د لاسرسۍ وړ لېنکونه

تازه خبر
یکشنبه ۶ سلواغه ۱۳۹۸ کابل ۰۵:۱۳

افغانستان

ګرشک کې چاودنې مرګ ژوبله اړولې

راپورونه وايي په هلمند كې په يوځان وژونکي بريد کې زيات شمير ملكي كسانو ته مرګ ،ژوبله اوښتي ده.

دګرشك ولسوال وايي دغه ځانمرګي بريدكوونكي غوښتل چي دخلکو دګڼې ګونې كې ځان والوزوي خو ترهغې مخكې يې ځان ته چاودنه وركړي ده.

دګرشك دولسوال په وینانږدې لس تنه ملكيان يي وژلي دي او یو شمير نور يې ټپيان كړي .

د هلمنددوالي وياند داود احمدي بیا وايي چې دا ځان وژونکی برید نه و بلکې دګرشك دبازار په منځ كې چاوديدونكي توكي په يو موټرسيكل كې ځاى په ځاى شوي وو او دريموټ کنټرول په وسیله يې انفجار وركړى دى چې دده په خبره هدف يې دګرشك ولسوال و خو خپله ولسوال دبريد نه روغ او رمټ وتلى دى .
تر اوسه ددې بريد پړه چاپه غاړه نه ده اخيستې.

د ګلبدین حکمتیار یو پلاوی د سولې د خبرو لپاره کابل ته رسیدلی

د راپورونو پر اساس د ګلبدين حکمتيار د حزب اسلامي ډلې يو هيئت د سولې د خبرو اترو لپاره کابل ته رسېدلى.

افغان چارواکو تر اوسه په دې اړه کومه تبصره نه ده کړې، خو ځينې سرچينې د حزب اسلامي ډلې د دغه پلاوی راتګ تاييدوي.

د دې ډلې يوه وياند له نامعلوم ځاى څخه په ټیليفوني تماس کې ازادۍ راډيو ته وويل، چې د دې هيئت مشري قطب الدين هلال کوي.

د نوموړي په وينا د حزب اسلامي پخوانى وياند قريب الرحمن سعيد او د دې ډلې ځينې نور غړي کابل ته رسېدلي چې ټاکل شوې له افغان چارواکو سره خبرې وکړي.

حزب اسلامي تر دې مخکې افغان حکومت ته يوه طرحه وړاندې کړې وه چې د مذاکرو مسئلې ته هم په کې اشاره شوې وه.

دا سفر په داسې حال کې کېږي، چې ولسمشر کرزي ويلي افغانستان ته د سولې د راوستو لپاره به خپلو هڅو ته ادامه ورکوي او د حزب اسلامي په ګډون يې ټولو مخالفانو ته د خبرو بلنه ورکړې ده.

په کندهار کې بمي چاودنې یوتن وژلی

د کندهار د امنيي قومندانۍ د امنيت امر فضل احمد شېرزاد وويل، چې نن شاوخوا لس نيمي بجې د څلورمې حاوزې په کاروان سيمه کې بمي چاودنه رامنځته شوې ده.

د ده په خبره، چې په دي چاودنه کې يو تن عام وګړۍ وژل شوى او يو بل تن ژوبل شوى دى.

نوموړى زياتوي، چې دغه چاوديدونکي توکي په انبارو کې ځاى پر ځاى شوي وه.

د دې پېښې په تړاو تر دې مهاله چا څه نه دي ويلي.

بانکي مون له ټولې نړۍ څخه د نوي کال د را رسېدود لمانځلوغوښتنه وکړه

د ملګرو ملتونو عمومي منشي د نوي كال د را رسېدو په مناسبت په يوه پيغام كې په ټوله نړۍ كې له خلكو د دغې ورځې د لمانځلو غوښتنه كړې.

بان كې مون په يوې اعلاميې كې خلك د نوي كال د لومړۍ ورځې يا نوروز لمانځلو ته رابللي دي او ويلي يي دي، چې دی تمه لري دغه ورځ د نړېوالې سولې په تامنيولو كې هم مرسته وكړي.

د ملګرو ملتونو په څلور څلوېښتمه عمومي غونده كې نوروز د يوې نړېوالې ورځې په توګه ومنل شوه.

په افغانستان کې به د پوهنې په برخه کې نوي پروګرامونه تطبیق شي

په داسې حال كې، چې د افغانستان په زیاترو سيمو كې نوى تعليمي كال پيليږي، د پوهنې وزارت ژمنه وكړه، په هېواد كې به د پوهنې د لا پراختيا لپاره نوي پروګرامونه تطبيق كړي.

د پوهنې وزارت د اطلاعاتو او نشراتو رييس محمداصف ننګ ازادۍ راډيو ته وويل، چې په ۱۳۸۹ كال كې به دغه پروګرامونه د نړېوالې ټولنې په مرسته پيل شي.

ښاغلي ننګ زياته كړه، چې په دغه پروګرامونو كې د ښونځيو د ودانيو جوړول، د پوهنې د كيفيت لوړول او د هېواد د ښوونكو د معيشتي وضيعت ښه والۍ شامل وي.

په خوست کې د ملي اردو په ګزمې یو ماین وچاودېد

د خوست ولايت امنيتي چارواكي وايي، چې نن سهار شا اوخوا نهه بجې د دغه ولايت په باك ولسوالۍ كې د ملي اردو د ګزمې پر مهال د سړك د غاړې د ماين چاودنه شوې ده.

په خوست ولايت كې د ملي اردو د لومړې لوا درستيز وال جنرال زهير وردګ وايي، چې په دې پېښه كې د ملي اردو يو سرتېرى مړ او بل يي ټپي شوى دى.

ده همدا راز ازادۍ راډيو ته وويل، چې تر اوسه په پېښه كې د لاس لرلو په تورڅوك نه دي نيول شوي خو په اړه يي پلټنې روانې دي.

بل خوا د طالبانو يو وياند ذبيح الله مجاهد ادعا كړې، چې په دې پېښه كې د ملي اردو دوه موټر له منځه تللي او له لسو زيات سرتېري مړه او ټپيان شوي دي، خو جنرال زهير وردګ د طالبانو دغه ادعا بې بنسټه بولي.

کرزی به په راتلونکې کې چین ته ولاړشي

په پام كې ده، چې ولسمشر كرزى په راتلونكې سې شبې كې له چينايي چارواكو سره د خبرو اترو لپاره بېجنګ ته سفر وكړي.

په چين كې افغان سفارت د يوې اعلامېي په خپرولو سره ويلي، چې په پام كې ده بيجنګ ته د ولسمشر كرزي له سفره مخكې د افغانستان د ملي امنيت سلاكار ډاكټر رنګين دادفر سپنتا سبا ته په درى ورځني سفر چين ته ولاړ شي.

په خبرپاڼه كې همدا راز راغلي، چې د افغانستان د ملي امنيت سلاكار به په دې سفر كې له چينايي چارواكو سره د دواړو هېوادونو تر منځ د اړيكو پر پراختيا، له تروريزم سره مبارزه او د افغانستان او سيمې په وضيعت باندې بحث وكړي.

په دې وروستيو كې افغانستان او چين خپلې دوستانه اړيكې پياوړې كړې دي او د چين حكومت د افغانستان د بيا رغونې په پروژو كې خپله ونډه ډېره كړې ده.

د وزیرانو شورا د داخلي کمېټوکارونه له سره تنظیم شوي

د افغانستان د جمهوري رياست د يوه نوي فرمان له مخې د وزيرانو د شورا د داخلي كمېټو كارونه له سره تنظيم شوي دي.

د افغانستان دولتي اژانس باختر رپوټ وركړى، چې د دغه فرمان له مخې به د ملي دفاع او كورنيو چارو وزارتونه، د ملي امنيت رياست، د سيمه اېزو ارګانونو خپلواكه اداره او هغې ته اړوندې ادارې به خپل كاري رپوټونه د ولسمشر دوېم مرسيتال ته وړاندې كوي.

په رپوټ كې همدا راز راغلي دي، چې په اقتصادي كمېټې كې شامل وزارتونه او اړوندې ادارې به خپل كاري رپوټونه د جمهوري رياست دوېم معاونيت ته وړاندې كوي.

د افغانستان د جمهوري رياست په فرمان كې همدا راز راغلي چې د ولسمشر مرستيالان به د دغو ادارو او كمېټو د كارونو په اړه ولسمشر ته راپور وركوي.

ويل كيږي، چې دغه فرمان د حكومتي چارو د تنظيم او د منظم كاري تقسيم اوقات لپاره صادر شوى دى ، چې له مخې به يي په صلاحيتونو كې ښه نظم رامنځته ته شي.

په کندهار کې یوې چاودنې دوه ملکیان ټپیان کړي

په كندهار ولايت كې نن سهار د يوې چاودنې له امله دوه ملكي وګړي ټپيان شوي دي.

د كندهار ولايت د امنيې قوماندانى مرستيال محمدشاه فاروقي ازادۍ راډيو ته وويل، چاودنه نن سهار په لسو بجو د كندهار ښار د كابل په دروازې سيمه كې وشوه، چې يوازې دوه تنه په كې ټپيان شول.

بل خوا عيني شاهدان وايي، چې په چاودنه كې يو تن وژل شوى دى.

پوليس وايي، په چاودنه كې د لاس لرلو په توريې يو كس نيولى دى.

په فراه کې ۳۰۰میرمنو ته د ګلدوزۍ او خیاطۍ په برخو کې زده کړې پیل شوې

د فراه ولايت چارواكي وايې، چې په دغه ولايت كې د افغانستان د ښځو د پياوړتيا موسسې له خوا د ۳۰۰ ښځو لپاره د ګلدوزۍ او خياطۍ په برخو كې د زده كړې پروژه پيل شوه.

د دغه پروژې مسئول علي محمد ازادۍ راډيو ته وويل، چې په دې پروګرام كې به ښځو ته د ګلدوزۍ او خياطۍ د زده كړې سربېره د ليك او لوست زده كړه هم وركړل شي.

د نوموړي په وينا دا پروګرام به ۹ مياشتې دوام وكړي.

په پکتیا کې درې کسان د طالبانو سره د تړاو په تور نیول شوي

د پكتيا چارواكي وايې، د دغه ولايت په مركز ګرديز او زرمت ولسوالۍ كې د افغان او ايتلافي ځواكونو په ګډوعملياتو كې درې كسان له طالبانو سره د تړاو په تورنيول شوې دي.

د پكتيا د والي وياند روح الله سمون ازادۍ راډيو ته وويل، په دغو عملياتوكې يو وسلوال طالب، چې مقاومت يې کاوه، ووژل شو.

طالبانو تر اوسه په دې اړه څه نه دي ويلي.

د يو بل خبر له مخې د خوست ولايت په نادرشاه كوټ ولسوالۍ كې د يوې مرمۍ د چاودېدو په پېښه كې يو ماشوم مړ او دوه نور ټپيان شوي دي.

د خوست د عامې روغتيا ريس اميربادشاه منګل ازادۍ راډيو ته وويل، چې په ټپيانو كې د يوه ماشوم روغتيايي حالت د اندېښنې وړ دى.

پاکستان د طالبانو د مشرانو د نیولو په اړه د کای ایډې تورونه رد کړل

پاکستان په افغانستان کې د ملګرو ملتو د پخواني ځانګړي استازې دا خبره رد کړه، چې ویلي یې دي، اسلام اباد د طالبانو د دوهم مشر ملا عبدالغني برادر په نیولو د ملګرو ملتو او د افغان حکومت د مخالفو وسله والو تر منځ د سولې خبرې ګډوډې کړې.


کای ایډې په ناروې کې بي، بي، سي ته ویلی چې له تیر پسرلي راهیسې ده د طالبانو له غړو سره په پټه اړیکي درلودې خو څو اونۍ مخکې دا روابط هغه مهال ګډوډ شول، چې تر لسو ډیر طالبان د پاکستان او امریکا د ګډو عملیاتو په ترڅ کې ونیول شول.


کای ایده زیاته کړه چې دی فکر کوي چې پاکستان دا کار د دې لپاره وکړ چې دا خبرې پای ته ورسیږي او دا ځکه چې اسلام اباد غواړي له طالبانو سره د روغې جوړې په هرډول خبرو کې واکمن وي.

خو د پاکستان د بهرنیو چارو د وزارت یوه ویاند وویل، ملا برادر نه د کومو خبرو په اساس نیول شوی او نه هم د روغې جوړې د کومې هڅې له مخې.

د ایران،افغانستان او تاجکستان د بهرنیوچارو وزیران به په تهران کې سره وګوري

د ایران بهرنیو چارو وزارت وایې، د دغه هېواد افغانستان او تاجکستان بهرنیو چارو وزیران به د نوروز په ورځ په تهران کې سره ووینی.

په تېرنوروز کی دغو وزیرانو د افغانستان په مزارشریف کی غونډه کړی وه.

د ایران د بهرنیو چارو وزارت ویاند رامین مهمان پرست وایي، د نوروز دغو مراسمو ته یی د نورو هېوادونو چارواکي هم ورغوښتي دي.

د ایران افغانستان او تاجکستان د بهرنیو چارو وزیرانو په دی غونډی کې به د پخوانیو توافقاتو په تطبیق او د درې واړو هېوادونو ترمنځ د همکارۍ په نوېو پروژو خبرې وشي.

بلجیم په افغانستان کې خپل پوځيٍ ماموریت د یوه بل کال لپاره تمدید کړ

د بلجیم حکومت موافقه وکړه، چې خپل شپږ سوه عسکر د امریکا د متحدو ایالاتو له غوښتنې سره سم د دوه زره یولسم میلادي کال ترپایه په افغانستان کی پریږدی.

د بلجیم ځواکونه د کابل، کندز او کندهار په هوایي ډګرونو کې امنیت تامینوي او د افغانستان امنیتي ځواکونه هم روزي.

کای ایدې د طالب مشرانونیونه د سولې خلاف هڅه بولي

د افغانستان لپاره د ملګروملتونو پخوانی ځانګړی استازی کای ایډې وايي، په پاکستان کې د افغان طالبانو د نیولو وروستۍ لړۍ د سولې لپاره د ملګروملتونو د پټو خبرو هڅې له خنډ سره مخامخ کړې دي.

ښاغلي ایډې بي بي سي ټلویزیون ته وویل چې له طالب مشرانو سره د سولې خبرې یوکال مخکې پیل شوې او له دوی سره مخامخ کتنې په ډوبۍ او ځینو نورو ځایونو کې وشوې. خو ده په پاکستان کې د ملابرادر او نورو طالب مشرانو د نیولو موضوع ته په اشارې سره وویل چې دې کار د سیاسي حل لارې پر هڅو ناوړه اغېزه وکړه.

نور راوښيه

XS
SM
MD
LG