د لاسرسۍ وړ لېنکونه

تازه خبر
شنبه ۲۳ لیندۍ ۱۳۹۸ کابل ۰۶:۱۳

ایساف پر وسلوالو مخالفینو پسرلني یرغل ته چمتوالی نیسي


جنرال بلاټز وايي، موږ هڅه کوو چې شرایطو ته داسې بدلون ورکړو، چې کله مخالفین حمله وکړي
په روان پسرلي کې د افغانستان په بیلابیلو سیمو کې د وسلوالو مخالفینو حملو د زیاتیدو په اړه د اندیښنو په ډېریدو سره، د ناټو ځواکونو چارواکي وايي، دوی به پرمخالفینو خپلې یرغلیزې ستراتیژۍ ته دوام ورکړي.

د دغو ځواکونو چارواکي هم موسم ته په کتو سره د وسلوالو مخالفینو له خوا په حملو کې د زیاتوالي اټکل کوي.

خو د ناټو په مشرۍ د ایساف ځواکونو ویاند جنرال جوزف بلاټز په کابل کې خبریالانو ته وویل، چې د وسلوالو مخالفینو د احتمالي حملو د مخنیوي لپاره دوی پسرلني یرغل ته چمتوالی نیسيي:

په انتظار

"موږ د یوه پسرلني یرغل په انتظار یو، دغه یرغل ښايي د اپریل یا د مې په میاشت کې چې د تریاکو د حاصلاتو د راټولو وخت به وي، ترسره شي.

موږ هڅه کوو چې شرایطو ته داسې بدلون ورکړو، چې کله مخالفین حمله وکړي، د تیر کال په پرتله له لا سختو شرایطو سره مخ شي. هڅه کوو داسې چمتوالی ولرو، چې د دې فرصت ولرو، چې ملکي خلکو ته د مرګ ژوبلې مخنیوی وشي."

جوزف بلاټز همداراز وویل، چې ناټو ځواکونه د هلمند او پاکستان ترمنځ په سرحدي سیمو کې هم له افغان ځواکونو سره د ګډو عملیاتو د ترسره کولو پلان لري.

نوموړي د دغو عملیاتو په اړه ډیر جزیات ورنه کړل، خو ویې ویل، په دې سره به هڅه وشي چې د افغانستان په جنوب او له جنوب نه بهر د وسلو او مخدره موادو د قاچاق او د وسلوالو مخالفینو د تګ او راتګ مخنیوی وشي.

په هلمند ولایت کې مو د موبایل شبکو پر خدمتونو بندیز د خپلو کسانو د امنیت لپاره لګولی دی.

طالبان
بلاټز په هلمند ولایت کې د موبایل شبکو په خدمتونو بندیز ته هم اشاره وکړه او ویې ویل، دا ښيي چې وسلوالو مخالفینو په هلمند او کندهار ولایتونو کې له افغان او نړیوالو ځواکونو سره د مخامخ جګړې توان له لاسه ورکړی.

وسلوالو طالبانو ویلي دي، چې په هلمند ولایت کې یې د موبایل شبکو پر خدمتونو بندیز د خپلو کسانو د امنیت لپاره لګولی دی او تر بلې پریکړې به دغه بندیز په خپل ځای پاتې وي.

په افغانستان کې هر کال د پسرلي په موسم کې د وسلوالو مخالفینو له خوا د بریدونو لړۍ تیزېږي، چې ورسره یې پر ضد د افغان او نړیوالو ځواکونو عملیات هم شدت اخلي.

خو د جګړو په دغه شدت کې بیا هم ډیر ځلې عام افغانان د سر او مال له زیان سره مخ شوي. د ملګرو ملتونو او د افغانستان د بشر د حقونو د خپلواک کمیسیون د ګډ راپور له مخې تیر میلادي کال په افغانستان کې له ۲۷۰۰ نه ډير ملکي خلک په جګړو کې وژل شوي دي.

راپور: احمد زبیر ژمن – کابل
XS
SM
MD
LG