د لاسرسۍ وړ لېنکونه

تازه خبر
یکشنبه ۵ سلواغه ۱۳۹۹ کابل ۰۱:۵۶

خبرونه

لوګر کې د پلم علم ښاروالۍ ودانۍ او د یو سړک چارې بشپړې شوې

د پلم علم ښاروالۍ ودانۍ ا

په لوګر کې د ۴۶ میلیونه افغانیو په ارزښت د پلم علم ښاروالۍ ودانۍ او د یو سړک چارې بشپړې شوې.

د لوګر والي محمد اجمل شاپور وایي چې د پل علم ښاروالۍ ادارې ودانۍ په څلورو پوړونو کې په ۵۶۴،۲۵ متره مربع ځمکه کې د نږدې ۲۴ میلیونه افغانیو په لګښت رغول شوې چې لګښت یې د ښاروالۍ د پراختیایي بودیجې څخه ورکړل شوې.

دی وایي، د دې ودانۍ چارې په یوه کال کې بشپړې شوي چې د ۱۵ اداري خونو سربېره په کې یو مېلمستون، د غونډو تالار او نورې اړینې برخې رغول شوي دي.

دده په خبره د دې ودانۍ په پرانېستو سره به د ښاروالۍ ریاست د کار کوونکو او مراجعینو ډېرې ستونزې حل شي.

په همدې مهال د دې ولایت په مرکز پل علم ښار کې د یو نیم کیلو متر په اوږدوالي د یوه سړک د جوړېدو چارې هم بشپړې شوې چې په دغه پروژه، له تشویقي بودیجې څخه نږدې ۲۲ میلیونه افغانۍ لګښت راغلی او چارې یې په ۶ میاشتو کې بشپړې شوي دي.

د ورځې تازه خبرونه دلته ولولئ

هلمند کې کروندګرو ته ۱۶۶ شنې خونې جوړې شوې

ارشیف، افغانستان کې یوه شنه خونه

د هلمند د کرنې، اوبو لګولو او مالدارۍ رئیس وایي چې د دې ولایت په مرکز لښکرګاه، ناوې، نادعلي او نهر سراج ولسوالیو کې کروندګرو ته ۱۶۶ شنې خونې جوړې شوې دي.

د کرنې رئیس زلمي الکو نن ازادي راډیو ته وویل چې په هلمند کې د کرکېلې لپاره د شنو خونو له جوړېدو سره سم د بزګرو کار غوړېدلی.

زلمی الکو وايي چې د شنو خونو په جوړېدو سره د سبو کرکېلې نوې بڼه خپله کړې چې بزګرانو هم له نویو هیلو سره دغه کار ته مخه کړې ده.

نوموړی وايي، شنې خونې بزګرو ته ښه عاید لري.

دوى وايي، د شنو خونو په پراختيا سره کولای شي چې د هېواد یو شمېر نورو ولایتونو ته هم وخت په وخت كرنيز توکي ورسوي.

د هلمند د کرنې، اوبو لګولو او مالدارۍ ریاست چارواکي وایي، دوی په دې ولایت کې د کرنیزو حاصلاتو د لوړولو او د موسمي نباتاتو د کرکېلي د پراختیا په پار هلې ځلې کوي او د شنو خونو د حاصلاتو ښې پایلې دوی هڅولي چې د شنو خونو د جوړولو لړۍ نوره هم پیاوړې او ګړندۍ کړي.

۱۳۹۹ کال کې د افغانستان د ملکي هوايي چلند ادارې عواید کم شوي

ارشیف، کابل کې د حامد کرزي نړیوال هوايي ډګر

د افغانستان د ملکي هوايي چلند اداره په ١٣٩٩ لمریز کال کې د عوایدو له کمېدو اندېښمنه ده.

د دغې ادارې ویاند محمد نعیم صالحي نن ازادي راډیو ته وویل چې په دغه کال کې عواید ٩ سلنه راټیټ شوي دي.

نوموړي وویل چې په ١٣٩٩ لمریز کال کې د کرونا ویروس او قرنطین له امله پروازونه کم شول چې دې ادارې د ترانزیټي الوتنو له کمېدو څخه ٦٠ ملیونه افغانۍ زیان کړی.

د افغانستان د ملکي هوايي چلند ادارې په وینا، په دغه کال کې په ټوله کې ۵۳ زره کورني او ۳۵ زره نړیوال پروازونه ترسره شوي دي.

پاکستان د احمدي فرقې د وېب‌پاڼې د بندولو امر وکړ

ارشیف، انځور تزئیني بڼه لري.

پاکستان د احمدي فرقې د وېب‌پاڼې د بندولو امر کړی دی، د دوی وېب‌پاڼه له امریکا خپرونې کوي.

د دې مذهبي فرقې د وېب‌پاڼې چلوونکی حارث ظفر وايي، د پاکستان د مخابراتي ادارې چارواکو د روانې میاشتې په پیل کې رسمي حکم صادر کړی چې د دوی وېب‌پاڼه باید په پاکستان کې سانسور شي.

ظفر د پاکستان د حکومت دا اقدام د بیان او دیني ازادیو خلاف کار وباله.

د پاکستان پارلمان په ۱۹۷۴ م کال احمدي فرقه نامسلمانه اعلان کړه او له هماغه مهاله د دې فرقې پر غړو په پاکستان کې د سخت‌دریځو ډلو له لوري په ځلونو بریدونه شوي دي.

چین د کرونا ویروس ۱۷۲ نوې پېښې ثبت کړې

ارشیف، په چین کې په کرونا ویروس اخته ناروغان

چین وايي، د کرونا ویروس ۱۷۲ نوې پېښې یې ثبت کړې دي.

د چین روغتیايي چارواکو نن (یکشنبه) وویل، په داسې حال کې چې د خپل هېواد په شمال کې د کرونا وبا د خپرېدو د مخنیوي لپاره هلې ځلې کوي، ۱۷۲ مثبتې پېښې یې ثبت کړې دي.

تېره اوونۍ چینايي چارواکو له خلکو وغوښتل چې د کرونا ویروس د خپرېدو د مخنیوي لپاره دې د نوي لمریز کال په شپو ورځو کې غیر ضروري سفر نه‌کوي.

په چین کې د نوي کال په رخصتیو کې ملیونونه کسان له خپلو کورنیو سره له یوه ځایه بل ته سفر کوي.

جلال‌اباد کې یوې چاودنې لږترلږه ۳ تنه ملکي وکړي ژوبل کړل

ارشیف، جلال‌اباد کې د یوې چاودنې سیمه کې راټول شوي پولیس

په جلال‌اباد کې نن سهار په یوه چاودنه کې لږترلږه ۳ تنه ملکي وکړي ژوبل شوي دي.

د ننګرهار د رسنیو دفتر ازادي راډیو ته ویلي چې دا پېښه شااوخوا ۷ بجې د جلال‌اباد ښار-چپرهار زړې اډې ته څېرمه د سمېنټو د یوه دکان مخې ته د ځای پر ځای شویو چاودېدونکو موادو د چاودلو په نتیجه کې وشوه او له کبله‌یې درې تنه ملکیان ژوبل شوي دي.

د ټپیانو حال د ډاډ وړ بلل شوی دی.

د دې پېښې مسؤلیت تر اوسه چا په غاړه نه‌دی اخیستی.

ترکیه کې د پناه غوښتونکو د قاچاق یوه لویه ډله ونیول شوه

ارشیف، یو شمېر ترکي پولیس

ترکیه وايي، د پناه غوښتونکو د قاچاق یوه لویه ډله‌یې نیولې ده.

د ترکیې د انادولو خبري اژانس د راپور له مخې، ۷۲ تنه په ۱۲ ولایتونو کې د هم‌مهالو عملیاتو په ترڅ کې نیول شوي دي.

د دې اژانس پر اساس، دغو کسانو د افغانستان، پاکستان، بنګله‌دېش، عراق او سوریې په شان هېوادونو زرګونه پناه غوښتونکي د ترکیې له لارې اروپا ته په قاچاق وړل.

په راپور کې ویل شوي چې د دغو قاچاقبرو له نیول کېدو سره د هغو ۱،۴۷۷ پناه غوښتونکو په اړه هم پلټنې پیل شوي چې دوی ترکیې ته راوستي دي.

د ترکیې امنیتي ځواکونه د انساني قاچاق د دې ډلې د ۲۲ نورو غړو د نیولو په لټه کې دي.

بهرنیو چارو وزارت: پاکستان باید طالبان تاوتریخوالي کمولو او اوربند ته وهڅوي

ارشیف، یو شمېر وسله‌وال طالبان

د افغانستان د بهرنیو چارو وزارت وایي، د پاکستان حکومت باید طالبان د تاوتریخوالي د کمولو د ژمنې عملي کولو او سراسري اوربند ته وهڅوي.

بهرنیو چارو وزارت دغه څرګندونې د پاکستان د بهرنیو چارو د وزیر شاه محمود قریشي د هغو څرګندونو په ځواب کې کړي چې د طالبانو او امریکا د هوکړې په اړه‌یې کړې دي.

قریشي تازه ویلي، د امریکا نوی ولسمشر جو بایډن باید د افغانستان د سولې بهیر روان وساتي او له دغه هېواده د ځواکونو د وتلو پروسه هم ونه‌دروي.

ښاغلي قریشي له رسنیو سره په خبرو کې ویلي، امریکا باید وضعیت درک کړي او د شا تګ پر ځای باید هغه څه روان وساتي چې پیل شوي دي.

د افغانستان د بهرنیو چارو وزارت په خبرپاڼه کې چې پرون ماښام خپره شوه راغلي، طالبانو په "بې‌ساري" ډول تاوتریخوالی زیات کړی او د سولې د خبرو په وړاندې یې تازه خنډونه جوړ کړي دي.

افغان دولت ویلي، پاکستان او نور نړیوال شریکان‌یې باید طالبان دې ته هم وهڅوي چې له ترهګرو سره اړیکې وشلوي.

افغانستان کې امریکايي پوځیانو ته د کرونا ضد واکسین تطبیق پيل شو

ارشیف

امریکا په افغانستان کې خپلو پوځیانو ته د کرونا ضد واکسین تطبیق پيل کړی دی.

دا خبره د امریکا سټار انډ سټرایپس ورځپاڼې چې د پوځ اړوند موضوعات خپروي، په افغانستان کې د خپلو ځواکونو له قوله لیکلې ده.

په خبر کې راغلي، افغانستان ته د مودرنا واکسین بستې د جنورۍ په ۱۷مه لېږدول شوي او د جنورۍ په ۱۸مه امریکایي ځواکونو ته دا واکسین پيل شوی.

خبر کې د امریکا د پوځ د مسؤلینو په حواله راغلي چې لومړي سر کې دغه واکسین هغو کسانو ته ورکوي چې له کرونا ویروس سره د مبارزې په لومړۍ کرښه کې دي او بیا یې خپلو ټولو کارکوونکو او قراردادیانو ته تطبیقوي.

له دې وړاندې د افغانستان دولت هم ویلي چې تر راتلونکي اوړي پورې به مرسته کوونکي هېوادونه د کرونا واکسین ورورسوي.

تازه هندي رسنیو د هغه هېواد د چارواکو په حواله ویلي، که افغان مسؤلین‌یې ورسره ومني، هند چمتو دی چې د جنوبي اسیا د یو شمېر نورو هېوادونو په څېر افغانستان ته هم د کرونا ضد واکسین ولېږي.

د افغانستان او ایرلنډ کرکټ ملي لوبډلې نن دوهمه یو ورځنۍ لوبه کوي

آرشیف، بازی تیم‌های کریکت افغانستان و ایرلند در امارات متحده عربی

د افغانستان او ایرلنډ د کرکټ ملي لوبډلې نن بیا د سیالۍ ډګر ته ښکته کېږي.

دا د دواړو ټیمونو ترمنځ د درېیو یو ورځنیو لوبو د لړۍ دوهمه لوبه ده چې په متحده عربي اماراتو کې ترسره کېږي.

د افغانستان د کرکټ بورډ ویاند فرید هوتک وایي، لوبه د سهار په لس نیمو بجو پيلېږي او د افغانستان د ملي ټلوېزیون سپورټ چینل‌یې په ژوندۍ بڼه خپروي.

ښاغلی هوتک زیاتوي: "دا لوبې خورا مهمې او ارزښتناکه دي، ځکه چې له همدغو لوبو نه لوبډلې کولای شي چې نړیوال جام ته نېغ په نېغه لار پیدا کړي، هره لوبډله هڅه کوي چې بریا ترلاسه کړي، د ویلو ده چې افغان لوبډله چمتووالی لري."

افغانستان خپله لومړۍ مسابقه د ۱۶ منډو په توپیر ګټلې ده.

د افغانستان او ایرلنډ درېیمه پنځوس اوریزه لوبه د جنورۍ ۲۶مې یا راتلونکې سې شنبې ته پلان شوې ده.

د امریکا د ملي راډیو ټلوېزیون مشهور کوربه او ویاند لاري کېنګ مړ شو

لاري کېنګ

د امریکا د ملي راډیو ټلوېزیون مشهور کوربه او ویاند لاري کېنګ د ۸۷ کلونو په عمر مړ شو.

کېنګ له ۱۹۸۵ نه تر ۲۰۱۰ کال پورې د «سي.اېن.اېن» د «له لاري کېنګ سره په ژوندۍ بڼه» خپرونه کې ډېر شهرت ته ورسېد.

کېنګ د سرطان ناروغي درلوده او د خپل مسلکي ژوند پر مهال‌یې د نړۍ له مشرانو، د سینما له ستورو او لوبغاړو سره لسګونه زره مرکې کړې دي.

د هغو مشهورو کسانو له ډلې چې کېنګ ورسره مرکې کړي د پخواني شوروي اتحاد د رهبر میخایل ګرباچوف، له ګیرال فورده نیولې تر بارک اوباما پورې د امریکا د ولسمشرانو، د لای لاما او بل ګېتس نومونه یاد شوي دي.

پر هغه باندې وروستیو کلونو کې له دې کبله انتقادونه وشول چې د روسیې له «آر. ټي» ټلوېزیون سره‌یې همکاري کوله.

ایران کې د کرونا ویروس د نوې بڼې په اړه د حسن روحاني اندېښنه

د ایران ولسمشر حسن روحاني

د ایران ولسمشر دغه هېواد کې د کرونا ویروس د نوې بڼې په اړه اندېښنه وښوده او ویې‌ویل، راتلونکو څو اوونیو کې به د 'کووېډ-۱۹' ناروغۍ ضد واکسین پيل شي.

ایران په منځني ختیځ کې تر نورو ډېر د کرونا له کبله زیانمن شوی دی.

د ایران ولسمشر حسن روحاني په یوه ټلوېزیوني وینا کې ویلي، تر هغو چې کورنی واکسین جوړېږي، بهر کې تولید شوی هغه اړین دی.

روحاني ونه‌ویل چې له کوم بهرني واکسین نه به کار واخلي.

ایران تېره میاشت د خپل کورني واکسین ازمیښت هم پیل کړ.

د رسمي شمېرو له مخې، څه باندې ۵۷ زره ایرانیان په 'کووېډ-۱۹' ناروغۍ مړه شوي دي، خو داسې راپورونه شته چې ممکن نارسمي شمېرې تر دې لوړې وي.

واشنګټن: مسکو دې نیول شوي مظاهره کوونکي او خبریالان خوشې کړي

روسیه کې مظاهرې او د پولیسو اخ‌وډب

واشنګټن له مسکوه وغوښتل چې نیول شوي مظاهره کوونکي او خبریالان خوشې کړي.

روسیه کې د پرونیو مظاهرو پر مهال چې د کرملېن د مخالف الکسي ناوالني د خوشې کېدو په هدف ترسره شوې، څه باندې دوه زره کسان ونیول شول.

واشنګټن له مظاهره‌چیانو سره د دوی په وینا د پولیسو تاوتریخجن چلند غندلی دی.

د امریکا د بهرنیو چارو وزارت ویلي، نیول شوي هغه کسان دي چې د مظاهرو لپاره‌یې له خپلو بنسټیزو حقونو نه استفاده کوله.

اروپایي ټولنې هم په روسیه کې د مظاهره کوونکو نیول غندلي دي.

د دغې ټولنې د بهرني سیاست مشر جوزف بورېل ویلي، په روسیه کې د مظاهره کوونکو پر پراخې نیونې او له هغوی سره په شوي زورزیاتي خواشینی دی.

روسي پوليسو د لاريون پر مهال د ناوالني مېرمن نیولې

معترضان در روسیه

د روسیې د اپوزیسیون مشر الکسي ناوالني وايي پولیسو یې مېرمن په مسکو کې د مظاهرو پر مهال نیولې ده.

ناوالنې د پولیسو له توقیفځایه د ټولنیزو شبکو په یوه پوست کې ویلي، چې مېرمن یې یولیا ناوالنایا نن د هغو مظاهرو پر مهال ونیول شوه، چې په زرګونو کسان کې په راغونډ شوي وو.

مظاهره چیانو له توقیف نه د ناوالني د خوشې کېدو غوښتنه وکړه.

الکسي ناوالني چې له څه مودې یې په جرمني کې درملنه روانه وه، تېره اوونۍ مسکو ته له رسېدو سره سم ونیول شو.

د روسیې پولیسو په مسکو او لسګونو نورو ښارونو کې مظاهرې غیرقانوني بللي او په سلګونو کسان یې نیولي دي.

افغان حکومت د امریکا او طالبانو ترمنځ د شوې هوکړې له بيا کتنې هرکلى وکړ

په قطر کې د سولې د بين الافغاني مذاکراتو د پرانيسغونډې انځور. 12.9.2020

د سولې په چارو کې د دولت وزارت د امریکا د نوي ولسمشر د هغې پرېکړې هرکلی وکړ، چې ویلي یې دي د امریکا او طالبانو ترمنځ د شوې موافقې بیاکتنه کوي.

د سولې په چارو کې د دولت د وزارت یوه معین عبداله خنجاني په دې اړه نن په یوه ویډیويي پیغام کې وویل: "د افغانستان اسلامي جمهوریت په دوحه کې د امریکا او طالبانو ترمنځ د شوې موافقې د بیاکتنې لپاره د امریکا د متحدو ایالتونو د پرېکړې هرکلی کوی. په عین حال کې غوښتنه لري چې دغه ارزونه د افغانانو له غوښتنې سره برابره وي، چې هغه په افغانستان کې د تاوتریخوالي سمدستي ختمېدل او یوې پایداره او عادلانه سولې ته رسېدل دي."

د طالبانو او امریکا ترمنځ د شوې موافقې پر بیاکتنې د افغانستان او امریکا د ملي امنیت سلاکارانو حمد اله محب او جېک سالیوان پرون ټیلیفوني خبرې وکړې.

ښاغلي سالېوان ویلي، امريکا به له طالبانو سره د ۲۰۲۰ م کال په فبروري کې د سولې شوې موافقه، له نورو ټروريسټي ډلو سره د طالبانو د اړيکو، په افغانستان کې د تاوتريخوالي کمښت او له افغان دولت سره د معنی دارې سولې مذاکراتو په رڼا کې و ارزوي.

د خامنه اي په ويبپاڼه د ډونالډ ټرمپ ته ورته د يو سړي عکس خپور شوى

آیت‌الله علي خامنه‌اي

د ایران د رهبر ایت اله علي خامنه اي په ویبپانه کې د خبرداري له متن سره، د داسې سړي عکس خپور شوی، چې د امریکا پخواني ولسمشر ډونالډ ټرمپ ته یې څېره ورته ده.

په دې عکس کې دا سړی په ګلف لوبه بوخت ښکاري، چې یوې بې پېلوټه الوتکې په نښه کړی دی.

دا ظاهراً د ایراني جنرال قاسم سلیماني د وژنې په تړاو د غچ اخیستو د ګواښ پیغام ورکوي.

د خامنه اي د ویبپاڼې په یادښت کې راغلي: "قاتلان او د قتلونو امر ورکوونکي باید پوه شي، غچ چې هره شېبه ممکن دی."

دا عکس د اول وار لپاره د ټویټر په یوه فارسي پیغام کې خپور شو، چې د خامنه اي د ویبپاڼې لینک هم ورسره مل و، خو ټویټر پرون دغه مطلب وتاړه او ویې ویل دا حساب جعلي و.

د تهران او واشنګټن ترمنځ کړکېچ وروسته له هغې زیات شو، چې ډونالډ ټرمپ درې کاله مخکې له اټومي تړون څخه د وتلو او پر ایران بېرته د بندیزونو لګولو اعلان وکړ.

نور راوښيه

XS
SM
MD
LG