د لاسرسۍ وړ لېنکونه

تازه خبر
چهارشنبه ۲ سلواغه ۱۳۹۸ کابل ۰۶:۲۶

افغانستان

مزارشریف: د ګل سرخ په نامه د نجونو د بایسکل چلونې سیالي وشوه

تیره ورځ په مزارشریف ښار کې د ګل سرخ په نامه د نجونو د بایسکل چلونې سیالي ترسره شوه.

د بایسکل چلونې د فدراسیون مشر عبدالصادق صادقي ازادي راډیو ته وویل چې په دغه سیالي کې د بلخ، پروان او کابل ښار څخه ۱۲ نجونو ګډون کړی وه.

د ښاغلي صادقي په خبره د دغې سیالي لومړی، دوهم او دریم مقام ګټونکی ته نقدي جایزې هم ورکول شوي.

د افغان فوټبال ملي لوبډله به د چاپان له ملي ټیم سره سیالي وکړي

ټاکل شوې ده چې د افغانستان د فوټبال ملي ټیم د چهارشنبې په ورځ د چاپان له ملي ټیم سره سیالي وکړي.

د فوټبال فدراسیون د مطبوعاتو مسول ازادي راډیو ته وویل چې دغه سیالۍ به د حمل په څلورمه د جاپان له ملي ټیم سره ترسره شي.

د یادونې وړ ده چې دغه سیالي به د چاپان په سایتاما سټیډیم کې ترسره شي.


الکوزی: د افغانستان واردات پنځه میلیاردو ډالرو ته راټیټ شوي

د افغانستان د سوداګرۍ خونه وايي، په ۱۳۹۴ کې د افغانستان واردات په بازارونو کې د تقاضا د کمښت له کبله له اوو میلیاردو ډالرو څخه پنځه میلیاردو ډالرو ته راټیټ شوي دي.

د سوداګرۍ خونې مرستیال خان جان الکوزی وايي، څلور نوویم کال د افغانستان د سوداګرو لپاره هېڅ ښه کال نه وو او په ورته وخت کې حکومت هم د اداري فساد، امنیت او افغان سوداګرو ته د سهولتونو د برابرولو په برخه کې خپلې ژمنې عملي نه کړي.

ښاغلی الکوزی وايي، له همدې کبله په کم ساری توګه په افغانستان شاوخوا د ۳۰سلنه پانګونه په څلور نوویم کال کې کمه شوه.

نوموړي له ازادي راډیو سره په خبرو کې وویل، له تېرو دوه کلونو تردې دمه له افغانستان نه پانګه د تیښتې په حال کې ده او که وضعیت همداسې دوام وکړي له هېواده به د پانګو د ویستلو لړۍ چټکه شي.

ماليي وزارت په ګمرکونو کې بنسټیز اصلاحات راوستي

د افغانستان د مالیې وزارت مسولین وایي چې د هېواد په ګمرکونو کې یې بنسټیز اصلاحات راوستي دي.

د دغه وزارت ویاند اجمل عبدالرحیمزي د ۱۳۹۴ کال د پروګرامونو د تشریح په غونډه کې وویل چې د افغانستان په ګمرکونو کې یې په نوي ټکنالوجۍ سمبال وسایل لګولي چې د عوایدو په ډېریدو او د فساد په له مځه وړلو کې به ګټور تمام شي.

د ښآغلي عبدالرحمیزي په خبره مخکې تردې یو شمېر کسانو په دغه وزارت کې د فساد له موجودیته شکایت کاوه.

رستمي: د کرنې د پرمختګ لپاره ګټور پروګرامونه عملي شوي

د افغانستان د کلیو او پراختیا وزارت مسولین وایي چې د کرنې د پرمختګ لپاره یې ګټور پروګرامونه عملي کړي.

د دغه وزارت ویاند اکبر رستمي د ۱۳۹۴ کال د پروګرامونو د تشرح کولو په مراسمو کې وویل چې د کرنې د پراختیا په اړه یې تیره اوونۍ د ۶۷ کانالونو بیا رغونه او پاکول پیل کړي دي.

د ښاغلي رستمي په خبره دغه کانالونه به په پروان، لوګر او کابل ولایتونو کې پاک او بیا ورغول شي.

مجاهد:اسلامي حزب سره د سولې خبرې به طالبان هم وهڅوي

د سولې عالي شورا وايي، د ګلبدین حکمتیارپه مشرۍ اسلامي حزب سره د سولې خبرې به طالبان هم په دې پروسه کې شاملیدو ته وهڅوي.

د دې شورا ویاند مولوي شهزاده شاهد ازادي راډیو ته وویل چې که څه هم حزب اسلامي او حکومت ترمنځ خبرې پر طلبانو کوم مستقیم اغیز نه لري خو دا یو هڅونکی اقدام دی.

د افغان حکومت او د حکمتیار په مشرۍ اسلامي حزب ترمنځ د سولې خبرې تیره پنجشنبه په رسمي ډول په کابل کې پیل شوې.

بل لورته طالبانو له افغان حکومت سره خبرې کول رد کړي او له دې ډلې سره د سولې د هڅو برخلیک لا روښانه نه دی.

افغان کرکټ لوبډله نن یکشنبې له جنوبي افریقا سره مخامخ کیږي

د افغانستان د کرکټ ملي ټیم نن د شل اوریز نړېوال جام په سیالیو کې له جنوبي افریقا سره مخامخ کیږي.

دا لوبه د هند د ممبي ښار د کرکټ په نړېوال لوبغالي کې ترسره کیږي.

که څه هم جنوبي افریقا د نړۍ له پیاوړو ټیمونو څخه ده خو افغان لوبغاړي او د ټیم روزونکي وايي، دوي د دې سیالۍ لپاره پوره چمتوالی لري.

افغانستان د شل اوریز نړېوال جام د لسو غوره ټیمونو په سیالیو کې خپله لومړی لوبه سري لنکا ته بایللې ده.

افغانستان له انګلستان او ویست انډیز سره هم مسابقې لري.

ولسمشرغني: افغانستان به په نوي کال کې بې ساري بریښنا تولید کړي

ولسمشراشرف غني وايي، افغانستان به په نوي لمریز کال کې دومره بریښنا تولید کړي چې په تیرو سلو کې يې ساری نه وي.

د افغانستان جمهور رئیس دا خبره د نوروز په مناسبت خپله وینا کې وکړه.

ښاغلي غني دا هم وویل چې په لویدیځ کې له ایران او په جنوب کې به له پاکستان سره د اورګاډۍ پټلی جوړې شي او زیات شمیر ولایتونو به د لویو اقتصادي پروژو شاهد وي.

محمد اشرف غني وویل، تېرکال افغان حکومت له اقتصادي بحران سره مقابله وکړه او ولس به په نوي کال کې ددې مقابلې ثمره وویني.

د ننګرهار په ښیوه کې ۱۰تنه مشکوک بهرنیان نیول شوي

د ننګرهار په ښیوې ولسوالۍ کې لس تنه مشکوک بهرنیان نیول شوي دي.

د ننګرهار د والي ویاند عطا الله خوګیاڼي ازادي راډیو ته وویل، دا کسان د جمعې په ورځ پر یوه کور د امنیتي ځوړاکونو په چاپه کې نیول شوي دي.

خوګیاڼي وویل، له نیول شوو کسانو څخه پلټنه روانه ده خو نوموړي د هغوي د هویت او دا چې څه فعالیت يې کاوه، جزئیات نه دي ورکړي.

په همدې حال کې د سیمې یوې باوري سرچیني ازادي راډیو ته ویلي چې په نیول شوو کسانو کې ۷ تاجک او درې روسي اتباع دي.

اخوا بیا ملي امنیت وايي چې په کابل کې يې د حقاني شبکې درې غړي چې غوښتل يې ځانوژونکې بریدونه وکړي نیولي دي.

شېرزاد: په نوي کال کې د داعش ځپلو ته لازم تدابیر لرو

د ننګرهار امنیتي چارواکي وايي چې په نوې کال کې د داعش ډلې په وړاندې لازم تدابیر لري.

د ننګرهار امنیه قوماندان فضل احمد شېرزاد نن ازادي راډیو ته وویل چې په ۱۳۹۴ کال کې له داعش ډلې سره تړلې نېږدې دوو زرو جنګیالیو ته تلفات اوښتی دی:

"د کورنیو چارو وزارت موږ ته زیات سیمه ییز پولیس منظور کړي چې بشپړ تجهیزات لري، د نازیانو په سیمه کې مو نېږدې زر پاڅون کوونکي ځای پرځای کړي دي."

په ورته وخت کې د ننګرهار خلک هیله لري چې راتلونکي کال به حکومت د داعش په وړاندې کوټلي ګامونه واخلي.

اوچقون: د جګړې دوام د مخالفینو په ګټه نه دی

د افغانستان د سولې عالي شورا وايي، پاکستان باید له پخوانیو ژمنو سره سم وسله وال طالبان له افغان حکومت سره د سولې مخامخ خبرو ته حاضر کړي.

د دغې شورا مرستیال عبدالخبیر اوچقون نن ازادي راډیو ته وویل چې په افغانستان کې د جګړې دوام د وسله والو مخالفینو په ګټه نه دی:

"دا اوس په اسلام باد پورې اړه لري هغه کسان چې د سولې له پروسې سره نه یوځای کېږي، باید ورباندې فشار راوړي، پاکستان په ټولو څلور اړخیزو غونډو کې ژمنې کړې چې باید خپلو ژمنو ته صادق پاتې شي."

دا په داسې حال کې ده چې وسله والو طالبانو د جمعې په ورځ د یوې اعلامیې په خپرولو سره په افغانستان کی یوځل بیا پر جګړې ټینګار کړی او له خپلو پلویانو یې غوښتي چې د دوی په وړاندې د تبلیغاتو پروا ونه کړي.

مشرانو جرګې د حکومت او حکمتیار د سولې خبرو هر کلی وکړ

د افغانستان مشرانو جرګه د افغان حکومت او د حکمتیار په مشرۍ د حزب اسلامي ترمنځ د سولې له پیل شویو خبرو هرکلی کوي.

د دغې جرګې رییس فضل الهادي مسلمیار نن په یوه خبري غونډه کې هیله څرګنده کړه چې دغه خبرې به د سولې راتګ زمینه برابره کړي:

"حکمتیار د افغانستان یو له جهادي مشرانو څخه دی، پنځلس کاله کېږي چې د افغان حکومت په وړاندې وسله واله مبارزه کوي، دا چې د دوی پلاوی کابل ته راغلی، موږ ورته هیله من یو چې ښه پيغام به ولري."

ښاغلي مسلمیار همدارنګه له وسله والو مخالفینو هم وغوښتل چې له افغان حکومت سره د سولې خبرو ته کېني.

دا په داسې حال کې ده چې د افغان حکومت او د حکمتیار په مشرۍ د حزب اسلامي استازو ترمنځ له تېرې پنجشنبې راهسې په کابل کې د سولې پيل شوې دي.

په بغلان کې د یوې ۱۳کلنې نجلۍ جسد پیدا شوی

د بغلان سیمه ییز چارواکي وايي چې نن سهار یې په نهرین ولسوالۍ کې د یوې ۱۳ کلنۍ انجلۍ جسد موندلی دی.

د نهرین ولسوال عبدالفتاح عاطف ازادي راډیو ته وویل دغه انجلۍ چې کوژده کړې وه، د نامعلومو وسله والو له لوري لومړی تښتول شوی، بیا جنسي تېری پرې شوی او وروسته یې په ډزو وژلې ده.

ښاغلی عاطف وايي، په دې اړه څېړنې روانې دي، خو تراوسه څوک نیول شوي نه دي.

د وژل شوې انجلۍ پلار له ازادي راډيو سره په خبرو کې له سیمه ییزو چارواکو وغوښتل چې د لور قضیه دې وڅېړې او عدالت دې تامین شي.

افغان کډوالو اروپا ته له ځان سره ۲ میلیارډه ډالر ایستلي

د افغانستان بانک مسوولین وایي چې اروپا ته د افغانونو له کډوالۍ سره له دغه هېواده دوه میلیارډه ډالر وړل شوي دي.

د افغانستان بانک د رسنیو مسؤل ایمل عاشور ازادي راډیو ته وویل چې د کډوالۍ دغه بهیر د دې لامل شوی چې د شتمنۍ یوه لویه برخه له افغانستان څخه ووځي، د هېواد په بازارونو کې د ډالرو بیه لوړه شي او د کارځواک کم شي.

د راپورونو له مخې په تېر کال کې شاوخوا دوه نیم لکه افغانان اروپا ته په غیر قانوني لارو تللي چې هریوه یي ۱۰ زره ډالره قاچقبر ته ورکړي دي.

د سلما بند امتحاني چارې په بریالیتوب سره پیل شوې

د افغانستان د اوبو او انرژۍ وزارت چارواکي وایي چې په هرات کې د سلما بند ازمایشي کار په بریالیتوب سره پيل شو.

د دغه وزارت ویاند عبدالبصیر عظیمي ازادي راډیو ته وویل چې د سلما بند د اوبو کاسه اوسمهال په مناسبه اندازه اوبه لري او د دغه بند څو توربینونو په ازمایشي توګه فعالیت پيل کړي دی.

دی وایي چې تر راتلونکو دوو میاشتو پورې به د سلما بند د اوبو کاسه په بشپړه توګه ډکه شي او د برېښنا تولید ته به چمتوشي:

"له نیکه مرغه د اوبو سطح مناسبې اندازې ته رسېدلې ده او موږ په ازمایشي توګه څو توربینونه فعاله کړل ترڅو معلومه شي چې د میکانیزم او هایدرو میخانیکي کارنو له پلوه دغه توربینونه مناسب فعالیت لري که نه چې الحمدالله دغه ازمایش هم په سمه توګه ترسره شو."

د سلمان بند چې په دې وروستیو کې د افغان هند د دوستي د بند په نوم یاد شوی ۴۲ میګاواټه برېښنا تولیدوي د صنعتي پارکونو تر څنګ به شاوخوا ۴۲زره کورنیو ته هم برېښنا ورکړي او ۷۵ زره هکتاره ځمکه به خړوبه کړي.

نور راوښيه

XS
SM
MD
LG