د لاسرسۍ وړ لېنکونه

تازه خبر
سه شنبه ۷ سلواغه ۱۳۹۹ کابل ۱۰:۲۳

افغانستان

د بهرنیو چارو وزیر د سولې په برخه کې د اندونیزیا هڅې وستایلې

د بهرنیو چارو وزیر محمدحنیف اتمر له یوه اندونیزیايي پلاوي سره

د افغانستان د بهرنیو چارو وزیر محمدحنیف اتمر له یوه اندونیزیايي پلاوي سره په کتنه کې په افغانستان کې د اوربند د ټینګښت او د سولې د پروسې د ملاتړ په برخه کې د اندونیزیا هڅې وستایلې.

د بهرنیو چارو وزارت په یوه خبرپاڼه کې وايي چې ښاغلي اتمر پرون پنجشنبې(د مرغومي ۴مه) په کابل کې د اندونیزیا له پخواني مرستیال ولسمشر یوسف کالا سره چې اوس مهال د دې هېواد د جوماتونو د شورا مشر دی وکتل.

ښاغلي کالا ویلي دي چې اندونیزیا په خپل ټول توان سره د افغانستان د سولې د خبرو ملاتړ کوي او د سیمه ییزې اجماع د رامنځ ته کولو هڅه کوي.

د ورځې تازه خبرونه دلته ولولئ

امنیتي چارواکي: په کندز کې ٧ طالبانو ته مرګ ژوبله اوښتې

افغان هوايي ځواک د عملیاتو پرمهال. ارشيف

پامیر قول اردو په کندز ولایت کې په هوايي حملو کې د پنځو طالبانو د وژل کېدو او د دوو نورو د ټپي کېدو خبر ورکوي.

۲۱۷ پامیر قول اردو په یوه بیان کې وايي، دا ډله طالبان پرون مازیګر وروسته له هغه په دریو هوايي حملو کې په نښه شول چې د ارچي ولسوالۍ په عابدي سیمه کې یې د افغانستان پر ملي دفاعي ځواکونو د حملو پلان جوړاوه.

طالبانو د افغان چارواکو د دې ادعاوو په اړه تراوسه څه نه دي ویلي.

د افغانستان او پاکستان د بهرنیو چارو وزیرانو پر سوله او سوداګرۍ بحث کړى

د عکس ښي لور ته د پاکستان د بهرنیو چارو وزیر شاه محمود قریشي او چپ لور ته د افغانستان د بهرنیو چارو وزیر محمد حنیف اتمر

د افغانستان او پاکستان د بهرنیو چارو وزیرانو پر دوه اړخیز تجارت او د افغانستان د سولې پر پروسه بحث وکړ.

د پاکستان د بهرنیو چارو وزیر شاه محمود قریشي پرون ناوخته په یوه ټویټ کې ویلي، چې له محمد حنیف اتمر سره یې د سیمې د ثبات لپاره د همکارۍ پر دوام هم خبرې وکړې.

دا ټلیفوني خبرې په داسې حال کې کېږي، چې د افغانستان د بهرنیو چارو وزارت د شاه محمود قریشي پر تازه څرګندونو انتقاد کړی و.

شاه محمود قریشي تېره اوونۍ په یوه مرکه کې ویلي وو: "د پاکستان حکومت هیله من دی، چې د امریکا نوی حکومت به د افغانستان سولې د خبرو بهیر او له افغانستانه د امریکايي ځواکونو د ویستلو لړۍ روانه وساتي."

د افغانستان د بهرنیو چارو وزارت ویلي وو، د پاکستان حکومت باید طالبان د تاوتریخوالي د کمولو د ژمنې عملي کولو او سراسري اوربند ته وهڅوي.

چارواکي: په بلخ کې ۹ طالبان وژل شوي

افغان هوايي ځواک د عملیاتو پرمهال

شاهین قول اردو په بلخ ولایت کې د افغان هوايي ځواک په بمبارۍ کې د نهو طالبانو د مړینې او د څلورو نورو د ټپي کېدو خبر ورکوي.

د ۲۰۹ شاهین قول اردو مطبوعاتي دفتر په یو بیان کې وايي، دا هوايي حمله پرون ماسپښین د چاربولک ولسوالۍ په خان آباد کلي کې د طالبانو د راټولېدو پر یوه مرکز وشوه.

په بیان کې یادونه شوې چې د طالبانو دې ډلې پر افغان ځواکونو د حملو پلان درلود.

افغانستان او ایرلنډ د کرکټ ملي ټیمونه نن درېیمه یو ورځنۍ لوبه کوي  

د ايرلنډ او افغانستان د کرکټ ملي لوبډلې لوبغاړي

افغانستان او ایرلنډ د کرکټ ملي ټیمونه نن سې شنبه په خپلو کې درېیمه یو ورځنۍ یا پنځوس اووره نړیواله مسابقه کوي.

د کرکټ بورډ ویاند فرید هوتک نن ازادۍ راډیو ته وویل، د افغانستان لوبغاړي دغسې مسابقې ته چمتووالی لري.

هغه زياتوي:*"ټاکل شوې نن د افغانستان د کرکټ ملي لوبډله د ایرلنډ د کرکټ له ملي لوبډلې سره د کاردان پوهنتون جام سیالیو درېیمه نړیواله پنځوس اووره سیالي ترسره کړي. ټولې لوبې د افغانستان په کوربه توب کېږي. افغان لوبغاړي نننۍ مسابقې ته پوره چمتووالی لري."

د افغانستان د کرکټ ملي ټیم دغه لوبلړۍ چې په متحد عرب اماراتو کې ترسره کېږي، د دوو مخکنیو مسابقو په ګټو سره ګټلې ده.

ارغندیوال: پر ما لګېدلي تورنه ټول بې اساسه دي

عبدالهادي ارغندیوال

د افغانستان د مالیې وزارت لرې شوی وزیر عبدالهادي ارغندیوال وايي، په ده لګېدلي تورنه ټول بې اساسه دي.

نوموړي په کابل کې د یوې خبرې ناستې پرمهال وویل، د افغان جمهور رییس تر څنګ یو حلقه فعالیت لري چې هر کله یې ګټي په خطر کې شي دغه ډول دسیسې جوړوي.

هغه وايي، اوسنی حالت سم نه دی او په دې وضیعت کې کار کول ډېر سخت دی.

نوموړي زياته کړه: "زموږ خلکو ته هم دغه واقعیت معلوم دی چې یوې حلقې د جمهور رییس شاوخوا محاصره کړې او له بده مرغه رییس جمهور هم ډېری وخت له واقعیتونو نه خبرېږي، کله چې ددغې حلقې ګټې په خطر کې شي بیا په داسې کارونو لاس پورې کوي."

ولسمشرۍ مانۍ تر اوس په دې اړه څه نه دي ویلي.

د افغانستان جمهور رییس محمد اشرف غني دوه ورځې وړاندې د مالیې وزیر عبدالهادي ارغندیوال د مدیریتي ضعف، غیر قانوني مقرریانې او د غیر قانوني کړنو په تور له دې دندې لرې کړ.

عبدالهادي ارغندیوال څو مودې وړاندې د ولسي جرګې لخوا د باور رایو په اخیستو څخه وروسته د مالیې وزیر شوى و.

په غزني کې وسله والو د سرې مياشتې ټولنې ٢ کارکوونکي ټپیان کړي

د سرې مياشتې ټولنې پر موټر بريد کې دوه کسان ټپیان شوي

په غزني کې د سرې میاشتې د ټولنې پرکارکونکو په وسله وال برید کې د دې ټولنې دوه تنه کارکوونکي ټپیان شوي دي.

په سیمه کې د دغې ټولنې رييس سمیع الله صدیق نن ازادي راډیو ته وویل، چې دغه برید نن غرمه مهال د دوی د هغو کارکونکو د موټرو پر کاروان شوی چې په قره باغ ولسوالۍ کې د بشرپالنې د خدمتونو تروړاندې کولو وروسته بېرته راګرځېدل.

هغه زياتوي: "د کابل ـ کندهارپه عومي سړک باندې، غزني ښار ته څېرمه د نوغي په کلي کې پرې وسله وال برید شوی چې له بده مرغه زموږ دوه تنه همکاران ټپیان دي او موټرو ته هم زیان رسېدلی دی."

ښاغلی صدیق زیاتوي، چې کارکونکي یې سیمې ته له دواړو اړخونو، حکومت او طالبانو سره له همغږۍ وروسته تللي و او په دې اړه چې دغه برید چا یا کومې ډلې پرې کړی، پلټنه کوي.

په افغانستان کې ډیجیټل او انټرنېټي ټلویزیوني خپرونو ته زمینه برابرېږي

د افغانستان رسنۍ

د مخابراتي خدمتونو د تنظیم اداره يا اترا وایي، ډېر ژر به په افغانستان کې ډیجیټل او آی پي یعنې انټرنېټي ټلویزیوني خپرونو ته زمینه برابره کړي.

د دې ادارې ویاند سعید شینواري ازادي راډیو ته په دې اړه چې دا به د ټلویزیونې خپرونو په برخه کې څه ډول اسانتیاوې رامنځته کړي، وویل: "په دې سره به په افغانستان کې خلک په نوې بڼه، په ښه کیفیت ټلویزیوني نشراتو او هم د آی پي له لارې نشراتو ته لاسرسی ولري. په دې سره به د ټلویزیونو عواید هم ښه شي."

تر دې مخکې د مخابراتي خدمتونو د تنظیم ادارې يا اترا رئیس عمر منصور انصاري په کابل کې د رسنیو له یوه ګروپ سره په خبرو کې ویلي و چې ادارې یې د تصویري او راډیويي رسنیو د فریکونسۍ د ډیجیټلي کولو لپاره هڅې پیل کړې چې په نتیجه کې یې خلک ډېر ژر په ښه کیفیت تصویري او غږیزو نګورنو نشراتو څخه برخمن شي.

په افغانستان کې په اوس وخت کې په سلګونو صوتي او غږیزې رسنۍ فعالیت کوي.

شاهین قول اردو: بلخ کې ۱۱ وسله‌وال طالبان ووژل شول

ارشیف، بلخ کې د شاهین قول اردو عملیات

د ۲۰۹ شاهین قول اردو په بلخ کې طالبانو ته د مرګ‌ژوبلې خبر ورکوي.

دې قول اردو نن په یوه خپره کړې خبرپاڼه کې ویلي چې تېره شپه طالبانو د دې ولایت په شولګره ولسوالۍ کې د افغان امنیتي ځواکونو پر پوستو بریدونه وکړل چې د درېیمې لوا د کمانډو د درېیم کنډک پوځیانو هغه په شا وتمبول او د نښتو په پایله کې ۱۱ طالبان ووژل شول او ۶ نور یې ټپیان شول.

حمد الله محب: ځینو هېوادونو د طالبانو د مذاکراتي ډلې کورنۍ برمته کړي

د افغانستان د ملي امنیت سلاکار حمد الله محب

د افغانستان د ملي امنیت سلاکار وايي، د طالبانو د مذاکراتي ډلې غړي خپلواکي نه‌لري.

حمد الله محب پرون د هوايي ځواکونو په قول اردو کې د وینا پر مهال وویل، د طالبانو د مذاکراتي ډلې د دغو غړو کورنۍ د ځینو هېوادونو له‌خوا برمته شوي دي.

ښاغلی محب زیاتوي: ​"دا شی یې واضح کړ چې دوی خپل استقلالیت نه‌لري. محاصره دي او ګروګان نیول شوي دي. د دوی فامیلونه په پردي مملکت کې اوسېږي. هغه هېواد دوی ته لارښوونه کوي چې دلته ترورېستي اعمال او اقدامات وکړي."

د ملي امنیت سلاکار وايي، په قطر کې د طالبانو د مذاکراتي ډلې هر غړی جلا جلا غوښتنې مطرح کوي.

په قطر کې د طالبانو سیاسي دفتر او یا د مذاکره کوونکي پلاوي غړو تر اوسه د ښاغلي محب د تازه څرګندونو په اړه څه نه‌دي ویلي.

په قطر کې د مذاکرو د دوهم پړاو خبرو ۲۰ ورځې کېږي، خو تر اوسه په دغو مذاکرو کې د کوم ځانګړي پرمختګ خبر نه‌دی ورکړل شوی.

د کورنیو چارو وزارت: طالبانو د خپلو جنایتونو لپاره بېلابېلې لارې غوره کړي

هغه مستري‌خونه چې د کورنیو چارو وزارت په وینا مستري یې په موټرو کې ماینونه ځای پر ځای کول.

د کورنیو چارو وزارت ویاند وايي طالبانو د خپلو جنایتونو د عملي کولو لپاره بېلابېلې لارې خپلې کړې دي.

طارق ارین پرون ناوخته په یوه ټویټ کې ویلي، پولیسو د کابل په اتمه حوزه کې یو مستري نیولی چې په دولتي موټرو کې یې ماینونه ځای پر ځای کړي.

ښاغلي ارین له خلکو غوښتنه کړې، کله چې خپل موټرونه مستریانو ته بیايي باید دقت وکړي.

د کورنیو چارو وزارت ویاند وايي د دولت دښمن د خلکو د په نښه کولو لپاره بېلابېلې لارې کاروي چې د نانوای، د لیني موټرو د چلوونکي، کراچۍ چلوونکي او مستریانو په بڼه خپل فعالیتونه کوي.

دا څرګندونې په داسې حال کې کېږي چې د کابل په ګډون په ځینو ولایتونو کې هدفي وژنې زیاتې شوې دي.

د افغانستان د کرکټ ملي ټیم د ایرلنډ پر وړاندې دوهمه لوبه هم وګټله

د افغانستان د کرکټ ملي لوبډلې لوبغاړي

د افغانستان د کرکټ ملي ټیم د ایرلنډ په وړاندې دوهمه لوبه هم وګټله.

د یکشنبې په لوبه کې د ابوظبي په شیخ زاید سټډیوم کې وشوه افغان لوبغاړو د ایرلنډ ۲۶۰ منډې هدف په ۴۵ اوور کې پوره کړ.

د لوبې غوره لوبغاړی رحمت شاه و چې ۱۰۳ منډې یې جوړې کړې.

هغه وویل: "واقعاً څه پلان چې ما ته کوم پلان د روزونکي او کپټان له خوا راکړل شوی و چې خپله طبیعي لوبه به کوې ما ته توپ ډېر ښه جوړېده. خپل شاټونه مې نه دي درولي، کامیابه شوم او سلیزه مې ووهله. هر ټیم دا غواړي چې نړیوال جام ته ووځي موږ هم انشاالله کوښښ کوو څومره نورې لوبې چې زموږ پاتې دي هغه هم وګټو او نړیوال جام ته لار پیدا کړو."

د بالرانو په برخه کې هم نوین الحق څلور ویکټې، مجیب الرحمن دری او ګلبدین او راشد یوه یوه وېکټه واخیسته.

د دې لوبې په بریا سره افغان ټیم د ایرلنډ په وړاندې د دریو لوبو لړۍ که څه هم وروستۍ یوه دوه ورځې وروسته کېږي وګټله.

د افغانستان او ایرلنډ دا لوبې د ۲۰۲۳ کال د نړیوال جام د سوپرلیګ په لړ کې دي چې د هرې لوبې بریا په نړیوال جدول کې ګټونکي ته لس نمرې ور زیاتوي.

په پاکستان کې د سنوبورډینګ له لوبو یوه افغان لوبغاړي مډال ګټلى

احمد سروش سروش

په پاکستان کې د سنوبورډینګ له نړیوالو لوبو یوه افغان لوبغاړي د سپینو زرو مډال وګاټه.

د سوات په مالم جبه کې د سنوبورډینګ نړیوالې لوبې پرون او وړمه ورځ وشوې چې پکې د پاکستان، افغانستان، فرانسې او بلجیم شاوخوا سلو لوبغاړو برخه اخیستې وه.

د افغانستان د سنوبورډینګ فدراسیون په خپله فیسبوک پاڼه لیکلي چې افغان لوبغاړي احمد سروش سروش د دوو رونډونو په ګټلو فاینل کې دویم شو.

د مډالونو د ویش پروګرام هم نن جوړ شوی و.

د دوبۍ له زندانونو ازاد شوي افغانان کابل ته رسېدلي

اماراتو له زندانونو خوشې شوي افغانان

۲۱ تنه افغانان د دوبۍ له زندانونو ازاد او نن کابل ته ورسېدل.

د افغانستان د بهرنیو چارو وزارت دا خبره په یوه اعلامیه کې کړې ده.

د اعلامیې له مخې د افغانستان دا اتباع په دوبۍ کې د افغان جنرل کونسلګرۍ په هڅه او د متحده عرب اماراتو د عدلي او قضايي ارګانونو په همکارۍ خوشې شول.

اعلامیه زیاتوي چې په وروستیو څو میاشتو کې ۲۱۰ تنه افغانان د دوبۍ له زندانونو خلاص او هېواد ته رالېږل شوي.

د افغانستان د بهرنیو چارو وزارت په خپله اعلامیه کې نه دي لیکلي چې دا افغانانو په کومو جرمونو بندیان و.

د ایرلنډ کرکټ لوبډلې دوهمه لوبه کې افغانستان ته ۲۶۰ منډې هدف وټاکه

د افغانستان او ایرلنډ د کرکټ ملي لوبډلې

ایرلنډ د افغانستان لپاره په دوهمه یو ورځنۍ لوبه کې ۲۶۰ منډې هدف ورکړ.

په دې لوبه کې ایرلنډ لومړی توپ وهنه وکړه او په ۵۰ اورونو کې یې د نهو لوبغاړو په سوځېدو پاسنی هدف وټاکه.

لوبه د متحده عربي اماراتو په شېخ زایډ سټډیوم کې روانه ده.

د افغانستان او ایرلنډ لومړۍ لوبه وړمه ورځ د ۱۶ منډو په توپیر د افغانستان په ګټه پای ته رسېدلې وه.

د افغانستان او ایرلنډ دا لوبې د ۲۰۲۳ کال د نړیوال جام د سوپرلیګ په لړ کې دي چې د هرې لوبې بریا په نړیوال جدول کې ګټونکي ته ۱۰ نمرې ور زیاتوي.

کابل کې د افغانستان بانک پر کارکوونکو چاودنې یو تن وواژه او ۲ نور ټپیان دي

ارشیف، کابل کې چاودنه

په کابل ښار کې یوې ماین چاودنې یو ملکي وګړی وژلی او دوه نور یې ټپیان کړي دي.

چاودنه د افغانستان بانک د مالي شخړو د حل د کمېسیون د رئیس عبدالله دوراني په موټر شوې ده.

د افغانستان بانک په یوه اعلامیه کې تأیید کړې چې ښاغلی دوراني او یو بل کس ټپيان او یو ساتونکی یې وژل شوی دی.

د کابل امنیه قوماندانۍ ویاند فردوس فرامرز هم ازادي راډیو ته ویلي و چې د مقناطیسي ماین دا چاودنه سهار شاوخوا اته بجې د کابل په شاه شهید سیمه کې شوې ده.

چا د دې ماین چاودنې مسؤلیت په غاړه نه‌دی اخیستی.

افغان او امریکايي چارواکي د دې ماین چاودنو پړه په طالبانو اچوي او وايي چې طالبان دې د سولې لپاره له داسې هدفي وژنو او مقناطیسي ماین چاودنو لاس واخلي.

طالبانو اکثر په دې چاودنو کې لاس لرل رد کړي.

نور راوښيه

XS
SM
MD
LG