د لاسرسۍ وړ لېنکونه

تازه خبر
پنجشنبه ۹ سلواغه ۱۳۹۹ کابل ۰۷:۱۶

افغانستان

له افغانستانه د جاسوسۍ په تور د چینايي وګړو اېستل او د چین بې خبري

د افغانستان او چین ګډ بیرغونه

د چین د بهرنیو چارو وزارت له افغانستانه د جاسوسۍ په تور د یو شمېر چینايي وګړو د ایستلو د راپورونو په اړه بې خبري ښودلې.

د رویټرز خبري اژانس د راپور له مخې د افغانستان د ملي امنیت عمومي رئیس احمدضیا سراج د دوشنبې په ورځ د پارلمان په غونډه کې د چینايي جاسوسانو د یوې شبکې د نیولو خبره تایید کړه، خو د موضوع د حساسیت له کبله یې په دې اړه د جزئیاتو له ورکولو ډډه وکړه.

آژانس د هندوستان ټایمز ورځپاڼې د راپور په حواله لیکي چې په ډسمبر میاشت کې د چین د استخباراتو لږ تر لږه لس غړي په کابل کې ونیول شول او وروسته له دې چې حکومت بښنه ورته وکړه، له افغانستانه وایستل شول.

د چین د بهرنیو چارو وزارت ویاند هو- چون- یېنګ پرون پنجشنبې په یوه خبري غونډه کې د هندوستان ټایمز ورځپاڼې د راپور په اړه د یوې پوښتنې په ځواب کې وویل چې دی په دې اړه مالومات نه لري.

د افغان حکومت درېیو جګ پوړو چارواکو رویټرز خبري آژانس ته ویلي، ۱۳ چینايي وګړي چې د ساختمان او ترکاڼۍ په برخو کې یې کار کاوه او یو کلینیک او یوه نانوايي یې هم لرله له افغانستانه ایستل شوي دي.

د ورځې تازه خبرونه دلته ولولئ

ایران: طالبان امریکا سره په خپله مبارزه کې ولاړ دي

د ایران د ملي امنیت شورا مشر علي شمخاني

د ایران د ملي امنیت شورا مشر وایي، د طالبانو ډله له امریکا سره په خپله مبارزه ولاړه ده.

علي شمخاني نن چهارشنبه (د سلواغې ۸مه) د طالبانو له سیاسي پلاوي سره په تهران کې تر خبرو وروسته په ټویتر کې ولیکل چې د طالبانو له سیاسي پلاوي سره تر لېدو وروسته مې دوی داسې وموندل چې د امریکا پرضد پر خپله مبارزه ولاړ دي او هغه څوک چې ۱۳ کاله یې په ګوانتنامو کې تر شکنجې لاندې تېر کړي دي، کله هم د امریکا پرضد له مبارزې لاس نه اخلي.

بل لور ته د افغانستان د ملي امنیت شورا وایي چې طالبانو په قطر کې د سولې خبرې پرې ایښې دي او سفرونه یې پيل کړي دي.

د ملي امنیت د شورا ویاند رحمت اله اندړ په یوه پیغام کې چې رسنیو ته یې استولی ویلي، پرته له دې چې ایران ته د طالبانو د پلاوي تازه سفر ته اشاره وکړي، زیاته کړه: "د دې معنا دا ده چې طالبان مذاکراتو او سولې ته ژمن نه دي دوی ته د جګړې اوږدېدل او د افغانانو د وژلو دوام هېڅ ارزښت نه لري سره له دې چې تر اوسه امریکا د دوحې هوکړه لیک نه دی ارزولی، خو داسې ښکاري چې طالبان وار له مخه له پایلو ویریږي، سفرونو ته یې مخه کړې ده."

د طالبانو د سیاسي دفتر د مشر ملابرادر په مشرۍ د پلاوي نن دوهمه ده چې په ایران کې دی.

د ناټو سرمنشي سټولټنبرګ له جوبایډن سره پر افغانستان غږېدلی

ارشیف، د ناټو سرمنشي ینس سټولټنبرګ د امریکا د متحد ایالتونو له نوي ولسمشر جوبایډن سره

د ناټو سرمنشي ینس سټولټنبرګ د امریکا د متحد ایالتونو له نوي ولسمشر جوبایډن سره په ټیلیفون د یو شمېر نورو موضوعاتو ترڅنګ د افغانستان په اړه خبرې وکړې.

په دې ټیلیفوني مکالمه کې چې تېره شپه وه، ینس سټولټنبرګ ښاغلي بایډن ته د امریکا د شپږ څلویښتم ولسمشر په توګه مبارکي ورکړه او د نړیوال ترورېزم په ارتباط یې هم خبرې ورسره وکړې.

راتلونکې میاشت په بروکسل کې د ناټو د دفاع وزیرانو غونډه ده.

تمه ده چې دې غونډه کې ناټو په افغانستان کې د خپلو ځواکونو د ماموریت په اړه پریکړه وکړي.

امریکا له طالبانو سره د تېر کال فبروري په تړون کې منلې ده چې خپل ټول ځواکونه به له افغانستانه باسي، خو د جوبایډن په مشرۍ نوې اداره غواړي چې دې تړون ته بیا کتنه وکړي.


ملي امنیت شورا: طالبانو د سولې خبرې پرې ایښي او په سفر وتلي

محمد نعیم ویلي، د ملابرادر په مشرۍ طالب پلاوی ایران ته تللی

د افغانستان د ملي امنیت شورا وایي چې طالبانو په قطر کې د سولې خبرې پرې ایښې دي او سفرونه یې پيل کړي دي.

د ملي امنیت د شورا ویاند رحمت الله اندړ په یوه پیغام کې چې رسنیو ته یې استولی دی، پرته له دې چې ایران ته د طالبانو د پلاوي تازه سفر ته اشاره وکړي، زیاته کړه: "د دې معنا دا ده چې طالبان مذاکراتو او سولې ته ژمن نه دي، دوی ته د جګړې اوږدېدل او د افغانانو د وژلو دوام هېڅ ارزښت نه لري سره له دې چې تر اوسه امریکا د دوحې هوکړه لیک نه دی ارزولی، خو داسې ښکاري چې طالبان وار له مخه له پایلو ویریږي، سفرونو ته یې مخه کړې ده."

بل لور ته د طالبانو د قطر د دفتر ویاند محمد نعیم په یوه پیغام کې چې رسنیو ته یې لیږلی دی، ویلي دي چې د دوی د سیاسي دفتر د مشر ملا برادر په مشرۍ پلاوي نن ایران ته د دې هیات د سفر په دوهمه ورځ د ایران د ملي امنیت شورا له مشر علي شمخاني سره کتلي دي.

هرات کې د تنکیو ځوانانو ترمنځ د فوټبال سیالۍپیل شوې

هرات کې نن چهارشنبه (د سلواغې ۸مه) د ١٢ کلنو تنکیو ځوانانو ترمنځ د فوټبال سیالۍ پیل شوې.

د هرات د ورزش ریاست فني مدیر ضیاالحق ضیا ازادي راډیو ته وویل\ چې دغه سیالۍ د هرات د ١٤ لوبډلو ترمنځ کېږي.

ښاغلی ضیا وایي، د سیالیو موخه ولایتي سیالیو لپاره د غوره استعدادونو موندل دي.

د نوموړي په وینا، د دې سیالیو په لومړۍ لوبه کې نن د اریانا او انصاري ټیمونو سیالي وکړه او اریانا ټیم درې د صفر په وړاندې لوبه وګټله.

ټاکل شوې، چې سبا دوه لوبې تر سره شي.

په دغو سیالیو کې به باختر له هیواد او اتک انرژی له افغان لوبډلې سره مخ شي.

د ۱۴ لوبډلو له منځه به یوه غوره لوبډله ولایتي سیالیو ته انتخاب شي.

د ننګرهار په کرنيز نندارتون کې ۳۵ هوکړه ليکونه لاسليک شول

په ننګرهار کې د کرنيزو توکو د نندارتون يوه څنډه

د ننګرهار په کرنيز نندارتون کې ۳۵ هوکړه ليکونه لاسليک شول.

د افغانستان د کرنې او مالدارۍ وزارت ویاند اکبر رستمي نن ازادي راډیو ته وویل، چې د ننګرهار کرنې، اوبو لګولو اومالدارۍ ریاست په نوښت په دې ولايت کې "کرنه د وطن ابادي" تر شعار لاندې دوه ورځنۍ کرنيز نندارتون جوړ شوی و، چې په ترڅ کې يې د سوداګرو، پانګه والو او بزګرانو ترمنځ ۳۵ هوکړه ليکونه لاسليک شول.

ياد نندارتون د روانې اوونۍ د دوشنبې په ورځ د کرنې وزير ډاکتر انوارالحق احدي او د ننګرهار والي ضياالحق امرخېل له خوا پرانيستل شو چې نن پای ته ورسېد.

یاد نندارتون په ۱۷۳ غرفو کې کرنيز توکې لکه سابه، وچې او تازه مېوې، شات، زراعتي او تیلي نباتات، کرنيزې توکي او درمل، تصدیقي نیالګي، د نجارۍ برخې تولیدات، لبنیات او نور ګڼ شمېر توکې نندارې ته اېښودل شوي وو.

د مسوولينو په وينا نندارتون د جوړولو موخه کورنيو تولیداتو ته په کور دننه بازارموندنه او هېوادوالو ته د اصلي باکيفيته توليداتو پېژندل و.

د افغانستان بانک: په ختیځ کې له افغانیو ګته اخیستنه ۹۴ سلنې ته رسېدلې

آرشیف

په ۱۳۹۹ لمریز کال کې په ختیځ زون کې له افغانیو څخه ګته اخیستنه، ۹۴ سلنې ته رسېدلې ده.

د افغانستان بانک د بانکي څارنې څانګې رییس، نثار احمد یوسفزي پرون ملت ته د دولت حساب ورکولو په کنفرانس کې وویل، هڅه روانه چې په ختیځ زون کې په بشپړه توګه افغانۍ وکارول شي.

د افغانستان بانک وايي، مخکې کلونو کې په ختیځ زون کې په معاملاتو کې د افغانیو کارونه شاوخوا ۱۴ سلنه وه. خو په ۱۳۹۹ کال کې په یاد زون کې د تر سره شوې سروې له مخې، له افغانیو څخه ګته اخیستنه، ۹۴ سلنې ته رسېدلې ده، چې د افغانستان بانک او پیسو سیاست د بریالیتوب ښکارندویي کوي.

نوموړي همدارنګه وویل، چې د ۱۳۹۹ مالي کال له پیل څخه تر دې مهاله د ډالرو په مقابل کې د افغانیو د تبادلې نرخ ۱.۷۸ سلنه زیات شوی دی.

ښاغلي یوسفزي وویل، د افغانستان بانک رهبرۍ، په بانکونو کې د خلکو بانکي حسابونو د ساتنې او خوندیتوب لپاره پرېکړه وکړه چې دغه حسابونه بیمه شي.

چارواکي: په ارزګان کې چاودنې ١۵ کسانو ته مرګژوبله واړوله

آرشیف

د ارزګان ولایت په مرکز ترینکوټ کې یوې چاودنې دوه ملکیان وژلي او دیارلس کسان یې ټپيان کړي دي دي.

د ارزګان ولایت مقام په یوه اعلامیه کې ویلي، چې په یوه موټرسایکل کې د ځای پر ځاش شوي بم د چاودنې په نتیجه کې دا مرګژوبله اوښتې ده.

د اعلامیې له مخې په ټپیانو کې دری پولیس هم شامل دي.

اعلامیه زیاتوي لومړی یوه کوچنۍ چاودنه په ترینکوټ ښار کې د منار څلور لاري د پولیسو پوستي ته نږدې وشوه کله چې خلک ورټول شول نو سمدستي د موټر سایکل بم چاودنه وشوه.

د ارزګان ولایت د ولایتي روغتون رئیس امین الله توخي ازادي راډیو ته وویل، چې روغتون ته له نهو ور انتقال شویو ټپيانو یوه ساه ورکړې او د نورو وضعه هم ښه نه ده.

د ارزګان ولایت د امنیه قوماندانۍ مسولین دغه پیښه تائیدوي او له دې پرته چې کره شمېر ووايي زیاتوي، چې ملکي خلکو او پولیسو ته مرګ ژوبله اوښتې ده.

د دغې پېښې مسولیت تراوسه کومې وسله والې ډلې نه دی منلی.

امریکا پر "اى سي سي" د افغانستان د جنګي جرمونو په اړه لګول شوي بنديزونه ارزوي

د نړيوالې جنایي محکمې ودانۍ

امریکا پر نړیواله جنايي محکمه د پخواني ولسمشر ډونالډ ټرمپ هغه بندیزونه ارزوي چې په دې محکمې یې د افغانستان د احتمالي جنګي جرمونو د څېړنې په سبب لګولي وو.

پخواني ولسمشر ډونالډ ټرمپ د ۲۰۲۰ کال جون میاشت د یوه اجرايي فرمان په ترڅ کې د نړیوالي جنايي محکمې ځینې کارکوونکي امریکا ته له تګه منع کړل او شتمنۍ یې ورته کنګل کړې.

د امریکا متحده ایالتونو په نوې اداره کې د بهرنیو چارو وزارت ویاند ازادې اروپا راډیو ته په یوه ایمیل کې لیکلي: "تر کومه ځایه چې موږ د افغانستان او اسراییل/فلسطین د شرایط په تړاو د ای سي سي له کړنو سره مخالف یو، د راتلونکو اقداماتو لپاره به موږ دا بندیزونه په بشپړه توګه ورزاوو."

د نړیوالې جنايي محکمې له خوا په افغانستان کې له امریکايي ځواکونو او استخباراتي چارواکو پلټنې پيل شوې وې څو معلومه کړي چې امریکايي ځواکونو جنګي جرمونه کړي که نه.

امریکا په نړیوالې جنايي محکمې تور ولګاوه، چې د پلټنو د اجازې له ترلاسه کولو وروسته یې د امریکا ملي حاکمیت نقض کړی دی.

په پکتیا کې د ۴۵۰ میلیونه افغانیو په ارزښت دوه پروژې پرانيستل شوې

په پکتیا کې د دوو پروژو د پرانيستې مراسمو يو انځور

د پکتیا په مرکز ګردېز کې د ولسي تړون او د ملي دسترخوان د دوو پروګرامونو پرانیسته وشوه.

د سیمه یېزو ارګانونو د خپلواکې ادارې رئیس شمیم خان کټوازی چې د لوګر او خوست ولایتونو له سفر وروسته پکتیا ته راغلی، دلته یې د ۴۵۰ میلیونه افغانیو په ارزښت د ولسي تړون او د ملي دسترخوان پروژې پرانیستې.

نوموړی وایي، یادې پروژې به د پکتیا په مرکز ګردېز کې د هغو شوراګانو لخوا پلي شي، چې د خلکو په رایو ټاکل شوي.

شمیم خان کټوازي وویل، چې دواړه پروګرامونه د خلکو په خوښه د شوراګانو له خوا ترسره کېږي، چې له مخې یې د فساد د ترسره کېدو فرصت ډېر کم لیدل کېږي.

هغه زياتوي: "په لومړي قدم کې۴۵۰ میلیونه افغانۍ بودیجه ورته په نظر کې نیول شوې ده او دا به نوره هم زیاتېږي، ښه داده چې دواړه پروګرامونه د ولس لپاره دي او د دوی له خوا نه عملي کېږي."

د ۲۵۴ میلیونه افغانیو په ارزښت د ولسي تړون او د ۱۸۵ میلیونه افغانیو په ارزښت د ملي دسترخوان دغه پروګرامونه به د پکتیا په مرکز ګردیز په ۶ ناحیو کې د ۳۰ پراختیایي شوراګانو له لارې د سړکونو او کوڅو جوړولو، برېښنایي اسانتیاوو برابرولو، د تفریحي ځایونو جوړولو او د ښځو ځواکمنتیا په برخو کې بېلابېلې پروژې پلي کړي او د ۱۱۴ پراختیایي شوراګانو له لارې به د ګردیز ښار ۲۳ زره بې وزله کورنیو ته د څلور زره افغانیو په لګښت خوراکي مواد وویشل شي.

افغان کرکټ ملي ټیم له ایرلنډ درېیمه یو ورځنۍ نړیواله لوبه هم وګټله

د افغانستان کرکټ ملي لوبډله د دغو سياليو اتلولۍ خپله کړه.

د افغانستان د کرکټ ملي ټیم له ایرلنډ څخه د کرکټ درېیمه یو ورځنۍ نړیواله مسابقه هم وګټله.

پرونۍ لوبه افغانستان پیل کړه، چې په پنځوسو اوورنو کې یې د ۹ لوبغاړو په سوځېدو مقابلې لوبډلې ته د ۲۶۷ منډو هدف وټاکه.

ایرلنډ ونه توانېد ورکړل شوی هدف پوره کړي، ټول لوبغاړي یې په داسې حال کې وسوځېدل چې اته څلوېښتم اوور روان و او د ګټلو لپاره ۳۶ نورې منډې ورته په کار وې.

د کرکټ بورډ ویاند فرید هوتک ازادۍ راډیو ته وویل، افغانستان ۳۰ نومرې ترلاسه کړې.

هغه زياتوي: "افغانستان په درېیمه لوبه کې هم د ایرلنډ د کرکټ ملي لوبډله ماته کړله او ویې کړای شول نړیوال جام ته د لار موندنې په درجه بندۍ کې په ټوله کې ۳۰ نومرې ترلاسه کړي."

دغه درې یو ورځنۍ یا پنځوس اووره نړیوالې مسابقې په متحده عرب اماراتو کې وشوې.

د ایران د بشري حقونو سازمانونو پر افغانانو د بريدونو زیاتېدل وغندل

په کابل کې د چاودنې وروسته د سيمې انځور. Dec. 20, 2020

د ایران د بشري حقونو ۸ سازمانونو په افغانستان کې پر مدني فعالانو او ملکیانو د حملو زیاتېدل وغندل.

دغو سازمانونو په ګډه اعلامیه کې، په افغانستان کې د بشري حقونو پر فعالانو، خبریالانو او نورو څېرو د هدفي وژنو د مخنیوي غوښتنه وکړه.

د دغو سازمانونو له ډلې په ایران کې د بشري حقونو کمپاین، د درېیمې عرصې سازمان، د ایران لپاره د اتحاد سازمان، په ایران کې د اذرباییجاني وګړو د بشري حقونو د دفاع ټولنې او په ایران کې د کردستان د بشري حقونو ټولنې دغه اعلامیه لاسلیک کړې ده.

په وروستیو درېیو میاشتو کې د ازادی راډیو د خبریال محمد الیاس داعي تر څنګ لږ تر لږه پنځه خبریالان هم په هدفي حملو کې وژل شوي دي.

په همدې حال کې د افغانستان د ازادو رسنیو د ملاتړ ادارې یا نی اجرائیه مشر مجیب خلوتګر د خبریالانو د قتل په تور د نیول شویو کسانو د علني محاکمې غوښتنه وکړه.

هغه وویل: "موږ د هغو کسانو د علني محاکمې غوښتنه کوو، چې د خبریالانو د وژنې او یا د دوی په وړاندې د تاوتریخوالي په تور نیول شوي دي. د رسنیو کورنۍ او ځینو خلکو پر عدلي او قضايي ارګانونو خپل اعتماد له لاسه ورکړی."

د افغانستان د سترې محکمې مطبوعاتي څانګې د دغو تورنو کسانو د علني محاکمې د غوښتنې په باب له تبصرې ډډه وکړه.

"طالبان او القاعده شبکه په خپلو کې نه شلول کېدونکې اړیکې لري"

په غزني کې د طالبانو له لوري جوړ شوى چېک پواينټ. 2020.1.11

د افغانستان د ملي امنیت شورا وايي وسله وال طالبان او القاعده شبکه په خپلو کې نه شلول کېدونکې اړیکې لري.

د دې شورا ویاند، رحمت اله اندړ پرون سې شنبه رسنیو ته په یوه ویډیويي پیغام کې وویل، طالبانو په دوحه کې له امریکا سره په موافقه کې له القاعده او نورو افراطي ډلو سره د اړیکو پرې کولو ژمنه کړې وه.

هغه زياتوي: "په تېرو درېیو میاشتو کې د طالبانو په لیکو کې د القاعده شبکې ۱۱ غړي د ملي امنیت [عمومي ریاست] له خوا نیول شوي او درې مشران یې وژل شوي دي."

د طالبانو یوه ویاند ذبیح اله مجاهد پرون ازادۍ راډیو ته وویل، طالبان اوس له القاعده شبکې سره اړیکې نه لري.

تر دې مخکې د امریکا خزانې وزارت ویلي، چې القاعده شبکه د طالبانو تر ولکې لاندې د پراختیا په حال کې ده.

د غزني سیمه ییز چارواکي: ناڅرګندو وسله والو یو قومي مشر وواژه

په غزني کې یو قومي مخور او ټولنیز فعال ډګروال عبدالرازق اندړ

په غزني کې یو قومي مخور او ټولنیز فعال ناڅرګنده کسانو وژلی دی.ددې ولایت چارواکي وايي، پر ډګروال عبدالرازق اندړ وسله والو کسانو د خپل کور مخې ته برید کړی دی.

د غزني د والي ویاند واحدالله جمعه زاده د سې شنبې (د سلواغې ۷مه) ورځ ماښام ناوخته ازادي راډیو ته وویل: "نن ماښام مهال د غزني مرکز اړوند د څلورمې حوزې په قلعه نو سیمه کې ناپېژانده وسله والو د غزني یو قومي مخور او پخوانی ډګروال د خپل کور مخې ته په شهادت رسولی دی."

تر اوسه پورې کومي ډلې د دغه پېښې پړ پر غاړه نه ده اخیستې.

ارزګان چارواکي: ترینکوټ کې غبرګو چاودنو دوه ملکیان وژلي

د چاودنې له ځایه د ترینکوټ روغتون ته راوړل شوي ټپیان

د ارزګان ولایت په مرکز ترینکوټ ښار کې غبرګو چاودنو ۱۵ تنو ته مرګ ژوبله واړوله.

د ارزګان ولایت د رسنیز دفتر د خبرپاڼې له مخې دې چاودنو دوه ملکیان ووژل او د درېیو پولیسو په ګډون یې ۱۳ ملکي کسان ټپیان کړل.

دغه اعلامیه کې راغلي چې چاودېدونکي توکي پر یوه موټر سایکل بار و چې له امله یې دا پېښه رامنځته شوه.

خبرپاڼه کاږي، لومړی چاودنه د ترینکوټ ښار د منار څلور لاري د پولیسو یوې پوستې ته نږدې وشوه، کله چې خلک پر ټپیانو ورټول شول، سمدستي د موټر سایکل بم چاودنه وشوه.

هاخوا د ارزګان ولایت د ولایتي روغتون رئیس امین الله توخي ازادي راډیو ته وویل، د پېښې له ځایه ورته ۹ کسان ور وړل شوي چې یو په کې وژل شوی او ۸ نور ټپیان دي.

نوموړی وايي، ټپیانو کې ۶ تنه ملکي وګړي دي او دوه نور هغه یې پولیس دي چې ده د ټپیانو روغتیايي حالت ناسم ښودلی.

خو سیمه کې عیني شاهدان دا هم وايي، دغه پېښه کې دوه نور پولیسان هم وژل شوي دي.

د ارزګان ولایت د امنیه قوماندانۍ مسولین هم پیښه تائیدوي او وايي چې ملکي خلکو او پولیسو ته په کې مرګ ژوبله اوښتې خو وايي، د کره شمېر په اړه يې معلومات نه لري.

د دغه پېښې مسولیت تراوسه کومې وسله والې ډلې نه دی منلی.

هند افغانستان ته د کرونا ۵۰۰ زره ډوزه واکسین ورکوي

ارشیف، عکس تئزیني بڼه لري

هند افغانستان ته د کرونا پنځه سوه زره ډوزه واکسین ورکوي.

په هند کې د افغانستان سرپرست سفیر طاهر قادري په ټویټر کې لیکلي دي چې دا واکسین به ډېر ژر افغانستان ته واستول شي او د کرونا د مخنیوي په بیړنیو چارو کې به ګټه ترې واخېستل شي.

په افغانستان کې تر اوسه په کرونا ویروس څلورپنځوس زره اووه سوه پنځوس تنه اخته شوي دي او د دې ناروغۍ د تلفاتو رسمي شمېرې دوه زره درې سوه نهه اتیا ته رسیدلي دي.

نور راوښيه

XS
SM
MD
LG