د لاسرسۍ وړ لېنکونه

تازه خبر
دوشنبه ۲۰ غویی ۱۴۰۰ کابل ۰۸:۱۰

افغانستان

راس وېلسن: له افغانستان سره د ماین پاکۍ برخه کې کلنۍ مرسته به جاري وي

ارشیف

په کابل کې د امریکا سفارت شارژدافیر راس وېلسن ډاډ ورکړی چې د ماین پاکۍ په برخه کې د دوی کلنۍ ۲۰ ملیونه ډالره مرسته به جاري وي.

ښاغلي وېلسن یکشنبه ماښام په دې اړه یو لړ ټويټونه کړي.

یکشنبه د اپرېل څلورمه د ماین د خطرونو په اړه د پوهاوي نړیواله ورځ وه.

د امریکا د دغه لوړپوړي ډیپلوماټ په ټویټونو کې دا یادونه هم شوې ده چې امریکا له ۱۹۹۳ تر ۲۰۲۰ کاله پورې له افغانستان سره د متعارفه وسلو په له‌منځه وړلو او د ماین پاکۍ لپاره څه باندې ۵۳۷ ملیونه ډالره مرسته کړې ده.

پېښو ته د رسېدو په چارو کې د دولت وزارت د معلوماتو له مخې یوازې ۲۰۲۰ کال نږدې ۱،۶۰۰ ملکیان (۱۵۸۲) د ماینونو، ناچاودو مهماتو او د انسانانو په لاس د جوړو ماینونو په چاودنو کې مړه یا ټپيان شوي دي.

د دغه وزارت د معلوماتو له مخې د افغانستان په ۱،۶۰۰ کیلومتره مربع ځمکه کې لا هم د ماینونو او ناچاوده مهماتو د موجودیت خطر دی چې د عامو خلکو ژوند ګواښي.

د ورځې تازه خبرونه دلته ولولئ

کابل او لوګر کې د خونړیو بریدونو په خاطر سبا ملي ماتم اعلان شو

 د کابل په دشت برچي کې د شنبې ورځې خونړي برید د قربانیانو د خاورو ته سپارلو مراسم

د کابل په دشت برچي کې د شنبې ورځې او په لوګر کې د خونړي برید په خاطر افغان ولسمشر سې شنبه ملي ماتم اعلان کړی.

ولسمشر محمد اشرف غني یکشنبه وویل چې د مړو او ټپیانو له کورنیو سره په غم او درد کې ځان شریک بولي او په همدې خاطر د سې شنبې په ورځ د ملي ماتم او سراسري فاتحې اعلان کوي.

ښاغلي غني وویل: "په لوګر کې په بې‌ګناه محصلینو او په کابل کې پر معصومو زده‌کوونکو د ترهګریزو بریدونو د شهیدانو د درناوي لپاره د همدې اوونۍ سې شنبې ورځ د ملي ماتم اعلان کوم. د دې غمجنې پېښې د شهیدانو د روح لپاره به د ارګ په جامع جومات، ټولو دولتي ادارو او ولایتونو، ټولو جوماتونو او تکیه‌خانو او د هېواد په بهرنیو استازولیو کې د فاتحې او دعا مراسم ترسره شي."

ولسمشر غني همداراز وویل چې د وژل شویو او ټپيانو له کورنیو سره به نغدي مرستې وشي او هم به د دشت برچي د سیمې د خلکو د امنیت لپاره د سیمې له خلکو په سلا هڅې وشي.

د شنبې په ورځ په دشت برچي سیمه کې سیدالشهدا نجونو ښوونځي مخ ته په موتر بم حمله کې د رسمي شمېرو له مخې له ۵۰ زیات کسان وژل شوي او تر ۱۰۰ زیات ټپیان دی.

روېټرز اژانس بیا د افغان چارواکو په حواله ویلي چې تر یکشنبې ناوخته د مړو شمېر ۶۸ او د ټپيانو ۱۶۵ ته پورته شو.

افغان چارواکو طالبان په دې برید کې ښکېل بللي، خو طالبانو بیا هر ډول ښکېلتیا رد کړې.

تر دې مخکې د کابل په لوېدیځ سیمه کې د اکثرو خونړیو بریدونو مسؤلیت داعش یا اسلامي دولت ډلې په غاړه اخیستی.

ایران له سره صلیب هلته مېشت افغان کډوالو لپاره د کرونا ضد واکسین غوښتی

ارشیف، ایران کې د کرونا ویروس ضد واکسین د تطبیق لړۍ

ایران د سره صلیب له نړیوالې کمېټې غوښتي چې هلته د مېشتو افغان کډوالو لپاره د کرونا دوه ملیون دوزه واکسین ورکړي.

ایراني رسنیو دا خبره د ایران د سره صلیب کمېټې د مشر کریم همتي په حواله خپره کړې ده.

همتي ویلي اوس وخت له دوو ملیونو تر درېیو ملیونو پورې افغانان په ایران کې هستوګن دي چې د کرونا واکسین ته اړتیا لري.

د ایران د سره صلیب کمېټې مشر زیاته کړې چې د سره صلیب له نړیوالې کمېټې یې رسماً د دغو افغان کډوالو د واکسینولو لپاره د دوه ملیون دوزه کرونا واکسین غوښتنه کړې، خو تر اوسه‌یې مثبت ځواب نه‌دی ترلاسه کړی.

د راپورونو له مخې یوازې هغو افغان کډوالو ته واکسین ورکول کېږي چې د ایران په روغتیايي برخو کې په کار بوخت دي.

د کډوالو په چارو کې د ملګرو ملتونو عالي کمېشنرۍ د معلوماتو له مخې په ایران کې د افغان کډوالو له ډلې یوازې یو لک او ۲۰ زره تنه‌یې روغتیايي بیمه لري.

امنیتي چارواکي: طالبانو پکتیا کې مدني فعال عبدالصمد پکتین وواژه 

مدني فعال عبدالصمد پکتین

د پکتیا ولایت امنیتي چارواکي وايي وسله وال طالبانو د دې ولایت په مرکز ګردېز کې یو مدني فعال په ډزو وژلی دی.

د پکتیا د پولیسو ویاند محمد لعل امیري نن یکشنبه(د غويي ۱۹مه) ازادي راډیو ته وویل نن مازدېګر مهال وسله والو طالبانو په ګردېز کې مدني فعال عبدالصمد پکتین وژلی او په ټکو یې قاتل په تېښته بریالی شوی دی.

امیري وايي، د قاتل د نیولو هڅې روانې دي.

پکتین د پکتیا د زرمت ولسوالۍ اوسیدونکی و چې وخت ناوخت یې د پکتیا او ځینې وخت د هېواد په کچه په مدني فعالیتونو کې فعاله ونډه اخېسته.

د نوموړي له وژل کیدو سره سم د پکتیا ځوانانو او مدني فعالانو په ټولنیزو رسنیو کې د امنیتي ځواکونو پر رهبرۍ هم تُندې نیوکې کړي چې په وینا یې هر وخت د ورته هدفي وژنو عاملین ترې د ښار په منځ کې په تېښته بریالي کېږي.

تر اوسه وسله والو طالبانو د دې برید مسولیت نه دی منلی .

لوګر چارواکي: د ملي امنیت ۴ کارکوونکي وژل شوي

ارشیف، د لوګر مرکز پل علم

په لوګر ولایت کې د ملي امنیت څلور کارکوونکي وژل شوي او یو بل ټپی دی.

د لوګر د والي ویاند دیدار لونګ ازادي راډیو ته وویل، د ملي امنیت دغو کار کوونکو په پکتیکا ولایت کې دنده درلوده چې نن یکشنبه(د غويي ۱۹مه) پُل علم ته نژدې کلنګار سیمه کې پرې طالبانو برید وکړ.

لونګ همدا راز ازادي راډیو ته تایید کړه چې نن ماسپښین مهال وسله والو طالبانو د لوګر د مرکز پل علم ښار اړوند په پادخواب شانه سیمه کې د افغانستان بانک د لوګر څانګې مدیر هم وژلی دی.

لوګر کې نن سهار د اقتصاد رییس عبدالمنان سعیدي هم ووژل شو.

اروپایي ټولنه: د کابل د دشت برچي پېښې له عاملینو سره دې حساب وشي

د دشت برچي د پېښې یو قرباني

اروپایي ټولنه وایي، د کابل د دشت برچي سیمې د پرونۍ (شنبه-د غويي ۱۸مه) خونړۍ پېښې له عاملینو سره باید حساب کتاب وشي.

دغې ټولنې په یوه خبرپاڼه کې دا برید له نړیوالو بشري قوانینو سرغړونه بللې او ویلي یې دي، هغه څوک چې دا کړنه توجیه کوي، باید د "بشپړ شرم" احساس وکړي.

دغې ټولنې ویلي، دوی تل افغانستان کې د داسې سملاسي اوربند غوښتنه کوي چې د یوه سیاسي جوړجاړي له لارې تلپاتې سولې ته لاره هواره کړي.

د کورنیو چارو وزارت ویاند طارق ارین وایي، دې پیښه کې له پنځوسو ډېر کسان وژل شوي دي.

بېلابېلو نورو ادارو دا برید غندلی. یونسف بیا ویلي ښونځیو ته نژدې دا ډول بریدونه په هیڅ ډول د منلو نه دي.

د پيښې مسولیت داعش وسله والې ډلې منلی، خو حکومتي چارواکي د ځینو تېرو ورته بریدونو په څېر طالبان ګرم بولي.

چارواکي: طالبانو د لوګر د اقتصاد رییس عبدالمنان سعیدي وواژه

د لوګر ولایت د اقتصاد رییس عبدالمنان سعیدي

د لوګر ولایت د اقتصاد رییس عبدالمنان سعیدي د وسله والو طالبانو په یوه برید کې وژل شوی دی.

د لوګر د والي ویاند دیدار لونګ وايي: "نن غرمه مهال وسله والو طالبانو ددې ولایت د اقتصاد رئیس عبدالمنان سعیدي د کابل -لوګر پر لارې وواژه."

هاخوا د لوګر امنیه قوماندانۍ په یوه خبرپاڼه کې ویلي، ښاغلی سعیدي نن یکشنبه (د غويي ۱۹مه) سهار دندې ته پر لاره و چې د کابل-لوګر لویې لارې پر سر د بلند اب په سیمه کې وسله والو ډزې پرې وکړې.

دا سیمه له مرکز پل علم سره یوازې څو کېلو متره واټن لري.

د برید مسوولیت لا کومې ډلې نه دی اخېستی، خو د پل علم شااوخوا سیمو کې وسله وال طالبان فعاله ده.

پرون شنبه (د غويي ۱۸مه) د لوګر په محمد اغې ولسوالۍ کې د ماین چاودنې څلور ولسي پاڅون کوونکي ووژل.

حنیف اتمر د جرمونو نړیوالې محکمې له څارنوالې سره غږیدلی

د افغانستان د بهرنیو چارو وزیر محمد حنیف اتمر

د افغانستان د بهرنیو چارو وزیر محمد حنیف اتمر د جرمونو نړیوالې محکمې له څارنوالې فاتو بینسودا سره د جرمونو او جزایي معافیتونو پر مخنیوي خبرې وکړې.

دغه لیده کاته هالنډ ته د ښاغلي اتمر په مشرۍ د یوه افغان پلاوي د سفر پر مهال ترسره شوی دی.

د بهرنیو چارو وزارت په یوه خبرپاڼه کې راغلي، لیدنه کې د دغې نړیوالې محکمې او د افغانستان د عدلي او قضایي ادارو ترمنځ د همکارۍ په تخنیکي اړخونو هم خبرې شوي دي.

تر اوسه معلومه نه ده چې دغې نړیوالې محکمې افغانستان کې د ترسره شوېو جرمونو د څیړنو په اړه افغان پلاوي ته څه ویلي دي؟

د دغې محکمې قاضیانو له دې وړاندې خپلې څارنوالې مېرمن بینسودا ته اجازه ورکړې وه چې افغانستان کې د هغو جرمونو ادعاوې وڅیړي چې د ۱۳۸۲ لمریز کال له ثور میاشتې وروسته ترسره شوي دي.

کابل کې د ۳ چاودنو وژل شوي کسان په ډله ییز ډول خاورو ته وسپارل شول

ارشیف، عکس تزئینی دی

کابل کې د پرونیو (شنبه-د غويي ۱۸مه) درېیو چاودنو وژل شوي کسان نن (یکشنبه-د غويي ۱۹مه) په ډله ییز ډول خاورو ته وسپارل شول.

یوه چاودنه د موټر بم وه، خو د دوو نورو څرنګوالی تراوسه په رسمي ډول نه دی اعلان شوی.

د کورنیو چارو وزارت ویاند طارق ارین ازادي راډيو ته وویل، چاودنو کې څه باندې پنځوس تنه وژل شوي دي:" ​وروستۍ شمېرې ښیې چې څه باندې ۵۰ وژل شوي او تر ۱۰۰ ډېر نور ټپیان دي. ښایې دا شمېرې هم بدلې شي، ځکه تر شپې ناوخته پورې مړي او ټپیان انتقالېدل. دا د طالبانو لوی جنایت او نه بښونکی عمل دی."

خو طالبانو په دې پېښه کې لاس لرل رد کړي دي او اسلامي دولت نومې ډلې داعش یې مسولیت منلی دی.

تر دې برید وروسته د افغانستان ولسمشر محمد اشرف غني له امنیتي او دفاعي ځواکونو وغوښتل چې د طالبانو پر وړاندۍ لا جدي اقدامات وکړي.

مالدارانو سره د مرستې لپاره د کرنې وزارت ۲ بنسټونو سره هوکړه کوي

ارشیف، عکس تزئیني بڼه لري

ټاکل شوې، نن یکشنبه(د غويي ۱۹مه) د کرونا وبا له امله زیانمنو مالدارانو سره د مرستې په موخه د کرنې وزارت، د هالنډ کمېټې او د ملګرو ملتونو د خوړو او کرنې ادارې 'FAO' ترمنځ هوکړه لیک لاسلیک شي.

د کرنې، اوبو لګولو او مالدارۍ وزارت ویاند اکبر رستمي نن یکشنبه (د غويي ۱۹مه) ازادي راډیو ته وویل چې د دغې پروژې ټولیز لګښت ۱۵۴ میلیونه افغانۍ ده: "له دغه هوکړې هدف له زیانمنونو مالدارنو په ځانګړي توګه کوچي مالدارنو سره چې د کرونا ویروس له امله زيانمن شوي تخنیکي مرسته کول دي او دغه شان د هغو لوازمو چې اړتیا يې وي، څو د دوی اقتصادي وضعیت ورسره ښه شي."

ښاغلی رستمي زیاتوي، ټاکل شوې دغه پروژه راتلونکو څو میاشتو کې د ملګروملتونو د خوړو او کرنې ادارې او هالنډ کمېټه له لوري د کرنې وزارت په تخنیکي همکارۍ پلې شي.

دا په داسې حال کې ده چې له تېر یوه کال راهیسې د افغانستان د نورو سکتورنو په شان کرونا وبا د افغانستان مالدارۍ سکتور هم زیانمن کړی دی.

د صنعت او سوداګرۍ وزارت د کورنیو تولیدي صنایعو نندارتون جوړوي

ارشیف، عکس تزئیني بڼه لري

د افغانستان د صنعت او سوداګرۍ وزارت وايي، د صنعت اوونۍ او پانګونې راجلبولو په مناسبت د کورنیو تولیدي صنایعو ځانګړی نندارتون جوړوي.

د دغه وزارت وياند فواد احمدي نن یکشنبه (د غويي ۱۹مه) ازادي راډيو ته وویل چې دغه نندارتون به د روانې غويي میاشتې په ۲۹مه نېټه په 'کابل نندارې' کې جوړ او درې ورځې به دوام وکړي.

احمدي وايي: "له دغه نندارتونه هدف د افغانستان د په ځان بسیاینې پر لور ګام اخیستل او کورنیو صنایعو ته د هېوادوالو هڅول دي."

ښاغلي احمدي زیاتوي په یاد نندارتون کې به په ۲۰۰ ځانګړو غرفو کې د صنعتي شرکتونو تولید شوي محصولات نندارې ته کېښودل شي.

د صنعت اوسوداګرۍ وزارت وايي چې د ۴۸قلمه تولیدي صنایعو څخه افغانستان ۴۸ کې په ځان بسیا شوي او ۱۲ قلمه نورو کې په ځان بسیاینې لور ته نږدې شوي دي.

ارزګان والي: ترینکوټ کې یوه نفوذې بریدګر خپل ۴ پولیس ملګري ووژل

د ارزګان والي محمد عمر شېرزاد

د ارزګان والي په ترینکوټ ښار کې په یوه نفوذې برید کې د څلورو پولیسو د وژل کېدو خبر ورکړی.

محمد عمر شېرزاد تېره شپه ناوخته ازادي راډیو ته وویل: "تېره شپه د کمر بند په یوې پوسته کې یو نفوذي کس خپل ۴ ملګري ووژل، دی بیا د درېیو کسانو له مقاومت سره مخ شو او تر هغه وروسته په تېښته بریالی شو."

ښاغلی شېرزاد زیاتوي چې یاد کس تر تېښتې وروسته بېرته د افغان ځواکونو په هوایي بریدونو کې له خپلو نورو طالب ملګرو سره یوځای ووژل شو.

بل خوا د ارزګان د ولایتي شورا مرستیال محمد کریم موسی زوی ازادي راډیو ته وویل چې طالبانو د تېرې شپې په نفوذي برید کې ۱۰ پولیس وژلي او ۶ نور یې له ځانه سره بیولي دي.

طالبانو تر اوسه په دې اړه رسنیو ته څه نه دي ویلي.

دشت برچي کې چاودنې؛ کورنیو چارو وزارت: د وژلو شویو شمېر له ۵۰ واوښت

د کابل د دشت برچي پېښه

د افغانستان د کورنیو چارو وزارت منلې چې د کابل په دشت برچي سیمه کې د پرونۍ چاودنې د قربانیانو شمېر څه باندې پنځوسو تنو ته رسیدلی.

د دغه وزارت ویاند طارق ارین نن یکشنبه (د غويي ۱۹مه) ازادي راډیو ته وویل چې دا برید طالبانو کړی دی: "وروستۍ شمېرې ښیې چې څه باندې ۵۰ وژل شوي او تر ۱۰۰ ډېر نور ټپیان دي. ښایې دا شمېرې هم بدلې شي، ځکه تر شپې ناوخته پورې مړي او ټپیان انتقالېدل. دا د طالبانو لوی جنایت او نه بښونکی عمل دی."

خو طالبانو په دې پېښه کې لاس لرل رد کړي دي.

تر دې برید وروسته د افغانستان ولسمشر محمد اشرف غني له امنیتي او دفاعي ځواکونو وغوښتل چې د طالبانو پر وړاندې لا جدي اقدامات وکړي.

ولسمشر غني په یوه اعلامیه کې طالبان د پرونې برید مسوول وبلل.

دا برید چې د سید الشهدا په نامه د نجونو یوه ښونځي ته څېرمه شوې، د بېلابېلو هېوادونو او بنسټونو له خوا په سختو الفاظو وغندل شو.

لوګر چارواکي: ماین چاودنې ۴ پاڅونوال وژلي

آرشیف، د لوګر مرکزپل علم

د لوګر امنیه قومانداني وايي، په محمداغې ولسوالۍ کې د ماین چاودنې څلور ولسي پاڅونوال ووژل.

د لوګر د امنیې قوماندانۍ ویاند، ګل حیدر احمدي ازادي راډیو ته وویل چې چاودنه پرون شنبه(د غويي ۱۸مه) ماسپښین د پاڅونوالو پر موټر شوې ده.

د ده په وینا په وژل شویو کې د ولسي پاڅونوالو مرستیال مشر هم شامل دی.

تر اوسه د دې چاودنې مسوولیت چا نه دی منلی.

بل خوا د میدان وردګ د ولایتي شورا مرستیال شریف الله هوتک ازادي راډیو ته وویل چې په چک ولسوالۍ کې موټربم چاودنې د ملي اردو ۱۲ سرتېري وژلي دي.

د دغه ولایت امنیتي چارواکو په دې اړه څرګندونې نه دي کړي.

غني امنیتي او دفاعي ځواکونو ته: د طالبانو پر وړاندې لا جدي اقدام وکړئ

ولسمشر محمد اشرف غني

ولسمشر محمد اشرف غني امنیتي او دفاعي ځواکونو ته سپارښتنه وکړه، د طالبانو په وړاندې لا جدي اقدام وکړي.

د کابل په دیارلسمه امنیتي حوزه کې د سیدالشهدا په نوم د نجونو ښوونځي ته څېرمه تر پرونیو چاودنو وروسته ولسمشر محمد اشرف غني په یوه اعلامیه دا د طالبانو کار وباله.

د جمهوري ریاست د اعلامیې له مخې ولسمشر غني امنیتي او دفاعي ځواکونو ته سپارښتنه وکړه، څو د طالبانو بشري جنایتونه، چې هره ورځ بېګناه خلک قرباني کوي، بې ځوابه پرې نه نږدې.

د کورنیو چارو وزارت ویاند طارق ارین تېره شپه رسنیو ته وویل: "له بده مرغه دا یو لوی او نه بښل کېدونکی جنایت دی. زموږ تخنیکي ټیمونه کار کوي چې د چاودنې څرنګوالی معلوم کړي. هغه ورته والی چې له تېرو چاودنو سره ښکاري، زموږ پرتله څرګندوي چې طالبان مسوول دي."

وسله والو طالبانو په پرونیو چاودنو کې خپل دخالت رد کړی دی.

دفاع وزارت: تېرو څو ورځو کې زر طالبان وژل شوي او ټپیان دي

د افغانستان د دفاع سرپرست وزیر جنرال یاسین ضیا

د افغانستان د دفاع سرپرست وزیر وايي، په ټول هېواد کې د تېرو څو ورځو په جګړو کې نژدې زر تنه طالبان مړه او ټپیان شوي دي.

جنرال یاسین ضیا نن شنبه (د غويي ۱۸مه) په کابل کې یوې خبري غونډې ته وویل چې په وژل شوېو کې د طالبانو مشران هم شامل دي: "د دښمن نژدې زر تنه مړه او ټپیان شوي دي. په دې ډله کې د طالبانو یو شمېر مهم رهبران هم وژل شوي دي."

جنرال ضیا زیاته کړه چې تازه جګړې په کندهار، هلمند، غزني، بغلان، فراه او هرات ولایتونو کې شوې دي.

ښاغلي ضیا وویل دې جګړو کې افغان امنیتي دفاعي ځواکونو ته هم تلفات اوښتي خو ده یې شمېر ونه ښود.

د طالبانو ویاند ذبیح الله مجاهد دا ادعا رد کړه او ویې ویل چې دا تشې ادعاوې دي.

نور راوښيه

XS
SM
MD
LG