د لاسرسۍ وړ لېنکونه

تازه خبر
چهارشنبه ۲۹ غویی ۱۴۰۰ کابل ۰۵:۰۸

نړۍ

د روسیې سره د چک لانجه؛ اروپايي ټولنه د چک جمهوریت تر څنګ درېږي

په چک جمهوریت پراګ کې د روسیې سفارت

اروپايي ټولنې ډاډ ورکړی چې له روسیې سره په ډيپلوماتیکه لانجه کې به د چک جمهوریت تر څنګ ودرېږي او پوره ملاتړ به یې وکړي.

دا لانجه د چک له هغې ادعا وروسته رامنځته شوه چې ویې ویل، د دې هېواد د وسلو په یوه ډیپو کې په بمي چاودنه کې د روسیې د هغو پوځي ایجنټانو لاس درلود چې په بریتانیا کې د روسیې د استخباراتو د یو پخواني اېجنټ د مسمومولو په قضیه کې ښکېل و.

د پراګ او مسکو ترمنځ د دې ډیپلوماتیکې لانجې په نتیجه کې روسیې په مسکو کې د چک د سفارت شلو کار کوونکو ته له دې هېواده د وتلو امر وکړ او له هغه مخکې د چک حکومت اتلس روسي ډيپلوماتان په دې تور له دې هېواده وایستل چې ګنې د روسیې استخباراتي فعالان دي.

دواړو هېوادونو پرون خپل ډیپلوماتان او د هغو د کورنۍ غړي په دولتي الوتکو کې کورونو ته ستانه کړل.

پرون د اپرېل په ۱۹مه د دې لانجې په اړه د اروپايي ټولنې د بهرنیو چارو د وزیرانو له خبرو وروسته د دې ټولنې د بهرنۍ پالیسۍ د مشر جوزیپ بورېل ویاند وویل، اروپايي ټولنه په اروپا کې د روسیې د پرله پسې خطرناک او خصمانه چلند له کبله اندېښنه لري.

د ورځې تازه خبرونه دلته ولولئ

څېړنه: پر ځمکه د انسانانو  پرتله د مرغانو شمېر ۶ برابره زیات دی

ارشیف

د یوې نوې څیړنې له مخې پر ځمکه د مرغانو شمېر څه باندې شپږ برابره د انسانانو تر شمېره زیات دی.

د استرالیا ساینس پوهانو د امریکا د ساینس د ملي اکاډیمۍ په خپرونه کې یوه څېړنه خپره کړې ده چې په کې راغلې دي، د ځمکې کره د شااوخوا پنځوس میلیارده مرغانو کور دی.

جرمني اژانس خبر ورکوي چې په سدني کې د 'نیو سوت ویلس' پوهنتون له لوري څیړنه په نړۍ کې پر نهه زره اووه سوه ډوله مرغانو شوې ده چې د دې څېړنې له مخې دا شمېره د ټولې نړۍ د دوه نوي په سلو کې مرغانو استازیتوب کوي.

د څېړنې له مخې د ځینو مرغانو شمېر زیات دی او یو شمېر یې ډېر لږ دي، تر ټولو ډېر مرغان مرغۍ دي چې شمېر یې یو اعشاریه شپږ میلیاردو ته رسېږي.

ملګري ملتونه په غزه کې د روانې حګړې د درېدو په اړه بېړنۍ ناسته کوي

ارشیف، غزه

ټاکل شوې ده چې نن د ملګرو ملتونو امنیت شورا د اسراییل او فلسطینیانو ترمنځ د روانې جګړې د دریدو پر لارو چارو بیړنۍ غونډه وکړي.

په څه باندې یوه اوونۍ کې د دې جګړې له کبله تر دوه سوه ډېر کسان وژل شوي دي.

د دې سربېره چې د دې جګړې د درېدو غږ له هر لوري په جګېدو دی، د اسراییل صدراعظم بنیامین نتانیاهو پرون ناوخته وویل چې ځواکونه به یې په غزه کې د ترهګرو ځایونه تر هغو په نښه کوي چې د اسراییل ټول اتباع خوندي شي.

د سپینې ماڼۍ په بیان کې راغلي دي چې ولسمشر جوبایډن د دوشنبې په ورځ له صدراعظم نتانیاهو څخه د اوربند غوښتنه وکړه.

ولسمشر بایډن تر دې مخکې هم ورته غوښتنه کړې وه او ویلي یې و چې دا د اسراییل حق دی چې له خپلې خاورې د توغندیو دفاع وکړي.

په ورته وخت کې د سپینې ماڼۍ په بیان کې راغلي دي چې اسراییل دې د بې ګناه ملکیانو د خوندیتوب لپاره ډيرې هڅې وکړي.

د اسراییل پوځ وایي چې حماس او نورو فلسطیني ډلو شااوخوا درې زره درې سوه پنځوس توغندي له غزې د اسراییل لور ته ویشتلي دي او یوازې دوشنبې یې دوه سوه فیر کړي دي.

د اسراییلي پوځیانو په وینا د دغه هېواد د هوایي ځواکونو او توپخانې د ډزو پر مهال لږ تر لږه یو سل او دیرش وسله وال وژل شوي دي.

ملګري ملتونه وایي چې د دې جګړې له امله تر اته دیرش زره ډېر فلسطنیان په غزې کې د خپلو کورونو پریښودو ته مجبوره شوي دي او نورو دوه نیمو زرو کورونه له لاسه ورکړي دي.

اسراییل د مې په لسمه وروسته تر دې پر غزه بمباري پیل کړه چې حماس له غزې د اسراییل په لور توغندي وویشتل.

د ګوانتانامو ۷۳ کلن پاکستانی بندي له ۱۶ کاله بند وروسته خوشې کېږي

سیف الله پراچه

د ګوانتانامو زندان یوه ۷۳ کلن پاکستاني بندي ته خبر ورکړل شوی چې له شپاړلس کلن بند وروسته خوشې کېږي.

سیف الله پراچه پر امریکا د ۲۰۰۱ میلادي کال د سېپټمبر د ۱۱مې د تروریستي حملو له دوو طراحانو سره د مرستې په تور نیول شوی و.

شېلبي سولیوان بېنیس چې په نوومبر میاشت کې یې د زندانیانو د ارزونې د بورډ په غونډه کې د پراچه د مدافع وکیلې په توګه برخه اخیستې وه پرون دوشنبې (د مې په ۱۷مه) وویل چې دې بورډ د ده موکل او دوو نورو بندیانو ته خبر ورکړ چې برائت یې ورکړی دی.

دوه نور بندیان یو ۵۴ کلن عبدالرباني دی چې هغه هم پاکستانی دی او دوهم ۴۰ کلن یمنی عبدالرحیم عثمان دی.

پنټاګون په ګوانتانامو کې د امریکا له پوځي زندانه د دې کسانو د خلاصون د تایید په اړه د ازادي راډیو ایمیل ته ځواب ونه وایه، خو مدافع وکیلې سولیوان بېنیس ویلي دي چې د پراچه د خلاصون پر وړاندې هېڅ خنډ نه دی پاتې او دا فکر کوي چې نوموړی په راتلونکو څو میاشتو کې په پاکستان کې خپل کور ته ستون شي.

جوبایډن د فلسطینیانو او اسراییلو ترمنځ د اوربند ملاتړ کړی

د امریکا ولسمشر جوبایډن

د امریکا ولسمشر جوبایډن د غزې او اسراییلو ترمنځ د اوربند ملاتړ کړی دی.

سپینه ماڼۍ وايي، ښاغلي بایډن دا غوښتنه پرون دوشنبې (د مې په ۱۷مه) د اسراییلو له صدراعظم بنیامین نتانیاهو سره په ټیلیفوني خبرو کې وکړه.

د سپینې ماڼۍ په بیان کې راغلي دي چې بایډن له نتانیاهو سره په خبرو کې همدا راز د فلسطیني ډلو د توغندويو حملو پر وړاندې د خپلې دفاع لپاره د اسراییلو د حق پر قاطع ملاتړ ټینګار وکړ.

له دې مخکې د سپینې ماڼۍ ویاندې جین ساکي خبریالانو ته وویل، امریکا د اسراییل او فلسطینیانو ترمنځ د جګړې د پای ته رسولو هڅو ته ژمنه ده: "زموږ هدف، زموږ تمرکز او زموږ هر اقدام او هره اعلامیه د تاوتریخوالي د کمولو او ناورین ته د پای ورکولو لپاره ده."

مېرمن ساکي وویل چې دا نه شي کولای د ټولو هڅو جزییات اوس څرګند کړي.

په غزه کې د اسراییل او فلسطینیانو جګړه دوهمې اوونۍ ته غځیدلې او له ۲۰۰ زیات کسان په کې وژل شوي دي.

سپینې ماڼۍ: امریکا غزه کې د جګړې د پای ته رسېدو هڅو ته ژمن دی

غزه کې اوسنی جګړه ییز حالت

سپینې ماڼۍ په غزه کې د جګړې پایته رسېدو ته د پيل شوېو هڅو د دوام غوښتنه وکړه.

د سپینې ماڼۍ ویاندې جین ساکي پرون دوشنبه (د غويي ۲۷مه) خبریالانو ته وویل، هېواد یې د اسراییل او فلسطینیانو د جګړې د پای ته رسېدو هڅو ته ژمن دی، خو ويې نه ویل چې هېواد یې د سملاسي اوربند غوښتونکی دی.

نوموړې وویل: "زموږ هدف، زموږ تمرکز او زموږ هر اقدام او هره اعلامیه د تاوتریخوالي د کمولو او ناورین ته د پای ورکولو لپاره ده."

ساکي زیاته کړه، نه شي کولی ټولې پیل شوې هڅې په علني ډول بیان کړي.

اوس په غزه کې د اسراییل او فلسطینیانو جګړه دویمې اوونۍ ته غځیدلې ده او له دوه سوو ډېر کسان په کې وژل شوي دي.

بلېنکن خپل ډنمارکي سیال سره د شمال قطب په اړه خبرې پیل کړې

د امریکا د بهرنیو چارو وزیر انتوني بلېنکن د ډنمارک د بهرنیو چارو له وزیر میت فیریدرایکسین سره

د امریکا د بهرنیو چارو وزیر انتوني بلېنکن د شمال قطب د راتلونکي په اړه خبرې د ډنمارک د بهرنیو چارو له وزیر میت فیریدرایکسین له کتنې پيل کړې.

د امریکا د بهرنیو چارو وزارت د خبرپاڼې له مخې، بلېنکن په دغه ملاقات کې د اقلیم له بدلون سره د مبارزې د ګډو اهدافو پر اهمیت او د شنې ټکنالوژۍ پر پراختیا خبرې کړي دي.

اعلامیه کې راغلي چې د شمال قطب په اړه له ډنمارک سره همکارۍ هم د دغو لیدو کتو یوه برخه وه.

ټاکل شوې بلېنکن له ډنمارک وروسته ایسلنډ ته ولاړ شي او سبا 'د مې په نولسمه' د شمال قطب د شورا په غونډه کې ګډون وکړي.

بلېنکن به وروسته له خپل روسي سیال سرګي لاوروف سره هم وګوري.

لاوروف پرون وویل، شمال قطب د روسیې د خاورې یوه برخه ده او دا یوازې د دوی د هېواد مسوولیت دی چې له ساتنې یې ځان ډاډه کړي.

د شمال قطب شورا دا مهال اته غړي لري چې ډنمارک، فنلنډ، ناروې، سوېډن، کاناډا، ایسلنډ، روسیه او امریکا دي.

روتردام ښار د یورو ویژن سندرو د سیالۍ کوربه توب کوي

ارشیف، د یورو ویژن د سندرو سیالۍ

د هالند روتردام ښار د یورو ویژن سندرو د سیالۍ کوربه توب ته چمتو کېږي.

له کرونا وبا سره- سره چې تېرکال یې دغه سیالۍ ځنډولې وې، د یورو ويژن وروستۍ برنامه د مې په ۲۲مه ترسره کېږي.

ټاکل شوې له نن شپې د مې تر شلمې پورې د سیالۍ د نیمه پای ګټونکي اعلان شي.

د هالنډ حکومت دغې سیالۍ ته ډېر چمتوالی نیولی او ګډونوالو ته یې ویلي، هرو ۴۸ ساعتونو کې یو ځل باید د کرونا معاینه وکړي.

۲۰۱۹ میلادي کال کې هالنډي سندرغاړی دونکان لاورینس د یوروویژن سیالیو اتل شو او خپل هېواد یې د ۲۰۲۰ کال لپاره د سیالۍ کوربه کړ.

تېر کال بیا دا سیالۍ ترسره نه شوې.

اسرائیل وايي د حماس ډلې د نهو قوماندانانو کورونه‌یې ویجاړ کړي

نن سهار وختي پر غزې تړانګې د اسرائیل هوايي بریدونه

اسرائیل وايي چې جنګي الوتکو یې نن سهار د غزې پر تړانګه د بمبارۍ لړۍ بیا پیل کړې او په دې ترڅ کې یې د فلسطیني وسله‌والو ۱۵ کیلو متره سمڅې او د حماس ډلې د نهو قوماندانانو کورونه ویجاړ کړي دي.

په یوه هوايي حمله کې په غزې ښار کې یوه درې پوړیزه ودانۍ سخته زیانمنه شوه، خو اوسېدونکو یې ویلي دي چې اسرائیلي پوځ له حملې ۱۰ دقیقې مخکې دوی ته خبرداری ورکړی او ټول ترې ووتل.

د اسرائیلو د نننیو هوايي حملو د تلفاتو په اړه سمدستي جزئیات نه‌شته، خو د فلسطین د روغتیا وزارت وايي په غزه کې په پرونیو بمباریو کې د اتو ماشومانو او دوو ډاکترانو په ګډون لږترلږه ۴۲ فلسطینیان وژل شوي دي.

د اسرائیل پوځ ویلي دي چې د ترورېستانو ۳۵ اهداف‌یې په نښه کړي دي. اسرائیل همداراز وايي، فلسطیني وسله‌والو تېره شپه د اسرائیلو پر ښارونو ۶۰ توغندي وویشتل په داسې حال کې چې د دې توغندیو شمېر پرون ۱۲۰ او وړمه ورځ ۲۰۰ و.

په غزه کې د اسرائیل په بمباریو کې د وژل شویو فلسطینیانو ټول شمېر ۱۹۷ ته لوړ شوی، خو ژغورونکي په ویجاړو ودانیو کې په نورو کسانو پسې ګرځي.

د اسرائیلو د هوايي حملو له کبله په ډېرو سیمو کې برېښنا پرچاو شوې ده او سلګونه ودانۍ ویجاړې شوي.

د امریکا د بهرنیو چارو وزیر ډنمارک، ایسلنډ او ګرینلنډ ته روان شو

د امریکا د بهرنیو چارو وزیر انتوني بلېنکن

د امریکا متحده ایالاتو د بهرنیو چارو وزیر پرون له واشنګټن څخه ډنمارک، ایسلنډ او ګرینلنډ ته په پنځه ورځني سفر روان شو.

انتوني بلېنکن به په دې ډیپلوماتیک سفر کې په ایسلنډ کې د شمالي قطب د شورا په یوه غونډه کې هم برخه واخلي.

وروسته له هغې چې جو بایډن د امریکا د ولسمشر په توګه خپله دنده پیل کړې، بلېنکن به د لومړي وار لپاره له خپل روسي سیال سرګي لاوروف سره په دې غونډه کې مخامخ شي.

انتوني بلېنکن به نن په کوپنهاګن کې د ډنمارک له چارواکو سره هم وګوري.

د امریکا د بهرنیو چارو وزارت وايي، ښاغلی بلېنکن به د اقلیمي بدلون په وړاندې پر مبارزه او د اتلانتیک سمندرګي په شااوخوا کې د ګډو ګټو پر پیاوړتیا بحث وکړي.

ښاغلی بلېنکن به نن وروسته ایسلنډ ته ځي چې د دغه هېواد له چارواکو سره هم پر ځینو مسایلو خبرې وکړي.

اسرائیل نن هم د غزې ښار پر ګڼو ساحو درنې بمبارۍ وکړې

پر فلسطین د اسرائیل هوايي حمله

د اسرائیل جنګي الوتکو نن دوشنبه هم د غزې ښار پر ګڼو ساحو درنې بمبارۍ وکړې.

دا هوايي حملې په داسې حال کې وشوې چې له تېرې اوونۍ د دې پیل شوي خونړي تاوتریخوالي د بندېدو لپاره غوښتنې مطرح شوې دي. پرون د دې تاوتریخوالي خونړۍ ورځ وه.

راپورونه وايي، نن سهار لسګونه هوايي حملو غزې ښار ولړزاوه.

د اسرائیل دفاعي ځواکونو په یوه لنډه اعلامیه کې ویلي چې دوی په غزې تړانګه کې ترورېستي اهداف ویشتلي دي.

دغه حملې د برېښنا د پرچاوۍ او د سلګونو ودانیو د تخریب سبب شوي.

د فلسطین روغتیا وزارت وايي، په یوه حمله کې په غزه کې ۴۲ فلسطینیان وژل شوي چې لږ تر لږه ۸ تنه په‌کې ماشومان او دوه تنه ډاکتران دي.

په ټوله کې په غزه کې د وژل شویو فلسطینیانو شمېر ۱۹۷ ته زیات شوی او ژغورونکي په نورو کسانو پسې په نړېدلو ودانیو کې ګرځي.

د نننیو حملو د مرګ‌ژوبلې په اړه لا راپور نه‌دی ورکړل شوی.

د فلسطیني ادارې د بهرنیو چارو وزیر اسرائیل په جنګي جنایتونو تورن کړ

د فلسطیني ادارې د بهرنیو چارو وزیر ریاض‌المالکي

د فلسطیني ادارې د بهرنیو چارو وزیر ریاض‌المالکي اسرائیل په غزه تړانګه کې په جنګي جنایتونو تورن کړ.

المالکي د ملګرو ملتونو امنیت شورا په پرونۍ بېړنۍ غونډه کې وویل د هغه وحشت بیانولو ته الفاظ نه‌لري چې د فلسطین په خلکو تپل شوی.

د هغه په خبره اسرائیل په دې هڅه کې دی چې فلسطینیان له بیت‌المقدسه ختم کړي.

اخوا د ملګرو ملتونو عمومي منشي انتونیو ګوترش خبرداری ورکړ چې د اسرائیل او حماس جګړه به منځنی ختیځ یوه تازه ناورین ته یوسي چې د ده په خبره د کنټرول وړ به نه‌وي.

هغه د فلسطین او اسرائیلو ترمنځ د راپورته شوي کړکېچ د سمدستي بندېدو غوښتنه وکړه.

اخوا د اسرائیل پوځ وايي چې په غزه تړانګه کې د حماس ډلې د سیاسي څانګې د مشر یحیی سینوار په کور باندې یې هوایي برید کړی.

په دې برید کې لږ تر لږه ۴۰ کسان وژل شوي، خو نه‌ده معلومه چې سینوار هم مړ دی که څنګه.

د فلسطین روغتیايي چارواکو ویلي تېر یوه اوونۍ د اسرائیلو په بریدونو کې نږدې ۲۰۰ فلسطینیان وژل شوي چې په‌کې ۵۵ ماشومان او ۳۳ ښځې شامل دي.

اسرائیل بیا ویلي چې د دوی لور ته ۱۰ کسان وژل شوي، یو پنځه کلن ماشوم او یو سرتېری هم په‌کې شته.

د چک جمهوریت ولسمشر د روسیې وروستی اقدام احمقانه یاد کړ

(ښی-کین) د روسیې ولسمشر ولادیمیر پوتین او د چک جمهوریت ولسمشر میلوش زیمان

د چک جمهوریت ولسمشر میلوش زیمان د روسیې هغه اقدام چې چک‌یې د غیر دوستو هېوادونو په ډله کې شامل کړی، احمقانه یاد کړی.

روسیې چک جمهوریت او امریکا د "غیر دوست" هېوادونو لېست کې شامل کړي او ګواښ‌یې کړی چې که نور هېوادونه هم د مسکو په وړاندې غیر دوستانه اقدامات وکړي په دې لېست کې به‌یې واچوي.

د چک جمهوریت ولسمشر د روسیې د دې کار په غبرګون پرون وویل پخوانیو دوستانو ته د دښمن خطاب کول یو احمقانه کار دی چې روسیې کړی.

د چک جمهوریت او روسیې ترمنځ اړیکې له یو څه وخت راهیسې ځکه کړکېچنې شوي چې چک جمهوریت ځیني روسي ډیپلوماتان د جاسوسۍ په تور له خپلې خاورې وایستل.

چک جمهوریت د اپرېل په لومړیو کې روسیه د هغې چاودنې تر شا ښکېله وبلله چې ۲۰۱۴ کال په چک کې وشوه او دوه کسان په‌کې ووژل شول.

روسیې دا تور رد کړ او په ځواب کې یې د چک جمهوریت څو ډیپلوماتان له مسکو وایستل.

د نړۍ د سوک‌وهنې دوه اتلان تایسن فیوري او انتوني جوشوا لوبه کوي

د نړۍ د سوک‌وهنې د درانه وزن اتل تایسن فیوري

تمه ده د نړۍ د سوک‌وهنې د درانه وزن دوه اتلان تایسن فیوري او انتوني جوشوا سږ اګسټ لوبه وکړي.

د نړۍ د سوک‌وهنې د درانه وزن اتل تایسن فیوري پرون اعلان وکړ چې د انتوني جوشوا په وړاندې به په سعودي عربستان کې د اګسټ په ۱۴مه مخ شي.

فیوري په خپل ټویټر په دې اړه پیغام ورکړی: "د اګسټ په ۱۴مه ۲۰۲۱ کال کې به د ټولې نړۍ سترګې سعودي عربستان ته وي. زه بې‌صبرانه انتظار باسم څو د نړۍ په تر ټولو لوی سټېج باندې انتوني جوشوا مات کړم. دا به د ځمکې په سر تر ټولو لوی سپورټي پروګرام وي."

۳۲ کلن تایسن فیوري په ۳۱ لوبو کې ۳۰ ګټلي یوه‌یې مساوي کړې.

په وړاندې یې ۳۱ کلن انتوني جوشوا هم د نړۍ د لږترلږه درېیو سازمانونو د اتلولۍ کمربندونه لري. ۲۵ لوبې یې کړي یوازې یوه‌یې بایللې.

دوی دواړه بریتانویان دي.

د یوې سروې نتیجه؛ نږدې ۶۰ سلنه جاپانیان د المپیک لوبو د لغوه کېدو پلوي کوي

ارشیف، جاپان کې د المپیک حلقې

په جاپان کې د یوې ترسره شوې سروې نتیجه ښیي چې په سلو کې نږدې ۶۰ جاپانیان د کرونا وبا له امله په توکیو کې د المپیک د دوبنیو لوبو د لغوه کېدو پلوي کوي.

دغه سروې چې د کویدو خبري اژانس ترسره کړې، په سلو کې څه باندې ۲۵ ګډونوالو یې ویلي چې دغه لوبې دې له نندارچیانو پرته له مهالوېش سره سرم ترسره شي او څه باندې ۱۲ نیم فیصده ګډونوالو هم د دغو لوبو د ترسره کېدو پلوي کړې، خو ویلي یې دي چې د نندارچیانو شمېر یې باید محدود وي.

د المپیک نړیواله کمېټه او د دې لوبو جاپاني تنظیموونکي غواړي چې دغه لوبې په ټاکلې نېټې ترسره شي او تمه ده چې په دې اړه په جون میاشت کې پرېکړه وکړي.

په پام کې ده دغه لوبې د جولای په ۲۳مه پیل شي او د اګسټ تر اتمې پورې به دوام وکړي.

د اسلامي هېوادونو همکارۍ سازمان غړو د غزې د وضعیت په اړه بېړنۍ غونډه وکړه

ارشیف، د اسلامي همکارۍ سازمان غړي

د اسلامي هېوادونو د همکارۍ سازمان ۵۷ غړو د غزې د وضعیت په اړه نن انلاین بېړنۍ غونډه وکړه او د اسرائیل د پوځي حملو د پای ته رسولو غوښتنه‌یې وکړه.

د سعودي عربستان د بهرنیو چارو وزیر شهزاده فیصل بن فرحان له نړیوالې ټولنې وغوښتل چې په غزه کې د اسرائیل د پوځي عملیاتو د پای ته رسولو لپاره دې کار وکړي ترڅو ځپل شویو سیمو ته مرستې ورسول شي.

د فلسطیني ادارې د بهرنیو چارو وزیر ریاض المالکي چې له رام‌الله یې خبرې کولې، اسرائیل تورن کړ، هغه‌یې اپارټایډ دولت وباله چې د ده په وینا په غزه کې زموږ د خلکو په وړاندې جنایتونه او بې‌رحمۍ ترسره کوي.

المالکي د نړۍ له اسلامي هېوادونو وغوښتل چې له ټولو امکاناتو په استفادې دې د فلسطینیانو ملاتړ وکړي.

د ترکیې د بهرنیو چارو وزیر مولود چاووش اوغلو اسرائیل د وروستي تاوتریخوالي مسؤل وباله.

هغه وویل، اسرائیل په ختیځ بیت‌المقدس، لوېدیځه غاړه او غزه کې د وروستي کړکېچ د زیاتوالي مسؤل دی او هغه خبرداري ته‌یې هېڅ پام نه‌دی کړی چې تېره اوونۍ یې اسرائیل ته ورکړی و.

د فلسطیني چارواکو په وینا په غزه کې د وژل شویو کسانو شمېر ۱۷۴ تنو ته لوړ شوی. ۴۷ یې ماشومان ښودل شوي.

اسرائیل هم خپل لور ته د دوو ماشومانو په ګډون د ۱۰ کسانو وژنه تأیید کړې ده.

نور راوښيه

XS
SM
MD
LG