د لاسرسۍ وړ لېنکونه

تازه خبر
پنجشنبه ۱۸ غبرګولی ۱۴۰۲ کابل ۰۰:۱۰

نړۍ

جرمني د ټيسلا شرکت په اړه څېړنې کوي

د ټيسلا شرکت

د ټیسلا برښنايي موټرو د کارکوونکو د شخصي معلوماتو تر افشا کېدو وروسته د جرمني چارواکو پرون وویل چې د دې شرکت په اړ څېړنې کوي.

د راپورونو له مخې زیات احتمال دا و، چې دغه افشا شوي شخصي اطلاعات د امریکا په دې کمپنۍ کې په پراخه پیمانه د لاسرسي وړ وي.

د جرمني په برادن­برګ کې چې ټیسلا په کې لویه فابریکه لري، د معلوماتو د خوندیتوب ادارې ویاند د دې څېړنې خبر ورکړی دی.

هغه ویلي، دا موضوع ځکه مهمه ده چې د اطلاعاتو د خوندیتوب له اړخه ښايي په ټوله نړۍ کې خلک اغېزمن شوي وي.

د جرمني یوې تجارتي ورځپاڼې راپور ورکړی چې د ټیسلا د کارکوونکو د سلو جي بي په شاوخوا کې اطلاعات د سلو مخبرانو له خوا لاس په لاس شوي دي.

دغه افشا شوي اطلاعات د ټیسلا د کارکوونکو، مشتریانو او تجارتي پروژو په اړه دي.

ټیسلا د جرمني دغې ورځپاڼې ته ویلي، د دوی شک دا دی چې یو مخکېنی کارکوونکی یې ښايي په دې افشاګرۍ کې لاس ولري.

د ورځې تازه خبرونه دلته ولولئ

جرمني د هوايي ځواک تر ټولو لویو تمريناتو ته تیاری نيسي

د جرمني هوايي ځواکونه

جرمني د هوایي ځواکونو تمرینونو ته چې د ناټو په تاریخ کې تر ټولو لوی تمرینونه بلل شوي، تیاری نیسي.

جرمني او امریکایي چارواکو ویلي، د دغه ځواک له ښودلو یې هدف پر متحدینو او احتمالي دښمنانو لکه روسیې د اغېزو شیندل دي.

د هوایې مدافعې په دغو تطبیقاتو کې به چې راتلونکې اوونۍ پیلېږي، لس زره پرسونل او د ۲۵ هېوادونو دوه‌ نیم سوه الوتکې د ناټو پر یوه غړي حملې ته ورته یوه ننداره کې ګډ غبرګون ښکاره کړي.

ياد تطبیقات مخکې له دې چې روسیه پر اوکراین یرغل وکړي، له ۲۰۱۸ م کال راهیسې پلان شوي وو.

د روسیې یرغل ناټو تړون دې ته اړ ایستلی چې پر قلمرو یې د احتمالي برید لپاره جدي تیاری ولري.

اوکرايني چارواکو د خيرسون لسګونه زره کسان له خپلو مېنو بې‌ځايه کړي

د دنیپرو پر سیند ودان د لوی بند د نړېدو په نتیجه کې اوبه د خلکو کورونو ته رسېدلي.

اوکرایني چارواکو په خیرسون سیمه کې په لسګونو زره کسان له خپلو اصلي ځایونو وروسته له هغې بې‌ځایه کړي چې د دنیپرو پر سیند ودان د لوی بند د نړېدو په نتیجه کې په سیند کې د اوبو کچه لوړه شوې او تمه کېده چې نن سهار به یې کچه په لاندنۍ برخه کې نوره هم لوړه شي.

کییف او مسکو د کاخوفکا د بند چې د شوروي په وخت کې د اوکراین د خیرسون په جنوبي سیمه کې جوړشوی و، د ویجاړولو پړه پر یو بل اچوي.

د اوکراین ولسمشر ولودمیر زیلینسکي دا پېښه د روسیې له‌خوا په قصدي توګه د ویجاړۍ یو عمل او د ډله‌ییزې وژنې چاپېریالي بم یاد کړی دی.

زیلینسکې ویلي، د بند په لاندنۍ برخه کې شاوخوا اتیا مېشت ځایونه د دغه بند د نړېدو له امله له خطر سره مخ شوي دي.

چارواکو اټکل کړی چې په راتلونکو ۲۰ ساعتونو کې به د سیند په لاندنۍ برخه کې د اوبو کچه یو متر نوره هم لوړه شي.

د مسکو تر کنټرول لاندې د خیرسون د برخې چارواکو نن په سیمه کې بېړنی حالت اعلان کړی دی.

انټوني بلېنکن عربستان ته رسېدلی

د امریکا د بهرنیو چارو وزیر انټوني بلېنکن

د امریکا د بهرنیو چارو وزیر پرون سعودي عربستان ته ورسېد او تمه ده چې نن به له جګ‌پوړو سعودي چارواکو سره وګوري.

د انټوني بلېنکن د سفر هدف دا دی چې د واشنګټن او ریاض ترمنځ د ایران، سیمه‌يیزو امنیتي مسایلو او د تېلو د بیو پر سر له څو کلونو راهیسې ترینګلي شوي اړیکې بیا ورغوي.

بلېنکن به د ولیعهد محمد بن سلمان په ګډون چې د سعودي عربستان اصلي واکمن بلل کېږي د سعودي عربستان له چارواکو سره وګوري.

بلېنکن دویم امریکايي چارواکی دی چې په یوه میاشت کې سعودي عربستان ته سفر کوي.

له دې مخکې د سپینې ماڼۍ د ملي امنیت سلاکار جګ سولیوان د مې میاشتې په لومړیو کې دې هېواد ته سفر کړی و.

بلېنکن به سبا پنجشنبې خپل سفر پای ته ورسوي.

فوټبال؛ بینزیما د عربستان له الاتحاد لوبډلې سره تړون لاسلیک کړی

کریم بینزیما

د فرانسې هېواد د فوټبال نوموتي ستوري کریم بینزیما د سعودي عربستان د 'پرولیګ' سیالیو لپاره د الاتحاد له لوبډلې سره تړون لاسلیک کړی دی.

د سې‌شنبې په ورځ د جون په ۶مه نېټه د الاتحاد لوبډلې په خپلې ټوېټر پاڼې لیکلي چې له کریم بینزیما سره یې د درې کلونو لپاره تړون کړی دی او تر ۲۰۲۶ کاله پورې به له یاد کلب سره لوبېږي.

یاد کلب له ښاغلي بینزیما سره لاس‌لیک شوی تړون د سعودي عربستان فوټبال د ودې لپاره یو بل مهم ګام بللی دی.

الاتحاد لوبډلې د دې تړون د قیمت په تړاو څه نه‌دي ویلي، خو په نورو رپوټونو کې ویل شوي دي چې کریم بینزیما ته به د کال ۲۰۰ میلیونه یورو ورکول کېږي.

وروسته له هغې چې د النصر لوبډلې له کریسټیانو رونالډو سره تړون وکړ، دا د سعودي پرو لیګ په تاریخ کې دویم قیمتي لوبغاړی دی چې پېرل کېږي.

کریم بینزیما چې په ۲۰۲۲ کال کې د فوټبال د سروزرو کپ هم ګټلی دی، تر دې تړون وړاندې یې له ریال ماډریډ لوبډلې سره ۶۴۷ سیالۍ کړې دي چې ۳۵۳ ګولونو یې وهلي دي.

د رپوټونو له مخې چې د سعودي عربستان د پرولیګ سیالیو نورې لوبډلې هم هڅې کوي چې له ځینو مشهور لوبغاړو لکه لیونل میسي سره تړون وکړي.

د سوډان په جګړه ځپلې پلازمېنه کې بیا جګړې پیل شوې

د سوډان د روانو جګړو یو انځور

عیني شاهدانو ویلي چې د سوډان په جګړه ځپلې پلازمېنه خرطوم کې پرون سې شنبه یو وار بیا جګړې پیل شوې دي.

په داسې حال کې چې قحطي په پراخېدو ده، د نیل سیند په یوه ټاپو کې ځايي اوسېدونکو ویلي، چې دغه ټاپو تر محاصرې لاندې دی.

د سعودي عربستان او د امریکا متحدو ایالتونو په منځګړیتوب د سوډان د پوځ او د چټک ملاتړ د ځواکونو په نوم د ملېشه ډلې ترمنځ اوربند د مې میاشتې پر ۲۲مه پیل شوی و او تېره شنبه یې مهلت پای ته ورسېد.

دغه جګړه د پوځ د مشر عبدالفتاح البرهان او د چټک ملاتړ د ځواکونو په نوم د ملېشه وو د قوماندان محمد حمدان دقلو ترمنځ روانه ده.

په سوډان کې څو څو وارې پر لنډمهالو اوربندونو موافقې شوي، خو بېرته ورڅخه سرغړونې شوې دي.

د خرطوم اوسېدونکو پرون د فرانسې خبري اژانس ته ویلي، یو وار بیا د خرطوم په شمال کې د درنو او سپکو وسلو د ډزو غږونه اورېدل کېږي.

د امریکا، جاپان او فیلیپین سرحدي کښتیو د چین سمندرګي ته څېرمه تمرینات کړي

ارشیف: د امریکا او فیلیپین د سرحدي کښتیو د ګډو تمریناتو یو انځور

د امریکا متحدو ایالتونو، جاپان او فیلیپین د سرحدي ساتنې کښتیو پرون سې شنبه د چین لانجمن سمندرګي ته څېرمه په اوبو کې د قانون د تنفیذ تمرینات وکړل.

واشنګټن په اسیا کې داسې وخت د متحدانو د پیاوړتیا هڅه کوي، چې د اسوشېټېډ پرېس اژانس په لیکنه، له عمده حریف چین سره یې کړکېچ په زیاتېدو دی.

د امریکا ساحلي ساتونکو خپله تر ټولو لویه جنګي کښتۍ د جون له لومړۍ تر اوومې نېټې پورې په سیمه کې ځای پر ځای کړې چې د واشنګټن تر ټولو لوی متحد هېواد فیلیپین یې کوربه دی.

د امریکا ساحلي ساتونکو ویلي دغې کښتۍ یې مخکې هم په تمریناتو کې برخه اخیستې چې د قانون د تنفیذ، پلټنې او ژغورنې په برخه کې خپلې تجربې د تمریناتو له نورو ګډونوالو سره شریکې کړي.

جاپان هم د ساحي ساتونکو لویه کښتۍ په کار اچولې، چې د فیلیپین د ساحلي ساتونکو څلور جنګۍ کښتۍ ورسره ملګري شوي دي.

فورډ شرکت بیا زرګونه سپورټي او لارۍ موټرې ټولوي

ارشیف

د موټرو تولیدوونکي شرکت فورډ پرون سې شنبه د یو لک او ۲۵۰۰۰ سپورټي او لارۍ موټرونو د بیا ټولولو خبر ورکړی دی.

د دې شرکت په خبره دغه غوښتنه یې د دې لپاره کړې، چې د دغو موټرو په انجن کې یوه خرابۍ ښايي د اورلګېدو سبب شي.

د لویو لارو د ټرافیک د خوندیتوب ادارې د یوه سند له مخې په دغو موټرو کې چې د بیا ټولولو غوښتنه یې شوې، ایسکېپ او د لینکولن کورسېر او ماوریک پیک اپ موټرونه شامل دي، چې د ۲۰۲۰ او ۲۰۲۳م کلونو دي.

په دغو موټرو کې دوه نیم لیټره هایبرید او پلګ این هایبرید انجن لرونکي موټرونه شامل دي.

فورډ په لومړیو کې د ۲۰۲۲م کال په جولای میاشت کې د امریکا په متحدو ایالتونو کې د بېلابېلو ماډلونو د یو لک عرادې موټرو د ټولولو خبره کړې وه، خو کله چې د نړۍ په نورو برخو کې هم د ماشینونو د اور اخیستو یا هم ورڅخه د لوګي پورته کېدو راپورونه ثبت شول، دغه شمېر زیات شو.

په عربستان کې د ایران سفارت بېرته پرانیستل شو

په ریاض کې د ایران سفارت

د سعودي عربستان په پلازمېنه ریاض کې نن د ایران سفارت بېرته پرانیستل شو.

دا خبر د سعودي رسنیو ورکړی دی.

په ریاض کې د ایران سفارت څو میاشتې وروسته له هغې پرانستل کېږي چې دغو دواړو سیمه ییزو سیالانو د چین په منځګړیتوب د خپلو ډیپلوماتیکو اړیکو د بېرته ټینګېدو په اړه موافقه وکړه.

ایران او سعودي عربستان له څو کلونو تربګنۍ وروسته چې په منځني ختیځ کې یې ثبات له خطر سره مخ کړی او د یمن، سوریې او لبنان په ګډون یې سیمه ییزو شخړو ته لمن وهلې وه، په تېره مارچ میاشت کې په خپلو دوه اړخیزې اړیکې بېرته ټینګې کړې.

د اړیکو د ټینګېدو موافقه اوه کاله وروسته له هغې وشوه چې سعودي عربستان د ایران په پلازمېنه تهران کې پر خپل سفارت له برید وروسته له دې هېواد سره اړیکې پرې کړې وې.

په تهران کې د سعودي پرسفارت معترضینو دغه برید د ریاض له خوا د یوه شیعه ملا د اعدام په غبرګون کې کړی و.

ایران په کور دننه لومړنی جوړ شوی بالسټیک توغندی نندارې ته وړاندې کړ

ایراني چارواکو ویلي چې د فتاح په نوم دغه هایپرسونیک توغندی له هر ډول دفاعي چتر څخه تېرېږي، خو د دغې ادعا په اړه شواهد نه‌دي وړاندې شوي.

د ایران د سپاه پاسداران انقلاب ځواکونو نن سې‌شنبې په کور دننه جوړ شوی لومړنی داسې بالسټیک توغندی وښود، چې تر غږه چټک ځي.

د ایران دولتي رسنیو د دې هېواد د سپاه پاسداران انقلاب ځواکونو د چارواکو له قوله ویلي چې د فتاح په نوم دغه هایپرسونیک توغندی له هر ډول دفاعي چتر څخه تېرېږي، خو د دغې ادعا په اړه شواهد نه‌دي وړاندې شوي.

د راپورونو له مخې د دغې نوي توغندي د ښودلو په مراسمو کې د ایران د سپاه پاسداران انقلاب ځواکونو قومندانانو او د ایران ولسمشر ابراهیم رییسې چې نوم یې ده پخپله غوره کړی، ګډون کړی و.

رییسي وویل: "موږ نن داسې احساس کوو چې د حملو د مخنیوي لپاره یو ځواک رامنځته شوی دی."

د ایران د هوایي فضایي ځواکونو قومندان امیرعلي حاجي‌زاده ویلي، دغه نوی توغندی کولای شي چې په یوه ساعت کې پنځلس‌نیم زره کیلومتره واټن ووهي.

خو د لوېدیځ چارواکو ویلي چې ایران تل د خپلو نویو توغندیو په اړه مبالغه کوي.

ټېسټ کرکټ؛ سبا د هندوستان او اسټرالیا ترمنځ د ټېسټ اتلولیو پایلوبه پيلېږي

د هند او اسټرالیان ترمنځ د یوې پخوانۍ ټېسټ لوبې انځور

د کرکټ نړیوالې شورا له لوري د ټېسټ اتلولیو د پيل شویو سیالیو پایلوبه سبا چهارشنبه د جون ۷مه د هندوستان او اسټرالیا ترمنځ پیلېږي.

دغه سیالي به د انګلستان په 'اوول' لوبغالي کې په ځايي وخت سهار ۱۰:۳۰ بجې پيل شي.

دواړه لوبډلې له یوې اونۍ راهیسې لندن ته راغلي او په تمریناتو بوخت دي.

په دې پایلوبه کې به د یادو لوبډلو په ۱۱کسیز ترکیب کې د کرکټ د نړۍ مشهور ستوري ویرات کولي، روحیت شرما، سټیف سمېټ، مېچل سټارک، ډیوېډ وارنر، شبمن ګېل، محمد شامي او نتن لاین لوبه وکړي.

د ویلو ده چې د دې پایلوبې ګټونکې لوبډلې ته به تر یو نیم میلیون امریکايي ډالر ورکړل شي.

نور راوښيه

XS
SM
MD
LG