د لاسرسۍ وړ لېنکونه

تازه خبر
شنبه ۱۵ لیندۍ ۱۳۹۹ کابل ۰۶:۳۰

نړۍ

د امریکا سنا امي کوني باریټ د سترې محکمې غړیتوب لپاره تأیید کړه

 امي کوني باریټ

د امریکا سنا د سترې محکمې د غړیتوب لپاره د امي کوني باریټ نوماندي تأیید کړه.

له دې سره د سترې محکمې انډول ۳-۶ د محافظه‌کارانو په ګټه بدل شو چې دا د ولسمشر ډونالد ټرمپ لپاره یوه سیاسي بریا ګڼل کېږي.

د امریکا د مشرانو جرګې چې اکثریت په‌کې جمهوري‌پال دي، پرون د اکټوبر په ۲۶مه، د ۴۸ مخالفو رایو پر وړاندې په ۵۲ موافقو رایو ۴۸ کلنې باریټ ته رایې ورکړې.

د سترې محکمې څوکۍ تېره میاشت وروسته له هغه تشه شوه چې په امریکا کې د عدالت مخکښه لبرال څېره روت بادېر ګینسبورګ مړه شوه.

ډیموکراتانو په سنا کې د باریټ لپاره د رأی اخیستو سره مخالفت کړی و او ویلي یې و، د نوماندې د معرفي کولو او هغې ته د رأی ورکولو بهیر دې د ولسمشرۍ له انتخاباتو وروسته چې د نومبر په درېیمه نېټه کېږي، ترسره شي.

د ورځې تازه خبرونه دلته ولولئ

پاکستان: کرونا ویروس په پنځو ورځو کې ۱۰ ډاکتران مړه کړي

په پاکستان کې ټول ټول ۴۱۰ زره کسان په کرونا اخته شوي چې له ډلې یې څه باندې ۸۲۰۰ تنه مړه شوي.   

کرونا ویروس په پاکستان کې په ۵ ورځو کې ۱۰ ډاکتران مړه کړي.

د پاکستان د روغتیاپالانو ټولنې یا (پي ايم اې) په يو راپور کې ويلي چې دا ډاکتران د نومبر له ۲۷مې څخه د دیسمبر تر دويمې نېټې پورې د پاکستان په بېلابېلو ښارونو کې مړه شوي.

د پي ايم اې راپور وايي چې نومبر میاشت د ډاکترانو لپاره تر ټولو مرګونې وه ځکه د کرونا له لاسه اتلسو ډاکترانو ساه ورکړه.

په دې سره په په کوویډ۱۹ ناروغۍ باندې په پاکستان کې د ټولو مړو شوو ډاکترانو شمېر ۳۰۸ ته رسېدلی دی.

پاکستاني ډاکترانو په اکتوبر کې وېره څرګنده کړې وه چې که حکومت د کرونا وبا د دوېمې څپې مخنيوي لپاره کوټلي ګامونه پورته نه کړل نو دا څپه به د لومړۍ هغې په نسبت زياته خطرناکه وي.

د حکومتي شمېرو له مخې په پاکستان کې د نومبر له ۱۲ مې يو وارې بيا هره ورځ له ۲۰۰۰ زيات کسان په کرونا اخته شوي.

په پاکستان کې ټول ټول ۴۱۰ زره کسان په کرونا اخته شوي چې له ډلې یې څه باندې ۸۲۰۰ تنه مړه شوي.

تاجکستان کې د اپوزیسیون مشر "مهمراد ادینه یف" لادرکه شوى

مهمراد ادینه يف

د تاجکستان چارواکي وايي، تراوسه پورې یې د اپوزیسیون د مشر مهمراد ادینه یف د موندلو لپاره لټون له دې سره سره نه دی پیل کړی چې د هغه خپلوانو یې غوښتنه کړې ده.

د کورنیو چارو وزارت ویندوی نصرت الله محمودزاده وویل، د اپوزیسیون د سیوسیال دیموکرات ګوند د مرستیال مشر اودینایف نوم د ورکو کسانو په لیست کې د دې لپاره نه دی ثبت شوی چې پولیسو د ده د خپلوامو غوښتنه نه ده ترلاسه کړې.

د ادینه یف د نوومبر په شلمه بې درکه دی.

د ده خپلوانو ازادي راډیو ته وویل، چې نوموړی څو ورځې وروسته له دې ورک شو چې د فیسبوک په یوه پوسټ کې یې د دوشنبې ښار له ښاروال رستم امام علي څخه وغوښتل چې ده او د ده د ګوند فعالانو ته اجازه ورکړي چې د خوراکي موادو د بیو د لوړېدو په اعتراض کې مظاهره وکړي.

ايران د يوه نوي تصویب شوي قانون د نه تطبیق لپاره شرط کېښود

محمد جواد ظریف

د ایران د بهرنیو چارو وزیر محمدجواد ظریف وايي، هغه قانون چې د دغه هېواد په پارلمان کې تصویب شوی، په هغه صورت کې نه تطبیق کېږي چې پر ایران نړیوال بندیزونه لېرې شي.

د ایران پارلمان یو قانون تصویب کړ چې پر اساس یې د دغه هېواد د اټومي پروګرام د چټکتیا غوښتنه شوې ده.

ظریف پرون د ویډیو له لارې د ایټالیا یوه دیپلوماتیک کنفرانس ته وویل، دا قانون به تطبیق کړي ځکه چې دا د ایران قانون دی، بېرته اخیستل کېدای نه شي.

ده په عین حال کې وویل، وروسته له دې چې د امریکا ولسمشر دونالډ ترمپ په یو اړخیز ډول د ایران او نړیوالو قدرتونو د ۲۰۱۵ کال له موافقې ووته او بندیزونه یې له سره ولګول، دا د ایران حق دی چې د موافقې شرطونه په بشپړ ډول عملي نه کړي.

د امریکا نوي منتخب ولسمشر جو بایډن ویلي چې چې که ایران لومړی په کلکه د اتومي موافقې شرطونه عملي کړي، متحد ایالتونه به موافقې ته بېرته وروګرځي.

یو اوکراینی زده کوونکی د ونو له پاڼو کاغذ جوړوي

آرشیف

یو اوکراینی زده کوونکی د ونو له پاڼو کاغذ جوړوي.

نولس کلن والینتین فریخیک د ښوونځي له وختو د ونو له پاڼو د کاغذ جوړولو کار پیل کړی.

دی د اوکراین په یوه کلي کې اوسي.

د ونو له لوېدلو پاڼو د کاغذ جوړولو پروژه یې درې کاله مخکې پیل کړې وه.

دی د ونو له لوېدلو پاڼو څخه کاغذي کڅوړې او پوښونه جوړوي.

له دې سره دی غواړي چې د چاپېریال د ککړتیا کچه راټيټه شي.

دا ډېره اسانه مفکوره ده.

هغه شیان چې موږ فکر کوو کثافت دي بېرته کارېدلای شي.

پاڼې داسي کثافت دی چې باید له پارکونو ټولې شي ځکه د ورستېدو پر مهال ډېر کاربن خارجوي.

په ۲۰۱۸م کال کې د کارډبورډ جوړوونکي یوه شرکت فریخکا د څېړونکي په توګه استخدام کړ.

سرګي رودکوفسکي د ژیتمیر کارډبورډ شرکت مرستیال مشر دی.

دی وايي: "زموږ فلسفه د استفاده شویو موادو بېرته کارول ده. د ونو پاڼې په دې فلسفه کې شاملې دي. موږ واښه هم تجربه کړل. په ښه کیفیت د موادو په پوښلو کې مو واښه اضافه کړل. د کافي پاته شونې مو د کافي د پيالو نیولو په کاغذ کې استفاده کړل."

په تېره اکتوبر میاشت کې ري لیف شرکت لومړی ځل پرېکړه وکړه چې پر پراخه کچه به خپل تولیدات پیل کړي.

په ۲۰۲۰م کال کې فوربز مجلې د اوکراین اوسېدونکی فریخکا د هغو دېرشو بریالي کسانو په لیست کې شامل کړ چې عمر یې تر دېرشو کلونو کم دی.

اذربایجان له ارمنستان سره په جګړه کې د خپلو پوځي تلفاتو شمېر اعلان کړ

د اذربایجاني ځواکونو سرتېري

اذربایجان جمهوریت اعلان وکړ چې د نګورنو قره باغ پر سر له ارمنستان سره په ۴۴ ورځنۍ جګړه کې یې نږدې ۲ زره ۸۰۰ پوځیان وژل شوي او سل نور یې بې درکه شوي دي.

په دې جګړه کې، چې د سپټمبر په ۲۷ نېټه پیل او د نوومبر تر ۱۰ پورې یې دوام وکړ، ۷ سیمې اذربایجان بېرته ونیولې او د نګورنو قره باغ کنټرول تر ۵ کلونو پورې د روسیې سوله ساتو ته وسپارل شو څو په دې موده کې هغه کسان چې په درو لسیزو یا د وروستیو جګړو په لړ کې له خپلو مېنو بې ځایه شوي دي، بېرته خپلو سیمو ته وګرځي.

د نګورنو قره باغ اکثره اوسېدونکي ارمنیان دي.

د چهارشنبې په ورځ د ارمنستان د روغتیا وزارت یوه چارواکي ازادي راډیو ته ویلي و چې د ۲ زره ۷۱۷ پوځیانو مړي نه دي پېژندل شوي او ښايي ځینې یې اذربایجاني وي.

بغداد کې د امریکا سفارت خپل ځينې کارکوونکي باسي

بغداد کې د امریکا سفارت

د امریکا متحد ایالتونه د عراق په پلازمېنه بغداد کې د خپل سفارت یوه اندازه کارکوونکي باسي.

دا په داسې حال کې ده، چې د ایران او عراق له ملېشه ډلو سره په وروستیو کې کړکېچ زیات شوی دی.

د عراق لپاره د امریکا سفیر ماتیو تیولر پرون د رسنیو تر راپورونو وروسته د لنډ وخت لپاره د سفارت د کارکوونکو د کمېدو خبره تایید کړه.

دا لا معلومه نه ده، چې له سفارت څخه چې د امریکا تر ټولو ستر سفارت ګڼل کېږي، د څو سوه ډیپلوماتانو له جملې څو تنه ایستل شوي دي.

دا اقدام په داسې کېږي، چې د امریکا ولسمشر ډونالډ ټرمپ منتخب ولسمشر جو بایډن ته د مسوولیتونو تر انتقال مخکې پر ایران فشارونه زیات کړي دي.

ټرمپ بیا ټاکنو کې د درغلیو بې ثبوته ادعاوې تکرار کړي

د امریکا برحاله ولسمشر ډونالډ ټرمپ په یوې نوې ویډیو کې یو ځل بیا په ټاکنو کې د درغلیو بې ثبوته ادعاوې تکرار کړي دي.

په دغې ۴۶ دقیقه یي ویډیو کې چې بېګا د ښاغلي ټرمپ پر فیسبوک خپره شوې، ټرمپ دا خبرې" خپلې ډېرې مهمې" څرګندونې یادې کړي دي.

نوموړي سپارښتنه کړې چې ستره محکمه باید هغه څه وکړي چې د هېواد په ګټه وي او د ټاکنو پایله لغوه کړي: "موږ پخوا د ټاکنو ورځ درلوده، خو اوس د ټاکنو ورځې، اوونۍ او میاشتې لرو، د ولسمشر په توګه زه تر دې بله لوړه دنده نه لرم چې د امریکا د اصولو او اساسي قانون دفاع وکړم، له همدې امله زه ژمن یم چې ټاکنیز سیستم خوندي کړم، هغه سیستم چې اوس تر همغږي برید او کلابندۍ لاندې دی."

ټرمپ یو ځل بیا وویل چې د امریکا د نومبر د درېیمې نېټې په ولسمشریزو ټاکنو کې لاسوهنه شوې ده، هغو ټاکنو کې چې سیال یې جو بایډن بریالی اعلان شوی دی.

کرکټ؛ د سریلانکا د غوره لیګ سیالیو په دوام نن دوه سیالۍ کیږي

ارشیف، د سریلانکا بیرغونه

د سریلانکا د کرکټ د غوره لیګ یا 'اېل.پي. اېل' د سیالیو په دوام نن پنجشنبه(د لېندۍ ۱۳مه) دوه سیالۍ ترسره کېږي.

لومړۍ لوبه به د ګالي ګلیدترس او جپنا سټالونز او دویمه لوبه به د دمبولا ویکنګ او کینډي ټاسکر ترمنځ وي.

د افغانستان د کرکټ ملي ټیم یو شمېر لوبغاړي هم په دغو لوبو کې لوبېږي.

دغه لوبې چې نن پنجشنبه ناوخته ترسره کېږي، افغان لوبغاړي افتاب عالم، سمیع الله شینواری، رحمت الله ګربز، نوین الحق او حضرت ځاځی په کې لوبیږي.

بشر حقونه: ازربایجان کې له اسیرو ارمني سرتیرو سره ناوړه چلند شوی

ارشیف، په نګورنو قرباغ سیمه کې ارمني سرتیري

د بشري حقونو د څار نړیوال سازمان وایي، د نګورنو قره باغ په جګړه کې له اسیر شوېو ارمني ټبره سرتېرو سره ناوړه بشري چلند شوی دی.

دغه سازمان په خپل تازه راپور کې ویلي چې وهل ډبول او سپکاوی د هغو ناوړه کړنو له ډلې دي چې ارمني ځواکونو سره د اسارت پر مهال شوي دي.

په راپور کې راغلي، ټولنیزو رسنیو کې خپرې شوې یو شمېر ویډیوګانې ښيي چې ازربایجاني ځواکونه د جګړې اسیران په سوکانو او لغتو وهي.

د راپور پر بنسټ اسیر شوي ارمنیان مجبور شوي چې د اذربایجان بیرغ ښکل کړي، د اذربایجان د ولسمشر الهام عليیف ستاینه وکړي او د ارمنستان صدراعظم نیکول پاشنیان ته سپکې سپورې ووايي.

هیومن رایټس واچ ویلي، دوی چې له ارمني ځواکونو سره د ناوړه چلند خپرې شوې ویډیوګانې څیړلي، ۱۴ هغه یې ریښتیا ختلې دي.

کرونا وېروس؛ امریکا کې د ناروغانو شمېر له یو لکو واووښت

ارشیف، په امریکا کې په کرونا وېروس اخته ناروغ

د امریکا په متحدو ایالتونو کې پرون چهارشنبې(د لېندۍ ۱۲مه) د کوویډ – ۱۹ ناروغۍ له امله په روغتونونو کې د بستر شوېو ناروغانو شمېر له یو لک کسانو واووښت.

دا په ټوله امریکا کې د دغې ناروغۍ له امله د بستر شوېو یو نوی ریکارډ دی چې روغتونونه او روغتیا پالان یې تر سخت فشار لاندې راوستي.

د کرونا ویروس له امله هم ۲۷۳۳ تنه مړه شوي چې دا هم یو نوی ریکارډ دی او په ورځ کې پر دغه ویروس د اخته کېدونکو کسانو شمېر هم دوه لکه کسانو ته رسیدلی.

په دې توګه په امریکا کې په یوه اوونۍ کې پر کرونا د اخته شوېو کسانو شمېر له یو میلیون وګړو اوښتی.

د امریکا د ناروغیو د مخنیوي او کنټرول د مرکز رئیس ډاکټر رابرټ ریډ فیلډ پرون اټکل وکړ چې راتلونکې ورځې به وضعیت له دې هم خراب وي.

هغه زیاته کړه، واقعیت دا دی چې د ډسمبر، جنوري او فبرورۍ میاشتې به ډېرې سختې میاشتې وې.

ریډ فیلډ چې د امریکا د سوداګرۍ د خونې له فونډیشن سره خبرې کولې دغه راز وویل چې د ده په باور دغه درې میاشتې به د امریکا د عامه روغتیا په تاریخ کې تر ټولو ستونزمن وخت وي.

نوموړي خبرداری ورکړ چې ښایي په فبرورۍ کې په متحدو ایالتونو کې د کوویډ ـ ۱۹ له امله د مړینو شمېر چې اوس ۲۷۳ زره تنه دی، څلور نیم لکو ته ورسېږي.

د ایران نګهبان شورا هم د ملګرو ملتونو د تفتیش ځنډولو لایحه تصویب کړه

د ایران د نګهبان شورا نښان

د ایران د اساسي قانون یوه څارونکي یوه طرحه وړاندې کړه چې په‌کې له حکومته غوښتل شوي، که په یوه میاشت کې پر ایران لګېدلي بندیزونه سست نه‌شي، د ملګرو ملتونو مفتشین دې منع کړي چې د ایران اټمي تاسیسات وڅاري، همداراز دې یورانیم تر هغه زیات غني کړي چې د ۲۰۱۵ کال د اټمي تړون پر مهال ایران له نړیوالو سره موافقه پرې کړې وه.

د ایران نګهبان شورا دا طرحه پرون یوه ورځ وروسته تر دې تصویب کړه چې پارلمان هم موافقه ورسره وکړه.

د ایران ولسمشر حسن روحاني دا پرېکړه د هغو ډیپلوماتیکو هڅو په ضرر بللی چې تهران‌یې د ۲۰۱۵ کال د اټمي تړون د پلي کېدو او د امریکا متحده ایالاتو د بندیزونو د نرمېدو لپاره کوي.

د پاکستان په باجوړ کې دوه قومي مشران ووژل

ارشیف، د پاکستان باجوړ کې د یوې پېښې سیمه کې راټول شوي پولیس

د پاکستان په باجوړ کې وسله‌والو دوه قومي مشران ووژل. له دې سره روانه اوونۍ د وژل شویو قومي مشرانو شمېر شپږو ته ورسېد.

پولیسو ازادي راډیو ته وویل چې په باجوړ کې دا دوه قومي مشران د چهارشنبې په شپه خپل کور ته روان وو چې د سالارزیو په سیمه کې ډزې پرې وشوې.

برید کوونکي له سیمې تښتېدلي او چا د پېښې مسؤلیت نه‌دی منلی.

دوه ورځې مخکې تر دې پېښې څلور تنه قومي مشران په شمالي وزیرستان کې وسله‌والو ووژل.

پوتین په روسیه کې د کرونا ویروس ضد واکسین د تطبیق امر وکړ

ولادیمیر پوتین

د روسیې ولسمشر ولادیمیر پوتین خپل حکومت ته امر وکړ چې سر له راتلونکې اوونۍ په پراخه کچه د کرونا ویروس واکسین تطبیق کړي.

ولادیمیر پوتین د چهارشنبې په ورځ د ټیلیفون کنفرانس له لارې د دفاع وزارت روغتیایي څانګو ته دا امر په داسې حال کې وکړ چې لاهم د سپوتنیک په نوم د کرونا پر ضد د روسیې د چمتو کړي واکسین د مؤثریت په برخه کې سؤالونه شته.

د چهارشنبې د شمېرو له مخې په روسیه کې نږدې دوه میلیونه او ۳۵ زره کسان په کرونا اخته دي او د دې وبا تلفات په دغهَ هېواد کې څه باندې ۴۱ زرو ته رسېږي.

هانګ کانګ کې درې فعالان په بند محکوم شول

ارشیف، عکس تئزیني بڼه لري

په هانګ کانګ کې درې دیموکراسۍ پلوه فعالان نن چهارشنبه (د لېندۍ ۱۲مه) په بند محکوم شول.

دوی کې دوه نارینه او یوه ښځه شامل دي چې نومونه یې جوشوا وانګ، ایوان لم او اګنس چاو یاد شوي دي.

پر دوی دا تور پورې و چې تېرکال یې د حکومت ضد هغه اعتراض کې ګډون کړی و چې اجازه یې نه درلوده.

دغو فعالانو کې یو په ۱۳ نیم میاشتو، بل په لسو میاشتو او بل په ۷ میاشتو بند محکوم شوی دی.

چین د هانګ کانګ پر نیمه خپلواکۍ خپل کنټرول پراخ کړی، حال دا چې تېرکال یې پر ضد څو میاشتې مظاهرې وشوې او کله نا کله په تاوتریخوالي هم اوښتې.

پر انځور د اسټرالیا او چین لانجه؛ امریکا هم غبرګون ښودلی

ارشیف، د امریکا او چین ګډ بیرغونه

په افغانستان کې د یوه اسټرالیایي سرتیري د انځور په اړه د اسټرالیا او چین پر لانجې امریکا هم غبرګون ښودلی دی.

لانجه د تېرې دوشنبې په ورځ هغه مهال پیل شوه چې د چین د بهرنیو چارو وزارت ویاند د هغه اسټرالیایي سرتیري انځور پر ټویټر خپور کړ چې د یوه افغان ماشوم مرۍ ته یې چاړه نېولې ده.

لیجیان ژاو دغه ټویټ کې لیکلي و چې "د اسټرالیایي ځواکونو په وسیله د افغان ملکیانو او زندانیانو پر وژنې یې ټکان خوړلی دی."

له دې ټویټ وروسته د اسټرالیا صدر اعظم وویل چې دغه خپور شوی انځور فوټوشاپ شوی او باید چین یې په اړه بښنه وغواړي او لېرې یې کړي.

اوس د امریکا د بهرنیو چارو وزارت مرستیال ویاند کالې براون د چین دغه کار د دوی ( نوې ناوړه کړنه) بللې ده.

نیوزلنډ، فرانسې او تایوان هم ویلي و چې ټویټ شوی انځور ټکان ورکوونکی او ټولو هغو هېوادونو ته یو سپکاوی دی چې افغانستان کې پوځیان لري.

چیني ډيپلوماتانو بیا ویلي، دغه انځور او ټویټ ته غبرګونونه له حده زیات دي.

له غبرګونونو سره سره د چین د بهرنیو چارو وزارت ویاند دا ټویټ نه دی لرې کړی.

نور راوښيه

XS
SM
MD
LG