د لاسرسۍ وړ لېنکونه

تازه خبر
یکشنبه ۹ لیندۍ ۱۳۹۹ کابل ۰۶:۲۱

خبرونه

د کابل ساحلي فوټبال غوره لیګ لوبې پيل شوې 

د کابل ساحلي فوټبال غوره لیګ لوبې نن پيل شوې.

د افغانستان فوټبال فدراسیون د نشراتو مسوول فیروز مشعوف نن د دوشنبې په ورځ (د لړم ۱۲مه ) ازادي راډیو ته وویل، په دې لوبو کې به اته ټیمه په لیګ سیستم کې د یو بل پر وړاندې ولوبیږي.

د ښاغلي مشعوف په خبره، دا لوبې به دوی سره مرسته وکړې څو ساحلي ملي لوبډلې کې نوي څېرې جذب کړې.

دی زیاتوي، نن په دوه بېلابېلو لوبو کې شریفي سپورټ ۷ د ۱ پر وړاندې افغان کلپ ته او د مرادخاني لوبډلې ۸ د صفر د سباوون لوبډلې ته ماته ورکړه.

دا لوبې به ۱۵ورځې دوام وکړي.

د ورځې تازه خبرونه دلته ولولئ

طالبان: د مذاکراتي ټيمونو ترمنځ د مذاکراتو طرز العمل بشپړ شوى

ارشیف

په دوحه کې د طالبانو د سیاسي دفتر ویاند وايي، د بين الافغاني مذاکراتي ټيمونو ترمنځ د بين الافغاني مذاکراتو طرز العمل په 21 مادو کې بشپړ او وروستى شوی دی.

د طالبانو د سیاسي دفتر ویاند محمد نعیم پر خپل ټویټر ویلي، دا کړنلاره د روان کال د نومبر په ۱۵ مه تکمیل شوې.

هغه د بین الافغاني خبرو د دې تکمیل شوې کړنلارې جزییات نه دي په ډاګه کړي، خو زیاته کړې یې ده چې د کړنلارې یوه نسخه د دواړو مذاکراتي خواوو له تاييد وروسته د نومبر په اولسمه نېټه اسان چاري هېواد ( قطر) ته هم سپارل شوې ده.

تر اوسه د افغان دولت مرکچي په ټیم په دې اړه چې دا کړنلاره دې بشپړه شوي وي تبصره نه ده کړې.

د بین الافغاني خبرو دواړو لورو د سیپټمبر د ۱۲ مې نېټې راهېسې په دوحه کې پر دې کړنلارې بحثونه او غونډې پیل کړې وې.

اتمر د اسلامي همکاريو له سازمانه نوې غوښتنه وکړه

محمد حنیف اتمر وزیر

د افغانستان د بهرنیو چارو وزیر حنیف اتمر د اسلامي هېوادونو د همکارۍ له سازمان او په کې شاملو اسلامي هېوادونو وغوښتل چې د افغانستان په سوله کې دې مرسته وکړي او پر طالبانو دې فشار راوړي چې تاوتریخوالی پای ته ورسوي.

حنیف اتمر چې د نایجیر په پلازمېنه نیامي کې یې د اسلامي همکارۍ د سازمان د بهرنیو چارو وزیرانو په ۴۷مه ناسته کې خبرې کولې افغانستان کې پر ولسي اهدافو د بریدونو زیاتېدل بې ساري وبلل.

هغه په دې لړ کې په کابل کې پر یو زېږنتون، یو ښوونیزو مرکز او کابل پوهنتون وروستي بریدونه د بېلګو په ډول یاد کړل او زیاته یې کړه چې پر معتدلو دینې عالمانو، د بشري حقونو پر فعالانو او ژورنالیستانو هم هدفي بریدونو زور اخیستی.

ښاغلي اتمر د تاوتریخوالي سره په یو وخت افغانستان کې د سولې لپاره رامنځته شوی فرصت هم بې ساري وباله او د اسلامي همکارۍ د سازمان له غړیو هېوادونو یې وغوښتل چې د افغانستان په سوله کې دې مرسته وکړي.

نوموړي د اسلامي همکارۍ د سازمان په ملاتړ په 2018 م کال کې په مکه مکرمه د دیني عالمانو هغه نړیواله غونډه مهم پرمختګ وباله چې افغانستان د سولې او په دې هېواد کې د جګړې د پای ته رسولو ملاتړ په کې شوی و او د اسلامي هېوادونو له دیني عالمانو یې وغوښتل چې د افغانستان د سولې لپاره دې خپلو هڅو ته دوام ورکړي.

د افغانستان د بهرنیو چارو وزیر د اسلامي همکاریو د سازمان له هغو غړیو هېوادونو، چې د افغانستان سوله کې رول لري وغوښتل چې طالبان دې سولې ته وهڅوي.

ښاغلي اتمر ترهګري د اسلامي هېوادونو په شمول د ټولې نړۍ شریک دښمن وباله او ویې ویل: "له دې سره د مقابلې لپاره تر ټولو ښه لاره دا ده چې افغانستان ته سوله راولو او د هغو بهرنیو وسلوالو پر ضد مبارزه وکړو چې په دې سیمه کې خوندي ځالې لري."

د اتمر په وینا په دې کې د اسلامي همکاریو سازمان مهم رول لوبولی شي او پر هغوی یې ټینګار وکړ چې لاسونه سره ورکړي او د افغانستان د سولې د پروسې ننګه وکړي او په اسلامي هېوادونو کې اسلامي دیني عالمانو وهڅوي چې افغانستان کې تاوتریخوالی وغندي او د سولې د بهیر ملاتړ وکړي.

خامنه يي د "محسن فخري زاده" د وژل کېدو غچ اخیستل وغوښتل

د فخري زاده د وژنې سيمه

د ایران مذهبي مشر آیت الله علي خامنه يي د دې هېواد د یوه وتلي اټومي ساینسپوه محسن فخري زاده د وژل کېدو د غچ اخیستو غوښتنه کړې ده.

خامنه يي نن پر خپله رسمي ویب پاڼه د دې قتل د تعقیب او عاملینو ته یې د سزا ورکولو غوښتنه کړې.

په همدې ورځ د ایران ولسمشر حسن روحاني هم د دې پېښې په تړاو اسراییل تورن کړ چې د امریکا د مزدور په توګه عمل کوي.

روحاني پر خپله رسمي ویب پاڼه لیکلي: "يو ځل بیا د نړیوالو اشرارو لاسونه د مزدور صهیونستي رژیم د دسیسې له کبله د دې هېواد د یوه بچي په وینو ولړل شول."

حسن روحاني نن د ایران د کابینې په غونډه کې وویل: "هم صهیونیستي رژیم او هم هغه کسان چې د ایران پر ضد دي، په دې باید پوه شي چې زموږ د ملګري فخري زاده په تلو سره به نور ډېر فخري زاده ګان ملا وتړي."

محسن فخري زاده د نومبر پر ۲۷ / پرون تهران ته نږدې په یوه وسله وال کمین کې ووژل شو.

د ایران د اټومي ادارې مشر علي اکبر صالحې نن ویلي، چې د فخري زاده وژنه به د ایران د اټومي پروګرام چاري اغېزمنې نه کړي.

د هند تر ولکې لاندې کشمیر کې د پرمختيايي شوراګانو ټاکنې ترسره کېږي

آرشیف، د کشمیر يوه سيمه

د هند تر ولکې لاندې کشمیر کې زرګونه کسان د سختو امنیتي تدابیرو او سړې هوا سره د سیمه ييزو پرمختیایې شوراګانو ټاکنو کې رایې ورکوي.

وروسته تر دې چې د هند صدراعظم نریندرا مودي تېر کال د دې سیمې نیمه خپلواکي او د دې سیمې بیل اساسي قانون یې لغوه کړ او دا سیمه یې په دوو فدرالي سیمو وویشله، دا لومړي انتخابات دي چې په کې ترسره کېږي.

بیلتون غوښتونکو وار له مخه له دې انتخاباتو سره مخالفت څرګند کړی دی.

دا انتخابات د سیمه ییزو پرمختیایي شوراګانو د ۲۸۰ څوکیو لپاره دي چې په اتو پړاوونو کې به ترسره شي او د ډسمبر په ۱۹مه به پای ته ورسېږي.

خامنه يي: د ساینس پوه 'فخري‌زاده' د وژلو د غچ دې واخیستل شي

د ایران ولسمشر وايي یو ځل بیا د نړیوالو اشرارو لاسونه د ایران د یوه بچي په وینو ولړل شول.

د ایران مذهبي مشر ایت الله علي خامنه يي د دې هېواد دیوه وتلي اټمي ساینس پوه محسن فخري زاده د وژل کېدو د غچ غوښتنه کړې ده.

خامنه یې نن شنبه (د لیندۍ ۸مه) پر خپله رسمي ویب پاڼه د دې قتل د تعقیب او عاملینو ته یې د سزا ورکولو غوښتنه کړې.

په همدې ورځ د ایران ولسمشر حسن روحاني هم د دې پېښې په تړاو اسرائیل تورن کړ چې د امریکا د مزدور په توګه عمل کوي.

روحاني پر خپله رسمي ویب پاڼه لیکلي: "یو ځل بیا د نړیوالو اشرارو لاسونه د مزدور صهیونستي رژیم د دسیسې له کبله د دې هېواد د یوه بچي په وینو ولړل شول."

محسن فخري زاده د نومبر پر ۲۷ مه پرون جمعه(د لیندۍ ۷مه) تهران ته نژدې په یوه وسله وال کمین کې ووژل شو.

د ایران د اټمي ادارې مشر علي اکبر صالحې نن ویلي چې د فخري زاده وژنه به د ایران د اټمي پروګرام چارې اغیزمنې نه کړي.

افغانستان: د کډوالو په اړه ایران سره ډیپلوماټیک مخته ځو

ارشیف، افغان کډوال

د افغانستان د بهرنیو چارو وزارت وایي، هڅه کوي له ډیپلوماتیکو لارو په ایران کې د غیر قانوني افغان کډوالو پر وړاندې د ایران د نویو ګواښونو لپاره حل لاره ومومي.

د دغه وزارت مرستیال ویاند حامد تهذیب رسنیو ته په یوه استولي پیغام کې نن د شنبې(د لیندۍ ۸مه) ویلي چې په تهران کې د افغانستان سفیر د ایران د پارلمان له مشر سره د غیر مجاز کډوالو پر وړانډې د ایران د نوي طرحې په اړه اندیښنې شریکې کړي دي.

دی وايي: "په دې لیدنه کې په تهران کې د افغانستان سفیر د دې طرحې د تصویب او عملي کېدو په اړه د افغانستان اندیښنې له ایراني لوري سره شریکې کړي او د دې اندیښنو د مخنیوي په برخه کې یې د لازمې همکارۍ غوښتنه کړې ده."

د ایران د پارلمان د یو شمېر استازو په نوې طرحه کې چې د دې هېواد د اسلامي شورا مجلس ته يې د تصویب لپاره وړاندې کړې، د غیرقانوني کډوالو پر وړاندې سخت قیودات وضع شوي دي.

د رپوټونو له مخې په دې طرحه کې ویل شوي، هر هغه بهرنی اوسیدونکی چې له اجازې پرته ایران ته داخل شي، یا په دې هېواد کې مېشت او یا تګ راتګ ولري، ښایي له ۲۵ کالو زیات بندي شي او هم باید سل میلیون تومان نغدي جرېمه ادا کړي. د شک په صورت کې د غیر قانوني اتباعو پر موټر باندې ډزې کول هم مجاز بلل شوي دي.

دغې طرحې هغه شااوخوا اته لکه افغانان چې له رسمي اسنادو پرته په ایران کې اوسیږي اندیښمن کړي دي.

ښاغلي تهذیب په دې اړه د ایراني لوري د ځواب په اړه څه نه دي ویلي.

دفاع وزارت: په بېلابېلو عملیاتو کې ۵۳ تنه طالبان وژل شوي

ارشیف، افغان امنیتي ځواکونو د عملیاتو پر مهال

د افغانستان دفاع وزارت وایي، د امنیتي ځواکونو په بېلابېلو عملیاتو کې ۵۳ تنه وسله وال طالبان وژل شوي او ۲۱ نور ټپیان شوي دي.

د دفاع وزارت په یوې اعلامیې کې راغلي چې په دې عملیاتو کې د هوایي ځواکونو ملاتړ هم وو .

د اعلامیې له مخې دا عملیات تېره شپه د هرات په کوهستان، د ارزګان په ګیزاب، د هلمند په ناوې، نهر سراج او نادعلي، د کندز په امام صاحب او د ننګرهار په خوګیاڼو ولسوالۍ کې شوي دي.

دفاع وزارت زیاتوي چې په دې عملیاتو کې یوه اندازې وسلې او مهمات د افغان ځواکونو لاسته ورغلي دي.

وسله والو طالبانو تر اوسه په دې اړه څه نه دي ویلي.

چارواکي: په پکتیا کې سږ کال د جلغوزو حاصلات لس سلنه زیات شوي

ارشيف


په پکتیا کې د جلغوزو د پروسس او بسته بندۍ د شرکت کارونه بشپړ شول.

د دغه ولایت د سوداګرۍ خونې مشر ناصر عالمیار وایي، چې په دغه شرکت کې زرو کسانو ته د کار زمینه برابره شوې او په کلني ډول به ۶۰۰۰۰ ټنه جلغوزې بسته بندي شي.

سږ کال په دغه ولايت کې جلغوزو څه باندې ١٣زره مټريک ټنه حاصل ورکړی چې د تېر کال په پرتله لس سلنه زياتوالى ښيي.

چارواکي وايي، که څه هم اوسمهال ګاونډي هېواد پاکستان ته د جلغوزو د قاچاق مخه تر ډېره نيول شوې، خو بيا هم يوه اندازه جلغوزي دغه هېواد ته په قاچاقي ډول وړل کېږي او پاکستان يې بيا په خپل نوم نورو هېوادونو ته صادروي.

چارواکی وايي، په کور دننه د جلغوزو د پروسس د ورته مزکزونو په جوړېدو سره به دا ستونزه هواره شي.

"بهر ته د افغاني غاليو صادرات دوه برابره کم شوي"

ارشيف

د افغانستان د غالیو د صادرونکو ټولنه وايي، سږکال یې بهر ته صادرات د تېر کال په پرتله دوه برابره کم شوي دي.

د غالیو تولیدونکو او صادرونکو ټولنې مشر محمد عظیم اسلم زاده ازادي راډیو ته وویل چې سږکال شاوخوا ۲۵۰ زره مټر مربع غالۍ بهر ته صادرې شوې دي.

په داسې حال کې چې تېر کال تر همدې مودې دا کچه شاوخوا ۱۰۰ زره مټر مربع غالیو ته رسېده.

نوموړي وویل چې د کرونا ويروس له حده زیاته اغېزه د غالیو پر تولیدونکو ده او ډېری غالۍ اوبدونکي دم ګړۍ نه شي کولای خپل تولیدات په مناسبه بیه وپېري.

غالۍ اوبدنه او د غالیو پروسس هغه صنعت دی چې ډېرو کسانو ته د کار زمینه برابروي.

که څه هم ویل کېږي چې اوسمهال په هېواد کې یو میلیون تنه په غالۍ اوبدلو او غالۍ پلورلو بوخت دي خو ځينې غالۍ اوبدونکي وایي چې د هرې ورځې په تېرېدو سره په هېواد کې د غالۍ اوبدونکو شمېر کمېږي.

هندي کشمیر کې د سیمه ییزو پرمختیایي شوراګانو ټاکنې پیلېږي

ارشیف، کشمیر ، دا عکس تئزیني بڼه لري

د هند تر واک لاندې کشمیر کې نن د سیمه ییزو پرمختیایي شوراګانو ټاکنې پیلېږي.

وروسته تر دې چې د هند صدراعظم ناریندرا مودي د دې سیمې نیمه خپلواک واک تېر کال وګرځاوه، د دې سیمې بیل اساسي قانون یې لغوه کړ او دا سیمه یې په دوو فدرالي سیمو وویشله، دا لومړي انتخابات دي چې په کې ترسره کیږي.

د رای ورکوونکو د ساتنې لپاره په لسګونو زره اضافي سرتیرې سیمې ته استول شوي دي.

بیلتون غوښتونکو وار له مخه له دې انتخاباتو سره مخالفت څرګند کړی دی.

دا انتخابات د سیمه ییزو پرمختیایي شوراګانو د ۲۸۰ څوکیو لپاره دي چې په اتو پړاوونو کې به ترسره شي او د ډسمبر په ۱۹مه به پای ته ورسېږي.

کابل کې ۲۵ کیلوګرامه چرس د پولیسو له لوري ونیول شول

ارشیف، عکس تئزیني بڼه لري

په کابل ښار کې تر شلو کيلو ګرامو ډېر نشه يي مواد ونيول شول.

د کابل ولایت امنيه قوماندانۍ وياند فردوس فرامرز ازادي راډيو ته وويل،۲۵ کيلو ګرامه چرس چې په يوه کورولا موټر کې پټ ايښودل شوي او په پام کې وه له شمالي ولايتونو څخه کابل ته قاچاق شي، په دسپيچري سيمه کې د پولیسو له خوا ونيول شول. د دې نشه يي موادو د قاچاقو په تور موټر چلوونکی هم نيول شوی دی.

پکتیا کې له ۳۰۰ کیلوګرامو ډېر چرس نیول شوي

ارشیف، عکس تئزیني بڼه لري

د پکتيا پولیسو تر درې سوه کيلوګرامو ډېر چرس او بنګ ونيول.

د کورنيو چارو وزارت له نشه يي موادو سره د مبارزې معينیت وياند اسدالله يادګاري ازادي راډيو ته وويل، له نشه يي موادو سره د مبارزې ځانګړو پوليسو د سيد کرم ولسوالۍ پر يوه کور عمليات وکړل چې په نتيجه کې يې ۳۰۰ کيلوګرامه بنګ او ۱۱۰ کيلوګرامه اومه چرس ونيول شول.

عراق کې د الصدر پلویانو د حکومت د مخالفینو درې تنه وژلي

ارشیف، عکس تئزیني بڼه لري

په عراق کې د شیعه ګانو د رهبر مقتدا الصدر پلویانو د حکومت د مخالفینو په یوه کمپ باندې په برید سره درې تنه ووژل او لسګونه نور یې ټپيان کړل.

د حکومت مخالفینو په جنوبي ښار ناصریه کې کمپ جوړ کړی و.

د دې پېښې عیني شاهدانو او روغتیاپالانو د خلکو د وژنې او ټپي کېدو معلومات رسنیو ته ورکړي.

د تُندلاري شیعه رهبر مقتدا الصدر پلویانو د جمعې ترلمانځه وروسته د الحبوبي مرکزي میدان په لور ورغلل چېرته چې د حکومت مخالفین مظاهره چیان له اکتوبر راهیسې پرلت او لاریون کوي.

د پېښې شاهدانو ویلي چې د الصدر پلویانو د مظاهره چیانو په خیمو باندې ډزې وکړې او پترولي بمونه یې ور وغورځول او مظاهره چیان هم اړ شول چې غبرګون وښيي.

اخ او ډب تر شپې روان و او روغتیاپالانو ویلي چې ټپیان په مرمیو لګېدلي و.

مقتدا الصدر چې د عراق په پارلمان کې تر ټولو لویه ډله رهبري کوي تمه لري چې د دغه هېواد له وخت مخکې پارلماني ټاکنو کې مطلق اکثریت خپل کړي.

دی په دې سربېره چې له امریکا سره له ډېره وخت مخالفت پالي په عراق کې د ایران له نفوذ سره هم جوړ نه دی.

د افغانستان د بهرنیو چارو وزیر له خپل پاکستاني سیال سره پر ۴ موضوعاتو غږېدلی

د افغانستان د بهرنیو چارو وزیر له خپل پاکستاني سیال سره

د افغانستان او پاکستان د بهرنیو چارو وزیرانو د اسلامي هېوادونو د همکارۍ سازمان د غونډې په درشل کې سره ولیدل.

محمد حنیف اتمر په خپل ټوېټر لیکلي چې له خپل پاکستاني سیال شاه محمود قریشي سره یې د سولې د راتلونکي پړاو، امنیت، د کډوالو په بېرته ستنېدو او اقتصادي همکاریو خبرې کړي دي.

د پاکستان د بهرنیو چارو وزیر هم له ښاغلي اتمر سره تر لیدنې وروسته په خپل ټوېټر لیکلي چې پاکستان د ټولو لپاره د یوه سوکاله راتلونکي په هدف له افغانستان سره د اړیکو غښتلتیا ته ژمن دی.

د افغانستان د بهرنیو چارو وزارت وايي چې د اسلامي هېوادونو د همکارۍ سازمان د بهرنیو چارو وزیرانو په غونډه کې به افغان پلاوی له ګډونوالو هېوادونو د افغان سولې او ثبات لپاره د همکارۍ غوښتنه وکړي.

فوزیه کوفي: د ښځو د حقونو له خوندیتوب پرته سوله له ناکامۍ سره مخ کیږي

د افغانستان د دولت د مرکچي پلاوې غړې فوزیه کوفي

د افغانستان د دولت د مرکچي پلاوې غړې فوزیه کوفي وایي چې د ښځو د حقونو او شته لاسته راوړنو له خوندیتوب او درناوي پرته د سولې له ناکامۍ سره مخ کېږي.

مېرمن کوفي دا خبره پرون جمعه(د لیندۍ ۷) د اسلام اباد د څېړنو د انسټیټوټ په یوه وېبينار یا انلاین غونډه کې وکړه.

نوموړې وويل: "د پروسې پر مهال که وګورو چې د خبرو د ښکېلو لورو له خوا د ښځو د حقونو خوندیتوب نه یقیني کېږي او د افغانستان لاسته راوړنو، بشري حقونو، تنوع او ټول شمولیت ته درناوی نه کېږي هغه به داسې یو وخت وي چې دا پروسه به نه کامیابیږي."

په دې غونډه کې د ولسي جرګې غړې شینکۍ کړوخېل هم ټینګار وکړ چې د سولې په خبرو کې باید د ښځو ونډه زیاته شي.

هغې زیاته کړه چې ښځې د ټولنیزې پخلاینې په برخه کې تر ټولو مهم رول ادا کوي.

نور راوښيه

XS
SM
MD
LG