د لاسرسۍ وړ لېنکونه

تازه خبر
سه شنبه ۸ سلواغه ۱۳۹۸ کابل ۰۸:۲۴

افغانستان

ننګرهار: کمانډو ځواکونو په ځانګړو عملیاتو کې یو طالب قومندان نیولی

په ننګرهار ولایت کې کمانډو ځواکونو په ځانګړو عملیاتو کې یو طالب قومندان نیولی دی.

د کمانډو ځواکونو لومړی لوا مطبوعاتي مسول احمدجاوید سلیم ازادۍ راډیو ته ویلي،چې د دوی خاصو ځواکونو تېره شپه په خوګياڼو ولسوالۍ کې ځانګړي عملیات ترسره کړي،چې په پایله کې د دولت د مخالفینو یو تن مهم قومندان نیولی او قضايي ارګانونو ته سپارلی دی.

نوموړی وايي دوی د تېرې شپې په جریان کې د کابل په سروبي او میدان وردګ ولایت کې هم عملیات ترسره کړي،چې په پایله کې یو شمېر مهمات او چاودیدونکي توکي يې نيولي دي.

وسله والو طالبانو د یادو عملیاتو په اړه تر اوسه رسنیو ته څه نه دي ویلي.

ننګرهار: په یوه وسله وال برید کې څلور تنه قومي مشران وژل شوي او دوه ټپیان دي

په ننګرهار ولایت کې په یوه وسله وال برید کې څلور تنه قومي مشران وژل شوي او دوه نور ټپیان دي.

د هسکې مینې ولسوالۍ یو شمېر اوسیدونکو ازادۍ راډیو ته ویلي، د دې ولسوالۍ د حسن خیلو قوم پر یوه ډله قومي مشرانو هغه مهال وسله وال برید وشو،چې د ټاکنو کمیسیون د یوه تن کارکوونکي د راخلاصولو وروسته کور ته په لاره وو.

دغو قومي مشرانو د انتخاباتو د کميسیون د هغو څلور تنو کارکوونکو د راخوشې کیدو هڅې پيل کړې وې،چې څه موده وړاندې ددې ولسوالۍ په مریز کنډاو کې وسله والو طالبانو له ځانه سره بوتلي ول.

د سیمې خلک وايي،ددغو قومي مشرانو د هڅو وروسته د پنجشنبې په ورځ طالبانو ورسره یو تن پريښی وو، چې د راستنېدو په حال کې تېر ماښام شاوخوا اووه نیمې بجې د مریز کنډاو په سیمه کې یو شمېر وسله والو پرې ډزې وکړې او د انتخاباتو کمیسیون د کارمند په ګډون څلور تنه ځای پرځای ووژل شول او دوه تنه نور زخميان دي.

د ویلو ده،چې په برید کې ښکار شوي خلک د حسن خیلو د قوم پيژندل شوې څېرې دي.

ددې برید مسولیت تر اوسه کومې وسله والې ډلې په غاړه نه دی اخیستی.

نن چې د نوي لمريز کال لومړۍ ورځ ده، د ازادۍ راډيو د ١٣٩٢ل کال شخصيت اعلانېږي

نن چې د نوي لمريز کال لومړۍ ورځ ده، د ازادۍ راډيو د ١٣٩٢ل کال شخصيت اعلانېږي.

ټاکل شوې د ازادۍ راديو د کال شخصيت د سهار د لسو بجو په خپرونه کې اعلان شي.

ازادي راډيو هر کال يو تن، چې غوره ټولنيز خدمتونه يې کړي، د کال د شخصيت په توګه اعلانوي.

د کال د شخصيت په اړه نور معلومات زموږ پر انټرنټي پاڼه هم لوستلاى شئ، چې پته يې ده: ازادي راډيو ډاټ کام

حامد کرزي هيله وښوده، چې افغانستان به بريالي انتخابات ترسره کړي

افغان ولسمشرحامد کرزي هيله وښوده چې افغانستان به بريالي انتخابات ترسره کړي او دغه انتخابات به د سولې او ثبات د ټينګښت سبب شي.

ولسمشر حامد کرزي د نوروز په مناسبت خلکو ته د مبارکۍ په پيغام کې دغه راز له خلکو غوښتي چې په راتلونکو انتخاباتو کې ګډون وکړي او د خپلې خوښې کانديد وټاکي.

ټاکل شوي د ولسمشرۍ او ولايتي شوراګانو اتخابات شاوخوا دوې اوونۍ وروسته ترسره شي.

کرکټ بورډ ملي ټيم او د کرکټ بورډ په اداره کې ځينې بدلونونه راولي

د افغانستان د کرکټ بورډ وايي په نژدې راتلونکي کې به په ملي ټيم او د کرکټ بورډ په اداره کې ځينې بدلونونه راولي.

د کرکټ بورډ اجرائيه رئيس نور محمد مراد ازادۍ راډيو ته وويل چې دا به مثبت بدلونونه وي:

”کله به هم د احساساتو له مخې بدلون رانه ولو- نه يې پلوي يو. پرځاى بدلون به راځي چې نړيوال به هم ترې خبر وي. ځينې اداري بدلونونه هم په پام کې دي. نه غواړم پر ټولو بحث وکړم، خو دا به پر دلايلو ولاړ تغييرات وي“

د کرکټ بورډ چارواکي په داسې حال کې د بدلونونو خبره کوي، چې افغانستان ونه توانېد له نيپال څخه پرونۍ نړيواله شل اووره مسابقه وګټي.

په پرونۍ مسابقه کې پچه افغانستان وګټله او نيپال ته يې بلنه ورکړه، چې لوبه پيل کړي. نيپال د ٥ لوبغاړو په سوځېدو سره ١٤١ منډې وکړې او افغانستان ته يې د ١٤٢ منډو هدف وټاکه. افغانستان ونه توانېد هدف پوره کړي. د ٨ لوبغاړو په سوځېدو سره يې يوازې ١٣٢ مندې وکړې.

افغانستان تر دې مخکې له هانګ هانګ څخه مسابقه ګټلې وه.

حامد کرزي د ننګرهار په مرکز جلال اباد کې د پرون ورځې حمله وغندله

ولسمشر حامد کرزي د ننګرهار په مرکز جلال اباد کې د پرون ورځې حمله وغندله.

پرون سهار اوو ځانمرګو بريدکوونکو د جلال اباد پر لومړۍ حوزه ډله ييز بريد وکړ، چې په نتيجه کې يې يو ملکي کس او ١٠ تنه پوليس ووژل شول او ٢٥ تنه نور ټپيان شول.

د جمهوري رياست په مطبوعاتي اعلاميه کې ولسمشر حامد کرزي دغه بريد د پرديو مزدورانو کار بللى دى.

ښاغلي کرزي ويلي چې دغه ډول ناوړه اعمال نه شي کولاى د افغانستان د پرمختګ مخه ونيسي.

د پروني بريد مسووليت وسلوالو طالبانو منلى دى.

تېر کال په نړۍ کې د افغانانو د کډوالۍ شمېر د وړم کال په پرتله کم و

تېر کال په نړۍ کې د افغانانو د کډوالۍ شمېر د وړم کال په پرتله کم و.

د کډوالو په چارو کې د ملګرو ملتونو عالي کمشنرۍ په يوه راپور کې نن جمعه يې خپور کړى ويلي، تېر کال تر ٣٨زره او ٦٠٠ زيات افغانان د نړۍ بېلابېلو هېوادونو ته کډوال شوي، حال دا چې وړم کال دغه شمېر تر ٤٧زور او ٥٠٠ زيات و.

د ملګرو ملتونو راپور وايي، د افغانستان، روسيې او سوريې اتباع په نړۍ کې د کډوالو زيات شمېر جوړوي.

خو دا لومړى ځل دى چې تر افغانانو د سوريې د کډوالو شمېر زيات شوى دى.

افغان پوليس وايي، په سرینا هوټل څلور حمله کوونکي وسلوال طالبان ووژل شول

افغان پوليس وايي، امنيتي ځواکونو څلور وسلوال طالبان چې د کابل په سرينا هوټل کې يې حمله پيل کړې وه، ووژل.

د کورنيو چارو وزارت وياند صديق صديقي وويل، درې ټپيان روغتون ته انتقال شوي، چې دوه په کې امنيتي ساتونکي او بل يې د هوټل بهرنى کارکوونکى و.

ويل کېږي په هوټل کې دېره نورو کسانو ته زيان نه دى اوښتى.

د طالبانو وياند ذبيح الله مجاهد چې د حملې مسووليت يې منلى وايي، په بريد کې يې په هوټل کې دېره ګڼ بهرني او افغان اتباع وژلي، چې د نوروز د جشن لپاره راغونډ شوي وو.

سرينا د کابل په زړه کې يو له خوندي هوټلونو ګڼل کېږي.

افغان حکومت سبا او بل سبا په ټول افغانستان کې عمومي رخصتي اعلان کړې

افغان حکومت سبا او بل سبا ته چې د نوروز او د بزګر له ورځو سره برابریږي، په ټول افغانستان کې عمومي رخصتي اعلان کړې.

د کار او ټولنیزو چارو وزارت په یوې اعلامیې کې راغلي، چې په دې اړه د وزیرانو د شورا له خوا پریکړه شوې ده.

په همدې حال کې د کابل امنیه قومندانۍ وایې، چې د نوروز د ورځې لپاره یې په کابل کې کلک امنیتي تدابیر نیولي دي.
دغه راز ټاکل شوې ده د نوروز نړیوال جشن د حمل یا اوري په اوومه نیټه د کابل په پغمان ولسوالۍ کې د لسګونه هیوادونو څخه د میلمنو او مشرانو په ګډون ولمانځل شي.

دادرس: له باګرام زندانه ۵۵ نوربندیان هم خوشې شول

د بګرام زندان د زندانیانو د دوسیو د څیړلو کمیټه وایي، له دې زندانه یې ۵۵ نوربندیان هم خوشې کړل.

د دې کمیټې غړي عبدالشکور دادرس نن په یوه خبرې کنفرانس کې وویل، د دې پنځه پنځوس کسانو له ډلې څخه ۴۰ تنه يې په هلمند کې د بریتانوي ځواکونو لخوا زنداني شوي وو.

نوموړي وویل، چې د دې زندان اکثره بندیان له څو کلونو راهیسي له کره شواهدو پرته په ناحقه په زندان کې پراته وو.

خوامریکایی چارواکو له مخکې نه ویلي چې په دې زندانیانوکې یوشمیر یې ډیرخطرناکه دي چې باید نه وای آزاد شوي.

د افغانستان او نیپال ترمنځ د کرکټ شل اووره سیالۍ پيل شوه

د افغانستان او نیپال ترمنځ د کرکټ شل اووره سیالۍ پيل شوه.

په دې لوبه کې ټاس یا پچه افغانستان وګټله او د بالینګ کولو پریکړه یې وکړه.

افغانستان په الف ګروپ کې تردې دمه د بنګله دیش په وړاندې یوه لوبه و بایلله، خو هانګ کانګ ته یې ماته ورکړه.

نیپال هم چې په الف ګروپ کې شامل دی یوه لوبه ګټلې او بله یې بایللې ده.

د نن ورځې بله لوبه د بنګله دیش او هانګ کانګ تر منځ ده.

کابل: په تیرو څو اونیو کې ۲۱ کسان د بېلابېلو جرایمو په تور نیول شوي دي

د کابل امنیه قومندانۍ وایې، په تیرو څو اونیو کې یوویشت کسان په کابل کې د بېلابېلو جرایمو په تور نیول شوي دي.

د کابل د امنیه قومندانۍ له جنایې جرمونو سره د مبارزې رییس ګل اغا هاشمي نن په یوې خبري غونډي کې وویل، چې دا کسان د غلا، وژنې او نورو جرمنو کې د لاس لرلو په خاطر نیول شوي دي.

ښاغلی هاشمي وایې، چې د کابل امنیه قومندانۍ د نوروز د جشن لپاره هم کلک امنیتي تدابیر نیولي دي.

وقاد: د سولې شورا د اجراییه هییت ترمنځ د همږغۍ نه موجودیت یو لړستونزې جوړې کړي

د افغانستان د سولې د عالي شورا یو شمېر غړي وایي، د دې شورا د اجراییه هییت ترمنځ د همږغۍ نه موجودیت یو لړ ستونزې جوړې کړي دي.

د یادې شورا د اجرایوي کمیټې غړي محمد امین وقاد نن ازادۍ راډیو ته وویل، چې د ناسم مدیریت په خاطر د سولې بهیر سمه نتیجه هم نه ده ورکړې.

نوموړی وایې، چې له همدې امله په تیرو څو کلونو کې له وسله والو مخالفینو سره د سولې د عالي شورا خبرو پرمختګ نه دی کړی.

د سولې د عالي شورا له خوا په یوه بل خبر کې راغلي، چې د دې شورا یو لوړ پوړی پلاوی ترکمستان ته تللی و او هلته یې د سولې د بهیر په اړه د ترکمنستان له ولسمشر او نورو چارواکو سره کتلي.

د سولې د عالي شورا له خوا په دې تړاو په یوې اعلامیې کې راغلي، چې ترکمنستان د افغانستان د سولې له بهیر سره د همکارۍ او په دې برخه کې د عملي ګامونو د پورته کولو لپاره چمتوالی ښودلی دی.

د بلخ د مستوفیت عواید د تیرکال په مقایسه لس فیصده کم شوي

د بلخ د مستوفیت عواید د تیرکال په مقایسه لس فیصده کم شوي دي.

د بلخ مستوفي محمد اسحق سروري نن آزادی راډيو ته وویل، چې تیره کال د یاد مستوفیت عواید درې سوه میلیونه افغانۍ و، خو سږ کال دا اندازه دوه نیم سوه میلیونه افغانیو ته راکم شوي دي.

نوموړي پانګونې ته د سوداګرو بې علاقه ګي، له حیرتان بندر څخه د صادراتو او وارداتو کموالۍ او د ۲۰۱۴ میلادي کال په اړه منفي تبلیغات د بلخ د مستوفیت په عوایدو کې د کموالي اساسي عوامل و بلل.

د سولې شورا: ترکمنستان له افغان سولې سره د هر اړخیزې همکارۍ چمتوالی ښودلی دی

د سولې عالي شورا وایي، ترکمنستان د افغانستان د سولې له پروسې سره هر اړخیزې همکارۍ او په دې برخه کې د عملي اقدامو د ترسره کولو لپاره چمتوالی ښودلی دی.

د سولې د عالي شورا له خوا په یوې مطبوعاتي اعلامیې کې راغلي، چې په دې اړه د یادې شورا د یوه لوړ پوړي پلاوي او د ترکمنستان د چارواکو ترمنځ په کتنه کې موافقه شوې ده.

اعلامیه زیاتوي، چې د کب له ۲۶ نه تر ۲۸ پورې د صلاح الدین رباني په مشرۍ د سولې د عالي شورا یوه پلاوي ترکمنستان ته سفر درلود او هلته یې د دې هېواد له ولسمشر قربانګلي بیردي محمدوف او ځينو نورو چارواکو سره لیدلي دي.

ترکمنستان تردې مخکې هم د افغان حکومت او وسله والو مخالفینو ترمنځ د سولې د خبرو د کوربه توب لپاره چمتووالی ښودلی و.

نور راوښيه

XS
SM
MD
LG