د لاسرسۍ وړ لېنکونه

تازه خبر
سه شنبه ۸ سلواغه ۱۳۹۸ کابل ۰۸:۰۸

افغانستان

د افغانستان کرکټ تیم د برموډا ټیم ته د ۱۷۸ منډو هدف ټاکلی دی

په عربي متحده اماراتو کې د کرکټ نړیوالو شل آوریزو سیالیوته دلار موندنې په لوبو کې نن د افغانستان او برموډا د لوبډلو ترمنځ لوبه روانه ده.

دا لوبه چې نن سهار په سیمه ییز وخت په لسو بجو پیل شوه، افغانستان د بیتنګ کولو پریکړه وکړه او په شلو اورونوکې یې یو سل اوه اویا منډې جوړې کړې.

په دې لړ کې د افغانستان پنځه لوبغاړي وسوځیدل او له دې ډلې څخه شهزاد محمدي ترټولو ډیرې منډې جوړې کړې.

له کابو نیم ساعته وقفې یا دمې نه وروسته لوبه بیا پیل شوه، برموډا د ۲۹ منډو په جوړولو کې خپل ۲ لوبغاړي له لاسه ورکړل، چې یو لوبغاړی افتاب عالم او دیم یې ضمیر خان وسوځاوه.

افغانستان په دې سیالو کې پنځه لوبې په پرله پسې ډول ګټلې چې هره لوبه دوه نمرې لري او په دې ډول افغانستان لس نمرې ترلاسه کړي دي.

په دې لوبوکې شپاړس هیوادونه برخه لري چې دوه به یې له نورو څخه د ډیرو نمرو په ګټلو سره د کرکټ په نړیوالو شل آوریزو مسابقوکې چې څه موده وروسته به ترسره کیږي د ګډون حق ترلاسه کړي.

د ملي امنیت ریاست په محبسونو کې د بندیانو د شکنجې په اړه د بشري حقونو د کمیسیون راپور رد کړ

په يوه تازه راپور کې ويل شوي، چې د افغانستان د ملي امنيت د رياست په محبسونو او د پوليسو په نظارتخانو کې بنديان شکنجه کېږي.

د افغانستان د بشري حقونو د خپلواک کميسون په راپور کې ويل شوي، چې د ملي امنيت د رياست په توقبف کې له بنديانو څخه د اقرار اخيستلو لپاره د شکنجې له خورا بې رحمانو شيوو څخه کار اخيستل کېږي.

د افغانستان د ملي امنيت د رياست ويندوی دا راپور ردکړ، ويې ويل چې هغه د دې لپاره خپور شوي چې د افغانستان حکومت د بګرام د محبس د کنټرول د ترلاسه کولو غوښتنه کړې ده.

د ترکیې د بهرنیو چارو وزیر له افغانستان سره د اوږد مهاله همکاریو ژمنه وکړه

د ترکيې د بهرنيو چارو وزير احمد داوود اوغلو پرون وويل، چې هيواد به يې هيڅکله افغانستان ته شا وانړوي.

د ترکيې د بهرنيو چارو وزير دا څرګندونې له افغانستانه د پوځيانو د ايستلو په باب د ترکيې د څو ګوندونو له غوښتنې وروسته وکړې.

تېره اوونۍ د کابل په بګرامۍ ولسوالۍ کې د ترکيې د پوځ يوه هيلي کوپتر پر يوه کور ولوېده چې په نتيجه کې يې دوولس ترک پوځيان او څلور تنه افغانان ووژل شول.

له دې پېښې وروسته د ترکيې ځینو ګوندونو له حکومت څخه وغوښتل، چې له افغانستانه ټول ترک پوځيان وباسي.

خو د ترکيې د بهرنيو چارو وزير له افغانستان سره د ترکيې اوږدو تاريخي اړيکو ته په اشارې په دې ټينګار وکړ؛ چې ترکيه به هيڅکله افغانان په کړاو کې يوازې پرې نږدي.

د رابرټ بیلز مدافع وکیل له خپل موکل سره لومړۍ کتنه له احساساتو ډکه کتنه وبلله

د هغه امريکايي، چې د کندهار په پنجوايي کې د شپاړس ملکي افغانانو په وژلو تورن دی، مدافع وکيل له خپل موکل بريدګي رابرټ بېلز سره لومړنۍ مخامخېدا په خپل ژوند کې د ځان لپاره تر ټولو احساساتي کتنه وبلله.

مدافع وکيل جان هنري براون له تورن بېلز سره پرون د کيسناس ايالت په پوځي محبس کې د درې نيم ساعتونو په مخه خبرې وکړې.

براون له خپل موکل سره له کتنې وروسته له اسوشيتيد پريس خبري اژانس سره په ټېلفوني خبرو کې وويل چې بيا به هم له تورن شوي بېلز سره وويني.

بېلز تراوسه پوري مجرم نه دي پېژندل شوي خو که محکوم شي ممکن اعدام شي.

د بغلان پولیسو نن یوه ۲۲ کلنه ښځه د خپل خاوند له شکنجو و ژغورله

د بغلان پولیسو نن یوه ۲۲ کلنه ښځه چې ریکا نومیږي د خپل خاوند له شکنجو و ژغورله.

ریکا، چې د وهلو او ټکولو نښې یې پر مخ لیدل کیږي، رسنیو ته وویل چې، خاوند یې هغه غیر اخلاقي کارونو ته هڅوله.

د بغلان امنیه قومندانۍ د جرمونو سره د مبارزې مدیر احمد ضیا کارګر ازادۍ راډیو ته وویل، چې د نوموړي خاوند اوس په توقیف کې دی.

نۍ:په تیر یو کال کې د خبریالانو په وړاندې تاوتریخوالې ۳۸ سلنه زیات وو

په کابل کې د رسنیو د ملاتړ دفتر یا نی نن د نوي کال په مناسبت په خپل یو نوي رپورټ کې ویلي، چې په تیر یو کال کې د خبریالانو په وړاندې تاوتریخوالې ۳۸ سلنه زیات شوې.

د دغې ادارې مسول محمد صابر فهیم نن ازادۍ راډيو سره په خبرو کې دا خبردارې ورکړ، که د تاوتریخوالي دا لړۍ ختمه نشي نو دا به د رسنیو په وړاندې ډیری ستونزې رامنځ ته کړي.

نوموړي د ژورنالستانو پر وړاندې د تاوتریخوالي د ډیریدو لاملونه د ناامنیو زیاتیدل، له قانون څخه د دولتي مسولینو سرغړنه او مجریمینو ته سزا نه ورکول په ګوته کوي.

په ننګرهار ولایت کې نن دوه چاودنې شوي، خو چاته يي زیان نه دی رسیدلی

په ننګرهار ولایت کې نن دوشنبې دوه چاودنې شوي، چې لومړې چاودنه د ننګرهار په بټي کوټ ولسوالۍ کې سهار اته بجې د پولیسو په رینجر موټر شوې، چې د ننګرهار د والي د ویاند احمد ضیا عبدالزي په وینا زیان نه لري.

دویمه چاودنه غرمه مهال یوولس نیمې بجې د تورخم – جلال اباد په لویه لار د مارکو په سیمه کې د پولیسو په یوه رینجرموټر شوې، چې د والي د ویاند احمدضیا عبدالزي په وینا پولیسو ته زیان نه دی رسیدلی او ترڅنګ یې په یوه روان ټیکسي موټر کې یو تن سپرلۍ ژوبل کړې ده .

ویاند زیاتوي، پولیس پلټنې کوي او عاملین یې تر اوسه نه دي موندلي.

محمد داود وفا

جلال اباد

د سالنګونو لویه لار د موسم د خرابیدو له کبله په وقفه یي ډول پرانیستل کیږي

د سالنګونو د ساتنې چارواکي وایي، چې د موسم د خرابیدو له کبله دغه لار په وقفه یي ډول د ټرافیکو پر مخ پرانیستل کیږي.

د افغانستان د فواید عامې وزارت مسئولین وایې چې په سیمه کې د تندو طوفانونو له وجې دا لار په وقفه یی توګه بندیږي.

په ورته وخت کې راپورونه ښیې چې د هیواد په یو شمیر شمالي ولایتونو کې واوري وریدلي.

په افغانستان کې د امریکايي ځواکونو له خوا نیول افغان احمد ولي په جرمني کې محاکمه کیږي

هغه افغان چې ویل کیږي معلوماتو یې په ۲۰۱۰ کال کې په اروپا کې د تروریستي حملو د خطر زنګ وهلی و، نن په جرمني کې محاکمه کیږي.

احمد ولي صدیقي، چې په جرمني کې اوسي، د ۲۰۱۰ کال په جولای کې په افغانستان کې د امریکایي ځواکونو له خوا نیول شوی و.

ویل کیږي، هغه د توقیف په جریان کې چارواکو ته په اروپایي ښارونو کې د القاعده د حملو د پلانونو جزیات افشا کړي و.

که چیرې ۳۷ کلن صدیقي د القاعده او د ازبکستان د اسلامي غورځنګ پرغړیتوب مجرم وپیژندل شي نو به ښایي په لسو کالو بند محکوم شي.

څارنوالان وایي، چې صدیقي ته په ۲۰۰۹ او ۲۰۱۰ کلونو کې دواړو تروریستي ډلو په پاکستان او هم افغانستان پولې ته نژدې قبایلو سیمو کې روزنه ورکړې ده.

خوست کې ملي اردو او ائتلافي ځواکونو په چاڼیزوعملیاتو کې درې تنه وسله وال نیولي

د خوست سیمه ایز چارواکي وایې، د ملي اردو او ائتلافي ځواکونو په یو لړ چاڼیزو عملیاتو کې د ګربزو په سرحدي ولسوالۍ کې درې تنه وسله وال له وسلو سره نیولي.

د ګربزو ولسوال ولي شاه همت ازادۍ راډیو ته وویل چې، دې کسانو د دې سیمې په نا ارامیو کې لاس درلود.

د نیول شوېو کسانو څخه څیړنې رواني دي، خو وسله والو مخالفینو د دوي د نیول په اړه تر اوسه څرګندونې نه دي کړي.

د سولې عالي شورا:افغانان دې د سولې په هڅو کې فعاله برخه واخلي

د افغانستان د سولې عالي شورا د نوي کال په مناسبت په خپل یو پیغام کې ټولو افغانانو ته بلنه ورکړې، چې د سولې په هڅو کې فعاله برخه واخلي.

په دې پیغام کې، چې نن ازادۍ راډیو ته استول شوې د هېواد په سیاسي مشرانو او وسله والو مخالفینو غوښتل شوي، چې د سولې د هڅو په وړاندې مسؤلانه چلند وکړي.

د سولې عالي شورا په ځانګړې ډول وسله والو مخالفینو ته بلنه ورکړل شوې، چې له تشدد نه لاس په سر شي او د تفاهم له لارې دې د ستونزو د حل هڅه وکړي.

په دې پیغام کې دا هم ویل شوي، چې ځینې کړۍ هڅه کوي د سولې د هلو ځلو په وړاندې خنډونه جوړ کړي، چې د سولې د عالي شورا په وینا د جګړې د دوام او د بې ګناه خلکو د وژنې لپاره به مسؤل وي.

د امریکا او افغانستان اړیکي باید د کندهار د وروستۍ پيښې تر اغیز لاندې نه راشي

په امریکا کې د افغانستان سفیر وایي، د امریکا او افغانستان تر منځ اړیکې نباید د کندهار د وروستۍ پيښې تر اغیز لاندې راشي.


په امریکا کې د افغانستان سفیر اکلیل حکیمي له امریکایې سي ان ان ټلویزیون سره په مرکه کې د امریکا او افغانستان اړیکې له ستونزو ډکې وبللې، خو زیاته یې کړه چې باور لري امریکا به د رابرټ بیلز په قضیه کې چې د پنجوایې په پيښه کې تورن دی، مناسب اقدام وکړي.

په ورته وخت کې یو بل افغان چارواکي رویټرز ته ویلي چې، دا پيښه د دواړو هیوادونو تر منځ پر ستراتیژیک تړون اغیز و نکړي او پدې اړه به خبري دوام و کړي.

د سالنګ لویه لاره د سختو طوفانونو له امله د ټرافیک په مخ تړل شوي

د راپورونو له مخې د سالنګ لویه لاره د سختو طوفانونو له امله د ټرافیک په مخ تړل شوي.

د سالنګونو د ساتنې او څارنې د ادارې ریس جنرال رجب ازادۍ راډیو ته وویل، چې دا لاره په شمالي او جنوبي سالنګ کې د سختو طوفانونو له امله تړل شوي.

دا په داسې حال کې ده، چې د نوي کال په مناسبت پر دې لار د خلکو تګ راتګ زیات شوي.

روسیه:تر څو چې افغان ځواکونه پرخپل پښو نه وي ولاړ ناټو دې له افغانستانه نه وځي

د روسیی د بهرنیو چارو وزیر سیرګي لاوروف پرون وویل، چې د ناتو په مشرۍ ځواکونه باید ترهغو له افغانستانه ونه وځي ترڅو پورې چې دا یقیني شوې نه وي چې افغان امنیتي ځواکونه د دې توان لري چې د خپل هېواد چارې په خپله سمبالې کړي.

لاوروف له یوه افغان خصوصي ټلویزیوني شبکې سره په مرکه کې وویل، چې د نړېوال قانون له مخې د افغانستان حکومت باید دغه توان ترلاسه کړي وی چې د نړیوالو ځواکونو له وتلو وروسته کولای شي په هېواد کې نظم او مقرررات تامین کړي.

ټاکل شوې ده، چې د ۲۰۱۴ میلادي کال تر پایه د ناتو په مشرۍ نړېوال ځواکونه له دې هېواده ووځي او د امنیتي چارو بشپړ مسولیت افغان امنیتي ځواکونو ته وسپارل شي.

د افغانستان د بهرنیو چارو وزیر ډاکټر زلمی رسول به نن واشنګټن ته ولاړ شي

ټاکل شوې ده، چې د افغانستان د بهرنیو چارو وزیر ډاکټر زلمی رسول نن واشنګټن ته ولاړ شي او له خپلې امریکایي سیالې او د کانګرس له یو شمېرغړېو سره به وګوري.

د بهرنیو چارو د وزارت ویاند جانان موسي زی پرون په کابل کې په یوې خبري غونډه کې وویل، چې د بهرنیو چارو وزیر دغه سفر د امریکا د بهرنیو چارو د وزیرې هیلري کلینتن په بلنه ترسره کوي.

هغه، د کندهار د پیښې په اړه چې ویل کېږي، د افغانستان او امریکا پر اړیکو یې منفي اغیز کړی وویل، چې د دواړه هېوادونو ترمنځ د اړیکو اساس پوخ دی خو د افغانستان حکومت له امریکا څخه غواړي چې د دغې پیښی په اړه هر څومره ژر چې کېدای شي څیړنه ترسره او عامل یا عامیلنو ته یې سخته سزا ورکړي.

موسی زي دغه راز وویل، چې د بهرنیو چارو وزیر به په دې سفرکې له امریکایي چارواکو او د کانګرس له یو شمېرغړېو سره د لیدنو کتنو ترڅنګ په امریکا کې د افغان- امریکا د ښځو په کلنۍ شورا کې هم ګډون وکړي.

نور راوښيه

XS
SM
MD
LG