د لاسرسۍ وړ لېنکونه

تازه خبر
جمعه ۳ سلواغه ۱۳۹۹ کابل ۱۰:۳۱

افغانستان

چارواکي: ارزګان کې تېرو دوو میاشتو کې تر ۳۰۰ زیات طالبان وژل شوي

ارشیف، افغان امنیتي ځواکونه

د ارزګان محلي چارواکي وايي، په تېرو دوو میاشتو کې تر ۳۰۰ زیات وسله‌وال طالبان وژل شوي دي.

د دغه ولایت امنیه قوماندان مل پاسوال محمد خطاب خنجري ازادي راډیو ته وویل، دغه وسله‌وال په ګېزاب او دهراوود ولسوالیو کې د جګړو پر مهال وژل شوي.

ښاغلی خنجري زیاتوي: "۲۹۳ تنه دښمنان په دهراوود ولسوالۍ کې وژل شوي او په ګېزاب ولسوالۍ کې هم موږ طالبانو ته درانه تلفات واړول، دوه شپې مخکې طالبانو غوښتل چې هلته پر یوې امنیتي پوستې برید وکړي، د افغان ځواکونو په ځوابي برید کې ۱۳ تنه یوځای ووژل شول او ۱۳ تنه نور بل ځای ووژل شول او سلګونه‌يې نور ټپیان دي."

خپلواکو سرچینو د وژل شویو وسله‌والو دغه شمېر تأیید کړی نه‌دی.

په دهراوود او ګېزاب ولسوالیو کې په وروستیو کې سختې جګړې شوي چې ځینې ساحې د وسله‌والو طالبانو لاس ته ورغلې دي.

د ورځې تازه خبرونه دلته ولولئ

سعودي او د اسلامي هېوادونو سازمان: د افغان سولې راوستو کې همکاري کوو

د سعودي عربستان د بهرنیو چارو وزیر فیصل بن فرحان ال سعود له افغان سیال محمد حنیف اتمر سره

سعودي عربستان او د اسلامي هېوادونو د همکارۍ سازمان په افغانستان کې د سولې او پرمختګ د ټينګښت په برخه کې د هڅو ډاډ ورکړی.

د افغانستان د بهرنیو چارو وزارت ویاند ګران هېواد په یوه پیغام کې وویل چې د سعودي د بهرنیو چارو وزیر فیصل بن فرحان آل سعود او د دې هېواد د اسلامي اړیکو د سازمان مشر د افغانستان د بهرنیو چارو وزیر حنیف اتمر ریاض ته د هغه د سفر پر مهال ډاډ ورکړ چې افغانانو ته د سولې په راوستو کې به همکاري وکړي.

ښاغلي هېواد زیاته کړه: "دوی دواړو د افغانستان د سولې له بهیره خپل کره ملاتړ اعلان کړ او د بهرنیو چارو وزیر ته یې ډاډ ورکړ چې د اسلامي نړۍ علماوو او د دیني- مذهبي بنسټونو له خوا به د افغانستان د سولې د ملاتړ په برخه کې هڅه وکړي."

د سعودي د بهرنیو چارو وزیر ښاغلي فیصل ویلي چې ترورېزم او افراطیت ګډ ګواښ دی او له هغه سره مبارزه هم ګډ کار غواړي.

ښاغلی اتمر او ورسره پلاوی د سې شنبې په ورځ د یوه درې ورځني سفر په مخه ریاض ته ورسېدل او پرون یې د سفر وروستۍ ورځ وه.

برېښنا شرکت: تخنیکي ستونزو پر کابل او څو ولایتونو برېښنا پرې کړې

ارشیف، عکس تئزیني بڼه لري

د افغانستان د برېښنا شرکت وايي، د ازبکستان د وارداتي برېښنا په ځینو پایو کې د تخنیکي ستونزو له کبله د کابل او څو نورو ولایتونو برېښنا قطع شوې.

برېښنا شرکت په یوه خبرپاڼه کې ویلي دي چې دا تخنیکي ستونزه د ایبک ښار د برېښنا د سب سټیشن په۵۸ کیلومترۍ کې د بغلان پر لور د برېښنا په پایو کې رامنځ ته شوې ده.

په خبرپاڼه کې راغلي چې د دې شرکت تخنیکي ټیم سیمې ته رسېدلی او هڅه کوي چې دا ستونزه ژر تر ژره حل کړي.

سعودي د افغان جګړې د پای لپاره د اسلامي نړۍ د علماوو ونډه حیاتي بللې

د سعودي عربستان د بهرنیو چارو وزیر فیصل بن فرحان ال سعود له افغان سیال محمد حنیف اتمر سره

د افغانستان د بهرنیو چارو وزارت وايي، سعودي عربستان په افغانستان کې د سولې او پرمختګ د بهیر ملاتړ کوي.

دې وزارت په یوه خبرپاڼه کې چې نن جمعه (د سلواغې ۳مه) خپره شوه ویلي چې د سعودي عربستان د بهرنیو چارو وزیر فیصل بن فرحان ال سعود له خپل افغان سیال حنیف اتمر سره په کتنه کې په افغانستان کې د جګړې د ختمولو او د سیاسي حل لارې د موندلو په برخه کې د اسلامي نړۍ د علماوو ونډه حیاتي بللې.

ښاغلي فیصل ویلي چې ترورېزم او افراطیت ګډ ګواښ دی او له هغه سره مبارزه هم ګډ کار غواړي.

د افغانستان د بهرنیو چارو وزارت خبرپاڼه د ښاغلي اتمر له قوله لیکي وايي، افغان ولسمشر اشرف غني له سعودي عربستان سره د سیاسي او اقتصادي همکاریو د یوه نوي څپرکي پرانېستل غواړي.

ښاغلی اتمر او ورسره پلاوی د سې شنبې په ورځ د یوه درې ورځني سفر په مخه ریاض ته ورسېدل او پرون یې د سفر وروستۍ ورځ وه.

غزني چارواکي: یوه هوايي برید کې ۷ طالبان وژل شوي او یو بل ټپي دی

د افغانستان په نقشه کې د غزني ولایت

د غزني چارواکي وايي، د دې ولایت په مرکز کې په یوه هوايي برید کې ۷ طالبان وژل شوي او یو بل ټپي دی.

د غزني د والي ویاند واحدالله جمعه زاده نن جمعه (د سلواغې ۳مه) ازادي راډیو ته وویل چې طالبانو پرون پنجشنبې(د سلواغې ۲مه) د غزني د مرکز په ناني سیمه کې د افغان ځواکونو پر پوستو د برید پلان لاره، خو دا پلان یې شنډ شو.

ښاغلي جمعه زاده زیاته کړه: "مخالفینو غوښتل په ناني سیمه کې د افغان امنیتي ځواکونو پر بېزونو حملې وکړي. له نېکه مرغه د افغان ځواکونو او هوايي ځواک له کلک مقاومت سره مخامخ شول. په دې ترڅ کې د یوه سرګروپ په ګډون ۷ وسله وال وژل شوي او یو تن یې ټپي دی."

طالبانو د دې عملیاتو په اړه تراوسه تبصره نه ده کړې.

ننګرهار چارواکي: خوږیاڼیو او شېرزادو کې ۱۶ طالبان وژل شوي

ارشیف، ننګرهار کې امنیتي ځواکونه د عملیاتو پر مهال

د ننګرهار چارواکي په خوږیاڼو او شېرزادو ولسوالیو کې د افغان ځواکونو په عملیاتو کې د ۱۶ طالبانو د وژل کېدو ادعا کوي.

د ننګرهار د والي ویاند عطاالله خوږیاڼي نن جمعه (د سلواغې ۳مه) سهار د دې عملیاتو په اړه ازادي راډیو ته معلومات ورکړل: "د دې عملیاتو پرمهال د طالبانو د پنځو سرګروپانو په ګډون ۱۶ وسله وال وژل شوي او د دوی موټر، وسلې، یوه دهشکه او نور مهمات تخریب شوي دي."

د ننګرهار چارواکو پرون له دې مخکې په هسکې مېنې او خوږیاڼو ولسوالیو کې هم د افغان ځواکونو په عملیاتو کې د ۳۴ طالبانو د وژل کېدو ادعا وکړه.

د ننګرهار ولایت د رسنیو څانګې همدا راز په یوه بیان کې ویلي دي چې په اچین ولسوالۍ کې د سیف الدین په نوم د طالبانو یو سرګروپ د ماین د جوړولو پر مهال په چاودنه کې وژل شوی دی.

په بیان کې راغلي چې دې چاودنه کې د سیف الدین درې پاکستاني ملګري هم وژل شوي دي.

طالبانو تر اوسه د دې ادعاوو په اړه څه نه دي ویلي.

ننګرهار چارواکي: ۲ ولسوالیو کې۳۴ طالبان وژل شوي

ارشیف، افغان ځواکونه د عملیاتو پر مهال

د ننګرهار چارواکي ادعا کوي چې د دې ولایت په دوو ولسوالیو کې د افغان پوځ په عملیاتو کې ۳۴ طالبان وژل شوي دي.

د ننګرهار ولایت د رسنیو دفتر په یوه بیان کې ویلي چې۳۱ طالبان د هسکې مېنې په تړلي کنډو او دیواني سیمو کې د عملیاتو پر مهال وژل شوي او یو وسله وال طالب ژوندی نیول شوی دي.

دې دفتر په یوه جلا بیان کې د خوږیاڼیو ولسوالۍ په خدرخېلو سیمه کې د افغان ځواکونو په هوايي برید کې د تراب په نوم د یوه قوماندان په ګډون د درېیو وسله والو طالبانو د وژل کېدو خبر هم ورکړی.

طالبانو تراوسه په دې اړه څه نه دي ویلي.

تندر قول اردو : غزني کې هوايي برید ۷ طالبان وژلي

د افغانستان په نقشه کې د غزني ولایت

تندر قول اردو په غزني کې په یوه هوايي برید کې د اوو تنو طالبانو د وژل کېدو او د یوه بل د ټپي کېدو خبر ورکوي.

۲۰۳ تندر قول اردو په یوه بیان کې وايي، طالبانو پرون پنجشنبې (د سلواغې ۲مه) د غرنې د مرکز په ناني سیمه کې د افغان ځواکونو پر پوستو د برید پلان درلود، خو هوايي ځواکونو مخکې له مخکې د دې پلان مخه ونیوله.

بیان زیاتوي چې په وژل شوېو کې د طالبانو یو سرګروپ هم شامل دی.

طالبانو د دې عملیاتو په اړه تراوسه تبصره نه ده کړې.

اترا: د مخابراتي شبکو چوپړونو د ټیټ کیفیت ستونزه د منلو نه ده

ارشیف، عکس تئزیني بڼه لري

د افغانستان د مخابراتي خدمتونو د تنظیم اداره- اترا وايي، د مخابراتي شبکو په خدماتو کې د ټیټ کیفیت ستونزه د منلو نه ده.

د اترا ویاند سعید شینواري ازادي راډیو ته وویل چې د نوموړې ادارې مشر عمر منصور انصاري پرون- پنجشنبې (د سلواغې ۲مه) د یوه مخابراتي شرکت له مشر سره په کتنه کې غوښتنه وکړه چې په افغانستان فعالې مخابراتي شبکې باید د خپلو خدماتو کیفیت لوړ کړي او لمن یې ټول هېواد ته وغځوي:

ښاغلي شینواري زیاته کړه: "نورو شبکو سره هم خبرې کېږي چې د ۱۴ سوم کال لپاره د دوی پلانونه واوري، پراختیايي طرحې یې واوري او دوی وهڅوي چې په ټول افغانستان کې د پوښښ ساحه او د کیفیت کچه پراخه او ښه کړي."

افغانستان تراوسه هم د نړیوالو معیارونو په اساس له مخابراتي خدماتو بې برخې دی او د ټیلیفوني او انټرنیټي خدماتو د ټیټ کیفیت له کبله پر مخابراتي شبکو خورا زیات انتقادونه کېږي.

پکتیا چارواکي: اریوب ځاځي کې ماین چاودنې یو قومي مشر وژلی

د افغانستان په نقشه کې د پکتیا ولایت

په پکتیا کې یو قومي مشر د مقناطیسي ماین په چاودنه کې وژل شوی.

د پکتیا د امنیه قوماندانۍ ویاند حیات الله نظامي ازادي راډیو ته وویل، په چاودنه کې چې پرون پنجشنبې (د سلواغې ۲مه) مازیګر مهال د اریوب ځاځیو ولسوالۍ په خوازي خېلو سیمه کې وشوه یو بل کس هم ټپي شوی دی.

ښاغلي نظامي زیاته کړه: "د پکتیا ولایت د ځاځي اریوب ولسوالۍ په خوازي خېلو کلي کې د یوه قومي مشر پر موټر د مقناطیسي بم چاودنه شوې چې په نتیجه کې یې یو قومي سپین ږیری په شهادت رسېدلی او یوبل ټپي دی."

ښاغلي نظامي وايي، دا قومي مشر چې نوم یې حاجي رحیم و، د ځاځي اریوب له مخورو مشرانو و او تل یې په سیمه کې د امنیت او یووالي لپاره هڅه کوله.

د دې برید مسولیت تراوسه کومې ډلې نه دی منلی.

فوټبال؛ پامیر لوبډلې په هرات کې د اتلوالي جام وګاټه

ارشیف، په هرات کې د فوټبال لوبډله

پامیر لوبډلې د هرات له شلو کلونو د کم عمره ځوانانو د فوټبال جام سیالیو اتلولي وګټله.

د هرات ولایت د روزشي ادارې فني مسول ضیاالحق ضیا نن پنجشنبه (د سلواغې ۲مه) ازادي راډيو ته وویل چې دغه سیالۍ له تېرو دوو میاشتو راهیسې د ۲۴ لوبډلو ترمنځ روانې وې.

ښاغلی ضیا زیاتوي، په یادو سیالیو کې د پامیر او سرخ پوشانو لوبډلې توانېدلې وې چې پای لوبو ته لاره پیدا کړي.

د پامیر او سرخ پوشانو ترمنځ وروستۍ لوبه تېره ورځ وشوه چې په پایله کې پامیر درې د دوه په مقابل کې سرخ پوشانو لوبډلې ته ماته ورکړه او د سیالو اتلوالي یې خپله کړه او په ترتیب سره سرخ پوشانو او ارش کمیل لوبډلو دوهم او درېیم مقامونه ترلاسه کړل.

"افغانستان کې به د سولې په اړه د علماوو تاریخي غونډه جوړه شي"

ارشیف، افغانستان کې یو شمېر علماء

د افغانستان د بهرنیو چارو وزارت وایي، ډېر ژر به دغه هېواد کې د سولې په اړه د اسلامي نړۍ د علماوو 'تاریخي' غونډه ترسره شي.

د بهرنیو چارو وزارت ویلي، د دغې غونډې د جوړېدو خبره په ریاض کې د اسلامي نړۍ د اړیکو مشر شیخ محمد بن عبدالکریم العیسی د بهرنیو چارو له وزیر محمد حنیف اتمر سره د لېدو پر مهال کړې ده.

د بهرنیو چارو وزارت خبرپاڼه کې که څه هم د دغې غونډې دقیق وخت او ځای نه دی ښودل شوی، خو ویلي یې دي، دغه غونډه کې به د افغانستان کړکېچ ته له دیني نظره د حل لارې چارې ولټول شي.

د اسلامي نړۍ د اړیکو رئیس ویلي، دغه غونډه باید تاریخي او برخلیک ټاکونکې پایله ولري او له طالبانو به هم وغواړي چې ګډون په کې وکړي.

له دې وړاندې ځینو نورو وتلو دیني عالمانو د افغانستان اوسنۍ جګړه "چې دواړه لوري یې افغانان او مسلمانان دي" ناروا بللي، خو له دې سره -سره هم د جګړې په شدت کې د پام وړ کموالی نه دی راغلی.

کرکټ؛ افغانستان ایرلنډ ته د ۲۸۸ منډو هدف وټاکه

افغان کرکټ لوبډله

د افغانستان د کرکټ ملي لوبډلې له ایرلنډ سره نننۍ لوبه کې ښه بیټینګ یا توپ وهنه وکړه او سیالې لوبډلې ته یې د ۲۸۸ منډو هدف وټاکه.

دا د دواړو ټیمونو ترمنځ د پلان شوېو درېیو پنځوس اورېزو لوبو لومړنۍ سیالۍ ده چې نن پنجشنبه (د سلواغې ۲مه) په اماراتو کې ترسره کېږي.

د افغانستان د پيل یوه لوبغاړي رحمان الله ګربز ۱۲۷ منډې وکړې.

وروسته به معلومه شي چې د ایرلنډ لوبډله به دغه هدف پوره کړي او که به افغان لوبډلې ته لومړنۍ ماته مني؟

د دغو دواړو ټیمونو ترمنځ دوهمه او درېیمه سیالۍ د جنورۍ په ۲۴مه او ۲۶مه نېټه کېږي.

د کرنې وزارت: اماراتو ته د افغانستان د صادراتو کچه څو برابره زیاتېږي

ارشیف، د هوايي دهلېز له لارې د افغانستان د حاصلاتو او تولیداتو د صادرولو بهیر

د افغانستان کرنې، اوبو لګولو او مالدارۍ وزارت وايي، هڅې روانې دي چې سږ کال اماراتو ته د صادراتو کچه څو برابره زیاته شي.

د دغه وزارت د اوبو لګولو او طبعیي سرچینو مرستیال حشمت‌الله غفوري وايي چې ۱۳ کرنیز توکي چې کولای شي د متحده عربي اماراتو د مارکېټ غوښتنې ته ځواب ورکړي، باید په جدې توګه پرې کار وشي.

ښاغلی غفوري زیاتوي، له هغو سوداګرو سره چې متحده عربي اماراتو ته کرنیز محصولات صادروي، د هوایي دهلېز او ځمکني ټرانسپورت په برخه کې د دوی د ستونزو او دغه‌راز د پروسس، بسته‌بندۍ، سرټیفکېټونو او د مېوو او سبو سټنډرد کولو په برخه کې یې پر شته ستونزو او ننګونو خبرې کړې دي.

امارات د افغانستان کرنیزو محصولاتو لپاره ښه بازار دی او له څو کالو را په دې خوا د افغانستان یو شمېر بڼوالۍ او کرنیز بېلابېل محصولات متحده عربي اماراتو ته صادرېږي.

د ۱۴۰۰ مالي کال د بودجې سند د درېیم ځل لپاره ولسي جرګې ته استول کېږي

ارشیف، د افغانستان ولسي جرګې تالار

د افغانستان د مالیې وزارت وايي چې د ۱۴۰۰ مالي کال بودجې په درېیمه مسوده کار روان دی او د رارونې اوونۍ په پيل کې به د تصویب لپاره ولسي جرګې ته واستول شي.

د مالیې وزارت مرستیال عبدالحبیب ځدراڼ وايي چې د دغه وزارت تخنیکي ډلې ۱۷ ولایتونو ته سفرونه کړي او د دې ولایتونو له مدني ټولنو، د سیمې له خلکو، دیني علماوو، خصوصي سکټور او ولایتي چارواکو سره‌یې په ملي بودجه کې د هغوی د اړتیاوو او لومړیتوبونو شاملولو په موخه سلا مشورې کړې دي.

دا په داسې حال کې ده چې له دې وړاندې د ولسي جرګې په بودجه کې د ناانډولۍ، په پروژو کې ولایتونو ته کم او د دولتي کارکوونکو د معاشونو ترمنځ توپير له امله د ۱۴۰۰ مالي کال بودجه دوه ځلې رد کړې ده.

دفاع وزارت: هلمند کې د طالبانو پر یوه زندان عملیاتو کې ۲۷ کسان خوشې شول

ارشیف، هلمند کې د افغان ځواکونو عملیات

تېره شپه ځانګړو کمانډو ځواکونو د هلمند ولایت "نهرسراج" ولسوالۍ کې د طالبانو پر یوه زندان عملیات ترسره کړي چې په پایله کې یې د یوه پخواني پوځي په ګډون ۲۷ کسان خوشې شول.

دفاع وزارت نن په یوه خپره کړې خبرپاڼه کې ویلي چې له دغو زندانیانو سره چې نه‌دي ویل شوي هغه څوک دي، د طالبانو له لوري د اسلامي اصولو او بشري حقونو خلاف بد چلند شوی، سخت شکنجه شوي او ځورول شوي دي.

د خبرپاڼې له مخې د دغو عملیاتو په ترڅ کې د طالبانو د زندان یو ساتونکی وژل شوی او یوه اندازه وسلې او مهمات هم د افغان ځواکونو لاس ته ورغلي دي.

طالبانو تر اوسه په دې اړه څه نه‌دي ویلي.

نور راوښيه

XS
SM
MD
LG