د لاسرسۍ وړ لېنکونه

تازه خبر
چهارشنبه ۳۱ وږی ۱۴۰۰ کابل ۱۰:۲۹

افغانستان

بلېنکن دوحې ته ورسېد، څو د افغانستان د کړکېچ په اړه وغږیږي

د امریکا متحده ایالاتو د بهرنیو چارو وزیر انتوني بلېنکن

د امریکا متحده ایالاتو د بهرنیو چارو وزیر انتوني بلېنکن د دوشنبې په ورځ د قطر پلازمینې دوحې ته ورسېد، څو د افغانستان د کړکېچ په اړه خبرې وکړي.

قطر اوس مهال د زرګونه افغانانو کوربه دی چې د امریکا له خوا له افغانستان څخه ایستل شوي دي.

امریکا له کابله خپل سفارت او اړوندې چارې اوس له قطر مخته وړي او د همدغو افغانانو د ویزو کارونه مخته وړي چې د قطر له خوا په جوړو شوېو کمپونو کې اوسي.

متحده ایالاتونو د قطر په شمول د ټولو هغو هېوادونو ستاینه کړې چې په موقتي شکل یې د افغانانو لپاره د هستوګنې کمپونه برابر کړي دي.

قطر له افغانستانه د امریکایانو او افغانانو د ایستلو په ماموریت کې کلیدي رول لوبولی دی.

دا ماموریت وروسته له هغې پیل شو چې طالبانو د اګسټ په پنځلسمه په کابل ولکه ټینګه کړه.

د امریکا دفاع وزیر لوېډ اسټن هم دوحې ته سفر کوي او هلته به له بلېنکن سره یوځای له افغانانو سره وګوري.

د ورځې تازه خبرونه دلته ولولئ

امریکا ته ورغلو افغانانو له ځانه سره خطرناکه ناروغي هم لېږدولې

امریکا ته ورغلي کډوال

د امریکا متحد ایالاتونه وایي، په لسګونو زره افغانان چې دې هېواد ته ورغلي دي خطرناکه ناروغۍ یې امریکا ته له ځانونو سره وړي دي.

یو شمېر امریکایي رسنیو د امریکا د ناروغیو د کنټرول د مرکز په وینا پرون سې شنبه (د وږي ۳۰مه) خبر ورکړچې دغو افغانانو د ملاریا، شري او توبرکلوز ناروغۍ امریکا ته له ځانونو سره لېږدولې دي.

دغو افغانانو ته ویل شوي دي چې د شري ضد واکسین وکړي.

د راپورونو له مخې تراوسه د شري شپاړس پېښې ثبت شوي دي.

کومو کسانو ته چې دا واکسین ورکړل شوی دی باید درې اوونۍ قرنطین شي.

دغو افغانانو ته اته روغتیایي مرکزونه ځانګړي شوي دي چې درې یې د ویرجینیا په ایالت کې او پنځه په انډیانا، نیوجرسي، نیو مکسیکو، تکزاس او ویسکانسن کې دي.

هند او فرانسه له افغانستانه د ترورېزم احتمالي خپریدو ته اندېښمن دي

د هند صدراعظم ناریندرا مودي او د فرانسې ولسمشر امانویل مکرون

د هند صدراعظم ناریندرا مودي او د فرانسې ولسمشر امانویل مکرون له افغانستانه د ترورېزم احتمالي خپریدو ته اندېښنه ښکاره کړه.

د هند د صدراعظم دفتر خبر ورکوي چې مودي له ښاغلي مکرون سره پرون د ټیلیفوني خبرو پر مهال همدا راز له افغانستانه د مخدر موادو، انسانانو او وسلو د قاچاق په اړه خبرې وکړې.

د هند او فرانسې مشرانو ټینګار وکړچې باید په افغانستان کې د ښځو او اقلیتونو د حقونو په برخو کې ډاډ ترلاسه شي.

تمه ده چې د هند صدراعظم ناریندرا مودي د جمعې په ورځ د افغانستان په اړه د امریکا د متحد ایالاتونو له ولسمشر جوبایډن سره هم خبرې وکړي.

د طالبانو سرپرست رییس الوزراء د روسیې، چین او پاکستان استازو سره وکتل

د طالبانو سرپرست رییس الوزراء ملا محمد حسن اخند

د طالبانو سرپرست رییس الوزراء ملا محمد حسن اخند پرون سې شنبه (د وږي ۳۰مه) په کابل کې د روسیې، چین او پاکستان له استازیو سره وکتل.

د افغانستان لپاره د روسیې له ځانګړي استازي ضمیرکابلوف، د افغانستان لپاره د پاکستان له ځانګړي استازي محمد صادق خان او د افغانستان لپاره د چین له ځانګړي استازي یو شیاو یونګ سره د غونډې پرمهال د طالبانو د بهرنیو چارو سرپرست وزیر امیرخان متقي او د دوی د مالیې سرپرست وزیر هدایت الله بدري هم وو.

ښاغلي متقي په خپل ټویټر کې د دې غونډې عکسونه خپاره کړي دي، خو نور جزییات یې نه دي ورکړي چې پر کومو موضوعاتو خبرې شوي دي؟

بل لورته له دغو درېیو بهرنیو استازیو سره پخواني ولسمشر حامد کرزي کتلي دي.

ښاغلي کرزي په فیسبوک کې لیکلي دي چې ده او ښاغلي عبدالله د روسیې، چین او پاکستان له استازیو سره د غونډې پر مهال پر یوه ټول شموله حکومت، سولې او ثبات، معتدل سیاست او د ښځو او نجونو لپاره د تحصیلي او تعلیمي فرصتونو پر چمتوالي ټینګار کړی دی.

یو افغان ډاکتر وحید ارین بریتانیا کې د کال د غوره ډاکتر اوارډ وګاټه

ډاکتر وحید ارین (کین) او مشهوره فوټبالر ډېوېډ بکهام

وحید ارین په بریتانیا کې د کال د غوره ډاکتر اوارډ وګاټه.

وحید ارین ته د بریتانیا په کچه د غوره ډاکتر اوارډ بېګا په یو لړ مراسمو کې چې د بریتانیا حکومتي چارواکو، شاهي کورنۍ غړو او روغتیاپالانو حضور درلود د مشهوره فوټبالر ډېوېډ بکهام په لاس ورکړل شو.

وحید ارین چې کلونه مخکې له افغانستانه بریتانیا ته تللی په ټویټر باندې ویلي چې د ده په څېر نور ګڼ کسان هم وړتیاوې لري او باید چانس ورکړل شي.

ښاغلی ارین زیاتوي: "دا اوارډ ما داسې حال کې وګټه چې کلونه مخکې د افغانستان له جګړو راووتم او دلته بریتانیا ته د یوه داسې ماشوم په توګه راغلم چې کورنۍ ورسره نه‌وه او رسمي تعلیم‌یې نه‌و کړی، خو نور ګڼ کسان هم لکه د ما په شان دي چې همداسې وړتیاوې لري او هیلې لري. هغوی هم لوی کارونه کولای شي که تاسو ترې ملاتړ وکړئ، نو هیله لرم چې کډوالو ته چانس ورکړئ."

ډاکتر ارین د ټيلي مېډیسن په نوم یو بنسټ جوړ کړی چې په‌کې د لوېدیځو هېوادونو ډاکتران د جنګ‌ځپلو سیمو له روغتیاپالانو سره په انلاین بڼه مشورې او لارښوونې شریکوي.

د بریتانیا په کچه روغتیاپالانو ته د غوره اوارډونو پروګرام د ملي روغتیا ادارې، سن خپرونې، څلورم چینل او ځینو نورو بنسټونو له‌خوا په لار اچول شوی و.

کاناډا کې ټاکنې؛ یوه افغان الاصله وزیره مریم منصف ماتې سره مخ شوې

د کاناډا د کابینې یوه افغان الاصله وزیره مریم منصف

د کاناډا د کابینې یوه افغان الاصله وزیره مریم منصف هم له ماتې سره مخ بلل شوې ده.

د کاناډايي رسنیو د راپورونو له مخې اغلې منصف چې د لیبرال ګوند څخه د پیتربورو د سیمې استازې وه او په کابینه کې یې د ښاري اقتصادي پراختیا وزارت مخته ووړ په روانو ټاکنو کې ښايي خپله څوکۍ په محافظه کارې سیالې میشل فیریري وبایلي.

د منصف تر څنګ د لیبرال ګوند یوه بله وزیره بېرنادېت جوردن هم خپله څوکۍ له لاسه ورکوي.

که څه هم د دغو دوو وزارتونو له لاسه ورکول د لیبرال ګوند لپاره ګران پریوزي، خو وړاندوینې ښيي چې د صدر اعظم جسټن ترودو دا ګوند به په نننیو ټاکنو کې ډېرې څوکۍ وګټي.

د وړاندوینو له مخې رایه ورکوونکو لیبرال ګوند بریالی کړی، خو لا هم معلومه نه ده چې دا ګوند به پارلمان کې دومره اکثریت وګټي چې د اپوزیسیون له ملاتړ پرته خپلو هېلو ته ورسېږي او که نه؟

ټرودو دا مهال د داسې حکومت مشري کوي چې پارلمان کې کمې څوکۍ لري، دوی د قوانینو د پاس کولو لپاره د نورو ګوندونو ملاتړ ته اړتیا لري.

جسټن ټروډو تېره میاشت ویلي و، د کرونا وبا پر مهال خلک محافظه کاره حکومت نه غواړي.

له ټاکنو مخکې نظرپوښتنو ښودلې وه چې ترودو به د محافظه کارانو له مشر ایرین و توولې ( Erin O toole) سره موازي مخته ولاړ شي.

طالبان: ډېر ژر به له ۶م ټولګي پورته د نجونو ښوونځي پرانېستل شي

د نجونو یو ښوونځی

د طالبانو حکومت اعلان کړی هر څومره ژر چې کېږي له شپږم ټولګي پورته د نجونو ښوونځي پرانېزي.

دا خبره د طالبانو د حکومت ویاند او د اطلاعاتو او فرهنګ وزارت مرستیال ذبیح الله مجاهد نن رسنیو ته وکړه.

هغه وویل، د لوړو ټولګیو د پرانېستې لپاره په یوه طرزالعمل کار روان دی، څو د ده په خبره نجونې په مصوونه توګه ښوونځي ته ولاړ شي.

طالبانو د روانې اوونۍ په پیل کې د هلکانو ښوونځي پرانیستل، خو له شپږم ټولګي پورته د نجونو د ښوونځیو د پرانیستې په تړاو یې ګام وانه خیست.

دې چارې ګڼ تُند غبرګونونه وپارول.

طالبانو خپله کابینه کې نوي سرپرستان او مرستیالان معرفي کړل 

د طالبانو د حکومت ویاند ذبیح الله مجاهد

طالبانو په خپله کابینه کې ځیني نوي سرپرستان او مرستیالان معرفي کړل.

نورالدین عزیزي د تجارت وزارت او ډاکټر قلندر عباد د روغتیا وزارت د سرپرست په توګه ګمارل شوي.

پاتې یو شمېر کسان د یادو وزارتونو د مرستیالانو او ځینو نورو ادارو د مشرانو په توګه ټاکل شوي.

د طالبانو د حکومت ویاند ذبیح الله مجاهد وویل چې مسلکي کسان معرفي شوي او لا په دې برخه کې کار روان دی: "دا اوس هم چې کوم لېسټ موږ اعلان کړ، تر ډېره حده پورې مسلکي کسان په نظر کې نیول شوي. پوهان او ډاکټر صاحب مسلکي ادارو ته معرفي شوي. له دې ایسته به هم کوښښ کوو خو دا چې بیا کله به اداره مسووله کېږي دا بعدي اقدامات دي چې زموږ د مشرانو له خوا به تصمیم ونیول شي."

تردې مخکې طالبانو د تقریباً ټولو وزارتونو لپاره سرپرستان معرفي کړي وو.

د طالبانو د کابینې ګڼو منتقدینو ویلي چې دوی د اقلیتونو، ښځو او مسلکي کسانو ګمارنه له پامه غورځولې ده.

صرافان وايي، که یې مالي ستونزې هوارې نه شي فعالیتونه دروي

شهزاده سرای

د افغانستان د صرافانو ټولنه وایي،که د صرافانو مالي ستونزې هوارې نه شي دوی د فعالیتونو درولو ته به اړ شي.

د افغانستان د صرافانو د سراسري ټولنې مرستیال حاجي داد ګل نن سې شنبې (د وږې په ۳۰مه) ازادي راډیو ته وویل، د افغانستان بانک له خوا لا هم د دوی ستونزه نه ده هواره شوې.

نوموړي وویل، بانکونه صرافانو ته په اوونۍ کې شل زره افغانۍ او یا دوه سوه ډالر ورکوي چې دې چارې د صرافانو کارونه له خنډ او ځنډ سره مخ کړي.

د افغانستان بانک دا پرېکړه په داسې حال کې کړې چې د افغانستان ډېره پانګه د نړیوال بانک له خوا ګنل ده.

په افعانستان د طالبانو په واکمنېدو سره «IMF» یا نړېوال بانک د افغانستان پیسې کنګل کړي چې له دې امله بانکونه له ګڼو ستونزو سره مخ دي

د افغانستان کرنې وزارت له ترکي استازو د هر اړخیزو مرستو غوښتنه کړې

د کرنې وزارت او ترکي استازو ناسته

د افغانستان د کرنې،اوبو لګونې او مالدارۍ وزارت له ترکیې غواړي چې له دغه هېواد سره هر اړخیزو مرستو ته دوام ورکړي.

د کرنې، اوبو لګونې او مالدارۍ وزارت سرپرست مولوی عبدالرحمن راشد نن سې شنبه (د وږي ۳۰مه) د افغانستان لپاره د ترکيې ۷۷ ودانيز شرکت مسؤل براق انسال سره د کتنې پر مهال له نوموړي وغوښتل چې هېواد دې خپلې پروژې په ځانګړي ډول د کرنې په برخه کې عملي کړي.

وزارت په يوه خبرپاڼه کې ویلي، په دغه ناسته کې ښاغلي انسال په خپلو خبرو کې له افغانستان سره د ترکي پانګوالو د هر ډول همکاریو ژمنه کړې او ډاډ یې ورکړی چې هېواد به یې له افغانستان سره په بېلابېلو برخو کې مرستې وکړې.

په خبرپاڼه کې راغلي، په دغه ناسته کې د کرنې وزارت مرستیال مولوي فضل ربي فضلي ويلي چې افغانستان د سوداګرۍ له نظره له ستونزو سره مخ دی او په وینا یې یوازینۍ لاره چې پرې اتکا کېږي هغه کرنه ده.

د افغانستان د کرنې وزارت وایي، افغانستان دا مهال د کمزوري اقتصادي وضعیت سره مخ او د بې وزلۍ په ټيټه کچه کې دی.

دا په داسې حال کې ده چې تر دې وړاندې ملګرو ملتونو په خپل راپور کې ویلي و چې د افغانستان د وګړو نیمایي برخه کافي اندازه خوړو ته لاسرسی نه لري او دا حالت یې خواشیونکی بللی.

سپینه ماڼۍ:کابل کې د اګسټ د ۲۹مې برید امریکا لپاره یوه تراژیدي ده

د سپینې ماڼۍ ویانده جېن ساکي

سپینې ماڼۍ یو وار بیا وویل چې په کابل کې د اګسټ نهه ویشتمې برید په تېروتنه شوی او امریکا یې یوه تراژیدي بولي.

د سپینې ماڼۍ ویاندې جېن ساکي پرون دوشنبه (د وږي ۲۹مه) په خبري کنفرانس کې د کابل د اګسټ د نهه ویشتمې د برید په تړاو چې په کې لس افغان ملکیان وژل شوي له څو پرله پسې پوښتنو سره مخ شوه.

یوه پوښتنه ترې دا وشوه چې ولسمشر د دې برید په تړاو څه پیغام درلود: "دا برید په تېروتنه شوی. څېړنې به روانې او ولسمشر ترې ملاتړ کوي. د یوه انسان، د یوه ولسمشر او د یوه داسې چا په صفت چې هم د رهبر او هم شخصاً یې له لاسه ورکول تجربه کړي دا ورته یوه تراژیدي ده ځکه هره مړینه یوه تراژیدي ده. دی د دې مسالې د چټک او کره څېړنو پلوي کوي."

د امریکا د پوځ د مرکزي قوماندانۍ مشر جنرال کېنټ مککنزي په کابل باندې له برید څو ورځې وروسته تېره اوونۍ ومنله چې امریکا د ډرون دا برید په تېروتنه کړی او ملکیان په کې وژل شوي.

هغه د برید په تړاو بښنه وغوښته.

د وژل شوېو لسو افغان ملکیانو د کورنۍ غړي بیا یوازې بښنه کافي ونه بلله، بلکې له امریکا یې د غرامت او یوه خوندي ځای ته د کورنۍ د پاتې غړو د انتقال غوښتنه وکړه.

طالبان: کورنیو چارو وزارت کې یو شمېر نوي مشران وټاکل شول

وسله وال طالبان

د طالبانو د کورنیو چارو وزارت اعلان کړی چې یو شمېر معینیتونو او ریاستونو ته یې نوي مشران ټاکلي دي.

د دغه وزارت له خوا پرون په خپره شوې اعلامیه کې راغلي چې په څلورو معینیتونو او شااوخوا لسو نورو لویو ریاستونو کې دا ګمارنې د چارو د غوره ترسراوي او د خدماتو د وړاندې کولو لپاره شوي.

د کورنیو چارو وزارت له خوا د نوېو ۱۵ ګمارل شوېو کسانو په ډله کې له څلورو تنو پرته د نورو ټولو له نومونو سره مولوي یا قاري لیکل شوی.

د خواله رسنیو ګڼو کاروونکو په تېره بیا د کورنیو چارو وزارت د همدې اعلامیې په پای کې سلګونو کسانو دا ګمارنې غیر مسلکي بللي او انتقاد یې پرې کړی دی.

د طالبانو د کورنیو چارو وزارت کې تازه ګمارل شوي کسان دا دي:

  • مولوي نورجلال د تعلیماتو او پرسونل معین
  • عبدالله خان د نشه یي توکو پر وړاندې د مبارزې معین
  • مولوي شمس الدین منصور د پالیسي او ستراتیژي معین
  • مولوي زین الله د مقام دفتر لوی رییس
  • وزیر حقاني د پلان او اوپراسیون لوی رییس
  • نورالله حافظ د اطفایې لوی رییس
  • تورن جنرال سید نورالله مراد د ترافیک پولیسو لوی رییس
  • شېرمحمد شریف د سرحدي پولیسو لوی رییس
  • مولوي حسیب الله د ښوونې او روزنې لوی قوماندان
  • مولوي علم ګل حقاني د پاسپورټ لوی رییس
  • مولوي موسی د کورني امنیت لوی رییس
  • مولوي عارف الله د بهرنیو اړیکو رییس
  • مولوي عبدالحکیم حمدي د مطبوعاتو او عامه اړیکو رییس
  • انجنیر ابراهیم د مخابرې او ټېکنالوژۍ لوی رییس
  • قاري عبیده د وزارت د امنیتي قطعې قوماندان

هند: ۳زره کیلوګرامه هیرویین چې له افغانستانه انتقال شوي وو ضبط شول

ارشیف

هندي چارواکي وايي، نږدې درې زره کیلوګرامه هیرویین چې له افغانستانه انتقال شوي و د هند په یوه لویدیځ بندر کې کشف او ضبط شوي.

د فرانسې خبري اژانس د هندي چارواکو په حواله د دغو هیروینو ارزښت دوه میلیارده او اووه سوه میلیونه ډالره اټکل کړې.

د دغو هیروینو د انتقال په تور دوه هندیان نیول شوي دي.

د هند د ګمرکونو استخباراتي اجنسۍ 'ډي.ار.ای' د دوشنبې په ورځ ویلي، په اصل کې دا مخدره مواد له افغانستانه بار او د ایران د یوه بندر له لارې د هند تر ګجراته رسول شوي وو.

دې اجنسۍ ویلي، افغان اتباع هم په دې قضیه کې ښکېل دي، خو لا تر اوسه پورې نه دي نیول شوي.

هندي چارواکو ویلي چې په احمداباد، ډیلي،چینای،ګاندیدام او د ګجرات په مادوي کې د دې قضیې څخه را وروسته تلاشي او څېړنه پیل شوې.

افغانستان په نړۍ کې د هیروینو د تر ټولو لوی تولیدوونکي په توګه پيژندل کېږي چې اتیا تر نوي فیصده هیروین تولیدوي.

طالبان: پنجشیر کې په ډله ییزه توګه د خلکو د وژلو راپورونه ردوو

د افغانستان په نقشه کې د پنجشیر ولایت

طالبانو په پنجشیر کې په ډله ییزه توګه د خلکو د وژلو راپورونه رد کړل.

د طالبانو ویاند او د اطلاعاتو او فرهنګ وزارت مرستیال ذبیح الله مجاهد پرون دوشنبه(د وري ۲۹مه) ازادي راډیو ته وویل چې دوی د پنجشیر تر نیولو وروسته چا ته زیان نه دی رسولی.

هغه زیاته کړه چې د طالبانو غړیو په پنجشیر کې له خلکو سره بېلابېلې مرستې هم کړي دي.

تر دې مخکې د "ملي مقاومت جبهې" ادعا کړې وه چې طالبان په پنجشیر کې په ډله ییزه توګه خلک وژلي دي.

د بشري حقونو ځینو مدافعینو هم مخکې طالبان تورن کړي و چې په پنجشیر کې یې یو شمېر خلک وژلي دي.

پنجشیر د افغانستان وروستی ولایت و چې د طالبانو تر ولکې لاندې راغی.

د مقاومت جبهې ویاند علي میثم نظري په خپل ټوېټر ویډیو خپره کړې او ویلي یې دي چې د دوی کسان لا هم د پنجشیر په ګڼو لوړو درو او مرتفع سیمو کې موجود دي او جګړه کوي.

جرمني ته لېږدول شويو افغانانو ته د څو واکسینونو د لګولو بهیر بشپړ شو

جرمني کې یو شمېر افغانان

د امریکا متحده ایالاتو پوځ وايي، هغو کسانو ته‌یې چې په وروستیو کې له افغانستانه جرمني ته لېږدول شوي د شري، کڅوک یا چېچک او کله‌چرک پر ضد د واکسین لګولو بهیر بشپړ شو.

د جرمني خبري اژانس په حواله، دغه واکسینونه په دوو پوځي مرکزونو کې پر اته زره او اته کسانو تطبیق شوي دي.

د دغو واکسینونو لګولو هدف د ناروغیو د خپراوي مخنیوی ګڼل شوی دی.

د جرمني رسنیو څو ورځې مخکې راپور ورکړی وو په هغو کسانو کې د شري او کڅوک ناروغي زیاته لیدل شوې چې په وروستیو کې له افغانستانه جرمني ته لېږدول شوي دي.

د ملګرو ملتونو سرمنشي: د طالبانو ترمنځ د قدرت پر سر لانجې وضعیت پېچلی کړی

د ملګرو ملتونو سرمنشي انتونیو ګوترش

د ملګرو ملتونو سرمنشي وايي د طالبانو د بېلابېلو سیالو ډلو ترمنځ د قدرت پر سر لانجې په افغانستان کې وضعیت پېچلی کړی دی.

انتونیو ګوترش له «CNN» ټلوېزیون سره په مرکه کې وویل: "موږ ګورو چې ټول‌ګډونه حکومت د طالبانو د خپل‌منځي اختلافاتو له امله جوړ نه‌شو. څه چې اعلان شول د یوه ټول‌ګډونه حکومت لپاره وروستۍ پرېکړه نه‌ده. زما په اند د افغانستان وضعیت د وړاندوينې وړ نه‌دی، په داسې یو حالت کې باید د دې هېواد په مسایلو کې ونډه ولرو او د هغو افغانانو چې ځورېږي، لاس‌نیوی وکړو. دا معلومه نه‌ده چې موږ بریالي کېږو، که نه، خو دا زموږ دنده ده چې هلته واوسوو او خدمت وکړو."

د ملګرو ملتونو سرمنشي خبرداری ورکړ چې دا به یو خیال وي که د طالبانو تر ولکې لاندې د ملګرو ملتونو ښکېلتیا ناڅاپه ټول‌­شموله حکومت، د حقونو درناوي او د ترورېستانو د حضور ختمېدو ته زمینه برابره کړای شي.

انتونیو ګوترش وايي، په افغانستان کې د ملګرو ملتونو ظرفیت او نفوذ لږ دی، خو بیا هم هڅه کوي له دغه جګړه‌ځپلي هېواد سره د بشري مرستو لپاره کلیدي رول ادا کړي.

طالبانو تر اوسه د ښاغلي ګوترش د څرګندونو په اړه څه نه‌دي ویلي.

نور راوښيه

XS
SM
MD
LG