د لاسرسۍ وړ لېنکونه

تازه خبر
شنبه ۷ غبرګولی ۱۴۰۱ کابل ۰۲:۳۵

افغانستان

طالبانو په بانکي سکټور کې د اروپايي ټولنې همکاري وغوښته

د افغانستان بانک

د افغانستان لپاره د اروپايي ټولنې استازي توماس نیکلاسن نن د طالبانو د مرکزي بانک له چارواکو سره لیدلي.

مرکزي بانک په خپل ټویټر پاڼه لیکلي، چې په یاده ناسته کې دواړو خواو د بانکي نظام پر عادي کېدو او د بانکونو له لارې د بشري مرستو په دوام ټینکار کړی.

د طالبانو مرکزي بانک لیکلي، افغان پلاوي له مقابل لوري د بانکي سکټور په وده کې د همکارۍ غوښتنه کړې.

په خبر کې راغلي، چې د اروپايي ټولنې استازي له افغانستان سره په بانکي او مالي برخو کې په خپلو ژمنو ټینکار کړی او ویلي چې دا لړۍ به راتلونکي کې هم دوام ولري.

د ورځې تازه خبرونه دلته ولولئ

طالبانو په ننګرهار کې د دوى پر سرپرست دفاع وزیر چاودنه رد کړه

د طالبانو د دفاع وزارت سرپرست مولوي محمد یعقوب مجاهد

د ننګرهار چارواکي وایي، دغلته د طالبانو پر سرپرست دفاع وزیر مولوي محمد يعقوب مجاهد چاودنه حقیقت نه لري.

د ننګرهار د اطلاعاتو او کلتور ریاست استازي قریشي بدلون نن شنبه ازادي راډیو ته وویل، چې پر دفاع وزیر مولوي محمد یعقوب مجاهد د چاودنې ګونګسې دروغ دي او په خبره یې، دا کړنه د دوی د نظام ضد کړیو او اشخاصو تبلیغات دي.

تر دې وړاندې په یو شمېر ټولنیزو پاڼو او رسنیو کې داسې خبرونه ورکړل شول، چې ګوندې پرون د جمعې په ورځ ننګرهار ته د طالبانو د دفاع وزیر مولوي محمد یعقوب مجاهد د سفر پرمهال پر نوموړي چاودنه شوې چې خپله دی ترې روغ وتلی خو ساتونکو ته یې مرګ ژوبله اوښتې ده.

خو د ننګرهار د اطلاعاتو او کلتور ریاست مسؤلان بیا دا ډول خبرونه ناسم بولي او هدف یې د عامه ذهنتونو ګډوډول یادوي.

دا په داسې حال کې ده، چې پرون د طالبانو د دفاع سرپرست وزیر مولوي محمد یعقوب مجاهد ننګرهار ته تللی و او دغلته یې د ورځې تر ناوخته د ډیورند له صفري سیمو لیدنه کړې او د سیمې له خلکو سره یې د ستونزو اورېدو په هدف لیده کاته کړي دي.

سي پي جي طالبانو ته: د خبریال علي اکبر د تري تم کېدو مسئله وڅېړئ

افغان ژورنالیست علي اکبر خيرخواه

د خبریالانو د خوندیتوب کمېټې "سي پي جي" په یوه بیان کې چې پرون یې خپور کړ، ویلي دي چې طالبان باید د افغان خبریال علي اکبر خیرخواه د تري تم کېدو مسئله وڅاري او تحقیقات وکړي.

دې کمېټې په ورته وخت کې له طالبانو غوښتې دي، چې د ښځینه خبریالانو په کارونو کې د خنډ رامنځته کېدو مخه ونیسي.

د دې کمېټې د اسیا د برخې همغږه کوونکی سټیفن بټلر وایي، په کابل کې د خبریال علي اکبر خیرخواه او په هرات کې له خبرې غونډې څخه د خبریالې مرجان وفا ایستل هغه اندېښنې پیاوړي کوي چې د خبریالانو په برخه کې شته.

د فوټو ژورناليست خیرخواه د کورنۍ غړي وایي، چې دی د سې شنبې په ورځ د کابل له ميروىس ميدان "کوټې سنګي" سیمې څخه تری تم شو.

د پنجشېر اوسېدونکي: طالبانو لس ملکي وګړي نيولي

آرشیف: د پنجشېر په يوه څنډه کې طالبان

د پنجشېر د پریان ولسوالي اوسېدونکي د طالبانو له لوري د لسو ملکیانو د نیولو خبر ورکوي.

په سیمې کې یوې سرچینې چې نه یې غوښتل نوم یې واخیستل شي، وویل چې طالبانو دا کسان د جمعې په ورځ ناوخته له ځانونو سره بیول.

د پنجشېر امنیه قوماندان مولوي داد محمد بتار ازادي راډیو ته دا خبر تایید کړ او ویې ویل، چې د دوی کسان سیمې ته ورغلي وو، هلته یې پر ځینو کسانو شک درلود نو هغوی یې له ځانونو سره د ولسوالۍ مرکز ته د تحقیقاتو لپاره راوستل.

ملګرو ملتونو په افغانستان کې پر ملکيانو د حملو له کبله اندېښنه څرګنده کړه

په بشري چارو کې د ملګروملتونو ځانګړی راپور ورکوونکی ریچارد بینیټ

په بشري چارو کې د ملګروملتونو ځانګړي راپور ورکوونکي په افغانستان کې پر ملکي وګړو د تروریستي حملو له کبله اندېښنه څرګنده کړې.

ریچارد بینیټ تېر ماښام پر خپل ټویټر لیکلي، چې د افغانستان د روانو پېښو او خونړیو حملو په اړه باید خپلواک تحقیقات وشي.

بینیټ په مزارشریف کې د پنجشنبې ورځې حملو ته چې په نتیجه کې یې ۱۶ ماشومان ووژل شول اشاره کړې او خپګان یې څرګند کړی.

په مزارشریف کې د دې حملې مسوولیت د داعش ډلې خراسان څانګې ومانه.

مقاومت جبهې په پنجشېر کې د شپږو طالبانو د وژلو ادعا وکړه

د مقاومت جبهي غړي

د طالبانو مخالفه د ملي مقاومت په نوم جبهه په پنجشېر ولایت کې د طالبانو د شپږو وسله والو د وژل کېدو خبر ورکوي.

د دې جبهې له خوا په یوه خپره شوې خبرپاڼه کې چې پرون خپره شوه راغلي، چې پرونۍ حمله د پنجشېر د لومړۍ حصې د ولسوالۍ په پېشغور سیمه کې شوې.

خپلواکو سرچینو تردې دمه دا خبر نه دی تایید کړی او په دې اړه د طالبانو د حکومت چارواکو هم تراوسه څه نه دي ویلي.

طالبانو په ننګرهار کې د ډزو پرمهال د ناوې وژل رد کړل

د جلال اباد ښار یوه څنډه

د ننګرهار امنیه قوماندانۍ د سرخرود ولسوالۍ په هجرت سیمه کې د واده په مراسمو کې د ډزو پرمهال د ناوې د وژل کېدو راپورونه ردوي.

د ننګرهار د امنیه قوماندانۍ ویاند حافظ عبدالبصیر زابلي له آزادۍ راډیو سره په خبرو تایید کړه، چې د واده په مراسمو کې ډزې شوې دي خو د نوموړي په وینا په دې پېښه کې یوازې درې کسان ټپیان شوي دي.

زابلي د پېښې د علت په اړه څه ونه ویل، خو له دې مخکې سیمه ایزو چارواکو ویلي و، چې د پېښې عاملان تراوسه نه دي پېژندل شوي او په اړه یې څېړنې روانې دي.

اجيت دوال: له تروريزم سره مبارزې لپاره بايد د افغانستان وړتيا لوړه شي

د هند د ملي امنیت سلاکار اجیت دوال

د هند د ملي امنیت سلاکار اجیت دوال نن د تاجکستان په پلازمېنه دوشنبې کې په سیمه‌ییزې امنیتي غونډې کې وویل، پکار ده چې له ترورېزم سره د مبارزې لپاره د افغانستان وړتیا لوړه شي.

ښاغلي دوال زیاته کړه چې هند له افغانستان سره تاریخي اړیکي لري او د هند حکومت تل د افغانانو ترڅنګ دریدلی او د افغانانو ملاتړ ته به دوام ورکړي.

په پلازمېنې دوشنبې کې د افغانستان په اړه په دې غونډه کې د هند سربېره د روسیې، چین، ایران او منځي اسیا د هېوادونو د ملي امنیت سلاکارانو برخه اخیستې ده.

د افغان ښځو په اړه طالبانو د ملګرو ملتونو پرېکړه ليک رد کړ

د يوناما لوګو

طالبانو نن د ملګرو ملتو د امنیت شورا پریکړه لیک رد کړ چې پکې راغلې دي چې طالبانو پر ښځو سخت بندیزونه لګولي دي.

د امنیت شورا پنځلس غړیو د سې شنبې په ورځ پر طالبانو غږ وکړ چې سمدستي دې پر ښځو له لګولیو بندیزونو لاس واخلي.

امنیت شورا انتقاد کړی چې طالبانو د زده کړو، کار او د ښځو پر ازادانه سفر بندیزونه لګولي دي.

د طالبانو مشر دا امر هم کړی دی چې ښځې دې په عامه ځایونو کې حجاب اغوندي او مخ دې پټوي.

د طالبانو د بهرنیو چارو وزارت نن په یوه بیان کې د امنیت شورا اندېښنې بې بنسټه وبللې او ویې ویل، افغان حکومت اسلامي حجاب د ټولنې له دیني او کلتوري دودونو سره سم او مناسب ګڼي.

د کاناډا او ايران ترمنځ د فوټبال سيالۍ لغوه شوې

ارشيف

د کاناډا د فوټبال فدراسیون له ایران سره د جون په پنځمه لوبه لغوه کړه خو تر اوسه يې د لوبې د لغوه کېدو لاملونه نه دي په ډاګه کړي.

خو د کاناډا په فوټبال فدراسیون او حکومت باندې ګڼ فشارونه وو چې د ایران له ټیم سره دا مسابقه ترسره نه کړي.

په خپله صدر اعظم جستن تروډو هم د لوبې په اړه مخالفت ښودلی و.

د مخالفو خلکو لویه برخه د هغې الوتکې د قربانیانو کورنۍ او دوستان وو چې د ایران له خوا نسکوره شوه او پکې لسګونه ایراني کاناډایان او د افغانانو په شمول د ځینو نورو هېوادونو خلک پکې ووژل شول.

د کاناډا د فوټبال فدراسیون له ایران سره دا لوبه د نړیوال جام د چمتووالي په هدف ترسره کوله.

تاجکستان نن د افغانستان په تړاو د ناستې کوربه دی

تاجکستان کې د افغانستان په تړاو د يوې پخوانۍ ناستې انځور

د تاجکستان پلازمېنه دوشنبه د سیمې د هېوادونو د ملي امنیت د سلاکارانو د یوې ناستې کوربه ده.

د افغانستان په اړه په دې غونډه کې د هند، روسیې، چین، ایران او منځنۍ اسیا د هېوادونو د ملي امنیت سلاکاران برخه لري.

په افغانستان کې د ښځو د حقونو او د ټول ګډونه حکومت په اړتیا باندې په دې ناسته کې خبرې کېږي.

هند کې يو افغان د ناقانونه درملو د وړلو په تور نيول شوی

ارشيف

د ډیلي په هوايي ډګر کې یو افغان په غیرقانوني ډول د درملو د وړلو په تور ونیول شو.

هندي رسنۍ وايي، دغه افغان د چهارشنبې په ماښام له ډیلي څخه کابل ته د څه باندې ۶۴ لکه هندي روپیو په ارزښت د ګولیو د وړلو په خاطر د ګمرکي چارواکو له لوري نیول شوی دی.

ګمرکي چارواکي وايي، له نیول شوي افغان سره کشف شوې ګولۍ د مغزي تومور د درملنې لپاره کارول کېږي.

کابل کې د چين د ټکنالوژۍ توليداتو نندارتون پرانيستل شو

ارشيف

د چین د ټکنالوژۍ او نورو تولیداتو لومړنی نندارتون پرون په کابل کې پرانیستل شو.

په دغه نندارتون کې بایسکلونه، موټرسایکلونه، برېښنايي او ګازۍ بخارۍ، لمریز موټر، بېټرۍ، یخچالونه، کرنیز او سپورتي وسایل، امنیتي کمرې او نور الیکترونیکي وسایل نندارې ته اېښودل شوي دي.

دا نندارتون به نن او سبا هم دوام ولري.

راتلونکي مياشت افغانستان کې د کرونا ضد واکسين تطبيق پيليږي

ارشيف

د روغتیا نړیوال سازمان یا (ډبلیو ایچ او) وايي، راتلونکې میلادي میاشت به په افغانستان کې خلکو ته د کرونا وبا پر ضد واکسین ورکړل شي.

ډبلیو ایچ او پرون (پنجشنبې) پر خپله ټویټرپاڼه کښلي چې دا کمپاین د افغانستان په ټولو ۳۴ ولایتونو کې عملي کېږي.

د روغتیا د نړیوال سازمان د مالوماتو پر اساس، د کمپاین په لړ کې به له اتلس کلونو پورته ۵ ميلیون تنو ته کرونا ضد واکسین ورکړل شي.

د طالبانو د حکومت د عامې روغتیا وزارت مخکې ویلي و چې نژدې ۸ ميلیونه افغانان د کرونا پر ضد واکسین شوي دي.

ايران يوه اوونۍ کې نږدې شل زره افغان کډوال بېرته افغانستان ته ستانه کړي

عکس آرشیف : جریان برگشت مهاجرین اخراج شده از ایران به افغانستان

د طالبانو د حکومت د کډوالو او بېرته راستنېدونکو وزارت وايي، ایران په شاوخوا یوه اوونۍ کې کابو ۲۰ زره افغان کډوال بېرته افغانستان ته ستانه کړي دي.

دې وزارت په یوه خبرپاڼه کې ویلي چې ایران د ثور له ۲۴ د جوزا تر دوهمې پورې ۱۹ زره ۹۶۳ تنه افغان کډوال له خپلې خاورې ایستلي او افغانستان ته رالېږلي دي.

د طالبانو د حکومت د کډوالو او بېرته راستنېدونکو وزارت د چهارشنبې په ورځ ویلي و چې یوازې د سې شنبې په ورځ، یعنې د مې په ۲۴ مه ۳ زره ۵۸۷ افغان کډوال د نیمروز ولایت له لارې افغانستان ته راستانه شوي چې د هغو په منځ کې څه باندې دوه نیم زره راشړل شوي دي.

د طالبانو له واک ته رسېدو او په افغانستان کې د اقتصادي ستونزو له اوج ته رسېدو وروسته ویل کېږي چې شاوخوا یو ميلیون افغانانو ایران ته پناه وړې ده.

عمرګل: د افغان کرېکټ ملي لوبغاړو روزنه به په لېوالتيا وکړم

د افغان کرېکټ ملي لوبډلې لوبغاړي

د افغانستان کرېکټ ملي لوبډلې د توپ اچوونې تازه ټاکل شوی روزونکی عمر ګل وايي، د خوارېکښو افغان لوبغاړو د روزنې دنده به په لیوالتیا مخکې یوسي.

د افغانستان کرېکټ بورډ پرون ناوخته پر خپله وېبپاڼه کې ولیکل، چې د پاکستان تېز توپ اچوونکی عمرګل یې د افغانستان د کرېکټ ملي لوبډلې د توپ اچونې روزونکی ټاکلی دی.

عمر ګل تر دې مخکې د لنډ وخت لپاره د افغان لوبډلې د روزنې دنده منلې وه خو اوس د اوږد مهال لپاره ورسره تړون شوی دی.

عمر ګل پر خپله ټوېټر پاڼه لیکلي دي چې له افغان لوبډلې سره له لنډ‌مهالې دندې وروسته په لیوالتیا د اوږد مهالې دندې مسولیت مني.

۳۹ کلن عمر ګل د پاکستان لپاره د ټېسټ کرېکټ په ۴۷ لوبو کې ۱۶۳ وېکېټې په ۱۳۰ یو ورځنیو لوبو کې ۱۷۹ او په ۶۰ شل اوریزو لوبو کې یې ۸۵ وېکټې اخیستي دي.

نور راوښيه

XS
SM
MD
LG