د لاسرسۍ وړ لېنکونه

تازه خبر
دوشنبه ۲۹ مرغومی ۱۳۹۹ کابل ۰۵:۱۴

خبرونه

د کاپیسا فعالې 'سیرت' د جرمني- فرانسې د بشري حقونو مډال ترلاسه کړ

د افغانستان په نقشه کې د کاپیسا ولایت

په کاپیسا کې د بشري حقونو فعالې ساره سیرت د جرمني- فرانسې د بشري حقونو مډال ترلاسه کړ.

په کابل کې د جرمني سفارت پر خپله ټویټرپاڼه مېرمن سیرت زړوره فعاله بللې او ویلي یې دي چې د بشري حقونو نړیوالې ورځې په مناسبت یې دا مډال ورکړی دی.

ساره سیرت چې د ځوانانو د پارلمان غړې ده، له څو کلونو راهیسې کاپیسا ولایت کې د مدني فعالې په توګه فعالیت کوي.

نوموړې تېرو پارلماني ټاکنو کې ولسي جرګې ته نومانده هم وه، خو د بریا رایې یې خپلې نه کړې.

د ورځې تازه خبرونه دلته ولولئ

استرالیا کې د تېنس لږترلږه ۷۲ لوبغاړي قرنطین شول

ارشیف

په استرالیا کې د تېنس د لوی تورنمنت د پیلېدو په درشل کې لږترلږه ۷۲ لوبغاړي وروسته تر هغې سخت قرنطین شوي چې دې تورنمنت ته د لوبغاړو، روزونکو او چارواکو د لېږدولو په چارټر الوتکو کې د یو شمېر سپرلیو د 'کووېډ-۱۹' مثبتې پېښې ثبت شوې دي.

د دغو لوبو تنظیموونکو پرون یکشنبه تایید کړه چې د قطر له پلازمېنې دوحې څخه ملبورن ته په تللې الوتکه کې د یو مسافر د کرونا مثبته پېښه ثبت شوې ده.

که څه هم دغه مسافر د دغه ورزشي ټیم غړی نه‌دی، خو د ۲۵ لوبغاړو په ګډون د دې الوتکې ټولې ۵۸ سپرلۍ اجازه نه‌لري چې په هوټل کې له خپلو خونو ووځي او هم نه‌شي کولای چې تر۱۴ ورځو پورې تمرین وکړي.

تر دې مخکې د دغه تورنمنت ۴۷ نور لوبغاړي وروسته له هغې قرنطین شول چې له لاس انجلس څخه په یوه چارټر الوتکه کې د درېیو تنو او له ابوظبي هم په یوه الوتنه کې د یوه د کرونا مثبتې پېښې تثبیت شوې وې.

ټاکل شوې ده چې د استرالیا اوپین د تېنس لوبو سیالۍ د فبرورۍ په اتمه پیل شي. د دې لوبو د تنظیم د چارو مشر ویلي چې لوبې به په خپل وخت پیل شي.

چارواکي: تخار او کندهار کې د طالبانو د بریدونو مخه ونیول شوه

ارشیف، کندهار کې د افغان ځواکونو عملیات

په تخار او کندهار کې چارواکي د طالبانو د حملو د په شا تمبولو او دې ډلې ته د زیانونو د اړولو خبر ورکوي.

د تخار د امنیه قوماندانۍ ویاند عبدالخلیل ازادي راډیو ته وویل چې افغان امنیتي ځواکونو د دې ولایت په خواجه غار ولسوالۍ کې د طالبانو د یوې حملې مخه ونیوله.

نوموړي طالبانو ته د اوښتې مرګ‌ژوبلې په اړه وویل: "د صادق په نوم چې د لایزري قطعې مرستیال دی، په ګډون پنځه طالبان وژل شوي او څو تنه هم ټپیان دي."

ښاغلي اسیر په دغو نښتو کې خپل لور ته د یوه سرتېري د ټپي کېدو خبره وکړه.

په عین حال کې د افغانستان دفاع وزارت وایي، په کندهار کې یې د وسله‌والو طالبانو د پراخو بریدونو مخه نیولې او د دې ډلې له ۲۰ زیات وسله‌وال یې وژلي دي.

دې وزارت نن په یوه خپره کړې خبرپاڼه کې ویلي چې تېره ورځ طالبان د کندهار ولایت "ژړۍ" او " ارغنداب" ولسوالیو کې د دفاعي او امنیتي ځواکونو پر پوستو د برید په موخه راټول شوي وو چې دفاعي او امنیتي ځواکونو د فعالې دفاع په چوکاټ کې پرې بریدونه وکړل.

د دغو بریدونو په پایله کې ۲۵ طالبان ووژل شول او ۸ نور ټپیان شول.

د خبرپاڼې له مخې د نښتو په پایله کې د طالبانو دوه پټنځایونه او یوه اندازه وسلې او مهمات له‌منځه یوړل شول.

طالبانو په تخار او کندهار کې دې ډلې ته د اړول شویو زیانونو په اړه د دغو ادعاوو په اړه تر اوسه څه نه‌دي ویلي.

د جنوبي کوریا یوې محکمې د سامسونګ کمپنۍ مرستیال مشر په بند محکوم کړ

ارشیف

د جنوبي کوریا یوې محکمې د الکترونیکي وسایلو د سترې کمپنۍ سامسونګ مرستیال مشر د فساد په تور په دوه‌نیم کلونو بند محکوم کړی دی.

۵۲ کلن لیي جای یونګ مخکې د جنوبي کوریا د ولسمشرې پارک ګیون هي یو همکار ته د رشوت ورکولو په تور په ۲۰۱۷ کال کې په پنځو کلونو بند محکوم شوی و.

هغه ویلي چې کوم غلط کار یې نه‌دی کړی چې وروسته‌یې سزا کمه شوه او د استېناف غوښتنې په نتیجه کې په زندان کې د یوه کال بند له تېرولو وروسته خوشې شوی و.

سترې محکمې د هغه دوسیه بېرته د سئول عالي محکمې ته استولې وه چې نن‌یې دغه نوی حکم صادر کړ.

د سامسونګ کمپنۍ عواید د جنوبي کوریا د کورنیو ناخالصو عوایدو په ۱۰۰ کې ۲۰ جوړوي.

پولیسو د کابل ښار د ګذر یو وکیل له مهماتو او پوځي تجهیزاتو سره ونیوه

په کابل کې د ګذر نیول شوی وکیل

د افغانستان د کورنیو چارو وزارت وایي، پولیسو یې د کابل ښار د ګذر یو وکیل له دوو کلاشینکوفونو او یوې اندازې مهماتو او پوځي تجهیزاتو سره نیولی دی.

د وزارت ویاند طارق ارین پر خپله ټویټرپاڼه لیکلي چې دغه مهمات په ۱۳ حوزه کې د ګذر له وکیل څخه ترلاسه شوي دي.

ارین وایي، په دې اړه د پولیسو پلټنه روانه ده.

دا په داسې حال کې ده چې پلازمېنه کابل کې نا امنیو او هدفي وژنو خلک اندېښمن کړي دي.

همدا نن سهار هم د ملي شورا سړک ته نږدې او د ۱۱مې حوزې په مربوطاتو کې پر دوو موټر د مقناطیسي ماین چاودنه شوې چې د کابل امنیه قومانداني وایي، مرګ‌ژوبله نه‌لري.

پرون دغه ښار کې ناپېژانده وسله‌والو د سترې محکمې دوه قاضیانې په ډزو ووژلې.

د ډونالد ټرمپ پلویانو بیا د اعتراض څو وړې غونډې وکړې

ارشیف، د ټرمپ د پلویانو اعتراض

په واشنګټن کې د سختو امنیتي تدابیرو په ترڅ کې پرون (د جنورۍ په ۱۷مه) د ډونالد ټرمپ پلویانو د اعتراض څو وړې غونډې وکړې، خو د تاوتریخوالي کوم راپور ورنه‌کړل شو.

یوه چارواکي وویل، په دغې ورځ (هېڅ ډول پېښه) نه‌ده رامنځته شوې.

واشنګټن کې وروسته تر هغه وضعیت کړکېچن شوی چې د جنورۍ په شپږمه د ټرمپ پارېدلو پلویانو د کانګرس پر ودانۍ یرغل ورووړ.

ټرمپ ادعا کوي چې د ټاکنو پایله غلا شوې او دی ګټونکی دی، خو دا ادعا یې څو ځله د امریکا په محکمو کې رد شوې ده.

په واشنګټن او د لسګونه نورو ایالتونو په مرکزونو کې د ملي ګارد سرتېري چې د مظاهرې د مخنیوي په وسایلو سمبال دي، ځای پر ځای شوي دي.

دغه ځواکونه هڅه کوي چې د جنورۍ په ۲۰مه د ټاکل شوي ولسمشر جو بایډن له لوړې مخکې د نارامۍ هر ډول هڅه شنډه کړي.

امریکا او جرمني د روسیې د سیاسي مخالف الکسي ناوالني نیول وغندل

نیول شوی الکسي ناوالني

د امریکا متحده ایالاتو او جرمني د روسیې د سیاسي مخالف الکسي ناوالني نیول غندلي دي.

۴۴ کلن ناوالني چې له تېرې اګسټ میاشتې راهیسې په جرمني کې تر درملنې لاندې و، پرون د مسکو هوایي ډګر ته له رسېدو سره سم پولیسو ونیو. د اخبره د هغه دوو ملګرو په ټویټونو کې کړې او ویلي یې دي چې ناوالني د خیمکي ښارګوټي کې د پولیسو یوه مرکز ته انتقال شوی دی.

د امریکا د بهرنیو چارو وزیر مایک پومپیو په یوه بیان کې د ناوالني د "بې‌قید او شرطه" خوشې کېدو غوښتنه کړې ده.

پومپیو د ناوالني د نیولو په اړه د امریکا اندېښنه په ډاګه کړې او دا ګام‌یې د روسیې له‌خوا د ناوالني او نورو هغو څېرو د غږونو غلي کول بللي چې د روسیې منتقدین دي.

د جرمني د بهرنیو چارو وزیر هایکو ماس هم د ناوالني په نیولو انتقاد کړی او د هغه د سمدستي خوشې کېدو غوښتنه‌یې کړې ده.

د امریکا د منتخب ولسمشر جو بایډن ادارې هم چې د چهارشنبې په ورځ کار پیلوي، د ناوالني د خوشې کېدو غوښتنه کړې.

عبدالله: مذاکره کوونکې ډله هڅه کوي روانې مذاکرې په سرعت مخ ته لاړې شي

د افغانستان د ملي مصالحې عالي شورا مشر عبدالله عبدالله

د ملي مصالحې عالي شورا رئیس وايي، د افغانستان مذاکره کوونکې ډله هڅه کوي چې په قطر کې روانې مذاکرې په سرعت مخ ته لاړې شي

عبدالله عبدالله دا خبره په هغه دوهمه مجازي غونډه کې وکړه چې پرون د افغانستان د سولې له پروسې د اجماع د پیاوړتیا په هدف رابلل شوې وه.

ښاغلي عبدالله زیاته کړه: "تر هغه ځایه چې په موږ اړه لري، یو اصل چې زموږ مذاکره کوونکې ډله به‌یې تعقیبوي، تر خپله وسه روانو مذاکرو ته د سرعت بخښل دي. البته چې ټول‌شموله جوړجاړي ته رسېدل زموږ هدف دی."

په قطر کې د دولت او طالبانو مذاکراتي ډلو پرون ماښام په جلا جلا ټویټونو کې وویل چې د دواړو لورو د مذاکراتي ډلو مشرانو او غړو په خپلو کې غونډه وکړه چې د اجنډا ترڅنګ‌یې د راروانو غونډو په اړه بحث وکړ.

په قطر کې د طالبانو د سیاسي دفتر ویاند محمد نعیم ویلي چې د افغانستان د سولې لپاره د واشنګټن ځانګړي استازي زلمي خلیلزاد، وړمه ورځ یعنې د شنبې ماښام د طالبانو د سیاسي دفتر له مشر ملا عبدالغني برادر او د مذاکراتي ډلې له مشر عبدالحکیم حقاني سره د سولې پر موضوع خبرې وکړې.

عامې روغتیا وزارت د دیني عالمانو په مرسته د پولیو ضد واکسین کمپاین پیلوي

هرات کې روغتیايي مسؤلین د پولیو ضد واکسین د تطبیق پر مهال

د افغانستان د عامې روغتیا وزارت وايي هڅه کوي، ماشومانو ته د ګوزڼ یا پولیو ضد واکسین په تطبیق کې د دیني عالمانو مرسته خپله کړي.

دغه وزارت وايي سر له نن دوشنبې په افغانستان کې د روغتیا نړیوال سازمان په همکارۍ د ګوزڼ ضد واکسین بل کمپاین پیلوي.

د عامې روغتیا وزارت یوه ویاند نور الله تره‌کي ازادي راډیو ته وویل: "د عالمانو په ملتیا د کلي د مشرانو په همکارۍ مخ په وړاندې روان یو. پر هېوادوالو مو غږ دی چې په دې برخه کې له روغتیا وزارت سره ملتیا وکړي، تر څو هغو ماشومانو ته چې له پولیو ضد واکسین بې‌برخې پاتې دي، دا واکسین ورکړل شي."

روغتیا وزارت مخکې ویلي وو چې د تېرې میاشتې له کمپاین څخه ۳ ملیونه ماشومان بې‌برخې پاتې دي. په هغه کمپاین کې ۹ ملیونه او ۹ لکه ماشومانو ته د واکسین رسول پلان شوي وو.

په ۲۰۲۰م کال په افغانستان کې د پولیو د مثبتو پېښو شمېر ۵۶ ته ورسېد چې دا له ۲۰۰۱م کال راهیسې تر ټولو لوړ شمېر دی.

ننګرهار کې تر ۴۳۰ ډېر سرتېري د سیمه‌ییزې اردو لپاره وروزل شول

ارشیف، ننګرهار کې یو شمېر افغان ځواکونه

په ننګرهار ولایت کې د ملکي هوايي ډګر او درېیو ولسوالیو د امن ټینګولو لپاره تر ۴۳۰ ډېر سرتېري د سیمه‌ییزې اردو لپاره وروزل شول.

د ننګرهار د والي ویاند عطاالله خوګیاڼي پرون ازادي راډیو ته وویل، دغو کسانو ته پوځي روزنه ورکړل شوې ده.

ښاغلی خوګیاڼی زیاتوي: "دغو سرتېرو مخکې د سیمه‌ییزو پولیسو په لیکو کې دندې ترسره کولې چې د اړوندو سیمو دي او تر دې وروسته به د ملي اردو له ټولو امکاناتو برخه‌من شي. دوی رسماً فارغ او خپلو سیمو ته ولېږل شول."

هغه ولسوالۍ چې دغه تازه فارغ شوي کسان به په‌کې وګمارل شي کوټ، اچین او دوربابا ولسوالۍ دي.

د افغانستان په ختیځ کې د ولسي ملاتړ د پروګرام مشر سید الرحمن موند ډاډ ښوولی چې د سیمې اوسېدونکي به له دغو ګمارل شویو سرتېرو سره هر ډول همکاري وکړي.

تندر قول اردو: غزني کې د وسله‌والو طالبانو حمله شنډه شوه

ارشیف، غزني کې د افغان ځواکونو عملیات

۲۰۳ تندر قول اردو وايي په غزني ولایت کې یې د وسله‌والو طالبانو یوه حمله شنډه کړې ده.

د دې قول اردو ویاند اېمل خان مومند پرون رسنیو ته وویل، طالبانو غوښتل پرون ماسپښین د ګیلان ولسوالۍ په بختیار سیمه کې د امنیتي ځواکونو پر پوسته برید وکړي.

ښاغلي مومند وویل، امنیتي ځواکونو ځوابي اقدام وکړ: "د دفاعي او امنیتي ځواکونو بیدارو منسوبینو د ترهګرو طالبانو د دې شوم پلان تر عملي کېدو مخکې دوی ته کمین نیولی و او د دوی برید یې له ماتې سره مخ کړی. په پایله کې د مولوي قدرت د ترهګرې ډلې دوه تنه ترهګر طالبان وژل شوي دي."

وسله‌والو طالبانو د دې پېښې په اړه رسماً کومه تبصره نه‌ده کړې.

لبنان له فایزر کمپنۍ سره د کرونا ضد واکسین د رانیولو موافقه وکړه

د فایزر شرکت کرونا ضد واکسین

لبنان پرون یکشنبه له فایزر کمپنۍ سره د ۲ ملیونه او یو لک دوزه واکسین د رانیولو موافقه نهايي کړه.

لبنان د کرونا ضد دغه واکسین په داسې حال کې رانیسي چې په کرونا ویروس د اخته کسانو د شمېر زیاتېدو یې د روغتیایي څارنې سیستم اغېزمن کړی دی.

د اسوشېټډ پرس خبري اژانس په حواله، د واکسینونو دا بستې به د فبرورۍ له لومړیو لبنان ته ورسول شي.

د لبنان حکومت ویلي د فایزر کمپنۍ د واکسین ۲،۷ ملیونه نور دوزونه به د ملګرو ملتونو د ملاتړ یوه پروګرام له لارې دغه هېواد ته ورسېږي.

دا لا معلومه نه‌ده چې دا دوهمه بسته به کله لبنان ته ورسېږي، خو د حکومت د اعلامیې له مخې په دې اړه موافقه په اکټوبر میاشت کې لاسلیک شوې وه.

په لبنان کې تر اوسه نږدې دوه نیم لکه کسان په کرونا ویروس اخته شوي او د مړو شمېر په‌کې ۱،۹۰۰ ته نږدې شوی دی.

د روسیې د اپوزېسیون مشر مسکو ته له رسېدو سره سم ونيول شو

مسکو کې نیول شوی د روسیې اپوزېسیون مشر الکسي ناوالني

د روسیې د اپوزېسیون مشر الکسي ناوالني له جرمني پرون ناوخته مسکو ته له رسېدو سره سم ونيول شو.

دی له څو میاشتو په جرمني کې د مسمومېدو له کبله چې روسي چارواکي په‌کې دخیل بلل شوي وو، تداوي کېده.

په پلازمېنه مسکو کې پولیسو په لسګونه هغه کسان هم ونیول چې په یونوکوفو (Vnukovo) هوايي ډګر کې د الکسي ناوالني راتګ ته انتظار وو.

په نیول شویو کسانو کې د ناوالني د اداري فساد ضد بنسټ مدافع وکیل لیوبوف سوبول، د پروژو مدیر روسلان شاویدینوف او ځیني ژورنالېستان شامل دي.

پرون ناوخته د بلوا ضد ګڼ پولیس تر سترګو کېدل چې د راروانو مسافرو ترمینل ته‌یې د ناوالني د هغو پلویانو مخه نیوله چې شعار یې ورکاوه: فاشیستان!

ناوالني په داسې حال کې مسکو ته روان شو چې چارواکو یې د نیولو او د کلونو لپاره زندان ته د اچولو خبرداری ورکړی و.

جو بایډن د کرونا ویروس د لا خپرېدو مخنیوي لپاره بېړني اقدامات کوي

د امریکا منتخب ولسمشر جو بایډن

د امریکا متحده ایالاتو منتخب ولسمشر جو بایډن چې راروانه چهارشنبه لوړه کوي، په پام کې لري د کرونا ویروس د لا خپرېدو د مخنیوي لپاره بېړني اقدامات وکړي.

د ښاغلي بایډن د دفتر رئیس رونالډ کلېن دا خبره پرون خپلو لوړ رتبه همکارانو ته په یوه یادښت کې کړې ده.

په دغو اقداماتو کې د محصلانو د قرضو د ورکړې لپاره د وقفې تمدید او له هغو کسانو سره مرسته شامله ده چې د کرونا وبا پر مهال‌یې زیات کړاو ګاللی دی.

ټاکلی ولسمشر جو بایډن په پام کې لري چې د خپلې کاري دورې په لومړیو ۱۰۰ ورځو کې د امریکا ۱۰۰ ملیونه وګړو ته د کرونا ضد واکسین ورکړي، خو دا هغه هدف دی چې د کلېن په خبره ورته رسېدل ګران برېښي.

جو بایډن د ټاکنیزو کمپاینونو پر مهال د کرونا وبا په وړاندې د مبارزې لپاره د جدي او عملي اقداماتو ژمنه کړې وه.

د امریکا په متحده ایالاتو کې په کرونا ویروس د اخته کسانو شمېر ۲۴ ملیونه ته نږدې شوی دی.

د 'پي.ټي.اېم'مخکښه ثنا اعجاز: له بلوچستانه په زوره و ایستل شوم

د پښتون ژغورنې غورځنګ 'PTM'  مخکښه ثنا اعجاز

د پښتون ژغورنې غورځنګ 'PTM' مخکښه ثنا اعجاز وايي‌ چې د بلوچستان حکومت په زوره له دې ایالته ایستلې ده.

ثنا اعجاز د جنورۍ پر ۱۷مه د ازادې اروپا مشال راډيو ته وويل چې دا بلوچستان د پښتون مېشتې ولسوالۍ ژوب ته د یوه کتابتون پرانېستې ته ورغلې، خو پولیسو پرېنه ښوده.

نوموړې وویل: "دلته دومره ډير امنيتي کسان راغلي چې پاکستان کې ښايي په يو ترهګر پسې هم شايد ورنه شي. پولیسو او ټولو امنیتي کسانو راته ویلي چې یوه دقیقه خبرې به هم نه کوې او موږ یې را روان کړو او وايي چې د بلوچستان له حدودو به وځئ."

يو پولیس چارواکي چې رسنيو سره یې د خبرو اجازه نه درلوده، مشال راډيو ته د نوم نه خپرولو په شرط وويل چې د قانون له مخې د پښتون ژغورنې غورځنګ پر ځينو مشرانو د ورتګ بندېز دی، نو ځکه هغوی په بلوچستان کې فعاليت نه شي کولای.

مشال راډيو ته رسېدلي ويډيوز ښيي چې ثنا اعجاز د ليویز د ګڼو امنيتي اهلکارانو په منځ کې په موټر کې کښېنول کېږي.

ثنا اعجاز څو ورځې مخکې د لنډې مودې لپاره پولیسو بندي کړې هم وه.

ترکمنستان د هلیکوپټرې د سقوط پېښه ۳ پوله ساتي وژل شوي

ارشیف، عکس تئزیني بڼه لري

د ترکمنستان درې پوله ساتي ځواکونه د یوې هیليکوپټرې د سقوط په پېښه کې وژل شوي دي.

د پېښې عیني شاهدانو ویلي هليکوپټره د برېښنا له لوړ ولتاژ یوې ستنې سره ولګېده او په ځمکه ولوېده.

پېښه د پلازمېنې عشق آباد ۶۰ کیلومترۍ کې د یاشلیک کلي کې چې له ایران سره پولې ته نږدې پروت دی، څو ورځې مخکې شوې او خبر ځکه په ځنډ خپور شوی چې د ترکمنستان چارواکي اکثر د پوځیانو د مرګ ژوبلو اعلان نه کوي.

یوه پوله ساتي افسر د نوم د نه ښودلو په شرط د ازادې اروپا راډیو ترکمن سرویس ته ویلي چې پېښه کې د پیلوټ په شمول درې واړه پوله ساتي ځواکونه ځای پر ځای وژل شوي.

پېښه د خرابې او لړجنې هوا په خاطر شوې ده.

نور راوښيه

XS
SM
MD
LG