د لاسرسۍ وړ لېنکونه

تازه خبر
جمعه ۱۵ کب ۱۳۹۹ کابل ۰۲:۰۷

افغانستان

خلک په اطلاع رسونه کې د "راډیو" رول څنګه ارزوي؟

په افغانستان کې په کور دننه بې ځایه شويو خلکو ته د ازادې اروپا ازادي راډیو له لوري وېشل شوې راډيوګانې. Sept. 17, 2010

فبرورۍ ۱۳ مه د "راډیو" له نړیوالۍ ورځې سره برابره ده او خلک په اطلاع رسونه کې د راډیو ګانو رول د پام وړ بولي.

راډیو د خپل پیدایښت له وخته ترننه له غږ نه په استفادې خلکو ته د اطلاع په رسولو کې ځانګړې وه.

د افغانستان خلک د بېلابېلو لاملونو له امله ټکنالوجۍ ته زیات لاس رسی نه لري، ناامنۍ او د برښنا نشتوالی هغه څه دي چې انټرنېټ ته یې د خلکو لاسرسی لاپسې محدود کړی، ښايی همدا لامل وي چې په دې هيواد کې راډیو ډېر اورېدونکي لري.

په کمه بیه او په سختو شرایطو کې اطلاع ته رسول، هغه هم په نورو هېوادونو کې د دغې غږېزې رسنۍ یوه بله ځانګړنه ده.

د کرونا ویروس خپراوي سره راډیو واتوانېده، چې په ښارونو او لرې پرتو سیمو کې خلک د دغه ویروس له خطره خبر کړي.

د تېر کال د کب په پنځمه په افغانستان کې د کرونا ویروس لومړنۍ پېښه ثبت شوه، له هغې وروسته تراوسه خلکو ته په ځانګړې توګه په اطلاع رسونې کې د راډیو رول د پام وړ او مهم و.

د کونړ اوسېدونکی نصار احمد په دې اړه ازادي راډيو ته وویل: "د کرونا ویروس د خپراوی په وخت کې هغه اعلانونه چې د راډیو ګانو له لارې خلکو ته نشرېدل خلکو ته ډېر ګټور و، په ځانګړې توګه هغه خلکو ته چې په لرې سیمو کې ژوند کوي، دوی ته دا ورزده کړل شول، چې څنګه له کرونا ځان وساتي او روغتیايي تدابیر عملي کړي."

د ننګرهار اوسېدونکي نصرالله وویل: "چېرته چې موږ ژوند کوو، له راډیو پرته هیڅ شي ته هم لاس نه لرو، نه تلویزیون، نه اخبار او نه هم نور د اطلاع رسونې وسایل، همدا راډیو وه، چې موږ اورېدوه او په ژوند کې مو روغتیايي سپارښتنې عملي کولې."

د افغانستان د عامې روغتیا وزارت مسوولین هم وايي، د کرونا ویروس د خپراوی په وخت کې یې ډیری اعلانونه او د دې ناروغۍ په اړه عامه پوهاوی د راډیو له لارې و.

د دغه وزارت ویاند ډاکټر دستګیر نظري: "د کرونا ویروس له خپرېدو تر اوسه، د دغه ویروس د مخنیوي په اړه د عامه ذهنونو د روښانتيا او لازمو روغتیايي سپارښتنو په پام کې نیولو لپاره له ملي او سیمه ییزو ۱۵۰ راډیو ګانو ۲ زره ۶۳۳ ساعته د عامه پوهاوي اعلانونه خپاره شوي دي، د دغه پيغامونو لګښت د یونسیف له لوري ورکړل شوی."

په همدې حال کې د افغانستان له ازادو رسنیو د ملاتړ ادارې اجرائیوي رئیس عبدالمجیب خلوتګر ازادي راډیو ته وویل، چې ۷۵ سلنه افغانان راډیو اوري.

عبدالمجیب خلوتګر
عبدالمجیب خلوتګر

هغه زياتوي: "د هغو څېړنو په اساس چې شوې، په افغانستان کې ۷۵ سلنه خلک راډیو ته بشپړ لاسرسی لري، په داسې حال کې چې تلویزیون ته څو چنده کم لاس رسی لري، حتی نیم یې هم نه لري، موږ د کرونا ویروس په دوران کې د اطلاع رسونې په برخه کې د رسنیو په ځانګړې توګه د رادیو ګانو چې له کویډ۱۹ سره څه ډول چلند وکړي د رول د پام وړ و."

په لومړي ځل راډیو په ۱۸۹۶ میلادي کال کې د ایټالیايي عالم ګلوګلیمو مارکوني له لوري اختراع شوه، خو اوس یې هم په دومره ډېرو رسنیو کې ځانته ځانګړی ځای ساتلی.

که څه هم په ۱۳۰۲ لمریز کال کې د کابل په پل ارتل کې په کمو امکاناتو راډیو دستګاه کار پیل کړ او ان تر دې چې د غږ د ثبت دستګاه یې هم نه درلوده، خو په ۱۳۲۰ لمریز کال کې زیات امکانات ترلاسه کړل.

د هر کال په تېرېدو په راډیو ګانو کې کار هم توپیر کوي، محمود کوچی چې نږدې څلور لسیزې یې په راډیو کې کار کړی وايي: "په هغه وخت کې موږ اصلا تليفون او مبایل هم نه و، هغه کس سره چې کار به دې و ورسره ، ډېر ستونزمن و، د غږونو په راټولولو کې زیات مشکلات و، که څه هم ټکنالوجي نه وه، موږ به د ریواکس په وسیله خپلې برنامې ایډیټ کولې، ریواکس کار ستونزمن و، فیتې وې، په هغه کې ایډیت ډېرې ستونزې درلودې، اوس زیات سهولتونه رامنځته شوي دي."

که څه هم په افغانستان کې له ازادو رسنیو د ملاتړ ادار په افغانستان کې د فعالاو راډیو ګانو شمېر۱۹۰ ښيي، خو د اطلاعاتو او فرهنګ وزارت دغه شمېر له ۲۶۰ زیات یادوي.

يونيسکو په ۲۰۱۲ کې د فبرورۍ ۱۳ د راډیو نړیوالې ورځې په نوم ونوموله، له هغې وروسته یاده ورځ هر کال له دغې وسیلې نه د اطلاع رسونې احترام لپاره نمانځل کېږي.

په ۲۰۱۳ میلادي کال کې د دغه سازمان د معلوماتو پربنست په ټوله نړۍ کې د راډیو ۴۴ زره دستګاوې فعالیت لري، که څه هم راډیو د نړۍ پخوانۍ رسنۍ بلل کېږي، خو د وخت په تېرېدو سره سره بیاهم زیات اورېدونکي لري.

د ورځې تازه خبرونه دلته ولولئ

ننګرهار کې پنځوس کیلوګرامه نشه يي مواد ونیول شول

ننګرهار ولایت، عکس تئزیني بڼه لري

په ننګرهار ولایت کې څه د پاسه پنځوس کیلوګرامه نشه يي مواد ونیول شول.

د ننګرهار ولایت د امنیه قوماندانۍ رسنیو ته ویلي چې پولیسو په جلال اباد ښار کې د استوګنې پر یوه کور عملیات وکړل چې په نتیجه کې یې ۲۹ کیلوګرامه چرس، ۱۶ کیلوګرامه تاریاک او شبږ کیلوګرامه هیروئین ونیول.

د دې موادو د ساتنې په تور پنځه تنه هم نیول شوي او له نشه يي موادو سره د مبارزې د عدلي او قضايي مرکز څارنوالۍ ته معرفي شوي دي.

هرات کې د شرابو یوه کارخونه ویجاړه شوه

ارشیف، عکس تئزیني بڼه لري

د هرات ولایت پولیسو د شرابو یوه کارخانه ویجاړه کړه.

د هرات ولایت د امنیه قوماندانۍ ویاند عبدالاحد ولي زاده ازادي راډیو ته وویل، له نشه يي موادو سره د مبارزې پولیسو په ګذره ولسوالۍ کې پر یوې کارخونې د برید په نتیجه کې یو زرو ۹۰۰ کیلوګرامه تخمیر شوي کشمش او ۲۹ لېټره شراب ونیول.

پولیسو د شرابو د کارخانې وسایل له منځه یووړل،خو د ساتنې او جوړولو په تور یې څوک نه دي نیولي.

غزني او پنجشېر کې ۴۰ کیلوګرامه نشه يي توکي نیول شوي

ارشیف، عکس تئزیني بڼه لري

په غزني او پنجشیر ولایتونو کې به دوو جلا جلا پېښو کې څه د پاسه څلوېښت کیلوګرامه نشه يي مواد ونیول شول.

په لومړۍ پېښه کې پولیسو د غزني ولایت په مرکز کې د نشه يي موادو پر یوې ذخیرې د برید په نتیجه کې ۲۳ کیلوګرامه چرس ونیول.

له نشه يي موادو سره د مبارزې معینیت د رسنیو دفتر وايي چې پولیسو په دوهمه پېښه کې د پنجشیر ولایت په بازارک سیمه کې د موټرو د تلاشۍ پر مهال ۱۹کیلوګرامه چرس ونیول.

د دې موادو د ساتنې او انتقال په تور دوه تنه هم نیول شوي دي.

بدخشان کې د سل کیلوګرامو نشه يي توکو د قاچاق مخه ونیول شوه

ارشیف،

په بدخشان ولایت کې د څه د پاسه سل کیلوګراموه نشه يي موادو د قاچاقو مخه ونیول شوه.

د بدخشان ولایت امنیه قوماندان محمد صادق مرادي ازادي راډیو ته وویل، پولیسو ۱۴۰ کیلوګرامه چرس ونیول چې له بهارک ولسوالیه یې په یوه بار وړونکي موټر کې د وردوج ولسوالۍ له لارې له هېواده بهر قاچاق کول.

د موټروان په ګډون دوه کسان هم د دې موادو د قاچاقو په تور نیول شوي دي.

اروپايي ټولنې د هدفي وژنو په اړه افغان چارواکو سره اندېښنه وښوده

تېره ورځ ننګرهار کې نامعلومه وسله‌والو د ګچو د یوې کارخونې ۷ کارکوونکي وژلي وو، په عکس ښکاري چې د دې کارخونې د یوه کارکوونکي جسد لېږدول کېږي.

ولسمشر اشرف غني او په کابل کې د اروپايي ټولنې د غړو او ځینو نورو هېوادونو سفیرانو د افغانستان د سولې د پروسې د راتلونکو ګامونو په اړه خبرې وکړې.

ارګ په یوه بیان کې وايي، دې غونډه کې چې پرون پنجشنبه (د کب ۱۴مه) جوړه شوه د سولې لپاره د سیمه ییزې او نړیوالې اجماع او نورو مسایلو په اړه بحث وشو.

د ارګ په بیان په دې اړه نور جزئیات نه دي ورکړل شوي.

په همدې حال کې په افغانستان کې د اروپايي ټولنې استازولۍ پر ټویټر لیکلي دي چې له ښاغلي غني او د ولسمشر له لومړي مرستیال امرالله صالح سره د اروپايي ټولنې د ډیپلوماتانو خبرې رغنده وې او دوی دې کتنه کې په افغانستان کې د هدفي وژنو له کبله خپله اندېښنه څرګنده کړه.

په افغانستان کې د خبریالانو، مدني فعالانو، دیني عالمانو او دولتي کار کوونکو هدفي وژنې دې وروستیو کې زیاتې شوي.

د دې وژنو په لړۍ کې د سې شنبې (د کب ۱۲مه) په ورځ د ننګرهار په مرکز جلال اباد کې په دوو جلا حملو کې د انعکاس ټلوېزېون درې ښځینه کارکوونکې ووژل شوې.

د دې حملو مسوولیت داعش ډلې ومانه.

"افغانستان کې د خبریالانو خوندیتوب لپاره بېړني اقداماتو ته اړتیا شته"

افغانستان کې وژل شوي خبریالان

د بې پولو خبریالانو ټولنې په افغانستان کې د خبریالانو د وژنو د بندېدو غوښتنه کړې.

د دې ټولنې د افغانستان او ایران د څانګې مسوول رضا معیني پرون پنجشنبې (د کب ۱۴مه) ازادي راډیو ته وویل چې په افغانستان کې د خبریالانو د خوندیتوب لپاره عاجلو او عملي اقداماتو ته اړتیا شته.

ښاغلي معیني زیاته کړه: "موږ له افغان چارواکو دې برخه کې جدي څېړنې غواړو او له نړیوالې ټولنې، په تېره له امریکا، جرمني او فرانسې غواړو چې د جرمونو د نړیوالې محکمې په تحقیقاتو کې د دې جنایتونو د ور زیاتولو په هدف د بې پولې خبریالانو د ټولنې د غوښتنې ملاتړ وکړي."

په افغانستان کې د خبریالانو او د رسنیو د کار کوونکو د وژنې له کبله اندېښنې وروسته له هغه لا زیاتې شوې چې د انعکاس د خصوصي ټلوېزیون درې ښځینه کارکوونکې په دوو جلا حملو کې د ننګرهار په مرکز جلال اباد کې ووژل شوې.

د دې وژنو مسوولیت داعش ډلې ومانه.

په روان هجري لمریز کال کې د ازادي راډیو د خبریال محمدالیاس داعي په ګډون لږ تر لږه لس خبریالان په افغانستان کې په هدفي حملو کې وژل شوي دي.

پر کابل پوهنتون د برید پر عامل 'عادل' د اعدام حکم تایید شو

پر کابل پوهنتون د برید عاملین

په افغانستان کې د استېناف یوې محکمې د کابل پوهنتون د تروریستي حملې د عامل او طراح د اعدام حکم تایید کړ.

د افغانستان د سترې محکمې ویاند احمد فهیم قویم تېر ماښام ازادي راډیو ته وویل چې د عادل د اعدام حکم په بګرام زندان کې د تروریستي جرایمو د څېړنې د استېناف محکمې له خوا تایید شو.

ښاغلي قویم زیاته کړه: "د کابل پوهنتون د تروریستي حملې عامل او طراح عادل چې په ارش او طلحه مشهور و، مخکې اړوندې ابتداییه محکمې په اعدام محکوم کړی و. دا حکم اوس د استېناف محکمې له خوا تایید شو."

د روان کال په لړم میاشت کې پر کابل پوهنتون خونړي برید چې مسوولیت یې داعش ډلې ومانه، ۲۲ کسان ووژل او له څلوېښتو زیات نور یې ټپیان کړل.

د سترې محکمې ویاند ښاغلی قويم همدا راز وايي چې استېناف محکمې د عادل یو بل ملګری عبیدالله هم- چې په حماد مشهور و، په نورو تروریستي جرمونو کې د لاس لرلو له کبله په اعدام محکوم کړی دی.

ننګرهار کې نامعلومه وسله‌والو د یوې کارخونې ۷ کارکوونکي ووژل

ارشیف، د ننګرهار جلال‌اباد ښار د یوې پېښې په سیمه کې ولاړ پولیس.

ننګرهار کې نامعلومه وسله‌والو د ګچو د یوې کارخونې ۷ کارکوونکي وژلي دي.

د دغه ولایت امنیه قوماندان جمعه ګل همت رسنیو ته ویلي، پېښه تېره شپه په سره رود ولسوالۍ کې شوې ده.

د ننګرهار د ولایتي شورا غړي اجمل عمر ازادي راډیو ته ویلي چې وژل شوي کارګران هزاره توکمه دي چې دغلته په مزدورۍ بوخت وو.

د ننګرهار د سیمه‌ییز روغتون مسؤلینو هم ویلي چې له څېرو دغه کسان هزاره توکمه ښکاري.

د برید مسؤلیت کومې ډلې نه‌دی اخیستی، خو له دې وړاندې داعش وسله‌والو د پاکستان په کوټه کې پر هزاره توکمو ورته بریدونه کړي دي.

په یوه بله پېښه کې نن سهار ننګرهار کې د ماین چاودنې یوه ډاکتره ووژله او د هغې ماشومه لور یې ټپي کړه.

دغه چاودنه د ښار د عربانو ګولایي سیمه کې پر رېکشا د نښلول شوي ماین له کبله وشوه.

بدخشان کې د واورې ښویېدو له کبله ۱۵ تنه مړه شوي

ارشیف، بدخشان کې د واورې ښویېدو له امله د یو وژل شوي کس مړی

د بدخشان په خواهان ولسوالۍ کې د واورې ښویېدو له کبله ۱۵ تنه مړه شوي او ۵ نور ژوبل دي.

د بدخشان والي محمد زکریا سودا ازادي راډیو ته ویلي، دغه ټول کسان سیمه کې د سرو زرو د کان کېندونکي وو.

د ښاغلي سودا په خبره، پېښه نن له غرمې مخکې د خواهان ولسوالۍ په زرند اب کلي کې د یوه غره او پر سر یې د واورې د ښویېدو له کبله شوې ده.

سودا وایي، دا لومړنۍ شمېرې دي او په خبره‌یې، ممکن وروسته د مرګ‌ژوبلې کره شمېر معلوم شي او بدلون هم په‌کې راشي.

پېښه داسې ځای کې شوې چې د بدخشان د والي په خبره کنټرول‌یې د طالبانو په لاس کې دی او مخابراتي اړیکې هم په‌کې سمې نه‌دي.

افغان کرکټر نبي عیسی خېل: ډالۍ شوې پیسې بې ‌وزلو ته ځانګړې کوم

د افغانستان د کرکټ ملې لوبډلې لوبغاړی محمدنبي عیسی‌ خېل

د افغانستان د کرکټ ملې لوبډلې لوبغاړی محمدنبي عیسی‌ خېل وايي، د لوبې غوره لوبغاړي په توګه تر ټاکل کېدو وروسته، ده ته ډالۍ شوې پيسې يا امتیاز د هېواد بې ‌وزلو خلکو ته ځانګړی کړي.

محمد نبي عیسی‌ خېل پرون چهارشنبه (د کب ۱۳مه) د‌ پاکستان سوپر لیګ سیالیو کې د لوبې د غوره لوبغاړي له ټاکل کېدو وروسته، پر خپلې رسمي فیسبوک‌ پاڼې ولېکل، په هره لوبه کې چې دی غوره لوبغاړی وبلل شي، انعامي پیسې یې د خپل هېواد بې‌وزلو خلکو ته ځانګړې کوي او د نبي فاونډېشن له لارې یې د خیر ښېګڼې په کار لګوي.

محمد نبي په پرونۍ لوبه کې د خپلې لوبډلې کراچي کینګز لپاره خورا ښه لوبه وکړه. هغه په توپ اچونه کې دوه اوورونه وکړل، ۱۲ منډې یې ورکړې، خو کومه وکټ یې وا نه ‌خېسته، ولې په توپ وهنه کې یې بیا د ۳۵ توپونو په مټ ۶۷ منډې وکړې.

نبي په یاده لوبه کې ۸ څلوریزې او څلورشپږیزې ووهلې.

د غور- هرات لویه لاره له بندښت وروسته بېرته پرانېستل شوه

ارشیف، عکس تئزیني بڼه لري

د غور- هرات لویه لاره له نژدې شلو ورځو بندښت وروسته بېرته خلاصه شوه.

دغه لاره د دې لپاره بنده وه چې په اوږدو کې یې د حکومتي ځواکونو عملیات روان وو او چارواکو ادعا کوله چې طالبانو دغې سیمه کې د عملیاتو پر ضد ماینونه خښ کړي دي.

د غور امنیه قوماندان عبدالقادر ولي زاده ازادي راډیو ته وویل، د قومي مشرانو او سپین ږېرو په منځګړیتوب پرون چهارشنبه (د کب ۱۳مه) ماښام دا لاره خلاصه شوه.

د دغې لارې له بندېدو سره په غور کې د خوراکي موادو بیې هم لوړې شوې.

چارواکي: بزګرو ته د کوکنارو پرځای د بدیلو محصولات د کښت پروګرام جوړېږي

ارشیف، عکس تئزیني بڼه لري

د افغانستان د کرنې اوبو لګونې او مالدارۍ وزارت کروندګرو ته د کوکنارو د کښت پرځای د بدیلو زراعتي محصولات د کښت پروګرام د جوړېدو خبر ورکوي.

د دې وزارت له لوري خپرې شوې خبرپاڼه کې راغلي چې د کرنې اوبو لګونې او مالدارۍ وزارت، د متحده ایالاتو د قانون اجرا او د مخدره توکو چارو نړیوال دفتر يا INL او د ملګرو ملتونو پراختیایي ادارې هوډ کړی چې د کرنې او د کلیو د پراختیا پروژه نویو سیمو ته وغځوي.

دا پروژه د مشروع معیشت ته لاسرسی، کرنې او کليوالي پرمختیا ودې په نوم جوړه شوې ده.

د دې پروژې موخه په هغو سیمو کې چې کوکنار کرل کېږي، د هغو پرځای د میوو، سبزیو او نورو با ارزښته کرنې محصولاتو کښت دود کول دي.

یاده پروژه د ملګرو ملتونو پراختیایي ادارې او ROP یا «د سولې ریښې» بنسټ له خوا چې پر کرنې کار کوي د ۳۰ میلیونه ډالرو په ارزښت پلي کېږي.

د کرنې اوبو لګونې او مالدارۍ وزارت معلومات ښیې چې د کوکنارو د کښت پر ځای د بدیلو محصولاتو کښت پروژه به په بادغیس، فراه، کندها، بلخ، لغمان، او ننګرهار ولایتونو کې تر پنځو کلونو دوام وکړي.

مالیې وزارت: د افغانستان د نړیوالو شریکانو د رهبرۍ ناسته وشوه

ارشیف، عکس تئزیني بڼه لري

د افغانستان د نړیوالو شریکانو د رهبرۍ ناسته ترسره شوه.

د افغانستان د مالیې وزارت وایي، دا ناسته د ماليې وزارت د پالیسۍ معين په مشرۍ د افغانستان د نړیوالو شریکانو د رهبرۍ پلاوي سره 'Heads of Donor Agencies Meeting' د ویډیو کنفرانس له لارې جوړه شوه.

د دې وزارت مطبوعاتي مسوول فرید نوښت ازادي راډیو ته وویل، دغه ناسته کې د ۵۰ بهرنیو پراختیایي بنسټونو رئیسانو، د ملګرو ملتونو او نورو نړیوالو سازمانونو استازو ګډون درلود.

د ښاغلي نوښت په خبره، په یاده ناسته کې د مالیې وزارت مسوولینو له خوا نړیوالو شریکانو ته د ماليې وزارت د وروستیو مثبتو بدلونونو، د مرستو د مدیریت او مؤثریت د ښه والي، د ماليې وزارت په تشکيل کې د بنسټیزو اصلاحاتو او د ماليې وزارت په کليدي او رهبري بستونو کې د ښځو د بيا حضور په اړه معلومات ورکړل شول.

نوموړی زیاتوي، د نړيوالو بنسټونو استازو د افغانستان د مشارکت چوکاټ (AFP) د ژمنو د پلي کولو لپاره د جمهوری ریاست د چارو ادارې او د ماليې وزارت تر منځ د ګډ مېکانېزم د جوړېدو هرکلی وکړ.

سراج: بدخشان کې ترهګر د طالبانو په همکارۍ پلان لري چې امنیت خراب کړي

د افغانستان د ملي امنیت د ادارې رئیس احمد ضیا سراج

د افغانستان د ملي امنیت د ادارې رئیس احمد ضیا سراج خبرداری ورکوي چې هغه بهرني ترهګر چې په بدخشان کې حضور لري او د طالبانو پر مټ فعالیتونه ترسره کوي، ښايي په نوي کال کې د دې ولایت د یو شمېر ولسوالیو د نیولو یا یې د امنیت د خرابولو هڅې وکړي.

ښاغلي سراج چې د بدخشان ولایت د امنیتي وضعیت د څېړنې لپاره هغه ولایت ته تللې دغه څرګندونې پرون چهارشنبه(د کب ۱۳مه) په فیض کې آباد کې په یوه غونډه کې وکړې.

ښاغلي سراج زیاته کړه: "ترهګر او هغه بهرنۍ ډلې چې په بدخشان کې حضور لري، د دې ولایت له طالبانو سره په همکاري پلان لري چې د یو شمېر ولسوالیو امنیت خراب کړي."

سراج وویل، افغان امنیتي ځواکونو هم تیاری نیولی چې د دغو ترهګرو د فعالیتونو مخه ونیسي.

د بدخشان سیمه ییز چارواکي د هغو بهرنیو سخت دریځو چې دې ولایت کې دېره دي، شمېر شااوخوا نهه سوه تنه یادوي.

چارواکو دا هم ویلي چې د دولت وسله وال مخالفین د دې ولایت پر نژدې څلویښت سلنه ساحې نفوذ لري.

امریکا: خلیلزاد هڅه کوي افغان سولې ته نړیوال ملاتړ جلب کړي

د افغانستان د سولې لپاره د امریکا ځانګړی استازی زلمی خلیلزاد

د امریکا د بهرنیو چارو وزارت وایي، د افغانستان د سولې لپاره د امریکا ځانګړی استازی زلمی خلیلزاد هڅه کوي چې په افغانستان کې یوه سیاسي جوړجاړي ته د رسېدو لپاره د افغانانو ترمنځ د سولې د روانو هڅو لپاره سیمه ییز او نړیوال ملاتړ جلب کړي.

د دې وزارت ویاند نېډ پرایس پرون چهارشنبه (د کب ۱۳مه) په واشنګټن کې په یوه خبري کنفرانس کې وویل چې خلیلزاد د طالبانو له استازیو سره د خبرو لپاره اوس په دوحه کې دی او کابل ته درې ورځنی سفر یې ګتور و.

پرایس زیاته کړه: "خلیلزاد او ټیم یې په کابل کې له حکومتي چارواکو سره درې ورځنۍ ګټورې سلا او مشورې نن پای ته ورسولې. دوی د مدني ټولنې له مشرانو سره وکتل. دوی له نورو افغان سیاسي مشرانو سره وکتل چې تمرکز یې د سولې پر لور د پرمختګونو ګړندي کول و."

د امریکا د بهرنیو چارو د وزارت ویاند نېډ پرایس وویل، خلیلزاد به په دوحه کې هم دغو هڅو ته دوام ورکړي او د اړتیا په صورت کې به نورو ځایونو ته هم ولاړ شي.

نور راوښيه

XS
SM
MD
LG