د لاسرسۍ وړ لېنکونه

تازه خبر
چهارشنبه ۸ سلواغه ۱۳۹۹ کابل ۱۲:۳۱

ګارډین: استرالیا دې افغانستان کې د جنګي جرمونو د قربانیانو کورنیو ته تاوان ورکړي


یو شمېر نړیوالې ورځپاڼې
  • ګارډین

ګارډین ورځپاڼې یو مطلب لیکلی چې د استرالیا صدراعظم سکاټ مورېسن ته خبرداری ورکړل شوی چې هېواد یې مکلف دی په افغانستان کې د جنګي جرمونو د قربانیانو کورنیو ته تاوان ورکړي.

ورځپاڼه زیاتوي، د بشري حقونو د څار ادارې مورېسن ته لیکلي چې د هغه وروستیو خبرو خواشیني کړي.

مورېسن ویلي، حکومت‌یې په اوسنۍ مرحله کې افغان کورنیو ته د تاوان په ورکولو غور نه‌کوي.

د استرالیا د دفاع وزارت په راپور کې د دې هېواد د ځانګړو ځواکونو یوه ډله د افغانستان په خاوره کې د لږ تر لږه ۳۹ کسانو د وژنې مسؤله بلل شوې ده.

د استرالیا د پوځ عمومي قوماندان جنرال ریک بور په دې وروستیو کې ویلي چې ۱۳ تنه استرالیایي سرتېري به ښایي د همدې پېښې په تړاو له دندې لیرې شي.

د بشري حقونو څار بنسټ له سکاټ مورېسن څخه غوښتي چې ‌ډاډ ترلاسه کړي چې د دې پېښې په تړاو له لوړپوړو قوماندانانو څخه د تحقیق زمینه ځانګړي پلټونکي ادارې ته برابره شوې وي.

په دې خبرداري کې د تحقیقاتو په ترڅ کې د هر ډول سیاسي او پوځي مداخلې پر مخنیوي ټینګار شوی دی.

په افغانستان کې ولسمشر اشرف غني ویلي چې مورېسن ډاډ ورکړی چې عدالت به پلی شي.

  • نیویارک ټایمز

نیویارک ټایمز ورځپاڼې په یوه مطلب کې لیکلي چې د امریکا متحده ایالات له افغانستان څخه د خپلو اډو په ایستلو سره، د ځمکې پر سر د دعوا میراث له ځانه پرېږدي.

د ورځپاڼي په لیکنه، د امریکا متحده ایالاتو په مشرۍ ائتلاف ځمکې ونیولې او سلګونه پوځي اډې یې پرې جوړې کړې.

ورځپاڼه زیاتوي، ډېری دغه ځمکې اوس د افغان ځواکونو په اختیار کې دي.

نیویارک ټایمز لیکي، کلیوالو خلکو د زیانونو د تاوان اخیستلو او د خپل ملکیت د بېرته ترلاسه کولو لپاره کلونه مبارزه کړې.

ورځپاڼي د کونړ ولایت د وټه‌پور ولسوالۍ د یوه اوسېدونکي جمال خان له قوله لیکلي چې ځمکه‌یې د ده د کورنۍ یوازنۍ اقتصادي سرچینه وه.

لیکوال زیاتوي، شاوخوا ۱۰ کاله دمخه زرهي موټر یوه ورځ ناوخته د ده د جوارو پټیو ته ننوتل او سیمه‌یې په اغزن تار کلابنده کړه.

نیویارک ټایمز د جمال خان په حواله لیکلي چې دا د دوی شخصي ځمکې دي، نو څنګه دغو پوځیانو په سمدستي ډول ونیولې؟

د جمال خان په خبره، ځواکونو نور څه ونه‌ویل.

ورځپاڼه لیکي، له افغانستان څخه د زرګونه امریکایي ځواکونو د وتلو سره سره، لا هم هغه ملکیتونه چې هغوی نیولي وو، خپلو څښتنانو ته‌یې بېرته نه‌دي ورکړل شوي او په بدل کې دا ځمکې افغان ځواکونو ته انتقال شوې دي.

د ورځپاڼي په لیکنه، د پنټاګون یو ویاند راب لودویک د ځمکې پر سر د دعوا پوښتنه د افغانستان حکومت ته راجع کړه.

لیکوال زیاتوي د افغانستان دفاع وزارت له پرله‌پسې غوښتنو سره سره په دې اړه تبصره نه‌ده کړې.

XS
SM
MD
LG