د لاسرسۍ وړ لېنکونه

تازه خبر
سه شنبه ۸ سلواغه ۱۳۹۸ کابل ۰۸:۱۲

افغانستان

حامد کرزي د ایتلافي ځواکونو د دې اعلان هرکلۍ وکړ، چې د میدان وردک له ولایته وتلو ته تیار دي

ولسمشر حامد کرزي د ایتلافي ځواکونو د دې اعلان هرکلۍ وکړ، چې د میدان وردک له ولایته وتلو ته تیار دي.

له میدان وردکه د ځانګړیو امریکایي ځواکونو د وتلو پریکړه وروسته تر دې وشوه، چې سیمه ییزو د امریکا له سپیشل فورس یا ځانګړیو ځواکونو څخه بیا بیا شکایت وکړ او په دې پسې د افغانستان د ملي امنیت شورا او ولسمشر کرزي امر وکړ، چې ځانګړي امریکایي ځواکونه دې له دغه ولایته ووځي.

د ولسمشرۍ ماڼۍ په خپره کړې اعلامیه کې نن څرګنده کړه، چې ځانګړي ځواکونه دې ته چمتو شوې دي چې له میدان ودرکه ووځي.

تمه ده، چې دغه بهیر د نرخ له ولسوالۍ پیل شي او د هغوي ځای به افغان ځواکونه ونیسي.

ولسمشرکرزي د نوي کال په مناسبت په خپلې راډيويي وینا کې بیا پر طالبانو د سولې غږ وکړ

د افغانستان ولسمشرحامد کرزي د نوي کال په مناسبت په خپله راډیویي وینا کې طالبانو ته د ورور خطاب وکړ او ویې ویل:

(پر طالبانو پر هغو چې افغانان دي، مسلمانان دي او د دې خاورې دي او ځانونه د دې خاورې ګڼي د ورور خطاب کوم او ورته وایم، چې هغه ټوپک چې په اوږه دې دي او بهرنی دی هغه لرې کړه او د اسلام لپاره او د دې خاورې د پرمختګ لپاره له خپلو افغانانو سره یوځای شه.)

د نوروز په مناسبت د ولسمشر کرزي پیغام د راډیو له لارې خپور شو او حامد کرزي په دې راډیویي وینا کې طالبان مخاطب کړل او څرګنده یې کړه، چې د افغان عسکر او پولیس وژل د افغانستان کمزوري کول دي.

تیرکال په افغانستان کې یولس سوه دوه اتیا افغان عسکر او اتلس سوه پولیس وژل شوې دي.



د هلمند په مارجه کې په یوې مدرسې کې د ځان وژونکې حملې یو واسکټ چاودلی دی

د هلمند چارواکي وايي، چې نن د دې ولایت د مارجې ولسوالۍ په مربوطاتو کې په یوې مدرسې کې د ځان وژنکې حملې یو واسکټ چاودلی دی، پنځه زده کوونکي یې وژلي او شپږ نور يي ټپیان کړي دي.

د هلمند د والي ویاند احمد ځیرک ازادي راډیو ته وویل، چې ممکن د مدرسې زده کوونکي د ځان وژونکې حملې په روزنې لګیا و، چې دا واسکټ پرې چاودلی دی.

نوموړي زیاته کړه، چې چاودنه د مارجې ولسوالۍ د شين غزک د سیمې په یوې مدرسې کې شوې.

د رپوټونو له مخې په دغې سیمه کې د وسلوالو طالبانو فعالیتونه زیات دي.

د تخار د اشکمش ولسوال نن د سړک د غاړې د ماین په چاودنه کې ووژل شو

په تخار کې نن سهار د سړک د غاړې د ماین په یوې چاودنه کې ددې ولایت د اشکمش د ولسوال په ګډون درې کسان ووژل شول او دوه نور ټپيان شول.

د اشکمش ولسوالۍ د امنیې قومندان عبدالبصیر بیګ ازادي راډیو ته وویل چې په دې چاودنه کې ولسوال عبدالمنان حکیمي له خپل یوه ساتونکي او موټر چلوونکي سره ووژل شو او دوه ملکي کسان ټپیان شول.

په پیښه کې د ولسوال موټر په ماین ختلی دی. د چاودنې مسوولیت طالبانو پر غاړه اخیستی.

افغانستان، ترکمنستان او تاجکستان په خپلو کې د اورګاډي د پټلۍ پرغزولو هوکړه وکړه

افغانستان، ترکمنستان او تاجکستان په خپلو کې د اورګاډي د پټلۍ پر غزولو هوکړه وکړه.

په دې اړه تفاهم لیک پرون افغان ولسمشر حامد کرزي له تاجک ولسمشر امام علي رحمان او ترکمن ولسمشر قربان قلي بیردي محمدوف سره په یوه درې اړخیزه غونډه کې لاس لیک کړ.

د ولسمشر کرزي د ویندوې مرستیالې عادله راز له ازادي راډیو سره خبرو کې د دې تفاهم لیک په اړه وویل، چې د اوسپنې دغه پټلۍ به د ترکمنستان د اتا مراد له سیمي څخه پیل شي او د افغانستان پولي ته نږدې د امام نظر سیمې ته به را ورسیږي، بیا به د افغانستان د اقینې او اندخوي د سیمې په تګ لوري کې دوام ومومي او وروسته به د کندز ولایت د شیرخان بندر له لارې له تاجکستان سره ونښلي.

د ولسمشر کرزي د ویندوې دفتر په یوې خبر پاڼې کې ویلي، چې د دې تفاهم لیک تر لاسلیکولو وروسته درې واړو هېوادونو مشرانو په یوه ګډه خبري غونډه کې دا پروژه د سیمې د هېوادونو د اقتصاد او سوداګرۍ د پیاوړتیا او پراختیا لپاره مهمه بللې ده.

ټاکل شوې ده، چې ولسمشر حامد کرزی به نن ( پنجشنبې )په عشق اباد کې د نوروز په نړېوال جشن کې د سیمې او نړۍ له یو شمېر نورو مشرانو سره یوځای ګډون وکړي.

نن د افغانستان په بېلابېلو ولایتونو کې نوروز په ځانګړو مراسمو لمانځل کېږي

نن د افغانستان په بېلابېلو ولایتونو کې نوروز یا د نوي هجري لمریز کال رابره کېدل په میلو، جشنونو او د ځانګړو مراسمو په جوړیدو لمانځل کېږي.

په دې مناسبت ترټولو لویه میله په مزار شریف کې د سخي صیب پر روضې د جنډې پورته کولو او ګل سرخ میله ده، چې د افغانستان د بېلابېلو سیمو څخه خلک د ګډون لپاره ورغلي دي.

د بلخ ولایت امنیتي ادارې وايي، چې د دې میلې د ترسره کېدو لپاره یې کلک امنیتي تدابیر نیولې دي. روضې ته تللې ټولې لارې یې د موټرو په مح تړلي او د هر ډول ناوړې پیخې مخنیوي ته چمتو دي.

ټاکل شوې ده، چې په دې مراسمو کې به یو شمېر لوړ پوړي افغان چارواکي هم ګډون وکړي.

پر دې سربیره په پایتخت کابل او نورو ولایتونو کې هم د نوروز یا نوي کال په مناسبت لویې او وړې میلې جوړیږي.

په بېلابېلو ولایتونو کې افغان چارواکو ویلي، چې د نوروز په مناسبت یې د احتمالي ناوړه پېښو د مخنیوي لپاره ځانګړي امنیتي تدابیر نیولي دي.

نوروز د افغانستان په ډیرو سیمو کې د یوې دودیزې میلې په توګه لمانځل کېږي.

په کندز کې د یوې خونړۍ هوايي حملې قربانیان د جرمني څخه میلیونونه ایرو تاوان غواړي

د جرمني یوې محکمې د چارشنبې په ورځ په افغانستان کې د یوې خونړۍ هوايي حملې د قربانیانو د کورنیو د هغې دعوې اوریدل پیل کړل، چې د جرمني له حکومت څخه میلیونونه ایرو تاوان غواړي.

په ۲۰۰۹م کال کې د کندوز په ولایت د تیلو پر دوو هغو ټانکرو چې وسلوالو تښتولي ول، د امریکا د الوتکو په یو هوايي برید کې لسګونه ولسي خلک وژل شوي چې ویل کېږي، امریکايي الوتکو دا بمباري په سیمه کې د میشتو جرمني پوځیانو په غوښتنه کړې وه.

د جرمني حکومت هڅه وکړه، چې دا دعوه له محکمې خارج کړي. ټینګار یې دا وو، چې دا هوايي بریدونه د ناټو تر قومندې لاندې شوي او یوازې جرمني باید په کې ملامته نه شي.

د جرمني د حکومت مدافع وکېل مارک ځیمیر د رویترز خبري اژانس ته ویلي چې جرمني حکومت ددې قضیې سم لوری نه دی. نوموړې همدارنګه وویل، چې د جرمني حکومت د پېښې وروسته د قربانیانو له کورنیو سره بشري مرستې هم کړې دي.

خو د پېښې د قربانیانو مدافع وکېل کریم پوپل، محکمې ته وویل، په دې حمله کې د ملکېانو د وژل کېدو سبب، جرمني قومندان جورج کلین دی.

د نوموړي په وینا، د جرمني د حکومت له خوا شوې مرستې تر ډیره د پېښې د قربانیانو کورنیو ته نه دي رسیدلې.

هغه قاضي، چې دا دعوه یې اوریده ویلي، دوي به دا وڅیړي، چې ایا په دې قضیه کې د نړېوال بشري قانون څخه سرغړاوی شوی دی کنه.

جمهور ریس حامد کرزي خلکو ته د نوي کال مبارکي ویلي

جمهور ریس حامد کرزي نن د نوروز په مناسبت په راډیویی وینا کې خلکو ته د نوي کال مبارکي ویلي او په افغانستان کې یې د امنیت د ټینګیدو هیله کړې ده .

د ولسمشر د مطبوعاتو دفتر د ښاغلي کرزي د دې خبرو د متن یوه برخه خپره کړې ، چې په هغه کې پر طالبانو غږ کوي، چې د بهرنیانو ټوپک له اوږې وغورځوي او د خپلې خاورې د ترقۍ لپاره کار وکړي.

جمهور ریس له وسله والو طالبانو غوښتنه کړې، چې د افغانستان پر ملي امنیتي ځواکونو له حملو لاس واخلي ځکه د ښاغلي کرزي په وینا، پر هغوي حمله کول د افغانستان د خاورې پر پیاوړتیا حمله ده .

په ایران او اذربایجان کې د نوروز د لمانځني مراسم پيل شول

په ایران او اذربایجان کې د نوروز د لمانځني مراسم پيل شول، نوروز په دودیز ډول په افغانستان، ایران او د منځنۍ اسیا په یو شمېر جمهوریتونو سربیره د چین په شمال لویدیز ، د کرایمیا په ټاپو وزمه او د بالکان په یو شمېر هېوادونو کې لمانځل کیږي.

په افغانستان او د منځنۍ اسیا په نورو جمهوریتونو کې نوروز سبا لمانځل کیږي.

جمهور ریس بارک اوباما پرون د نوروز په مناسبت ځانګړی ويډیويي پيغام خپور کړ .

نۍ: په ۱۳۹۱ کې د خبریالانو سره د تاوتریخوالي ۷۱ پيښې ثبت شوي

په افغانستان کې د ازادو رسنیو څخه د ملاتړ ادارې یا نۍ وایې، په ۱۳۹۱ لمریز کال کې د خبریالانو سره د تاوتریخوالي ۷۱ پيښې ثبت شوي دي.

د یادې ادارې ریس صدیق الله توحیدي نن ازادي راډیو ته وویل چې، په دې کال کې یو خبریال وژل شوی، اته تنه ټپیان شوي، څلور کسه نیول شوي، په ۲۶ پيښو کې خبریالان وهل شوي او پينځه د ګواښ پيښې ثبت شوي دي.

نوموړي پر خبریالانو ږغ وکړ، چې په دې برخه کې اساسي تدابیر ونیسي.

ښاغلي توحیدی زیاته کړه، چې د تاوتریخوالي په دې ۷۱ پیښو کې ۴۶ یې د دولتي چارواکو او پاته نور یې د طالبانو او نورو ډلو لخوا تر سره شوي دي.

دفاع وزارت: امریکایې ځانګړي ځواکونه به له میدان وردک ووځي

د دفاع وزارت وایې، تر راتلونکو څو ورځو پوري به امریکایې ځانګړي ځواکونه له میدان وردک ووځي.

د دې وزارت ویاند جنرال ظاهر عظیمي نن خبریالانو ته وویل چې، امریکایې چارواکو له دې ولایته د خپلو ځانګړو ځواکونو د ایستلو په اړه موافقه وکړه.

(نړېوال ځواکونه چمتو دي چې خپل خاص ځواکونه د میدان وردګو له نرخه و باسي او د ملي اردو قطعې هلته ځای پر ځای شي. شاید تر راتلونکو څو ورځو پوري دا ستونزه په بشپړ ډول حل شي. )

په ورته وخت کې د ایساف مطبوعاتي دفتر هم د یوې اعلامیې په خپرولو سره دا موافقه تایید کړې.

په اعلامیه کې راغلي چې دا موافقه نن په کابل کې د ولسمشر حامد کرزي او په افغانستان کې د بهرنیو ځواکونو د عمومي قومندان جنرال جوزف ډنفورډ په لیدنه کې وشوه.

ولسمشر کرزي نږدې یوه میاشت مخکې له دې ولایته د امریکایې ځانګړو ځواکونو د وتلو امر وکړ.

ولسمشر کرزي او د ناټو قومندان له میدان وردګو نه د ځانګړو امریکایې ځواکونو پر وتلو موافقه وکړه

د افغانستان جمهوري ریاست وایې، چې ولسمشر کرزي او په افغانستان کې د ناټو او امریکایې ځواکونو عمومي قومندان له میدان وردګو څخه د ځانګړو امریکایې ځواکونو پر وتلو موافقه وکړه.

د جمهوري ریاست یوه ویاند فایق واحدی ازادي راډيو ته وویل چې، دا ځواکونه به لومړی د میدان وردګ له نرخ څخه وتل پيل کړي:

(نن د ولسمشر حامد کرزي او جنرال جوزف ډانفورډ ترمنځ په غونډه کې پر دې موافقه وشوه چې له میدان وردګو څخه د امریکایې ځانګړو ځواکونو وتل لومړی له نرخ ولسوالۍ څخه پیل شي. )

په ورته وخت کې د ایساف مطبوعاتي دفتر هم د یوې اعلامیې په خپرولو سره دا موافقه تایید کړه.

په اعلامیه کې راغلي چې دا موافقه نن په کابل کې د ولسمشر حامد کرزي او په افغانستان کې د بهرنیو ځواکونو د عمومي قومندان جنرال جوزف ډنفورډ په لیدنه کې وشوه.

د افغانستان د دفاع وزارت ویاند جنرال ظاهر عظیمي وایی چې ځانګړي امریکایی ځواکونه یوازې د میدان وردک ولایت په نرخ ولسوالۍ کې میشت دي.

ولسمشر کرزی د نوروز په نړېوال جشن کې د ګډون لپاره ترکمنستان ته وخوځید

ولسمشر کرزي د نوروز په نړېوال جشن کې د ګډون لپاره نن ترکمنستان ته روان شو.

د جمهوری ریاست مطبوعاتي دفتر په یوه خپره کړې اعلامیه کې ویلي چې ولسمشر کرزی او ورسره پلاوی به په عشق اباد کې د ترکمنستان، تاجکستان او ازبکستان له جمهورو رییسانو سره هم وګوري.

د نوروز د نړیوال جشن مراسم تیرکال په تاجکستان او وړم کال په ایران کې جوړشوي وو چې ولسمشرکرزي هم پکې برخه اخیستې وه، دا مراسم سږ کال د ترکمنستان په پایتخت عشق آباد کې ترسره کیږي چې د یوشمیر هیوادونو ولسمشران به هم پکې برخه واخلي.

د کابل والي: د کابل ښار د بیارغونې لپاره پينځه کلن پراختیایي پلان مو جوړ کړی دی

د کابل والي وایې، چې د کابل ښار د بیارغونې او ودې لپاره یې پينځه کلن پراختیایي پلان جوړ کړی دی.

د کابل والي عبدالجبار تقوا نن په کابل کې یوې خبري غونډي ته وویل چې، په دې پلان کې نوي کابل ته د ښار انتقال، د غیر متوازنې ودې اصلاح او د ملي پارکونو جوړول شامل دي.

ښاغلي تقوا زیاته کړه، چې د رواني مارچ یا هم د اپریل په میاشت کې به د نوي کابل پر پروژې کار پیل شي:

"د کابل د نوي ښار چارې بشپړي شوي او د مارچ تر آخرو او یا هم د اپریل په میاشتي کې به یې عملي چارې پیل شي."

د کابل نوی ښار په ۴۸۷ جریبه ځمکه کې د ده سبز په ولسوالۍ کې جوړیږي.

د ننګرهار په خوګياڼوکې اته تنه شکمن کسان نیول شوي

د ننګرهار په خوګياڼو ولسوالۍ کې اته تنه شکمن کسان نیول شوي دي.

د ننګرهار د امنیې قومندانۍ ویاند حضرت حسین مشرقي وال ازادۍ راډیو ته وویل، چې تیره شپه ناوخته افغان او بهرنیو ځواکونو د خوګياڼو ولسوالۍ د کږې په سیمه کې مشترک چاڼيزعملیات ترسره کړي.

مشرقي وال وايي، چې په دې عملیاتو کې اته تنه شکمن کسان نیول شوي، چې د تحقیق لپاره ایساف ځواکونو له ځانه سره وړي دي.

نور راوښيه

XS
SM
MD
LG