د ترکیې د بهرنیو چارو وزیر د منځني ختیځ د شخړو په خاطر د اسراییل پر ضد د نړیوالو بندیزونو او لهدې هېواد سره د نړیوالې ټولنې د ملاتړ د پرې کولو غوښتنه وکړه.
هاکان فیدان پرون (سهشنبې) د خپل هېواد د واکمن ګوند له استازو سره د فلسطین په اړه په غونډه کې وویل، باید نور د خبرو او ډیپلوماسۍ له پولو هاخوا لاړ شي او پر اسراییل باید بندیز ولګول شي.
د ترکیې د بهرنیو چارو وزیر د سهشنبې په ورځ له خپل اردني سیال ایمن الصفدي سره په کتنه کې وویل: "نن ورځ اسراییل د نړیوالې سولې او امنیت لپاره پر اصلي ګواښ بدل شوی دی، خو اسراییل دغه جرم په یوازې سر نه ترسره کوي."
نوموړي زیاته کړه چې، ځینې هېوادونه شته چې د اسراییل ملاتړ کوي او وسلې ورکوي.