د لاسرسۍ وړ لېنکونه

تازه خبر
پنجشنبه ۲۶ وری ۱۴۰۰ کابل ۰۷:۰۴

چین وايي شدیده بې‌وزلي یې بشپړه پای ته رسولې


په چین کې یو تورېست له یوه تلېسکوبه د بیجېنګ ښار د لیدو پر مهال.

د چین ولسمشر شي جین پېنګ د شدیدې بې‌وزلۍ پر ختمولو د خپل هېواد د "بشپړ بري" ادعا کړې او اعلان‌یې کړی چې په دې برخه کې یې "بشري معجزه " کړې.

خو د هغو معیارونو په اړه پوښتنې شته چې د چین کمونېست رژیم‌یې د دې ادعا لپاره لري.

په بیجېنګ کې نن (پنجشنبه) په یو لړ مراسمو کې د چین ولسمشر شي پر دې اعلان سربېره د کلیوالي ټولنو چارواکو ته جایزې ورکړې او ژمنه‌یې وکړه چې د نورې مخ په پراختیا هېوادونو سره به د "چین دا بېلګه" شریکه کړي.

شي جین پېنګ وویل "هېڅ بل هېواد په دومره کم وخت کې سلګونه ملیونه کسان له بې‌وزلۍ نه‌شي ایستلی " د نوموړي په وینا دا یوه "بشري معجزه" ده چې په تاریخ کې به پاتې شي.

د چین ولسمشر په ۲۰۱۵ م کال کې ژمنه کړې وه چې تر ۲۰۲۰ میلادي کال پورې به دې هېواد کې شدیده بې‌وزلي له‌منځه یوسي. دا د چین د کمونېست ګوند د هغه پلان په ترڅ کې تر ټولو مهم هدف و چې وايي، غواړي د دې ګوند د بنسټ ایښودلو تر ۱۰۰مې کالیزې چې راتلونکي جولای کې پوره کېږي یو "نسبي بسیا ټولنه " رامنځته کړي.

د چین ولسمشر شي جین پېنګ
د چین ولسمشر شي جین پېنګ

تېر کال بیجېنګ اعلان وکړ چې دوی د خپلې هغې اوږدې مودې موخې ته رسېدلي چې ټول وګړي یې د لږترلږه ۲،۳۰ ډالرو ورځني عاید په لرلو د بې‌وزلۍ له کرښې پورته شي. د عاید دا اندازه د نړیوال بانک د تر ټولو کم معیار څخه چې ۱،۹۰ ډالر دي یو څه پورته دی، خو تر هغې کمه ده چې د ډېرو عوایدو لرونکو هېوادونو ته‌یې سپارښتنه کېږي.

نړیوال بانک وايي، چین د ۱۹۷۰مو کلونو راهیسې وروسته له هغې چې د بازار په برخه کې یې اصلاحاتو ته مخه کړه تر ۸۰۰ ملیونو زیات وګړي له شدیدې بې‌وزلۍ راپورته کړي. تر دې مخکې لسیزو کې د چین د دولت پلانونو د دې کمونېست هېواد اقتصاد ځپلی وو.

د پنجشنبې په ورځ په خپله اوږده وینا کې د چین ولسمشر شي جین پېنګ د چین د سیاسي سیستم ښېګڼې وستایلې او ویې‌ویل بیجېنګ اوس "هغو د پرمختګ په حال کې هېوادونو سره مرسته کوي" چې اوس هم د بې‌وزلۍ سره لاس و ګرېوان دي.

چین د زېربناوو لکه سړکونو او عصري اپارتمانونو د ودانیو د جوړولو لپاره میلیاردونه ډالر ولګول او په دې برخه کې یې خپلو بې‌وزله کلیوالي ټولنو کې مالیاتي هڅونې او سبسایډۍ رامنځته کړې.

چین کې یو شمېر لوړپوړې ودانۍ
چین کې یو شمېر لوړپوړې ودانۍ

د چین ولسمشر نن په بیجېنګ کې وویل چې هېواد یې په تېرو اتو کلونو کې د بې‌وزلۍ د ختمولو سره د مبارزې په برخه کې ۱،۶ ټریلیونه یوَن چې شااوخوا ۲۹۴ میلیارده ډالر کېږي لګولي، خو د راتلونکو پنځه کلونو لپاره د پلان شویو لګښتونو په اړه‌یې شمېرې ورنه‌کړې.

د ازادي راډیو د خبر مرکزي څانګې راپور وايي، دا روښانه ده چې د ۱۹۷۰مو کلونو راهیسې په چین کې د ژوند معیارونه په ډراماتیکه توګه بدل شوي دي، خو د بیجېنګ دا ادعا چې وايي په بشپړه توګه‌یې شدیده بې‌وزلي پای ته رسولې له شکونو سره مخ ده.

منتقدان په دې برخه کې د بې‌وزلۍ لپاره د نسبتاً ټیټې کرښې ټاکل او د بې‌وزلۍ د ختمولو لپاره په بېله شوې بودجه کې د فساد د قضیو ادعاوو ته ګوته نیسي.

دوی په دې اړه هم پوښتنې راپورته کړي چې د بې‌وزلۍ په اړه د چین د حکومت رسمي معلومات خو به د دې لپاره بدل شوي نه‌وي څو د چین د واکمن ګوند د سیاسي اهدافو سره سمون ومومي.

XS
SM
MD
LG