په پام کې ده د نجونو د فوټبال غوره لیګ سیالیو په لړ کې نن هم په کابل کې دوه ټیمونه سره مخامخ شي.
د افغانستان د فوټبال فدراسیون ویاند فېروز مشعوف په دې اړه پرون ازادي راډیو ته وویل: "نن [یکشنبه] د اینده جوړوونکو او د کابل ځوانانو د نجونو لوبډلو ترمنځ مسابقه کېږي. دا د لومړۍ اوونۍ درېیمه مسابقه ده. پرون د نجونو شریفي سپورټ لوبډلې د افغان کلب په وړاندې شپږ د صفر په وړاندې بریا خپله کړه او لومړني درې امتیازونهیې ترلاسه کړل."
د نجونو د فوټبال غوره لیګ مسابقې د پنجشنبې په ورځ په کابل کې پیل شوې.
د بلخ ولایت په مرکز مزار شریف کې د افغانستان د فوټبال اتلانو د لیګ دوهم پړاو مسابقه روانه ده.
په پرونۍ مسابقه کې د سرپل اف. سي خدیم لوبډلې دوه د یو په وړاندې د فاریاب خراسان لوبډلې ته ماتې ورکړه.
نن به د کندز واحدي ځوانان او د تخار موج ساحل لوبډلې سره مخامخ شي.