د امریکا مخکینی ولسمشر ډونالډ ټرمپ به نن سې شنبه په نیویارک کې محکمې ته حاضر شي.
دا د امریکا په تاریخ کې لومړی ځل دی چې یو واکمن یا پخوانی ولسمشر د جرمي قضیې په تور محکمې ته حاضرېږي.
د پنجشنبې په ورځ قضايي پلاوي پرېکړه وکړه چې د امریکا مخکینی ولسمشر باید په دې خاطر رسماً تورن شي چې د پورن فلمونو لوبغاړې سټورمي ډنیلز ته یې ۱۳۰ زره ډالر ورکړي چې خوله پټه کړي او څه ونه وايي.
که څه هم تر اوسه پورې د ټرمپ خلاف د تورونو جزییات ډېر څرګند نه دي، خو دا به د متحدوایالتونو د یوه مخکیني ولسمشر خلاف د جرم لومړنۍ دوسیه وي.
د ټرمپ مدافع وکیلې سوزان نیچل دا خبره تایید کړه او ویې ویل چې موکل یې هېڅ جرم نهدی کړی، خو له دې سره سره به دا په محکمې کې د دې دوسیې پر وړاندې، چې هغې سیاسي وبلله، دفاع وکړي.
د منهټن د سیمې څارنوال الوین بیزګ ته دنده سپارل شوې وه چې دونالډ ټرمپ او د هغه وکیلانو ته خبر ورکړي.
د ده د مدافع وکیلانو ډله وايي، نوموړی به راتلونکې اوونۍ پخپله ځان تسلیم کړي.
د امریکا خفیه پولیس به، چې د دغه هېواد د اوسني او پخوانیو ولسمشرانو د ساتنې مسوولیت لري، د محاکمې په لړ کې امنیتي تدابیر غوره کړي.
ټرمپ باید د نورو کسانو په شان، چې په جرم تورن شوي وي، هغه مراحل بشپړ کړي چې تورن کسان یې تېروي لکه د ګوتو د نښو ورکول او عکس اخیستل.
له بلې خوا سټورمي ډنیلز ویلي چې دونالډ ټرمپ په ۲۰۰۶ کې له دې سره جنسي اړیکې لرلې او دا هغه وخت و چې له اوسنۍ مېرمنې منیلا ترمپ سره یې د واده یو کال تېر شوی و.
د ډونالډ ټرمپ پخواني وکیل مایکل کوهن د محاکمې په لړ کې وویل، د ټرمپ په امر او له هغه سره په مشوره یې سټورمي ډنیلز ته یولک او ۳۰ زره ډالر ورکړل چې د دې موضوع په اړه خوله پته کړي.
خو ډونالډ ترمپ له مېرمن ډنیلز سره د اړیکو لرل ردوي او په وروستیو کې یې د خپلې ټولنیزې شبکې 'ټروت سوشل' له لارې پر خپلو پلویانو غږ وکړ چې که د ده د نیولو امر وشو، نو اعتراض پرې وکړئ.
ټرمپ حاضردمه د امریکا د راتلونکي کال د ولسمشرۍ انتخاباتو ته د جمهوريپال ګوند د کاندیدانو د لېست په سر کې دی.
د امریکا په قانون کې داسې ماده نهشته چې که د ولسمشرۍ یو کاندید مجرم وپېژندل شي، د انتخاباتي کمپاین په وسیله دې حتی له بنده خوشې شي.
