د لاسرسۍ وړ لېنکونه

تازه خبر
یکشنبه ۴ لړم ۱۳۹۹ کابل ۰۹:۴۰

افغانستان

چارواکي: تېرو دوو اوونیو کې تر ۹ میلیارده افغانۍ ډېر عواید راټول شوي

مالیې وزارت

په تېرو دوو اوونیو کې ۹ میلیارده ۴۰۷ میلیونه افغانۍ ملي عواید راټول شوي دي.

د مالیې وزارت ویاند شمروز خان مسجدي نن ازادي راډيو ته وویل، چې د عوایدو کچه د روان کال د وږې میاشتې د وروستیو دوو اوونیو په پرتله ۹۸۴ میلیونه افغانۍ زیاتوالی ښیي.

هغه زیاته کړه: "د ۱۳۹۹ مالي کال د تلې میاشتې له لومړۍ نېټې نه تر ۱۵ مې نېټې پورې ۹ میلیارده ۴۰۷ میلیونه افغانۍ ملي عواید راټول شوي دي، چې له دې جملې ۵۱۵ میلیونه له مستوفیتونو، ۲ میلیارده ۲۹۷ میلیونه له مالیاتي عوایدو، ۲ میلیارده ۴۷۶ میلیونه له غیر مالیاتي عوایدو او ۴ میلیارده ۱۱۹ میلیونه له ګمرکونو څخه تر لاسه شوي دي."

نوموړي وویل چې،د روان مالي کال له پیل څخه تر اوسه پورې ۱۲۷ میلیارده ۲۰۳ میلیونه افغانۍ ملي عواید راټول شوي دي.

همداشان د ۱۳۹۹ مالي کال له پیل نه د تلې میاشتې تر ۱۲ مې نېټې پورې ۸۳ میلیارده ۱۸۹میلیونه افغانۍ (۵۰.۲) سلنه پراختیایي بودیجه او ۱۹۶ میلیارده ۷۱۵ میلیونه افغانۍ (۶۴) سلنه عادي بودیجه لګول شوې ده چې په ټوله کې د ملي بودیجې ۲۷۹ میلیارده ۹۰۴ میلیونه افغانۍ (۵۹) سلنه جوړوي.

د ورځې تازه خبرونه دلته ولولئ

کابل کې د بې اسناده او نامحصول شویو موټرو د ضبط پروسه پیلېږي

د کابل ښار یوه څنډه

د ولسمشر د لومړي مرستیال دفتر وايي، د لیندۍ یا قوس له ۲۷مې پولیس د بې اسناده او نامحصول شویو موټرو د ضبط پروسه پیلوي.

د دغه دفتر د مطبوعاتي دفتر مشر رضوان مراد نن په یوه ویډیويي پیغام کې وویل، د دغو موټرو د ثبت او محصول پروسه له راروانې شنبې پیل او د لیندۍ تر ۲۷مې دوام کوي.

هغه زیاته کړه: "که چېرې له دې نېټې وروسته بې اسناده موټر د کابل پر سړکونو یا ولایتونو کې لیدل کېږي، نو د پولیسو له خوا نیول کېږي او ستاسو موټر به پولیسو ته د ګزمو لپاره ورکول کېږي یا به په لیرې پرتو سیمو کې ترې پولیس استفاده کوي."

په کابل کې د امنیتي پېښو تر زیاتېدو وروسته د ولسمشر لومړي مرستیال امر اله صالح په خپله د څو اوونیو لپاره د کابل د امنیتي چارو مسوولیت پرغاړه اخیستی دی.

تر دې مخکې شکایتونه وو، چې په بېلابېلو جنايي پېښو کې له بې اسناده موټرو کار اخیستل کېږي.

د پکتیا چارواکي: د ترور د یوې  ډلې ۲ غړي وژل شوي

ګردیز

د پکتیا سرپرست امنیه قوماندان وايي، د ترور د یوې ډلې ۲ غړي ووژل شول او یو یې ژوندی نیول شوی دی.

لطف اله کامران رسنیو ته وویل، چې دغه کسان نن ماسپښين په مرکز ګردېز کې د یوه پولیس تر وژنې وروسته د تېښتې په حال کې وو، چې پولیسو په نښه کړل.

هغه زیاته کړه: "د برخورد په نتیجه کې دوه نفره ووژل شول او یو نفر مو ژوندی ونیوه، له خپلو ټولو اسبابو او وسلو سره، چې یو میله بې غږه تفنګچه هم ورسره وه."

د پکتیا سرپرست امنیه قوماندان ادعا کوي، چې دغو کسانو په ګڼو بریدونو او جنايي پېښو کې لاس درلود.

د پکتیکا پولیس: ماین چاودنې ۴ ماشومان وژلي

ارشیف

د پکتیکا د پولیسو ویاند وايي، په مرکز ښرنه کې نن د یوه کور مخې ته د ځای پر ځای شوي ماین په چاودنه کې ۴ ماشومان ووژل شول.

شاه محمد ارین رسنیو ته وویل، په وژل شویو کې یوه نجلۍ او درې هلکان دي.

هغه زیاته کړه: "له بده مرغه پر وړو ماشومانو یې چاودنه کړې او څلور واړه ماشومان یې ځای پر ځای شهیدان کړي دي."

د پکتیکا د پولیسو ویاند وایي وسلوالو طالبانو درې ورځې مخکې دغې کورنۍ ته خبرداری ورکړی وو چې له دې کلي کډه وکړي.

چارواکو نه دي ویلي چې د دې خبرداري علت څه و.

وسله والو طالبانو تر اوسه د دې پېښې په اړه څه نه دي ویلي.

اندرابي: د طالبانو او القاعده ترمنځ لا هم اړیکې شته

د افغانستان د کورنیو چارو سرپرست وزیر مسعود انداربي

د افغانستان د کورنیو چارو سرپرست وزیر وايي، د ملي امنیت له‌خوا د القاعده د یوه مهم غړي وژل کېدل، له القاعده تروریستي ډلې سره د طالبانو اړیکې ښيي.

مسعود اندرابي پرون ناوخته په ټویټر کې لیکلي، چې د طالبانو او القاعده ترمنځ لا هم اړیکې شته، خو طالبان په دې اړه بېلابېلو اړخونو ته درواغ وايي.

د ملي امنیت عمومي ریاست پرون په غزني کې د ابو محسن المصري د وژلو خبر ورکړ.

المصري جې په القاعده شبکه کې دویم ځای لري او د امریکايي اتباعو د وژلو لپاره د دسیسو په جوړولو کې د لاس لرلو په خاطر د امریکا د فدرالي تحقیقاتي ادارې د مطلوبو کسانو په لیست کې شامل دی.

د امریکا د فدرالي تحقیقاتي ادارې ویلي چې دغه کس په خټه مصری دی او یوه موده په حسن ابو روف مشهور و.

'غور کې تر۱۰۰۰کیلوګرامو زیات بېلابېل نشه يي توکي سوځول شوي'

ارشیف

په غور ولایت کې تر ۱۰۰۰کیلوګرامو زیات بېلابېل نشه يي توکي وسوځول شول.

د دغه ولایت امنیتي چارواکي وايي دغه مواد له ۱۳۹۷لمریز کال راهیسې د غور په بېلابېلو ساحو کې نیول شوي وو.

د غور ولایت امنیه قوماندان وحید اله نظامي نن رسنیو ته وویل: "له ۱۳۹۷ څخه تر ۱۳۹۹ لمریز کاله پورې تر زرو کیلوګرامو زیات مخدره مواد نیول شوي وو، چې نن مو وسوځول او عاملان یې په زندان کې دي."

امنیه قوماندان ونه ویل چې د دغو نشه یي توکو په تړاو دقیقاً څو کسان نیول شوي دي.

د کابل په پروني برید کې د وژل شویو کسانو شمېر ۲۴ ته ورسېد

د پېښې یو ټپي روغتون ته د لېږدولو پرمهال

په کابل ښار کې د پروني ځانمرګي برید د وژل شویو کسانو شمېر ۲۴ ته زیات شو.

د افغانستان د کورنیو چارو وزارت ویاند، طارق ارین نن سهار ازادۍ راډیو ته وویل، په دې برید کې اووه پنځوس نور ټپیان شوي.

ارین زیاتوي: "له بده مرغه د تېر ماښام په تروریستي پېښه کې چې د کابل د دیارلسمې حوزې یوه ښوونیز مرکز ته نږدې وشوه، زموږ تر ۲۴ زیات ملکي هېوادوال شهیدان شوي او تر ۵۰ زیات نور ټپیان شوي دي، دا یو جنایت دی."

پرون مازیګر د کابل په پل خشک سیمه کې د (کوثر دانش) په نوم د یوه ښوونیز مرکز مخې ته هغه مهال انتحاري برید وشو چې حمله کوونکي غوښتل دغه ښوونیز مرکز ته ننوځي.

د کابل په دې شیعه میشته سیمه کې له دې وړاندې داعش وسله والو پر ښوونیزو مرکزونو، غونډو او ورزشي کلپونو بریدونه کړي دي.

د افغانستان ولسمشر محمد اشرف غني دا برید غندلی، د اسلامي او انساني ارزښتونو خلاف کار یې بللی دی.

وسله والو طالبانو ویلي چې په دې حمله کې دوی لاس نه لري.

'د ارزګان په دهراود کې ۲۷ وسله وال طالبان وژل شوي'

ارشیف

د ارزګان ولایت د والي ویاند وايي، په دهراود ولسوالۍ کې ۲۷ وسله وال طالبان وژل شوي دي.

احمد شاه ساحل نن ازادۍ را‌ډيوته وویل چې په تېرو ۲۴ ساعتونو کې په هوايي بریدونو او مخامخ جګړو کې ۱۹ نور طالبان ټپيان شوي دي.

هغه زیاته کړه: "د افغان ځواکونو په هوايي عملیاتو کې ۲۱ وسله وال طالبان وژل شوي او ۱۹ تنه نور ټپیان دي، دغه راز تېره شپه پر درېیو بجو جګړه شوې چې د افغان ځواکونو په ځوابیه بریدونو کې ۶ نور وسله وال طالبان د دوی د یوه قوماندان په ګډون وژل شوي دي."

د ارزګان د والي ویاند وايي په دې موده کې د مخامخ جګړې پر مهال څلور سرتېري هم ټپیان شوي دي.

وسله والو طالبانو د دغو پېښو په اړه رسماً کومه تبصره نه ده کړې.

کندهار چارواکي: د وژل شوې ښځینه پولیسې د وژونکو د نیولو هڅې پیل شوي

ارشیف

د کندهار پولیس وايي، د هغو کسانو د موندلو هڅې یې پیل کړي، چې د یوې ښځینه پولیسې په وژنه کې لاس لري.

د کندهار د امنیې قوماندانۍ ویاند، جمال ناصر بارکزي ازادي رادیو ته وویل پر دغې ښځینه پولیسې نن سهار د کندهار په نهمه حوزه کې ډزې شوي.

هغه زیاته کړه: "زموږ یوه سرتېره پولیسه چې په محبس کې یې دنده درلوده، د وسله والو ترهګرو له خوا ویشتل شوې او شهیده کړای شوې ده، زموږ هڅې روانې دي، چې وسله وال ترهګر ژر تر ژره ونیسو او قضايي ارګانونو ته یې معرفي کړو."

که څه هم تر اوسه د پېښې مسوولیت تر اوسه چا نه دی منلی، خو تر دې مخکې وسله وال طالبان په وَرته پېښو کې په لاس لرلو تورن شوي دي.

غزني کې هاوان مرمۍ یوه ښوونکې او ۲ زده‌کوونکې ټپيانې کړي

ارشیف، غزني ښار

د غزني په خواجه عمري ولسوالۍ کې یوه ښوونځي ته نږدې د هاوان مرمۍ یوه ښوونکې او دوه زده‌کوونکې ټپيانې کړې دي.

د والي ویاند واحدالله جمعه‌زاده ازادي راډیو ته ویلي چې د ټپیانو روغتیایي وضعیت نازک دی او تر درملنې لاندې دي.

هغه زیاته کړه: "شااوخوا درې بجې د غزني د خواجه عمري ولسوالۍ اړوندو کې د دولت وسله‌والو مخالفانو د هاوان یوه مرمۍ توغولې ده، مرمۍ د مکتب مخې ته لګېدلې ده، یوه استاده او دوه شاګردانې ټپيان شوې دي."

تر اوسه طالبانو په دې اړه څه نه‌دي ویلي.

په غزني کې پرون د ماین یوې چاودنې هم د څلورو مېرمنو په ګډون ۸ تنه ووژل.

دشت برچي کې ځانمرګي برید لږترلږه ۲۴ تنه وژلي

په دشت برچي کې د برید له امله ۵۷ تنه ټپیان شوي

د افغانستان کورنیو چارو وزارت وایي، د کابل ښار دشت برچي سیمه کې پروني ځانمرګي برید لږترلږه ۲۴ تنه ووژل او ۵۷ نور یې ټپیان کړل.

د وزارت ویاند طارق ارین یکشنبه سهار مهال د مرګ‌ژوبلې دغه شمېرې له خبریالانو سره شریکې کړې.

چاودنه پرون مازدیګر د پل خشک سیمه کې د (کوثر دانش) په نوم یوه ښوونیز مرکز مخې ته وشوه.

د کابل په دغې شیعه مېشته سیمه کې له دې وړاندې داعش وسله‌والو پر ښوونیزو مرکزونو، غونډو او ورزشي کلپونو بریدونه کړي دي.

ارګ دغه برید غندلی او د اسلامي او انساني ارزښتونو خلاف کار یې بللی دی.

د ارګ په خبرپاڼه کې د ولسمشر محمد اشرف غني په حواله راغلي، د طالبانو د څه باندې شپږ زره زندانیانو له خلاصون او د جګړې د پای ته رسېدو لپاره د دولت، خلکو او نړیوالو له مکررو غوښتنو سره سره هم خلک د دوی په ټکو د "نا مشروع جګړې" شاهدان دي.

پر افغان چارواکو سربېره ناټو او د پاکستان د بهرنیو چارو وزارت دغه برید غندلی دی.

پاکستان سږ کال سلګونه افغان محصلانو ته د لوړو زده کړو بورسونه ورکړي

آرشیف، پاکستان کې د سوات پوهنتون

پاکستان سږ کال تر ۸۰۰ زیاتو افغان محصلانو ته د لوړو زده کړو بورسونه ورکړل.

په کابل کې د پاکستان سفارت وایي هڅه کوي له افغان دولت سره د دوه اړخیزو اړیکو له لارې دغه بهیر لا پیاوړی کړي.

د دغه سفارت نن په کابل کې پر ۸۵۸ افغان محصلانو بورسونه ووېشل چې په طب، کمپیوټر ساینس، اقتصاد او ځينو نورو رشتو کې دي.

د دغه سفارت د معلوماتو له مخې، دا پرورګرام په ۲۰۰۹ کال کې پیل شوی او تر دې دمه یې په لړ کې له ۳۰۰۰ زیات افغان محصلانو په پاکستان کې په بشپړ سکالرشیپ زده کړې کړي دي.

د ننګرهار لسګونو حق الزحمه ښوونکو لاریون وکړ

ننګرهار کې د لاریون کوونکو یو انځور

د ننګرهار لسګونو حق الزحمه ښوونکو نن په جلال اباد کې یو سوله ییز لاریون وکړ.

دوی پر مسئولینو تور پورې کړ چې ګوندې فساد ته لاره هواروي او پر رسمي بستونو د ګمارنې لپاره بیا ځلي ازموینې ورکولو ته اړایستل کېږي.

دوی وایي، درې کاله یې په ښوونیز ډګر کې خدمتونه ترسره کړي، خو په خبره یې، اوس چې د رسمي ښوونکو په توګه باید وګمارل شي، د دوی پرځای نوي ښوونکي جذبول کېږي.

یو تن لاریون کوونکي وویل: "نوم مې همایون حضرتي دی، دوی فقط دا غواړي چې ۱۵سوه ډالر وکړې نو رسمي کوي مو، مونږ هېڅ نه لرو، مونږ سره پیسې نشته، مونږ د دې هېواد د بچیانو لپاره شپه او ورځ یوه کړې، مونږ نتایج هم د خپل جیب په مصرف جوړ کړي، ولې دا خدمت نه دی؟ خو زمونږ خبرې څوک نه اوري."

خو د ننګرهار د پوهنې رئیس حسیب الله شینواری وایي، دوی په دې هڅه کې دي چې دغه ښوونکي په رسمي بستونو وګماري خو په خبره یې، اداري اصلاحاتو کمېسیون نه یې دغه غوښتنه کړې خو تر اوسه یې ځواب نه دی ترلاسه کړی.

اخوا د ننګرهار د اداري اصلاحاتو کمېسیون مشر هجرت الله اختیار وایي، له قراردادي ښوونکو ازموینه د پوهنې ریاست په چوکاټ کې اخیستل شوې او دوی په جریان کې شوي نه دي.

دی زیاتوي، د ښوونکو د رسمي کېدو لپاره باید بستونه لومړی اعلان او بیا د ازموینې له لارې وړ ښوونکي رسمي مقرر شي.

د یادونې وړ ده چې په ننګرهار کې ۱۱ سوه قراردادي ښوونکي دي چې له تېرو درې کالو راهیسې په مختلفو ښوونځیو کې په تدریس بوخت دي.

پکتیا کې د مڼو باغداران: حاصلات ډېر دي خو بازار او سړې خونې نه لرو

ارشیف

پکتیا کې د مڼو باغداران وايي، سږکال یې حاصلات ډېر او ښه دي خو نه بازار لري او نه سړې خونې چې ویې ساتي.

دلته د یو شمېر کورنیو د عوایدو یوازینۍ سرچینه همدا باغونه دي.

د پکتیا یو بڼوال حسن قادري د خپل سږني حاصل په اړه ازادي راډیو ته وویل: " نسبتاً د تېر کال په مقایسه سږ کال حاصلات ښه دي، په دې کې موږ درې قسمه مڼې لرو، مڼې څلور قسمه دي موږ درې قسمه لرو، بیروتۍ، مارلینګ او زیړه مڼه، جاپانۍ مڼه موږ نه ده کرلې، ځکه ځای ورته نه لرو".

هغه وايي، د خپل باغ رسېدلو مڼو ته چې ګوري سترګې یې پرې خوږې شي، خو کله چې د مڼو بازار ته ګوري نو بېرته نهیلی شي، ځکه په وینا یې د مڼو بازار ډېر سوړ دی او دا چې د ساتلو لپاره یې سړې خونې نه لري مجبور دی چې په همدې ساړه بازار کې یې وپلوري.

پکتیا کې د کرنې او مالدارۍ ریس محمد دین مومند وایي، سږ کال دې ولایت کې د مڼو حاصلات د تېر کال پرتله په سلو کې ۱۴ لوړ شوي دي.

هغه د سړو خونو د نشتوالي د ستونزې په اړه وویل:"موږ ۵۹ د مڼو سړې خونې جوړو، چې هره خونه ۲۵ میټریک ټنه ظرفیت لري."

د پکتیا د کرنې او مالدارۍ ریاست وايي، دا سړې خونې به د مرکز په ګډون په احمد ابا سید کرم، مېرزکه، زرمت او روحاني بابا ولسوالیو کې جوړېږي او ښايي کار یې نږدې دوه میاشتې نور وخت هم وغواړي چې چمتو شي.

په هرات کې د بوکسېنګ ټاکنیزې سیالۍ ترسره شوې

ارشیف

په هرات کې د کیون کیک بوکسېنګ ټاکنیزې سیالۍ ترسره شوې.

د هرات د بدني روزنې ریاست مسلکي او فني مدیر ضیا الحق ضیا نن له ازادي راډیو سره په خبرو کې د دي لوبو هدف د کاري پلان تطبیق او د غوره لوبغاړو ټاکل وبلل.

نوموړي وویل، چې په دې سیالیو کې ۸ کلبونو برخه اخیستې وه چې په پایله کې دلیران، لومړی، اتحاد استقلال دوهم او جونان میهن درېیم مقام خپل کړ.

یادې سیالۍ تېره ورځ پیل شوې وې.

د اسیا ۲۰۲۱ کال باولېنګ سیالیو لپاره د افغانستان چمتووالی

ارشیف

افغانستان د اسیا ۲۰۲۱ کال باولېنګ سیالیو لپاره چمتووالی نیسي.

د افغانستان د باولېنګ فدراسیون وايي، هڅه کوي چې په یادو سیالیو کې ښې لاس ته راوړنې ولري.

د دې فدراسیون رییس ادریس فاروقي نن ازادي راډيو ته وویل، چې په همدې هدف د باولېنګ ټاکنیزې سیالۍ پیل شوي څو غوره کسان ترې انتخاب شي.

د دغه سیالیو لومړی پړاو نن پای ته ورسېد چې د ښاغلي فاروقي په وینا ۱۲ نجونې او ۱۲ هلکان ترې غوره شوي دي.

ټاکل شوې چې د اسیا د ۲۰۲۱ کال سیالۍ په هانګ کانګ کې ترسره شي.

نور راوښيه

XS
SM
MD
LG