د لاسرسۍ وړ لېنکونه

تازه خبر
سه شنبه ۴ لیندۍ ۱۳۹۹ کابل ۰۷:۵۴

خبرونه

نن په کابل کې  د ۱۲ لوبډلو ترمنځ د کورش لوبې پيل شوې

ارشیف، په جوزجان کې کورش غېږنیونې ته د ځوانانو لیوالتیا د جوزجان ورزشکاران د المپیک له ملي کمیټې غواړې چې په ملي او نړیوالو سیالیو کې د ګډون په برخه کې له دوی سره همکارې وکړي. نور جزیات د عالم رحمانیار په ویډیويي راپور کې وګورئ.

نن په کابل کې د ۱۲ لوبډلو ترمنځ د کورش لوبې پيل شوې.

د افغانستان کورش فدراسیون فني او مسلکي مرستیال محمد اشرف تقدیر نن د دوشنبې په ورځ (د لړم ۱۲مه) ازادي راډیو ته وویل، دا لوبې چې درې ورځې به دوام لري، له ولایتونو لس لوبډلو او له ایران او پاکستان څخه هم له راغلو کډوالو دوو تېمونو ګډون کړی دی.

ښاغلی تقدیر وایي، دا لوبې د کورش ملي لوبډلې ته د غوره لوبغاړو د انتخابولو په موخه ترسره کوي.

د ورځې تازه خبرونه دلته ولولئ

روسیه: د امریکا یوه جنګ کښتۍ د لېرې ختیځ له اوبو په شا شوه

ارشیف، عکس تئزیني بڼه لري

د روسیې دفاع وزارت وایي، د متحد ایالتونو یوه جنګي کښتۍ وروسته له هغې د روسیې د لېرې ختیځ له اوبو په شا شوه چې خبرداری یې ورکړ.

د روسیې دفاع وزارت په بیان کې ویلي دي چې د "یو. اېس. اېس. جان اېس مککین" په نوم امریکایي بیړۍ د لوی پیټر په خلیج کې نن دوه کیلومتره د روسیې اوبو ته ننوتې وه چې د اډمیرال وینوګرادوف بیړۍ له خبرداري وروسته بیرته په شا شوه.

په ارام سمندر کې د امریکا سمندري خواکونو په یوه بیان کې پرته له دې چې دې پیښې ته اشاره وکړي ویلي دي چې دوی ازادانه خپل فعالیت ته ادامه ورکوي.

باميان کې دوو چاودنو ۱۴ تنه وژلي

په بامیان کې چاودنو ۱۵ تنه ټپیان کړي.

باميان ولايت کې دوو چاودنو ۱۴ تنه وژلي او ۵۰ نور ټپيان دي.

د باميان مرستيال والي عتيق‌الله عتيق دغه پېښه تأييدوي.

د سيمه‌ييزو چارواکو په وينا په وژل شويو کسانو کې يو ترافيک او په ټپيانو کې دوه امنيتي ځواکونه شامل دي.

د باميان امنیه قوماندان رضا يوسفي وايي چې دغه چاودنې د سې راهي شفاخانې سيمه کې په يوه وياله او يوې کراچۍکې د ځای پر ځای شویو ماینونو له امله وې.

تر اوسه کوم کس يا ډلې د دې چاودنو مسؤليت نه‌دی منلی.

باميان د افغانستان په مرکز کې له امنو ولايتونو شمېرل کېږي. په دغه ولايت کې چاودنې په تېرو دوو لسيزو کې بې‌مخينې دي.

طالبان په بامیان ښار کې په نننيو چاودنو کې لاس لرل ردوي.

هلمند کې د ځوان فکر ټولنه: د داعي قاتلان دې ونیول شي

وژل شوی خبریال الیاس داعي

په هلمند کې د ځوان فکر په نوم مدني ټولنې نن سې شنبه (د لېندۍ ۴مه) د ازادي راډیو د خبریال الیاس داعي او د پخواني ژورنالېست یما سیاوش د قاتلانو د ژر تر ژره نیولو غوښتنه وکړه.

د دې ټولنې مشر نور علي نوري ازادي راډیو ته وویل: "ځوانان، قومي مشران او خبریالان زموږ په ټولنه کې راغونډ شوي وو، له دولته مو وغوښتل چې د خبریالانو ژوند ته جدي پاملرنه وکړي او له طالبانو مو وغوښتل چې خبریال خپل هدف ونه ګرځوي."

په هلمند کې د ازادي رادیو خبریال الیاس داعي له نننه دولس ورځې مخکې په لښکرګاه کې هغه وخت ووژل شو چې د ده پر موټر مقناطیسي ماین وچاودید، څو ورځې مخکې تر دې په کابل کې د طلوع ټلوېزیون پخوانی خبریال یما سیاوش د ورته چاودنې قرباني شو.

کابل کې د پینګ پانګ لوبدلې ته د لوبغاړو د غوراوي لپاره سیالۍ پېل شوې

ارشیف، عکس تئزیني بڼه لري

په کابل کې د پینګ پانګ ملي لوبدلې ته د لوبغاړو د غوراوي لپاره، د نارینو او مېرمنو د پنځلسم پړاو سیالۍ تېره ورځ پېل شوې.

د ملي المپیک کمېټې له لوري په خپره شوې اعلامیه کې راغلي چې په دغو لوبو کې له ۱۵ ولایتونو ١٠٣ نارینو او ٣٦ مېرمنو ګډون کړی.

د نوموړي په خبره، دا لوبې چې په بېلابېلو ګټه ګوریو کې دي، شپږ ورځې به دوام وکړي.

په اعلامیه کې یادونه شوې چې له دغو لوبغاړو به شل غوره لوبغاړي ملي لوبډلې ته غوره شي.

ننګرهار کې د کرکټ لوبې وسایلو یوه فابریکه پرانېستل شوه

ارشیف، عکس تئزیني بڼه لري

په ننګرهار ولایت کې د کرکټ لوبې وسایلو یوه تولیدي فابریکه پرانېستل شوه.

دغه فابریکه د کډوالو په چارو کې د ملګرو ملتونو عالي کمېشنري په مالي همکاري جوړه شوې ده چې په یوه ورځ کې د سل بېټونو او وېکټو د تولید ظرفیت لري.

د ننګرهار د صنعت او سوداکرۍ رئيس محمد حسن محسن وایي، دم ګړۍ دغه فابریکه یوازې د ننګرهار بازارونو لپاره د کرکټ لوبې وسایل چمتو کوي او هڅه دا ده چې د تولید ظرفیت لوړ او نورو ولایتونو ته هم واستول شي.

دا فابریکه داسې مهال په کار پیل کوي چې له دې وړاندې د کرکټ د وسایل په ګډونو د نورو لوبو توکي له نورو هېوادونو په ځانګړي ډول له ایران، چین او پاکستانه افغانستان ته را واردېدل.

ننګرهار کې "اېمریجنګ" لوبډلو ته د لوبغاړو د پېژندلو په پار کمپ پیل شو

کرکټ بورډ وایي چې تېره ورځ یې په ننګرهار کې له ١٩ ښکته او له ٢٣ کلونو ښکته یا "اېمریجنګ" ملي لوبډلو ته د غوره لوبغاړو د پېژندلو لپاره ٧١ ورځنی تمریناتي کمپ پیل کړ.

د کرکټ بورډ ویاند فرید هوتک نن سې شنبه (د لیندۍ ۴مه) ازادي راډیو ته وویل چې دغه لوبغاړي به په بېلابېلو برخو کې تمرینونه وکړي او له ١٩ کلونو ښکته ملي ټیم ته به ترینه ١٥ غوره لوبغاړي انتخاب شي.

ښاغلی فرید زیاتوي چې اېمرجنګ یا له ٢٣ کلونو ښکته لوبډلې لپاره به هم غوره لوبغاړي وټاکل شي.

چین نن سې شنبه سپوږمۍ ته یوه ستور بېړۍ وتوغوله

ارشیف، عکس تئزیني بڼه لري

چین نن سې شنبه (د لېندۍ ۴مه) له سپوږمۍ څخه د خاورو او ډبرو د نمونو ټولولو او ځمکې ته د راوړلو په نیت یوه ستور بیړۍ وتوغوله.

د چانګ پنځه په نوم دغه ستوربیړۍ نن سهار وختي د لانګ مارچ پنځه په نوم د توغندي په وسیله د هینان ولایت په جنوب کې د فضا په لور روانه شوه.

د دې ماموریت مرستیالې ژینګ یوهوا وویل: "سپوږمکۍ په بریالیتوب وتوغول شوه که څه هم دا لا پیلامه ده."

که دا ماموریت بریالی شي دا به د امریکا له متحد ایالتونو وروسته په تېرو شااوخوا ۴۰ کلونو کې لومړی ځل وي چې یو هېواد د سپوږمۍ خاورې او ډبرې مځکې ته راوړي.

اشرف غني: سوله د افغانانو لومړیتوب دی

د افغانستان ولسمشر محمد اشرف غني

د افغانستان ولسمشر محمد اشرف غني وایي، سوله د افغانانو لومړیتوب دی.

اشرف غني په جنیوا کې نن سې شنبه (د لیندۍ ۴مه) د افغانستان لپاره نړیوالې غونډې ته له کابله په ویډیو کنفرانس کې وویل: "د افغانستان د خلکو اصلي لومړیتوب څه دی؟ سوله ده. نن زموږ د افغانستان خلک، حکومت او نړیواله ټولنه یو ګډ لرلید لرو؛ هغه یو خپلواک، متحد او ډیموکراټ افغانستان دی چې په کور دننه، له سیمې او نړۍ سره په سوله کې وي او د تېرو ۲۰ کلونو د لاسته راوړنو د خوندیتوب توان ولري."

بل لور ته د جنیوا کنفرانس ته نن د ملګرو ملتونو سرمنشي انتونیو ګوتېرش په خپلو خبرو کې په افغانستان کې پرته له قید او شرطه د اوربند غوښتنه وکړه، څو د ده په خبره د دوحې د سولې په خبرو کې د پرمختګ زمینه مساعده شي.

په جنیوا کې د افغانستان لپاره په نړیواله دوه ورځنۍ غونډه کې پرون پيل شوه، د اویا هېوادو او ۳۰ نړیوالو موسسو استازیو برخه اخېستې ده.

دبرا لاینز: افغانستان باید مخته حرکت وکړي

دبرا لاینز

د افغانستان لپاره د ملګرو ملتو استازې دبرالاینز وویل، افغانستان باید مخته حرکت وکړي، شاته لاړ نه شي.

دبرالاینز په جینوا کې د افغانستان په اړه نن د دوه ورځنۍ غونډې په دوهمه ورځ دا ژمنه وکړه چې ملګري ملتونه به له افغانانو سره خپلو مرستو ته ادامه ورکړي.

دې هغو ستونزو ته هم اشاره وکړه چې افغانان ورسره مخامخ دي.

هغې زياته کړه: "موږ ټول پوهېږو، چې د شخړو کچه خورا لوړه ده، باید راکمه شي په میلیونو افغانان لاهم له خپل هېواده بهر پاتې دي او په زرګونو نور د افغانستان دننه بېځایه شوي دي."

د ملګرو ملتونو استازې زیاته کړه، چې په وروستیو څو کلونو کې په میلیونونو افغانان له فقره سره مخامخ شوې دي او افغانان په دوامدار ډول د فساد شاهدان دي چې دا دواړه فقر او فساد باید ختم شي.

اغلې لاینز زیاته کړه، چې تر سلو د ډېرو هېوادونو او نړیوالو موسسو مرستو ته سترګې په لاره ده چې له افغانستان سره یې وکړي.

چارواکي: پنجوایي کې طالبانو ته مرګ ژوبله اوښتې

ارشيف

په کندهار کې امنیتي چارواکي خبر ورکوي چې د پنجوایي په ولسوالي کې طالبانو تېره شپه د یخچال په سیمه کې د افغان ځواکونو پر پوستو بریدونه کړي دي.

دفاع وزارت په یوه خبرپاڼه کې ویلي دي، چې په ځوابي برید کې درې طالبان وژل شوي او درې تنه یې ټپیان شوې دي.

طالبانو د دې حملو په اړه څه نه دې ویلي.

د بشري حقونو څار ډلې د روسیې له پارلمان نوې غوښتنه کړې

د روسیې د پارلمان يوه څنډه

د بشري حقونو د څار ډله ( هیومن رایټس واچ) وایي، د روسیې پارلمان باید دا نوې لایحه رد کړي چې چارواکو ته دا واک ورکوي چې هغه ویبپاڼې بلاک کړي چې د روسیې په دولتي رسنیو کې خپاره شوي معلومات سانسوروي.

د بشري حقونو د څار ډله وایي، که دا لایحه تصویب شي له دې سره به په روسیه کې سانسور زیات شي.

د اروپا او اسیا لپاره د بشري حقونو همغږه کوونکې انستیزیا زلوبینا په یوه بیان کې وویل، که دا لایحه تصویب شي خلک به د اطلاعاتو له ترلاسه کولو محروم شي.

دغه لایحه د نومبر په نولسمه پارلمان ته وړاندې شوه.

په ننګرهار کې لسګونه مېرمنې د سبو او مېوو د پروسس برخو کې روزل شوي

ارشيف

د افغانستان د کرنې، اوبو لګولو او مالدارۍ وزارت وایي، په ننګرهار ولایت کې١٠٠ یې مېرمنې د سبو او مېوو د پروسس او بسته بندي په برخه کې روزلې دي.

د دغه وزارت په اعلامیه کې راغلي، چې دغو مېرمنو ته عملي او نظري زده کړې ورکړل شوې دي.

په اعلامیه کې وړاندې ویل شوي، دغه ښځې د سبو او مېوو د پروسس برخه کې کار وکړي او له اقتصادي پلوه به په ځان بسیاینې ته ورسېږي.

مخکې تر دې بیا د افغانستان د کرنې او مالدارۍ وزارت په بېلابېلو ولایتونو کې یو شمېر ښځو ته د دوی د اقتصاد پیاوړتیا په هدف کورنۍ باغچې او د چرګانو د ساتنې پروګرامونه پلي کړې دي.

د افغانستان د اقتصادي پراختیا د ټکنۍکېدو لاملونه په ډاګه شول

عبدالهادي ارغندیوال

د افغانستان د مالیې وزیر وایي، بېکاري، بېوزلۍ، روغتیايي خدمتونو ته د خلکو نه لاس رسی او د زیربناو د کمښت ترڅنګ د کرونا ویروس خپرېدو د هېواد اقتصادي پراختیا ټکنۍ کړې ده.

د مالیې وزارت په اعلامیه کې د مالیې وزیر عبد الهادي ارغندیوال له قوله ویل شوي، له همدې امله افغانستان د نړیوالې ټولنې مالي او تخنیکي ملاتړ ته اړتیا لري، څو د ملي چوکاټ په عملي کولو سره تر ٢٠٢٥ کال له اقتصادي پلوه په ځان بسیا شي.

په اعلامیه کې ویل شوي ښاغلي ارغندیوال د جنیوا کنفرانس په لومړۍ ورځ د کنفرانس ګډونوالو ته ویلي، افغان حکومت ملي ستراتیژي ترتیب کړې چې په عملي کېدو سره به یې افغانستان په راتلونکو پنځو کلونو کې له اقتصادي پلوه په ځان متکي شي.

پاریس کې د یوه کمپ د تشولو لپاره اوښکې بهوونکی ګاز کارول شوى

ارشيف

د فرانسې پولیسو د پلازمېنې پاریس په مرکزي برخه کې د پناه غوښتونکو د یوه کمپ د تشولو لپاره اوښکې بهوونکی ګاز وکاراوه.

دغه سلګونه پناه غوښتونکي چې ډېری یې افغانان دي، مخکې د پاریس له یوې بلې برخې وایستل شول، خو بل ځای ورته مشخص نه شو.

رضاکارانو پرون دوشنبه د پاریس په مرکزي برخه کې دغو پناه غوښتونکو ته شا و خوا ۵۰۰ شنې خېمې برابرې کړې او ډېر ژر په پناه غوښتونکو ډکې شوې.

خو پرون د خیمو تر ډکېدو یو ساعت وروسته پولیس د کمپ د تشولو لپاره لاس په کار شول.

۳۴ کلن افغان پناه غوښتونکي شهاب الدین وویل، پولیسو ډېر زورزیاتی وکړ.

د فرانسې د کورنیو چارو وزیر ژرالد درمانیان چې د کمپ د تشولو عکسونه ټکان ورکوونکي بللي ویلي، چې له پولیسو یې د دې تصفیې د جزییاتو ورکولو غوښتنه کړې ده.

د "کويډ19" ضد واکسین د موندلو په صورت کې د کنتاس هوايي شرکت غوښتنه

د کويډ19 ضد واکسین

د اسټرالیا هوايي شرکت کنتاس وايي، کله چې د کرونا-ضد واکسین هر چا ته د موندلو وړ وي، له نړیوالو مسافرو به وغواړي چې باید د سفر پر مهال واکسین شوي وي.

د دغه شرکت اجرائیه رئیس الن جویس پرون وویل، د اسټرالیا هوايي شرکت په پام کې لري، چې دغه پالیسي عملي کړي او دا مقررات به په دغه شرکت کې عادي بڼه خپله کړي.

دغه زیاته کړه، په بازار کې د کرونا ضد واکسین د موجودیت شرایطو ته په کتو به په کورنیو الوتنو کې د دې واکسین اړتیا په پام کې ونیول شي، خو په نړیوالو الوتنو کې به دغه واکسین ضروري وي.

که څه هم په نړۍ کې په کرونا ویروس د اخته کسانو شمېر تر ۵۹ ميلیونو اوښتی، په عین حال کې د کرونا ویروس ضد واکسین جوړولو هڅې هم چټکې شوې دي.

نور راوښيه

XS
SM
MD
LG