د لاسرسۍ وړ لېنکونه

تازه خبر
دوشنبه ۱۴ لیندۍ ۱۴۰۱ کابل ۱۲:۰۴

نړۍ

نظر پوښتنه: ښايي 'بنیامین نتنیاهو' بيا د اسرائيل صدراعظم وټاکل شي

بنیامین نتانیاهو صدراعظم سابق اسرائیل

په اسرائیل کې د پرونیو انتخاباتو اړوند نظر پوښتنې ښيي چې د بنیامین نتنیاهو په مشرۍ ښي‌پالي په‌کې مخکې دي.

که دا نظرپوښتنه له اصلي نتایجو سره سمون ولري نو نتنیاهو به چې شپاړس میاشتې مخکې د صدارت له مقامه لیرې شو او په اپوزیسیون کې و، یو ځل بیا صدراعظم شي.

د هغې نظر پوښتنې له‌مخې چې نتایج یې پرون ماښام خپاره شول، د اوسني صدراعظم یاییر لاپید ګوند به په دې انتخاباتو کې ماتې وخوري.

د کان په نوم د اسرائیلو یوه ټلوېزیون د رایو د اویا صندوقونو د نتیجو په اساس اعلان وکړ چې د ښي‌پالو ائتلاف د پارلمان له ۱۲۰ څوکیو څخه د ۶۲ او منځ‌پال او کیڼ‌پال ګوندونه د ۵۴ څوکیو په ګټلو بریالی شوي دي.

د ورځې تازه خبرونه دلته ولولئ

د سايبريا په مرکزي برخه کې په يوه ودانۍ کې د چاودنې له امله ۶ کسان وژل شوي

انځور - ارشيف

د سایبریا په مرکزي برخه کې په یوه څو پوړیزه ودانۍ کې د چاودنې له کبله لږ تر لږه ۶ کسان وژل شوي دي.

روسي چارواکي وايي، پېښه تېره شپه په نیژني - وارتوفسک ښار کې شوې چې ۹ تنه نور کسان یې ټپیان کړي دي.

د لومړنیو معلوماتو له‌مخې د چاودنې علت په دویم پوړ کې د ګازو د ډبې لیک کېدل وو او د چاودنې له کبله د ودانۍ یوه برخه ونړېده.

بلېنکن: روسيه اوکراين کې د جګړې ختمولو لپاره خبرو ته لېوالتيا نه‌لري

انتوني بلېنکن

د امریکا د متحدو ایالتونو د بهرنیو چارو وزیر وايي، واشنګټن داسې کومه نښه نه ګوري چې مسکو دې په اوکراین کې د روانې جګړې د ختمېدو لپاره خبرو ته لېوالتیا ولري.

انتوني بلېنکن پرون د امریکا CBS نیوز ټلوېزیوني شبکې سره په مرکه کې وویل، روسیه بامفهومې ډیپلوماسۍ ته لېواله نه‌ده.

د ده په وینا د روسیې ولسمشر ولادمیر پوتین د اوکراین د جګړې په ډګرونو کې له شاتګونو وروسته خپل تاکتیکونه بدل کړي دي.

په وروستیو اوونیو کې د روسیې پوځ په اوکراین کې پر اساسي پروژو پر حملو تمرکز کړی او د دونیڅک سیمې په باخموت ښار کې یې پوځي عملیات شدید کړي دي.

روسیې دغه راز د اوکراین د خرسون ښار پر ځینو ساحو چې تېره میاشت د روسیې تر ۸ میاشتني اشغال وروسته د اوکراین د پوځ له‌خوا بېرته نیول شوي، د توغندیو حملې کړې دي.

ټېسټ کرېکټ؛ د اسټرالیا بری او د وېسټ انډیز پینځه‌ویشت کلن انتظار

د اسټراليا کرېکټ لوبغاړي، انځور - ارشيف

د اسټرالیا د کرېکټ په مشهور لوبغالي «پرت»کې د وېسټ انډیز او کوربه هېواد ترمنځ د دوو ټیسټ لوبو لړۍ د نومبر میاشتې په دېرشمه نېټه پيل شوې ده.

لومړۍ لوبه چې پرون(یکشنبه) پای ته ورسېده اسټرالیا په ۱۶۴ منډو وګټله.

وېسټ انډیز په وروستي ځل په ۱۹۹۶ زېږدیز کال له اسټرالیا څخه په دې هېواد کې د ټیسټ لوبو لوبلړۍ ګټلې وه.

تر دې ماتې وروسته څرګنده شوه چې وېسټ انډیز به دغه ۲۵ کلن انتظار ته دوام ورکوي.

په دې لوبه کې د اسټرالیا له لوري مارنس لبیشاین په لومړۍ پاڼۍ کې غبرګه سلیزه او په دویمه پاڼۍ کې هم سلیزه ترسره کړه او د لوبې غوره لوبغاړی ونومول شو.

دوی به دویمه ټیسټ لوبه د ډسمبر میاشتې په اتمه نېټه پيل کړي.

د یادونې ده چې دا لوبې د کرېکټ نړیوالې شورا د ټيسټ اتلولۍ په پار د نهو هېوادونو ترمنځ پيل شوي دي، خو افغانستان د دې سياليو برخه نه‌دي.

د فوټبال نړیوال جام؛ انګلستان او فرانسې بل پړاو ته لار پيدا کړه

قطر کې د فوټبال نړيوال جام سيالۍ

د انګلستان او فرانسې لوبډلې د فوټبال نړیوال جام د کوارټرفاینل مرحلې ته ووتې، خو پولنډ او سنیګال بیا له دې سيالیو بهر شوې.

نن به کرووشیا د جاپان او برازیل د سويلي کوریا پر وړاندې لوبې ترسره کړي.

پرون په لومړۍ لوبه کې فرانسې ۳ـ۱ پولنډ مات کړ او په دویمه لوبه کې بیا انګلستان په یوه یو اړخیزه لوبه کې سنیګال ۳ـ۰ مات کړ.

د یادونې ده چې د فوټبال نړیوال جام د شپاړلس غوره لوبډلو پړاو د لیندۍ په دولسمه نېټه پیل شوې دي او دغه دور لوبې به د سې شنبې په ورځ پای ته ورسېږي.

فوټبال؛ نن جاپان له کروويشيا او برازيل له جنوبي کوريا سره لوبه کوي

قطر کې د فوټبال نړيوال جام

ټاکل شوې چې نن د ۲۰۲۲ کال د فوټبال د نړیوال جام د لوبو په لړۍ کې لومړی د ماښام په اوه نیمو بجو جاپان او کروویشیا سیالي سره وکړي او د شپې په یوولس نیمو بجو به د برازیل او جنوبي کوریا لوبډلې سره مخامخ شي.

د دې پړاو بریالي ټیمونه د خپلو سیالانو له ماتولو وروسته نیم پایلوبې ته وځي.

په بیګانیو لوبو کې فرانسې پولنډ ته درې- یو او انګلنډ سنیګال ته درې- صفر ماتې ورکړه او په دې توګه فرانسه او انګلینډ چې غښتلې لوبډلې لري، د اتو غوره لوبډلو یا نیم پایلوبې پړاو ته ورسېدل.

د نړيوال بانک مرستياله: د اوکراين بيا رغونه ۶۰۰ مليارده يورو لګښت ته اړتيا لري

اوکراين کې د جګړې له امله رامنځته شوې ويجاړي

د نړیوال بانک مرستیاله انا بجرد Anna Bjerde وايي چې د جګړه ځپلي اوکراین بیا رغونه ۵۰۰ یا ۶۰۰ میلیارد یورو لګښت ته اړتیا لري.

نوموړې دا څرګندونې پرون د اتریش له دې پریس ورځپاڼې سره په مرکه کې وکړې.

مېرمن بجرد وویل، له اروپايي کمېسیون او د اوکراین له حکومت سره په ګډه یې د دې احتمالي لګښت اټکل چمتو کړی دی.

هغې زیاته کړه چې د جون میاشتې په لومړیو کې د اوکراین د زیانونو د رغونې لګښت ۳۵۰ میلیارد یورو اټکل شوی و، خو د مېرمن بجرد په وینا له هغه راهیسې د دوی په اټکل کې د پام وړ زیاتوالی راغلی دی.

ایران د اسراییلو استخباراتو ته د جاسوسۍ په تور ۴ کسان اعدام کړل

ارشیف

ایران څلور کسان چې د اسراییل استخباراتي ادارې موساد ته په کار کولو تورن ووو نن اعدام کړل.

د ایران دولتي اژانس ایرنا د اعدام شویو کسانو نومونه خپاره کړي او وايي، دوی له موساد څخه د وسلو او پیسو په ترلاسه کولو تورن وو.

د ایران سپاه پاسداران انقلاب د ګڼو کسانو د نیولو ادعا کړې چې ګواکې له موساد سره اړیکې لري او د ایراني وګړو په اختطاف او د ملکیتونو په تخریب کې لاس لري.

اسراییل او ایران په سیمه کې د یو بل سرسخت رقیبان دي او کله ناکله ایران بهرنیو هېوادونو ته د جاسوسۍ په تور د ځینو کسانو د نیولو خبر ورکوي.

ایران د ښځو حجاب په تړاو ګزمې ودرولې

ایران کې د ارشا په نامه پولیس هغه ښځې کېنولي چې حجاب یې نه ده مراعات کړی.

ایران د هغې ګزمې فعالیت ودراوه چې ښځې یې حجاب ته اړ ایستلې.

دا په ایران کې له وروستیو اعتراضونو وروسته د ایران د حکومت له لوري له خپلو جبري مقرراتو څخه یو ګام شاتګ بلل شوی دی.

د ایران لوی څارنوال محمدجعفر منتظري پرون په یوه خبري غونډه کې وویل چې د «ارشاد» فعالیت له قضاییه قوې سره تړاو نه لري او په کوم ځای کې چې تاسیس شوی و له هماغه ځای یې فعالیت درول شوی دی.

ده د پنجشنبې په ورځ ویلي و چې په راتلونکو ۱۵ ورځو کې به د ایران پارلمان او د فرهنګي انقلاب عالي شورا په ټولنه کې د حجاب په شمول د خلکو د اعمالو په اړه خپل نظر اعلان کړي.

اډهانم: د نړۍ ۹۰ سلنه وګړي د کرونا په وړاندې تر ډېره مقاومت لري

په چین کې روغتیايي کارکوونکي په کرونا ویروس د اخته کسانو د معاینې پرمهال

د روغتیا نړیوال سازمان اټکل کوي چې اوس د نړۍ په سلو کې ۹۰ وګړي د کرونا په وړاندې تر ډېره مقاومت لري، خو خبرداری ورکوي چې لا هم د دې ویروس له کبله په نړۍ کې د یوه نوي سرخوږي د پیدا کېدو امکان شته.

د روغتیا د نړیوال سازمان عمومي رييس ټډروس اډهانم ویلي چې خلکو د واکسینونو او یا د کرونا د تېرولو له کبله د دې وبا په وړاندې مقاومت ترلاسه کړی دی.

د ثبت شویو شمېرو پر اساس، تراوسه پورې په نړۍ کې ۶ میلیونه او ۶ لکه تنه له کرونا مړه شوي دي، خو د ملګروملتو د روغتیا نړیوال سازمان وايي چې د کرونا له کبله د مړو شویو کسانو حقیقي شمېر تر دې خورا ډېر دی.

د خیبر پښتونخوا په اکوړه خټک کې ۳ پولیس وژل شوي

ارشیف

د خیبر پښتونخوا په اکوړه خټک کې پرون شنبه د پولیسو پر یوه موټر په برید کې ۳ پولیس وژل شوي دي.

د پولیسو یوه ځايي چارواکي محمدعلي ګنډاپور رویټرز خبري اژانس ته ویلي، پر پولیسو تېر ماښام برید په داسې حال کې وشو چې هغوی ګزمه کوله.

د پاکستاني طالبانو تحریک یا ټي ټي پي د دې برید مسوولیت منلی دی.

دې ډلې په وروستیو کې اوربند پای ته رسېدلی اعلان کړ او خپلو وسله والو ته یې د پاکستان د امنیتي ځواکونو پر ضد د عملیاتو د پیلولو امر وکړ.

نور راوښيه

XS
SM
MD
LG