د لاسرسۍ وړ لېنکونه

تازه خبر
پنجشنبه ۲۱ لیندۍ ۱۳۹۸ کابل ۰۲:۳۸

خبرونه

غزني کې د ملي اردو د دوو پوځي اډو اړتیا

ارشیف

د غزني ولايت د خواجه عمري ولسوال وايي په دې ولسوالۍ کې د ملي اردو دوو لويو پوځي اډو ته اړتيا ليدل کېږي.

احمد ضيا يعقوبي له ازادۍ راډيو سره په خبرو کې وويل، که دغه دوې پوځي اډې جوړې شي، خواجه عمري به بيا د دولت د وسله والو مخالفانو لاس ته نه لوېږي.

هغه وايي: "د امن د تامين لپاره که دوه بېسونه په حساسو پوځي ساحو قلور او ده دولت کليو کې ځاى پر ځاى شي، مقصد اردو بايد زمونږ تر څنګ وي، ځکه د دوى امکانات ډېر ښه دي، نو په ډاډه زړه تاسو ته ډاډ درکوم چې هېڅکله به بيا خواجه عمري ولسوالي سقوط ونه کړي."

ولسوال وايي، د خواجه عمري د امنيې قوماندانۍ د ودانۍ د بيانولو شپږ مياشتې کېږي خو تر اوسه نه ده رغول شوې.

ښاغلى يعقوبي وايي، ولسوالۍ ته يې د ميدان وردګ له جغتو ولسوالۍ څخه ځينې امنيتي ګواښونه شته.

خواجه عمري ولسوالي په تېره چنګاښ/سرطان مياشت کې د دولت له وسله والو مخالفانو ونيول شوه.

په غزني ولايت کې د ملي اردو چارواکو تېره اوونۍ ويلي وو، چې د يوې مياشتې په موده کې د غزني ٥ ولسوالۍ د دولت له وسلوالو مخالفانو نيول شوي دي.

د ايران پارلمان ١٦٠ وکيلانو د معترضینو د ځپلو په تړاو د څېړنو غوښتنه وکړه

د ایران پارلمان

د ايران د پارلمان ١٦٠ وکيلانو په دغه هېواد کې په مرګوني ډول د اعتراض کوونکو د ځپلو په اړه د څېړنو غوښتنه وکړه.

تېره مياشت دغه اعتراضونه د ايران سلو ښارونو او ښارګوټو ته خپاره شوي وو.

په ايران کې دغه اعتراضونه وروسته له هغې پيل شول، چې حکومت د تېلو بيې لوړې کړې او د هغوى پر کارونې يې سهميه ولګوله.

وکيلانو دغه غوښتنه ولسمشر حسن روحاني ته په يوه ليکلي پرانيستي ليک کې کړې ده.

دغه ليک د اپوزيسيون په ويبپاڼه "کلمه" کې تېره دوشنبه خپور شوى دى.

په ليکه کې ويل شوي، چې د اعتراض کوونکو ځپونکي دې له دندو ليرې او مجازات شي.

ايراني چارواکو تر اوسه د اعتراضونو پر مهال د وژل شويو رسمي ارقام نه دي خپاره کړي.

خو په لندن کې دېره، د بخښنې نړيوال سازمان ويلي، چې په ايران کې د هغه څه له کبله چې دغه سازمان ”د انسان ژوند ته شرموونکې بې اعتنايي“ بللې، لږ تر لږه ٢٠٨ کسان وژل شوي دي.

امريکا پر چچنيا چارواکي، پاکستاني پوليس او ١٨ نورو کسانو بنديزونه ولګول

د امريکا د خزانې وزير سټيفن منوچين

د امريکا متحدو ايالتونو د چچنيا پر يوه چارواکي، يوه پاکستاني پوليس او ١٨ نورو کسانو بنديزونه ولګول.

دغه کسان په دې تورن دي، چې له بشري حقونو په ښکاره سرغړونو کې ښکېل دي.

د امريکا د خزانې وزير سټيفن منوچين پرون په يوه اعلاميه کې وويل: ”امريکا به د ملکيانو په وړاندې شکنجه، اختطاف، جنسي تاوتريخوالى، وژنه يا هم ظلم ونه زغمي.“

منوچين دا خبرې د بشري حقونو د نړيوالې ورځې په مناسبت کړي دي.

د خزانې وزارت وايي، د روسيې د شمالي قفقاز د چچنيا جمهوريت په پلازمېنه ګروزني کې د کورنيو چارو وزارت يو رئيس اسلان ايراسخانوف او د کورنۍ غړي يې د امريکا خاورې له ننوتلو منع اعلان شوي دي.

په اعلاميه کې ويل شوي، چې ايراسخانوف د خپلې دندې پر مهال د ٢٧ کسانو د اعدام په قضيه کې دخيل و.

د خزانې وزارت په پاکستان کې پر يوه پوليس راو انور خان هم بنديز لګولى دى.

پر ده تور پورې شوى، چې د راپورونو پر اساس، د داسې جعلي وسلوالو نښتو ډرامه يې جوړه کړې، چې په نتيجه کې يې ګڼ کسان د پوليسو له خوا وژل شوي دي.

اتلس نور کسان په ميانمار، ليبيا، سلواکيا، کانګو، جنوبي سوډان او سعودي عربستان کې چارواکي يا هم سوداګر دي.

د متحدو ایالتونو ولسمشرۍ ټاکنو کې روسیې ته د امریکا خبرداری

د امریکا او روسیې د بهرنیو چارو وزیران

د امريکا د متحدو ايالتونو د بهرنيو چارو وزير خپل روسي سيال ته خبردارى ورکړ، چې د امريکا د ولسمشرۍ په راروانو ټاکنو کې به د مسکو احتمالي مداخله ناوړه پايلې ولري.

مايک پامپيو پرون په واشنګټن کې يوه کنفرانس ته چې د هغه روسى سيال سرګي لاوروف هم په کې حاضر و، وويل: "د ډونالډ ټرمپ اداره تل هڅه کوي چې زمونږ د ټاکنو د جريان بشپړتيا خوندي وي، که روسيه يا بل بهرنى لوبغاړى زمونږ د ډيموکراتيکو پروسو د کمزوري کولو اقدامات وکړي، موږ به ځوابي اقدام کوو."

تر دې مخکې د امريکا د ولسمشر ډونالډ ټرمپ منتقدانو ويلي چې روسيې د امريکا د جمهوري رياست د ٢٠١٦ میلادي کال په ټاکنو کې د ټرمپ په پلوي مداخله کړې ده خو مسکو دا تورونه رد کړي دي.

پرون په واشنګټن کې د امريکا او روسيې د بهرنيو چارو وزيرانو دغه راز پر نورو مسايلو، له دې جملې د واشنګټن او مسکو د اړيکو پر ښه کېدو هم بحث وکړ.

د دوى په خبرو کې د ايران، اوکراين، منځني ختيځ او يمن موضوعات هم شامل وو.

واشنګټن پوسټ: سپینې ماڼۍ د افغانستان ۱۸ کلنې جګړې په اړه ناسم معلومات ورکړي 

ارشیف

واشنګټن پوسټ ورځپاڼې د امریکا د حکومت د محرمو اسنادو پربنسټ یو راپور خپور کړی چې ښيي سپینې ماڼۍ د افغانستان په ۱۸ کلنه جګړه کې د نیمګړتیاوو په اړه خلکو ته غلط معلومات ورکړي دي.

په اسنادو کې دا خبره افشا شوې چې د افغانستان جګړه- چې په نتیجه کې یې ۲۳۰۰ امریکايي سرتېري وژل شوي او نژدې یو تریلیون ډالر لګښت پرې شوی، نوره د ګټلو نه ده.

د واشنګټن پوست راپور وايي، د څه باندې دوه زره پاڼو لرونکي دا اسناد د هغو کسانو د مرکو او لیکنو په استناد- چې د افغانستان په جګړه کې یې ونډه درلوده، د شکایتونو او اعترافونو او نورو شواهدو په اساس برابر شوي دي.

په راپور کې په جریاناتو کې شاملو شاوخوا ۴۰۰ کسانو د افغانستان لپاره د واشنګټن پر بدلېدونکې ستراتیژۍ، د اغېزمن افغان پوځ د جوړېدو پر نیمګړتیاوو، د طالبانو د ځپلو د عملیاتو پر ناکامۍ او په افغان حکومت کې د فساد پرضد د مبارزې پر څرنګوالي انتقاد کړی.

طالبانو جوزجان کې د یوه کلي سل اوسېدونکي برمته کړي

د جوزجان ځايي چارواکي وايي، طالبانو نن د فیض اباد ولسوالۍ له کوګل تاش کلي شا او خوا سل اوسېدونکي له ځان سره وړي دي.

د فیض اباد ولسوال الف شاه ازادي راډیو ته وویل: "یو شمېر سپين ږیري او قومي مشران چې غوښتل يې د الله بیرن د جنازې په مراسمو کې ګډون وکړي، د دولت وسله والو مخالفینو له ځان سره د خان آقا کلي پر لور بیولي دي او هغوی اوسمهال له مخالفینو سره اسیر دي."

د فیض اباد ولسوال زیاته کړه، دا کسان د ولسي پاڅونوالو د یوه قومندان الله بیرن په جنازه کې د ګډون په هدف روان وو چې د طالبانو لاس ته ولوېدل. الله بیرن د ولسي پاڅونوالو قومندان وو چې په یوه ترافیکي پېښه کې مړ شو.

طالبانو تر اوسه په دې اړه څه نه دي ویلي.

چک جمهوریت کې یوه بریدګر شپږ کسان په ډزو ووژل

ډزې نن سهار شا او خوا اووه بجې د روغتون په یوه انتظار خونه کې وشوې.

د چک جمهوریت د اوستراوا ښار په یوه روغتون کې یوه بریدګر شپږ کسان په ډزو وژلي او وروسته یې ځان هم وژلی دی.

د چک جمهوریت صدراعظم اندرې ببیش دولتي تلویزیون ته وویل چې دا یوه داسي غمیزه ده چې هیڅ ورباندي نه پوهيږي.

ببیش وویل چې ډزې سهار شا او خوا اووه بجې په یوه انتظار خونه کې وشوې.

پولیس وايي دوی د مشکوک کس موټر وموند او کله چې دوی نږدې ورغلل، حمله کوونکي ځان هم په ډزو وواژه. دوی وايي حمله کوونکی دوه څلوېښت کلن وو.

دا له ۲۰۱۵ میلادي کال راهیسي د چک جمهوریت تر ټولو خونړۍ حمله ګڼل کیږي. په ۲۰۱۵ میلادي کال کې یوه سړي وروسته له هغه ځان وواژه چې اته کسان یې په ډزو ووژل.

امریکایی سناتور: که پاکستان طالبان ونه ساتي افغانستان کې جګړه څو اوونیو کې پای ته رسي

ښاغلي ګراهام د امریکا فاکس ټلویزیون ته ویلي، له طالبانو سره د مذاکراتو خبره ناسمه ده.

امریکايي سناتور لینډسې ګراهام وايي، که پاکستان په دغه هېواد کې طالبانو ته خوندي ځایونه ورنه کړي، په افغانستان کې جګړه په څو اوونیو کې پای ته رسیدلای شي.

ښاغلي ګراهام د امریکا فاکس ټلویزیون ته ویلي، له طالبانو سره د مذاکراتو خبره ناسمه ده.

ده ویلي چې د طالبانو پر ځای امریکا باید له پاکستان سره مذاکرات وکړي او که پاکستان طالبانو ته د خوندي ځایونو ورکول بند کړي، په افغانستان کې به جګړه په یوازي یو څو اوونیو کې پای ته ورسيږي.

ګراهام ویلي چې دی غواړي له پاکستان سره د ازادې سوداګرۍ د یوه تړون له لارې چې هغه په امنیتي برخه کې د دې هېواد له فعالیت سره تړلی وي، دا هېواد خپل چلند بدل کړي.
پاکستان تل د طالبانو د ملاتړ تورونه رد کړي.

د امریکا ولسمشر ډونالد ټرمپ په سپټمبر میاشت کې په کابل کې د طالبانو تر یوه ځانمرګي برید وروسته چې د یوه امریکايي په ګډون دوولس کسان ووژل، له طالبانو سره د سولې خبرې لغوه اعلان کړې.

خو د نومبر په نهه ویشتمه نېټه ټرمپ په بګرام هوايي اډه کې د خبرو پر مهال وویل چې له طالبانو سره بېرته خبرې پیلوي ځکه فکر کوي طالبان اوربند غواړي. دا خبرې د دواړو لوریو ترمنځ د ډسمبر په اوومه بېرته پیل شوې.

یوناما د بشري حقونو په مناسبت د ځوانانو له کمپاین سره یوځای شوه

د افغانستان له پاره د ملګرو ملتونو د مرستندویه اداره (یوناما) د بشري حقونو د ورځې په مناسبت نن د ځوانانو له نړیوال کمپاین سره یو ځای شوه.

د دې ادارې په خبرپاڼه کې راغلي چې "ځوانان د بشري حقونو ملاتړ کوي" په نوم نړیوال کمپاین د تغيیر راوستلو او بشري حقونو د خوندیتوب په برخه کې د ځوانانو رول روښانه کوي.

په اعلامیه کې راغلي چې د افغانستان په درېیو کې دوه برخې نفوس تر پنځه ویشتو کلونو کم عمر لري.

په ۲۰۱۹ میلادي کال کې ملګرو ملتونو د کوچنیانو د حقونو د کنوانسیون دېرشمه کلیزه ولمانځله چې افغانستان يې په ۱۹۹۴ میلادي کال کې غړی شو.

خبرپاڼه زیاتوي چې ملیونونه کوچنیان له خپلو اساسي حقونو بې برخې دي، دوی پر ښوونځیو او روغتونو په حملو کې اغېزمن کیږي او په جګړه کې له بیلابیلو ځورونو سره مخامخ کیږي.

یوناما په دې اعلامیه کې لیکلي چې ملګري ملتونه به په افغانستان کې د بشري حقونو خپلواک کمیسیون په ګډون د دې هېواد د بنسټيزو ادارو د پرمختګ لپاره همکاري ته دوام ورکړي.

همداراز ویل شوي چې د ملګرو ملتونو امنیت شورا د پرېکړې له مخې به یوناما د ملکیانو د خوندیتوب، د بشري حقونو اړوند ارزونې او راپور ورکولو په برخه کې کار ته دوام ورکړي.

د کندز په چهاردره کې ۲۱ امنیتي سرتېري او ۴ ملکي وګړي ټپیان شوي

د کندز د چهاردرې ولسوالۍ

د کندز په چاردرې ولسوالۍ کې د هاوان د لګېدو په دوو پېښو کې ۲۱ امنیتي سرتېري او ۴ ملکي وګړي ټپیان شوي دي.

د کندز د امنیه قوماندانۍ ویاند انعام الدین رحماني نن آزادۍ راډیو ته وویل چې تېر ماښام یو هاوان پر امنیه قوماندانۍ او یو بل د ملکي وګړو د استوګنې پر یوه سیمه ولګېدل.

هغه زیاتوي: "د هاوان د لومړۍ مرمۍ په چاودنه کې ۲۱ امنیتي سرتېري برسېرن ټپیان شول، د سردارانو په کوڅه کې د دوهم هاوان په چاودنه کې د کندز څلور اوسېدونکي ټپیان شول."

ښاغلی رحماني وايي چې د پېښې ټپیان روغتون ته لېږدول شوي دي او د هغوی وضعیت د ډاډ وړ دی.

د طالبانو ویاند ذبیح الله مجاهد ویلي دي چې د چاردرې ولسوالۍ پر امنیه قوماندانۍ دوی هاوانونه توغولي چې په نتیجه کې یې زیات شمیر حکومتي سرتېري وژلي او ۲۲ نور یې ټپیان کړي دي.

غزني کې د شهیدانو او معلولینو چارو آمر وژل شوی

د غزني د شهیدانو او معلولینو چارو امر وژل شوی.

وسله والو په غزني کې د شهیدانو او معلولینو چارو آمر وژلی.

په غزني کې وسله والو د دغه ولایت له پاره د شهیدانو او معلولینو سرپرست آمر نصر الله سیاسي وژلی دی.

د ولایت ویاند محمد عارف نوري وايي پر نوموړي د سه شنبې په ورځ سهار د غزني ښار په دریم پلان سیمه کې د بې غږه توپانچې په وسیله برید شوی دی.

نوري زیاتوي، وسله وال له سیمې څخه تښتېدلي دي.

تر اوسه پورې د دغې پېښې پړه چا پر غاړه نه ده اخیستې.

دا په داسې حال کې ده چې په دغه ولایت کې ډیری وخت دولتي کارمندان، امنیتي سرتېري او قومي مشران او دیني عالمان په نښه کېږي.

--

جاپان د اټومي لانجې په اړه تهران او واشنګټن سره مرسته کوي 

د جاپان صدراعظم شینزو ابې

د جاپان صدراعظم وایي، د ایران ولسمشر ته هغه هېوادته د ورتلو بلنه ورکوي څو د ایران د اټومي پروګرام پرسر د تهران او واشنګټن ترمنځ د کړکیچ له هواري سره مرسته وکړي.

د جاپان صدراعظم شینزو ابې وایي، هېواد یې د ایران د ولسمشرحسن روحانې کتنې ته تیاری نیسي ځکه غواړي چې د هغې اټومي لانجې په هوارولو کې پراخ رول ولوبوي چې د تهران او واشنګټن ترمنځ را ولاړه شوې ده.

ابې چې په توکیو کې په یوه خبري کنفرانس کې خبرې کولې دغه راز وویل چې دا هیواد همداشان غواړي چې په منځني ختیځ کې د کړکیچ له کمولو سره مرسته وکړي.

هغه زیاتوي: "له جاپانه د ایران د ولسمشر حسن روحاني پرکتنې خبرې روانې دي، نړیواله ټولنه له جاپانه چې له متحدو ایالتونو سره شراکت لري او په عین حال کې هم له ایران سره له اوږدې مودې راهیسې ښه اړیکی لري، تمه کوي چې وضعیت ته رسیدګي وکړي."

د اسوشیتید پرس خبري آژانس د راپور له مخې جاپان چې د تېلو په برخه کې په سلو کې اتیا د ایران په تېلو متکي دي، د دې هېواد صدراعظم په تېر جون میاشت کې هم ایران ته تللی و چې ایران او متحده ایالات دواړه دې ته وهڅوي چې د کړکېچ د کمولو لپاره په خپلو کې خبرې وکړې خو دغو هڅو یې نتیجه ور نه کړه.

د جاپان صدراعظم شینزو ابې که څه هم جاپان ته د ولسمشر روحاني د ورتلو په اړه نور جزیات ورنکړل خو د دې هېواد رسنیو ویلي چې دغه سفرد روانې میاشتې په وروستیو کې تنظیم شوی.

له مالېزیا څخه د روحاني د پلان شوې کتنې مخکې یا وروسته.

ټاکل شوې چې حسن روحاني د اسلامي هیوادونو د کنفرانس په سرمشریزه کې چې مالیزیا به یې کوربنه وي، ګډون وکړي.

د تهران او واشنګټن ترمنځ کړکیچ وروسته له هغې زیات شو چې د امریکا ولسمشر ډونالډ ټرمپ د تیرکال په مې میاشت کې د ایران او د نړۍ د قدرتونو ترمنځ د ۲۰۱۵ میلادي کال له اټومي تړون ووت او له هغې راهیسې یې پر ایران بیرته بندیزونه ولګول.

د واشنګټن بندیزونو تر ډېره د ایران د تېلو صنعت ډیر اغېزمن کړی دی.

دغه بندیزونه ایران نه پرېږدي چې پر بهرنیانو اومه تېل وپلوري، هغه چې د دې هېواد د عوایدو اصلي سرچینه بلل کیږي.

دغو بندیزونو ته په پام تهران هم په تدریجې ډول له هغو ژمنو په شا شوی چې په شوي اټومي تړون کې یې کړي دي.

د جاپان صدراعظم زیاته کړه چې جاپان به تر خپلې وسې هڅه وکړي چې د دوامداره خبرو له لارې په منځني ختیځ کې کړکېچ کم او وضعیت ثبات ومومي.

ښاغلي ابې وویل، د دې ترڅنګ چې جاپان به دې هېواد ته د تېلو لېږدولو د کشتیو امنیت تامینوي، د انرژۍ خوندي کولو ته په پام دا د جاپان دنده ده چې په سیمه کې د سولې او ثبات په ټینګښت کې خپل رول ولوبوي.

هرات کې کډوالو او امنیتي ځواکونو کورنیو ته د ځمکو نمرې ورکول کېږي

ارشیف

د افغانستان د کډوالو او راستنیدونکو چارو وزیر سید حسین عالمي بلخي وايي، په هرات کې ۲۵۰۰ نومرې مځکه کورنیو بې ځایه شویو کډوالو، راستنیدونکو او په افغان امنیتي او دفاعي ځواکونو کې د قرباني شویو کسانو کورنیو ته ویشل کیږي.

ښاغلي بلخي نن هرات ولایت ته د یو سفر په ترڅ کې وویل د استوګنې د کورونو د جوړولو لپاره به دا نومرې د زنده جان ولسوالۍ په سعادت ښارګوټي وویشل شي.

د نوموړې په وینا د مځکو دا ویش به په شپږ میاشتو کې ترسره شي.

د هرات د کډوالو او راستنیدونکو چارو د ریاست شمیرې ښيي چې همدا اوس په دې ولایت تر ۱۵۰ زرو زیاتې داخلي بې ځایه شوې کورنۍ له دوی سره ثبت دي.

طالبانو د ټاکنو کمېسیون ۸ کارکوونکي خوشي کړي

ارشیف

وسله والو طالبانو په پروان کې د ټاکنو د خپلواک کمېسیون اته برمته کړي کارکوونکې خوشې کړي.

د پروان ولایت د شینوارو ولسوال محمد اکوګل محمدي ازادي راډیو ته وویل، دا کسان دوه نیمې میاشتې مخکې وسله والو طالبانو نیولې وو.

د ښاغلي محمدي په وینا په دې موده کې ددې کسانو د خوشې کېدو لپاره لسګونه ځله قومي مشرانو د طالبانو سره د منځکړیتوب هڅه کړې ده.

د پروان د شینوارو ولسوال په وینا د خوشې شویو کسانو روغتیايي وضیعت د ډاډ وړ دی.

هغه دا نه دي ویلي چې دا کسان طالبانو خپله خوشې کړي او که د دوی له خوا ورسره کوم جوړجاړی شوی دی.

د پروان ولایت شینوارو ولسوالۍ کې د تلې په شپږمه نېټه د ولسمشرۍ د ټاکنو په ورځ طالبانو د ټاکنو د خپلواک کمېسیون لس قرادادي کارکونکي برمته کړي وو.

ایران: افغان دولت باید د سولې راتلونکو مذاکراتو کې اساسي رول ولري

ولسمشر غني ترکیه کې د ایران د بهرنیو چارو وزیر جواد ظریف سره د لیدنې پرمهال.

د ایران د بهرنیو چارو وزیر وایې د افغانستان دولت باید د سولي د راتلونکو مذاکراتو اساسي رول ولري.

محمد جواد ظریف د دوشنبه په ورځ د آسیا زړه – یا د استانبول پروسې د اتم کنفرانس په څنډو کې له افغان ولسمشر اشرف غني سره د لیدو پر مهال دا خبره کړې ده.

له ارګ څخه په یوې اعلامیې کې راغلي چې د ایران د بهرنیو چارو وزیر پدې لیدنه کې د افغانستان د ټولو لاسته راوړنو پر خوندیتوب ټینګار وکړ او ویویل چې غواړي په افغانستان کې جګړه پای ته ورسیږي.

اعلامیه زیاتوي ولسمشر غني د افغانستان امنیت او ثبات د ایران په ګډون د سیمي او نړۍ د امن لپاره ګټور وباله او ټینګار یې وکړ چې افغانستان به د هغو تروریستي ډلو پر ضد چې په افغانستان کې فعالیت کوي مبارزه وکړي.

ولسمشر غني دا هم ویلي چې سوله د افغان حکومت مهم لومړیتوب دی خو په وینا یې اساس به دا وي چې اوربند وشي او له هېواده بهر د طالبانو د پټنځایونو ستونزه هواره شي.

د ایران د بهرنیو چارو وزیر داسې مهال دا څرګندوني کړې چې په قطر کې د امریکایې پلاوي او طالب مرکچیانو ترمنځ خبرو نن څلورمه ورځ ده .

په دې خبرو کې د افغانستان د سولې لپاره د واشنګټن ځانګړی استازی زلمی خلیلزاد د طالبانو د سیاسي دفتر له استازو سره پر هغه څه بحث کوي چې د خلیلزاد مطبوعاتي دفتر په افغانستان کې د تاوتریخوالي کمول او بالاخره یو اوربند ته رسېدل بللي دي.

د تېرو دریو ورځو په خبرو کې تر اوسه د کوم پرمختګ راپور نه دی ورکړل شوی.

په سېپتمبر کې د امریکا او طالبانو ترمنځ د پخوانیو مذاکراتو تر لغو کېدو وروسته د طالبانو پلاوي دوه ځله په تهران کې له ایراني چارواکو سره لیدلي دي.

نور راوښيه

XS
SM
MD
LG