د لاسرسۍ وړ لېنکونه

تازه خبر
پنجشنبه ۶ لیندۍ ۱۳۹۹ کابل ۰۰:۰۳

خبرونه

افغان ځواکونو د کندز دشت ارچي ولسوالۍ بېرته ونېوله

ارشیف، کندز کې د افغان ځواکونو عملیات

د کندز سیمه ییز چارواکي وايي چې تېره شپه افغان ځواکونو په دشت ارچي ولسوالۍ کې د وسله والو طالبانو د ځپلو په هدف عملیات پیل کړي وو او په نتیجه کې یې نن سې شنبه(د لړم ۲۷مه) سهار و توانېدل چې نوموړې ولسوالۍ له وسله والو طالبانو بېرته ونیسي.

په شمال ختېځ زون کې د پامیر ۲۱۷م قول اردو د ویاند مرستیال عبدالهادي جمال ازادي راډیو ته وویل چې لا هم په سیمه کې عملیات دوام لري او دولتي ځواکونه د پرمختګ په حال کې دي.

دی زیاتوي: "د دشت ارچي ولسوالۍ د طالبانو له وجوده تصفیه شوه. تېره شپه امنیتي او دفاعي ځواکونو تصفیوي عملیات پیل کړي وو او وتوانېدل د ولسوالۍ مرکز د طالبانو له وجوده پاک کړي. په دې عملیاتو کې لسګونه تنه وسله وال طالبانو وژل شوي دي. لاهم په سیمه کې جنګ دوام لري او ډېر ژر به پاتې سیمې هم د طالبانو له وجوده تصفیه شي."

همداراز د کندز د ولایتي شورا رئیس محمد یوسف ایوبي هم تأیید کړه چې افغان ځواکونو د دشت ارچي ولسوالۍ بېرته نیولې.

وسله والو طالبانو په دې اړه لا څه نه دي ویلي.

دشت ارچي ولسوالۍ د ۷۰ کیلومتر واټن په درلودو سره د کندز ښار شمال ختېځ لوري ته موقعیت لري.

د ورځې تازه خبرونه دلته ولولئ

"افغانستان کې د ښځو د وضعیت ښه والي ته پام نه دی شوی"

ارشیف، عکس تئزیني بڼه لري

د افغانستان د بشري حقونو خپلواک کمېسیون وایي، دغه هېواد کې د ښځو د وضعیت ښه والي ته جدي پام نه دی شوی.

کمېسیون پر خپله ټویټرپاڼه لیکلي چې دغلته ښځې له ډول ډول تاوتریخوالي لکه له کوره شړلو، جبري او کم عمر کې ودولو، د ژوند د ملګري د نه انتخاب، په بدو کې ورکړې او ورته نورو ټولنیزو ستونزو سره مخامخې دي.

کمېسیون ویلي، افغانستان د ښځو د حقونو په برخه کې لاسته راوړنې هم لري چې د دوی په وینا کافي نه دي.

کمېسیون دغه څرګندونې د نومبر د ۲۵مې، یا د ښځو په وړاندې د تاوتریخوالي د له منځه وړلو نړیوالې ورځې په مناسبت کړي دي.

له دې وړاندې یوناما، په افغانستان کې د ناټو ماموریت او بېلابېلو نورو ډيپلوماتیکو ادارو د افغان ښځو د حقونو په ټینګښت ټینګار کړی دی.

سوریه کې اسرائیل لږ تر لږه ۸ ایران پلوه جنګیالي وژلي

ارشیف

په سوریه کې د اسرائیل هوایي بریدونو کې لږ تر لږه ۸ ایران پلوه جنګیالي وژل شوي دي.

د روسیې پر بشري حقونو د څار بنسټ چې مرکز یې بریتانیا کې دی وايي، د تېرې شپې دغه بمبار کې د دمشق ښار په څنډه کې د لبنان حزب الله ډلې اته غړي وژل شوي او د وسلو او مهماتو یوه زېرمه یې له منځه وړل شوې ده.

تردې وړاندې د سوریې دولتي خبري اژانس سانا ویلي و چې د دمشق په جنوب کې اسرائیلي ځواکونو یوه سیمه په نښه کړې ده.

د اسرائیل پوځ په دې اړه له څه ویلو ډډه کړې.

د لبنان حزب الله ډله د ایران ملاتړ له ځان سره لري او ایران په سوریه کې د بشارالاسد د رژیم کلک ملاتړی هم دی.

اسرائیل بیا ژمنه کړې چې سوریه کې به د ایران د نظامي پیاوړتیا مخه نیسي او تراوسه یې په سوریه کې سلګونه بریدونه کړي دي.

د بدخشان چارواکي: ۲۱ پولیس سرتیري له طالبانو سره نه دي یوځای شوي

ارشیف

بدخشان کې چارواکي د طالبانو هغه ادعا ردوي چې ویلي یې دي، د محلي اردو او محلي پولیسو ۲۱ سرتیري ورسره یوځای شوي دي.

د بدخشان د امنیه قوماندانۍ ویاند ثناالله روحاني وایي، دغو محلي ځواکونو د معاشونو د نه ور رسېدو په اعتراض کې وسلې ایښي او کورونو ته تللي دي.

پخوا کورنیو چارو وزارت د محلي پولیسو معاش ورکاوه، خو کله چې دغه ځواکونه د محلي اردو چوکاټ ته دننه شول، معاشونه یې دفاع وزارت ورکوي.

د بدخشان د پولیسو ویاند ښاغلی روحاني وایي، همدې کړنلاره کې بدلون ممکن د ځواکونو معاش ځنډولی وي: "له پروسیجر نه د بې خبرۍ له کبله دوی وسلې ایښي او خپلو کورونو ته تللي دي، دا په دې معنا نه ده چې حکومت یا امنیتي سکتورونو دې د دوی حق خوړلی وي."

طالبانو بیا همدې محلي ځواکونو ته منسوب انځورنه خپاره کړي او ادعا یې کړې چې راغستان ولسوالۍ کې د خپل قوماندان عاشور محمد په ګډون دوی سره یوځای شوي دي.

د نیوزلنډ سواحلو کې نژدې سل نهنګان او ډولفینان مړه شوي

د نیوزلنډ چارواکي وایي، په سواحلو کې نژدې سل نهنګان او ډولفینان مړه شوي دي.

د نیوزلنډ چارواکي وایي، د دغه هېواد په سواحلو کې نژدې سل نهنګان او ډولفینان مړه شوي دي.

د نیوزلېنډ د چاپریال ساتنې وزارت نن چهارشنبه (د لېندۍ ۵مه) وویل، دغه ژوي د لېرو پرتو چاتهام ټاپوګانو سواحلو کې د بند پاتې کېدو او ډبرو سره د ټکر له کبله مړه شوي دي.

د دغه وزارت په خبره، دغه سمندري ژويي وروستیو اونیو کې سرګردان و او د ژغورنې هڅې یې ځکه له ستونزو سره مخ وې چې دغه ټاپو لېرې پروت دی.

په ۱۹۱۸ کال کې هم شاوخوا زر نهنګان او نور سمندري ژوي د همدې ټاپو ګانو په سواحلو کې مړه شوي وو.

بېکلي د کرکټ نړیوالې شورا نوی مشر شو

ارشیف، عکس تئزیني بڼه لري

کرېګ بېکلي د کرکټ نړیوالې شورا نوی مشر وټاکل شو.

د روان میلادي کال په تېر جولای میاشت کې د هندي شاشنک منوهر له استعفا وروسته د لنډ مهالي لپاره دا دنده عمران خواجه په مخ وړله، خو تېره ورځ د یادې څوکۍ لپاره د ټاکنو په پايله کې د نیوزیلینډ کرکټ بورډ ډایریکټر کرېګ بېکلي تر نورو نوماندانو زیاتې رایې خپلې کړې او دا مشري يې خپله کړه.

له دې وړاندې نوموړي د ۲۰۱۲میلادي کال راهیسې د نیوزیلینډ کرکټ بورډ د ډایریکټر په توګه دنده ترسره کوله.

کرېګ ویلي، خوښ دی چې د کرکټ نړیوالې شورا مشر ټاکل شوی. د هغه په وینا د کرکټ د لا غوړېدا لپاره به د ټولو ۱۰۴ غړو هېوادونو سره په ګډه خپل کار ته ادامه ورکوي.

په 'کراټو سو کیوکوشین' لوبه کې د هرات لوبډله اتله شوه

ارشیف، عکس تئزیني بڼه لري

د هرات کراټو سو کیوکوشین لوبډله د افغانستان اتله لوبډله شوه.

د کراټو د سوکیوکوشین سبک مشر غلام محبوب رحیمي، نن د چهارشنبې (د لېندۍ ۵مه) په ورځ ازادي راډیو ته وویل، د هرات سوکیوکوشین لوبډله چې څو ورځې وړاندې د دې لوبو په شپږم پړاو کې د ګډون په موخه کابل ته تللې وه، ويې کړای شوی چې د ډېرو امتیازاتو په ګټلو د دې لوبو اتلولۍ خپله کړې.

د ده په خبره، په یادو لوبو کې د کابل او خوست لوبډلو په ترتيب سره دوهم او درېیم مقام ترلاسه کړی دی.

د دې لوبو لوبو جوړولو موخه د غوره لوبغاړو ټاکل او د ملي لوبډلې جوړول وو.

ښاغلی رحیمي وايي، په دې لوبو کې له ۱۰ ولایتونو ۱۱۰ لوبغاړي ۴ ورځې ولوبېدل.

کابل کې د غېږ نيونې ۶م پړاو لوبې پای ته ورسېدې

ارشیف، عکس تئزیني بڼه لري

په کابل کې د غېږ نيونې شپږم پړاو لوبې پای ته ورسېدې.

د غېږ نيونې يا پهلوانۍ فدراسیون ویاند اقبال احمد منوچهر نن د چهارشنبې (د لېندۍ ۵مه) ازادي راډیو ته وویل، په دې لوبو کې د کابل له ۱۳ ورزشي کلبونو څخه ۱۲۰ لوبغاړو ګډون کړی وو.

د ښاغلي منوچهر په خبره، د دې لوبو په پای کې ۴۰ لوبغاړو د کابل د غېږ نيونې د منتخبې لوبډلې غړیتوب ترلاسه کړ.

نوموړی زیاتوي، دا ورزشکاران له ۴۰ تر ۱۰۰ کیلو ګرام بېلابېلو وزنونو کې درې ورځې ولوبېدل.

دا لوبې د کابل منتخبې لوبډلې لپاره د غورو څېرو ټاکلو په موخه ترسره شوې وې.

روسیه وايي، د داعش سخت دریځو یو پلان یې شنډ کړی

د روسیې د فدرالي امنیت ادارې سرتیري

د روسیې امنیتي چارواکي وایي، د اسلامي دولت یا داعش سخت دریځو وسله والو یو پلان یې شنډ کړی دی.

د روسیې د فدرال امنیت ادارې "ایف.ایس.بي" نن (د نومبر ۲۵مه) په یوه خبرپاڼه کې وویل، دغې ډلې نیت درلود چې د مسکو په یوې سیمه کې " تخریبي او ترهګریز" فعالیتونه وکړي.

دغې ادارې ویلي، د څېړنو او تالاشۍ پر مهال د یادې ډلې یو غړی د مسکو په ختیځ کې له جوړ شوي ماین سره نیول شوی دی.

خبرپاڼه کې راغلي، د داعش د دغې کړۍ یو بل هدف دا و چې نوي کسان جذب او ترهګرو ته مالي ملاتړ پیدا کړي.

د روسیې سترې محکمې د ۲۰۱۴ میلادي کال دسمبر کې داعش یوه ترهګریزه ډله وبلله او پر فعالیت یې بندیز ولګاوه.

ناټو: افغانستان د ښځو لپاره خطرناک ځای دی

ارشیف، عکس تئزیني بڼه لري

ملګرو ملتونو، ناټو او په کابل کې بېلابېلو دیپلوماتیکو ادارو د افغان ښځو پر وړاندې د تاوتریخوالي په پای ته رسېدو ټینګار کړی دی.

یوناما یا په افغانستان کې د ملګرو ملتونو مرستندوی ماموریت په یوه خبرپاڼه کې ټینګار کړی چې د ښځو او نجونو پر وړاندې د تاوتریخوالي د پای ته رسولو هڅې باید چټکې شي.

په افغانستان کې د ناټو ماموریت بیا ویلي، دغه هېواد د ښځو لپاره یو خطرناک ځای دی او دغه ماموریت غوښتنه کړې چې د ښځو او نجونو پر وړاندې د جرایمو معافیت باید پای ته ورسیږي.

دغه غوښتنې داسې مهال کېږي چې نن د نومبر ۲۵مه، د ښځو پر وړاندې د تاوتریخوالي د له منځه وړلو نړیواله ورځ ده.

ملګري ملتونه سږکال دغه ورځ په دې شعار لمانځي چې د جنسیت پر اساس د تاوتریخوالي پر ضد مبارزه چټکه شي او د دې پدیدې په وړاندې له هېڅ زغمه کار وانه خېستل شي.

د افغانستان د ښځو چارو وزارت ویلي، سږکال د ښځو په وړاندې د تېر کال پرتله شل فیصده تاوتریخوالی زیات شوی دی.

د نړۍ په ګوټ ګوټ په تېره بیا هغو هېوادونو کې چې د ښځو په وړاندې تاوتریخوالی زیات دی، سر له نن نه د ۱۶ ورځو په مخه د ښځو د حقونو د ساتنې یو کمپاین هم پیل شوی.

کندهار کې موټر بم برید ۶ پولیس ټپیان کړي

ارشیف، عکس تئزیني بڼه لري

د افغانستان د کورنیو چارو وزارت وایي، کندهار کې د پولیسو پر ۱۱مې حوزې موټر بم برید ۶ پولیس ټپیان کړي دي.

د وزارت ویاند طارق ارین رسنیو ته ویلي، برید نن چهارشنبه (د لېندۍ ۵مه) له غرمې مخکې لس نیمې بجې شوی دی.

کندهار کې د روغتون سرچینو بیا د ازادي راډیوږ خبریال ته ویلي چې دوی ته له پېښې ۱۱ ټپیان ور وړل شوي چې ۷ پولیس او نور ملکیان دي.

د کندهار په څنګ لوري ارزګان کې بیا دوه پولیس د یوه غلچکي برید په ترڅ کې وژل شوي دي.

د ارزګان د والي ویاند احمد شا ساحل ادعا کوي چې دا برید د طالبانو له خوا شوی: " تېره شپه اته بجې شاوخوا د ترینکوټ ښار د پله په سیمه کې چې د دویمې حوزې مربوط کېږي، وسله والو کسانو پر سرتیرو برید کړی، دا بریدونه تر ډېره طالبان کوي، پېښه کې دوه پولیس په شهادت رسیدلي دي."

طالبانو لا د کندهار او ارزګان د پېښو په اړه څه نه دي ویلي.

چارواکي: کندهار کې پر پولیسو موټربم چاودنه شوې

ارشيف

د کندهار ښار په عینو مېنه کې د پولیسو پر یولسمې حوزې موټر بم چاودنه شوې ده.

د امنیه قومندانۍ ویاند جمال ناصر بارکزی برید تاییدوي، خو سم لاسي د مرګ ژوبلې په اړه څه نه وایي.

یوې امنیتي سرچنې بیا ویلي، برید کې چې سهار لس نیمې بجې وشو، پنځه پولیس ټپیان شوي دي.

د چاودنې مسوولیت تر اوسه چا نه دی منلی.

کرنې وزارت: سږ کال بدخشان کې د اينجې حاصلات ۳۵ ټنو ته رسېږي

د اينجې کروندې

د افغانستان کرنې اوبو لګونې او مالدارۍ وزارت وایي، د بدخشان د اينجې حاصلات ۳۵ ټنو ته رسېږي.

د دې وزارت ویاند اکبر رستمي ازادي راډیو ته وویل، چې سږکال د دې ولایت د اينجې د حاصلاتو کچه ۳۵ ټنو ته رسېږي.

ښاغلى رستمي وايي، چې اينجه تر ډېره په دې ولایت کې په وحشي او طبیعي ډول شنه کېږي خو په خبره يې، د کرنې وزارت هم د اينجې د کرکېلي د سیمو په پراختیا کې عمده رول درلود او تېر کال يې د درایم او تیشکان په ولسوالیو کې په نږدې په ۲۵۹ هکټاره ځمکه کې د اينجې کرکېله کړې ده.

اينجه یو طبي بوټی دی، چې د بدخشان ولایت د ډېرو ولسوالیو په غرونوکې په طبعي ډول شنه کېږي.

د کرنې وزارت وايي، تر دې دمه د بدخشان ولایت د طبعي اينجې د سیمو په هکله کومه دقیقه سروې نه ده تر سره شوې.

د دغه وزارت د معلوماتو له مخې چې څو ورځې مخکې ازادي راډيو سره شريک کړي وو، سږ کال په تخار ولايت کې هم د اينجې د حاصلاتو کچه ۱۲۵ ټنو ته رسېږي.

"مرستندويان د خپلو مرستو د اندازې او څرنګوالي په اړه د پرېکړې حق لري"

ماليې وزارت

افغانستان سره د مالي مرستو لپاره د جينيوا دوه ورځني کنفرانس، د څه د پاڅه ۱۲ میلیارده ډالرو مرستو په ترلاسه کولو سره پرون پای ته ورسېد.

د مالیې وزارت ویاند شمروز خان مسجدي ازادي راډیو ته ویل، د افغانستان نړيوالو ملاتړو تر ۲۰۲۴ د مالي مرستو د دوام ژمنه کړې ده.

د ښاغلي مسجدي په وینا، تمویل کوونکو د لومړي کال لپاره لږترلږه د ۳.۳ میلیارده ډالرو ژمنه کړې چې تمه کېږي کال په کال په همدغه اندازه وشي.

نوموړی زیاتوي، دا مرستې د حکومت او نړیوالو ملګرو لخوا يې په کلني دول د بیا کتنې ګډ بهیر پورې اړه ولري.

د ښاغلي مسجدي په خبره، مرسته کوونکي حق لري چې د خپلو کلنیو مرستو د اندازې او څرنګوالي په اړه پرېکړه وکړې.

د جینیوا کنفرانس د نومبر په ۲۳ د سویس په جینيوا کې د فنلنډ، ملګرو ملتونو او افغانستان په ګډ کوربه توب جوړ شو چې په کې د نږدې سلو دولتونو او سازمانونو استازو ګډون کړی وو.

نړیوالې ټولنې په ۲۰۱۶م کې د بلجیم په پلازمېنه بروکسل کې له افغانستان سره د ۲۰۱۷م کال څخه تر ۲۰۲۰م کال پورې د تر ۱۵ میلیارده ډالرو زیاتو مالي مرستو ژمنه کړې وه.

"په افغانستان کې د ښځو پر وړاندې تاوتریخوالي زيات شوى"

ارشيف

نن د نومبر پنځه ویشتمه د ښځو په وړاندې د تاوتریخوالي د ختمولو نړیواله ورځ ده.

په افغانستان کې د ملګرو ملتونو مرستندویه ماموریت یوناما ټینګار کړی چې د ښځو او نجونو پر وړاندې د تاوتریخوالي د پای ته رسولو هڅې باید چټکې شي.

یوناما په دې اړه په اعلامیه کې زیاته کړې چې سږ کال د ښځو پر وړاندې د تاوتریخوالي د ختمولو د ورځ په دې شعار لمانځل کېږي، چې د جنسیت په اساس د تاوتریخوالي پر ضد مبارزه چټکه شي او د دې پدیدې پر وړاندې له هېڅ زغم کار وانخیستل شي.

افغانستان یو له هغو هېوادونو دی چې د ښځو پر وړاندې په کې تاوتریخوالی زیات دی.

د افغانستان د ښځو چارو وزارت ویلي سږ کال د ښځو پر وړاندې د تېر کال په پرتله شل فیصده زیات تاوتریخوالی زیات شوی دی.

د نړۍ په ګوټ ګوټ په تېره بیا هغو هېوادونو کې چې د ښځو پر وړاندې تاوتریخوالی زیات دی سر له نن نه د شپاړسو ورځو په مخه یو کمپاین هم پیل شوی.

په دې کمپاین کې د ښځو پر وړاندې د تاوتریخوالي د پای ته رسولو هڅې کېږي.

"جوبایډن" ته د ورځنيو محرمو استخباراتي راپورونو لېږل پيل شول

جوبایډن

سپینې ماڼۍ اجازه ورکړه چې منتخب ولسمشر جوبایډن ته ورځني محرم استخباراتي راپورونه ولېږل شي.

ورځني امنیتي راپورونه ولسمشر ته وړاندې کېږي خو په امریکا کې منتخب ولسمشر هم د دې حق ترلاسه کوي چې دغو راپورونو ته لاسرسی ولري.

په دغو راپورونو کې ملي امنیت ته د ورپېښو ګواښونو په اړه معلومات شامل وي.

منتخب ولسمشر جوبایډن ته د ورځني راپور د لېږلو لړۍ وروسته له هغه پيل شوه چې پرون د ټرمپ ادارې وویل د بایډن ادارې ته د انتقال رسمي بهیر پیلېدای شي.

ولسمشر ټرمپ خپله ماته نه ده منلې او تور یې لګولی چې په ټاکنو کې پراخې درغلۍ شوي دي.

نور راوښيه

XS
SM
MD
LG