د لاسرسۍ وړ لېنکونه

تازه خبر
پنجشنبه ۷ کب ۱۳۹۹ کابل ۰۶:۴۰

نړۍ

کرونا وبا او د نړۍ د اقتصاد رغول له 'جي-۷' سره د بایډن د خبرو اجنډا ده

د امریکا ولسمشر جو بایډن

سپینه ماڼۍ وایي، د امریکا ولسمشر جو بایډن به د راتلونکې جمعې په ورځ د «جي-۷» هېوادونو له مشرانو سره د کرونا وبا او د نړۍ د اقتصاد په رغولو خبرې وکړي.

سپینې ماڼۍ پرون یکشنبه په یوه خبرپاڼه کې وویل چې ښاغلی بایډن به دغې غونډه کې کرونا وبا ته د نړۍ په کچه د ځواب ورکولو په لارو چارو او د دغې ناروغۍ په وړاندې د واکسین پر وېش خبرې وکړي.

د روغتیا نړیوال سازمان خبرداری ورکړی چې د کرونا واکسین د وېش په برخه کې د شتمنو هېوادونو (لومړی زه) تګلاره بې‌وزله هېوادونه له خطر سره مخامخوي او دغو هېوادونو کې د ویروس پراختیا دوام مومي.

د جي-۷، یا ۷ صنعتي هېوادونو دا غونډه د بریتانیا د صدراعظم بورېس جانسون په کوربه‌توب ترسره کېږي.

د دې سازمان غړي هېوادونه بریتانیا، جرمني، کاناډا، امریکا، فرانسه، ایټالیا او جاپان دي.

تېر کال د دغه سازمان هغه غونډه چې د امریکا په کوربه‌توب ترسره کېده، د کرونا وبا له کبله لغوه شوه.

د ورځې تازه خبرونه دلته ولولئ

جرمني کې یو عراقی ملا د ترهګریز سازمان د ملاتړ په جرم په بند محکوم شو

ارشیف، انځور تزئیني بڼه لري.

د جرمني محکمې یو عراقی ملا چې ویل کېږي دغه هېواد کې د داعش ډلې عملیاتي مشر و، د ترهګریز سازمان د ملاتړ په جرم، په ۱۰ کاله او شپږ میاشتې حبس محکوم کړ.

محکوم شوی کس احمد عبدالعزیز عبدالله عبدالله نومېږي چې په ابووالا مشهور دی.

نوموړی د هغې جهادي شبکې په مشرۍ تورن دی چې اروپا کې ځوانان سخت دریځۍ ته هڅوي او عراق او سوریې ته د هغوی په سفرونو کې مرسته کوي.

محکمې دغه ۳۷ کلن سړی یوه ترهګریز بهرني سازمان کې د غړیتوب، د تاوتریخجنو طرحو له جوړولو سره د مرستې او د ترهګرۍ د تمویل په خاطر مجرم پېژندلی دی.

د سل (Celle) ښار په دې محکمه کې درې کسان نور هم په اته اته کاله بند محکوم شول.

امریکا بېرته د ملګرو ملتونو د بشر حقونو شورا ته ورګرځي

د ملګرو ملتونو د بشر حقونو شورا

د امریکا د بهرنیو چارو وزیر انتوني بلېنکن وایي، هېواد به‌یې بېرته د ملګرو ملتونو د بشر حقونو شورا ته راوګرځي.

د مخکېني ولسمشر ډونالد ټرمپ اداره درې کاله وړاندې، د ۲۰۱۸ کال په جون میاشت کې له دې نړیوالې شورا وتلې وه.

همدې میلادي میاشت کې د جو بایډن اداره د دغې شورا د څارونکي په توګه بېرته دغه بنسټ کې شامله شوه.

د ملګرو ملتونو عمومي مجمع د دغې شورا د درې کلني غړیتوب لپاره هر کال په اکټوبر میاشت کې ټاکنې ترسره کوي.

د امریکا د بهرنیو چارو وزیر: کرملېن دې ناوالنۍ بې‌قید او شرطه خوشې کړي

د کرملېن منتقد الکسي ناوالنۍ

د امریکا د بهرنیو چارو وزیر د کرملېن د منتقد الکسي ناوالنۍ د ژر تر ژره او بې‌قید او شرطه خوشې کېدو غوښتنه وکړه.

انتوني بلېنکن نن (چهارشنبه) په جنوا کې د ملګرو ملتونو د بشري حقونو شورا انلاین غونډې ته په یوه ثبت شوي پیغام کې وویل: "موږ یو ځل بیا د روسیې له دولته پر خپلې غوښتنې ټینګار کوو، دوی دې الکسي ناوالنۍ او دغه‌راز د روسیې سلګونه نور اوسېدونکي چې له خپلو حقونو نه د ګټې اخیستنې په خاطر په ناحقه نیول شوي، ژر او له قید او شرط پرته خوشې کړي."

الکسي ناوالنۍ چې تېره میاشت له جرمني مسکو ته د ستنېدو پر مهال نیول شوی، تورن دی چې جرمني کې یې د مشروطې ازادۍ اصول نقض کړي دي.

پر ده دغه راز تور دی چې د دویمې نړیوالې جګړې یوه سرتیري پسې یې تهمت کړی دی.

ښاغلي ناولنی ویلي، پر ده لګول شوي تورونه سیاسي انګیزه لري.

امریکا: سایبري برید پرمختللی و چې باید یو هېواد یې تر شا وي

ارشیف، عکس تئزیني بنه لري

د امریکا د ټکنالوژي شرکتونو مشران وایي، دغه هېواد کې د حکومت پر کمپیوټري شبکو وروستی سایبري برید دومره پرمختللی و چې باید یو هېواد یې تر شا وي.

د شرکتونو مشرانو پرون د فبرورۍ په ۲۳مه د کانګرس په استماعیه غونډه کې دا خبرې وکړې.

دا وروسته تر دې چې تېر دسمبر میاشت کې دا سایبري برید څرګند شو، په اړه یې لومړنۍ لویه غونډه ده.

استخباراتي چارواکو او نورو سرچینو له دې مخکې روسیه دغو سایبري بریدونو کې په لاس لرلو تورنه کړې ده.

روسیې بیا دې موضوع کې هر ډول لاس لرل رد کړي دي.

د امریکا د تکنالوژۍ شرکتونو مشرانو بیا ویلي، د سایبري برید دقت او پراختیا ته په کتو، د ملامتۍ ګوته روسیې ته نیول کېږي.

سنا 'ګرینفیلډ' ملګروملتونو کې د امریکا د سفیرې په توګه تایید کړ

لېنډا توماس ګرینفیلډ

د امریکا سنا د سې شنبې(د کب ۵مه) په ورځ لېنډا توماس ګرینفیلډ په ملګروملتونو کې د امریکا د متحد ایالاتونو د سفیرې په توګه تایید کړه.

په سنا کې د اکثریت مشر چک شومر پرون سې شنبه (د کب ۵مه) د غونډې پر مهال وویل، ګرینفیلډ په داسې وخت کې خپل کار پیلوي چې د نړۍ هېوادونه باید له کووېډ-۱۹ سره په مبارزه کې او د اقلیم د بدلون په برخه کې خپلې همکارۍ زیاتې کړي.

مېرمن ګرینفیلډ څو لسیزې ډیپلوماته پاتې شوې، دې د لایبریا، سویس او پاکستان په ګډون د امریکا په سفارتونو کې کار کړی دی.

دا د ولسمشر بارک اوباما د ولسمشرۍ په وخت د امریکا په بهرنیو چارو په وزارت کې د افریقا د چارو مرستیاله وه.

د ایران سیستان-بلوچستان کې نښتو ۵ تنه ټپیان کړي

د ایران سیستان-بلوچستان نقشه

د راپورونو له مخې د ایران د سیستان-بلوچستان ایالت په ساراوان ښار کې د سې شنبې)د کب ۵مه) په ورځ لږ تر لږه پنځه تنه تپيان شوي دي.

د ازادي راډیو د فردا څانګې د راپور له مخې تر پرونۍ نښتې یوه ورځ مخکې سپاه پاسداران انقلاب ځواکونو د تیلو پر قاچاق کوونکو ډزې کړې وې او څو تنه یې وژلي وو.

د همدې وژل شوېو شمېر هرانا خبري اژانس دوه تنه یادوي، خو یو شمېر سرچینې وایي چې تلفات تر لسو پورې رسېږي.

ایراني چارواکو د پرونۍ نښتې تایید نه دی کړی.

ناسا د مریخ له سیارې ثبت شوي لومړني غږونه خپاره کړل

د ناسا مرکز کې د مریخ انځورونه

د امریکا د فضایي څېړنو د ادارې، ناسا ساینس‌پوهانو د مریخ له سیارې ثبت شوي لومړني غږونه خپاره کړي دي.

دغه غږونه بېرته ځمکې ته هغې متحرکې وسیلې را استولي چې تېره اوونۍ مریخ ته د ناسا له‌خوا استول شوې فضایي بېړۍ هغه د دې سیارې سطحې ته کوزه کړې ده.

دغه غږونه چې ناسا تېره شپه خپاره کړي، د باد شنیډا او د سیلۍ غږ ته ورته دي.

د مریخ د سیارې اتموسفیر ته د رسېدو لپاره د ناسا فضایي بېړۍ شاوخوا اووه میاشتې مزل وهلی دی.

د ازادي راډیو موندنې؛ د ازبکستان ولسمشر ته په پټه یو تفریحي ځای جوړ شوی

د ازبکستان ولسمشر شوکت میرضیایف

د ازادي راډیو د یوه څېړنیز راپور موندنې ښیي چې د ازبکستان یوې دولتي کمپنۍ په پټه د دې هېواد ولسمشر شوکت میرضیایف ته یو غرنی عصري تفریحي ځای جوړ کړی دی.

دغه څېړنه چې د ازادي راډیو د ازبکستان څانګې ترسره کړې او موندنې یې نن خپرې شوي، له چارواکو، د سیمې اوسېدونکو او هغو ساختماني کارګرانو سره چې د دغه عصري کمپلېکس په جوړولو کې یې مرسته کړې ده، د مرکو په اساس ترسره کړې ده.

دغه استراحت ځای د ازبکستان په لوېدیځ تین شان غرنۍ سیمه کې د یونېسکو له‌خوا یوې خوندي سیمې ته نږدې جوړ شوی دی.

یو شمېر سرچینو پر دغه استراحت ځای د مصرف شویو پیسو اندازه سوونه ملیونه ډالره ښودلې.

ویل شوي چې د دغه کمپلېکس پر پلان د ۲۰۱۷ کال د فبرورۍ د میاشتې له لومړیو یعنې دوه میاشتې وروسته تر دې چې میرضیایف قدرت په لاس کې واخلي، کار پیل شوی و.

کاناډا اویغوریانو سره د چین چلند نسل وژنه بللې

د چین ایغوریان

د کاناډا پارلمان له اویغور مسلمان اقلیت سره د چین د حکومت چلند جینوسایډ یا د یوه نسل ګڼه وژنه بللې ده.

په دې اړه د کاناډا د پارلمان له رای اخېستو، څو ساعته مخکې پېنکېنګ ادعا وکړه چې په شینجن ایالت کې له اویغور اقلیت سره د چین د حکومت چلند په دې هېواد کې د بشري حقونو د پرمختګ یوه ځلانده نښه ده.

خو د کاناډا پارلمان په خپل پرېکړه لیک کې چې پرون د رایو په اکثریت تصویب شو، ویلي دي چې اویغوران له نسل وژنې سره مخامخ دي.

د چین او کاناډا اړیکي په وروستیو څو کلونو کې ترینګلي وو او اټکل کېږي چې ښايي د کاناډا د پارلمان دا اعلان د چین غوسه لازیاته کړي.

د کاناډا صدراعظم جسټین ټرودو تېره اوونۍ وویل، په شینجېن کې له بشري حقونو د سرغړونو د پام وړ راپورونه ترلاسه شوي، د بشري حقونو نړیوالې ډلې وايي چې په چین کې شاوخوا یو میلیون اویغوران او نور مسلمانان په جبري کمپونو کې اچول شوي دي.

چین دا انتقادونه رد کړي دي او وايي چې د شینجین مسایل د چین کورني مسایل دي او دا کمپونه د افراطيت پرضد د مبارزې لپاره جوړ شوي چې د ځوانان له افراطیته ژغوري.

بایډن: د کووېد ۱۹ له کبله د ۵ لکو کسانو مړینه وېروونکې غمیزه ده

ولسمشر جوبایډن

ولسمشر جوبایډن په متحدو ایالاتونو کې د کووېد ۱۹ ناروغۍ له کبله د څه باندې پنځه لکه کسانو مړینه یوه وېروونکې غمیزه او بوږنوونکې مرحله بللې او د هېواد له خلکو یې غوښتي دي چې د دې وبا پرضد په مبارزه کې یو موټی شي.

ښاغلي بایډن چې د خپلې کورنۍ غړي یې په تېرو کلونو کې له لاسه ورکړي تېره شپه په یوه ټلوېزیوني وینا کې خپل ویر ته اشاره وکړه او پر امریکایانو یې غږ وکړ چې د خپلو تللو عزیزانو یاد ته درناوی ورکړي او په یاد یې وساتي.

هغه له امریکایانو وغوښتل چې هوښیار واوسي، ټولنیز واټن وساتي، ماسکونه واغوندي او په خپل وار واکسین وکړي.

د جانز هاپکېنز پوهنتون د شمېرنو له مخې په متحدایالاتونو کې د کووېد-۱۹ ناروغۍ له کبله د مړینو شمېر ۵۰۰۲۳۶ کسانو ته رسېدلې او په دې ناروغۍ د اخته کسانو شمېر له اته ویشت میلیونه یو سل او اته اتیا زرو ۲۸۱۸۸۰۰۰ اوښتی دی.

تر ټولو زوړ محصل د ایټالیا له پالیرمو پوهنتونه فارغ شو

جوسپیني پتیرنو ۹۶ کلن دی

په نړۍ کې یوه تر ټولو زاړه محصل د ایټالیا له پالیرمو پوهنتونه د فراغت اسناد ترلاسه کړل.

جوسپیني پتیرنو ۹۶ کلن دی او د تاریخ او فلسفې پوهنځی یې ولوست.

پتیرنو په دویمه نړیواله جګړه کې سرتیری و او له جګړې وروسته یې د ایټالیا د اوسپنې پټلۍ په شرکت کې کار کاوه.

پتیرنو د هغو هیلو په اړه خبرې کوي چې له ۹۰ کلنۍ را وروسته یې په فکر کې وې: "د راتلونکې لپاره زما پروګرام همدا دی چې ډېر وخت لیکلو ته ورکړم. غواړم ټول هغه متنونه چې مې نه دي لوستلي د راتلونکي لپاره ولولم. دا زما هدف دی."

جوسیپي پتیرنو چې ځوان لمسیان لري، د کمزوري اقتصاد په خاطر په ځوانۍ کې درس نه و ویلی.

هغه د فراغت په سند سربېره د ایټالیا له پالیرمو پوهنتونه افتخاري لقب هم ترلاسه کړ.

ایران د اټمي تأسیساتو په اړه د یوې موافقې عملي کول پای ته ورسول

ارشیف

د ایران دولتي ټلوېزیون تایید کړې ده چې تهران پرون د هغې موافقې عملي کول پای ته ورسول چې د دې هېواد د اټمي تاسیساتو ناڅاپي پلټنو ته اجازه ورکوي.

له دې سره دا وېره پیدا شوې چې ښايي د نړۍ له شپږو پیاړو قدرتونو سره د ۲۰۱۵ میلادي کال له اټمي موافقې د ایران واټن لا زیات شي.

ایران دا خبرداری وروسته له هغه ورکوي چې ایراني چارواکو په خورا زیاته کچه د یورانیمو د غني کولو د احتمال یادونه وکړه.

له دې مخکې د امریکا د بهرنیو چارو وزیر انتوني بلېنکن ویلي و، که تهران پر خپلو ژمنو ودریږي نو واشنګټن هم لېوال دی چې د ایران اټمي تړون ته ورستون شي.

بلېنکن د ملګرو ملتونو له خوا د بې وسلې کولو یوه کنفرانس ته چې په جنیوا کې جوړ شوی و په یوه ثبت کړي بیان کې دا خبرې وکړې.

هغه وویل، له ملګرو او متحدینو سره په ګډه کار د تړون تمدید او غښتلتیا غواړي.

نوموړي بیا دا ټینګار هم وکړ چې واشنګټن به په سیمه کې د ایران بې ثباته کوونکو اقداماتو او بالسټیک میزائیلو پروګرام ته ګوتې نیسي.

هاخوا د ایران رهبر علي خامنه اي ټینګار کړی چې تهران به د یورانیمو له بډاینې نه په شا کېږي: "زموږ د بډاینې اندازه هم شل فیصده نه ده. که لازمه وي، د اټمي او نورو چارو د مخته وړلو لپاره به د غني سازۍ کچه ۶۰ سلنې ته ورسوو."

خامنه اي داسې وخت دا ګواښوونکی پیغام ورکړی چې امریکا او له ایران سره د اټمي تړون نورو لاسلیکوونکو هېوادونو د ایران له خوا د فلزي یورانیمو په تولید او د یورانیمو په شل فیصدي بډاینې اندېښنه ښودلې.

د جرمني د بهرنیو چارو وزیر: د اټمي تړون ټولې ژمنې پوره کول د ایران په ګټه ده

د جرمني د بهرنیو چارو وزیر هایکو ماس

د جرمني د بهرنیو چارو وزیر هایکو ماس له ایرانه وغوښتل چې دا یې په ګټه ده څو د نړۍ له قدرتونو سره د ۲۰۱۵ کال د اټمي تړون ټولې ژمنې پوره کړي.

ماس نن په جنوا کې د ملګرو ملتونو د بې‌وسلې کولو کنفرانس ته په وینا کې د امریکا د ولسمشر جو بایډن د ادارې دریځ ته په اشاره وویل چې دا اداره لېواله ده چې بېرته له دغه تړون سره یوځای شي.

هغه زیاته کړه، مخکې له دې چې دغه تړون دومره ویجاړ شي چې د ترمیم وړ نه‌وي، دا د ایران په ګټه ده چې اوس خپل دریځ بدل کړي.

ماس وویل، جرمني تمه کوي چې ایران د نړیوالې اټمي انرژۍ له ادارې سره بشپړه همکاري وکړي، داسې چې هغه بشپړه شفافه وي او ورسره په کړو ټولو ژمنو یې عمل وکړي.

د دغې ادارې مشر رافایل ګروسي تهران ته له سفر وروسته پرون بېرته اروپا ته ستون شو.

ایراني چارواکو تهران ته د ښاغلي ګروسي سفر او هغه موقتي موافقه چې دواړه لورو له اټمي تأسیساتو څخه د کتنې په اړه ترلاسه کړې، د یوې مهمې لاس ته راوړنې په توګه ستایلې.

په داسې حال کې چې ټولې خواوې د دغه تړون د ژغورنې هڅه کوي، دغه موافقه ټولو لورو ته یو فرصت برابروي.

د پاکستان سوپرلیګ؛ لاهور قلندرز او کوېټه ګلډیټرز لوبډلې سره لوبېږي

ارشیف

د پاکستان سوپرلیګ په څلورمه لوبه کې نن ماښام ۶:۳۰ بجې لاهور قلندرز او کوېټه ګلډیټرز لوبډلې سره لوبېږي.

په لاهور لوبډله کې راشد او کوېټه لوبډله کې بیا قیس احمد لوبېږي.

د پاکستان د کرکټ شپږم پړاو سوپرلیګ د تېرې شنبې په ورځ پیل شو چې پرون ماسپښين‌یې په دوهمه لوبه کې لاهور قلندرز لوبډلې په څلورو وېکټو پېښور زلمي لوبډلې ته ماته ورکړه.

راشد خان د ښې توپ اچونې ترڅنګ ښه توپوهنه هم ترسره کړه او لاهور قلندرز لوبډله‌یې بریالۍ کړه.

پېښور زلمي په ټاکلو ۲۰ اورونو کې د ۶ لوبغاړو په سوځېدو ۱۴۰ منډې وکړې.

لاهور قلندرز لوبډلې په ۱۸.۳ اورونو کې د ۶ لوبغاړو په سوځېدو ټاکل شوی هدف پوره او لوبه‌یې په خپل نوم کړه.

د اروپایي ټولنې د بهرنیو چارو وزیران پر روسیې نوي بندیزونه تصویبوي

ارشیف، د اروپايي ټولنې بیرغونه

تمه ده چې د اروپایي ټولنې د بهرنیو چارو وزیران به نن پر روسیې نوي بندیزونه تصویب کړي.

دغه بندیزونه پر روسیې د کرملېن د منتقد الکسي ناوالنۍ د زنداني کېدو او د هغه د پلونانو د ځپنې په تړاو لګول کېږي.

دغه وزیران به د بروکسل په غونډه کې مشخص اهداف په نښه کړي، پر یو شمېر روسانو او ادارو به د ویزې بندیز ولګوي او شتمني به‌یې کنګل کړي.

الکسي ناوالنۍ تورن شوی و چې جرمني ته د درملنې لپاره په تګ سره‌یې له مخکېني تعلیقي بند څخه سرغړونه کړې وه.

نوموړی تېره میاشت له جرمني بېرته هېواد ته له ستنېدو سره سم ونیول شو. هغه پر ځان لګول شوي تورونه سیاسي انګېزه بللې ده.

نور راوښيه

XS
SM
MD
LG