د لاسرسۍ وړ لېنکونه

تازه خبر
پنجشنبه ۹ سلواغه ۱۳۹۹ کابل ۰۷:۱۸

نړۍ

هانګ کانګ کې درې فعالان په بند محکوم شول

ارشیف، عکس تئزیني بڼه لري

په هانګ کانګ کې درې دیموکراسۍ پلوه فعالان نن چهارشنبه (د لېندۍ ۱۲مه) په بند محکوم شول.

دوی کې دوه نارینه او یوه ښځه شامل دي چې نومونه یې جوشوا وانګ، ایوان لم او اګنس چاو یاد شوي دي.

پر دوی دا تور پورې و چې تېرکال یې د حکومت ضد هغه اعتراض کې ګډون کړی و چې اجازه یې نه درلوده.

دغو فعالانو کې یو په ۱۳ نیم میاشتو، بل په لسو میاشتو او بل په ۷ میاشتو بند محکوم شوی دی.

چین د هانګ کانګ پر نیمه خپلواکۍ خپل کنټرول پراخ کړی، حال دا چې تېرکال یې پر ضد څو میاشتې مظاهرې وشوې او کله نا کله په تاوتریخوالي هم اوښتې.

د ورځې تازه خبرونه دلته ولولئ

روسیه ۲۰۲۲ کال کې د سوک وهلو د نړیوال جام سیالیو کوربه دی

ارشیف، عکس تئزیني بڼه لري

د ۲۰۲۲ میلادي کال په نیمايي کې په روسیه کې د سوک وهلو نړیوال جام سیالۍ ترسر کېږي.

د نړیویال ورزشي وېب پاڼو د راپور له مخې د سوک وهنې نړیوال جام سیالۍ د کورنا ویروس د خپرېدو له امله ځنډېدلې وې.

د سوک وهنې لومړۍ سیالۍ په ۱۹۹۷میلادي کال کې ترسره شوه او هر کال دغه سیالۍ تر ۲۰۰۸میلادي کاله پورې په منظمه توګه ترسره کېدلې.

د احمد عمر سعید شیخ د برائت پر وړاندې د استناف غوښتنه رد شوه

احمد عمر سعید شیخ  

د پاکستان سترې محکمې د وال سټریت ژورنال د خبریال په وژنه د محکوم کس د برائت پر وړاندې د استناف غوښتنه رد کړې ده.

احمد عمر سعید شیخ چې بریتانیا کې زیږېدلی، ۲۰۰۲ میلادي کال کې د وال سټریت ژورنال د خبریال دانیل پېرل په وژنه محکوم شو او د مرګ سزا ورته ورکړل شوه.

اوس د پاکستان سترې محکمې هم شیخ ته برائت ورکړ او د هغه د خوشې کېدو امر یې ورکړی دی.

د سعید شیخ مدافع وکیل محمود شیخ په دې اړه وویل: "د پاکستان سترې محکمې د استناف ټولې هغه غوښتنې رد کړې چې د سند حکومت د دغه ایالت د عالي محکمې پر وړاندې ثبت کړې وې، دوه غوښتنې د دانیل پېرل د کورنۍ له خوا هم ثبت شوې وې چې هغه دواړه هم رد شوي دي."

د وال سټریت ژورنال دغه خبریال ۲۰۰۲ میلادي کال جنورۍ میاشته کې کراچۍ کې د اسلامپاله ملېشو په اړه څېړنه کوله چې وتښتول شو او وروسته یې مړی وموندل شو.

چین ته د روغتیا نړیوال سازمان د تللو ساینسپوهانو قرنطین پای ته رسېږي

ارشیف، د روغتیا نړیوال سازمان مرکز

تمه ده چې د روغتیا نړیوال سازمان (WHO) هغه ساینسپوهان چې د کرونا ویروس د سرچینې په اړه د څېړنو لپاره چین ته تللي، نن په هوټل کې له قرنطینه ووځي او په ووهان ښار کې چې دغه ویروس ورڅخه د لومړي ځل لپاره د ۲۰۱۹ کال په وروستیو کې خپور شوی، خپلې څېړنې پیل کړي.

دغه ساینسپوهان چې دوه اوونۍ مخکې دې ښار ته رسېدلي، نن‌یې ۱۴ ورځنی قرنطین پای ته رسېږي.

د روغتیا نړیوال سازمان دغه مأموریت چې ډېر ځنډېدلی، ورسره داسې اندېښنه هم شته چې ښایي څېړونکي یې هغو معلوماتو او هغو کسانو ته لاسرسی پیدا نه‌کړي چې د دغه ویروس د سرچینو او خپرېدو د لومړنیو پېښو څخه خبر دي.

کرونا ویروس تر اوسه په ټوله نړۍ کې له دوه ملیون او یو لک کسانو ژوند اخیستی او له ۱۰۰ ملیونو زیات وګړي هم پرې اخته شوي دي.

امریکا کې د ترورېزم د خطر په اړه یوه اطلاعیه صادره شوه

ارشیف، واشنګټن مېشت پولیس

د امریکا د کورني امنیت وزارت په ټول هېواد کې د ترورېزم د خطر په اړه یوه اطلاعیه صادره کړې او د امریکا پر کانګرس د جنوري د ۶مې یرغل ته په اشاره‌یې ویلي چې د دولت ضد داخلي سخت دریځي ښایي دغه یرغل زړور کړي وي.

په دغه خبرداري کې چې دې وزارت پرون چهارشنبه ورکړی، ویل شوي د یوې مشخصې دسیسې په اړه معلومات نه‌لري، خو دا اندېښنه تر اوسه شته چې یو شمېر کسان چې د ولسمشرۍ د دورې پر انتقال ناراضه دي ښایي تاوتریخوالی ترسره کړي.

د کورني امنیت وزارت ویلي چې ښایي دغه وضعیت په متحده ایالاتو کې څو اوونۍ نور هم دوام وکړي.

د امریکا پر کانګرس د پخواني ولسمشر ډونالد ټرمپ د ملاتړو د برید په پایله کې پنځه تنه ووژل شول.

پاکستان راتلونکې اوونۍ د کرونا ویروس ضد واکسین پیلوي

پاکستان کې یو شمېر روغتیايي رضاکاران د چین د کرونا ویروس ضد واکسین د ترلاسه کولو په تمه.

پاکستان د راتلونکې اوونۍ له پيله د 'کووېډ-۱۹' ضد واکسین پیلوي.

له کرونا سره د مبارزې د ادارې مسؤل اسد عمر پرون چهارشنبه دغه اعلان وکړ او ویې‌ویل، لومړني ګام کې به دا واکسین روغتیایي کارکوونکو ته ورکړل شي.

له دې وړاندې چین ژمنه کړې وه چې له پاکستان سره به د کرونا واکسین د پنځو لکو دوزو مرسته کوي.

ټاکل شوې د همدې واکسین لومړنۍ بستې راتلونکې یکشنبه پاکستان ته ورسېږي.

د پاکستان د بهرنیو چارو وزیر شاه محمود قریشي د چین له‌خوا د واکسینو دا مرسته د پیکېنګ ښه نیت یاد کړی دی.

قریشي ویلي، هیله لري چې چین به یو ملیون دوزه نور واکسین هم پاکستان ته صادر کړي.

پاکستان کې پرون چهارشنبه د کرونا ۱،۵۶۳ مثبتې پېښې وشوې او په همدې ورځ د ۷۴ کرونایي ناروغانو د مړینې راپور ورکړل شو.

تر اوسه څه باندې پنځه لکه او ۳۰ زره پاکستانیان په کرونا اخته شوي او له دې کبله نږدې ۱۱ نیم زره کسان مړه شوي دي.

یوې امریکایۍ «بي-۵۲» ډوله الوتکې بیا د فارس خلیج پر فضا الوتنه کړې

هغه امریکايي «بي-۵۲» ډوله الوتکه چې د «اف ۱۶» جنګي الوتکو په همکارۍ یې پر فارس خلیج الوتنه کړې.

د امریکا پوځ وایي، یوې «بي-۵۲» ډوله الوتکې یې د قدرت په یوې ننداره کې د فارس خلیج پر فضا الوتنه کړې ده.

دا په وروستیو میاشتو کې شپږمه دا ډول الوتنه او د جو بایډن د کار له پیله لومړنی پرواز دی چې د فارس خلیج پر فضا ترسره کېږي.

بي دوه پنځوس الوتکې د اټمي وسلو د لېږد وړتیا لري او معمولاً د «اف ۱۶» جنګي الوتکو په همکارۍ پرواز کوي.

د امریکا د پوځ مرکزي قومانداني ویلي، د دوی «B-52» الوتکې د لویزیانا له پوځي مرکزه الوتنه کړې وه او دغه الوتکه پرون چهارشنبه بېرته دغې اډه کې کېناسته.

د ایران او امریکا ترمنځ ناندرۍ وروسته تر هغه بیا زیاتې شوې چې امریکا ۲۰۱۸ کال کې د تهران او شپږو قدرتونو ترمنځ له لاسلیک شوي اټمي تړونه ووته.

د امریکا نوي ولسمشر جو بایډن ویلي، که ایران دغه تړون کې شویو ژمنو باندې ودرېږي، امریکا به بېرته دغه تړون ته وروګرځي.

اوکراین امریکا او ځینو اروپايي هېوادونو ته زیان اړوونکي هکران ونیول

ارشیف

د اوکراین چارواکي وایي، د هکرانو داسې یوه ډله‌یې پېژندلې چې د ځینو اروپایي هېوادونو کمپیوټري شبکو او د امریکا بانکونو ته‌یې ۲،۵ میلیارده ډالره زیان اړولی دی.

د اوکراین د عمومي څارنوال دفتر پرون چهارشنبه وویل، دغه هکران له ۲۰۱۴ کال راهیسې د ځینو سافټ ویرونو په مرسته په اتریش، بریتانیا، جرمني، لتوانیا، هالند، سویس او امریکا کې کمپیوټري سیستمونو ته ننوتلي دي.

دغه دفتر ویلي، په خارکیف ښار کې د پولیسو د عملیاتو په پایله کې د همدې هکرانو کمپیوټر او نور تجهیزات ضبط شوي دي.

ویل شوي چې په دې تړاو د اروپایي ټولنې د عدلي نظام، نړیوالو پولیسو او جرمني کې د قانون د تنفیذ د مراجعو له‌خوا څېړنې شوې دي.

د دې پېښې په تړاو تر اوسه ډېر جزئیات نه‌دي خپاره شوي.

د قرغزستان پخوانی صدراعظم عبدالغازېف د فساد په تور ونیول شو

د قرغزستان پخوانی صدراعظم محمد خلیل عبدالغازېف

د قرغزستان پخوانی صدراعظم محمد خلیل عبدالغازېف د فساد په تور ونیول شو.

د قرغزستان د ملي امنیت کمېټې نن چهارشنبه (د سلواغې ۸مه) وویل چې پر عبدالغازېف دا تور هم دی چې دی یو ځل شتمن شوی دی.

۵۳ کلن عبدالغازېف له ۲۰۱۸مه تر دوه زره شلم کلونو پورې د قرغزستان صدراعظم و.

د هند پلازمېنه له امنیتي پلوه د تیارسی په حال کې دی

د هند امنیتي ځواکونه

د هند پلازمېنه، نوې ډیلي نن چهارشنبه (د سلواغې ۸مه) له امنیتي پلوه د تیارسی په حال کې دی.

په لسګونو زره بزګران چې له دوو میاشتو راهیسې یې د کرنې په برخه کې د اصلاحاتو پرضد اعتراضونه پیل کړي دي، د پلازمېنې په لمنو کې راغونډ شوي دي.

له پولیسو سره د شخړو پرمهال پرون یو اعتراض کوونکی ووژل شو او په لسګونو پولیس ټپیان شول.

د هند دولت وایي، د کرنې په برخه کې اصلاحات به د زراعتي سکتور د ازادۍ، د پلور په قوانینو کې د نرمښت او د زراعتي محصولاتو د زېرمه کولو سبب شي.

خو بزګران دا وېره لري چې له دې بدلونونو سره به دوی د ځانګړیو شرکتونو تر واک لاندې شي او ګټې به یې د هغوی شي.

نظر پوښتنه: ځینې خلک د اقلیم بدلېدل نړیوال ګواښ ګڼي

ارشیف، عکس تئزیني بڼه لري

د ځمکې د تودېدو په اړه تراوسه تر ټولو د پراخې نظرپوښتنې له مخې له درېیو دوه برخې خلک په نړۍ کې د اقلیم بدلېدو ته د یوه نړیوال ګواښ په سترګه ګوري.

د دې سروې له مخې چې د سې شنبې (د سلواغې ۷مه) په ورځ خپره شوه، د ځنګلونو او ځمکې ساتل تر ټولو غوره لاره ده چې د هوا د تودېدو مخه ورسره ونیول شي.

د پنځوسو هغو هېوادونو چې د نړۍ نیم نفوس په کې ژوند کوي، یو اعشاریه دوه ویشت میلیونه کسانو په دې نظر پوښتنې کې برخه واخېسته.

د اقلیم په اړه د خلکو رایې په نوم په دې نظرپوښتنه کې چې د ملګرو ملتونو او اکسفورډ پوهنتون له لوري تنظیم شوې وه، پوښتنې یې تېرکال د اکتوبر او ډسمبر میاشتو کې د ټیلیفون د یوه اپلېکېشن لارې خپاره شوي وو.

په دې سروې کې د بېلابېلو طبقو او بېلابېلو تعلیمي سوییو خلکو برخه واخېسته، خو د نیمایي برخه والو عمرونه یې له څوارلسو تر اتلسو کلونو وو.

د اکسفورډ په پوهنتون کې د ټولنپوهنې د برخې استاد سټیفان فیشر وایي، د ځمکې د اقلیم وضعیت تر هغه ډېر اضطراري دی چې مخکې یې په اړه څه ویل کېدل.

د پیرو ۱۶ میلیونه خلک د دوو اونیو په مخه ټولبند پیلوي

د پیرو د یوه ښار یوه څنډه

د پیرو مؤقت ولسمشر وویل، د پیرو ۱۶ میلیونه خلک به د کرونا ویروس د خپرېدو د مخنیوي لپاره د جنوري په پای کې د دوو اونیو په مخه ټولبند پیل کړي.

د جنوبي امریکا په دغه هېواد کې چې دوه دېرش میلیونه خلک ژوند کوي یوازې پنځه سوه بیړني بسترونه شته.

د پیرو مؤقت ولسمشر فرانسېسکو شیګاستي د سې شنبې(د سلواغې ۷مه) په ورځ په ټلوېزیوني وینا کې وویل، ټولبند به په پیرو کې د جنوري له یو دیرشمې پیل شي او د فبروري تر څوارلسمې به دوام وکړي.

په دې ټولبند کې به د خوراکي موادو دوکانونه، درملتونونه او بانکونه پرانیستي وي او نور ځایونه به د کلیساوو په ګډون بند وي.

په پیرو کې د کرونا ویروس ورځني تلفات له شااوخوا زرو څه باندې پنځه زرو ته رسیدلي دي.

په دغه هېواد کې د کرونا ویروس ټول تلفات تر سې شنبې پورې څه باندې څلویشت زرو ته رسېده.

جاپان ته د سفر لپاره د المپیک نړیوالې کمېټې نوې غوښتنه کړې

آرشیف

د المپیک نړیوالې کمېټې ټولو لوبغاړو څخه غوښتي چې جاپان ته تر سفر وړاندې د کرونا واکسین ترلاسه وکړي.

د المپیک نړیوالې کمېټې د ویب پاڼې د معلوماتو پر بنسټ، د جاپاني وګړو د خوندیتوب لپاره ورزشکارانو او چارواکو ته لارښوونه شوې چې د سفر دمخه د کرونا واکسین ترلاسه کړي.

د المپیک ملي کمېټې ټینګار کړی، چې د کرونا ویروس د مخنیوي لپاره واکسین یوازینۍ لار ده چې د پکینګ 2021 او د 2022 کلونو لوبو لپاره په پام کې نیول شوي.

د المپیک نړیوالې کمېټې دا پرېکړه وروسته له هغه وکړه چې د روغتیا نړیوال سازمان چارواکو کوویډ 19 واکسینو ته لومړۍ د المپیک سیالیو د ګډونکوو د لاسرسي له خبرې سره مخالفت وکړ.

په نړۍ کې د کرونا ویروس د مثبتو پېښو شمېر له سلو میلیونو واوښت

په روسیه کې په کرونا ویروس د اخته کسانو درملنه کېږي. ارشيف

په نړۍ کې د کرونا ویروس د مثبتو پېښو شمېر له سلو میلیونو اوښتی دی.

د امریکا د جانز هاپکنز پوهنتون د شمېرو له مخې څه باندې سل میلیونه او دوه لکه او اویا زره انسانان په کرونا ويروس اخته شوي، چې له ډلې یې څه باندې دوه میلیون او یو لک پنځوس زره کسان مړه شوي دي.

امریکا د ډېرو مثبتو پېښو او زیاتو مړینو په لحاظ په سر کې ده.

هلته د ټولو مثبتو پېښو شمېر له پنځه ویشت نیم میلیونو اوښتی چې له ډلې یې څه باندې څلور لکه او پنځه ویشت زره کسان مړه شوي.

د نړۍ په بېلابېلو هېوادونو کې د کرونا ضد واکسین لګول هم پيل شوي دي.

د ملګرو ملتونو سازمان د نړۍ ګوټ ګوټ ته د کرونا د واکسین د رسولو په برخه کې د همغږۍ او یووالي غوښتنه کړې ده.

د امریکا ولسمشر جوبایډن له خپل روسي سیال ولادیمیر پوتین سره غږېدلی

د عکس ښي لور ته د روسیې ولسمشر ولادیمیر پوتین او چپ لور ته د امریکا ولسمشر جوبایډن

د امریکا متحده ایالتونو نوي ولسمشر جوبایډن له خپل روسي سیال ولادمیرپوتین سره په څو مهمو مسئلو ټيلیفوني غږېدلی.

د راپورونو له مخې پرون ښاغلي بایډن د ولسمشر په توګه له پوتین سره په خپله لومړنۍ ټیلیفوني مکالمه کې د کرونا وبا د خپرېدو، د الکسي ناوالني د نیول کېدو، د ایران د اټومي تړون او په افغانستان کې د امریکايي ځواکونو د وژلو لپاره د انعام ټاکلو په احتمالي راپورونو خبرې کړي.

د امریکا د ولسمشر ویاندې جن ساکي (جنیفر رنې) څو ورځې دمخه واضح کړې وه چې د دوی اداره به په افغانستان کې د روسیې له خوا د امریکايي ځواکونو د وژلو پر سر د انعام ټاکلو د موضوع د څېړنې لپاره یوه ډله وګماري.

سپينې ماڼۍ په یوه بیان کې د بایډن او پوتین د پرونۍ ټیلیفوني مکالمې په اړه ویلي، ولسمشر بایډن واضح کړه چې متحده ایالتونه له خپل ځانه په دفاع سربېره به د امریکا او د دغه هېواد د متحدینو ملي ګټو ته د روسیې د زیان رسوونکو اقداماتو په وړاندې پرېکنده غبرګون وښيي.

د روسیې ولسمشرۍ ماڼۍ کرملین هم په یوه جلا اعلامیه کې ویلي، چې پوتین او بایډن له پرانیستي اسمان هوکړې د امریکا په یو اړخیز وتلو او له ایران سره د اټومي تړون د ساتلو په ستونزو خبرې کړي دي.

د ايران د ولسمشر د مرستيال ورور په دوو کلونو بند محکوم شو

مهدي جهانګيري

ايران، د ولسمشر حسن روحاني د لومړي مرستیال اسحاق جهانګیري ورور د مالي درغلۍ په تور په دوو کلونو بند محکوم کړ.

د قضاییه قوې ویاند غلام حسین اسماعیلي پرون وویل، چې پر مهدي جهانګیري په لګېدلو تورونو کې د اته لکه او ۴۷زره او ۲۰۰ ډالرو معادل د اسعارو د قاچاق تور هم شامل دی.

مهدي جهانګیري ته امر شوی چې دا پیسې بېرته حکومت ته تسلیم کړي او د دغو پیسو څلور برابره نورې به د جریمې په توګه سپاري.

د قضاییه قوې ویاند وايي، دا حکم نهايي دی او محکوم شوی کس د استنیاف غوښتنه نه شي کولی.

جهانګیري د تهران د سوداګرۍ خونې د مدیره هیئت غړی و، چې د ګردشګرۍ په نوم د خصوصي بانک له مشرانو ګڼل کېده.

دی د ۲۰۱۷م کال په اکتوبر میاشت کې نیول شوی و، خو د ۲۰۱۸م کال په مارچ میاشت کې په ضمانت خوشې شوی و.

نور راوښيه

XS
SM
MD
LG