د لاسرسۍ وړ لېنکونه

تازه خبر
سه شنبه ۳۱ وری ۱۴۰۰ کابل ۰۶:۵۱

نړۍ

ترکیې او ایران د یو بل سفیران ور احضار کړي

د ایران او ترکیې ګډ بیرغونه

ترکیې او ایران د یو بل سفیران ور احضار کړي دي.

د ترکیې دولتي اژانس راپور ورکړی چې د بهرنیو چارو وزیر مولود چاوش اغلو د ایران سفیر محمد فرازمند ور غوښتی او له هغه یې غوښتي چې له ترهګرۍ سره په مبارزه کې د ترکيې تر څنګ ودریږي.

هاخوا ایران هم د ترکیې سفیر ور غوښتی او خپل اعتراض یې د ترکي چارواکو د هغو څرګندونو په غبرګون ور اورولی چې ویلي یې و زرګونه د 'پي.کې.کې' د کردانو کارګر ګوند غړي په ایران کې حضور لري.

دا ګوند د ترکیې له خوا یو ترهګر ګوند بلل شوی چې وخت پر وخت یې په عراق او سیمه کې پر سنګرونو عملیات هم ورته کوي.

د دغه ډیپلوماټیک جنجال یوه بل عامل هم په عراق کې د ایران او ترکیې د سفیرانو تر منځ شخړه ده.

د ایران سفیر ایرج مسجدي د عراق له یوه کُرد ژبي ټلوېزیون سره په مرکه کې ویلي و چې ایران په عراق باندې د ترکیې د بریدونو خلاف دی.

د مسجدي د دغو خبرو په غبرګون د ترکیې سفیر فاتح یلدیز په ټوېټر لیکلي: "فکر کوي وروستی کس چې د عراق پولو ته د درناوي درس ورکوي د ایران سفیر به وي."

د ورځې تازه خبرونه دلته ولولئ

له پاکستانه د فرانسې د سفیر د ایستلو موضوع پارلمان ته وړاندې شوه

د پاکستان پارلمان

د پاکستان د کورنیو چارو وزیر وایي، د فرانسې پرضد د اسلامپالو د خونړیو مظاهرو وروسته به حکومت له دې هېواده د فرانسې د سفیر د ایستلو موضوع پارلمان ته وړاندې کړې چې په دې اړه رایې واخلي.

شیخ رشید احمد په یوې ثبت شوې ویډیو کې چې نن سې شنبه (د وري ۳۱مه) خپره شوې دغه خبره کړې او ویلي یې دي، د پاکستان د تحریک طالبان لبیک له ډلې سره تر اوږدو خبرو دې پرېکړې ته رسیدلي چې حکومت به په دې اړه یوه مسوده پارلمان ته وړاندې کړي.

له پاکستانه د فرانسې د سفیر ایستل د پاکستان د تحریک لبیک د ډلې یوه غوښتنه ده.

دې سخت دریځې ډلې له څو ورځو راهیسې فرانسه کې د هغو کاریکاتورونو د خپریدو په وړاندې چې حضرت محمد ته سپکاوی بلل شوی، مظاهرې کړې دي.

تحریک لبیک ډلې د پاکستان له خاورې د فرانسې د سفیر د ایستلو د غوښتنې لپاره حکومت ته د اپریل شلمه چې نن ده، وروستی ضرب الاجل ټاکلی.

د پاکستان د کورنیو چارو د وزیر تر دې څرګندونو وروسته د تحریک لبیک ډلې ویاند شفیق امیني نن په یوه صوتي پیغام کې ویلي چې له خپلو پلویانو یې غوښتي چې په ټول هېواد کې مظاهرې پای ته ورسوي.

د امریکا یو پخوانی مرستیال ولسمشر والټر اېف موندېل مړ شو

د امریکا یو پخوانی مرستیال ولسمشر والټر اېف موندېل

د امریکا یو پخوانی مرستیال ولسمشر والټر اېف موندېل پرون د اپرېل په ۱۹مه د ۹۳ کلونو په عمر مړ شو.

د نوموړي د کورنۍ غړو د هغه د مړینې د علت په اړه څه نه دي ویلي.

موندېل د ۱۹۷۷- ۱۹۸۱ کلونو ترمنځ د جېمي کارتر د مرستیال، سناتور، سفیر او د میناسوټا ایالت د لوی څارنوال په توګه کار کړی دی. هغه چې یو مخکښ لېبرال دیموکرات و، پرون په مینیا پولیس ښار کې په خپل کور کې سا ورکړه.

موندېل د ۱۹۸۴ کال د ولسمشرۍ په انتخاباتو کې د رونالډ رېګان پر وړاندې چې خورا زیات محبوبیت یې درلود، ماتې وخوړه.

د روسیې سره د چک لانجه؛ اروپايي ټولنه د چک جمهوریت تر څنګ درېږي

په چک جمهوریت پراګ کې د روسیې سفارت

اروپايي ټولنې ډاډ ورکړی چې له روسیې سره په ډيپلوماتیکه لانجه کې به د چک جمهوریت تر څنګ ودرېږي او پوره ملاتړ به یې وکړي.

دا لانجه د چک له هغې ادعا وروسته رامنځته شوه چې ویې ویل، د دې هېواد د وسلو په یوه ډیپو کې په بمي چاودنه کې د روسیې د هغو پوځي ایجنټانو لاس درلود چې په بریتانیا کې د روسیې د استخباراتو د یو پخواني اېجنټ د مسمومولو په قضیه کې ښکېل و.

د پراګ او مسکو ترمنځ د دې ډیپلوماتیکې لانجې په نتیجه کې روسیې په مسکو کې د چک د سفارت شلو کار کوونکو ته له دې هېواده د وتلو امر وکړ او له هغه مخکې د چک حکومت اتلس روسي ډيپلوماتان په دې تور له دې هېواده وایستل چې ګنې د روسیې استخباراتي فعالان دي.

دواړو هېوادونو پرون خپل ډیپلوماتان او د هغو د کورنۍ غړي په دولتي الوتکو کې کورونو ته ستانه کړل.

پرون د اپرېل په ۱۹مه د دې لانجې په اړه د اروپايي ټولنې د بهرنیو چارو د وزیرانو له خبرو وروسته د دې ټولنې د بهرنۍ پالیسۍ د مشر جوزیپ بورېل ویاند وویل، اروپايي ټولنه په اروپا کې د روسیې د پرله پسې خطرناک او خصمانه چلند له کبله اندېښنه لري.

الکسي ناوالنۍ روغتون ته انتقال شوی

د روسیي د اپوزیسیون زنداني مشر الکسي ناوالنۍ

د روسیي د اپوزیسیون زنداني مشر الکسي ناوالنۍ روغتون ته انتقال شوی دی.

دا خبره د الکسي ناوالنۍ وکیل او د روسیې د زندانونو ادارې دوشنبه(د وري ۳۰مه) اعلان کړه.

د روسیې د زندانونو ادارې په یوه اعلامیه کې ویلي چې ناوالنۍ د زندان روغتون ته انتقال شوی او وضعه یې ښه ده.

اعلامیې زیاته کړې چې د ناوالنۍ په خوښه هغه ته ویټامینونه ورکول کېږي.

ناوالنۍ له شلو ورځو د ډوډۍ له خوړلو ډډه کړې ده.

له زندانه د ناوالنۍ د خوشې کېدو لپاره پر کریملین د مخ په زیاتیدونکو فشارونو په لړکې د هغه پلویانو پراخې مظاهرې را بللې دي.

ناوالنۍ د جنوري له میاشتې راهیسې له کله چې له جرمني بېرته روسیې ته ستون شوی، نیول شوی او مسکو ته نژدې په یوه زندان کې ساتل کېږي.

اروپايي ټولنه: روسي پوځيان اوکراین سره پر پوله ځای پرځای شوي

ارشیف

اروپايي ټولنې ویلي، یو نیم لک روسي پوځيان د اوکراین د پولو په اوږدو کې ځای پر ځای شوي دي.

د اروپايي ټولنې د بهرني سیاست مشر جوزېپ بورېل دوشنبه (د وري ۳۰مه) په یوه کنفرانس کې ویلي، د عسکرو دومره لوړ شمېر د اندېښنې وړ دی او هره شېبه ممکنه ده چې یوه وړه لانجه یوه جګړه رامنځته کړي.

بورېل زیاته کړه چې روسیې له اوکراین سره پر پوله خپل پوځي حضور په بې ساري ډول پراخ کړی دی: "دا لومړی ځل دی چې د اوکراین سرحد ته دومره ډېر روسي پوځیان استول کېږي. دا د اندېښنې وړ ده چې دومره زیات سرتېري هلته ځای پرځای کېږي. ځکه چې دلته یا هلته یو اور بلېدلای شي."

روسیې داسې وخت له اوکراین سره پر پوله یو نیم لک سرتېري ځای پر ځای کړي چې اوس اوس د اوکراین په ختیځ کې د تازه نښتو راپورونه ورکړل شوي.

د اوکرایني عسکرو او روس پلوو بېلتونپالو تر منځ په اووه کلنه جګړه کې له ۱۴ زرو زیات کسان ووژل شول.

ناسا: مریخ ته استول شوې هلیکوپټره به نن پر دې سیارې الوتنه وکړي

مریخ ته د استول شوې هلیکوپټرې الوتنه

د امریکا د فضایي څېړنو اداره ناسا هیله‌منه ده چې نن به هغه هلیکوپټره د مریخ پر سیارې الوتنه وکړي او په تاریخ کې به ثبت شي چې دې سیارې ته‌یې له یوې ګرځنده وسیلې یا روبوټ سره یوځای استولې.

د انجینوټي په نوم دغه هلیکوپټره به چې ۱،۸ کیلوګرامه وزن لري، په شپږو ثانیو کې د مریخ له سطحې درې متره لوړه او له ۳۰ ثانیو پرواز وروسته بېرته راکوزه شي.

د ناسا چارواکو ویلي، دغه هلیکوپټر د علمي څېړنو له هدفونو سره مرسته نه‌کوي، بلکې یوازې یې ټکنالوژي ازمویل کېږي، خو چارواکي هیله‌من دي چې دغه هلیکوپټره به د راتلونکو الوتنو لپاره لاره پرانیزي او هغو ځایونو ته چې نورې ګرځنده وسیلې یا ربوټونه نه‌شي تللی، په سرعت په الوتنو سره د فضایي څېړنو په برخه کې یو انقلاب رامنځته کړي.

چینای سوپر کېنګز کرکټ لوبډله د راجستان رایلز پر وړاندې ۱۲مه لوبه کوي

ارشیف، د هندوستان سوداګریزو لوبو یوه سیالۍ

د هندوستان سوداګریزو لوبو په دوام نن د دوشنبې په ورځ چینای سوپر کېنګز د راجستان رایلز پر وړاندې ۱۲مه لوبه کوي.

د یکشنبې ورځې په لوبه کې بنګلور د کلکته نايټ رايډرز لوبډلې ته ماتې ورکړه او درېیمه بریا یې خپله کړه.

په دې لوبه کې بنګلور پچه وګټله او لومړى يې توپوهنه غوره کړه.

بنګلور په ټاکلو ٢٠ اورونو کې د ۴ لوبغاړو په سوځېدو ۲۰۴ منډې وکړې.

په مقابل کې د کلکته نايټ رايډرز لوبډله ونه‌توانېده چې هدف پوره کړي.

یادې لوبډلې په ټاکلو ٢٠ اورونو کې د ٨ لوبغاړو په سوځېدو ۱۶۶ منډې وکړې او د ٣٨ منډو په توپير يې ماتې وخوړه.

د اروپایي ټولنې د بهرنیو چارو وزیران پر روسیې د چک د تور په اړه بحث کوي

پراګ کې د روسیې سفارت مخ ته د راټول شویو مسکو پلویو معترضینو له ډلې د یوې په لاس کې د اروپايي ټولنې بیرغ

ټاکل شوې چې د اروپایي ټولنې د بهرنیو چارو وزیران نن په غونډه کې د چک جمهوریت د هغې ادعا په اړه بحث وکړي چې د روسیې پوځي جاسوسان‌یې څو کاله مخکې د مهماتو د یوه زېرمتون په چاودنه کې په لاس لرلو تورن کړي دي.

په دې چاودنه کې چې په ۲۰۱۴ کال د چک په ختیځه د زلین سیمې په وربیتیڅه کې شوې وه، دوه تنه ووژل شول.

د چک جمهوریت هغه روسي پوځي جاسوسان په دې چاودنه کې په لاس لرلو تورن کړي چې په ۲۰۱۸ کال په بریتانیا کې د روسیې د پخواني جاسوس سرګي سکریپال او د هغه لور د مسموم کېدو په پېښه کې په لاس لرلو تورن شوي دي.

وروسته له هغې چې د چک جمهوریت استخباراتو د روسیې پوځي جاسوسان په دې چاودنه کې په لاس لرلو تورن کړل او ۱۸ روسي ډیپلوماتان‌یې د جاسوسۍ په تور له خپلې خاورې وایستل، مسکو په ورته اقدام کې د دې هېواد ۲۰ ډیپلوماتان له خپلې خاورې وایستل.

د روسیې د بهرنیو چارو وزارت پرون وویل، چکي ډیپلوماتانو ته‌یې ویلي چې د دوشنبې د ورځې تر پایه له روسیې ووځي.

د دواړو هېوادونو ترمنځ دغه کړکېچ داسې مهال زیات شوی چې په پام کې ده د اروپایي ټولنې لوړپوړي ډیپلوماتان نن په غونډه کې په دې چاودنه کې د روسیې د لاس لرلو د ادعاوو په اړه بحث وکړي. هغه ادعا چې مسکو بې‌اساسه او هغه‌یې پر پراګ د واشنګټن د نفوذ نښه بللې ده.

د چک جمهوريت صدراعظم اندرې بابیش وویل، له خپلې خاورې د روسي ډیپلوماتانو د ایستلو پرېکړه‌یې د هغو کره شواهدو پر اساس کړې چې د چک د استخباراتو او امنیتي ادارو پلټونکو وړاندې کړې دي.

اوکراین، روسیه، فرانسه او جرمني د یوې احتمالي غونډې تګلاره جوړوي

ارشیف، پاریس کې د فرانسې ولسمشر امانوئل مکرون (ښی) او د اوکراین ولسمشر ولادیمیر زلنسکي غونډه

د اوکراین، روسیې، فرانسې او جرمني د مشرانو لوړپوړي سلاکاران نن سره ټولېږي چې د یوې احتمالي غونډې تګلاره جوړه کړي.

دا غونډه د اوکراین ختیځ کې د کړکېچ د کمولو په هدف جوړېږي.

د سلا مشورو تر کچې نننۍ راټولېدنه له هغه وروسته ترسره کېږي چې تېره اوونۍ د اوکراین، فرانسې او جرمني مشرانو له روسیې وغوښتل چې د اوکراین پولې ته نږدې د سرتېرو حضور بېرته کم کړي.

د اوکراین په ختیځ کې د حکومتي ځواکونو او روسي پلوه بېلتون غوښتونکو ترمنځ د تېر اوړي نازک اوربند هم وروستیو اوونیو کې مات شوی.

دغې سیمه کې د روان میلادي کال له پيله تر اوسه لږ تر لږه ۳۰ اوکرایني سرتېري وژل شوي دي.

د پاکستاني پولیسو او د تحریک لبیک ډلې پلویانو نښتو کې ۳ تنه ووژل شول

د پاکستان د تحریک لبیک سخت دریځې ډلې پلویانو اعتراض

پاکستاني چارواکي د پولیسو او د یوې اسلامي ډلې د پلویانو ترمنځ په تازه نښتو کې د لږترلږه درې تنو د وژل کېدو خبر ورکوي.

د پاکستان د تحریک لبیک سخت دریځې ډلې چې په دې هېواد کې یې پر فعالیت بندیز لګول شوی، پلویان له څو ورځو راهیسې مظاهرې کوي او د پاکستان له حکومته غواړي چې د هغو کاریکاتورونو په خاطر دې چې تېر کال په فرانسه کې خپاره شوي او هغه حضرت محمد ته سپکاوی بلل شوی، د فرانسې سفیر دې له دې هېواده وباسي.

د لاهور ښار د پولیسو ویاند رانا عارف وویل، پرون یکشنبه د تحریک لبیک پلویانو په دې ښار کې د پولیسو پر مأموریت برید وکړ، د امنیتي پرسونل شپږ غړي یې برمته کړل. هغه زیاته کړه چې په دغو نښتو کې د ۱۱ پولیسو په ګډون ۲۰ تنه ټپیان شول.

دغې سخت دریځې ډلې بل سبا د اپرېل ۲۰مه حکومت ته وروستی مهلت ټاکلی چې د فرانسې سفیر له دې هېواده وباسي.

د اپرېل په ۱۵مه په اسلام‌اباد کې د فرانسې سفارت په وړاندې مظاهرو په لړ کې د دوو پولیسو په ګډون لږترلږه پنځه تنه وژل شوي و.

بغداد کې د امریکایي پوځي ټېکه‌دارانو پر یوې اډې توغندي ویشتل شوي

ارشیف، عراق کې د امریکايي پوځیانو پر یوې اډې د لګېدلو راکټونو سیمه

د عراق امنیتي چارواکي وایي، د پلازمېنې بغداد په شمال کې پر هغې هوایي اډې چې امریکایي پوځي ټېکه‌داران په‌کې اوسي، پرون څو توغندي ویشتل شوي دي.

چارواکو وویل، په دغو راکټي بریدونو کې د عراق د امنیتي ځواکونو دوه غړي ټپیان شوي دي.

دا په عراق کې د هغو بریدونو وروستۍ بېلګه ده چې په دې وروستیو اوونیو کې پر هغو تأسیساتو چې امریکایان ورڅخه ډېر کار اخلي، زیات شوي.

د دغو بریدونو مسؤلیت تر اوسه چا یا کومې ډلې نه‌دی اخیستی، خو امریکایي چارواکي په عراق کې د ایران ملاتړې ملېشې تورنوي چې د ځواکونو، په بغداد کې د امریکا سفارت او هغو کاروانونو په ګډون چې بهرنیو ځواکونو ته اکمالات کوي په دې هېواد کې د امریکا پر ګټو په منظم ډول د توغندیو بریدونه کوي.

په تېره مارچ میاشت کې د عراق په لوېدیځ کې د امریکا په مشرۍ د ائتلافي ځواکونو او ټېکه‌دارانو پر یوې اډې ۱۰ توغندي ولګېدل چې یو ټېکه‌دار په‌کې ووژل شو.

له ایران سره تړلې ملېشه ډلو له عراقه د ټولو امریکایي ځواکونو چې شمېر یې دوه‌نیم زرو ته رسېږي، د وتلو غوښتنه کړې او د هغوی حضور یې د عراق اشغال بللی دی.

مسکو ته د واشنګټن خبرداری: که الکسي ناوالنۍ ومري، نو ناوړه نتیجې به ولري

د کرملېن سرسخت منتقد الکسي ناوالنۍ

واشنګټن خبرداری ورکړی چې که په زندان کې د کرملېن سرسخت منتقد الکسي ناوالنۍ ومري، نو ناوړه نتیجې به ولري.

ناوالنۍ چې د ډوډۍ نه‌خوړولو اعتصاب کړی، د ډاکترانو یوې ډلې یې روغتیایي وضعیت خطرناک بللی دی.

له زندانه د ناوالنۍ د خوشې کېدو لپاره پر کرملېن د مخ په زیاتېدونکو فشارونو په لړ کې د هغه پلویانو پراخې مظاهرې رابللې دي.

روسي چارواکو تر اوسه له دې ډډه کړې چې یوه خپلواک ډاکتر ته اجازه ورکړي چې ۴۴ کلن ناوالنۍ له نږدې معاینه کړي.

د امریکا د ملي امنیت سلاکار جک سولیوان پرون یکشنبه له سي‌اېن‌اېن ټلوېزیون سره په مرکه کې وویل، د روسیې حکومت ته‌یې ویلي هر هغه څه چې له ناوالنۍ سره پېښېږي، د نړیوالې ټولنې له‌خوا به‌یې مسؤل دوی وي ځکه نوموړی د دوی په زندان کې دی.

هغه زیاته کړه دا چې دوی به څه ډول اقدام کوي اوس په ښکاره په دې اړه څه نه‌شي ویلی، خو دا یې د روسیې حکومت ته واضح کړې چې که په ښاغلي ناوالنۍ څه وشي نو ناوړه عواقب به ولري.

ناوالنۍ د جنوري له میاشتې راهیسې له کله چې له جرمني بېرته روسیې ته ستون شوی، نیول شوی او مسکو ته نږدې په یوه زندان کې ساتل کېږي.

نړۍ کې د کرونا له کبله د مړه شويو کسانو شمېر له درې ملیونو واوښت

ارشیف، برازیل کې د کرونا ویروس له امله د مړه شویو کسانو قبرونه

د نړۍ په کچه د هغو کسانو شمېر له درېیو ملیونو واوښت چې د کرونا له کبله مړه شوي دي.

دا په داسې حال کې ده چې دا مهال په برازیل، هند او فرانسه کې د کرونا څپه ګړندۍ ده او مسؤلین‌یې د کابو کولو هڅه کوي.

د امریکا د جانز هاپکنز پوهنتون د شمېرو له مخې تېره اوونۍ په اوسط ډول هره ورځ د نړۍ په کچه ۱۲ زره کسان په کرونا مړه شوي دي.

د روغتیا نړیوال سازمان ویلي، دا داسې وضعیت نه‌دی چې د وبا له پيل ۱۶ میاشتې وروسته‌یې دوی وړاندوینه کړې وه.

په اکثرو هېوادونو کې لا هم د ویروس د مخنیوي محدودیتونه پر خپل ځای دي.

د بلاروس مشر: د امریکا په ملاتړ د ترور د یوې طرحې هدف وم

د بلاروس مشر الکساندر لوکاشینکا

د بلاروس مشر الکساندر لوکاشینکا ادعا کړې چې دی د امریکا په ملاتړ د ترور د یوې طرحې هدف و.

لوکاشینکا پرون (د اپرېل په ۱۷مه) په دې اړه د خبرو پر مهال ډېر جزئیات ورنه‌کړل، خو ویې‌ویل، دی او ماشومان‌یې د دې ترور هدف و.

امریکایي چارواکو هم سملاسي په دې تړاو څه نه‌دي ویلي.

د بلاروس د اصلي امنیتي ادارې (کې.جي.بي) مشر تېر اوړي کې د یوې انلاین غونډې پر مهال چې د دغه هېواد له کارپوهانو او د قانون حاکمیت له چارواکو سره‌یې درلوده، د دې طرحې یادونه کړې ده.

د روسیې د کورني امنیت ادارې ویلي، وروستیو ورځو کې یې مسکو کې دوه تنه بلاروسیان توقیف کړي چې د ترور همدې طرحه کې په لاس لرلو تورن دي.

لوکاشینکا چې له شاوخوا درې لسیزو راهیسې پر بلاروس واکمن دی له دې وړاندې هم داسې ادعاوې کړي چې لوېدیځ هېوادونه‌یې د پرځولو په هڅه کې دي.

چک جمهوریت له خپلې خاورې د ۱۸ روسي ډیپلوماتانو د ایستلو برېکړه وکړه

د چک جمهوریت د کورنیو چارو وزیر یان هاما چیک

چک جمهوریت له خپلې خاورې د ۱۸ روسي ډیپلوماتانو د ایستلو اعلان وکړ.

دا پرېکړه وروسته له هغه شوې چې د چک جمهوریت چارواکو روسان په جاسوسۍ او په ۲۰۱۴ کال کې د پلازمېنې پراګ جنوب ختیځ ته په زلین ښار کې د مهماتو په یوې زېرمه کې په یوه چاودنه کې په لاس درلودلو تورن کړل. روسیې په یادې پېښه کې لاس لرل رد کړي دي.

په هغې چاودنه کې دوه تنه وژل شوي وو.

د چک جمهوریت د کورنیو چارو وزیر یان هاما چیک چې د دې هېواد د بهرنیو چارو سرپرستي هم کوي، پرون په پراګ کې یوې خبري غونډې ته وویل: "د چک د بهرنیو چارو وزیر په توګه ما پرېکړه وکړه چې په پراګ کې د روسیې د سفارت ټول هغه کارکوونکي وباسم چې زموږ د استخباراتي ادارې له‌خوا په ښکاره د روسیې د استخباراتي ادارې افسران پېژندل شوي دي. د روسیې د سفارت ټول ۱۸ غړي دې په ۴۸ ساعتونو کې له چک جمهوریت څخه ووځي."

مسکو د خپلو ډیپلوماتانو د ایستلو د عواقبو په اړه خبرداری ورکړی دی.

نور راوښيه

XS
SM
MD
LG