د لاسرسۍ وړ لېنکونه

تازه خبر
جمعه ۱۲ لیندۍ ۱۴۰۰ کابل ۱۱:۲۱

افغانستان

سرچینه: جلال اباد ښار کې چاودنو ۳ تنه ملکي وګړي ووژل

ارشیف، عکس تزئیني بڼه لري

یوه ځايي سرچینه وايي ، د ننګرهار مرکز جلال اباد ښار کې چاودنو ۳ تنه ملکي وګړي ووژل.

دا سرچینه چې نه غواړي د موضوع د حساسیت له کبله نوم یې واخیستل شي ازادي راډیو ته وویل چې نن سهار شااوخوا ۹بجې د جلال اباد ښار د دوهمې ناحیې اړوند فارم هډې پل ته څېرمه دوه غبرګې چاودنې وشوې چې په کې ۳ تنه لارویان ملکیان ووژل شول.

د سرچینې د معلوماتو له مخې، پېښه د سړک ترغاړې د ځای پرځای شوېو چاودېدونکو توکو د چاودنې له امله رامنځته شوې دې.

معلومه نه ده چې د چاودنو هدف څوک و؟

ځایي مسؤلانو په رسمي بڼه په دې اړه معلومات نه دي شریک کړي او نه یې هم مسؤلیت چا منلی دی.

د ورځې تازه خبرونه دلته ولولئ

د امریکا ځانګړي استازي له قطري چارواکو سره د افغانستان په اړه خبرې وکړې

د افغانستان لپاره د امریکا ځانګړي استازي سره د قطر بهرنیو چارو وزیر او د دغه هېواد د ملي امنیت سلاکار لیدنه

د افغانستان لپاره د امریکا ځانګړي استازي ټام وېسټ له لوړپوړو قطري چارواکو سره د افغانستان په مسئله خبرې کړي.

ټام وېسټ نن په خپل ټوېټر د دې لیدنې په اړه لنډ لیکلي.

هغه زیاته کړې چې د امریکا د یوه نږدې متحد قطر هېواد د بهرنیو چارو له وزیر محمد بن عبدالرحمن ال ثاني او د دغه هېواد د ملي امنیت له سلاکار محمد ال مسناد سره‌یې د افغانستان د راتلونکي په اړه بحث کړی. ټام وېسټ په دې ټویټ کې لیکلي چې د قطر ملاتړ او فعالیت د ستایلو دی.

قطر په دوحه کې د طالبانو د سیاسي دفتر کوربه دی او وخت ناوخته له امریکایانو او نورو چارواکو سره د افغانانو غونډې جوړوي.

د افغانستان لپاره د امریکا ځانګړي استازي ټام وېسټ د دې اوونۍ سر کې د طالبانو د بهرنیو چارو د سرپرست وزیر امیرخان متقي په مشرۍ له یوه لوړپوړي پلاوي سره هم دوه ورځې غونډې وکړې.

طالبان وایي د معتادینو د درملنې د تر ټولو ستر مرکز ظرفیت‌یې لوړ کړی

کابل کې د معتادینو د درملنې یو مرکز

د طالبانو حکومت کورنیو چارو وزارت وایي، پر نشو د روږدو کسانو د درملنې د تر ټولو ستر مرکز ظرفیت‌یې لوړ کړی دی.

د دغه وزارت ویاند سعید خوستي ویلي، پلازمېنه کابل کې دې مرکز پخوا د زرو روږدو د درملنې وړتیا درلوده، خو اوس په یوه وخت درې زره کسان په‌کې تداوي کېدای شي.

ښاغلي خوستي پرون د نشه‌یي توکو په وړاندې د مبارزې معینیت له مسؤلانو سره له دې مرکزه د لیدنې پر مهال وویل: "د اسلامي امارت پلان دا دی چې په کابل ښار کې او په ولایتونو کې چې څومره معتادین دي، راټول کړل شي او علاج‌یې وشي. دا خلک واقعاً د رحم وړ دي، دوی مریضان دي، مجرمین نه‌دي."

د طالبانو کورنیو چارو وزارت وایي، د سړې هوا په رارسېدو یې د کابل له بېلابېلو سیمو نږدې درې زره معتادین راټول کړي او د درملنې مرکزونو ته‌یې استولي دي.

په افغانستان کې د معتادینو د کره شمېر په اړه تازه څه نه‌دي خپاره شوي، خو پخوانیو سروې‌ګانو کې ویل شوي چې شااوخوا درې ملیونه کسان په‌کې په نشو روږدي دي.

د طالبانو لوی درستیز: د یوه پیاوړي پوځ د جوړولو لپاره هڅې روانې دي

ارشیف، د طالبانو د بدري ۳۱۳ قطعې یو شمېر سرتېري

د طالبانو حکومت پوځي چارواکي وایي، د یوه پیاوړي پوځ د جوړولو لپاره‌یې هڅې روانې دي.

د طالبانو د وسله‌والو ځواکونو لوی درستیز قاري فصیح‌الدین دا خبرې پرون په پکتیا کې ۲۰۳ تندر قول اردو کې چې اوس د منصوري قول اردو په نوم ده، وکړې.

هغه خبریالانو ته وویل، د اردو په لیکو کې د پخواني حکومت مسلکي کسانو ته هم ځای ورکوي.

دی زیاتوي: "هغه کسان هم جذبېږي چې پخوانۍ اردو کې یې روزنه ترلاسه کړې او مسلکي دي، دا به هغه کسان وي چې فساد کې ښکېل نه‌وو."

تر دې وړاندې د طالبانو د بهرنیو چارو سرپرست وزیر امیر خان متقي هم ویلي و چې د دوی په پوځ کې به د پخواني حکومت ټیټ پوړه سرتېرو ته ځای نه‌وي.

د محمد اشرف غني په مشرۍ د افغانستان پخواني حکومت شااوخوا درې نیم لکه پوځیان، پولیس او د ملي امنیت سرتېري درلودل، خو د طالبانو د بهرنیو چارو وزیر پاکستان ته د خپل وروستي سفر پر مهال وویل، په هغه کمیت کې اردو ته اړتیا نه‌لري.

طالبان: ویاندویان مکلف دي چې د اړتیا په صورت کې رسنیو ته معلومات ورکړي

د طالبانو ویاند او د اطلاعاتو او فرهنګ وزارت مرستیال ذبیح‌الله مجاهد

د طالبانو حکومت وایي، په کابل او ولایتونو کې یې ویاندویان مکلف دي چې د اړتیا په صورت کې رسنیو ته معلومات ورکړي.

دا خبره د طالبانو ویاند او د اطلاعاتو او فرهنګ وزارت مرستیال ذبیح‌الله مجاهد پرون خپلو ویاندویانو ته د یوه روزنیز پروګرام په پای کې وکړه.

دې غونډې ته د رسنیو ځیني مسؤلان هم ورغوښتل شوي وو چې هغوی له طالبانو نه اطلاعاتو ته د لاسرسي په برخه کې د همکاریو د زیاتوالي غوښتنه وکړه.

طالبانو پرون د ۲۵ وزارتونو او ادارو لپاره خپل ټاکل شوي ویاندویان هم رسنیو ته وروپېژندل.

د افغانستان د خبریالانو ملي ټولنې څه موده وړاندې په یوه نظر پوښتنه کې ویلي و چې د طالبانو په راتګ ۷۵ سلنه رسنۍ تړل شوي او اطلاعاتو ته لاسرسی هم ستونزمن شوی دی.

طالبانو په ارزګان کې ۱۴ تنه د جنایي جرمونو په تور نیولي

ارزګان کې یو شمېر نیول شوي کسان

په ارزګان کې د طالبانو ځایي چارواکي وایي چې له تېرې یوې میاشتې راهیسې یې ۱۴ تنه د جنایي جرمونو په تور نیولي دي.

د ارزګان ولایت لپاره د طالبانو د والي ویاند او د اطلاعاتو او فرهنګ رئیس محمد اصف ازادي راډيو ته وویل چې دغه کسان عدلي او قضايي ارګانونو ته سپارل شوي دي.

نوموړي وویل چې دغه ولایت کې امنیتي وضعیت په ښه کېدو دی.

دا په داسې حال کې ده چې په دې وروستیو کې په ارزګان ولایت کې د انسان تښتوونکو، غلاو او نورو جنايي جرمونو کچه لوړه شوې چې خلک‌یې لامل د خلکو او یا هم د ځوانانو بې‌کاري یادوي.

کابل کې لسګونه ښځو د عدالت غوښتنې په پار اعتراضي ناسته وکړه 

ارشیف، کابل کې د مېرمنو اعتراض

نن په کابل کې لسګونه ښځو له یوه سرپټي ځایه د عدالت غوښتنې په پار اعتراضي ناسته وکړه.

دغو ښځو په یوه ویډیو کې چې ازادي راډيو ته یې استولې ویلي چې بهر د لاریون لپاره وتلی نه شي او ادعا کوي چې د طالبانو له خوا په مرګ ګواښل شوې دي: "موږ په مرګ ګواښل شوي یو. موږ واټونو ته نه شو وتلی یعنې خپل غږ بهر نه شو پورته کولی. مجبوره یو چې د عدالت غوښتنې غږ له سرپټو ځایونو پورته کړو او له نړیوالې ټولنې وغواړو چې زموږ پیغامونه ولولي. موږ څه غواړو همدا چې ښوونځي باید پرانیستل شي او ښځې د زده کړو او کار حق لري."

دغو ښځو له دې مخکې د کابل ښار په بېلابېلو سیمو کې د مظاهرو هڅه کوله، خو اکثر د طالبانو له خوا نه پرېښودل کېدې او د راپورونو له مخې ان ځینې وخت د طالبانو وسله والو وهلې هم دي.

'IRC' موسسې لوګر کې له بزګرو سره نغدي مرستې کوي

ارشیف، عکس تزئیني بڼه لري

د 'IRC' موسسې په لوګر ولایت کې پر بزګرو څه باندې لس میلیونه افغانۍ د نغدي وېش لړۍ پیلوي.

د کرنې وزارت ویاند مستعین عمري ازادي راډیو ته وویل، دغه لړۍ د لوګر ولایت د کرنې ریاست په مرسته پیل شوی او په ترڅ کې به یې هر بزګر ته ۱۷ زره او ۵۸۰ افغانۍ ورکړل شي.

د دغو مرستو هدف په لوګر ولایت کې د کرنې وده بلل شوی.

د لوګر ولایت اکثریت اوسیدونکی په کرنه بوخت دي او هرکال مڼې، انګور، زردالو، شفتالو، غنم، جوار او لسګونه نور کرنیز توکي نورو ولایتونو ته لېږي.

طالبان: د ځنګلونو د پرې کولو مخنیوي لپاره خوست ته یو پلاوی تللی

ارشیف، عکس تزئیني بڼه لري

د کرنې اوبو لګولو او مالدارۍ وزارت وایي، د ځنګلونو د پرې کولو او بهر ته د هغو د قاچاق د څېړلو او مخنیوي لپاره یې یو پلاوی خوست ولایت ته لېږلی دی.

د کرنې وزارت ویاند مستعین عمري ازادي راډیو ته وویل، دغه پلاوی د یاد وزارت د اوبو لګولو او طبیعي زېرمو معین په مشرۍ خوست ته تللی.

ښاغلی عمری وایي: "ځنګلونه د افغانستان طبیعي شتمني ده او د طالبانو حکومت د دغې شتمني ساتلو ته ژمن دي، له همدې امله به ډېر ژر د ځنګلونو د غیرقانوني پرېکولو او بهرته د هغو د قاچاق مخنیوي طرحه جوړه او کابینې ته وړاندې شي."

د ښاغلي عمري په خبره دغه راز د طالبانو حکومت کابینې پرېکړه کړې چې یو کمېټه دې جوړه شي، څو د لرګیو د انتقال لپاره یو مشخص وخت وټاکل شي، څو یې د قاچاق مخنیوی وشي.

سور صلیب: وچکالۍ افغانستان له ناوړه اقتصادي وضعیت سره مخ کړی

افغانستان کې بې ځایه شوي کډوال

د سره صلیب او سرې میاشتې نړیوال فدراسیون خبرداری ورکوي چې سږکال افغانستان د وچکالۍ له امله له ناوړه اقتصادي وضعیت سره مخ دی.

د دغه فدراسیون په یوه اعلامیه کې راغلي، چې همدا اوس څه ناڅه ۲۲ میلیونه افغانان د خوراکي موادو له جدي کموالي سره مخ دي، ځکه وچکالي ۸۰ سلنه کرنېزې ځمکې اغېزمنې کړي، خلک یې د خپلو سیمو پریښودو ته اړ کړي.

د سره صلیب او سرې میاشتې نړیوال فدراسیون ویلي چې دوی هڅه کوي په روان ژمي کې درې زره ټنه خوراکي توکي په دوه لکه او لس زره اړمنو افغانانو وویشي.

په اعلامیه کې د دغه فدراسیون د اسیا د برخې اجرائیه رییس له خولې ویل شوي چې همدا اوس خلک له لوږې او سړو سره مخ دي او که مرستې په خپل وخت ونه رسېږي، نو یو انساني ناورین به رامنځته شي.

ملګرو ملتونو د نړۍ ډېرو زیانمنونکو لپاره مرستې غوښتې

افغانستان کې بې ځایه شوي کډوال

ملګرو ملتونو د نړۍ له ډېرو زیانمنونکو سره د مرستې لپاره د ۴۱ میلیارد ډالرو غوښتنه کړې ده.

د ملګرو ملتونو د بشري مرستو د همغږۍ ادارې اوچا د راتلونکو اړتیاوو په کلني سند کې چې نن یې خپور کړی ویلي، دا ۴۱ میلیارد ډالره د ۲۰۲۲ میلادي کال په مخه په شااوخوا ۶۳ هېوادونو کې ۱۸۳ میلیونو سختو اړمنو او زیانمنونکو کسانو ته د ژوند ژغورونکو لاسنیویو لپاره اړینې دي.

ملګري ملتونه معمولاً د خپلو مرستندویه پروګرامونو لپاره د نړۍ له بډایه هېوادونو او تمویلونکو خیریه بنسټونو د مرستو غوښتنه کوي.

د اوچا په خبره افغانستان د اړمنو او زیانمنونکو هېوادونو په سر کې دی ځکه د خلکو اړتیاوې یې په بې سارې کچه مخ په زیاتېدو دي.

د اوچا ادارې خبرداری ورکړی چې په افغانستان کې ۲۴ میلیونه کسان چې د دغه هېواد ۶۵ فیصده نفوس جوړوي ژوند ژغورونکو مرستو ته اړتیا لري او له دې ډلې یې نهه میلیونه له قحطۍ سره مخ دي.

د ملګرو ملتونو ادارې او همکارانو یې وړاندوینه کړې چې په افغانستان کې د ۲۰۲۲ میلادي کال په مخه له خلکو سره د مرستو لپاره څلور نیم میلیارد ډالرو ته اړتیا ده.

بلېنکن: ناټو افغانستان کې د داعش او نورو ترهګرو ډلو سره په مبارزې تمرکز لري

په کونړ کې امریکایي سرتېری

د امریکا د بهرنیو چارو وزیر وايي د ناټو متحدین په افغانستان کې د داعش خراسان په شمول له ترهګرو ډلو سره په مبارزې باندې تمرکز لري.

انتوني بلېنکن دا خبره پرون د لاتویا په پلازمېنه ریګا کې د ناټو د بهرنیو چارو وزیرانو غونډې ته کړې ده.

بلېنکن ویلي: "په افغانستان کې د غوڅ ملاتړ مأموریت له ختمېدو درې میاشتې وروسته متحدین د داعش خراسان په شمول له ترهګرۍ سره په مبارزې باندې متمرکزه دي او موږ هڅه کوو چې د ناټو لپاره یوه نوې ستراتېژيکه تګلاره برابره کړو څو ډاډمنه شي چې متحدین په یوه بدلېدونکې نړۍ کې نویو ګواښونو سره د مبارزې لپاره چمتو دي."

بلېنکن له افغانستان د خلکو د را ایستلو په مأموریت کې د ناټو له غړو مننه وکړه چې په ګډه‌یې له امریکا سره د څه باندې ۱۲۰ زره کسانو په را ایستلو کې مرسته وکړه.

کابل کې چاودنه وشوه

طالبان

نن سهار شااوخوا لس بجې کابل بيا د یوې چاودنې شاهد و.

د طالبانو حکومت د کورنیو چارو وزارت ویاند سعید خوستي ازادي راډیو ته وویل چې دا چاودنه د کابل ښار د ۱۰مې حوزې اړوند د سلیم کاروان په سیمه کې د سړک د غاړې د ماین له امله وه.

ښاغلي خوستي زیاته کړه چې په چاودنه کې چاته زیان نه‌دی اوښتی.

که څه هم عیني شاهدانو په سیمه کې د پرله‌پسې ډزو خبر ورکړی، خو طالبانو حکومت په دې اړه څه نه‌دي ویلي.

دا په روانه اوونۍ کې په کابل کې دوهمه پېښه ده.

روسیې له افغانستانه د خلکو د ایستلو ۳مه او وروستۍ الوتنه ترسره کړه

د افغانستان په هوايي ډګر کې يوه روسي الوتکه

د روسیې دفاع وزارت وایي، له افغانستانه‌یې د خلکو د ایستلو درېیمه او وروستۍ الوتنه ترسره کړه.

د روسیې تاس خبري اژانس د دې وزارت له قوله وویل، په دغه پوځي الوتکه کې چې د مسکو د چکالوفسکي په هوایي ډګر کې کېناسته، د روسیې، افغانستان او د یو شمېر نورو هېوادونو اتباع ولېږدول شول.

د راپور له مخې د روسیې پوځ په درېیو الوتنو کې له ۲۰۰ زیات کسان له افغانستانه ایستلي دي.

په عین حال کې د روسیې د ساینس او لوړو زده‌کړو وزارت ویلي چې د هغو افغان محصلانو چې د روسیې په پوهنتونونو کې یې زده‌کړې کولې، لومړنۍ ډله دې هېواد ته رسېدلې ده.

نړیوال بانک د افغانستان له کنګل شویو پیسو د ۲۸۰ ملیون ډالرو د لېږد ملاتړ وکړ

نړیوال بانک

د نړیوال بانک بورډ د افغانستان لپاره له یوه وجهي صندوق څخه د ملګرو ملتونو دوو مرستندویه ادارو ته له کنګل شویو پیسو څخه د ۲۸۰ ملیون ډالرو د لېږد ملاتړ وکړ.

روېټرز خبري اژانس د ځینو سرچینو په حواله وایي، مخکې له دې چې دغه پیسې د خوړو نړیوال پروګرام (WFP) او د ماشومانو د ساتنې ادارې یونېسف ته ورکړل شي، د افغانستان د بیارغونې لپاره د نړیوال بانک د وجهي صندوق ۳۱ بسپنه ورکوونکي یې باید تأيید کړي.

د نړیوال بانک بورډ د سې شنبې د ورځې په غونډه کې پر دې غور کاوه چې که له دغه وجهي صندوق څخه چې یو نیم میلیارد ډالره مرسته په‌کې راټوله شوې، تر ۵۰۰ ملیون ډالرو پورې له افغانستان سره د بشري مرستو لپاره ازاده کړي.

د راپور له مخې د افغانستان ۳۹ ملیونه نفوس له سخت اقتصادي وضعیت سره مخامخ دی، د ژمي لپاره خوراکي مواد کم دي او بې‌وزلي په وروستیو درېیو میاشتو کې چې امریکایي ځواکونه له دې هېواده وتلي او طالبان واک ته رسېدلي، پراخه شوې ده.

د نړیوال بانک یوه ویاند تأيید کړه چې د دې بانک بورډ په دې اړه بحث وکړ او د بسپنه ورکوونکو رهبري کمېټه به د سبا جمعې په غونډه کې په دې اړه چې ایا دغه پیسې مرستندویه ادارو ته ورکړل شي که نه؟ پرېکړه وکړي.

ملګرو ملتونو د افغانستان څوکۍ طالبانو ته ورنه‌کړه

د ملګرو ملتونو غونډه؛ نیویارک

په ملګرو ملتونو کې د افغانستان څوکۍ طالبانو ته ورنه‌کړل شوه.

په دې اساس به په دغه سازمان کې د پخواني افغان دولت استازولي خپل کار ته دوام ورکوي.

دې استازولۍ هم په خپله ټویټرپاڼه لیکلي چې د ملګرو ملتونو د اعتبارلیکونو کمېټې په یاد سازمان کې د افغانستان څوکۍ په هکله خپله پرېکړه وځنډوله.

استازولۍ ویلي په دې اساس به د افغانستان د اسلامي جمهوریت نمایندګي خپل کار ته دوام ورکوي.

غلام محمد اسحق‌زی چې د پخواني دولت استازی دی په خپله څوکۍ پاتې شوی.

په ملګرو ملتونو کې د سویډن استازې او د اعتبارلیکونو د نهه کسیزې کمېټې مشرې اننا کارین اینسټروم تر بېګانۍ غونډې وروسته وویل چې دوی د افغانستان او میانمار په اړه پرېکړې ځنډولي.

د پخواني ولسمشر اشرف غني مرستیال امرالله صالح هم د ملګرو ملتونو له دې پرېکړې هرکلی کړی. هغه ویلي دي چې په دې سازمان کې د افغانستان د اسلامي جمهوریت د استازولۍ دوام او د بیرغ رپانده ساتل د ده په خبره د هغو ټپونو لپاره مرهم دی چې طالبانو افغانستان ته وراړولي.

خو د طالبانو له‌خوا دې څوکۍ ته نومول شوي سهیل شاهین په یوه ټویټ کې ادعا کړې چې دا څوکۍ په افغانستان کې د طالبانو د حکومت د استازولۍ مشروع حق دی. هغه زیاته کړه په دې پرېکړه کې د ځینو هېوادونو سیاسي ملحوظات په نظر کې نیول شوي.

نور راوښيه

XS
SM
MD
LG