د لاسرسۍ وړ لېنکونه

تازه خبر
چهارشنبه ۴ غبرګولی ۱۴۰۱ کابل ۰۲:۴۴

خبرونه

ملګري ملتونه: له درې زرو زيات پناه غوښتونکي اروپا ته د سفر پر مهال مړه شوي

انځور: يو شمېر کډوال

ملګري ملتونه وايي چې د افغانانو په ګډون له درې زرو زیات کډوال او پناه غوښتونکي د مدیترانې او اتلانتیک له سمندري لارو اروپا ته د سفر په ترڅ کې مړه یا تري تم شوي دي.

د کډوالو لپاره د ملګروملتو د لویې کمېشنرۍ UNHCR یو تازه راپور چې پرون خپور شو ښېي چې تېرکال ۳۰۷۷ کسان پر دې لاره مړه یا ورک شوي دي چې د یو کال مخکې یعنې د ۲۰۲۰ کال پرتله دوه ځلې زیاتوالی ښېي.

د UNHCRویاندې شابیا مانتو پرون په ژنیو کې خبریالانو ته وویل، په شمېرو کې زیاتوالی راغلی چې د اندېښنې وړ دی.

د ورځې تازه خبرونه دلته ولولئ

ننګرهار کې د غنمو د حاصلاتو کچه لوړه شوې

ارشيف

د ننګرهار د کانال ریاست وايي، تمه لري چې سږ کال به په دې ولایت کې د غنمو له حاصلاتو ۲۵۸ میلیونه افغانۍ عواید ترلاسه شي.

د ننګرهار د کانال ریاست ویاند سید همایون غریب مل نن ازادي راډیو ته وویل، سږ کال یوازې د ننګرهار په کانال کې پر ۲۱ زره او ۵۳۸ جریبه ځمکه غنم کرل شوي چې د دوي د تخمین له مخې ۸۳۳ زره او ۶۵۵ منه غنم به ترې ترلاسه شي.

د ننګرهار کانال ریاست د معلوماتو پر بنسټ، اوس مهال څه باندې زر تنه په یاد کانال کې د غنمو پر کښت او کار بوخت دي.

د ښاغلی غریب مل په خبره، د کانال ریاست هڅه کوی چې په ننګرهار کې د غنمو کښت لا پراخ شي او د غنمو له اړخه د ننګرهار د ځان بسیاینې ترڅنګ، نورو ولایتونو ته هم غنم صادر کړي.

له کندهاره بهر ته د اينځرو صادرات ډېر شوي

اينځر

د کندهار ولایت د سوداګرۍ او پانګونې خوني مرستیال عبدالباقي بینا نن ازادي راډیو ته وویل، په ۱۴۰۰ لمریز کال کې څه باندې ۲۵ زره ټنه اینځر له کندهاره بهر ته صادر شوي چې مالي ارزښت یې ۱۴۹ میلیونو امریکایي ډالرو ته رسیږي.

د ښاغلي بینا د معلوماتو پر بنسټ په کندهار کې له انار او انګورو وروسته اینځر په درېیمه درجه مېوو کې راځي چې تولید او صادرات یې ډېر دی او په روان لمریز کال کې به یې تولید د تېر کال په پرتله ډېر وي.

په کندهار کې تولید شوي اینځر هند، پاکستان، متحده عربي اماراتو او جرمني ته صادریږي.

اوس مهال په کندهار ولایت کې یو کیلو اینځر په ۵۰۰ افغانیو پلورل کېږي.

له افغانستانه د بریتانیا د وتلو بهير سيستماتيکه ناکامي وبلل شوه

آرشیف: په 2021 کال کې د کابل هوايي ډګر يوه څنډه

د بریتانیا د عوامو جرګې د بهرنیو اړیکو کمېټې ویلي، چې د دوی څېړنو ښودلې چې په ګډوډۍ کې له افغانستانه د بریتانیا د تېر کال وتل، په رهبري، پلان او تیاریو کې سيستماتيکه ناکامي په ډاګه کوي.

د فرانسپرس خبري آژانس د راپور له مخې د دغې څېړنې نتیجه پرون خپره شوه او له افغانستانه د بریتانیا د وتلو بهير یوه تراژیدي او له متحدینو سره یې خیانت بلل شوی.

د دغې کمېټې په وینا د بریتانیا دغه چلند به په راتلونکو کلونو کې د دې هېواد ګټو ته زیان ورسوي.

وروسته له هغې چې د امریکا متحدو ایالتونو اعلان وکړ، چې په افغانستان کې نږدې شل کلن حضور پای ته رسوي، بریتانیا هم له افغانستانه د وتلو پرېکړه وکړه.

د فرانسپرس د راپور له مخې هغه مهال په سلګونو افغانان چې ژوند یې له جدي خطر سره مخامخ و او له دې هېواده د ایستلو پر شرایطو برابر و، په دې هېواد کې پاتې شول.

د زمبابوې پر وړاندې راتلونکو لوبو لپاره افغان لوبډلې اعلان شوې

زمبابوې سفر لپاره د افغان کرکټ ملي لوبډلې نوملړ

د افغانستان کرکټ بورډ د زمبابوې پر وړاندې راتلونکو لوبو ته لوبډلې اعلان کړې.

افغان لوبډله د جون په ۴مه له زمبابوې سره د یو ورځنیو لوبو لړۍ پیلوي او د جون میاشتې په دویمه لسیزه کې له زمبابوې سره درې شل اوریزې لوبې لري.

کرکټ بورډ ویلي، افغان لوبډله اوسمهال د کابل په ملي کرکټ لوبغالي کې پر خپلو تمریناتو بوخت ده او ټاکل شوې چې په راتلونکو څو ورځو کې زمبابوې ته سفر وکړي.

یو ورځنۍ نړیوالې سیالۍ د کرکټ نړیوالې شورا د سوپر لیګ سیالیو برخه دي، چې د ۲۰۲۳م کال نړیوال جام سیالیو ته د لار موندنې په موخه تر سره کېږي او شل اوریزې لوبې هم راتلونکي شل اوریز نړیوال جام ته د چمتووالي په موخه ترسره کېږي.

کرکټ بورډ د یو ورځنیو لوبو لپاره رحمن الله ګربز (ویکټ ساتونکی)، ریاض حسن، ابراهیم ځدراڼ، حشمت الله شهیدي (لوبډلمشر)، رحمت شاه، نجیب الله ځدراڼ، شاهد کمال، اکرام علي خېل، محمد نبي، عظمت الله عمرزی، راشد خان، مجیب الرحمن، ضیاء الرحمن اکبر، فضل الحق فاروقي، فرید ملک او یمین احمدزی غوره کړي او ترڅنګ یې په احتیاطي لوبغاړو کې نور احمد او نجات مسعود ته هم ځای ورکړل شوی دى.

دغه راز د شل اوریزو لوبو لوبغاړي رحمن الله ګربز (ویکټ ساتونکی)، حضرت الله ځاځی، عثمان غني، احسان الله جنت، نجیب الله ځدراڼ، دروېش رسولي، کریم جنت، محمد نبي (لوبډلمشر)، عظمت الله عمرزی، شرف الدین اشرف، افسر ځاځی، راشد خان، نور احمد، فضل الحق فاروقي، فرید ملک او نجات مسعود غوره شوي او د دې ترڅنګ ظاهر خان او سید احمد شیرزاد هم د احتیاطي لوبغاړو په توګه غوره شوي دي.

ملګرو ملتونو سلګونه زره بې وزله افغانانو سره نقدي مرسته کړې

آرشیف

د ملګرو ملتونو د کډوالو عالي کمېشنري وایي، تېرو اتلسو میاشتو کې یې اته لکه بې وزله افغانانو سره د نقدو پیسو مرسته کړې ده.

د دغې کمېشنرۍ د اسیا پاسفیک څانګې نن پر خپله ټویټرپاڼه لیکلي ،چې اړمنو کسانو پر دې پیسو د خپل ژوند لومړنۍ اړتیاوې پوره کړي او د سرپنا ستونزې حل کړي دي.

یو.ان.اچ.سي.ار د خپلو مرستو د دوام ډاډ ورکړی دی، خو د ازادۍ راډیو ګڼو اورېدونکو شکایتونه کړي چې د مرستو په وېش کې ورسره د مور مېرې چلند کېږي.

په افغانستان کې د ګوزن ضد واکسین سراسري کمپاین روان دی

هرات کې د پولیو ضد واکسین کمپاین یو انځور

په افغانستان کې نن د دویمې ورځې په مخه د ماشومانو د ګوزن یا پولیو ضد واکسین سراسري کمپاین روان دی.

دا کمپاین پرون پیل شو او د عامې روغتیا وزارت په خبره ۴ ورځې دوام کوي.

د روغتیا وزارت ویاند جاوېدهژیر رسنیو ته ویلي چې د دې کمپاین په ترڅ کې به نژدې لس میلیون ماشومانو ته د واکسین څاڅکي ورکړل شي.

هغه وویل: "په پام کې ده چې په دې دوره کې له ۵ کلونو کم عمره ۹،۹ میلیون ماشومانو ته د پولیو واکسین د خوړو په بنه ورکړل شي او ترڅنګ به یې هغو ماشومانو ته چې عمرونه یې د شپږو میاشتو او پنځو کلونو ترمنځ دي د ویټامین اې A څاڅکي ورکړل شي."

هژیر زیاته کړه، چې د روان کال له پیله تراوسه د پولیو یوه مثبته پېښه په پکتیا ولایت کې ثبت شوې ده په داسې حال کې چې تېرکال څلور مثبتې پېښې ثبت شوې وې.

ننګرهار کې د نفرایټو د یوولسو کانونو د استخراج چارې پیل شوې

د جلال اباد ښار یوه څنډه

په ننګرهار ولایت کې د نفرایټو د یوولسو کانونو د استخراج چارې پیل شوې.

د ننګرهار د والي ویاند قاضي ملا عادل آزادۍ راډیو ته وویل: "د ننګرهار ولایت په کامې او ګوشتې ولسوالیو کې د نفرایټ د یوولسو کانونو د استخراج چارې پیل شوې. دا قراردادونه له ۵۰۰ زره افغانیو تر نژدې شپږ میلیون افغانیو پورې شوي او سلګونه کسانو ته د کار زمینه برابره شوه."

ښاغلی عادل وايي، دا قراردادونه له افغاني شرکتونو سره شوي دي.

نفرایټ یو ډول زرغونه تېږه ده چې د زینتي شیانو او مریو په جوړولو کې کارول کېږي.

د نړۍ شلو هېوادونو له اوکراین سره د نویو پوځي مرستو ژمنه کړې

اوکرایني سرتېري

د نړۍ شلو هېوادونو د روسیې د یرغل پر وړاندې د مقابلې لپاره له اوکراین سره د نویو پوځي مرستو ژمنه کړې.

د متحدوایالتونو د دفاع وزیر لویډ اسټین پرون د مې په ۲۳مه د اوکراین د تماس ډلې له دوهمې غونډې وروسته دا خبر ورکړ. ښاغلي اسټین ډنمارک او چک جمهوریت د مثال په توګه یاد کړل.

ډنمارک موافقه کړې، چې اوکراین ته د خپلو سواحلو د دفاع لپاره هارپون ډوله توغندي ورکړي او چک جمهوریت منلې ده چې د یرغلیزو هیلیکوپټرو، ټانکونو او راکټي سیسټم په ګډون اساسي تجهیزات د اوکراین پوځ ته برابر کړي.

بایډن: که چین تایوان اشغال کړي نو امریکا به مداخله وکړي

بایډن په توکیو کې د خبرو پرمهال

د امریکا ولسمشر جوبایډن خبرداری ورکړی، چې که چین تایوان اشغال کړي نو امریکا به مداخله وکړي.

ښاغلي بایډن وویل، چې د تایوان د ساتنې مسوولیت حتی تر اوکراین وروسته چې روسیې یرغل پرې وکړ، هم جدي دی.

بایډن پرون د مې په ۲۳مه د جاپان په پلازمېنه توکیو کې، په یوه خبري غونډه کې دې پوښتنې ته چې که پر ټایوان برید وشي نو آیا امریکا به مداخله وکړي که نه، په ځواب کې وویل چې هو، دا د ده ژمنه ده چې مداخله به وکړي.

چین چې تایوان خپل یو ولایت ګڼي د بایډن څرګندونو ته سمدستي غبرګون وښود او د بهرنیوچارو وزارت ویاند وانګ وین بېن وویل، چین د خپلو ګټو په برخه کې له هېچا سره نه سازش کوي او چا ته امتیاز ورکوي.

د سپینې ماڼۍ یوه چارواکي وویل، چې د بایډن څرګندونې د امریکا په پالیسۍ کې د بدلون ښکارندويي نه کوي.

افغانستان د وېلچیر باسکټبال ملي لوبډلې اماراتو ته ماتې ورکړه

د افغانستان د وېلچر باسکټبال ملي لوبډله

د افغانستان د وېلچیر باسکټبال ملي لوبډلې نن د متحده عربي اماراتو لوبډلې ته ماتې ورکړه.

د افغانستان د بدني روزنې او ورزش ریاست پر خپله فېسبوک پاڼه لیکلي دي، چې افغان لوبډلې په تایلند هېواد کې د اسیا سهمیې ګټلو په روانو سیالیو کې د متحده عربي اماراتو لوبډلې ته د ۶۵ـ ۵۰ په توپیر ماتې ورکړه.

ټاکل شوې چې د افغانستان د وېلچير ملي لوبډله سبا له عراق سره د لوبې میدان ته ښکته شي.

افغان لوبډلې خپله لومړۍ لوبه فلپین هېواد ته بایللې وه.

د وېلچیر باسکټبال سیالۍ د ۱۱ هېوادونو په ګډون په تایلند کې پیل شوي دي، چې د افغانستان ۱۲ کیسزه لوبډله هم برخه په کې لري.

امېد لوبډله د غزني د فوټبال غوره لیګ اتله شوه

آرشیف

امېد غزني لوبډله د غزني د فوټبال غوره لیګ اتله شوه.

د افغانستان د بدني روزنې او ورزش ریاست په خپله فېسبوک پاڼه کې د یوه خبر په خپرولو سره ویلي دي، دا سیالۍ چې دوه اوونۍ وړاندې د ۶ لوبډلو په ګډون پيل شوې وې، د امېد غزني په اتلولۍ پای ته ورسېدې.

د غزني په غوره لیګ کې ازادي، امېد غزني، صداقت، کاروان کوچي، جمعیت منګور او ده یک ولسوالۍ لوبډلو ګډون کړی و چې لومړی مقام یې امېد غزني او دویم مقام ازادي لوبډلې خپل کړ.

د غزني غوره لیګ په پای کې غوره لوبغاړو ته ستاینلیکونه او ډالۍ هم ورکړل شوې.

د سریلانکا او بنګله دېش کرکټ لوبډلو ترمنځ دویمه ټېست لوبه پیل شوه

د سریلانکا د کرکټ ملي لوبډله

د سریلانکا او بنګله دېش کرکټ لوبډلو ترمنځ دویمه ټېست لوبه نن پیل شوه.

دا لوبه چې نن سهار د بنګله دېش په پلازمېنې ډهاکې کې پیل شوه، بنګله دېش په ۲۴ منډو کې خپل ۵ لوبغاړي له لاسه ورکړل خو د مشفق الرحیم او لېتون داس د غوره ملګرتیا په پایله کې د کوربه لوبډلې منډې له ۲۰۰ واوښتې او لا هم یاده لوبډله خپلې توپوهنې ته دوام ورکوي.

کاسن راجیثا د بنګله دېش درې او اسیتا فرنانډو دوه لوبغاړي له میدانه بهر کړل.

په دې لوبه کې د سریلانکا لوبغاړی کوشال منډيس په پښتیو که درد له امله له میدانه بهر شو او اوس په روغتون کې بستر دی. د منډیس د اوسني وضېعت او لوبې ته د بېرته را ستنېدو په اړه څه نه دي ویل شوي.

د یادونې ده، چې د سریلانکا او بنګله دېش ترمنځ لومړۍ ټېست لوبه په مساوي توګه پای ته رسېدلې وه.

امریکا کې روغتیاپالانو د لسګونه افغانانو د غاښونو وړیا درملنه کړې

آرشیف

د امریکا د ویرجینیا په فال چرچ ښار کې یوه ډله روغتیاپالانو د لسګونه افغانانو د غاښونو وړیا درملنه او معاینه کړې.

روغتیاپالان چې د مذاهبو د یووالي د یوې ډلې له خوا ګمارل شوي وو پرون یې د هغو ۷۰ افغانانو معاینه وکړه چې تازه امریکا ته تللي دي.

دغو افغان کډوالو ته د غاښونو د پاکوالي په خاطر ځینې مواد هم مرسته شول.

د ارزونو په اساس د غاښونو معاینه او پاککاري په لویدیځو هېوادونو کې ډېر لګښت لري او په اوسط ډول د یوه غاښ په عادي پاک کولو باندې پنځوس ډالره لګېږي.

امریکا څه باندې ۱۲۴ زره کسان تېر اګست له افغانستانه وایستل چې ترمنځ یې تر دې دمه نږدې اتیا زره افغانان دغه هېواد ته انتقال کړي.

کونړ کې د بزګرو ټولنو ته کرنيز ماشينونه ورکول کېږي

ارشيف

د طالبانو د کرنې او مالدارۍ وزارت ازادي راډيو ته په رالېږلې خبرپاڼه کې ویلي دي، دا ماشینونه چې ۵ میلیونه او ۶۹ زره افغانۍ ارزښت لري، د خوړو نړۍ سازمان لخوا د کونړ بزګرو ته ورکول کېږي.

په خبرپاڼه کې ویل شوي دي چې په دې ماشينونو کې تراکتورونه، ۴ زرنج موټرسایکېلونه او د غنم د حاصلاتو را ټولولو وسایل شامل دي.

د کرنې وزارت وايي، دا ماشینونه به د کرنیزو محصولاتو په وده کې ګټور تمام شي.

دا وزارت وايي، په پام کې لري چې د نړۍوالو موسسو په مرسته په نورو ولایتونو کې هم دا لړۍ عملي کړي.

ننګرهار: سلګونه ښځينه سوداګرو خپل فعاليتونه درولي

د لاسي صنايعو يو انځور

د ننګرهار د سوداګرۍ او پانګونې خونه وايي، د ښځینه سوداګرو د فعالېتونو بندېدو اندېښمن کړي دي.

د دې خونې ویاند شکرالله ساپي نن ازادي راډيو ته ویل، له وروستیو سیاسي تحولاتو وروسته تر اوسه په سلګونو ښځو چې د تولیداتو او سوداګرۍ په بېلابیلو برخو کې یې په ننګرهار کې فعالېت کاوه، کارونه یې درېدلي دي.

ښاغلی ساپی وايي، دې ښځو د لاسي صنایعو، غالیو، لبنیاتو، مربا او خیاطي په برخو کې په کار مصروفې وې چې تولیدات یې په کورنیو او بهرنیو نندارتونونو کې نندارې ته وړاندې شوي وو.

ښاغلي ساپی د ښځینه سوداګرو د فعالېتونو د درېدلو عوامل اقتصادي ستونزې، د بازار نه موجودېت او د حکومتي ادارو نه ملاتړ یادوي.

دغه راز نوموړی وايي، د ننګرهار د سوداګرۍ او پانګونې خونې څو ځله د سوداګرو ښځو ستونزې د طالبانو د حکومت له اړوندو ادارو سره شریکې کړې دي خو د ستونزو د حل له ژمنو سره هم دا ستونزې پر خپل ځای دي.

نور راوښيه

XS
SM
MD
LG