د لاسرسۍ وړ لېنکونه

تازه خبر
شنبه ۳ لړم ۱۳۹۹ کابل ۰۵:۳۱

خبرونه

ولسمشر غني د افغانستان د خونو فدراسیون پرانیست

افغان ولسمشر محمد اشرف غني

جمهور رئیس محمد اشرف غني د افغانستان د خونو فدراسیون رسماً پرانیست.

له ارګه په خپره شوې خبر پاڼه کې راغلي، ښاغلي غني په دې پرانیست غونډه کې وویل، چې افغانستان د خونو فدارسیون په پرانیستلو سره د اقتصاد یوه واحده ژبه او ادرس پیدا کړ.

د افغانستان د خونو فدراسیون عمومي رئیس محمد اسماعیل غضنفر وویل، خصوصي سکټور له پاشلتیا تېر شوی او اوس د خونو فدراسیون په جوړېدو سره یې د افغانستان د هوساینې لپاره تر یوه چتر لاندې استوار ګامونه واخیستل.

د خونو فدارسیون کې د کرنې او مالدارۍ تولیداتو، د ښځو د سوداګرۍ او صنایعو، د دوکاندارنو او کسبګرو، د پانګونې او سوداګرۍ، د کانونو او صنایعو او په افغانستان کې د نړیوالې سوداګرۍ خونې غړیتوب لري.

د اقتصادي فعالیتونو انسجام، د کار ایجاد او د بې وزلۍ راکمول، د متشبثینو او سوداګرو ښځو پیاوړتیا، د پانګونې جلبول، پر ځان د اتکا تمرکز، د مسلکي او فني زده کړو برابرول، د سوداګریزو شخړو حلول، د باور د فضا پیاوړي کول، د کورنیو تولیداتو وده او د خصوصي سکټور، دولت او نړیوالو شریکانو ترمنځ د متقابلې همکارۍ هڅې د دغه فدراسیون د جوړولو موخه یاده شوې.

د ورځې تازه خبرونه دلته ولولئ

سادیر ژاپاروف د قرغزستان اساسي قانون د بدلون لایحه توشېح کړه

د قرغزستان موقت صدراعظم او د حکومت د لومړی درجه چارواکی سادیر ژاپاروف

د قرغزستان حکومت د دغه هېواد په اساسي قانون کې د بدلون هغه لایحه نن توشېح کړه چې له مخې یې ولسمشریزې او پارلماني ټاکنې ځنډېږي.

د قرغزستان پارلمان پرون دغه لایحه تصویب کړه، اساسي قانون کې له دې بدلون سره سادیر ژاپاروف اجازه لري چې ولسمشریزو ټاکنو ته ځان نوماند کړي.

ژاپاروف د خپل یوه سیال د تښتونې په جرم په یوولس نیم کاله بند محکوم و.

نوموړی د اکټوبر د څلورمې ټاکنو وروسته د راولاړو شویو اعتراضونو پایله کې خوشې شو.

نوموړی وروسته د موقت صدراعظم او د حکومت د لومړي درجه چارواکي په توګه وټاکل شو.

د افغانستان بهرنیو چارو وزارت د ارمنستان-اذربایجان شخړه کې لاسوهنه ردوي

د افغانستان د بهرنیو چارو وزارت

د افغانستان بهرنیو چارو وزارت هغه راپورونه رد کړل چې ګواکې دغه هېواد د ارمنستان او اذربایجان ترمنځ شخړه کې لاسوهنه کوي.

د دوی په وینا، د دغې لاسوهنې ادعا د ارمنستان د ملي امنیت ادارې کړې ده او ویلي دي چې له افغانستانه "د اذربایجان د ملکي الوتنو" له لارې وسلې او جنګیالي اذربایجان ته لېږل کېږي.

بهرنیو چارو وزارت په یوه خبرپاڼه کې ویلي، افغانستان د جګړې د قرباني په توګه، د اذربایجان او ارمنستان د جګړې سوله‌ییز حل غواړي.

خبرپاڼه کې راغلي، دغه شخړه باید د ملګرو ملتونو امنیت شورا د پرېکړه‌لیک او د مېنسک ډلې د پرېکړو له مخې هواره شي.

د نګورنو قره‌باغ جلا شوې سیمې پر سر د ارمنستان او اذربایجان شخړه کې دواړو لورو ته سلګونه امنیتي کسان او ملکیان وژل شوي دي.

د افغانستان بشري حقونو کمېسیون: تخار کې هوايي برید ۱۲ ماشومان وژلي

هغه ماشوم چې د تخار په هوايي برید کې ټپي شوی دی.

د افغانستان د بشري حقونو خپلواک کمېسیون وایي، لومړنۍ موندنې یې ښيي چې تخار کې وړمه ورځ هوایي برید ۱۲ ماشومان وژلي دي.

کمېسیون نن په یوه خبرپاڼه کې وویل، د افغان ځواکونو دغه هوایي برید د تالقانو په هزاره قشلاق سیمه کې پر یوه جومات شوی چې ملا امام او ۱۷ ماشومان په‌کې ټپیان شوي هم دي.

خبرپاڼه کې راغلي، برید داسې مهال شوی چې د طالبانو یوه ډله د جومات له مخې تېرېده او جومات کې دننه ماشومانو ته تدریس روان و.

کمېسیون د ملکي کسانو په ځانګړې توګه ښځو او ماشومانو د مرګ‌ژوبلې په زیاتېدو اندېښنه ښودلې ده.

له دې وړاندې د ولسمشر لومړي مرستیال ویلي و، تخار کې شوي هوایي برید کې ملکیانو ته مرګ‌ژوبله نه‌ده اوښتې.

د میر رحمان رحماني په مشرۍ د ولسي جرګې پلاوی اسلام‌اباد ته ورسېد

د ولسي جرګې مشر میر رحمان رحماني

پاکستان ته د افغان سیاستوالو سفرونه دوام لري.

له تېرې یوې میاشتې راهیسې درېیم ځل دی چې چارواکي دغه هېواد ته ځي او په وروستي ځل د ملي شورا ۱۷ غړي د پاکستان د پارلمان له غړو سره د لیدو په هدف اسلام‌اباد ته رسېدلي دي.

له دې وړاندې د ملي مصالحې عالي شورا مشر عبدالله عبدالله او د حزب اسلامي مشر ګلبدین حکمتیار هم دغه هېواد ته تللي وو.

هلته د ملي شورا د پلاوي مشري د ولسي جرګې مشر میر رحمان رحماني کوي او ټاکل شوې دغه پلاوی له صدراعظم عمران خان سره هم وګوري.

دفاع وزارت: بادغیس او ننګرهار کې نږدې ۵۰ وسله‌وال طالبان ووژل شول

ارشیف، ننګرهار کې یو شمېر افغان سرتېري

د افغانستان دفاع وزارت وایي، په بادغیس او ننګرهار ولایتونو کې یې نږدې ۵۰ وسله‌وال طالبان وژلي دي.

وزارت ویلي، ۲۱ طالبان د بادغیس قادس ولسوالۍ کې سره ټول شوي و چې ټول نن یوه هوایي برید کې له‌منځه ولاړل.

وزارت ادعا کړې چې وژل شویو کې د ملا خیرالله او ملا خالق په نوم دوه ځایي قوماندانان هم شامل دي.

دفاع وزارت په یوه جلا خبرپاڼه کې ویلي چې د ننګرهار په خوګیاڼو او شېرزاد ولسوالۍ کې هم ۲۸ طالبان وژل شوي دي چې شپږ یې پاکستاني اتباع دي.

تر اوسه طالبانو په دې اړه څه نه‌دي ویلي.

قطر کې له څو میاشتني ځنډ وروسته د اوښ ځغلولو سیالۍ پیل شوې

ارشیف، متحده عربي اماراتو کې د اوښ ځغلولو سیالۍ

په قطر کې د اوښ ځغلولو سیالۍ له څو میاشتني ځنډ وروسته بېرته پيل شوې.

دغه سیالۍ تېره فبروري میاشت کې د کرونا وبا د خپرېدو له کبله درول شوې وې.

د منډې دغې سیالۍ کې تر اپرېل میاشتې پورې زرګونه اوښان ځغلول کېږي او وړونکو کسانو ته په بېلابېلو کټه ګوریو کې له ۲،۱۰۰ تر دوه لکه او ۵۰ زرو ډالرو جایزه ورکول کېږي.

لوبه داسې ده چې اوښان په یوه ټاکل شوي واټن کې یوازې ځغلي او تر ټولو ګړندی هغه‌یې جایزه ګټي.

د اوښ ځغلولو سیالۍ چې د عربو یوه پخوانۍ لوبه ده، له ۱۹۷۰ کال راهیسې په رسمي ډول په قطر کې ترسره کېږي.

سږنیو سیالیو کې له دوو زرو تر ۱۳ زرو پورې اوښان برخه اخلي.

امریکا: د روسیې له ملاتړه برخه‌منو هکرانو پر ګڼو ادارو سایبري حملې کړي

ارشیف

د امریکا متحده ایالات وایي، وروستیو څو اوونیو کې د روسیې د دولت له ملاتړه برخه‌منو هکرانو پر لسګونه ایالتي او محلي ادارو باندې سایبري بریدونه کړي دي.

هکرانو له لږ تر لږه دوو سرورونو څخه اطلاعات غلا کړي دي.

د امریکا د فدرالي څېړنو ادارې (اېف.بي.ای) پرون وویل، تر اوسه هېڅ داسې نښې نښانې نه‌شته چې دغو هکرانو دې د الوتکو د الوتنې، ښوونې او روزنې، ټاکنو او یا حکومتي عملیاتو سیستم ګډوډ کړی وي.

د هکرانو د بریدونو خبرداری داسې مهال ورکول کېږي چې امریکا کې ولسمشریزو ټاکنو ته له دوه اوونیو کمه موده پاتې ده.

امریکایي چارواکو د اکټوبر په ۲۱مه ادعا وکړه چې ایران او روسیې د امریکا د رأی ورکوونکو اطلاعات ترلاسه کړي او هڅه کوي چې له انتخاباتو مخکې پر عامه فکرونو اغېز وکړي.

روسیې او ایران دغه ادعاوې رد کړې دي.

د افغانستان کورنیو چارو وزارت: د نورو تورنو کسانو انځورونه هم خپروو

د افغانستان کورنیو چارو وزارت

د افغانستان کورنیو چارو وزارت وایي، کابل ښار کې به په جرمونو د نورو تورنو کسانو انځورونه هم خپاره کړي.

د وزارت ویاند طارق ارین رسنیو ته ویلي، دغه چاره د امنیتي جلسې د لارښوونې له مخې کېږي او د تورنو په نیولو کې مرسته کوي.

ښاغلی ارین زیاتوي: "د مجرمانو انځورونه د خپرېدو په حال کې دي، هدف‌یې دا دی چې خلک د هغو کسانو له څېرو سره بلد شي چې ښار کې امنیت او نظم ګډوډوي او د نیولو لپاره‌یې له پولیسو سره همکاري وکړي."

له تېرو څو ورځو راهیسې د کابل ښار بېلابېلو سیمو کې پولیسو په جنایي جرمونو د هغو تورنو کسانو انځورونه خپاره کړي چې د دوی په باور، د قانون له منګولو تښتېدلي دي.

دا کار وروسته له هغه وشو چې د ولسمشر لومړي مرستیال امرالله صالح د کابل د امنیت په ټینګښت کې ښکېل شو.

د نیمروز چارواکي: طالبانو خاشرود ولسوالۍ کې د ملي اردو ۲۳ سرتېري وژلي

ارشیف، د افغانستان ملي اردو سرتېری

د نیمروز چارواکي وایي، خاشرود ولسوالۍ کې طالبانو د ملي اردو ۲۳ سرتېري وژلي او ۳ نور یې له ځان سره بیولي دي.

د والي ویاند بهرام حقمل ازادي راډیو ته وویل، دغه سرتېري د (دهمزنګ) په نوم پوسته کې و چې تېره شپه طالبانو پرې برید کړی دی.

حقمل وایي، طالبانو له دغې پوستې نه ټول تجهیزات له ځان سره وړي دي.

دفاع وزارت تر اوسه په دې اړه کومه تبصره نه‌ده کړې.

تېرو څو ورځو کې دا دوهمه امنیتي پیښه ده چې له ۲۰ ډېر امنیتي او دفاعي سرتېري په‌کې وژل کېږي.

د چهارشنبې په ورځ د تخار بهارک کې د طالبانو د جګړې له کبله ۳۷ امنیتي او دفاعي سرتېري وژل شوي وو.

چارواکي: تخار کې ۳ طالب ماین جوړوونکي د خپل ماین چاودنه کې ووژل شول

ارشیف، تخار کې چاودنه

په تخار کې چارواکي وایي، د طالبانو درې ماین جوړوونکي د خپل ماین په چاودنه کې وژل شوي دي.

د امنیه قوماندانۍ ویاند خلیل اسیر وایي، دغو کسانو غوښتل تېره شپه په اشکمش ولسوالۍ کې ماین خښ کړي چې پرې وچاودېد.

طالبانو تر اوسه په دې اړه څه نه‌دي ویلي.

تخار یو له هغو ولایتونو دی چې وروستیو کې ترې د طالبانو او افغان امنیتي او دفاعي ځواکونو د تودې جګړې راپورونه خپاره شول.

اروپا کې د کرونا دوهمه څپه؛ د تېرو ۱۰ ورځو نوې پېښې دوه برابره شوي

چک کې روغتیايي کارکوونکي په کرونا ویروس د اخته ناروغ د درملنې پر مهال

په اروپا کې د کرونا ویروس دوهمه څپه ګړندۍ روانه ده او تېرو ۱۰ ورځو کې نوې پېښې څه باندې دوه برابره شوې دي.

روېټرز ویلي، پرون په ټوله اروپا کې د لومړي ځل لپاره په ورځنۍ کچه د کرونا څه باندې دوه لکه پېښې ثبت شوي چې دې سره په ټوله اروپا کې روغتونونه هم تر فشار لاندې راغلي دي.

په دغې لویه وچه کې تر ټولو زیاتې پېښې چک جمهوریت کې رامنځته کېږي او حکومت‌یې هغه پلان تأیید کړی چې له ناټو او اروپایي ټولنې دې ۳۰۰ پوځي روغتیایي کارکوونکي د ناروغانو درملنه کې مرسته وکړي.

بلجیم او یو شمېر نورو هېوادونو کې روغتونونه هغه ناروغان نه‌مني چې بېړنی روغتیایي وضعیت ونه‌لري.

د پولنډ په وارسا ښار کې حکومت ملي ستډیوم په ګرځنده روغتون اړوي چې د ۵۰۰ ناروغانو درملنه به په‌کې کېږي.

په فرانسه کې د روغتونونو ۴۴ په سلو کې بسترونه د 'کووېډ-۱۹' په ناروغانو ډک شوي دي.

د ډونالد ټرمپ او جوبایډن وروستۍ مناظره کې کوم موضوعات شامل وو؟

د ډونالد ټرمپ او جوبایډن وروستۍ مناظره

د امریکا ولسمشر ډونالد ټرمپ او انتخاباتي سیال‌یې جوبایډن پرون په وروستۍ مناظره کې ګډون وکړ.

د امریکا ولسمشرۍ انتخاباتو ته تر دوو اونیو لږ وخت پاته دی.

په دې ۹۰ دقیقه‌یي مناظره کې د دواړو سیالانو ترمنځ د لومړنۍ مناظرې پرتله لفظي نرمښت موجود وو.

ډونالد ټرمپ چې په ډېرو نظرپوښتنو کې تر جوبایډن شاته ښودل شوی دی د دې مناظرې په اصلي موضوع کې چې د کرونا ویروس کنټرول وو، د دې وبا د خورېدو د کنټرول د تګلارې دفاع وکړه.

ولسمشر ټرمپ وویل، د امریکا متحده ایالات له دې ویروس سره ژوند زده کوي او په خبره‌یې د روان کال تر پایه به د دې ناروغۍ لپاره واکسین جوړ شي.

جوبایډن بیا وویل چې د کرونا ویروس خورېدل لا هم دوام لري او په خبره‌یې ولسمشر ټرمپ نیت نه‌لري د هغه څه چې ده یو تیاره ژمی وباله مخه ونیسي.

د بایډن په خبره ۲۲۰ زره امریکایان مړه شول او هغه کس چې د دغو مړینو مسؤل دی باید د امریکا ولسمشر پاته نه‌شي.

فاریاب کې نا معلومو وسله‌والو یو دیني عالم وژلی

ارشیف، فاریاب کې یو وژل شوی کس

د فاریاب یو دیني عالم د دې ولایت په مرکز میمنه کې د نامعلومو وسله‌والو له‌خوا وژل شوی دی.

د فاریاب د امنیه قوماندانۍ ویاند کریم یورش ازادي راډیو ته وویل چې دغه دیني عالم رحمت‌الله نومېده او نن سهار تر لمانځه وروسته د کور او جومات ترمنځ لاره کې په نښه شو.

د دې پېښې علت تر اوسه معلوم نه‌دی.

بغلان کې یوې چاودنې یو قومي مشر ټپي کړی

حبیب‌الرحمن اندرابي

د بغلان چارواکي وایي د دې ولایت یو قومي مشر او متقاعد جنرال حبیب‌الرحمن اندرابي د ماین په یوه چاودنه کې ټپي شوی دی.

د بغلان د امنیه قوماندانۍ ویاند احمد جاوېد بشارت ازادي راډیو ته دا خبره وکړه.

دا پېښه تېره شپه په پلخمري ښار کې شوې ده. ښاغلي بشارت زیاته کړه چې په دې پېښه کې د اندرابي یو زوی او موټر چلوونکی هم ټپیان شوي دي چې روغتیایي وضعیت‌یې د ډاډ وړ ښودل شوی.

پلخمري ښار په دې وروستیو کې د څو امنیتي پېښو شاهد وو.

تخار کې د ۱۲ ماشومانو د وژل کېدو د ادعا خپروونکي ته د صالح خبرداری

د افغانستان ولسمشر لومړی مرستیال امرالله صالح

د افغان ولسمشر لومړی مرستیال وايي، له هغو کسانو سره به قانوني چلند وشي چې په تخار کې د افغان ځواکونو په هوايي عملیاتو کې د ۱۲ ماشومانو وژل کېدو ادعاوې یې خپرې کړې دي.

د تخار د والي ویاند محمد جواد هجري ازادي راډیو ته وویل، د چهارشنبې په ورځ د مرکز تالقان په هزار لق سیمه کې پر یوه جومات د هوايي حملې په نتیجه کې ۱۲ ماشومان وژل شوي او ۱۴ نور ټپیان دي.

خو د ولسمشر لومړي مرستیال امرالله صالح پر فېس‌بوک په یو بیان کې لیکلي، دی مؤثق اسناد لري چې دا ادعا ناسمه ده.

د ولسمشر ویاند صدیق صدیقي هم پرون د ازادي راډیو په یوه بحث کې په دې اړه سپیناوی وکړ: "د ولسمشر لومړي مرستیال ویلي چې دا خبره دروغ ده او طالبان هره ورځ دروغ وايي، دوی د خلکو په کورونو کې پټېږي، له جومات څخه‌یې قرارګاه جوړه کړې. په کوم هېواد کې تاسو لیدلي چې په جومات کې پوځي قرارګاه وي، خو طالبانو په هر جومات کې پوځي قرارګاه جوړه کړې."

ښاغلي صالح په خپل بیان کې د چا نوم نه‌دی یاد کړی، خو ویلي یې دي، له هغو کسانو سره به قانوني چلند وشي چې له اوازو څخه‌یې سرخطونه جوړ کړي.

په کابل کې د ملګرو ملتونو مرستندوی دفتر یا یوناما او د افغانستان د بشري حقونو خپلواک کمېسیون پر ټویټر په جلا بیانونو کې ویلي دي چې د دې ادعاوو په اړه‌یې پلټنې پیل کړې دي.

نور راوښيه

XS
SM
MD
LG