزې په برخه کې ګټور بولي.

د دغه وزارت ویاند جنرال دولت وزیري نن ازادي راډیو ته وویل چې جنرال جوزف ډانفورد به د دفاع له وزیر سره د افغان ځواکونو د پرمختګونو او ستونزو په اړه هم خبرې وکړي.

د امریکا د ټولو ځواکونو لوی درستیز جنرال جوزف ډانفورد تېره ورځ کابل ته راغی.

ډانفورد افغانستان ته په لاره په الوتکه کې له ده سره ملګرو خبریالانو ته وویل چې غواړي هغه اهداف چې په راتلونکو څو میاشتو کې د امریکا په مشرۍ ائتلاف څرنګه کولای شي په جګړه کې پرمختګ وکړي وارزوي.

دا په داسې حال کې ده چې تر دې وړاندې دفاع وزارت ویلي چې د حمل د میاشتې په لومړۍ نېټه به په ټول افغانستان کې پراخ عملیات پیل کړي.

په بامیانو کې پر ۱۰۸۰ مېرمنو د حرفوي زده‌کړو وسایل ووېشل شول

په بامیانو کې له زرو زیاتو ښځو ته چې د سواد او حرفوي زده‌کړو له کورسونو فارغې شوي، حرفوي وسایل ووېشل شول.

دغه وسایل د بامیانو د سواد د زده‌کړې د مدیریت له‌خوا پر دغو بې‌وزلو ښځو ووېشل شول.

د دې ادارې مدیر صادق فرهنګ ازادي راډیو ته د دغو وسایلو په اړه وویل:

"د دوی ۱۰۸۰ ښځې د حرفې په ګډون د سواد د زده‌کړې په کورسونو کې شاملې شوې وې چې د خیاطۍ، د لبنیاتو پروسس، د مچیو او چرګانو د فارمونو عملي چارې یې زده کړي او ورته نن دغه وسایل ووېشل شول."

د ښاغلي فرهنګ په وینا اداره‌یې هڅه کوي چې ښځې د سواد او حرفوي زده‌کړو له لارې خپلې اقتصادي ستونزې هوارې کړي.

په ننګرهار کې د زیتون او مالټو د باغونو محصولات ۳۳۳۴ ټنو ته رسېږي

د ننګرهار ولایت د زیتون او مالټو د باغونو محصولات سږ کال ۳۳۳۴ ټنه ته رسېږي.

د ننګرهار ولایت مطبوعاتي دفتر په یوه بیان کې ویلي چې د کانال اړوند باغونو څخه سږ کال ۸۳۴ ټنه زيتون او همداراز د کانال او کرنې رياستونو په ګډون له خصوصي باغونو څخه ۲۵۰۰ ټنه مالټې ترلاسه شوې دي.

بیان زیاتوي چې له دې زيتونو څخه ۶۰ زره لیټره تېل او زرګونه لیټره اچار توليد شوي دي.

همداراز کرنې او کانال رياستونو په دې ولايت کې ۲۲۰۰ جريبه ځمکه کې د سترسو نوي باغونه جوړ کړي دي او زرګونه جريبه کې یې پخواني باغونه احيا کړي دي.

د افغانستان د کرکټ ملي ټیم نن له متحده عربي اماراتو سره سیالي کوي

ټاکل شوې ده چې د افغانستان د کرکټ ملي ټیم نړیوال جام ته د لار موندنې په سیالیو کې نن له متحده عربي اماراتو سره د لوبې ډګر ته ووځي.

دا لوبې په زېمبابوې کې روانې دي او افغانستان په‌کې د شپږو غوره ټیمونو مرحلې ته لار موندلې ده.

د شپږو غوره ټیمونو په لومړۍ لوبه کې افغانستان وتوانېده چې وېسټ انډیز ته ماته ورکړي.

تمه ده چې له متحده عربي اماراتو سره له لوبې وروسته به د افغانستان د کرکټ ملي ټیم له ایرلنډ سره لوبه ولري.

دا د ۲۰۱۹ میلادي کال د کرکټ د نړیوال جام لوبو ته د رسېدو سیالۍ دي چې ټاکل شوې، د انګلستان په وېلز کې تر سره شي.

نور راوښيه

XS
SM
MD
LG