د کندهار په سپین بولدک ولسوالۍ کې د افغان او پاکستاني سرحدي ځواکونو ترمنځ د اغزن تار د غځولو پر سر یو ساعته جګړه شوې.
په کندهار کې د ۲۰۵ اتل قول اردو ویاند خواجه یحیی علوي ازادي راډیو ته وویل چې جګړه نن تر غرمې مخکې هغه مهال رامنځته شوه کله چې پاکستاني ځواکونو د سپین بولدک په لقمان کلي کې د اغزن تار د غځولو هڅه کوله او دوی یې مخنیوی وکړ.
د علوي په وینا جګړې یو ساعت دوام کړی چې پر مهالیې یو ملکي سړی زخمي شوی او دغهراز د سپین بولدک-چمن لار د مسافرو د تګ راتګ پر مخ تړل شوې ده.
ښاغلی علوي زیاتوي: "د سهار نهه بجې وې چې د افغان او پاکستاني ملېشو ترمنځ د اغزن تار د غځولو پر سر جګړه وشوه، افغان ځواکونو د دغه تار د غځولو مخنیوی وکړ، جګړه اوس پای ته رسېدلې، د خدای په فضل افغان ځاکونو ته تلفات نهدي رسېدلي، یو ملکي سړی ټپي شوی دی."
علوي زیاتوي چې د اوس لپاره جګړه درېدلې، خو افغان ځواکونه د تیارسی په حال کې دي.
تر دې مخکې د سپین بولدک ولسوالۍ اوسېدونکو ازادي رادیو ته ویلي وو چې پاکستاني ملېشې د تېرې یوې میاشتې راهیسې د دې ولسوالۍ په لقمان کلي کې د اغزن تار د غځولو هڅه کوي، خو ځايي اوسېدونکي او افغان ځواکونهیې مخنیوي کوي.
پاکستاني چارواکو تر اوسه د سپین بولدک د نن ورځې د جګړې په اړه څه نهدي ویلي.
په تېرو درېیو کلونو کې دا درېیم ځل دی چې افغان او پاکستاني سرحدي ځواکونه د سپین بولدک ولسوالۍ د لقمان په کلی کې د اغزن تار د غځولو پر سر جګړه کوي.