د لاسرسۍ وړ لېنکونه

تازه خبر
پنجشنبه ۱۴ کب ۱۳۹۹ کابل ۰۳:۵۵

نړۍ

بې پوله خبریالان: اذربایجان دې خبریال اصلانوف ته مرستې برابرې کړي

اذربایجانی خبریال پولاد اصلانوف

د بې پوله خبریالانو ټولنې پر اذربایجان غږ کړی چې ژر تر ژره هغه خبریال ته روغتیایي مرستې برابرې کړي چې له ۱۹ میاشتو راهیسې په بند کې دی او له څه باندې یوې اوونۍ راهیسې یې د نه خوړلو اعتصاب پیل کړی دی.

پولاد اصلانوف چې له وړاندې په نازک روغتیایې حالت کې وو ،د اته ورځو نه خوړو نور هم کمزوری کړی چې د عادلانه محاکمې او په کور کې د نظر بند غوښتنې ته لا دوام ورکړي.

د بې پوله خبریالانو ټولنې د فبرورۍ پر نهمه په دې اړه اعلامیه ورکړه.

اعلامیه د نوموړي د مېرمنې له قوله زیاتوي چې اصلانوف د بډوډو د درد په ګډون له نورو روغتیایې ستونزو کړیږي، خو درملنه یې نه کېږي.

اصلانوف د ۲۰۱۹ میلادي کال په جون میلاشت کې هغه مهال ونیول شو چې په اذربایجان کې یې د اخاذې په اړه یو راپور چمتو کاوه او ویل کېږي د دې هېواد د امنیتي څانګې د غړو د ښکېلتیا ادعا په کې شوې وه.

د ۲۰۲۰ میلادي کال په نوومبر کې د بې پوله خبریالانو د ټولنې په خبره جعلي تور ورباندې ولګېد او ادعا کیدله چې دغه خبریال ایران ته معلومات ورکول، خو اصلانوف دا تورونه رد کړل.

د ورځې تازه خبرونه دلته ولولئ

عراق کې پر عین‌الاسد هوايي اډې ۱۰ توغندي ويشل شوي

عین‌الاسد هوايي اډه

په عراق کې د امریکا په مشرۍ ائتلاف وایي، دغه هېواد کې د امریکایي او ائتلافي ځواکونو پر یوې اډې لږ تر لږه ۱۰ توغندي ویشتل شوي دي.

عراق کې د نړیوال ائتلاف ویاند واین ماروتو (Wayne Marotto) نن د مارچ په درېیمه وویل، دغه توغندي نن سهار په ځایي وخت ۷ بجې او ۲۰ دقیقې په الانبار لوېدیځ ولایت کې پر عین‌الاسد اډې لګېدلي دي.

تر اوسه د مرګ‌ژوبلې هېڅ راپور نه‌دی ورکړل شوی.

دغې اډې کې عراقي او د نړیوال ائتلاف هغه ځواکونه مېشت دي چې له عراق سره د داعش وسله‌والو ضد مبارزه کې مرسته کوي.

دا بریدونه یوه اوونۍ وروسته تر دې کېږي چې امریکایي الوتکو د سوریې ختیځ کې د عراق پولې ته نږدې د ایران پلوه ملېشو پر مرکزونو بریدونه وکړل.

خاشجي؛ بې­ پولې خبریالانو د سعودي چارواکو پرضد جنايي شکایت ثبت کړ

وژل شوی خبریال، جمال خاشقجي

د بې­ پولې خبریالانو نړیوالې ټولنې په جرمني کې د سعودي عربستان د ولیعهد شهزاده محمد بن سلمان او د سعودي د نورو چارواکو پرضد جنايي شکایت ثبت کړ.

دغې ادارې د سعودي عربستان دغه چارواکي تورن کړي چې په ۲۰۱۸میلادي کال کې یې په استانبول کې د خبریال جمال خاشقجي په وژنې سره د بشریت پر خلاف جنایتونه کړي دي.

دغه شکایت چې په ۵۰۰ مخونو کې برابر شوی، تېره دوشنبه د جرمني په یوه فډرال محکمه کې ثبت شو.

د سعودي عربستان پر ولیعهد او نورو چارواکو دا تور هم لګول شوی چې تر ۳۰ د زیاتو ژورنالېستانو په جبري نیولو کې لاس لري.

د سعودي عربستان ولیعهد مخکې د خاشقجي په وژنه کې خپل هر ډول دخالت رد کړی و.

دا په داسې حال کې ده چې تېره جمعه د امریکا یوه استخباراتي ارزونه خپره شوه چې په هغې کې ویل شوي، د خاشقجي «د وژنې یا هم نیولو» عملیات د شهزاده محمد بن سلمان له خوا تصویب شوي وو.

لوکاشینکو: بېلاروس کې 'د قدرت لېږد' امکان نه لري

د بېلاروس مستبد مشر الکساندر لوکاشینکو

د بېلاروس مستبد مشر الکساندر لوکاشینکو وايي، په دغه هېواد کې «د قدرت انتقال» امکان نه لري.

په بېلاروس کې د اګسټ میاشتې له لومړیو په زرګونو کسان د مظاهرو پر مهال د لوکاشینکو د استعفی غوښتنه کوي. دوی وايي په تېرو ټاکنو کې درغلي شوې ده.

لوکاشینکو پرون سې شنبه (د کب ۱۲مه) په مېنسک کې وویل، په بېلاروس کې د قدرت انتقال امکان نه لري، خو هرڅه به د اساسي قانون مطابق وي.

وروسته له هغې چې الکساندر لوکاشینکو د اګسټ میاشتې پر نهمه ځان د ولسمشرۍ ټاکنو ګټونکی اعلان کړ، د اپوزیسیون تر فشار لاندې دی.

د اپوزیسیون ملاتړي وايي، د دغو ټاکنو ګټونکې د اپوزیسیون کاندیده سویتلانا څیخانوفسکایا ده.

اروپا کې خلکو ته د 'جانسن اېنډ جانسن' واکسین د ورکړې پرېکړه کېږي

د 'جانسن اېنډ جانسن' واکسین

د اروپا د درملو د تنظیم اداره وايي، دوی به راتلونکې اوونۍ په دې اړه پرېکړه کوي چې په اروپا کې خلکو ته د جانسن اېنډ جانسن د واکسین لګولو اجازه ورکړي که نه؟

که په امستردام کې دېره د درملو د تنظیم اداره دغه واکسین چې خلکو ته په یوه ډوز کې ورکول کېږي تایید کړي، دا به څلورم واکسین وي چې د اروپايي ټولنې په ۲۷ غړو هېوادونو کې یې لګولو ته اجازه ورکول کېږي.

اروپايي مشران د مارچ پر یوولسمه د جانسن اېنډ جانسن واکسین په باب په ځانګړې غونډه کې پرېکړه کوي.

په نړۍ کې په کرونا ویروس د اخته کسانو شمېر تر ۱۱۴ میلیونو او ۵۰۰زرو اوښتی دی.

د روسیې سپوتنیک-وي واکسین سلواکیا ته ورسېد

د روسیې د کرونا ویروس ضد سپوتنیک-وي واکسین

سلواکیا ته د 'کووېډ-۱۹' ناروغۍ ضد سپوتنیک-وي واکسین دوه لکه دوزه ورسېدل. سلواکیا له روسیې سره د دوه ملیونه ډوزه سپوتنیک-وي واکسین د اخیستو تړون کړی دی.

د دوشنبې په ورځ د دې واکسین د لومړۍ برخې تر رسېدو وروسته، د دغه هېواد صدراعظم ایګور ماتوویچ وویل: "دا دوه ملیونه دوزه واکسین به له یو ملیون سلواکیانو سره د دوو میاشتو په ترڅ کې مرسته وکړي. موږ به د شوي تړون له مخې یو ملیون دوزه واکسین ترلاسه کړو. بیا به په مې او جون میاشتو کې یو ملیون دوزه نور ترلاسه کړو."

سلواکیا له هنګري وروسته د اروپایي ټولنې دوهم هېواد دی چې په روسیه کې د کرونا ضد جوړ شوی واکسین ترلاسه کوي. د اروپایي ټولنې د درملو د مؤسسې له لوري لاهم سپوتنیک-وي واکسین نه‌دی تصویب شوی.

امریکا: سعودي دې د خاشقجي قضیه کې نور اقدامات وکړي

وژل شوی خبریال جمال خاشقجي

د امریکا متحدایالاتونو پر سعودي چارواکو فشار زیات کړی چې د خبریال جمال خاشقجي د وژنې په قضیه کې نور اقدامات وکړي.

د سپینې ماڼۍ په یوه استخباراتي راپور کې چې د جمعې په ورځ خپور شو راغلي چې د خاشقجي قتل سعودي ولیعهد محمد بن سلمان تایید کړی و.

په ملګرو ملتونو کې د سعودي عربستان سفیر عبدالله المعلمي پرون دا راپور رد کړ.

د امریکا د بهرنیو چارو وزارت ویاند نېډ پرایس پرون دوشنبه(د کب ۱۱مه) وویل، متحدو ایالاتو سعودي عربستان ته په ډاګه ویلي دي چې د خاشقجي وژنه لا هم امریکا ته د منلو وړ نه ده.

ښاغلي پرایس وویل، امریکا له سعودي غوښتي چې د خاشقجي د قاتلانو بانډ منحل کړي او د هېواد په بنسټونو کې سیسټماټیک اصلاحات راولي، څو په بهر کې د سعودي د حکومت د مخالفینو پرضد د فعالیتونو بندېدل یقیني شي.

پر واشنګټن انتقادونه په زیاتېدو دي چې ولې یې په دې قضیه کې د بن سلمان پر ضد اقدام نه دی کړی، خو د سپینې ماڼۍ ویاندې جېن ساکي پرون دوشنبې په یوه خبري غونډه کې په دې اړه د یوې پوښتنې په ځواب کې وویل: "له تاریخي پلوه د امریکا ولسمشرانو- که ډیموکراتان وو، که جمهوریپال، د هغو هېوادونو د حکومتي رهبرانو پرضد اقدام نه دی کړی چې موږ ډیپلوماتیکې اړیکې ورسره لرو."

جمال خاشقجي د ۲۰۱۸ کال د اکتوبر په دوهمه نېټه د ترکیې په استانبول ښار کې د سعودي عربستان قونسلګرۍ ته تر ننوتلو وروسته تری تم شو او باور دا دی چې همالته وژل شوی او مړی یې له منځه وړل شوی دی.

ملګري ملتونه: د ۱،۷ میلیارد ډالرو مرسته یمن لپاره کافي نه ده

د ملګرو ملتونو سرمنشي انتونیو ګوتیریش

ملګري ملتونه وايي، هغه ۱،۷ میلیارد ډالر چې مرستندویو هېوادونو یې ژمنه کړې، په یمن کې له قحطۍ سره د مبارزې لپاره کافي نه دي.

د ملګرو ملتونو سرمنشي انتونیو ګوتیریش پرون دوشنبه(د کب ۱۱مه) په یوه انلاین غونډه کې له نړیوالو مرستندویانو د یمن لپاره د درې میلیارده او اته نیم سوه میلیونه ډالرو د ځانګړي کولو غوښتنه وکړه.

ملګري ملتونه وايي، د یمن نیمايي نفوس چې شپاړس میلیونه وګړي دي، له لوږې سره لاس ګرېوان دي.

حوثي یاغیانو چې ایران یې ملاتړ کوي په ۲۰۱۴ کال کې پلازمېنه پر صنعا او د یمن د شمال پر سیمو ولکه ټینګه کړه.

امریکا اوکراین سره د ۱۲۵ میلیونه ډالرو په ارزښت پوځي مرسته کوي

ارشیف، عکس تئزيني بڼه لري

د امریکا دفاع وزارت له اوکراین سره د ۱۲۵ میلیونه ډالرو په ارزښت پوځي مرسته اعلان کړه.

پنټاګون په یوه بیان کې وايي، په دې مرستو کې په وسلو سمبالې د ګزمې دوه کښتۍ هم شاملې دي څو اوکراین له هغو په کار اخېستو سره له خپل سمندري قلمرو څخه دفاع وکړای شي.

اوکراین د کریمیا د ټاپو وزمې پرسر له روسیې سره اختلاف لري.

مسکو په ۲۰۱۴ میلادي کال کې کریمیا اشغال کړه او له هغه وخته تراوسه د اوکراین په ختیځ کې د روس پلوو بېلتونپالو ملاتړ کوي.

د اوکراین په جګړه کې چې ۷ کاله پرې اوښتي، تر اوسه له ۱۴ زرو زیات کسان وژل شوي دي.

اوکراین د ډیپلوماتانو یوه شبکه شنډه کړې چې په قاچاق تورن وو

د یوکراین پولیس

د اوکراین د امنیتي خدماتو اداره وايي، د ځینو اوسنیو او پخوانیو ډیپلوماتانو یوه شبکه یې شنډه کړې چې د قیمتي توکو په قاچاق تورن وو.

د اوکراین دغه پخواني او اوسني ډیپلوماتان تورن دي چې د سرو-زرو او بهرنیو اسعارو په ګډون یې د سلګونو-زره ډالرو په ارزښت اجناس قاچاق کړي دي.

د امنیتي خدماتو ادارې پرون دوشنبه(د کب ۱۱مه) په یوه اعلامیه کې ویلي، دغو ډیپلوماتانو، د ډیپلوماټیکو اسنادو د پوستي خدماتو له سیسټم او ډیپلوماټیکو اسنادو څخه په استفاده، له اروپا اوکراین او له اوکراین اروپا ته اجناس قاچاق کول.

د دغو کسانو هویت نه دی په ډاګه شوی.

دغې ادارې ویلي چې د دې پېښې په تړاو څېړنې پیل شوي، د تورنو کسانو شمېر لا روښانه شوی نه دی.

پاشنیان: که اپوزیسیون تر وخت مخکې ټاکنې ومني، موږ یې هم ومنو

د ارمنستان صدراعظم نیکول پاشنیان

د ارمنستان صدراعظم نیکول پاشنیان پرون دوشنبه (د کب ۱۱مه) وویل، که اپوزیسیون شرطونه ومني، دی تر وخت مخکې پارلماني ټاکنو ته تیار دی.

په ارمنستان کې سیاسي کړکېچ وروسته له هغې اوج ته ورسېد چې د پاشنیان ملاتړو او د اپوزیسیون غړو جلا- جلا پراخ لاریونونه وکړل.

وروسته له هغې چې پوځ تېره اوونۍ له واکه د صدراعظم پاشنیان د لېرې کېدو غوښتنه وکړه، دی له روان سیاسي کړکېچ سره لاس و ګرېوان دی.

پاشنیان د پوځ دا غوښتنه د پوځي کودتا یوه هڅه ګڼلې ده.

نیکول پاشنیان پرون د پلازمېنې یریوان په جمهوریت میدان کې خپلو زرګونو پلویانو ته په وینا کې وویل، که پارلماني اپوزیسیون تر وخت مخکې ټاکنې ومني، موږ به یې هم ومنو.

د برما د لیرې شوې مشرې محاکمه؛ پر انګ سان سوچي نور تورونه هم ولګول شول

له قدرته د میانمار یا د پخوانۍ برما د حکومت لیرې شوې مشره انګ سان سوچي

له قدرته د میانمار یا د پخوانۍ برما د حکومت پر لیرې شوې مشرې انګ سان سوچي چې نن د لومړي ځل لپاره په یوه محاکمه کې ودرول شوه، نور تورونه ولګول شول.

۷۵ کلنه انګ سان سوچي د تېرې مارچ میاشتې له لومړۍ نېټې چې د دې هېواد پوځ کودتا وکړه او هغه‌یې له قدرته لیرې او په کور کې نظربند کړه، د وېډیویي کنفرانس له لارې په دې محاکمه کې چې په پلازمېنه نیپیداو کې جوړه شوې وه، راڅرګنده شوه او روغتیایي وضعیت‌یې ښه ښکارېده.

سوچي هېواد ته په غیر قانوني توګه د واکي ټاکي د مخابرو د واردولو، د برما د طبیعي افتونو له قانون او د 'کووېډ-۱۹' ناروغۍ له امله له لګول شویو بندیزونو څخه په سرغړونه تورنه شوه.

له کله چې هغه له قدرته لیرې شوې، په تېره یوه میاشت کې په دې هېواد کې مظاهرې پیل شوې دي.

اعتراض کوونکي، د ملکي حکومت د بېرته اعادې او د سوچي او د هغې د ګوند د نورو غړو د خوشې کېدو غوښتنه کوي.

نتانیاهو عمان خلیج کې د اسرائیل پر یوې کښتۍ برید د ایران کار وباله

د اسرائیل صدراعظم بنیامین نتانیاهو

د اسرائیل صدراعظم بنیامین نتانیاهو ایران تورن کړ چې تېره اوونۍ یې په عمان خلیج کې د اسرائیل پر یوې بار وړونکې کښتۍ برید کړی، هغه ادعا چې تهران رد کړې ده.

بنیامین نتانیاهو د اسرائیل له دولتي راډیو، کان سره په مرکه کې چې نن خپره شوې وویل، دا واضح ده چې دا برید د ایران کار و. نوموړي ایران د اسرائیل لوی دښمن وباله چې په وینا یې کلک هوډ لري چې مخه به‌یې نیسي.

د اسرائیل صدراعظم د دې پوښتنې په ځواب چې ایا اسرائیل به د دغه برید په وړاندې غبرګون وښیي، وویل، دوی په ټوله سیمه کې د ایران پر هدفونو ګوزارونه کوي.

د ایران د بهرنیو چارو وزارت ویاند سعید خطیب‌زاده دغه ادعا چې ګوندې هېواد یې پر بار وړونکې کښتۍ په برید کې لاس درلود، په کلکه رد کړه او ویې‌ویل، نتانیاهو د هغه په ټکو له ایران سره سودایي شوی دی.

د اسرائیل دغه کښتۍ چې موټر یې لېږدول، د سعودي عربستان د دمام له بندره سنګاپور ته په لاره وه چې د فبرورۍ په ۲۵مه پرې یوه چاودنه وشوه.

په دغه چاودنه کې چاته زیان نه‌دی رسېدلی، خو اسرائیلي مالک‌یې ویلي چې چاودنې د کښتۍ یوه خوا د یو نیم مترو په شعاع دوه ځایه سورۍ کړې ده.

د ایران له لوري د خبرو لپاره د غونډې د وړاندیز پر ردولو د امریکا خواشیني

ارشیف، د ایران او امریکا بیرغونه

واشنګټن د تهران پر هغه اقدام خواشیني څرګنده کړه چې پرون‌یې د امریکا له متحده ایالاتو او له اروپایي قدرتونو سره د ۲۰۱۵ کال د تړون د احیا پر سر د خبرو لپاره د غیر رسمي غونډې وړاندیز رد کړ.

تهران ټینګار وکړ چې واشنګټن دې لومړی ټول یو اړخیز بندیزونه لیرې کړي.

د سپیني ماڼۍ ویاندې جن ساکي وویل، که څه هم د ایران دغه ځواب موږ خواشیني کړي یو، خو دې ته چمتو یو چې د دغه تړون د عملي کېدو لپاره په بامفهومه ډیپلوماسۍ کې بېرته ښکېل شو.

جن ساکي وویل، واشنګټن به د دغه تړون له نورو لاسلیکوونکو، د ملګرو ملتونو د امنیت شورا له څلورو دایمي غړو چین، فرانسې، روسیې او بریتانیا او له جرمني سره سلا مشورو ته دوام ورکړي.

د ایراني رسنیو د راپور له مخې د ایران د بهرنیو چارو وزارت ویاند سعید خطیب‌زاده وویل، هغو وروستیو اقداماتو او ویناوو ته په پام چې متحده ایالاتو او درې اروپایي قدرتونو کړي، ایران داسې نه‌انګېري چې اوس دې له دغو هېوادونو سره د غیر رسمي غونډې لپاره چې د اروپایي ټولنې د بهرني سیاست مشر یې وړاندیز کړی، مناسب وخت وي.

ایراني چارواکو له دې مخکې ویلي چې تهران د جوزف بورېل پر دغه وړاندیز غور کوي.

د امریکا پخوانی ولسمشر ډونالد ټرمپ خپل هېواد په ۲۰۱۸ کال له دغه تړونه وایست او پر تهران‌یې بېرته بندیزونه ولګول.

ایران او د امریکا د ولسمشر جو بایډن نوې اداره په دې اړه چې د دغه تړون د احیا لپاره څوک باید لومړی ګام پورته کړي، سره اختلاف لري.

پولیسو  په برما کې لږ تر لږه ۱۸ معترضان وژلي

برما کې د اعتراضونو پر مهال د پولیسو له لوري پر سر ویشتل شوې د یوې معترضې مېرمنې مړی

پولیسو په برما کې لږ تر لږه ۱۸ معترضان وژلي او یو شمېر نور یې ټپیان کړي دي.

دغه معترضان پرون یکشنبه د پولیسو په ډزو وویشتل شول او دغه ورځ د کودتا پر ضد د څو اوونیو اعتراضونو له پيل راهیسې تر ټولو خونړۍ وه.

یوې ښځې هم په غالب ګومان وروسته تر دې د زړه د حملې له کبله ساه ورکړه چې پولیسو په یانګون ښار کې د ښوونکو اعتراض د یوه نارنجک بم په وسیله تیت او پرک کړ.

د ملګرو ملتونو عمومي منشي انتونیو ګوترش د اعتراض کوونکو ځپل په کلکو ټکو غندلي او د اعتراض کوونکو پر ضد یې د وژونکو وسلو کارونه او د هغوی خپل‌سره نیول د نه‌منلو وړ عمل بللی دی.

هغه د وژنې او د خلکو د ټپي کېدو پر زیاتوالي ژوره اندېښنه ښودلې ده.

په برما کې له یوې میاشتې راهیسې چې پوځ کودتا کړې او د ملکي حکومت مشره انګ سان سوچي او د هغې د ګوند یو شمېر نور غړي یې نیولي، اعتراضونه پیل شوي دي.

ایران له امریکا او اروپایي قدرتونو سره د خبرو لپاره د غونډې وړاندیز رد کړ

د تهران ښار یوې څنډه کې د ایران بیرغ

ایران پرون د امریکا له متحده ایالاتو او له اروپایي قدرتونو سره د ۲۰۱۵ کال د تړون د احیا پر سر د خبرو لپاره د غیر رسمي غونډې وړاندیز رد کړ.

تهران ټینګار وکړ چې واشنګټن دې لومړی ټول یو اړخیز بندیزونه لیرې کړي.

د ایراني رسنیو د راپور له مخې د ایران د بهرنیو چارو وزارت ویاند سعید خطیب‌زاده وویل، هغو وروستیو اقداماتو او ویناوو ته په پام چې متحده ایالاتو او درې اروپایي قدرتونو کړي، ایران داسې نه‌انګېري چې اوس دې له دغو هېوادونو سره د غیر رسمي غونډې لپاره چې د اروپایي ټولنې د بهرني سیاست مشر یې وړاندیز کړی، مناسب وخت وي.

ایراني چارواکو له دې مخکې ویلي چې تهران د جوزف بورېل پر دغه وړاندیز غور کوي.

د امریکا پخواني ولسمشر ډونالد ټرمپ خپل هېواد په ۲۰۱۸ کال له دغه تړونه وایست او پر تهران‌یې بېرته بندیزونه ولګول.

ایران او د امریکا د ولسمشر جو بایډن نوې اداره په دې اړه چې د دغه تړون د احیا لپاره څوک باید لومړی ګام پورته کړي، سره اختلاف لري.

نور راوښيه

XS
SM
MD
LG