د لاسرسۍ وړ لېنکونه

تازه خبر
یکشنبه ۵ سلواغه ۱۳۹۹ کابل ۰۴:۰۰

افغانستان

کابل کې چاودنې د ولسمشرۍ ماڼۍ د چارو ادارې یو لوړپوړی چارواکی ټپي کړ

ارشیف

د ولسمشرۍ ماڼۍ د چارو ادارې یو لوړپوړی چارواکی د ماین په چاودنه کې ټپي او موټر چلوونکی یې ووژل شو.

چاودنه نن سهار د کابل چهلستون (نه برجه) سیمه کې د چارو ادارې د سلاکارانو د انسجام ریاست د مرستیال جاوېد ولي پر موټر شوې ده.

د چارو ادارې مشر فضل محمود فضلي پر خپله ټویټرپاڼه دا خبر خپور کړی او ویلي یې دي چې "د افغانستان دښمنان دومره ذلیل او بې‌وسه شوي چې د ملکي او پوځي اهدافو ترمنځ توپير نه‌کوي".

د کابل پولیسو هم د مقناطیسي ماین دا چاودنه تأیید کړې، خو دا یې نه‌دي ویلي چې هدف‌یې څوک و.

بل لور ته په جلال‌اباد ښار کې نن سهار یوې ورته چاودنې د عامه ساتنې دوه پولیس ټپیان کړل او یو رېکشا چلوونکی یې وواژه.

د دواړو چاودنو مسؤلیت تر اوسه کومې وسله‌والې ډلې پر غاړه نه‌دی اخیستی.

د ورځې تازه خبرونه دلته ولولئ

افغان حکومت د امریکا او طالبانو ترمنځ د شوې هوکړې له بيا کتنې هرکلى وکړ

په قطر کې د سولې د بين الافغاني مذاکراتو د پرانيسغونډې انځور. 12.9.2020

د سولې په چارو کې د دولت وزارت د امریکا د نوي ولسمشر د هغې پرېکړې هرکلی وکړ، چې ویلي یې دي د امریکا او طالبانو ترمنځ د شوې موافقې بیاکتنه کوي.

د سولې په چارو کې د دولت د وزارت یوه معین عبداله خنجاني په دې اړه نن په یوه ویډیويي پیغام کې وویل: "د افغانستان اسلامي جمهوریت په دوحه کې د امریکا او طالبانو ترمنځ د شوې موافقې د بیاکتنې لپاره د امریکا د متحدو ایالتونو د پرېکړې هرکلی کوی. په عین حال کې غوښتنه لري چې دغه ارزونه د افغانانو له غوښتنې سره برابره وي، چې هغه په افغانستان کې د تاوتریخوالي سمدستي ختمېدل او یوې پایداره او عادلانه سولې ته رسېدل دي."

د طالبانو او امریکا ترمنځ د شوې موافقې پر بیاکتنې د افغانستان او امریکا د ملي امنیت سلاکارانو حمد اله محب او جېک سالیوان پرون ټیلیفوني خبرې وکړې.

ښاغلي سالېوان ویلي، امريکا به له طالبانو سره د ۲۰۲۰ م کال په فبروري کې د سولې شوې موافقه، له نورو ټروريسټي ډلو سره د طالبانو د اړيکو، په افغانستان کې د تاوتريخوالي کمښت او له افغان دولت سره د معنی دارې سولې مذاکراتو په رڼا کې و ارزوي.

په کابل کې د سوک وهنې سیالۍ پیل شوې

آرشیف

په کابل کې نن د سوک وهنې سیالۍ پیل شوې.

د افغانستان د المپیک ملي کمېټې مطبوعاتي مسوول مجیب قاریزاده نن ازادي راډیو ته وویل، چې په ه دغه سیالیو کې د کابل له څلورو زونونو ۶۴ لوبغاړو ګډون کړی.

د نوموړي په وینا، د نن ورځې په لوبه د اختري د نخبګان چهاردهي ټیم د کابل شاهین لوبډلې سره میدان ته ووته چې نخبګانو ټیم په ټوله کې د ډېرو امتيازونو په تر لاسه کولو سره بریا خپله کړه.

ټاکل شوې، چې د پنجشنبې په ورځ پلنګ ها لوبډله د کابل له اژدها لوبډلې سره مخ شي.

د سوک وهنې دغه سیالۍ به ٢٠ ورځې روانې وي.

د سیالیو هدف د غوره څېرو پېژندل په ګوته شوي.

د ارزګان چارواکي: ګیزاب ولسوالۍ د وسله والو طالبانو له شتونه پاکه شوه

ارشیف، ارزګان کې افغان امنیتي ځواکونه د عملیاتو پر مهال

ارزګان کې چارواکي وايي، د دې ولایت د ګېزاب ولسوالۍ د وسله والو طالبانو له شتون څخه پاکه شوې ده.

د ارزګان والي چې تازه د ګېزاب ولسوالۍ څخه مرکز ترينکوټ ته راستون شوی وايي، د ګیزاب جګړه کې ۵۰ وسله وال طالبان او دوه سرتيري وژل شوي او ۲۵ وسله وال طالبان ټپیان دي او په همدې جګړه دده په وینا ۱۸ ملکیانو ته هم مرګ ژوبله اوښتې.

د ارزګان والي محمدعمر شېرزاد زیاتوي: "ګېزاب ولسوالۍ کې زيات شمېر خلک له خپلو مېنو بې ځايه شوي او افغان حکومت به ډېر ژر د دغو بې ځايه شوېو کورنيو سره مرستې وکړي."

وسله والو طالبانو د دغو ادعاوو په اړه لا څه نه دي ویلي.

دا په داسې حال کې ده چې د ارزګان ګېزاب ولسوالۍ کې وسله والو طالبانو له تېرو څو مياشتو راهیسې بريدونو ته زور ورکړی.

افغان حکومت د مالیې وزیر عبدالهادي ارغندیوال له دندې لېرې کړ

عبدالهادي ارغندیوال

د افغانستان حکومت د مالیې وزیر عبدالهادي ارغندیوال له دندې د لېرې کېدو اعلان وکړ.

د چارو ادارې په حواله، د ولسمشر د جلا حکمونو له مخې محمد خالد پاینده د مالیې وزارت د سرپرست په توګه ټاکل شوی دی.

د ښاغلي ارغندیوال د ګوښه کېدو علت د عوایدو ټولولو کموالی، په وزارت کې د غیر قانوني ګمارنو په اړه له ټاکل شوي هیئت سره نه همکاري، کمزوری مدیریت او ښې حکومتوالۍ ته نه ژمنتیا ښوول شوې ده.

د چارو ادارې په اعلامیه کې د نورو جزئیاتو له وړاندې کولو پرته بل دلیل دا ښوول شوی چې ښاغلي اغندیوال د جمهوري ریاست له حکمونو سرغړونه کوله.

عبدالهادي ارغندیوال چې د خپلې برطرفۍ په اړه یې لا څرګندونې نه دي کړي، د لیندۍ یا قوس میاشتې پر لومړۍ نېټه د ۲۰۵ مثبتو رایو په ترلاسه کولو د ولسي جرګې له خوا د مالیې وزیر په توګه تایید شوی و.

د افغانستان د بهرنیو چارو وزیر سعودي چارواکو سره پر سوداګرۍ وغږېد

د افغانستان د بهرنیو چارو وزیر او د سعودي عربستان د سوداګرۍ وزیر د همکاریو پر پراختیا هوکړه وکړه

د افغانستان د بهرنیو چارو وزیر د سعودي عربستان د سوداګرۍ له وزیر سره د سوداګریزو، پانګونې او پراختیایي اړیکو پر پراختیا خبرې وکړي.

محمد حنیف اتمر په ریاض کې د درې ورځني سفر په لړ کې د سوداګرۍ له وزیر له ډاکټر ماجد بن عبدالله القصبی سره د سعودي عربستان له خوا د افغان کارګرو پر ګمارنې هم بحث وکړ.

د افغانستان د بهرنیو چارو وزارت نن شنبه (د سلواغې ۴مه) په یوه اعلامیه کې وویل، په دې کتنه کې سعودي عربستان ته د افغانستان د عمده صادراتو لپاره د ټرانسپورټي کرښو پر پراختیا هم بحث وشو.

د افغانستان د بهرنیو چارو وزارت په جلا اعلامیه کې ویلي چې ښاغلي اتمر د خلیج د همکارۍ شورا له مشر نایف بن فلاح الحجرف سره په کتنه کې د دوه اړخیزو همکاریو تفاهملیک لاسلیک کړ.

د ناروې لومړۍ وزیرې افغانستان کې پر تاوتریخوالي اندېښنه وښوده

جمهوررئیس غني او د ناروې لومړۍ وزیرې ټلیفوني خبرې وکړې

د افغانستان جمهوري ریاست وايي، د ناروې صدارعظمې له ولسمشر محمد اشرف غني سره په خبرو کې د تاوتریخوالي پر زیاتېدو اندېښنه وښوده.

د جمهوري ریاست مرستیال ویاند، دواخان مینه پال نن شنبه (د سلواغې ۴مه) ازادي راډیو ته وویل، محمد اشرف غني او ایرنا سولبرګ تېر ماښام ټیلیفوني خبرې وکړې: "د ناروې لومړۍ وزیرې په افغانستان کې د تاوتریخوالي پر زیاتېدو اندېښنه وښوده. دواړو لوریو د دایمي اوربند پر اړتیا چې د افغانستان د اکثریت خلکو غوښتنه ده، ټینګار وکړ."

د ناروې صدراعظمه پر دغو مسایلو په داسې حال کې له ولسمشر غني سره خبرې کوي چې په قطر کې د دولت او طالبانو مذاکره کوونکي په مذاکرو بوخت دی.

د دولت د مذاکراتي پلاوي غړو ویلي چې په دغو مذاکرو کې به د دایمي اوربند پر موضوع بحث وکړي.

ننګرهار کې د صابون جوړولو ۶ فابریکې فعالیت کوي

ارشیف، د افغانستان صابون

په ننګرهار ولايت کې د صابون جوړولو کار د پراختيا په حال کې دی چې سلګونو کسانو ته په کې د کار زمینه هم برابره شوې ده.

د دغه ولایت د سوداګرۍ او صنعت رئیس محمد حسن محسن نن شنبه (د سلواغې ۴مه) ازادي راډیو ته وویل چې د ننګرهار ولایت په مرکز جلال اباد ښار کې د پنځه میلیونه امریکايي ډالرو په پانګونې سره د جامو او ځان وینځلو د صابون ۶ فابریکې فعالیت کوي چې سلګونه کسانو ته په کې کاري زمینې برابرې شوي او د هېواد ټولو ولایتونو ته په ښه کیفیت صادرات لري.

ښاغلی محسن وایي، ټاکل شوې په دې ولایت کې دوه نورې فابریکې هم فعاله شي چې د برېښنا او ځای اړوند ستونزو په هواري به د ولایتونو سربېره نورو هېوادونو ته هم صادرات وکړي .

د کرونا ویروس نوېو ډولونو اندېښنې زیاتې کړي

ارشیف، عکس تئزیني بڼه لري

د کرونا ویروس نوېو ډولونو د دې ویروس د خپرېدو د لا ډېر خطر په اړه اندېښنې زیاتې کړي دي.

روغتیایي متخصصینو په ځانګړي ډول په بریتانیا، جنوبي افریقا او برازیل کې د دې ویروس د نوېو بڼو په اړ اندېښنې ښودلي چې اوس د نړۍ نورو هېوادونو ته هم رسیدلي دي.

انګېرنه دا ده چې د کرونا ویروس ټولې درې، نوي ډولونه تر لومړني ویروس ډېر د خپرېدو وړتیا لري، دا په دې مانا چې دا چټک خپرېدا به روغتونونه او د روغتیا پالنې سیستمونه له سختیو سره مخامخ کړي.

روغتیایي چارواکو د ویروس د هغې بڼې په اړه چې په بریتانیا کې وپېژندل شوه، ویلي و چې ډېره خطرناکه نه ده، خو پرون د بریتانیا متخصصینو وویل چې شواهد ښیې دا نوې بڼه ویروس د ځینو ډلو لپاره تر پخواني ویروس ۳۰ تر ۴۰ سلنه ډېر وژونکی وي.

ماليې وزارت: د بودجې د تصویب ځنډ بېلابېلې چارې ټکنۍ کړي

ارشیف

د افغانستان مالیې وزارت وايي چې د بودجې په تصویب کې ځنډ په بېلابېلو برخو کې چارې ټکنۍ کړي دي.

د دغه وزارت د رسنيو د برخې امر فرپد نوښت نن شنبه (د سلواغې ۴مه) ازادي راډيو ته وویل، تر ټولو لويه ستونزه دا ده چې د پرمختیایې چارو پر وړاندې يې خنډونه جوړ کړي دي.

د نوموړي په خبره دوی به ډېر ژر بودجه بيا ځلي د تصويب لپاره ولسي جرګې ته ولېږي او تمه لري چې دا ځل يې جرګه تصويب کړي.

د افغانستان مالي کال د مرغومي له لومړۍ پيلېږي او مالي اصول حکم کوي چې د هرکال مالي بودجه باید د کال له پیله مخکې تصویب او تطبیق ته تیاره شي.

ولسي جرګې له دې وړاندې ویلي چې د ۳۴ ولایتونو لپاره په پراختیایي پروژو کې د توازن نشتون، د دولتي کار کوونکو د معاشونو نه يو شانوالی، د ۲۱ زره تشکیلاتو کمښت، د هغه ادارو بودجه چې ولسي جرګې نه ده تصویب کړې او ملي دسترخان هغه موارد دي چې له امله یې ولسي جرګې د ۱۴۰۰ لمریز مالي بودجه رد کړه.

د ۱۴۰۰ مالي کال لپاره ټول ټال ملي بودجه ۴۵۲،۶ میلیارده افغانۍ اټکل شوې ده.

له دې ډلې عادي بودجه ۲۹۶ میلیارده افغانۍ ده چې د ملي بودجې ۶۵ سلنه جوړوي او همدارنګه پراختیایي بودجه د ۱۵۶ میلیارده افغانیو په لرلو سره د ملي بودجې ۳۵ سلنه جوړوي.

د زابل یو چارواکی: شاه جوی کې ۷ طالبان وژل شوي

د افغانستان په نقشه کې د زابل ولایت

په زابل ولایت کې د ملي اردو یوه مسوول د ۷ تنه وسله والو طالبانو د وژل کېدو ادعا وکړه.

د زابل د دویمې پلې لېوا قوماندان سید بابا منصوري نن شنبه (د سلواغې ۳مه) سهار ازادي راډیو ته وویل، تېره شپه ځینو وسله والو طالبانو په شاه جوی ولسوالۍ کې د امنیتي ځواکونو پر پوستو بریدونه پلان کړي وو چې ورباندې حمله وشوه.

ښاغلي منصوري زیاته کړه: "تېره شپه درې بجې شا او خوا طالبانو غوښتل د شاه جوی ولسوالۍ پر امنیتي پوستو حملې وکړي، خوشبختانه په دې حمله کې یې ۷ کسان وژل شوي او ۵ تنه ټپیان دي."

وسله والو طالبانو د دې پېښې په اړه تبصره نه ده کړې.

کرکټ؛ سبا به د افغانستان-ایرلېنډ دوهمه یوه ورځنۍ لوبه ترسره شي

د افغانستان او ایرلنډ ترمنځ د لومړۍ ورځې د لوبې عکس

سبا یکشنبه (د سلواغې۵ مه) د افغانستان او ایرلېنډ د کرکټ د ملي تیمونو دوهمه یوه ورځنۍ لوبه ترسره کېږي.

د کرکټ بورډ ویاند فریدهوتک ازادي راډيو ته وویل: "د افغانستان په کوربه توب د افغانستان د کرکټ ملي لوبډله د ایرلېنډ کرکټ ملي لوبډلې سره درې نړیوالې لوبې ترسره کوي. یوه لوبه ترسره شوې چې په کې افغانستان د ۱۶ منډو په توپیر ایرلېنډ ته ماته ورکړه. سبا به دویمه لوبه د اماراتو په شیخ زاید سټډیوم کې وشي."

د افغانستان او ایرلېنډ د کرکټ ملي لوبډلو تر منځ دا لوبې د ۲۰۲۳ میلادي کال د نړیوال جام سوپرلیګ په لوبو کې راځي چې هره بریا یې لس نومرې ورکوي.

د سوپرلیګ له ۱۳ ټیمونو د سر ۷ راساً نړیوال جام ته وتلی شي.

د ملکي هوايي چلند ادارې د حکمتیار وروستي تورونه رد کړل

د حزب اسلامي مشر ګلبدین حکمتیار

د افغانستان د ملکي هوايي چلند ادارې د حزب اسلامي د مشر ګلبدین حکمتیار تورونه رد کړل چې ویلي یې و بې نوم او نښان الوتکې د حامدکرزي له نړیوال هوايي ډګره قاچاق وړي.

حکمتیار پرون جمعه (د سلواغې ۳مه) د کابل په یوه جومات کې دا تورونه لګولي: "ولې بې لوګو الوتکې راځي؟ ولې یې امنیت د بلې ادارې له خوا نیول کېږي. هغه اداره چې په غلاوو کې شریکه ده. په لوټماریو کې شریکه ده او د هغو خلکو امنیت هم چې د چارواکو خپلوان دي نیسي. بې له کومې ویرې او مانع هر څه چې زړه یې غواړي وړي. طلا دي، پيسې دي ډالر دي. حتماً همدا دي بل څه نه دي."

د افغانستان د ملکي هوایي چلند ادارې بېګا ناوخته د حکمتیار د دغو تورونو په ردولو سره ویلي چې د حامدکرزي په نړیوال هوايي ډګر کې کلک امنیتي څار کېږي او هرکال زرګونه کیلوګرامه مخدره مواد او سره زر کشف او اړوند ادارو ته یې سپاري.

دې ادارې په خپله اعلامیه کې ویلي چې د هېواد ټول سیاسي مشران دې د ګونګوسو له خپرولو وړاندې د ځان د ډاډمنولو لپاره موضوع له دوی سره شریکه کړي، څو د خلکو او رسمي ادارو باور زیانمن نه شي.

سعودي او د اسلامي هېوادونو سازمان: د افغان سولې راوستو کې همکاري کوو

د سعودي عربستان د بهرنیو چارو وزیر فیصل بن فرحان ال سعود له افغان سیال محمد حنیف اتمر سره

سعودي عربستان او د اسلامي هېوادونو د همکارۍ سازمان په افغانستان کې د سولې او پرمختګ د ټينګښت په برخه کې د هڅو ډاډ ورکړی.

د افغانستان د بهرنیو چارو وزارت ویاند ګران هېواد په یوه پیغام کې وویل چې د سعودي د بهرنیو چارو وزیر فیصل بن فرحان آل سعود او د دې هېواد د اسلامي اړیکو د سازمان مشر د افغانستان د بهرنیو چارو وزیر حنیف اتمر ریاض ته د هغه د سفر پر مهال ډاډ ورکړ چې افغانانو ته د سولې په راوستو کې به همکاري وکړي.

ښاغلي هېواد زیاته کړه: "دوی دواړو د افغانستان د سولې له بهیره خپل کره ملاتړ اعلان کړ او د بهرنیو چارو وزیر ته یې ډاډ ورکړ چې د اسلامي نړۍ علماوو او د دیني- مذهبي بنسټونو له خوا به د افغانستان د سولې د ملاتړ په برخه کې هڅه وکړي."

د سعودي د بهرنیو چارو وزیر ښاغلي فیصل ویلي چې ترورېزم او افراطیت ګډ ګواښ دی او له هغه سره مبارزه هم ګډ کار غواړي.

ښاغلی اتمر او ورسره پلاوی د سې شنبې په ورځ د یوه درې ورځني سفر په مخه ریاض ته ورسېدل او پرون یې د سفر وروستۍ ورځ وه.

برېښنا شرکت: تخنیکي ستونزو پر کابل او څو ولایتونو برېښنا پرې کړې

ارشیف، عکس تئزیني بڼه لري

د افغانستان د برېښنا شرکت وايي، د ازبکستان د وارداتي برېښنا په ځینو پایو کې د تخنیکي ستونزو له کبله د کابل او څو نورو ولایتونو برېښنا قطع شوې.

برېښنا شرکت په یوه خبرپاڼه کې ویلي دي چې دا تخنیکي ستونزه د ایبک ښار د برېښنا د سب سټیشن په۵۸ کیلومترۍ کې د بغلان پر لور د برېښنا په پایو کې رامنځ ته شوې ده.

په خبرپاڼه کې راغلي چې د دې شرکت تخنیکي ټیم سیمې ته رسېدلی او هڅه کوي چې دا ستونزه ژر تر ژره حل کړي.

سعودي د افغان جګړې د پای لپاره د اسلامي نړۍ د علماوو ونډه حیاتي بللې

د سعودي عربستان د بهرنیو چارو وزیر فیصل بن فرحان ال سعود له افغان سیال محمد حنیف اتمر سره

د افغانستان د بهرنیو چارو وزارت وايي، سعودي عربستان په افغانستان کې د سولې او پرمختګ د بهیر ملاتړ کوي.

دې وزارت په یوه خبرپاڼه کې چې نن جمعه (د سلواغې ۳مه) خپره شوه ویلي چې د سعودي عربستان د بهرنیو چارو وزیر فیصل بن فرحان ال سعود له خپل افغان سیال حنیف اتمر سره په کتنه کې په افغانستان کې د جګړې د ختمولو او د سیاسي حل لارې د موندلو په برخه کې د اسلامي نړۍ د علماوو ونډه حیاتي بللې.

ښاغلي فیصل ویلي چې ترورېزم او افراطیت ګډ ګواښ دی او له هغه سره مبارزه هم ګډ کار غواړي.

د افغانستان د بهرنیو چارو وزارت خبرپاڼه د ښاغلي اتمر له قوله لیکي وايي، افغان ولسمشر اشرف غني له سعودي عربستان سره د سیاسي او اقتصادي همکاریو د یوه نوي څپرکي پرانېستل غواړي.

ښاغلی اتمر او ورسره پلاوی د سې شنبې په ورځ د یوه درې ورځني سفر په مخه ریاض ته ورسېدل او پرون یې د سفر وروستۍ ورځ وه.

نور راوښيه

XS
SM
MD
LG