د لاسرسۍ وړ لېنکونه

تازه خبر
جمعه ۲۶ وږی ۱۴۰۰ کابل ۰۵:۴۸

نړۍ

ترکیې له اوره ویریدلي سیلانیان خوندي سیمو ته ولېږدول

د ترکیه د ایجن سمندرګي په ځنګله کې لګیدلی اور

ترکیې پرون شنبه (د زمري ۹مه) دغلته له اوره ویریدلي سیلانیان په بیړیو کې خوندي سیمو ته انتقال کړل.

ترکي رسنۍ وایي، دا ګام وروسته تر دې پورته شو چې د ایجین سمندرګي په ځنګله کې د بل شوي اور ګواښ تر هوټلونو ورسېد.

د ژغورنې دا عملیات د سمندر غاړې ځواکونو له خوا ترسره شوي دي، خو له شخصي بیړیو هم غوښتل شوي چې دې عملیاتو کې مرسته وکړي.

دا اور دوه ورځې وړاندې د ترکیې د توریستي ښارونو انتالیا، بودروم، مارماریس او مرسین په ځنګلونو کې ولګېد او باد یې لمن لا پسې پراخه کړه.

د ترکیې اناتولي خبري اژانس ویلي چې ولسمشر رجب طیب اردوغان په اور ځپلو سیمو کې عمومي فاجعه اعلان کړې او ویلي یې دي چې د دې پېښو د لاملونو په اړه به څیړنه کېږي.

په دې اور لګېدنه کې د ځنګله د دوو کار کوونکو په ګډون ۶ تنه وژل شوي دي.

د ورځې تازه خبرونه دلته ولولئ

امریکا،بریتانیا او اسټرالیا د هندو پاسفیک لپاره امنیتي شراکت اعلان کړ

ارشیف

د امریکا متحدو ایالتونو، بریتانیا او اسټرالیا د هندو پاسفیک د سیمې لپاره د یوه نوي امنیتي شراکت اعلان وکړ، هغه اقدام چې چین پرې انتقاد کړی دی.

د امریکا ولسمشر جو بایډن، د بریتانیا صدراعظم بورېس جانسن او د اسټرالیا صدراعظم سکات موریسن دغه نوی تړون پرون چهارشنبې اعلان کړ.

د دغه تړون له مخې به غړي هېوادونه د دفاعي وړتیاوو د لوړولو لپاره په خپلو کې سره همکاري کوي او اسټرالیا ته اجازه ورکوي چې اټمي اوبتلونو ته لاس رسۍ ولري.

مکرون: فرانسوي ځواکونو افریقا کې د داعش مشر وژلی

د فرانسې ولسمشر امانویل مکرون

د فرانسې ولسمشر امانویل مکرون ویلي، د دوی ځواکونو په افریقا کې د اسلامي دولت ډلې یا داعش مشر وژلی دی.

مکرون پرون ناوخته پر خپله ټویټرپاڼه د داعش وژل شوی مشر عدنان ابو ولید الصحراوي یاد کړی دی.

ده ویلي، دا د افریقا په ساحل سیمه کې له ترهګرۍ سره د مبارزې یوه لویه بریا ده.

د فرانسې ولسمشر نه دي ویلي چې د داعش دا مشر څه وخت او څه ډول وژل شوی دی؟

الصحراوي ۲۰۱۷ کال کې د نایجریا دننه د هغه برید مسولیت منلی و، چې څلور امریکایي پوځیان او څلور نایجریایي سرتیري په کې ووژل شول.

هغه ۲۰۲۰ میلادي کال کې د شپږو فرانسوي مرسته کوونکو او د هغوی د نایجریایي موټر چلوونکي د وژنې امر هم ورکړی و.

بریتانیا د بهرنیو چارو وزیر ډومنیک راب د عدلیې وزیر ټاکلی

ډومنیک راب

د بریتانیا صدراعظم بورېس جانس په کابینه کې د بدلونونو په ترڅ کې د بهرنیو چارو وزیر ډومنیک راب د عدلیې وزیر ټاکلی دی.

له څو میاشتو راهیسې پر جانسن انتقادونه کېدل او ده پرون نوې پرېکړې وکړې.

پر ډومنیک راب وروسته تردې نیوکې وشوې چې کله طالبانو کابل ونیو دی د یونان کریټ ټاپو ته په سیاحت تللی و.

د سوداګرۍ وزیره لېز ټرس د بهرنیو چارو د وزیرې په توګه نومول شوې.

د بریتانیا په کابینه کې د کورنیو او پوهنې د وزیرانو د بدلون په ګډون یو شمېرنور تغییرات هم راغلي دي.

څیخانوسکایا: فرانسه دې د بلاروس د لانجې حل لپاره هلې ځلې وکړي

په جلاوطني کې د بلاروس مشره سویتلانا څیخانوسکایا

په جلاوطني کې د بلاروس مشره سویتلانا څیخانوسکایا د فرانسې له ولسمشره وغوښتل چې د بلاروس د لانجې د حل لپاره هلې ځلې وکړي.

څیخانوسکایا پرون په پاریس کې د وینا پر مهال وویل، ډموکراټیک هېوادونه باید جدي اقدامات ترسره کړي.

څیخانوسکایا په بلاروس کې پروسږکال د اګسټ په انتخاباتو کې د بلاروس د دکتاتور الکساندر لوکاشینکا مهمه سیاله وه، دې په پاریس کې خبریالانو ته وویل، د هېواد خلک یې د پرمختګ لپاره نورو هڅو ته اړتیا لري.

څیخانوسکایا له تېرکال راپه دې خوا په لیتوانیا کې ژوند کوي.

لویدیځ او اروپایي هېوادونه د بلاروس رژیم په رسمیت نه پېژني او پر دې هېواد یې یو لړ بندیزونه لګولي دي.

د پاریس د سفر پر مهال د څیخانوسکایا او د فرانسې د ولسمشر امانویل مکرون ترمنځ د لیدنې کتنې پروګرام په پام کې نه دی نیول شوی، خو تمه ده چې دا د فرانسې له بهرنیو چارو وزیرې ژان لودریان سره د خپل څلور ورځني سفر په ترڅ کې وګوري.

مارک میلي له خپل چینایي سیال سره په پټه غږیدلی و

د امریکا د وسله والو ځواکونو لوی درستیز

د راپورونو له مخې د امریکا د وسله والو ځواکونو لوی درستیز د مخکیني ولسمشر ډونالډ ټرمپ د ولسمشرۍ په وروستیو کې له خپل چینايي سیال سره په پټه تماس نیولی او هغه ته یې ډاډ ورکړی چې متحد ایالات پر چین د برید پلان نه لري.

په یوه کتاب کې چې راتلونکې اوونۍ خپرېږي، جنرال مارک میلي د جنوري په اتمه نېټه د امریکا د کانګرس پر ودانۍ د ټرمپ د پلویانو له حملې دوه ورځې وروسته د چین له لوی درستیز جنرال زو چنګ سره تماس نیولی و.

واشنګټن پوسټ ورځپاڼې، اسوشیټېډ پرېس خبري اژانس او سي اېن اېن ټلوېزیون پرون سې شنبې د پېرل یا خطر په نوم د دې کتاب په حواله راپور ورکوي چې جنرال مېلي د ټرمپ د ولسمشرۍ د دورې په وروستیو کې له هغه وېرېده.

راپور زیاتوي چې مارک مېلي د لومړي ځل لپاره ښاغلي زوچنګ ته ټیلیفون وکړ، څو هغه ته ډاډ ورکړي چې د امریکا اداره باثباته ده او ژمنه یې وکړه چې پر چین د برید په صورت کې به ده ته خبر ورکړي.

ډونالډ ټرمپ د دې راپورونو په اړه په غبرګون کې ویلي چې ده هېڅکله پر چین د برید په اړه فکر نه دی کړی، خو زیاتوي چې چین ته د امریکا د احتمالي برید په اړه مخکې له مخکې خبر ورکول خیانت دی.

پراګ: الکساندر فرانچیتي دې تر بل امر پورې په توقیف کې وساتل شي

الکساندر فرانچیتي 

د پراګ ښاري محکمې د روسیې وګړي الکساندر فرانچیتي ته تر بل امر پورې په توقیف کې د ساتل کېدو امر وکړ.

دغه کس اوکراین د ګرفتارۍ د یوه نړیوال حکم له مخې د کییف لپاره هم مطلوب دی.

تر هغو چې کییف ته یې د احتمالي سپارل کېدو په اړه پرېکړه کېږي فرانچیتي به په توقیف کې دی.

پرون د محکمې تر حکم وروسته د روسیې دغه وګړی چې تېره یکشنبه د پراګ په نړیوال هوايي ډګر کې نیول شوی و، د پراګ د پانکراڅ توقیف­ځای ته ولېږدول شو.

الکساندر فرانچیتي د روسیې له خاورې سره د اوکراین د کریمیا سیمې په الحاق کې د دخالت د ادعاوو له کبله اوکراین ته مطلوب دی.

د هغه مدافع وکیل یان شوارتځ د محکمې د پروني حکم په وړاندې سم د لاسه د استېناف غوښتنه وکړه.

د روسیې ولسمشر د سوریې له مشر بشارالاسد سره وکتل

د روسیې ولسمشر ولادمیر پوتین بشارالاسد سره

د روسیې ولسمشر ولادمیر پوتین د سوریې له مشر بشارالاسد سره په مسکو کې وکتل او په سوریه کې د یاغیانو تر کنټرول لاندې پاتې سیمو پر وړاندې یې د پوځي همکاریو پر لارو چارو خبرې وکړې.

دا خبره په دمشق کې دولتي رسنیو کړې ده.

د ایران ترڅنګ روسیې په سوریه کې د لس کلنې جګړې په ترڅ کې د بشارالاسد د رژیم کلک ملاتړ کړی دی.

د دغې جګړې په نتیجه کې له ۴۰۰ زره زیات کسان وژل شوي او په میلیونونو نور بې ځایه شوي دي.

روسیه د ۲۰۱۵ میلادي کال په سېپټمبر کې دغه کړکېچ ته داخله شوه او د اسد په پلوي یې د قدرت یو تعادل رامنځته کړ چې په نتیجه کې یې اوس د اسد رژیم د دې هېواد د خاورې پر ډېرې برخې کنټرول لري.

پوتین او اسد پرون دوشنبې په مسکو کې سره ولیدل.

دواړو مشرانو له دې مخکې د ۲۰۲۰ میلادي کال په جنوري کې د سوریې په پلازمېنه دمشق کې سره کتلي و.

د کرملین د بیان له مخې پوتین اسد ته وویل چې ترهګرو ډېر زیانونه اړولي، خو ستاسو په مشرۍ حکومت پر نوي سلنه خاورې کنټرول لري.

د خبر له مخې اسد هغه څه چې ده په سوریه کې له ترهګرو د اشغال شوېو سیمو ازادېدل، د سوریې او روسیې بریالیتوب بللی، ستایلي دي.

روسیه، سوریه او ایران اکثره وختونه د سوریې د حکومت ضد وسله وال، ترهګر بولي.

د ملګرو ملتونو عمومي اسامبلۍ کې د ۱۰۰ هېوادونو مشران ګډون کوي

ارشیف

د امریکا د متحدو ایالاتونو د ولسمشر جو بایډن په ګډون به د څه باندې سلو هېوادونو مشران راتلونکې اوونۍ د ملګرو ملتونو په عمومي اسامبله کې حضورې ګډون وکړي.

د اسوشیټېډ پرېس اژانس د راپور له مخې د اردن پاچا، د برازیل او ونزویلا ولسمشران، د فلسطیني ادارې مشر او د جاپان، هند، بریتانیا او اسراییل صدراعظمان به ویناوې وکړي.

د راپور له مخې د افغانستان، شمالي کوریا او میانمار استازي به د سېپټمبرپه ۲۷مه دې اسامبلۍ ته ویناوې وکړي، خو دا لا نه دي ویل شوي چې په دې عمومي اسامبلۍ کې به د افغانستان استازیتوب څوک کوي؟

وروسته له هغې چې طالبانو کابل ونیو، تراوسه یې حکومت هېڅ یوه هېواد هم په رسمیت نه دی پیژندلی.

انګېلا مېرکل له خپل البانیایي سیال ایدي راما سره ګوري

انګېلا مېرکل له خپل البانیایي سیال سره

د جرمني صدر اعظمه انګېلا مېرکل بالکان ته د خپل سفر په ترڅ کې نن له خپل البانیایي سیال ایدي راما سره ګوري.

مېرکل له البانیا سربیره د بالکان حوزې د څلورو نورو هغو هېوادونو له مشرانو سره هم ګوري چې اروپایي ټولنه کې د غړیتوب غوښتنه لري.

ټاکل شوې جرمني کې د همدې روانې میلادي میاشتې د پای له ټاکنو وروسته مېرکل له واکه لېرې شي.

د جرمني صدر اعظمې ویلي، د دوی یو هدف دا دی چې د لویدیځ بالکان شپږو هېوادونو ته د اروپایي ټولنې غړیتوب ورکړي، خو په خبره یې دا هېوادونه اوږده لاره مخ کې لري.

د پاکستان پارلمان مخته زرګونو ژورنالیستانو اعتراض وکړ

د پاکستان پارلمان

په پاکستان کې په زرګونو ژورنالیستانو د پارلمان د ودانۍ مخې ته اعتراض وکړ.

دوی د هغه قانون د مسودې په اړه د خپل اعتراض غږ اوچت کړ چې د دوی په باور پر رسنیو د حکومت کنټرول سختوي او د مطبوعاتو ازادۍ محدودوي.

ژورنالیستانو خپل تحصن وړمه شپه پیل کړ چې پرون یې هم تر هغو دوام وکړ چې پارلمان د نوې جلسې لپاره پرانیستل شو څو دغه نوی قانون تصویب کړي.

دغه پېشنهادي لایحه د رسنیو اوسني قوانین فسخه کوي او پر ځای یې نوي قوانین وضع کوي.

د پاکستان د بشري حقونو کمېسیون هم د قانون د دې نوې لایحې په اړه اعتراض کړ او په اړه یې اندېښنه ښوولې ده.

پاکستان د مطبوعاتو د ازادۍ د نړیوال فهرست تقریباً په وروستي کتار کې ځای لري.

۳ قرغزي وګړي او دوه د تاجکستان، قرغزستان کې محاکمه شول

د قرغزستان محکمه

د قرغزستان درې او د تاجکستان دوه وګړي پرون د خونړیو قومي شخړو له کبله په قرغزستان کې محاکمه شول.

دا شخړې روان کال د قرغزستان او تاجکستان د سرحد په لانجمنه سیمه کې شوې وې.

د اپرېل له ۲۹مې د مې تر لومړۍ نېټه په هغو شخړو کې د قرغزستان ۳۶ او د تاجکستان ۱۹ وګړي ووژل شول او په دواړو خواوو کې په لسګونو نور ټپیان شول.

محکمې ته حاضر شوي کسان د شخصي ملکیتونو په لوټ-تالان تورن شوي دي.

د پخواني شوروي اتحاد د دغو دوو جمهوریتونو پر سرحد وضعیت له کلونو راهیسې ترینګلی دی.

تهران: ډېر ژر به ویانا کې د اټمي موافقې د برخلیک په اړه خبرې بیا پیل کړو

د روان کال جون میاشت کې په ویانا کې د نړۍ له پیاوړو قدرتونو سره د ۲۰۱۵ کال د اټمي موافقې په اړه د ایران مذاکرات

ایران وايي چې ډېر ژر به په ویانا کې د نړۍ له پیاوړو قدرتونو سره د ۲۰۱۵ کال د اټمي موافقې د برخلیک په اړه خبرې بیا پیل کړي.

د ایران د بهرنیو چارو وزارت ویاند سعید خطیب‌زاده نن په تهران کې یوه خبري کنفرانس ته د وینا پر مهال همداراز وویل تهران د اټمي انرژۍ د نړیوالې ادارې مفتشانو ته پر خپلو اټمي بټیو د څار اجازه ورکړې ده.

ښاغلی خطیب‌زاده زیاتوي: "دا اداره د شوې موافقې په چوکاټ کې د تفتیش او څار چارې پر مخ بیایي، خو د پارلمان د فیصلې په اساس له دې هاخوا نور څه ته مو اجازه نه‌ده ورکړې."

خطیب‌زاده وویل چې ایران قطعاً دا تمه لري چې د خبرو نور اړخونه به د ویانا په خبرو کې ریالیستیک واوسي او په عین حال کې یې خبرداری ورکړ چې ایران به د ۲۰۱۵ کال د اټمي موافقې له اصولو بهر هېڅ اضافي ژمنه ونه‌کړي.

د ویانا په خبرو کې چې په اپرېل میاشت کې پیل شوې، پر ایران سربېره بریتانیا، جرمني، فرانسه، روسیه او چین برخه لري.

امریکا: د شمالي کوریا د میزایلو ازموینې ګاونډیانو او نورو ته ګواښ متوجې کړی

ارشیف، د شمالي کوریا رهبر کېم جونګ اون د میزایلو د ازموینې د لیدلو پر مهال

د امریکا متحده ایالاتو پوځ وایي، د هغو میزایلو ازموینې چې شمالي کوریا په تېرو دوو ورځو کې ترسره کړې، د دې هېواد ګاونډیانو او له هغې ورهاخوا نورو ته ګواښ متوجې کړی دی.

د امریکا د هند پاسیفیک قوماندانۍ په یوه بیان کې وویل چې د شمالي کوریا دغه فعالیتونه د دې ښکارندویي کوي چې دا هېواد پوځي پروګرام ته پراختیا ورکوي او په دې توګه خپل ګاونډیان او نړیواله ټولنه ګواښي.

شمالي کوریا ویلي چې په تېرو دوو ورځو کې یې د کروز میزایلو ازموینې بریالۍ ترسره کړې او ټاکل شوي د ۱،۵۰۰ کیلو متره واټن هدفونه‌یې ایشتي دي.

پیونګ یانګ دغه نوي میزایل مهمې ستراتېژیکې وسلې بولي او وایي چې په دې سره د شمالي کوریا د مشر کېم جونګ اون هغه غوښتنه پوره شوې چې د هېواد د پوځي وړتیا پر لا زیاتېدو یې ټینګار کړی دی.

پولنډ کې ډاکټرانو او روغتیاپالانو د لږو معاشونو له کبله اعتراض کړی

وارسا کې اعتراض

په پلازمېنه وارسا کې د ټول پولنډ ډاکټرانو، نرسانو او نورو روغتیايي کارکوونکو د لږو معاشونو او د خرابو کاري شرایطو له کبله اعتراض پیل کړ.

دا اعتراض داسې مهال کېږي چې د کرونا وبا له کبله د پولنډ روغتیايي سیسټم تر فشار لاندې دی.

اعتراض کوونکو چې نن یکشنبه د وارسا په مرکزي برخه کې او د دولتي ودانیو مخې ته راغونډ شوي وو خبرداری ورکړ چې د دغه هېواد روغتیايي سیسټم ښايي د مالي ستونزو له کبله له سقوط سره مخامخ شي.

دغو کسانو ویلي، تر هغو چې مهمې غوښتنې یې پرځای شوي نه وي، شپه به هم په همدغو ځایونو کې تېره کړي.

د پولنډ د روغتیا وزیر اډم ناید-زایلسکي ویلي چې د اعتراض کوونکو له استازو سره به نن پر دې موضوع خبرې وکړي.

پاکستان: د پشه­کال بارانونو او ځمکې ښویېدنې ۱۷ کسان وژلي

پاکستان کې راوتلي سیلابونه

د پاکستان پولیس وايي، د دغه هېواد په شمال لویدیځ کې نن د پشه­کال بارانونو او ځمکې ښویېدو له کبله لږ تر لږه ۱۷ کسان وژلي او ګڼ کورونه ویجاړ شوي دي.

یوه چارواکي محمد نواز ویلي، په تورغر ولسوالۍ کې له ویجاړیو او خټو ګڼ مړي ایستل شوي او ژغورونکي په نورو قربانیانو پسې پلټنه کوي.

د پاکستان د طبیعي پېښو پر وړاندې د مبارزې ادارې چارواکو ویلي، اغېزمنو شوېو سیمو ته یې مرستې لېږلي، خو د ځمکې ښویېدو، د دوی د مرستو رسولو چارې ټکنۍ کړې دي.

په پاکستان کې د سېپټمبر تر نیمايي پورې د پشه­کال د بارانونو موسم وي چې وخت ناوخت دې د دا ډول طبیعي پېښو سبب کېږي.

نور راوښيه

XS
SM
MD
LG