د لاسرسۍ وړ لېنکونه

تازه خبر
سه شنبه ۳۰ وږی ۱۴۰۰ کابل ۱۲:۱۴

افغانستان

الکوزی: د توکو د بیو لوړوالي سره-سره د لوږې او قحطۍ هېڅ وېره نشته

د افغانستان د سوداګرۍ خونو فدارسیون رستیال خان جان الکوزی

د افغانستان د سوداګرۍ خونو فدارسیون وايي، که څه هم په بازارونو کې د ځینو خوراکي توکو بیې لوړې شوي، خو په کافي اندازه خوراکي او نور توکي موجود دي.

د دغو خونو مرستیال خان جان الکوزي نن چهارشنبه (د زمري ۱۳مه) ازادي راډیو ته وویل چې په بازارونو کې د بیو له لوړوالي سره ــ سره بیا هم د لوږې او قحطۍ هېڅ وېره نشته: "د افغانستان روان وضعیت په بازار منفي اغېز کړی، لس تر پنځلس سلنه په بازار کې توکي ګران شوي، خو مواد او خوراکي توکي شته او رسېږي، د لوږې هېڅ وېره نشته."

نوموړی زیاتوي چې د بیو د لوړېدو لوی لامل وروستۍ ناامنۍ، په بندرونو کې دوه ځایه محصول اخیستل او د افغانیو په مقابل کې د ډالرو بیې لوړېدل دي.

د یادونې وړ ده چې د توکو د بیو د لوړوالي له امله مخکې له دې یو شمېر خلکو له ازادي راډیو سره خپلې اندېښنې شریکې کړې وې.

دا په داسې حال کې ده چې د راپورونو پر بنسټ په کندز کې شېرخان بندر، تخار کې ای خانم، په هرات کې تورغونډۍ او اسلام قلعه، په فراه کې ابو نصر فراهي او په پکتيا کې ډنډ پټان سوداګریز بندر د طالبانو لاسته لوېدلي او د افغانستان مالیې وزارت ویلي چې په دغو بندرونو کې فعالیت نه لري.

د ورځې تازه خبرونه دلته ولولئ

صرافان وايي، که یې مالي ستونزې هوارې نه شي فعالیتونه دروي

شهزاده سرای

د افغانستان د صرافانو ټولنه وایي،که د صرافانو مالي ستونزې هوارې نه شي دوی د فعالیتونو درولو ته به اړ شي.

د افغانستان د صرافانو د سراسري ټولنې مرستیال حاجي داد ګل نن سې شنبې (د وږې په ۳۰مه) ازادي راډیو ته وویل، د افغانستان بانک له خوا لا هم د دوی ستونزه نه ده هواره شوې.

نوموړي وویل، بانکونه صرافانو ته په اوونۍ کې شل زره افغانۍ او یا دوه سوه ډالر ورکوي چې دې چارې د صرافانو کارونه له خنډ او ځنډ سره مخ کړي.

د افغانستان بانک دا پرېکړه په داسې حال کې کړې چې د افغانستان ډېره پانګه د نړیوال بانک له خوا ګنل ده.

په افعانستان د طالبانو په واکمنېدو سره «IMF» یا نړېوال بانک د افغانستان پیسې کنګل کړي چې له دې امله بانکونه له ګڼو ستونزو سره مخ دي

د افغانستان کرنې وزارت له ترکي استازو د هر اړخیزو مرستو غوښتنه کړې

د کرنې وزارت او ترکي استازو ناسته

د افغانستان د کرنې،اوبو لګونې او مالدارۍ وزارت له ترکیې غواړي چې له دغه هېواد سره هر اړخیزو مرستو ته دوام ورکړي.

د کرنې، اوبو لګونې او مالدارۍ وزارت سرپرست مولوی عبدالرحمن راشد نن سې شنبه (د وږي ۳۰مه) د افغانستان لپاره د ترکيې ۷۷ ودانيز شرکت مسؤل براق انسال سره د کتنې پر مهال له نوموړي وغوښتل چې هېواد دې خپلې پروژې په ځانګړي ډول د کرنې په برخه کې عملي کړي.

وزارت په يوه خبرپاڼه کې ویلي، په دغه ناسته کې ښاغلي انسال په خپلو خبرو کې له افغانستان سره د ترکي پانګوالو د هر ډول همکاریو ژمنه کړې او ډاډ یې ورکړی چې هېواد به یې له افغانستان سره په بېلابېلو برخو کې مرستې وکړې.

په خبرپاڼه کې راغلي، په دغه ناسته کې د کرنې وزارت مرستیال مولوي فضل ربي فضلي ويلي چې افغانستان د سوداګرۍ له نظره له ستونزو سره مخ دی او په وینا یې یوازینۍ لاره چې پرې اتکا کېږي هغه کرنه ده.

د افغانستان د کرنې وزارت وایي، افغانستان دا مهال د کمزوري اقتصادي وضعیت سره مخ او د بې وزلۍ په ټيټه کچه کې دی.

دا په داسې حال کې ده چې تر دې وړاندې ملګرو ملتونو په خپل راپور کې ویلي و چې د افغانستان د وګړو نیمایي برخه کافي اندازه خوړو ته لاسرسی نه لري او دا حالت یې خواشیونکی بللی.

سپینه ماڼۍ:کابل کې د اګسټ د ۲۹مې برید امریکا لپاره یوه تراژیدي ده

د سپینې ماڼۍ ویانده جېن ساکي

سپینې ماڼۍ یو وار بیا وویل چې په کابل کې د اګسټ نهه ویشتمې برید په تېروتنه شوی او امریکا یې یوه تراژیدي بولي.

د سپینې ماڼۍ ویاندې جېن ساکي پرون دوشنبه (د وږي ۲۹مه) په خبري کنفرانس کې د کابل د اګسټ د نهه ویشتمې د برید په تړاو چې په کې لس افغان ملکیان وژل شوي له څو پرله پسې پوښتنو سره مخ شوه.

یوه پوښتنه ترې دا وشوه چې ولسمشر د دې برید په تړاو څه پیغام درلود: "دا برید په تېروتنه شوی. څېړنې به روانې او ولسمشر ترې ملاتړ کوي. د یوه انسان، د یوه ولسمشر او د یوه داسې چا په صفت چې هم د رهبر او هم شخصاً یې له لاسه ورکول تجربه کړي دا ورته یوه تراژیدي ده ځکه هره مړینه یوه تراژیدي ده. دی د دې مسالې د چټک او کره څېړنو پلوي کوي."

د امریکا د پوځ د مرکزي قوماندانۍ مشر جنرال کېنټ مککنزي په کابل باندې له برید څو ورځې وروسته تېره اوونۍ ومنله چې امریکا د ډرون دا برید په تېروتنه کړی او ملکیان په کې وژل شوي.

هغه د برید په تړاو بښنه وغوښته.

د وژل شوېو لسو افغان ملکیانو د کورنۍ غړي بیا یوازې بښنه کافي ونه بلله، بلکې له امریکا یې د غرامت او یوه خوندي ځای ته د کورنۍ د پاتې غړو د انتقال غوښتنه وکړه.

طالبان: کورنیو چارو وزارت کې یو شمېر نوي مشران وټاکل شول

وسله وال طالبان

د طالبانو د کورنیو چارو وزارت اعلان کړی چې یو شمېر معینیتونو او ریاستونو ته یې نوي مشران ټاکلي دي.

د دغه وزارت له خوا پرون په خپره شوې اعلامیه کې راغلي چې په څلورو معینیتونو او شااوخوا لسو نورو لویو ریاستونو کې دا ګمارنې د چارو د غوره ترسراوي او د خدماتو د وړاندې کولو لپاره شوي.

د کورنیو چارو وزارت له خوا د نوېو ۱۵ ګمارل شوېو کسانو په ډله کې له څلورو تنو پرته د نورو ټولو له نومونو سره مولوي یا قاري لیکل شوی.

د خواله رسنیو ګڼو کاروونکو په تېره بیا د کورنیو چارو وزارت د همدې اعلامیې په پای کې سلګونو کسانو دا ګمارنې غیر مسلکي بللي او انتقاد یې پرې کړی دی.

د طالبانو د کورنیو چارو وزارت کې تازه ګمارل شوي کسان دا دي:

  • مولوي نورجلال د تعلیماتو او پرسونل معین
  • عبدالله خان د نشه یي توکو پر وړاندې د مبارزې معین
  • مولوي شمس الدین منصور د پالیسي او ستراتیژي معین
  • مولوي زین الله د مقام دفتر لوی رییس
  • وزیر حقاني د پلان او اوپراسیون لوی رییس
  • نورالله حافظ د اطفایې لوی رییس
  • تورن جنرال سید نورالله مراد د ترافیک پولیسو لوی رییس
  • شېرمحمد شریف د سرحدي پولیسو لوی رییس
  • مولوي حسیب الله د ښوونې او روزنې لوی قوماندان
  • مولوي علم ګل حقاني د پاسپورټ لوی رییس
  • مولوي موسی د کورني امنیت لوی رییس
  • مولوي عارف الله د بهرنیو اړیکو رییس
  • مولوي عبدالحکیم حمدي د مطبوعاتو او عامه اړیکو رییس
  • انجنیر ابراهیم د مخابرې او ټېکنالوژۍ لوی رییس
  • قاري عبیده د وزارت د امنیتي قطعې قوماندان

هند: ۳زره کیلوګرامه هیرویین چې له افغانستانه انتقال شوي وو ضبط شول

ارشیف

هندي چارواکي وايي، نږدې درې زره کیلوګرامه هیرویین چې له افغانستانه انتقال شوي و د هند په یوه لویدیځ بندر کې کشف او ضبط شوي.

د فرانسې خبري اژانس د هندي چارواکو په حواله د دغو هیروینو ارزښت دوه میلیارده او اووه سوه میلیونه ډالره اټکل کړې.

د دغو هیروینو د انتقال په تور دوه هندیان نیول شوي دي.

د هند د ګمرکونو استخباراتي اجنسۍ 'ډي.ار.ای' د دوشنبې په ورځ ویلي، په اصل کې دا مخدره مواد له افغانستانه بار او د ایران د یوه بندر له لارې د هند تر ګجراته رسول شوي وو.

دې اجنسۍ ویلي، افغان اتباع هم په دې قضیه کې ښکېل دي، خو لا تر اوسه پورې نه دي نیول شوي.

هندي چارواکو ویلي چې په احمداباد، ډیلي،چینای،ګاندیدام او د ګجرات په مادوي کې د دې قضیې څخه را وروسته تلاشي او څېړنه پیل شوې.

افغانستان په نړۍ کې د هیروینو د تر ټولو لوی تولیدوونکي په توګه پيژندل کېږي چې اتیا تر نوي فیصده هیروین تولیدوي.

طالبان: پنجشیر کې په ډله ییزه توګه د خلکو د وژلو راپورونه ردوو

د افغانستان په نقشه کې د پنجشیر ولایت

طالبانو په پنجشیر کې په ډله ییزه توګه د خلکو د وژلو راپورونه رد کړل.

د طالبانو ویاند او د اطلاعاتو او فرهنګ وزارت مرستیال ذبیح الله مجاهد پرون دوشنبه(د وري ۲۹مه) ازادي راډیو ته وویل چې دوی د پنجشیر تر نیولو وروسته چا ته زیان نه دی رسولی.

هغه زیاته کړه چې د طالبانو غړیو په پنجشیر کې له خلکو سره بېلابېلې مرستې هم کړي دي.

تر دې مخکې د "ملي مقاومت جبهې" ادعا کړې وه چې طالبان په پنجشیر کې په ډله ییزه توګه خلک وژلي دي.

د بشري حقونو ځینو مدافعینو هم مخکې طالبان تورن کړي و چې په پنجشیر کې یې یو شمېر خلک وژلي دي.

پنجشیر د افغانستان وروستی ولایت و چې د طالبانو تر ولکې لاندې راغی.

د مقاومت جبهې ویاند علي میثم نظري په خپل ټوېټر ویډیو خپره کړې او ویلي یې دي چې د دوی کسان لا هم د پنجشیر په ګڼو لوړو درو او مرتفع سیمو کې موجود دي او جګړه کوي.

جرمني ته لېږدول شويو افغانانو ته د څو واکسینونو د لګولو بهیر بشپړ شو

جرمني کې یو شمېر افغانان

د امریکا متحده ایالاتو پوځ وايي، هغو کسانو ته‌یې چې په وروستیو کې له افغانستانه جرمني ته لېږدول شوي د شري، کڅوک یا چېچک او کله‌چرک پر ضد د واکسین لګولو بهیر بشپړ شو.

د جرمني خبري اژانس په حواله، دغه واکسینونه په دوو پوځي مرکزونو کې پر اته زره او اته کسانو تطبیق شوي دي.

د دغو واکسینونو لګولو هدف د ناروغیو د خپراوي مخنیوی ګڼل شوی دی.

د جرمني رسنیو څو ورځې مخکې راپور ورکړی وو په هغو کسانو کې د شري او کڅوک ناروغي زیاته لیدل شوې چې په وروستیو کې له افغانستانه جرمني ته لېږدول شوي دي.

د ملګرو ملتونو سرمنشي: د طالبانو ترمنځ د قدرت پر سر لانجې وضعیت پېچلی کړی

د ملګرو ملتونو سرمنشي انتونیو ګوترش

د ملګرو ملتونو سرمنشي وايي د طالبانو د بېلابېلو سیالو ډلو ترمنځ د قدرت پر سر لانجې په افغانستان کې وضعیت پېچلی کړی دی.

انتونیو ګوترش له «CNN» ټلوېزیون سره په مرکه کې وویل: "موږ ګورو چې ټول‌ګډونه حکومت د طالبانو د خپل‌منځي اختلافاتو له امله جوړ نه‌شو. څه چې اعلان شول د یوه ټول‌ګډونه حکومت لپاره وروستۍ پرېکړه نه‌ده. زما په اند د افغانستان وضعیت د وړاندوينې وړ نه‌دی، په داسې یو حالت کې باید د دې هېواد په مسایلو کې ونډه ولرو او د هغو افغانانو چې ځورېږي، لاس‌نیوی وکړو. دا معلومه نه‌ده چې موږ بریالي کېږو، که نه، خو دا زموږ دنده ده چې هلته واوسوو او خدمت وکړو."

د ملګرو ملتونو سرمنشي خبرداری ورکړ چې دا به یو خیال وي که د طالبانو تر ولکې لاندې د ملګرو ملتونو ښکېلتیا ناڅاپه ټول‌­شموله حکومت، د حقونو درناوي او د ترورېستانو د حضور ختمېدو ته زمینه برابره کړای شي.

انتونیو ګوترش وايي، په افغانستان کې د ملګرو ملتونو ظرفیت او نفوذ لږ دی، خو بیا هم هڅه کوي له دغه جګړه‌ځپلي هېواد سره د بشري مرستو لپاره کلیدي رول ادا کړي.

طالبانو تر اوسه د ښاغلي ګوترش د څرګندونو په اړه څه نه‌دي ویلي.

 د روغتیا نړیوال سازمان عمومي مشر کابل ته تللی

د روغتیا نړیوال سازمان عمومي مشر

راپورونه وايي د روغتیا نړیوال سازمان عمومي مشر نن سهار کابل ته تللی چې د روغتیايي ادارو د تمویل په اړه د طالبانو د حکومت له چارواکو سره خبرې وکړي.

تدروس ادهانوم ګبریاسوس په داسې حال کې کابل ته ځي چې د اګسټ پر ۱۵مه پر کابل هم د طالبانو د ولکې له ټینګولو وروسته په دغه هېواد کې د بشري بحران په اړه اندېښنې زیاتې شوې دي.

د طالبانو فرهنګي کمېسیون رسنیو ته ویلي چې ګبریاسوس به د طالبانو له رئیس‌الوزرا ملا محمد حسن اخوند، د هغه له مرستیال ملا عبدالغني برادر او نورو طالب چارواکو سره خبرې وکړي.

 یونېسف: افغانستان کې ۱۰ ملیونه ماشومان عاجلو بشري مرستو ته اړتیا لري

ارشیف، افغان ماشوم

د ماشومانو د ملاتړ لپاره د ملګرو ملتونو مرستندوی صندوق یا یونېسف وايي په افغانستان کې نږدې ۱۰ ملیونه ماشومان عاجلو بشري مرستو ته اړتیا لري.

دغه سازمان نن دوشنبه (د وږې ۲۹مه) په یوه ټویټ کې ویلي، په افغانستان کې د ماشومانو او ښځو ترڅنګ د درېدو لپاره هېڅکله دومره عاجله اړتیا نه‌وه پېښه شوې.

تېره دوشنبه د سویس په جنوا کې د ملګرو ملتونو په کوربه‌توب په یوه نړیوال کنفرانس کې مرستندویو هېوادونو له افغانستان سره د څه باندې یو میلیارد ډالرو مالي مرستې ژمنه وکړه.

ټاکل شوې ده چې دا مرستې طالبانو ته ورنه‌کړل شي، بلکې د نړیوالو ادارو له‌خوا به ولګول شي.

د ملګرو ملتو سرمنشي انتونیو ګوترش ویلي، ملګري ملتونه به هر کار چې په وس‌یې پوره وي د افغانستان لپاره وکړي.

داعش په ننګرهار کې د تېرو دوو ورځو د خونړیو حملو مسؤلیت واخیست

جلال‌اباد ښار کې د یوې چاودنې په سیمه کې د څېړنو لپاره راټول شوي طالبان

د اسلامي دولت ډلې یا داعش په ننګرهار کې د تېرو دوو ورځو کې د خونړیو حملو مسؤلیت په غاړه واخیست.

په دغو حملو کې چې د ننګرهار په مرکز جلال‌اباد کې د شنبې او یکشنبې په ورځو وشوې د طالبانو موتړ په نښه شوي و.

د شنبې په ورځ په درېیو جلا چاودنو کې د طالبانو موټر په نښه شوي چې لږترلږه دوه تنه په‌کې وژل شوي او یو شمېر نور ټپیان شوي او پرون یکشنبه هم د طالبانو پریوه موټر په چاودنه کې د یوه ماشوم په ګډون لږترلږه پنځه تنه ووژل شول او یو شمېر نور ټپیان شول.

د اعماق په نوم وېب‌پاڼه کې چې د داعش یوه تبلیغاتي پاڼه بلل کېږي، د اسلامي دولت ډلې د خراسان څانګې په دوو بیانونو کې د دواړو ورځو د چاودنو مسؤلیت اخیستی او ادعا یې کړې چې په دې بریدونو کې یې له ۳۰ زیاتو طالبانو ته مرګ‌ژوبلې اړولې.

تر دې وړاندې دې ډلې په کابل کې د اګسټ میاشتې په وروستو کې د هغه خونړي برید مسؤلیت اخیستی و چې د کابل په هوایي ډګر کې وشو او د ۱۳ امریکایي سرتېرو په ګډون له ۱۵۰ زیات کسان په‌کې ووژل شول او په سوونو نور هم په‌کې ټپیان شول.

په جلال‌اباد کې د داعش د ډلې حملې له هغې وروسته چې طالبان په افغانستان کې واک ته رسېږي، پر طالبانو لومړنۍ شدیدې حملې بلل کېږي.

د کابل له نړیوال هوایي ډګر له ۲۳۰ زیات نور کسان هم قطر ته ولېږدول شول

قطر ته رسول شوي افغانان او ځیني نور کسان چې په افغانستان کې ګېر پاتې وو.

د کابل له نړیوال هوایي ډګر څخه د قطر د هوایي شرکت څلورمه چارټر الوتنه پرون یکشنبه ترسره شوه چې له ۲۳۰ زیات کسان‌یې هغه هېواد ته ولېږدول.

د قطر د بهرنیو چارو مرستیال وزیرې لؤلؤة راشد الخاطر په یوه ټویټ کې ویلي چې له کابله ایستل شویو کې د افغانانو په ګډون امریکایي او د اروپایي ټولنې اتباع دي.

د روېټرز خبري اژانس د راپور له مخې یوه بل قطري چارواکي ویلي، په دغه الوتنه کې ۲۳۶ تنه دوحې ته ولېږدول شول چې دا د اګسټ له ۳۱مې چې له افغانستانه د امریکایي او نړیوالو متحدانو پوځي مأموریت‌یې پای ته ورسېد، تر ټولو زیات شمېر کسان دي چې په یوه الوتنه کې د کابل له هوایي ډګره ایستل کېږي.

دغه چارواکي چې نوم‌یې نه‌دی اخیستل شوی دغه‌راز ویلي چې قطر به له خپلو نړیوالو شریکانو سره په همغږۍ هغو هڅو ته دوام ورکړي ترڅو دا مسئله یقیني شي چې خلک له افغانستانه په ازادانه توګه وکړای شي بهر ته لاړ شي.

د افغان روباتیک ټیم هرکلي لپاره مکسیکو کې د بایسکل ځغلولو ننداره جوړه شوه

د افغان نجونو د روباتیک ټیم ځینې غړې

د افغان نجونو د روباتیک ټیم څلورو غړو پرون د مکسیکو په پلازمېنه مکسیکو سیټي کې د بایسکل ځغلولو په هغه ننداره کې ګډون وکړ چې د ښځو له‌خوا دوی ته د هرکلي لپاره تنظیم شوې وه.

د بایسکل ځغلولو په دغه ننداره کې چې «مکسیکو تاسو په غېږه کې نیسي» په نوم جوړه شوې وه، یو شمېر نورو ښځو هم ګډون کړی و او دوی د مکسیکو سیټي په مرکزي برخه کې د انقلاب تر یاد څلي پورې پر بایسکلونو ولاړې.

د هرات د نجونو د روباتیک ټیم پنځه غړې د تېرې میاشتې په وروستیو کې د طالبانو له‌خوا د کابل له نیول کېدو وروسته مکسیکو ته ولاړې او د هغه هېواد چارواکو یې تود هرکلی وکړ.

د افغان نجونو د روباتیک ټیم په ۲۰۱۷ کال د روباتیک په نړیوالو سیالیو کې ګډون کړی او یوه ځانګړې جایزه‌یې ترلاسه کړې وه.

طالبان: په بېړه کار کوو چې له ۶ ټولګي پورته نجونې ښوونځیو ته ستنې شي

ارشیف، ځینې افغان زده‌کوونکې نجونې

طالبان وایي، په بېړه کار روان دی چې له شپږمو ټولګیو پورته نجونې زده‌کوونکې هم بېرته ښوونځیو ته وګرځي.

د طالبانو ویاند ذبیح‌الله مجاهد وایي، دوی اوس دې برخه کې د ځینو تګلارو په جوړولو بوخت دي چې هدف‌یې د زده‌کوونکو خوندیتوب دی.

مجاهد وایي: "د نجونو په برخه کې د مصونیت لپاره لږ طرزالعمل او لایحو ته ضرورت شته چې هغه عملي شي، دوی ته به هم زمینه‌سازي کېږي. کار په جدیت سره روان دی. ضرورت دی چې د دوی د تګ راتګ مصونیت تضمین شي او بل‌یې تعلیمي بهیر داسې تنظیم شي چې دوی جلا وي او مطمئن."

طالبان دا ډاډ وروسته تر دې ورکوي چې له تېرو دوو ورځو راهیسې تر شپږم ټولګي پورې نجونې ښوونځیو ته ځي، خو د منځنۍ او لېسې دورې ملیونونه نجونې په کور ناستې دي.

طالبان وایي، ولایتونو کې له پخوا هم د نجونو ټولګي جلا وو، خو یوازې کابل کې دا مسئله شته چې هواره به شي.

اروپایي ټولنه: په افغانستان کې بشري حقونه تر ګواښ لاندې دي

د افغانستان لپاره د اروپایي ټولنې سفیر ون برنډت

د افغانستان لپاره د اروپایي ټولنې سفیر ون برنډت وایي، دغه هېواد کې بشري حقونه تر ګواښ لاندې دي.

ښاغلي برنډت پرون ماښام پر خپله ټویټرپاڼه ولیکل چې تعلیم او کار ته د نه‌لاسرسي حق هغه موضوع ده چې دی یې اندېښمن کړی دی.

نوموړی دا اندېښنه وروسته تر دې څرګندوي چې د طالبانو په راتګ د بې‌کارۍ او بې‌وزلۍ کچه لوړه شوې ده.

د ښځو د حقونو په برخه کې اندېښنې وروسته تر دې زیاتې شوې چې طالبانو وروستیو کې له شپږم ټولګي پورته ښځینه زده‌کوونکو ته د "شرایطو" تر برابرېدو کور کې د پاته کېدو سپارښتنه وکړه.

کابل کې د دولتي ادارو ځینو ښځینه کارکوونکو ادعا کړې چې کار ته د تګ اجازه نه‌ورکول کېږي.

طالبان بیا وایي، د ښځو د تعلیم او کار حق ته درناوی کوي، خو اوس په دې بوخت دي چې دې برخه کې د خپلو تګلارو له مخې شرایط برابر کړي.

نور راوښيه

XS
SM
MD
LG