د لاسرسۍ وړ لېنکونه

تازه خبر
جمعه ۱۰ چنګاښ ۱۴۰۱ کابل ۱۱:۳۹

افغانستان

پنجشېر کې له مقاومت جبهې سره د اړيکو په تور درې کسان نيول شوي

ارشيف: د افغانستان په نقشه کې پنجشېر ولايت

په پنجشېر ولایت کې د طالبانو ځايي چارواکو له مقاومت جبهې سره د تړاو په تور د درېیو کسانو د نیولو خبر ورکړ.

د پنجشېر د والي ویاند، ابوبکر صدیق ازادۍ راډیو ته وویل، دغه کسان نن یکشنبه له مقاومت جبهې سره د تړاو په شک نیول شوي دي.

د والي ویاند وايي، که د نیول شویو کسانو جرم ثابت شي، محکمې ته به معرفي کېږي.

ناتایید شوي راپورونه وايي په پنجشېر کې ۱۲ نور کسان هم نن سهار په همدې شک نیول شوي دي.

د مقاومت جبهې چې د طالبانو پر وړاندې یې د وسلوالو مبارزې د پرمخ بېولو خبره کړې، په دې باب څخه نه دي ویلي.

د ورځې تازه خبرونه دلته ولولئ

هوګو شارتر دوحه کې له طالب چارواکو سره پر افغانستان خبرې کړي

طالب چارواکو سره د برېتانيا د شارژدافير کتنه

د افغانستان لپاره د برېټانیا شارژدافیر هوګو شارتر په دوحه کې له طالب چارواکو سره په یو لړ مسایلو خبرې کړي.

شارتر د طالبانو د بهرنیو چارو له وزیر امیرخان متقي سره بېګا کتلي او په خپل ټوېټر باندې یې لیکلي چې له متقي سره په خبرو کې یې د هغو بشري همکاریو یادونه وکړه چې برېټانیا یې د وروستۍ زلزلې ځپلو سره کوي.

هغه همدا راز ویلي چې خلکو ته د اساسي خدماتو، د سیاسي ټولمشولیت پر اهمیت، بشري حقونو ته د درناوي او تعلیم ته د ټولو نجونو د پرېښودولو پر مساییلو مهم بحثونه وکړل.

له امیرخان متقي سره د هوګوشارتر د لیدنې په اړه د طالبانو د بهرنیو چارو وزارت ویاند قهار بلخي هم څو ټویټونه کړي او یادونه یې کړې چې د برېټانیا استازي له زلزه ځپلو سره د درې نیم میلیونو پونډو عاجله مرسته اعلان کړه.

مجاهد: د ديني عالمانو غونډه کې به نن کمېټې فعاليت پيل کړي

د طالبانو د حکومت وياند ذبيح الله مجاهد

نن په کابل کې د طالبانو د حکومت له خوا د دیني عالمانو او قومي مخورو د غونډې دویمه ورځ ده.

د طالبانو د حکومت ویاند ذبیح الله مجاهد وايي ګډونوالو په څو کمېټو کې خپل کار مخته وړي او سبا به بیا پرېکړه لیک هم ولري.

طالبانو شاوخوا درې نیم زره دیني عالمان او مخور د افغانستان له ولایتونو او ښارونو راغوښتي او وايي چې پر مهمو ملي او سیاسي مسایلو بحث کوي.

د طالبانو د حکومت ویاند پرون په خبري کنفرانس کې ژمنه وکړه چې د دوی مشرتابه د امکان تر حده د غونډې د ګډونوالو پرېکړې پلې کوي.

په دې ډله کې هېڅ ښځه نه ده رابلل شوې چې دې مسلې ګڼې نیوکې راپارولي.

هندي رسنۍ: ۱۵۰ سېکهان او هندوان به له کابل هند ته ولېږدول شي

ارشيف

هندي رسنۍ وايي چې ۱۵۰ تنه افغان سېکهان او هندوان لا هم په کابل کې انتظار دي چې هند ته ولېږدول شي.

په کابل کې د جون په ۲۳ نېټه د سېکهانو بر ګوردواره له بریده وروسته پرون (پنجشنبې) د افغان سېکهانو لومړۍ ډله هند ته لاړه.

دا ۱۱ تنه افغان سېکهان د هند د حکومت او د دغه هېواد د مدني ټولنو په مرسته په یوه ځانګړې الوتنه کې ډیلي ته لاړه.

د کابل په کارته پروان کې د سېکهانو پر ګوردواره له بریده وروسته د هند حکومت ومنله چې سل تنو افغان سېکهانو ته به پناه ورکړي.

هند افغانستان ته ۶ ټنه طبي مرسته استولې

ارشيف

هندي رسنیو د خپل هېواد د چارواکو په قول ویلي چې دا افغانستان ته د هند د طبي مرستو اووم پېټی دی.

په پرونۍ مرسته کې، چې په کابل کې اندراګاندي روغتون ته وسپارل شوه، ضروري درمل شامل دي.

وروسته له دې چې ملګرو ملتونو له افغانستان سره د بشري مرستو غوښتنه کړې، هند تر اوسه پورې په اوو پړاوونو کې ۲۰ ټنه طبي مرسته افغانستان ته لېږلې ده.

دې هېواد افغانستان ته د ۵۰ زره ټنه غنمو ژمنه هم کړې چې ډېره برخه یې د پاکستان له لارې افغانستان ته رسېدلې ده.

د ترکيې ولسمشر د کابل هوايي ډګر د مديريت په اړه د طالبانو ځواب ته منتظر دی

د ترکيې ولسمشر رجب طيب اردوغان

د ترکیې ولسمشر رجب طیب اردوغان وايي، ترکیې له قطر او متحده عربي اماراتو سره د افغانستان د کابل د نړیوال هوايي ډ‌ګر د عملیاتو وړاندیز کړی او لا هم د طالبانو ځواب ته انتظار ده.

اردوغان، دا خبره پرون (پنجشنبې) په مادرید کې د ناټو د سرمشریزې په پای کې یوې خبري غونډې ته وکړه.

نوموړی دا خبره داسې مهال کوي چې د طالبانو حکومت د درې هوايي ډګرونو د مديريت چارې يو عربي شرکت ته سپارلي دي.

حنا رباني کهر: لويديځ هېوادونه دې پر افغانستان بنديزونه نرم کړي

د پاکستان د بهرنیو چارو لپاره د دولت وزیره حنا رباني کهر

د پاکستان د بهرنیو چارو لپاره د دولت وزیرې حنا رباني کهر له لوېدیځو هېوادونو وغوښتل چې پر افغانستان بندیزونه نرم کړي.

اغلې کهر پرون (پنجشنبې) په یوه مرکه کې وویل، له اقتصادي نظره د افغانستان انزوا به د دغه هېواد اقتصاد د پاشل کېدو لور ته بوځي.

دې په ځانګړي ډول په افغانستان کې د نړیوالو بانکونو د فعالیت درېدا او د دغه هېواد د شتمنیو کنګل پاتې کېدا د افغانستان د اقتصاد لپاره خطرناکه وبلله.

د بهرنیو چارو لپاره د پاکستان د دولت وزیرې د طالبانو تر واک ته رسېدو مخکې له افغانستانه د لوېدیځو ځواکونو د وتلو پر څرنګوالي انتقاد وکړ.

چين: د افغانستان زلزله ځپلو ته مو مرستې رسولي دي

د افغانستان په جنوب ختيځ کې د زلزلې له امله رامنځته شوې ويجاړي

چین وايي، د یوې خیریه غیر حکومتي موسسې له لوري یې د افغانستان زلزله ځپلو ته بشري مرستې ورسېدې.

چین د افغانستان له زلزله ځپلو سره د اووه نیم میلیون ډالرو په ارزښت د بشري مرستو ژمنه کړې ده.

په همدې حال کې د ملګرو ملتونو د بشري مرستو د همږغۍ ادارې یا اوچا پرون یو وار بیا اعلان وکړ چې په افغانستان کې شاوخوا ۳ لکه ۶۲ زره زلزله ځپلو ته څه باندې ۱۱۰ میلیون ډالرو ته فوري اړتیا ده.

کرزی امريکا ته: د افغانستان کنګل شوې شتمني د امانت په توګه وساتئ

پخوانی ولسمشر حامدکرزی

د افغانستان پخواني ولسمشر حامد کرزي له امریکا وغوښتل چې د افغانستان اسعاري زېرمه د یوه امانت په توګه وساتي او په هیڅ صورت یې ونه لګوي.

ښاغلي کرزي دا خبره وروسته له دې کړې چې واشنګټن پوسټ ورځپاڼې په یوه راپور کې وویل چې امریکا له طالبانو سره پر یوه مېکانېزم کار کوي چې طالبان په څه ډول له دې اسعاري زېرمې څخه، چې په حقیقت کې د افغانستان بانک او افغانیو پشتوانه ده، کار واخلي.

حامد کرزي پر خپله ټویټرپاڼه کښلي چې د افغانستان بانک اسعاري زېرمه د افغانستان د خلکو ملي شتمني ده او له امریکا غواړي چې دا پیسې مصرف نه کړي.

ماليې وزارت: په تېرو لسو مياشتو کې له درې ولايتونو ۴ ميليارده افغانۍ عوايد راټول شوي

د افغانستان ماليې وزارت

د طالبانو حکومت مالیې وزارت وايي، په تېرو لسو میاشتو کې یوازې د پکتیا، تخار او نیمروز ولایتونو له کمرکونو نه له ۴ میلیاردو زیاتې افغانۍ عواید راټولې کړي.

دغه وزارت په خپل فېسبوک پاڼه کې ادعا کړې چې په یادو کمرکونو کې د فساد سره جدي مبارزه شوې او دغه لړۍ به راتلونکې کې هم دوام ولري.

که څه هم وزارت ددغو عوایدو د راټولېدو لاملونه نه‌دي په ډاګه کړي خو له دې وړاندې یې په کمرکونو کې افغان سوداګرو ته د اسانتیاو، په سوداګریزو توکو کې د لوړو تعرفو د کنټرول او ورسره په کمرکونو کې د چارو د چټکتیا خبره کړې وه.

د طالبانو د مالیې وزارت په داسې حال کې په دغو ولایتونو کې د زیاتو عوایدو خبره کوي چې له دې وړاندې په کمرکونو کې د زیات فساد له امله وخت ناوخت راپورونه ورکول شوي و.

سره له دې چې د طالبانو حکومت په کمرکونکو کې له فساد سره مبارزه جدي ګڼي خو له دې وړاندې یو شمېر سوداګر له ازادي راډیو سره په خبرو کې په ګمرکونو کې د پام وړ د ستونزو خبره کړې وه.

سعودي عربستان بله شنبه د لوی اختر لومړۍ ورځ اعلان کړه

د سعودي د مياشت ليدنې کمېټه

سعودي عربستان پرون اعلان وکړ چې د ذي الحجې میاشت پرون ولیدل شوه او پر دې اساس جمعه د عرفې او شنبه د لوی اختر ورځ ده.

سږ کال له افغانستانه ۱۳ زره ۵۸۲ کسان د فرضي حج لپاره سعودي عربستان ته تللي.

تېر کمکي اختر کې د طالبانو د حکومت لخوا د اختر ورځ اعلان شوه، خو د لوی اختر د ورځې اعلان په اړه يې لا تر اوسه څه نه‌دي ويلي.

د کډوالو لويه کمېشنري: تر اوسه مو زلزله ځپلو ولايتونو ته د مرستو ۳ کاروانونه لېږلي

پکتيا زلزله ځپلو سره د مرستو وېش پروګرام

د ملګرو ملتونو د کډوالو لویه کمېشنري وايي، تر اوسه پورې یې په پکتیکا او خوست ولایتونو کې زلزله ځپلو سیمو ته د بشري مرستو ۳ کاروانونه لېږلي دي.

د دې کمېشنرۍ له خبرپاڼې سره سم، دا مرستې د څه باندې ۱۲ زره تنو لپاره کفایت کوي.

ملګرو ملتونو ویلي چې زلزلې په پکتیکا او خوست ولایتونو کې څه باندې ۲ لکه تنه اغېزمن کړي دي.

ايران د طالبانو له لوري د خپل سرتېري پر وژل کېدو غبرګون وښود

نيمروز کې ايران سره پر سرحدي پوله طالب سرتېری

د ایران حکومت له طالب پوله ساتو سره په نښته کې د خپل یوه سرتېري په وژل کېدو غبرګون وښود.

د ایران د بهرنیو چارو وزارت وياند د چهارشنبې په ورځ وویل چې له افغان واکمنانو غواړي چې د ایران د سیستان او بلوچستان او د افغانستان د نیمروز ولایتونو ترمنځ د میلک په پوله کې د شخړې په نتیجه کې د یوه ایراني پوله ساتي د وژلو عاملانو ته سزا ورکړي او داسې اقدامات وکړي چې دا ډول پېښې بیا تکرار نه‌شي.

راپورونه وايي، د سې شنبې په ورځ د طالبانو او ایراني پوله ساتو ترمنځ هغه مهال شخړه وشوه چې د ځینو راپورونو پر اساس ایراني پوله ساتو پر دوو افغان ماشومانو ډزې وکړې او مرګ ژوبله یې ور واړوله.

ایران د خپل وژل شوي پوله ساتي نوم محمد صیاد ښوولی دی.

د دوبۍ واکمن زلزله ځپلو ته د بشري مرستو رسولو لپاره د الوتنو د اسانتيا امر ورکړی

د متحده عربي اماراتو د دوبۍ واکمن شیخ محمدبن راشد ال مکتوم

د متحده عربي اماراتو د دوبۍ واکمن شیخ محمدبن راشد ال مکتوم په افغانستان کې زلزله ځپلیو ته د بشري مرستو د ژر رسېدو لپاره د الوتنو د اسانتیا امر وکړ.

د متحده عربي اماراتو د خلیج ټایمز ورځپاڼې د راپور له مخې، د دوبۍ واکمن دا حکم د روغتیا د نړیوال سازمان او نړیوالې ټولنې له غوښتنې وروسته وکړ.

د روانې اوونۍ د سې شنبې په ورځ له دوبۍ څخه په یوه الوتنه کې څلرویشت نیم ټنه درمل او طبي وسایل کابل ته یووړل شول.

طالبانو پر بهرنيو اسعارو راکړه ورکړه بنده کړه

ارشيف

د طالبانو د کورنیو چارو وزارت پرون (چهارشنبې) په هېواد کې دننه په هر ډول سوداګري معامله کې له بهرنیو اسعارو کار اخیستل منع اعلان کړ.

دې وزارت په یوه خبرپاڼه کې ویلي چې د کابینې د پرېکړې پر اساس، د کور، ځمکې او موټر په شمول هر ډول تجارتي معامله په بهرنیو پیسو منع ده.

دې وزارت همدا راز ویلي چې د کابینې د دې پرېکړې د عملي کولو لپاره یې د پولیسو قوماندانو ته امر کړی چې په دې برخه کې جدي اقدامات وکړي.

په خبرپاڼه کې دغه راز راغلي چې د دې امر سرغړوونکو ته به له قانون سره سم سزا ورکړل شي.

د طالبانو د حکومت څه باندې لس میاشتې وځي خو تر اوسه څرګنده نه ده چې دوی کوم قوانین عملي کوي.

یو طالب پلاوى له امریکایي چارواکو سره د خبرو لپاره دوحې ته روان شو

د طالبانو د بهرنیو چارو سرپرست وزیر امیرخان متقي

د طالبانو حکومت د مالیې وزرات او د افغانستان بانک چارواکي له امریکایي چارواکو سره د خبرو لپاره نن د قطر پلازمېنې دوحې ته روان شول.

د آسوشیتدپرس خبري آژانس د راپور له مخې د طالبانو د بهرنیو چارو وزرات مرستیال ویاند حافظ ضیا احمد ویلي، چې د دغه پلاوي مشري به د بهرنیو چارو سرپرست وزیر امیرخان متقي کوي او په دوحه کې به د افغانستان لپاره د امریکا له ځانګړي استازي ټوماس ویسټ او د امریکا د خزانې وزارت له چارواکو سره د افغانستان پر اقتصادي وضعیت او بانکي سکتور خبرې وکړي.

له دې مخکې واشنګټن پوسټ ورځپاڼې پرون سې شنبې خبر ورکړی و، چې د امریکا د ولسمشر جو بایډن ادارې چارواکي د طالبانو له مشرتابه سره پر یوه میکانېزم کار کوي څو پر اساس به یې د طالبانو حکومت ته اجازه ورکړل شي چې د افغانستان بانک له شتمنیو څخه د شدیدې لوږې او بې وزلۍ د ستونزو د کمولو لپاره کار واخلي او دا ډاډ ترلاسه کړي، چې له دغو پیسو به ناوړه ګټه نه اخیستل کېږي.

د تېر کال د اګست د میاشتې راهیسې، چې طالبان بیا پر افغانستان واکمن شوي نړیوالې ټولنې منجمله امریکا پر دې هېواد بندیزونه لګولي دي.

دغه راز د افغانستان د مرکزي بانک شاوخوا نهه نیم میلیارد ډالره په بهر کې کنګل شوې چې شاخوا اوه ميليارده ډالره یې د امریکا په بانکونو کې ده.

نور راوښيه

XS
SM
MD
LG