د لاسرسۍ وړ لېنکونه

تازه خبر
شنبه ۲۷ وږی ۱۴۰۰ کابل ۰۲:۲۸

افغانستان

پنټاګون: افغانستان کې خپل ماموریت په تنظیم شوې بڼه پای ته رسوو

د امریکا دفاع وزارت ویاند جان کربي

د امریکا دفاع وزارت وایي، په افغانستان کې د امریکایي ځواکونو پوځي ماموریت به په خوندي او تنظیم شوې بڼه د روانې اګسټ میاشتې په ۳۱ مه پای ته ورسوي.

د دفاع وزارت یا پنټاګون ویاند جان کربي پرون شنبه (د وږي ۶مه) په واشنګټن کې په یوه خبري غونډه کې وویل چې د دغه ماموریت تر بشپړېدو به د کابل له هوایي ډګره د خلکو ایستلو ته دوام ورکړي.

د امریکا د وسله والو ځواکونو د درستیز والی د سیمه ییزو عملیاتو مرستیال مشر جنرال هانک ټېلر چې له ښاغلي کربي سره یې په دې ګډ خبرې کنفرانس کې ګډون کړی و، تر پرون شنبې پورې د دغو عملیاتو په ترڅ کې له افغانستانه د ټولو ایستل شوېو کسانو شمېر له ۱۱۷ زره تنو زیات وښود او ویې ویل: "د جمعې په ورځ، په ۲۴ ساعتونو کې ۶۶ الوتنې له کابله ترسره شوې او ۶۸۰۰ کسان ولېږدول شول. نن شنبې تاسو ته ویلی شم چې ټول له ۱۱۷ زرو زیات کسان چې اکثره یې افغانان دي، ایستل شوي دي."

د دفاع وزارت ویاند جان کربي دغه راز وویل، سره له دې چې په کابل هوایي ډګر کې یې ځواکونو ته جدي ګواښ متوجه دی خو په متحدو ایالاتونو کې دننه او بهر هېوادونو کې د پوځ په زرګونه ځواکونه هڅې کوي چې دغه مهم ماموریت بشپړ کړي.

جان کربي پر اسلامي دولت ډلې یا داعش چې پر کابل هوایي ډګر یې د وروستۍ خونړۍ حملې مسولیت اخیستی، د امریکا د بې پیلوټه الوتکې د برید په اړه وویل چې د دغه برید په نتیجه کې د داعش یو غړی چې دغه حمله یې پلان کړې وه او یو بل چې ورسره مرسته یې کړې وه، وژل شوی او یو بل ټپي دی.

د راپورونو له مخې امریکایي بې پیلوټه الوتکې دغه برید په ننګرهار کې د داعش پر غړیو ترسره کړی.

د ورځې تازه خبرونه دلته ولولئ

ملګري ملتونه: غلام اسحق زی دې خپلې دندې ته دوام ورکړي

د افغانستان د پخواني حکومت استازی غلام اسحق زی

ملګري ملتونه وایي چې په دې سازمان کې د افغانستان د پخواني حکومت استازي غلام اسحق زي غوښتنه کړې چې خپلې دندې ته دوام ورکړي.

د ملګرو ملتونو ویاند فرهان حق وویل چې اسحق زي د ملګرو ملتونو عمومي منشي انتونیو ګوتیرېش ته یو لیک لاسلیک کړی چې په هغه کې د ملګرو ملتونو په عمومي اسامبلۍ کې د افغانستان د پلاوي نومونه شامل دي.

د رویټرز خبري اژانس د راپور له مخې دا نه ده څرګنده چې ایا طالبان به چې د اګسټ په ۱۵مه نېټه په کابل کې واک ته رسیدلي، له خپله اړخه ملګرو ملتونو ته خپل پلاوی واستوي او که نه؟

ټاکل شوې چې د ملګرو ملتونو د عمومي اسامبلۍ غونډې راتلونکې اوونۍ د سېپټمبر په ۲۱مه نېټه پیل شي او د نړۍ په لسګونو مشران به په حضوري ډول په کې ګډون وکړي.

ټاکل شوې چې ښاغلی اسحق زی د سېپټمبر په ۲۷مه نېټه دې اسامبلۍ ته وینا وکړي.

پوهنې وزارت: ټول منځي ښوونځي، لېسې او رسمي مدرسې سبا پیلېږي

کابل کې یو ښوونځی

د افغانستان د پوهنې وزارت وایي، د نارینه وو ټول منځي ښوونځي، لېسې او رسمي مدرسې به سبا شنبې بېرته پیل شي.

د طالبانو د حکومت د پوهنې وزارت نن په دې اړه په یوه خبرتیا کې ویلي چې تر دې مخکې تر شپږم ټولګي پورې د زده کړې د بهیر پیل ته اجازه ورکړل شوې وه، خو اوس له ټولو زده کوونکو او ښوونکو غواړي چې سبا شنبې بېرته تعلیمو موسسو ته حاضر شي.

د پوهنې وزارت نه دي ویلي چې د نجونو زده کوونکو زده کړې به کله پیلېږي.

طالب چارواکو ژمنه کړې چې نجونو او ښځو ته به اجازه ورکړي چې د اسلامي اصولو په رڼا کې زده کړې وکړي او کارونه مخ ته یوسي.

د افغانستان د ښوونځیو نژدې نیمایي زده کوونکي یې نجونې دي چې په تېرو شلو کلونو کې له امنیتي او یو لړ ټولنیزو ستونزو پرته پر ښاري سیمو سربېره په ډېرو لېرې پرتو سیمو کې هم ورته د زده کړې امکانات برابر شوي او په میلیونونو یې له دولسمو ټولګیو فارغې شوي دي.

څېړنه: سختې وچکالۍ افغانستان کې د کرنیزو خوراکي توکو تولید ځپلی

ارشیف

د سره صلیب او د سرې میاشتې د ټولنو نړیوال فدراسیون او د دغو ټولنو د اقلیم مرکز په وروستۍ څېړنه کې په افغانستان کې پر کرنې د جګړو او کرونا وبا ترڅنګ د سختې وچکالۍ د ناوړه اغېزو خبره کوي.

د دغې څېړنې له مخې چې پرون پنجشنبې خپره شوې ویل شوي چې سختې وچکالۍ په افغانستان کې د کرنیزو خوراکي توکو تولید سخت ځپلی، څاروي کم شوي او په میلیونونو کسان له لوږې او خوار ځواکۍ سره مخامخ شوي دي.

ویل شوي چې د افغانستان د سرې میاشتې ټولنې اړو کسانو ته د خوراکي موادو او نغدو پیسو ورکولو په ګډون چې پرې د ځانونو لپاره خوراکي مواد وپیري، مرستې زیاتې کړي.

په دې مرستو کې د هغو محصولاتو د کر زیاتوالی هم شامل دی چې د وچکالۍ پر وړاندې مقاومت لري او هم یې په ساتنه کې له بزګرو سره مرسته کېږي.

د سره صلیب او د سرې میاشتې د ټولنو نړیوال فدراسیون په افغانستان کې د کرنې پر سکتور په تېره د سختې وچکالۍ د اغېزو خبره داسې مهال کوي چې د ملګرو ملتونو د احصایي له مخې د دې هېواد له اتلس میلیونو زیات وګړي عاجلو بشري مرستو ته اړتیا لري او د ملګرو ملتونو پراختیایي پروګرام 'UNDP' په وروستۍ سروې کې خبرداری ورکړی چې که نړیوال له دې هېواد سره مرستې ونه کړي، نو ښایي د راتلونکي ۲۰۲۲میلادي کال تر نیمایي به د افغانستان په سلو کې ۹۷ وګړي د لوږې تر کرښې لاندې ژوند کوي.

'IFJ': افغانستان کې پر رسنیو د طالبانو فشارونو زیات شوي

یو تن افغان خبریال

د خبریالانو نړیوال فدراسیون 'IFJ' په افغانستان کې پر رسنیو د طالبانو د فشارونو د زیاتوالي خبر ورکوي.

دغه فدراسیون په هغه راپور کې چې نن جمعه (د وږي ۲۶مه) یې خپور کړی ویلي، په داسې حال کې چې د طالبانو نوی رژیم خپلې ستنې ټینګوي، لږ تر لږه ۱۵۳ رسنۍ مجبوره شوي چې خپل فعالیتونه ودروي، ښځینه خبریالان له کار کولو منع کړای شوي، مخابراتي شبکې بندې کړای شوي او د رسنیو د کار کوونکو پر وړاندې ګواښونه او تشدد زیات شوی دی.

د خبریالانو نړیوال فدراسیون هغه څه چې د ازادۍ د زیندۍ کولو لپاره د طالبانو مخ په زیاتیدونکي فشارونه بللي، غندلي دي.

په راپور کې د هغو ژورنالېستانو پر وړاندې چې د وروستیو اعتراضونو په اړه یې راپورونه ورکول د طالبانو د حکومت د ځواکونو له خوا د تاوتریخوالي ځینې مشخصې پېښې یادې شوي دي.

د خبریالانو د نړیوال فدراسیون مشر انتوني بیلنګیر ویلي، دی په دې باور دی چې طالبان به پر افغان او نړیوالو خبریالانو فشارونه لا زیات کړي او هڅه کوي چې یوه رسمي رسنۍ چې ښځې به په کې نه وي، رامنځ ته کړي.

د هغه په وینا نور ټول خبریالان به له صحنې ووځي. نوموړي همدا شان ویلي، مخکې له دې چې طالبان واک ته ورسېږي هم خبریالان وژل کېدل او له ډېرو ستونزو سره مخامخ وو، خو اوسنی وضعیت د دوی لپاره یو ډېر تیاره وضعیت دی.

په افغانستان کې د طالبانو د حکومت د اطلاعاتو فرهنګ وزارت مرستیال او ویاند ذبیح الله مجاهد تر دې مخکې رسنیو ته ویلي و چې دوی به په خپل واک کې د رسنیو ازادي باوري کړي، خو د ژورنالېستانو نړیوال فدراسیون وايي، طالب واکمنو وروستیو کې خبریالانو ته ویلي چې د هغو اعتراضونو پوښښ ته دې نه ورځي چې اجازه نه وي ورکړل شوې.

چین: د شانګهای د همکاری سازمان دې افغانستان سره مرسته وکړي

د چین ولسمشر شي جین پینګ

د چین ولسمشر شي جین پینګ وایي، د شانګهای د همکاری د سازمان غړي باید له افغانستان سره مرسته وکړي چې په دې هېواد کې د انتقالي بهیر پر اساني پر مخ یوړل شي.

د چنیایي رسنیو د راپورونو له مخې شي جین پینګ دغه څرګندونې د تاجکستان په پلازمېنه دوشنبې کې د شانګهای د همکارۍ د سازمان سرمشریزې ته په یوه ویډیويي وینا کې وکړې.

هغه وویل، د دې سازمان غړیو ته پکار ده چې افغانستان یوې داسې لارې ته سیخ کړي چې سیاسي نظام یې ټول شموله وي او په کور دننه او بهر یوه معتدله پالیسۍ ولري.

په عین حال کې د ازبیکستان ولسمشر شوکت میرضیاییف غوښتنه وکړه چې د افغانستان کنګل شوې شتمني باید ازاده شي او زیاته یې کړه چې له سخت دریځې سره د مبارزې لپاره دې له طالبانو سره خبرې وشي.

د میر ضیاییف په وینا د افغانستان د شتمینو ازادېدل له دې سره مرسته وشي چې دغه هدف ترلاسه شي.

له کله چې طالبان پر افغانستان واکمن شوي، د افغانستان د مرکزي بانک شااوخوا نهه میلیارډه ډالره په بهر کې په تېره د امریکا په بانکونو کې کنګل شوې ده.

افغانستان چې د شانګهای د همکاری د سازمان څارونکی غړی دی، په نننۍ سرمشریزه کې استازی نه لري.

روسیه، چین، قرغزستان، قزاقستان، تاجکستان، ازبیکستان، هند او پاکستان د دې سازمان چې په ۲۰۰۱ کال کې جوړ شوی، دایمي غړي دي او ایران چې لکه د افغانستان په څېر د دې سازمان څارونکی غړی و، په نننۍ سرمشریزه کې د دایمي غړي په توګه ومنل شو.

د شانګهای د همکاری د سازمان غړي پر افغانستان غږیږي

د شانګهای سازمان غونډه

د شانګهای د همکاری د سازمان د غړیو هېوادونو مشران نن د تاجکستان په پلازمېنه دوشنبې کې د افغانستان په اړه خبرې کوي.

روسیه او چین د دې سازمان مهم غړي او افغانستان یې هم څارونکی غړی دی، خو په دې سرمشریزه کې چې تر اوسه روانه ده، له افغانستانه څوک استازیتوب نه کوي.

قرغزستان، قزاقستان، تاجکستان، ازبېکستان، هند او پاکستان د دې سازمان چې په ۲۰۰۱ کال کې جوړ شوی، نور غړي دي.

تر دې یوه ورځ مخکې هم په تاجکستان کې د ډله ییز امنیت د تړون سازمان غړیو د افغانستان پر روان وضعیت خبرې وکړې.

چین: امریکا دې افغانستان سره بشري مرستې بېرته پیل کړي

د چین او امریکا ګډ بیرغونه

د چین د بهرنیو چارو وزیر وایي، د امریکا متحده ایالات باید خپل مسولیت ومني او په افغانستان کې بیا رغونه، له دې هېواد سره اقتصادي او بشري مرستې بېرته پیل کړي.

د روسیې د تاس خبري اژانس د راپور له مخې وانګ ای د تاجکستان په پلازمېنه دوشنبې کې د روسیې، ایران او پاکستان له بهرنیو چارو وزیرانو سره د څلور اړخیزې غونډې په پای کې دا خبره وکړه.

د چین د بهرنیو چارو وزیر ویلي، له افغانستانه په بېړه د امریکایي ځواکونو او د متحدانو وتلو یې په دې هېواد کې نوې ستونزې رامنځ ته کړي.

د هغه په وینا په دې هېواد کې تر اوسه سیاسي نظام سم نه دی جوړ شوی، قومي او مذهبي شخړې جدي دي او د کورنۍ جګړې خطر شته.

له افغانستانه ټول امریکایي ځواکونه د تېرې میلادي میاشتې په ۳۱مه نېټه دوه اوونۍ مخکې له دې چې طالبان کابل ونیسي، ووتل.

پاکستان: عمران خان د ایران له ولسمشر سره پر افغانستان غږیدلی

د پاکستان صدراعظم عمران خان

د پاکستان د بهرنیو چارو وزارت وایي چې د دې هېواد صدراعظم عمران خان د ایران له ولسمشر ابراهیم ریسي سره د افغانستان په اړه خبرې وکړې.

دې وزارت نن په یوه بیان کې وویل چې دواړو مشرانو د تاجکستان په پلازمېنه دوشنبې کې د شانګهای د همکارۍ د سازمان د سرمشریزې په څنګ سره وکتل او د افغانستان او دوه اړخیزو اړیکو په اړه یې خبرې وکړې.

د بیان له مخې عمران خان ټینګار وکړ چې په یوه سوله ییز، باثباته او سوکاله افغانستان یې د هېواد حیاتي ګټې نغښتې دي.

عمران خان او ابراهیم ریسي د شانګهای د همکارۍ د سازمان د سرمشریزې چې ډېر بحثونه به یې پر افغانستان متمرکز وي، دوه ګډونوال دي.

له کله چې طالبان پر افغانستان واکمن شوي او نوی حکومت یې اعلان کړی، د پاکستان په ګډون هېڅ یوه هېواد یې حکومت تر اوسه په رسمیت نه دی پیژندلی.

پاکستان ویلي چې په دې اړه پرېکړه به له نړیوالې ټولنې سره له مشورې وروسته کوي.

پاکستان یوه له درې هېوادونو څخه و چې د طالبانو پخوانۍ واکمنۍ یې په رسمیت پېژندلې وه.

ایټالیا: په 'جي شل' غونډه پر افغانستان خبرې کیږي

د 'جي شل' غونډه

د ایټالیا د بهرنیو چارو وزیر وایي، د نړۍ شل ستر اقتصاد لرونکي هېوادونه به چې د جي شل په نوم یادیږي، په یوه ځانګړې غونډه کې د افغانستان د روان وضعیت په اړه خبرې وکړي.

لویجي ډي میو Luigi Di Maio له ډیلي لاریپبلیکه ورځپاڼې سره په مرکه کې چې نن خپره شوې ویلي چې دغه غونډه به د ملګرو ملتونو د عمومي اسامبلۍ تر پای ته رسېدو وروسته وروسته جوړه شي.

د ملګرو ملتونو عمومي اسامبلۍ د روانې سېپټمبر میاشتې په دیرشمه پای ته رسېږي.

د ایټالیا د بهرنیو چارو وزیر ویلي چې دغه غونډه به په نیویارک کې چې راتلونکې اوونۍ به دی هم هلته وي، جوړه شي او د جي شل د بهرنیو چارو وزیران به په کې برخه واخلي.

د ایټالیا د بهرنیو چارو وزیر وویل، هېواد به یې چې روان کال د جي شل مشري په غاړه لري، د ملګرو ملتونو له ټولو ادارو او نورو غیر انتفاعي موسسو چې په افغانستان کې فعالیت کوي، وغواړي چې په دې غونډه کې ګډون وکړي.

د ایټالیا د بهرنیو چارو وزیر د جل شل د بهرنیو چارو وزیرانو غونډه داسې مهال را غواړي چې افغانستان له کله چې طالبان پر دې هېواد واکمن شوي، له سختو اقتصادي او بشري ستونزو سره مخامخ شوي دي.

د پیسو نړیوال صندوق افغانستان کې روان اقتصادي وضعیت ته اندېښنه لري

د پیسو نړیوال صندوق ویاند جري رایس

د پیسو نړیوال صندوق وايي، په افغانستان کې روان اقتصادي وضعیت ته سخته اندېښنه لري.

پر افغانستان د طالبانو د ولکې له ټینګولو څه باندې میاشت وروسته د پیسو نړیوال صندوق په افغانستان کې د سختېدونکي بشري بحران په باب هم خبرداری ورکړ.

د پیسو نړیوال صندوق ویاند جري رایس (Gerry Rice) وویل، افغانستان ته د نړیوالو مرستندویانو تعامل ځنډول شوی، په دې معنی چې د پیسو نړیوال صندوق مالي مرستې هم ځنډول شوي دي.

ټاکل شوې وه چې د پیسو نړیوال وجهي صندوق ۴۴۴ میلیونه ډالره د تېرې اګسټ میاشتې په دوهمه نیمايي کې د افغانستان مخکنیي حکومت ته ورکړي، خو د همدې میاشتې په ۱۵مه پر کابل د طالبانو له واکمنېدو وروسته دې نړیوالې موسسې دغه پیسې بندې کړې او د طالبانو حکومت ورته لاسرسۍ نه لري.

ښاغلي رایس چې په واشنګټن کې یې خبریالانو ته خبرې کولې دغه راز وویل، په اوس وخت کې بېړنی تمرکز باید له افغان وګړو سره پر مرسته راټول وي چې هغه په کمه اندازه د انتقالاتو د بهیر دوام او له هغو هېوادونو سره مرسته ده چې افغان کډوالو ته یې پناه ورکړې ده.

پاکستان وايي، افغانستان ته یې صادرات کم شوي

تورخم لیکه کې پاکستانۍ لارۍ

پاکستان وايي، د روان مالي کال په لومړۍ میاشت کې یې افغانستان ته صادرات کم شوي دي.

د پاکستان مرکزي بانک پرون پنجشنبه(د وږي ۲۵مه) وویل، د تېرکال د ورته مودې پرتله افغانستان ته د پاکستان د تجارتي مالونو او خدماتو صادرات نژدې ۴۰ سلنه کم شوي دي.

د دغه بانک پر اساس د روان مالي کال په لومړۍ میاشت یعنې جولای کې پاکستان د ۳۸ میلیونه او ۵۵۷ لکه ډالرو صادرات لرل، حال دا چې تېرکال په ورته موده کې یې افغانستان ته د ۶۲ میلیونه او ۷۷۴ لکه ډالرو صادرات کړي وو چې دا په سلو کې ۳۸ اعشاره ۵۷ کموالی ښيي.

تر دې مخکې د افغانستان د سواګرۍ او پانګونې خونو د اوونۍ په پیل کې ویلي و چې بهر ته د دغه هېواد صادرات زیات شوي او واردات یې کم شوي دي.

افغانستان کې یو هندی سوداګر ورک دی؛ هند د افغان چارواکو پلټنې څاري

د هند بیرغ

د هند د بهرنیو چارو وزارت وايي، په افغانستان کې د یوه هندي سوداګر بانسوري لال اریندي د بې درکۍ په اړه د افغان چارواکو پلټنې له نژدې څاري.

د هند د بهرنیو چارو وزارت ویاند اریندام بګچي پرون پنجشنبه (د وږي ۲۵مه) وویل، هند په کابل کې له هغو ځايي چارواکو سره په تماس کې دی چې د دې قضیې په اړه څېړنې کوي.

تر اوسه کومې ډلې د بانسوري لال د تښتولو مسوولیت نه دی منلی.

د هند د بهرنیو چارو وزارت ویاند دا هم وویل چې اکثره هندي اتباع له افغانستانه ایستل شوي، خو ځینې لا هم په دې خاطر پاتې دي چې د کابل هوايي ډګر ته الوتنې ځنډېدلي دي.

اوچا: تر ۶ لکه ۳۴ زره ډېر افغانان جګړو له خپلو مېنو بې ځایه کړي

کابل کې بې ځایه شوي کډوال

د ملګرو ملتونو د بشري مرستو د همږغۍ اداره (اوچا) وايي، تر ۶ لکه ۳۴ زره ډېر افغانان سږ کال د جګړو له کبله په خپل هېواد کې بې ځایه شوي دي.

دې ادارې د پنجشنبې(د وږي ۲۵مه) په ورځ وویل، دا افغانان د سېپټمبر تر دوولسمې پورې بې ځایه شوي چې د هغو له منځه ۲ لکه ۸۲ زره ۲۴۶ تنو ته مرستې رسېدلي دي.

د اوچا د راپور له مخې، تر ۲۸ زره ډېر نور افغانان د روان ۲۰۲۱ میلادي کال له پیله تر اوسه پورې د طبیعي پېښو له کبله اغېزمن شوي دي.

د سې شنبې په ورځ د سویس په جنیوا کې د نړۍ هېوادونو له افغانستان سره د څه باندې یو میلیارد ډالرو بشري مرسته اعلان کړه.

طالبان: هلمند کې د یوې تاریخي کلا د نړولو مخه نیول شوې

د افغانستان په نقشه کې د هلمند ولایت

طالب چارواکي وايي چې د هلمند ولایت په ګرشک ولسوالۍ کې یې د یوې تاریخي کلا د نړولو مخه نیولې ده.

د طالبانو د فرهنګي کمېسیون غړي او د ویاند مرستیال حمدالله وثیق دا خبره وروسته له دې ازادي راډیو ته وکړه چې په ټولنیزو رسنیو کې د دې تاریخي کلا د نړېدو ویډیو خپره شوه.

په ویډیو کې بلډوزر لیدل کېږي چې د کلا دېوالونه نړوي، خو ښاغلی وثیق وايي چې د دې کار مخه نیول شوې ده: "د دې لپاره چې دا یوه تاریخي کلا ده، تقریباً تر ۱۷۰ کلونو پورې تاریخي قدامت لري، د افغانستان د تاریخ یوه برخه ده نو بیا تر مشرانو پورې خبره ورسېده او اوس ودرېده."

سره له دې چې څه باندې شل کاله پخوا طالبانو د خپلې واکمنۍ پر مهال د بامیان د لرغونو مجسمو په ګډون د کابل موزیم ګڼ شمېر لرغوني اثار ویجاړ کړل، دا ځل تر اوسه پورې کوم راپور نه دی ترلاسه شوی چې طالبانو دې تاریخي اثار وران کړي وي.

له کوزوو ۱۱۷ افغانان بریتانیا ته یووړل شول

هغه الوتکه چې له کوزوو یې افغانان بریتانیا ته ولېږدول

له کوزوو څخه ۱۱۷ افغانان پرون پنجشنبه(د وږي ۲۵مه) بریتانیا ته یووړل شول. ویل شوي چې دې کسانو په افغانستان کې له ناټو ځواکونو سره کار کړی وو.

دوی پرون پنجشنبه د خپلو کورنیو له غړیو سره له پلازمېنې پریشتینا څخه په یوه الوتکه کې بریتانیا ته ورسول شول.

څو سرچینو ازادي راډیو ته وویل چې دا پناه غوښتونکي څو ورخې وړاندې کوزوو ته تر رسېدو وروسته په یوه کمپ کې دېره شوي وو.

وروسته له دې چې طالبانو کابل ونیوه، امریکا او متحدانو یې لسګونه زره هغه افغانان چې ژوند یې له خطر سره مخامخ وو، له افغانستانه وایستل.

د هغوی له منځه نژدې ۱۴ زره په کوزوو کې په موقت ډول مېشت شول.

نور راوښيه

XS
SM
MD
LG