د لاسرسۍ وړ لېنکونه

تازه خبر
پنجشنبه ۲ سلواغه ۱۳۹۹ کابل ۱۰:۴۲

نړۍ

ارمنستان د قرباغ جګړه کې د وژل شویو لپاره ملي ماتم پیل کړ

د ارمنستان صدراعظم نیکول پاشنیان په جګړه کې د یوه وژل شوي سرتیري قبر ته درناوی کوي

ارمنستان نن شنبه په لانجمنه سیمه نګرنو-قره باغ کې له اذربایجان سره د شپږو اوونیو په جګړه کې د وژل شویو لپاره درې ورځنی ملي ماتم پیل کړ.

د ارمنستان صدراعظم نیکول پاشنیان چې ماسک یې کارولی و او شااوخوا یې امنیتي ځواکونه لیدل کېدل نن پر ځايي وخت د ماسپښین یوه بجه د زرګونو کسانو له ډلې سره یوځای شو.

راټولو شویو کسانو په سېپټمبر او نوومبر میاشتو کې د جګړې پر مهال د وژل شویو د یاد د درناوي لپاره ډله ییز حرکت وکړ.

ارمنستان له اذربایجان سره په لانجمنه سیمه نګورنو قره باغ کې د شپږو اوونیو لپاره جګړه وکړه چې بالاخره د مسکو په منځګړیتوب د نوومبر پر لسمه پر یوه اوربند موافقه وشوه.

د ورځې تازه خبرونه دلته ولولئ

جو بایډن: ډونالد ټرمپ راته سپینه ماڼۍ کې له سخاوته ډک یو لیک پرېښی

د امریکا ولسمشر جو بایډن

د امریکا ولسمشر جو بایډن وایي، مخکېني ولسمشر ډونالد ټرمپ ورته په سپینه ماڼۍ کې له سخاوته ډک یو لیک پرېښی دی.

دا هغه دود دی چې ولسمشران‌یې د خپل کار په وروستیو ورځو کې ترسره کوي، خو د ټرمپ لیک له دې پلوه هم مهم بلل کېږي چې هغه ډېر دودونه تر پښو لاندې کړي و، بایډن ته‌یې خپله ماتې نه‌وه ومنلې، نه‌یې هغه ته مبارکي ورکړې او نه‌یې هم پرون د هغه د لوړې په مراسمو ګډون کړی دی.

بایډن چې پرون‌یې د امریکا د ۴۶ م ولسمشر په توګه لوړه وکړه، په سپینه ماڼۍ کې خبریالانو ته د دغه لیک محتوا په ډاګه نه‌کړه او ویې‌ویل چې هغه‌یې شخصاً ده ته لیکلی او تر هغو به‌یې جزئیات په ډاګه نه‌کړي چې ټرمپ سره‌یې خبرې کړې نه‌وي. بایډن یوازې دومره وویل چې دا له سخاوته ډک یو لیک دی.

ټرمپ د بایډن د لوړې په مراسمو کې په نه‌ګډون سره په څه باندې یوه نیمه پېړۍ کې خپل نوم د یوه داسې ولسمشر په توګه چې له دې مخکې د دندې په مهال هېڅ یوه ولسمشر نه‌و ترسره کړی، ثبت کړ.

هغه پرون د ورځې وختي له سپینې ماڼۍ ووت او په الوتکه کې فلوریدا ایالت کې خپل استوګن ځای ته ولاړ.

جو بایډن د پاریس د اقلیم له تړون سره د یوځای کېدو فرمان لاسلیک کړ

د امریکا ولسمشر جو بایډن

د امریکا نوي ولسمشر جو بایډن پرون یو اجرائیوي فرمان لاسلیک کړ چې متحده ایالات بېرته د پاریس د اقلیم له تړون سره یوځای کوي.

بایډن په سپینه ماڼۍ کې په خپل دفتر کې وویل چې متحده ایالات د اقلیم له بدلون سره مبارزه په داسې بڼه مخ ته یوسي چې تر اوسه‌یې مخ ته نه‌ده وړې.

هغه ژمنه وکړه چې متحده ایالات به دغه تړون ته چې د نړۍ ډېرو هېوادونو په ۲۰۱۶ کال لاسلیک کړی او د نړۍ تودوخه محدودوي، ژمن پاتې شي.

مخکېني ولسمشر ډونالد ټرمپ د ۲۰۲۰ کال په نومبر کې رسماً خپل هېواد له دغه تړونه وایست چې نړیوالو پرې سخت انتقادونه وکړل.

متحده ایالات چې له چین وروسته په نړۍ کې هوا ته د مضره ګازونو د خپرېدو ستر هېواد بلل کېږي، په ۲۰۱۶ کال له دغه تړون سره یوځای شوی او ژمنه‌یې کړې وه چې تر ۲۰۲۵ کاله پورې د مضره ګازونو اندازه د ۲۰۰۵ کال تر سطحې یعنې تر ۲۸ فیصدو پورې راکمه کړي.

جو بایډن د خپل کار په لومړۍ ورځ څو اجرائیوي فرمانونه صادر کړل

د امریکا ولسمشر جو بایډن

د امریکا متحده ایالاتو نوي ولسمشر جو بایډن پرون د کار په لومړۍ ورځ څو اجرائیوي فرمانونه صادر کړل چې د یو لړ مهمو کورنیو او نړیوالو مسایلو په اړه د مخکېني ولسمشر ډونالد ټرمپ تګلاري باطلوي.

په یوه اجرائیوي فرمان کې د ټرمپ هغه پالېسي لغوه کېږي چې د امریکا متحده ایالاتو ته د اکثریت مسلمان مېشتو هېوادونو د وګړو پر ننوتو بندیز لګولی و.

سپینې ماڼۍ دغه پالېسي پر مذهبې ریښو ولاړه له بهرنیو د وېرې پالېسي بللې ده.

د ټرمپ له‌خوا د دغې پالېسۍ له مخې چې هغه په ۲۰۱۷ کې اعلان کړې وه، متحده ایالاتو ته د ایران، عراق، لیبیا، سومالیا، سوډان، سوریې او یمن پر اتباعو د ننوتو بندیز لګول شوی و.

عراق او سوډان وروسته له دغه لېسته وایستل شول او چاد، شمالي کوریا او ونزوئلا په‌کې زیات شول.

د ولسمشر بایډن له‌خوا د یوه بل اجرائیوي فرمان له مخې د روغتیا له نړیوال سازمان (who) څخه د متحده ایالاتو وتل درول کېږي. پخواني ولسمشر ډونالد ټرمپ تېر کال په دې اړه پرېکړه کړې وه.

د بایډن د پرېکړې له مخې متحده ایالات د روغتیا په نړیوال سازمان کې پاتې کېږي او هم‌یې اداره په پام کې لري چې د کوواکس په نوم ائتلاف سره چې له دوو نورو ډلو سره یوځای هڅه کوي د 'کوویډ-۱۹' ناروغۍ په وړاندې واکسین د نړۍ بې‌وزلو هېوادونو ته ورسېږي، یوځای شي.

اسپانیه کې یوې چاودنې دوه تنه ووژل او اته تنه نور ټپیان دي

اسپانیه کې د شوې چاودنې سیمه

د اسپانیې په پلازمېنه مادرید کې یوې چاودنې لږ تر لږه دوه تنه ووژل او اته تنه نور یې ټپیان کړل.

چاودنې چې زوروره یاده شوې، په مادرید کې یوه ودانۍ سرسري ویجاړه کړې او شاوخوا ورته ولاړ یو شمېر موټر سوځېدلي دي.

د بېړنیو خدمتونو مسؤلانو ویلي، د یوه ټپي حالت نازک دی.

د مادرید ښاروال په سیمه کې خبریالانو ته ویلي: "داسې ښکاري چې چاودنه دې په یوې ودانۍ کې د ګازو له کبله رامنځته شوې وي."

د سیمې یوه اوسېدونکي ویلي، دغې ودانۍ کې راهبانو یا عبادت کوونکو ته روزنه ورکول کېده او بې‌سرپناه کسانو ته ډوډۍ.

د پاکستان پوځ: د اټمي سرګلولې لېږدوونکی یو بالستیک توغندی مو ازمویلی

ارشیف

د پاکستان پوځ وایي، یو بالستیک توغندی یې چې اټمي سرګلوله لېږدولی شي، په بریالۍ توګه ازمویلی دی.

له ځمکې ځمکې ته دغه توغندی چې شاهین-درې نومېږي، د ۲،۷۵۰ کیلو مترو واټن وهلی شي.

د پاکستان د پوځ مطبوعاتي دفتر د دغه هېواد د لوی درستیز جنرال ندیم رضا له قوله ویلي، د پاکستان ستراتېژیک هدف دا دی چې پر خپل حاکمیت د هر ډول تېري مخه ونیسي.

شاهین-۳ توغندی د لومړي ځل لپاره په ۲۰۱۵ کال کې وازمایل شو.

پاکستان او سیال‌یې هند وسله تونونه او بېلابېل ډول توغندي لري.

له کله نه چې دغو ګاونډیو هېوادونو له بریتانیا خپلواکي اخیستې، درې ځله‌یې خپلو کې جګړه کړې ده.

بایډن ته قاضي‌القضات جان رابرت په کانګرس کې قسم ورکړ

جو بایډن د امریکا د ۴۶م ولسمشر په توګه لوړه وکړه او له دې سره د ډونالد ټرمپ د واک څلور کلنه دوره پای ته ورسېده.

۷۸ کلن بایډن ته د امریکا د سترې محکمې قاضي‌القضات جان رابرت د کانګرس په انګړ کې قسم ورکړ.

بایډن د انجیل پر هغې نسخې قسم یاد کړ چې له ۱۸۹۳ کال راهیسې د ده له کورنۍ سره دی.

تر لوړې وروسته نوموړي ولس ته په وینا کې وویل: "زه تاسو سره دا ژمنه کوم چې زه به د ټولو امریکایانو ولسمشر اوسم. د ټولو امریکایانو او تاسو سره وعده کوم چې د هغو کسانو چې زما ملاتړ یې نه‌دی کړی عیناً د هغو کسانو په څېر ننګه کوم چې ملاتړ یې کړی دی."

نوموړي په ۲۰۰۸ او ۲۰۱۳ کال کې هم د انجیل پر همدې نسخې هغه مهال قسم خوړولی و چې د امریکا د ولسمشر د مرستیال په توګه‌یې دنده پيلوله.

څېړونکي: که د 'نوي پیل' تړون ونه غځیږي د مسکو او واشنګټن ترینګلتیا به ډېره شي

ارشیف، د امریکا او روسیې ګډ بیرغونه

کرملېن له امریکا متحده ایالاتو سره د اټمي وسلو د کنټرول تړون د غځېدو په اړه خپله ژمنه بیا تکرار کړې ده او وایي په دې اړه د امریکا د نوي ادارې د هڅو د ژمنې هرکلی کوي.

د امریکا د نوې ادارې د بهرنیو چارو وزارت ته نوماند انتوني بلېنکین پرون د سنا جرګې ته ویلي و چې واشنګټن به د دې تړون د غځولو هلې ځلي وکړي.

د نیو سټارټ"نوي پیل' په نوم تړون چې د سټراتیژیکو وسلو د کمولو تړون دی، په ۲۰۱۰ میلادي کال کې لاسلیک شوی و او راتلونکې میاشت یې موده ختمېږي.

دا تړون هغه سټراتیژیک اټمي سروکي، توغندي او بم غورځوونکي محدودوي چې روسیه او امریکا یې ځای پرځای کولی شي.

د کرملېن ویاند ډیمتري پېسکوف نن چهارشنبه (د سلواغې ۱مه) خبریالانو ته ویلي، که امریکا د دې تړون غځولو ته په ریښتوني ډول سیاسي هوډ ولري، روسیه به د دې کار هرکلی وکړي.

د روسیې ولسمشر ولادیمیر پوتین تېرکال پر واشنګټن غږ کړی و چې له کوم شرط پرته د یوه کال لپاره دا تړون وغځوي.

څېړونکي وایي، که د نیوسټارټ یا نوي پیل تړون تمدید نه شي، د مسکو او واشنګټن ترمنځ به د نوېو وسلو سیالي رامنځته او ترینګلتیا به ډېره شي.

اروپایې شورا: امریکا د خپلې ډیموکراسۍ ځواک ثابت کړ 

د اروپایې شورا مشرچارلز مېشل

د اروپایې شورا مشر وایي، نن امریکا د خپلې ډیموکراسۍ ځواک ثابت کړ.

چارلز مېشل نن چهارشنبه اروپایې پارلمان ته په وینا کې هیله وښوده چې په امریکا کې د واک د لېږد چاره په سوله ییز ډول ترسره شي.

نوموړي د نړۍ په ثبات کې د اروپا رغنده رول ته په اشارې وویل چې د خپلو ګټو د دفاع او د ارزښتونو د پراختیا لپاره لا ډېر کار ته اړتیا ده چې دا کار د ده په وینا د امریکا په څېر د یوه پیاوړي متحد لاس نیوی غواړي.

مېشل په دې برخه کې د پنځو لومړیتوبونو یادونه وکړه: "موږ باید پر پنځو لومړیتوبونو کار وکړو:

  • لومړی، د دوه اړخېزو همکاریو پیاوړتیا.
  • دوهم، له کوویډ- ۱۹ ناروغۍ سره مبارزه.
  • درېیم، د چاپیریالي بدلون سره مقابله.
  • څلورم، د خپلو اقتصادونو بیارغول او د سوداګرۍ ډاډمنول.
  • پنځم د امنیت او سولې لپاره د ځواکونو یوځای کول. دا به آسانه کار نه وي، خو په ګډه پر دې ستونزو برلاسي کیدای شو."

د اروپایي شورا مشر په تېرو څلورو کلونو کې د اروپا او امریکا اړیکې دردوونکې وبللې.

حسن روحاني: جوبایډن دې پر ایران لګیدلي بندیزونه لېرې کړي

د ایران ولسمشر حسن روحاني وايي د امریکا نوی حکومت دې ددې هېواد سره اټمي تړون ته بېرته راشي.

د ایران ولسمشر حسن روحاني نن چهارشنبه(د سلواغې ۱مه) د امریکا له نوي ولسمشر جوبایډن څخه غوښتي چې د دې هېواد سره اټمي تړون ته بېرته راشي او پر ایران لګیدلي بندیزونه لېرې کړي.

د ولسمشر ټرمپ اداره په ۲۰۱۸ میلادي کال کې د ایران له اټمي تړونه ووتله او پر تهران یې نوي بندیزونه ولګول.

حسن روحاني نن د کابینې په غونډه کې چې پر ټلوېزیون خپره شوه وویل: "که واشنګټن له نړیوالو قدرتونو سره د ایران د ۲۰۱۵ میلادي کال اټمي تړون ته بېرته راشي، موږ به هم د دې تړون ژمنو ته درناوی وکړو."

د ایران ولسمشر په نننۍ وینا کې د ډونالډ ټرمپ د ادارې د پای ته رسېدو هرکلی وکړ او هغه یې یو ظالم ولسمشر وباله.

امریکا او اروپايي ټولنو کې د کرونا ضد واکسین پروګرامونه چټک شوي 

ارشیف، فرانسه کې یوه واکسیناتوره په کرونا اخته یوه ناروغ ددې وبا ضد واکسین پلی کوي.

د امریکا متحده ایالاتو او اروپایي ټولنې دواړو کې د کرونا وبا د خپرېدو د مخنیوي لپاره د واکسین پروګرامونه داسې مهال چټک شوي چې دواړو وچو کې د یاد ویروس له کبله د مړو شوېو کسانو شمېر تر ۴۰۰ زرو اوښتی دی.

په امریکا کې دا خبر داسې مهال خپور شو چې نوی منتخب ولسمشر جوبایډن نن چهارشنبه (د سلواغې لومړۍ نېټه) لوړه کوي او له دې وبا سره مبارزه او د واکسین پروګرام ګړندي کول یې د خپلې کاري اجنډا په سر کې راوستې ده.

په امریکا کې یوازې تېره میاشت د کووېډ-۱۹ ناروغۍ څخه شااوخوا یو لک کسان مړه شول.

روغتونونه هم د ژمي موسم په را رسېدو سره چې د ویروس خپرېدل په کې اوج ته ورسېد، له سختو فشارونو سره مخامخ دي.

هاخوا اروپايي ټولنه کې وروسته له هغه چې له کرونا ویروسه د مړو شمېر تر ۴۰۰ زرو واوښت، دغه بلاک اټکل کړی چې د روان میلادي کال تر نیمایي پورې به د اروپایي ټولنې د ۴۴۶ میلیونه وګړو څخه اویا سلنې ته یې واکسین تطبیق کړي.

اروپایي ټولنه د کافي واکسین د نه برابرولو له کبله دې وروستیو کې له انتقادونو سره مخامخ ده.

د جو بایډن دوه سپيان له څلورو کلونو وروسته بېرته سپينې ماڼې ته ستنېږي

د امریکا متحده ایالاتو سپینه ماڼۍ

د امریکا متحده ایالاتو منتخب ولسمشر جو بایډن دوه سپيان مېجر او چمپ به له څلورو کلونو وروسته بېرته سپينې ماڼې ته ستانه شي.

مېجر او چمپ کله چې جو بایډن د پخواني ولسمشر بارک اوباما مرستیال و کلونه په سپینه ماڼۍ کې تېر کړي وو.

مېجر او چمپ دواړه د جرمن شپهرد له نسله دي. دا ډول سپیان غښتلي او اکثر ژغورندویه دي چې له پولیسو سره هم وي.

د امریکا اکثرو ولسمشرانو په سپينه ماڼۍ کې کورني حیوانات اهلي سپيان او واړه پاپیان یا پېشوګانې ساتلې دي.

ډونالد ټرمپ ښايي په څه باندې یوه نیمه پېړۍ کې واحد ولسمشر و چې سپينه ماڼۍ کې یې سپی یا پېشو نه‌ساتله.

ایراني چارواکو یو ایراني‌الاصله امریکايي سوداګر په جاسوسۍ تورن کړی

ارشیف، تهران ښار

د امریکايي رسنیو راپورونه وايي ایراني چارواکو یو ایراني‌الاصله امریکايي سوداګر په جاسوسۍ تورن کړی دی.

دا تحول په داسې حال کې راځي چې په وروستیو کې د تهران او واشنګټن ترمنځ کړکېچ زیات شوی دی.

د امریکا د بهرنیو چارو وزارت د فرانسې خبري اژانس ته په یوه اعلامیه کې تأیید کړې چې د ایران له‌خوا د یوه بل امریکايي وګړي د نیول کېدو په اړه له راپورونو خبر دي.

په اعلامیه کې د دغه شخص د هویت په اړه معلومات نه‌دي ورکړل شوي او نور جزئیات هم نه‌دي ورکړل شي.

خو ایراني رسنیو تېره پنجشنبه د عماد شرقي د نیولو راپور ورکړی و چې د ساوارا په نوم‌یې د یوه ایراني مالي شرکت مرستیال معرفي کړی و.

مایک پومپیو: چین د اویغور اقلیت په وړاندې عام‌وژنه ترسره کوي

د امریکا د بهرنیو چارو وزیر مایک پومپیو

د امریکا متحده ایالاتو د بهرنیو چارو وزیر وايي، چین د اویغور اقلیت په وړاندې چې اکثریت‌یې مسلمانان دي، عام‌وژنه ترسره کوي.

مایک پومپیو پرون سې شنبه دا څرګندونې پر چین د فشار راوستلو لپاره په خپله وروستۍ کاري ورځ کې وکړې.

ښاغلي پومپیو پرون په یوه اعلامیه کې وویل: "زما په باور دا عام‌وژنه روانه ده او شاهدان یو چې له چین څخه د اویغور اقلیت د ورکېدو لپاره سیستماتیکه هڅه کېږي."

د بشري حقونو د ډلو په باور شاوخوا یو ملیون اویغوریان او نور ټبرونه چې اکثریت‌یې مسلمانان دي د شینجیانګ په کمپونو کې توقیف شوي دي.

چین دا تورونه ردوي او وايي دغه کمپونه د حرفوي روزنې لپاره دي.

اروپايي ټولنه: روسیه دې الکسي ناوالني او د هغه ملګري خوشې کړي

نیول شوی الکسي ناوالني

د اروپايي ټولنې یوه چارواکي له روسیې غوښتنه وکړه چې د اپوزېسیون مشر الکسي ناوالني او د هغه نور توقیف شوي ملګري خوشې کړي.

د بهرنیو چارو او امنیتي پالېسۍ په برخه کې د اروپايي ټولنې لوړ رتبه استازي جوزف بورېل پرون سې شنبه په بروکسل کې اروپايي پارلمان ته په وینا کې وویل: "د ښاغلي ناوالني حقونو ته باید په بشپړ ډول له کوم شرط پرته درناوی وشي او دا حقونه پر ځای شي. د عدالت سیاسي کول د منلو وړ نه‌دي. له روسي چارواکو غوښتنه کوو، ناوالني، نور ژورنالېستان او فعالان چې د ناوالني د ستنېدو په تړاو نیول شوي، خوشې کړي."

د روسیې د اپوزېسیون مشر الکسي ناوالني چې په جرمني کې یې درملنه روانه وه، تېره یکشنبه مسکو ته له ستنېدو سره سم ونیول شو.

وروسته له هغې چې یوه قاضي د ۳۰ ورځو لپاره د ناوالني د توقیف حکم صادر کړ، د کرملېن دغه منتقد اوس د مسکو په یوه توقیف‌ځای کې د بند شپې ورځې تېروي.

جو بایډن نن لوړه کوي

د امریکا منتخب ولسمشر جو بایډن او مېرمن‌یې

جوبایډن نن د امریکا د ۴۶م ولسمشر په توګه لوړه کوي.

۷۸ کلن بایډن به تر لوړې وروسته راساً سپينې مانۍ ته ځي څو د ډونالد ټرمپ ځای ونیسي.

د جو بایډن د لوړې په مراسمو کې چې په سیمه‌ییز وخت د غرمې په ۱۲ بجو به وشي ډونالد ټرمپ ګډون نه‌کوي. دا په تېرو څه باندې ۱۵۰ کلونو کې لومړی وار دی چې تلونکی ولسمشر د خپل ځای ناستي د لوړې په مراسمو کې ګډون نه‌کوي.

د بایډن د لوړې په مراسمو کې به پخواني ولسمشران جورج ډبلیو بوش، بېل کلنټن او بارک اوباما ګډون کوي.

په پلازمېنه واشنګتن ډي. سي کې د لوړې د مراسمو د امنیت لپاره زرګونه عسکر ځای پر ځای شوي دي.

امریکايي چارواکو وروسته تر هغه په پلازمېنه کې امنیتي تدابیر زیات کړل چې د جنورۍ په شپږمه د مظاهرو پر مهال خلک د کانګرس په ودانۍ ورننوتل.

د پولیسو او بریدګرو په نښتو کې یو پولیس او څلور نور کسان ووژل شول.

نور راوښيه

XS
SM
MD
LG