د لاسرسۍ وړ لېنکونه

تازه خبر
پنجشنبه ۱۳ لیندۍ ۱۳۹۹ کابل ۱۲:۲۰

نړۍ

د بلوچستان د سوداګرو د ټولنې مشر الله داد ترین ووژل شو

د پاکستان د بلوچستان د سوداګرو د ټولنې مشر او د پښتونخوا عوامي ګوند مخکښ غړی الله داد ترین

د پاکستان د بلوچستان د سوداګرو د ټولنې مشر او د پښتونخوا عوامي ګوند مخکښ غړی الله داد ترین ووژل شو.

پولیسو وویل چې الله داد ترین په پښین کې پرون د دوشنبې (د لړم ۱۹مه) د ماښام له لمانځه وروسته کور ته روان وو چې ډزې پرې وشوې او ساه یې ورکړه.

پولیس وایي چې برید کوونکي له سیمې تښتیدلې دي او تراوسه چا د دې پېښې مسوولیت نه دی منلی.

د ورځې تازه خبرونه دلته ولولئ

کرونا وېروس؛ امریکا کې د ناروغانو شمېر له یو لکو واووښت

ارشیف، په امریکا کې په کرونا وېروس اخته ناروغ

د امریکا په متحدو ایالتونو کې پرون چهارشنبې(د لېندۍ ۱۲مه) د کوویډ – ۱۹ ناروغۍ له امله په روغتونونو کې د بستر شوېو ناروغانو شمېر له یو لک کسانو واووښت.

دا په ټوله امریکا کې د دغې ناروغۍ له امله د بستر شوېو یو نوی ریکارډ دی چې روغتونونه او روغتیا پالان یې تر سخت فشار لاندې راوستي.

د کرونا ویروس له امله هم ۲۷۳۳ تنه مړه شوي چې دا هم یو نوی ریکارډ دی او په ورځ کې پر دغه ویروس د اخته کېدونکو کسانو شمېر هم دوه لکه کسانو ته رسیدلی.

په دې توګه په امریکا کې په یوه اوونۍ کې پر کرونا د اخته شوېو کسانو شمېر له یو میلیون وګړو اوښتی.

د امریکا د ناروغیو د مخنیوي او کنټرول د مرکز رئیس ډاکټر رابرټ ریډ فیلډ پرون اټکل وکړ چې راتلونکې ورځې به وضعیت له دې هم خراب وي.

هغه زیاته کړه، واقعیت دا دی چې د ډسمبر، جنوري او فبرورۍ میاشتې به ډېرې سختې میاشتې وې.

ریډ فیلډ چې د امریکا د سوداګرۍ د خونې له فونډیشن سره خبرې کولې دغه راز وویل چې د ده په باور دغه درې میاشتې به د امریکا د عامه روغتیا په تاریخ کې تر ټولو ستونزمن وخت وي.

نوموړي خبرداری ورکړ چې ښایي په فبرورۍ کې په متحدو ایالتونو کې د کوویډ ـ ۱۹ له امله د مړینو شمېر چې اوس ۲۷۳ زره تنه دی، څلور نیم لکو ته ورسېږي.

د ایران نګهبان شورا هم د ملګرو ملتونو د تفتیش ځنډولو لایحه تصویب کړه

د ایران د نګهبان شورا نښان

د ایران د اساسي قانون یوه څارونکي یوه طرحه وړاندې کړه چې په‌کې له حکومته غوښتل شوي، که په یوه میاشت کې پر ایران لګېدلي بندیزونه سست نه‌شي، د ملګرو ملتونو مفتشین دې منع کړي چې د ایران اټمي تاسیسات وڅاري، همداراز دې یورانیم تر هغه زیات غني کړي چې د ۲۰۱۵ کال د اټمي تړون پر مهال ایران له نړیوالو سره موافقه پرې کړې وه.

د ایران نګهبان شورا دا طرحه پرون یوه ورځ وروسته تر دې تصویب کړه چې پارلمان هم موافقه ورسره وکړه.

د ایران ولسمشر حسن روحاني دا پرېکړه د هغو ډیپلوماتیکو هڅو په ضرر بللی چې تهران‌یې د ۲۰۱۵ کال د اټمي تړون د پلي کېدو او د امریکا متحده ایالاتو د بندیزونو د نرمېدو لپاره کوي.

د پاکستان په باجوړ کې دوه قومي مشران ووژل

ارشیف، د پاکستان باجوړ کې د یوې پېښې سیمه کې راټول شوي پولیس

د پاکستان په باجوړ کې وسله‌والو دوه قومي مشران ووژل. له دې سره روانه اوونۍ د وژل شویو قومي مشرانو شمېر شپږو ته ورسېد.

پولیسو ازادي راډیو ته وویل چې په باجوړ کې دا دوه قومي مشران د چهارشنبې په شپه خپل کور ته روان وو چې د سالارزیو په سیمه کې ډزې پرې وشوې.

برید کوونکي له سیمې تښتېدلي او چا د پېښې مسؤلیت نه‌دی منلی.

دوه ورځې مخکې تر دې پېښې څلور تنه قومي مشران په شمالي وزیرستان کې وسله‌والو ووژل.

پوتین په روسیه کې د کرونا ویروس ضد واکسین د تطبیق امر وکړ

ولادیمیر پوتین

د روسیې ولسمشر ولادیمیر پوتین خپل حکومت ته امر وکړ چې سر له راتلونکې اوونۍ په پراخه کچه د کرونا ویروس واکسین تطبیق کړي.

ولادیمیر پوتین د چهارشنبې په ورځ د ټیلیفون کنفرانس له لارې د دفاع وزارت روغتیایي څانګو ته دا امر په داسې حال کې وکړ چې لاهم د سپوتنیک په نوم د کرونا پر ضد د روسیې د چمتو کړي واکسین د مؤثریت په برخه کې سؤالونه شته.

د چهارشنبې د شمېرو له مخې په روسیه کې نږدې دوه میلیونه او ۳۵ زره کسان په کرونا اخته دي او د دې وبا تلفات په دغهَ هېواد کې څه باندې ۴۱ زرو ته رسېږي.

هانګ کانګ کې درې فعالان په بند محکوم شول

ارشیف، عکس تئزیني بڼه لري

په هانګ کانګ کې درې دیموکراسۍ پلوه فعالان نن چهارشنبه (د لېندۍ ۱۲مه) په بند محکوم شول.

دوی کې دوه نارینه او یوه ښځه شامل دي چې نومونه یې جوشوا وانګ، ایوان لم او اګنس چاو یاد شوي دي.

پر دوی دا تور پورې و چې تېرکال یې د حکومت ضد هغه اعتراض کې ګډون کړی و چې اجازه یې نه درلوده.

دغو فعالانو کې یو په ۱۳ نیم میاشتو، بل په لسو میاشتو او بل په ۷ میاشتو بند محکوم شوی دی.

چین د هانګ کانګ پر نیمه خپلواکۍ خپل کنټرول پراخ کړی، حال دا چې تېرکال یې پر ضد څو میاشتې مظاهرې وشوې او کله نا کله په تاوتریخوالي هم اوښتې.

پر انځور د اسټرالیا او چین لانجه؛ امریکا هم غبرګون ښودلی

ارشیف، د امریکا او چین ګډ بیرغونه

په افغانستان کې د یوه اسټرالیایي سرتیري د انځور په اړه د اسټرالیا او چین پر لانجې امریکا هم غبرګون ښودلی دی.

لانجه د تېرې دوشنبې په ورځ هغه مهال پیل شوه چې د چین د بهرنیو چارو وزارت ویاند د هغه اسټرالیایي سرتیري انځور پر ټویټر خپور کړ چې د یوه افغان ماشوم مرۍ ته یې چاړه نېولې ده.

لیجیان ژاو دغه ټویټ کې لیکلي و چې "د اسټرالیایي ځواکونو په وسیله د افغان ملکیانو او زندانیانو پر وژنې یې ټکان خوړلی دی."

له دې ټویټ وروسته د اسټرالیا صدر اعظم وویل چې دغه خپور شوی انځور فوټوشاپ شوی او باید چین یې په اړه بښنه وغواړي او لېرې یې کړي.

اوس د امریکا د بهرنیو چارو وزارت مرستیال ویاند کالې براون د چین دغه کار د دوی ( نوې ناوړه کړنه) بللې ده.

نیوزلنډ، فرانسې او تایوان هم ویلي و چې ټویټ شوی انځور ټکان ورکوونکی او ټولو هغو هېوادونو ته یو سپکاوی دی چې افغانستان کې پوځیان لري.

چیني ډيپلوماتانو بیا ویلي، دغه انځور او ټویټ ته غبرګونونه له حده زیات دي.

له غبرګونونو سره سره د چین د بهرنیو چارو وزارت ویاند دا ټویټ نه دی لرې کړی.

بریتانیا ۲شرکتونو ته د کرونا واکسینونو د تطبیق اجازه ورکړه

بریتانیا د نړۍ لومړنی هېواد شو چې د یوه جرمنۍ کمپنۍ بیو ان ټیک او امریکایي ملګري شرکت فایزر د کورونا واکسینونو ته یې د تطبیق اجازه ورکړه.

ټاکل شوې دغه واکسین د راتلونکې اوونۍ له پيله بازار ته وړاندې شي.

د درمل جوړولو بیو ان ټیک جرمنۍ او فایزر امریکایي کمپنۍ دغه اعلان نن په نیویارک او ماینز ښارونو کې وکړ.

له دې سره به بریتانیا اجازه ولري چې تر امریکا او نورو اروپایي هېوادونو مخکې خپل خلک د کرونا پر ضد واکسین کړي.

د فایزر شرکت مشر البرت بورلا د بریتانیا دغه پریکړه " تاریخي شیبه" یاده کړه.

یو شمېر نور هېوادونه هم هڅه کوي چې کرونا واکسین تولید کړي.

دا هڅې داسې مهال کېږي چې د امریکا د جانز هاپکېنز پوهنتون د شمېرو له مخې نژدې ۶۴ میلیونه انسانان په ټوله نړۍ کې په کرونا اخته شوي چې له ډلې یې نژدې یو نیم میلیون تنه مړه شوي دي.

د کرونا د واکسین د اکمال لپاره د بېلابېلو هېوادونو تابیا

د نړۍ بېلابېل هېوادونه د کرونا د واکسین د اکمال لپاره تابیا نیسي.

دوی د دې لپاره پلانونه جوړوي چې وکولای شي خپلو خلکو ته د واکسین لومړني ډوزونه په څو اوونیو کې ورسوي.

د کرونا د واکسین د رسولو لپاره داسې وخت هڅې چټکې شوي چې کوویډ – ۱۹ ناروغۍ په ډېرو سیمو کې شدت موندلی.

هیله مندي شته چې د همدغه میلادي کال تر پایه د کرونا واکسین د تطبیق لپاره چمتو شي.

د کرونا د واکسین دوه مخکښې جوړونکې کمپنۍ مدرنا او بایوتیک/فایزر وار دمخه په دې هڅه کې دي چې په امریکا متحده ایالتونو او اروپا کې د واکسین د بیړني تطبیق اجازه ترلاسه کړي.

د امریکا د جانز هاپکنز پوهنتون د شمېرو له مخې نږدې ۶۴ میلیونه انسانان ۶۳،۷۹۰،۷۷۴ په ټوله نړۍ کې په کرونا اخته شوي چې له ډلې یې نږدې یو نیم میلیون۱،۴۷۹،۴۴۶ تن مړه شوي.

"سمندرونو کې د ایسارو ماڼوګانو وضعیت ته دې رسیدګي وشي"

ارشیف، عکس تئزیني بڼه لري

د ملګرو ملتونو سازمان ټینګار کړی چې په سمندرونو کې د ایسارو لکونه ماڼوګانو وضعیت ته رسیدګي وشي.

دا ماڼوګان یا د بیړیو کار کوونکي، چلوونکي او خدماتي منسوبین د کوویډ – ۱۹ یا کرونا وبا په خاطر د بېلابېلو هېوادونو له خوا د سفر د محدودیتونو په سبب څو میاشتې له کورونو لېرې پاتې دي او د بېرته ستنېدو اجازه نه ده ورکړل شوې.

د ملګرو ملتونو سازمان ۱۹۳ غړیو پرون په یوه غیر اجرايي پرېکړه لیک کې له دولتونو وغوښتل چې کورونو ته د دغو ماڼوګانو د ستنېدو غمه وخوري.

شاوخوا څلور لکه دا خلک په بېلابېلو سمندرونو کې ایسار دي او د ستنېدو اجازه نه لري.

چین، فلیپین، اندونیزیا، روسیه او اوکراین هغه پنځه لومړي هېوادونه دي چې د نړۍ د نوي فیصده تجارتي مالونو د انتقال بیړیو ته خدماتي کار کوونکي یا ماڼوګان ورکوي.

رسنۍ: ټرمپ د ټاکنو له ورځې تر ۱۵۰ میلیون ډالرو ډېرې پیسې راټولې کړي

ډونالد ټرمپ

امریکايي رسنیو راپور ورکړی چې د متحده ایالاتو ولسمشر ډونالد ټرمپ د ټاکنو له ورځې د خپل کمپاین او سیاسي هڅو لپاره تر ۱۵۰ میلیون ډالرو ډېرې پیسې راټولې کړې دي.

رسنۍ وايي ولسمشر ټرمپ دغه پیسې په نومبر میاشت کې وروسته له هغې راټولې کړي چې خپلو پلویانو ته‌یې له تندو الفاظو ډکې ویناوې کولې او په عین حال کې یې په ټاکنو کې د درغلیو بې‌اساسه ادعا هم کړې وه.

نیویارک ټایمز د دوشنبې په ورځ راپور ورکړی چې ټرمپ هغه میاشت د مالي مرستې له بېړنۍ غوښتنې سره سم ۱۷۰ میلیونه بسپنه ټوله کړه.

واشنګتن پوسټ ورځپاڼې بیا مخکې د پیسو دغه اندازه ۱۵۰ میلیون ډالره ښوولې وه.

ورځپاڼو دغه راپور د هغو کسانو په حواله برابر کړی چې د بسپنې دا موضوع‌یې تأیید کړې، خو خپل هویت‌یې په ډاګه کړی نه‌دی.

جرمني کې یوه موټر چلوونکي ۴ تنه وژلي او ۷ نور ټپیان کړي

تریر ښار کې پولیس او سیمه کې عام خلک

د جرمني پولیس وايي لږ تر لږه څلور کسان هغه وخت مړه او ۷ نور ټپیان شول چې په غربي ښار تریر کې د لوکزامبورګ پولې ته نږدې یوه موټر ووهل.

د جرمني رسنۍ وايي پېښه پرون د دغه ښار په داسې ساحه کې شوې چې د خلکو د تګ راتګ لار ترې تېره شوې ده.

پولیسو په ټویټر کې لیکلي، یو کس له موټر سره نیول شوی دی.

د پولیسو په لومړنیو راپورونو کې ویل شوي چې څلور کسان مړه شوي او پولیسو سیمه کلابنده کړې ده.

یوه عیني شاهد یوې جرمنۍ ورځپاڼې ته ویلي، یو موټر چې ډېر تېز روان و، پر خلکو وربرابر شو.

ناټو: راتلونکی کال به افغانستان کې د خپلو پوځیانو په اړه پرېکړه وکړو

د ناټو سرمنشي ینس سټولټنبرګ

د ناټو سرمنشي وايي د ناټو غړي هېوادونه او شریکان به راتلونکی کال وضعیت ته په کتو له افغانستانه د وتلو، یا هم هلته د خپلو پوځیانو د کمولو پرېکړه کوي.

ینس سټولټنبرګ دا خبره تېره شپه د ناټو د بهرنیو چارو وزیرانو له پرونۍ غونډې وروسته یوه انلاین خبري کنفرانس ته وکړه: "دا چې په افغانستان کې خپل پوځیان نور کم کړو، یا په تدریجي ډول له افغانستانه ووځو که پاتې شو؟ دا پرېکړه به راتلونکی کال وضعیت ته په کتو کېږي. دا پرېکړه به د ناټو د ټولو شریکانو تر سلا مشورې وروسته کېږي. په راروانه فبرورۍ میاشت کې به د ناټو د دفاع وزیرانو غونډه مهمه وي."

په دې وروستیو کې د امریکا متحده ایالاتو اعلان کړی چې د جنورۍ تر نیمايي پورې به په افغانستان کې د خپلو پوځیانو شمېر له ۴،۵۰۰ څخه ۲،۵۰۰ ته راکم کړي.

تېر کال ټوله نړۍ کې ١٢ ميليونه کسان پر ايډز اخته شوي

آرشیف

د ایډیز نړیواله ورځ نن په داسې وخت کې لمانځل کېږي، چې په نړۍ کې یو مخ متفاوته وبا خپره شوې ده.

د ایچ ای وي او ایډز لپاره د ملګرو ملتو اجراییي مشره وایي، د خلکو باید د ایچ ای وي تجربه په یاد وي چې دوی د کويډ١٩ ناروغۍ د واکسین ژمنې کوي او ډاډ ورکوي چې دا یوازې د بډایه خلکو لپاره نه دی.

واني بینیما په یوه بیان کې وویل، چې نړۍ باید له هغې تیروتنې زده کړه وکړي چې د ایچ ای وي په وخت په میلیونونه کسان په مخ په وده هېوادونو کې درملنې ته د انتظار لپاره مړه شول.

د ملګرو ملتو د راپور له مخې چې تېره اونۍ یې خپور کړ، پروسږکال دولس میلیونه کسان چې په ایچ ای وي اخته وو درملنه یې ترلاسه نه کړه.

په ټوله نړۍ کې تر اته دېرش میلیونه ډېر کسان اوس په ایچ ای وي اخته دي.

د اتیایمې میلادي لسیزې له پیله چې د ایډز ناروغي پیل شوې ده تر اوسه یې په نړۍ کې نږدې درې دېرش میلیونه کسان وژلي دي.

له نولس سوه اته اتیایم کال راهیسې د ایډز نړیواله ورځ هر کال د ډسمبر په لومړۍ لمانځل کېږي.

د ډونالډ ټرمپ يوه سلاکار استعفا وکړه

سکاټ اتلاس

هغه ډاکټر چې د کرونا ویروس د خطر د څرنګوالي په اړه یې د امریکا اوسني ولسمشر ډونالډ ټرمپ ته مشورې ورکولې، له دندې استعفی وکړه.

ولسمشر ټرمپ ته د ډاکټر سکاټ اتلاس مشورې په سپینې ماڼۍ کې د کرونا ویروس پر ضد د مبارزې ټیم له نظریو سره په ټکر کې وې.

نوموړي د کرونا ویروس د خپرېدو د کنټرول لپاره د قرنطین مودې پر اوږدولو، د ښونځیو پر تړلو او د ماسک اغوستلو پر اهمیت شک ښوده.

د امریکا د ساري ناروغیو وتلي متخصص انتونیو فوچې د ډاکټر اتلاس پر هغو معلوماتو انتقاد کاوه چې ولسمشر ټرمپ ته یې ورکول.

ښاغلي فوچي، هغه معلومات ناسم او ګمراه کوونکي بلل.

اتلاس د اعصابو ډاکټر وو او په پرله پسې ډول یې د ماسک اغوستل بې اهمیته ښودل.

ډاکټر اتلاس پر ټویټر د یوه لیک په خپرولو سره چې د ډسمبر لومړۍ نېټه ورکړل شوې وه، ولسمشر ته د خپلې استعفی د پرېکړې په اړه وویل.

نوموړي، چې ویل کېږي د عامي روغتیا او ساري ناروغیو په برخه کې یې رسماً تجربه نه درلوده ، څلور میاشتې د ولسمشر د سلاکار په توګه کار کړی او د موقت قرارداد نېټه یې روانه اونۍ ختمېدله.

د پاکستان په ملتان کې زرګونه لاريون کوونکو د عمران خان استعفا وغوښته

آرشیف

د پاکستان په ملتان ښار کې زرګونو خلکو مظاهره وکړه او له عمران خان څخه یې وغوښتل چې استعفا وکړي.

دوی دا مظاهره له دې سره سره وکړه چې حکومت پر غونډو او مظاهرو بندیز لګولی او لسګونه فعالان یې نیولي دي.

پرونۍ مظاهره، چې د پاکستان دیموکراتیک غورځنګ (PDM) تنظیم کړې وه، پنځمه ورته مظاهره وه.

دا غورځنګ په وروستیو کې د ۱۱ ګوندونو له لوري جوړ شوی دی.

د اپوزیسیون پلویانو د مظاهرې ځای ته په تللیو لارو کې د خنډونو پروا ونه کړه.

چارواکو ملتان ښار ته تللې لارې په کانتینرونو بندې کړې او په ښار کې یې د موبال ټېلفون خدمات درولي وو.

نور راوښيه

XS
SM
MD
LG