د لاسرسۍ وړ لېنکونه

تازه خبر
یکشنبه ۲۸ مرغومی ۱۳۹۹ کابل ۰۲:۰۸

خبرونه

پر ژورنالیستانو د بریدونو عاملانو سره د حساب او محاکمې غوښتنه وشوه

د ازادي راډیو خبریال محمد الیاس داعي چې څه موده وړاندې په هلمند کې د بمي چاودنې له امله ژوند له لاسه ورکړ.

په افغانستان کې د اروپايي ټولنې او امریکا استازولیو پر افغان ژورنالیستانو د حملو له عاملانو سره د حساب او محاکمې غوښتنه وکړه.

په کابل کې د امریکا سفارت په خپله ټویټرپاڼه کې ویلي، په افغانستان کې د مطبوعاتو ازادي د تېرو دوو لسیزو تر ټولو مهمه بریا ده.

دغه سفارت همداراز لیکلي چې د رسنیو پر کارکوونکو باید حملې ودرول شي.

اروپايي ټولنې هم په افغانستان کې پر ژورنالیستانو حملو ته په اشاره پر خپله ټویټرپاڼه کښلي، د مطبوعاتو ازادي د پرانیستې ټولنې لپاره کلیدي اهمیت لري.

دې ټولنې هیله څرګنده کړې، چې د ژورنالیستانو د سر د ساتنې لپاره اغېزمن اقدامات وشي او پر ژورنالیستانو حمله کوونکي او د حملو طراحان، دې ته له پامه پرته چې په چا پورې تړاو لري، مسوول وګڼل شي او محاکمه شي.

په وروستیو کې په هلمند کې د ازادي راډیو خبریال الیاس داعي، په کابل کې د طلوع پخوانی ویاند یما سیاوش، په ننګرهار کې د انعکاس راډیو تلویزیون خبریاله ملاله میوند او په غزني کې د الجزیرې خبریال رحمت الله نیکزاد ووژل شول.

هیڅ ډلې د دغو بریدونو مسوولیت په غاړه وانه خیست خو افغان چارواکي وايي، چې دا قتلونه وسله والو طالبانو کړي دي.

د ورځې تازه خبرونه دلته ولولئ

د جرمني د فوټبال فدراسیون ندیم امیري ته د سپکاوي قضیه څېړي  

ارشیف، د جرمني د فوټبال لوبډله

د جرمني د فوټبال فدراسیون ویلي، ندیم امیري ته د سپکاوي قضیه په جدي توګه څېړي.

ندیم امیري چې په خټه افغان دی د جرمني د فوټبال په ملي ټيم او بایرن لورکوزن کې لوبېږي.

بایرن لورکوزن د جمعې په ورځ له یونین برلین سره لوبه درلوده چې په پای کې یې د ندیم امیري او د یونین برلین د لوبغاړي فلوریان هوبنر تر منځ لفظي شخړه وشوه.

جرمني رسنیو په خپلو راپورونو کې ویلي، شکایت شوی چې ګواکې ندیم امیري ته د "چټل افغان" خطاب شوی دی.

امیري وروسته ویلي، هوبنر ترې بښنه غوښتې ده.

د فلوریان هوبنر مدافع بیا امیري ته د سپکو الفاظو کارول رد کړي.

د جرمني د فوټبال فدراسیون د کنټرول کمېټې مشر انتون ناخراینر ویلي، توکمپالنه او تبعیض د زغملو نه دی او همدا اوونۍ څېړنې پیلېږي چې که رښتیا سپکاوی شوی وي، عامل به یې خپله سزا وویني.

د ننګرهار وادي کانال شرکت ۵۴ زره بې روزګارو کار پیدا کړ

د ننګرهار مرکز جلال اباد ښار یوه څنډه

د ننګرهار وادي کانال شرکت ۵۴ زره بې روزګارو خلکو ته د کاري زمینې برابرولو خبر ورکوي.

د ننګرهار د کانال شرکت ویاند همایون غریبمل ازادي راډیو ته وویل چې د دغه شرکت د زیتونو په څلورګونو فارمونو کې یې د ښاخونو پرېکولو او ویالو جوړولو شپږ میاشتني پروګرام پیل کړی چې په کې به ۵۴ زره بې روزګاره خلک په کار بوخت وي.

د غریبمل په خبره، په دغو کسانو چې په یاد پروګرام کې په کار بوخت دي، ۴زره ټنه غنم هم وېشل کېږي.

غریبمل وایي، له دې پروګرامه یې هدف د زیتونو د فارمونو سمه پالنه او بې روزګارو خلکو ته د کار زمینه برابرول دي.

د افغانستان زعفرانو لومړی مقام خپل کړ

د افغانستان زعفران

د افغانستان زعفرانو د ذایقې نړیوال انسټیټیوټ له لوري لومړی مقام خپل کړ.

د افغانستان د صنعت او سوداګرۍ وزارت فواد احمدي ازادي راډیو ته وویل چې د دغه انسټیټیوټ له لوري د افغانستان زعفرانو ته د ښه خوند له امله د سرو زرو درې ستوریز مډال ورکړل شوی.

د ذايقې نړیوال انسټیټیوټ چې یو معتبر انسټیټیوټ دی، په ۲۰۰۳ میلادي کال کې په بلجیم کې جوړ او تر اوسه یې په نړۍ کې بېلابېل خوراکي توکي د خوند يا ذایقې له پلوه ارزولي دي.

دا لومړی ځل نه دی چې د افغانستان زعفران په نړیواله کچه لومړی مقام خپلوي، بلکې له تېرو څو کلونو راهیسې په پرله پسې ډول د افغانستان زعفران په نړۍ کې لومړی مقام ترلاسه کوي.

جو بایډن د خپل کار په لومړیو ورځو کې ځیني اجرايي اقدامات کوي

د امریکا منتخب ولسمشر جو بایډن

د امریکا منتخب ولسمشر جو بایډن به په سپینه ماڼۍ کې د خپل کار په لومړیو ورځو کې ځیني اجرايي اقدامات وکړي.

د متحده ایالاتو لوی درستیز ران کلاین پرون (شنبه) وویل، د لوړې له مراسمو وروسته به د منتخب ولسمشر یو مهم کار دا وي چې د اسلامي هېوادونو اتباعو ته په سفر کې اسانتیا راولي.

په امریکا کې د ولسمشر اجرايي فرمان د کانګرس پرېکړې ته اړتیا لري.

کلاین ویلي چې د بایډن د لومړیو ورځو په پروګرامونو کې د پاریس اقلیمي تړون ته د امریکا ورګرځېدا او د کرونا ویروس د خپرېدو د مخنیوي لپاره په فدرالي ادارو کې د ماسک تړل هم شامل دي.

نامعلومو وسله‌والو په کابل کې دوه ښځینه قاضیانې وژلي

ارشیف، کابل کې د یوې حملې سیمه

د افغانستان لویه څارنوالي وايي، د نامعلومو وسله‌والو په حمله کې په کابل کې دوه ښځینه قاضیانې ووژل شوې.

د راپورونو له مخې، دا پېښه نن سهار اته نیمې بجې په قلعه فتح‌الله کې وشوه.

د لویې څارنوالۍ ویاند جمشېد رسولي فرانس پرس خبري اژانس ته ویلي چې دواړو قاضیانو په ستره محکمه کې کار کاوه.

راپورونه وايي چې په دې برید کې دوه نورې ښځینه قاضیانې ژوبلې شوې دي.

په وروستیو کې په کابل او نورو ښارونو کې دې ته ورته هدفي بریدونه ډېر شوي او اکثره افغانان‌یې اندېښمن کړي دي.

عموماً د دې ډول بریدونو مسؤلیت څوک په غاړه نه‌اخلي، خو دولتي چارواکي وايي چې هدفي بریدونه د طالبانو له لوري کېږي.

واشنګټن ډي سي کې امنیتي تدابیر زیات شوي

واشنګټن ډي سي کې د امریکا د ملي ګارد سرتېري

د امریکا متحده ایالاتو په پلازمېنه واشنګټن ډي سي کې امنیتي تدابیر زیات شوي دي.

دا تدابیر وروسته له دې ډ‌ېر شول چې تېره اوونۍ د ډونالد ټرمپ پلویان په زوره د کانګرس ودانۍ ته ننوتل او له بلې خوا د نوي ولسمشر جو بایډن د لوړې مراسم په رانږدې کېدو دي.

د جو بایډن د لوړې د مراسمو په درشل کې چې ټاکل شوې ده د روانې اوونۍ په ۲۰مه ترسره شي، د امریکا پوځ وايي چې په واشنګټن ښار کې به د ملي ګارډ ۲۵ زره ځواکونه ځای پر ځای کړي.

په همدې حال کې یوه چارواکي له سي بي اېس شبکې سره په مرکه کې تأیید کړه چې د کورني امنیت وزارت په یوه راپور کې ویلي چې کورني سختدریځي د چهارشنبې په ورځ د جو بایډن د لوړې د مراسمو لپاره تر ټولو لوی ګواښ دی.

په همدې حال کې ویل شوي چې جو بایډن د لوړې مراسمو ته په رېلګاډي کې واشنګټن ته خپل سفر لغوه کړی دی.

بوسنیا هرزګوېنا کې د پناه غوښتونکو پر وضعیت د اروپايي اتحادیې اندېښنه

بوسنیا هرزګوېنا کې پناه غوښتونکي

د اروپايي اتحادیې د بهرنۍ پالېسۍ ویاند د بوسنیا هرزګوېنا په کمپونو کې د پناه غوښتونکو پر وضعیت اندېښنه ښکاره کړه، ویې‌ویل چې دا حالت د منلو نه‌دی او باید د پناه غوښتونکو ستونزه هواره شي.

د بوسنیا په کمپونو کې زرګونه پناه غوښتونکي مېشت دي، خو د تېر کال د ډسمبر په ۲۲مه په لیپا کمپ کې له اور لګېدو وروسته ۹۰۰ پناه غوښتونکي په منفي صفر درجه هوا او تر باران او واورو لاندې بې‌سرپناه پاتې دي.

د لیپا کمپ له سوځېدو وروسته بوسنیايي چارواکو ویلي چې پناه غوښتونکي به بل ځای ته ولېږدوي، خو د سیمې د اوسېدونکو د مخالفت له کبله دا پرېکړه لغوه شوه او حکومت د پناه غوښتونکو د مېشتولو لپاره پوځي خېمې ودرولې.

کابو ۹ زره پناه غوښتونکو اروپا ته د رسېدو په هیله په بوسنیا کې اړولي او اکثره د پاکستان، افغانستان او سوریې وګړي دي.

اروپايي اتحادیې د بوسنیا حکومت ته له پناه غوښتونکو سره د مرستې لپاره ۱۰۷ ملیونه ډالره ورکړي او ویلي یې دي چې د بوسنیا حکومت باید پر خپلو هغو ژمنو ودرېږي چې بشري حقونو، د اروپايي اتحادیې قوانینو او د پناه غوښتونکو د ستونزو حل کولو ته‌یې لري.

فرانسه: تهران او واشنګټن دې اټمي تړون ته بېرته راوګرځي

ارشیف، د امریکا او ایران بیرغونه

د فرانسې د بهرنیو چارو وزیر وايي، د ایران له لوري د اټمي تړون بیا بیا سرغړونې دا ضروري کړې چې تهران او واشنګټن بېرته دې موافقې ته راوګرځي.

د فرانسې د بهرنیو چارو وزیر ژان ایو لودریان دا څرګندونې د ډونالد ټرمپ د ولسمشرۍ د دورې له پای ته رسېدو څو ورځې مخکې په هغه مرکه کې وکړې چې پرون (شنبه) خپره شوه.

ایران په وروستیو کې وویل چې په فردو کې یې تر ۲۰ فیصدو پورې د یورانیمو تولید بیا پیل کړی او پرمختللي سنتریفیوژنونه‌یې نصب کړي دي.

ژان ایو لودریان ویلي، باید دا کار نه‌وی شوی ځکه ښيي چې ایران د اټمي وسلې د ترلاسه کولو هڅه کوي.

په نړۍ کې د ګلتوني ګازونو تولید کم شوی

ارشیف

د انرژۍ نړیوالې ادارې په یوه راپور کې ویلي، په نړۍ کې د ګلتوني ګازونو تولید کم شوی دی.

د کرونا ویروس له خپرېدو او د نړۍ په ګڼو سیمو کې پر تګ راتګ له بندیزونو او ټولبندیو وروسته، له فوسیلي سونګ موادو لکه تېلو څخه استفاده خورا کمه شوې او په نتیجه کې یې د ۲۰۱۹ کال په پرتله په ۲۰۲۰ کې ګلتوني ګازونه په سلو کې کابو ۷ کم شوي دي.

د انرژۍ نړیوالې ادارې دې حد ته د ګلتوني ګازونو کمېدل یو تاریخي ریکارډ بللی دی.

ګلتوني ګازونه د ځمکې د تودېدا یو تر ټولو مهم سبب بلل کېږي.

د افغانستان مالیې وزارت: د بودجې تصویب کې ځنډ مو له ستونزو سره مخ کوي

د افغانستان مالیې وزارت

د افغانستان مالیې وزارت وایي، د ۱۴۰۰م مالي کال د بودجې په تصویب کې ځنډ دوی په اوږدمهال کې له ستونزو سره مخامخ کوي.

د دغه وزارت ویاند شمروز مسجدي دا خبرې پرون شنبه داسې مهال ازادي راډیو ته وکړې چې ولسي جرګې د دوهم ځل لپاره د دغې بودجې طرحه رد کړه.

ښاغلی مسجدي زیاتوي: "تر څو چې بودجه پاس شوې نه‌وي، موږ هېڅ پروژه شروع کولای نه‌شو او نه هم د پروژې قرارداد او مطالعه کېږي، هر څومره چې وخت ځنډېږي، هماغومره د پروژو تطبیق وروسته کېږي، یعنې په وخت او زمان سره نه‌تطبیقېږي، که چېرته وخت زیات تېرېږي، بیا ورو ورو مشکلات زیاتېږي."

مالیې وزارت وایي، د بودجې د طرحې بله بڼه به هم ولسي جرګې ته ولېږي، خو وایي دا چاره لږ وخت نیسي ځکه چې د کابینې منظورۍ ته هم اړتیا لري.

مالیې وزارت په وروستۍ طرحه کې چې ولسي جرګې رد کړې، ۱۴۰۰م مالي کال ته ۴۷۳ میلیارده افغانۍ بودجه ځانګړې کړې ده.

د افغانستان زعفرانو د اروپایي ټولنې د ذایقې نړیوال انسټیټوټ جایزه وګټله

هرات کې د زعفرانو د ټولولو چارې

د افغانستان زعفرانو د اروپایي ټولنې د ذایقې نړیوال انسټیټوټ د ۲۰۲۱ کال لومړنۍ جایزه ترلاسه کړه.

دغه خبره د افغانستان د صنعت او سوداګرۍ وزارت پرون (شنبه) په یوه خبرپاڼه کې وکړه او ویې‌ویل، د (درې ستورو) دغه جایزه نړیوال اعتبار لري.

د اروپایي ټولنې د ذایقې نړیوال انسټیټیوټ د بلجیم پلازمېنه بروکسل کې فعالیت لري او په نړیواله کچه د ذایقې په ټاکلو او د کرنیزو محصولاتو د کیفیت په تعیینولو کې رول لري.

په افغانستان کې د کیهان په نوم د یوه شرکت له‌خوا تولید شویو زعفرانو دغه جایزه ګټلې او د سوداګرۍ وزارت وایي، یاد شرکت له دې وروسته پر خپلو تولیداتو د (درې ستورو) نښان لګولی شي.

جو بایډن، شرمن او نیولنډ د امریکا بهرنیو چارو وزارت لوړو پوستونو ته ونومول

د ایران د ۲۰۱۵ کال اټمي تړون کې ستره مرکچي ویندي شرمن

د امریکا منتخب ولسمشر جو بایډن د ایران د ۲۰۱۵ کال اټمي تړون کې خپله ستره مرکچي ویندي شرمن په بهرنیو چارو وزارت کې د دوهم لوړپوړي کس په توګه وګمارله.

مېرمن شرمن د بارک اوباما د ولسمشرۍ پر مهال په سیاسي چارو کې د بهرنیو چارو وزارت مرستیاله وه او له ایران سره‌یې په اټمي تړون کې د خپل هېواد د مرکچیانو مشري کوله.

بایډن دغه‌راز تجربه کاره او متقاعده ډیپلوماته ویکتوریا نیولنډ د بهرنیو چارو وزارت د درېیم لوړپوړي پوست لپاره ټاکلې ده.

نیولنډ هغه مېرمن ده چې ۲۰۱۴ کال کې یې په اوکراین کې د خلکو له هغو اعتراضونو ملاتړ کاوه چې پایله کې یې پخوانی ولسمشر ویکتور یانکوېچ له دندې لیرې شو.

جو بایډن انتوني بلېنکن د بهرنیو چارو د وزیر په توګه ټاکلی او دوه ورځې وروسته‌یې د سنا د بهرنیو اړیکو کمېټه د تأییدۍ په اړه غونډه جوړوي.

که نوموړی د بهرنیو چارو وزیر شي، شرمن او نیولنډ به‌یې تر مدیریت لاندې کار کوي.

د سیاسي مطالعاتو د مکتبونو په اړه د روسیې پر اقدام د اروپايي شورا اندېښنه

د اروپایي شورا سکرتر جنراله ماریجا پیچینووېچ

د اروپا د شورا رئیسې د روسیې پر هغه اقدام جدي اندېښنه وښوده چې د دغې شورا د سیاسي مطالعاتو د مکتبونو ټولنه‌یې د نامطلوبه سازمانونو په ډله کې شامله کړه.

د اروپا شورا د جنورۍ په ۱۴مه یوه لیک کې چې یوه کاپي یې د ازادې اروپا/ ازادي راډیو ته رارسېدلې، له مسکو نه غوښتنه وکړه چې د دغې پرېکړې د دلایلو په اړه وضاحت ورکړي.

لیک د اروپایي شورا د سکرتر جنرالې ماریجا پیچینووېچ (Marija Pejcinovic) له‌خوا لیکل شوی او نوموړې د مسکو دغه پرېکړه د نه‌منلو وړ یاده کړې ده.

د روسیې لویې څارنوالۍ تېره ډسمبر میاشت کې د اروپایي شورا د سیاسي مطالعاتو مکتبونه چې د فرانسې په ستراتسبورګ ښار کې موقعیت لري، نامطلوبه وبلل او له عدلیې وزارته‌یې وغوښتل چې هغه په تور لېست کې شامل کړي.

په روسیه کې د ۲۰۱۵ کال د یوه قانون له مخې، د دغه هېواد لویه څارنوالي کولای شي هر هغه بنسټ نامطلوبه اعلان کړي چې د دغه هېواد امنیت ته ګواښوونکی وبلل شي.

د بشري حقونو ملاتړو بنسټونو بیا روسیه تورنه کړې چې د دغه قانون له لارې غواړي د روسیې ضد غږونه چوپ کړي او د مدني فعالیتونو مخه ونیسي.

عربستان په قطر کې خپل سفارت بېرته پرانېزي

د سعودي عربستان د بهرنیو چارو وزیر فيصل بن فرحان

د سعودی عربستان د بهرنیو چارو وزیر، فیصل بن فرحان وايي، تمه کېږي هېواد یې په راروانو ورځو کې په قطر کې خپل سفارت بېرته پرانېزي.

په ۲۰۱۷م کال کې د سعودي عربستان تر څنګ متحده عرب اماراتو، بحرین او مصر د ټروریزم د ملاتړ په تور له قطر سره خپلې ډیپلوماتیکې اړیکې وځنډولې.

قطر چې دغه ډول تورونه رد کړي- ویلي وو، دا اقدام یې د ملي حاکمیت د کمزوري کولو لپاره شوی دی.

سعودي عربستان ۱۱ ورځې مخکې ویلي وو، د امریکا د متحدو ایالتونو په ملاتړ یې د عربي ټولنې د پیاوړتیا او د اختلافاتو د حل لپاره قطر ته یو هیئت لېږلی دی.

سعودي عربستان او قطر اوس د یو بل په وړاندې خپل هوايي حریمونه پرانیستي او ځینې الوتنې له سره پیل شوې دي.

سپاه پاسداران انقلاب د بالستیک توغندیو د توغولو وروستۍ مرحله عملي کړه

آرشیف

د ایران سپاه پاسداران انقلاب نن د جنګي کښتیو-ضد بالستیک توغندیو د توغولو لپاره د خپلو پوځي تمریناتو دویمه او وروستۍ مرحله عملي کړه.

د ایران دولتي نن راپور ورکړی، چې دغه توغندي د هند په سمندر کې پر یوه فرضي هدف ویشتل شوي دي.

په ویډیويي تصاویرو کې ښکاري دوه توغندي پر یوه هدف چې دولتي ټلویزیون د «دښمن فرضي جنګي کښتۍ» بللي، د یو زر او اته سوه کیلومتره په فاصله کې ویشتل شوي دي.

د ایران د دغو پوځي تمریناتو لومړۍ مرحله پرون عملي شوه او دا تمرینات په داسې حال کې کېږي چې د تهران د لانجمن اټومي پروګرام له کبله پر ایران د امریکا فشارونه زیات شوي دي.

نور راوښيه

XS
SM
MD
LG