د لاسرسۍ وړ لېنکونه

تازه خبر
جمعه ۲ لړم ۱۳۹۹ کابل ۰۳:۰۶

افغانستان

ولسمشر محمد اشرف غني بامیان ته لاړ

د افغانستان ولسمشر محمد اشرف غني

د افغانستان ولسمشر محمد اشرف غني د بامیان د وضعیت د لیدلو لپاره نن سهار دغه ولایت ته لاړ.

د ارګ له خبرپاڼې سره سم، ولسمشر غني به په بامیان کې د یکاولنګ – دره صوف د سړک د جوړولو چارې هم وګوري.

دغه راز په پام کې ده چې د ولسمشر د دوو مرستیالانو په ګډون د حکومت د مشرتابه ځانګړې امنیتي غونډه د ولسمشر غني د سفر په لړ کې په بامیان کې جوړه شي.

د ورځې تازه خبرونه دلته ولولئ

د افغانستان کورنیو چارو وزارت: د نورو تورنو کسانو انځورونه هم خپروو

د افغانستان کورنیو چارو وزارت

د افغانستان کورنیو چارو وزارت وایي، کابل ښار کې به په جرمونو د نورو تورنو کسانو انځورونه هم خپاره کړي.

د وزارت ویاند طارق ارین رسنیو ته ویلي، دغه چاره د امنیتي جلسې د لارښوونې له مخې کېږي او د تورنو په نیولو کې مرسته کوي.

ښاغلی ارین زیاتوي: "د مجرمانو انځورونه د خپرېدو په حال کې دي، هدف‌یې دا دی چې خلک د هغو کسانو له څېرو سره بلد شي چې ښار کې امنیت او نظم ګډوډوي او د نیولو لپاره‌یې له پولیسو سره همکاري وکړي."

له تېرو څو ورځو راهیسې د کابل ښار بېلابېلو سیمو کې پولیسو په جنایي جرمونو د هغو تورنو کسانو انځورونه خپاره کړي چې د دوی په باور، د قانون له منګولو تښتېدلي دي.

دا کار وروسته له هغه وشو چې د ولسمشر لومړي مرستیال امرالله صالح د کابل د امنیت په ټینګښت کې ښکېل شو.

د نیمروز چارواکي: طالبانو خاشرود ولسوالۍ کې د ملي اردو ۲۳ سرتېري وژلي

ارشیف، د افغانستان ملي اردو سرتېری

د نیمروز چارواکي وایي، خاشرود ولسوالۍ کې طالبانو د ملي اردو ۲۳ سرتېري وژلي او ۳ نور یې له ځان سره بیولي دي.

د والي ویاند بهرام حقمل ازادي راډیو ته وویل، دغه سرتېري د (دهمزنګ) په نوم پوسته کې و چې تېره شپه طالبانو پرې برید کړی دی.

حقمل وایي، طالبانو له دغې پوستې نه ټول تجهیزات له ځان سره وړي دي.

دفاع وزارت تر اوسه په دې اړه کومه تبصره نه‌ده کړې.

تېرو څو ورځو کې دا دوهمه امنیتي پیښه ده چې له ۲۰ ډېر امنیتي او دفاعي سرتېري په‌کې وژل کېږي.

د چهارشنبې په ورځ د تخار بهارک کې د طالبانو د جګړې له کبله ۳۷ امنیتي او دفاعي سرتېري وژل شوي وو.

چارواکي: تخار کې ۳ طالب ماین جوړوونکي د خپل ماین چاودنه کې ووژل شول

ارشیف، تخار کې چاودنه

په تخار کې چارواکي وایي، د طالبانو درې ماین جوړوونکي د خپل ماین په چاودنه کې وژل شوي دي.

د امنیه قوماندانۍ ویاند خلیل اسیر وایي، دغو کسانو غوښتل تېره شپه په اشکمش ولسوالۍ کې ماین خښ کړي چې پرې وچاودېد.

طالبانو تر اوسه په دې اړه څه نه‌دي ویلي.

تخار یو له هغو ولایتونو دی چې وروستیو کې ترې د طالبانو او افغان امنیتي او دفاعي ځواکونو د تودې جګړې راپورونه خپاره شول.

فاریاب کې نا معلومو وسله‌والو یو دیني عالم وژلی

ارشیف، فاریاب کې یو وژل شوی کس

د فاریاب یو دیني عالم د دې ولایت په مرکز میمنه کې د نامعلومو وسله‌والو له‌خوا وژل شوی دی.

د فاریاب د امنیه قوماندانۍ ویاند کریم یورش ازادي راډیو ته وویل چې دغه دیني عالم رحمت‌الله نومېده او نن سهار تر لمانځه وروسته د کور او جومات ترمنځ لاره کې په نښه شو.

د دې پېښې علت تر اوسه معلوم نه‌دی.

بغلان کې یوې چاودنې یو قومي مشر ټپي کړی

حبیب‌الرحمن اندرابي

د بغلان چارواکي وایي د دې ولایت یو قومي مشر او متقاعد جنرال حبیب‌الرحمن اندرابي د ماین په یوه چاودنه کې ټپي شوی دی.

د بغلان د امنیه قوماندانۍ ویاند احمد جاوېد بشارت ازادي راډیو ته دا خبره وکړه.

دا پېښه تېره شپه په پلخمري ښار کې شوې ده. ښاغلي بشارت زیاته کړه چې په دې پېښه کې د اندرابي یو زوی او موټر چلوونکی هم ټپیان شوي دي چې روغتیایي وضعیت‌یې د ډاډ وړ ښودل شوی.

پلخمري ښار په دې وروستیو کې د څو امنیتي پېښو شاهد وو.

تخار کې د ۱۲ ماشومانو د وژل کېدو د ادعا خپروونکي ته د صالح خبرداری

د افغانستان ولسمشر لومړی مرستیال امرالله صالح

د افغان ولسمشر لومړی مرستیال وايي، له هغو کسانو سره به قانوني چلند وشي چې په تخار کې د افغان ځواکونو په هوايي عملیاتو کې د ۱۲ ماشومانو وژل کېدو ادعاوې یې خپرې کړې دي.

د تخار د والي ویاند محمد جواد هجري ازادي راډیو ته وویل، د چهارشنبې په ورځ د مرکز تالقان په هزار لق سیمه کې پر یوه جومات د هوايي حملې په نتیجه کې ۱۲ ماشومان وژل شوي او ۱۴ نور ټپیان دي.

خو د ولسمشر لومړي مرستیال امرالله صالح پر فېس‌بوک په یو بیان کې لیکلي، دی مؤثق اسناد لري چې دا ادعا ناسمه ده.

د ولسمشر ویاند صدیق صدیقي هم پرون د ازادي راډیو په یوه بحث کې په دې اړه سپیناوی وکړ: "د ولسمشر لومړي مرستیال ویلي چې دا خبره دروغ ده او طالبان هره ورځ دروغ وايي، دوی د خلکو په کورونو کې پټېږي، له جومات څخه‌یې قرارګاه جوړه کړې. په کوم هېواد کې تاسو لیدلي چې په جومات کې پوځي قرارګاه وي، خو طالبانو په هر جومات کې پوځي قرارګاه جوړه کړې."

ښاغلي صالح په خپل بیان کې د چا نوم نه‌دی یاد کړی، خو ویلي یې دي، له هغو کسانو سره به قانوني چلند وشي چې له اوازو څخه‌یې سرخطونه جوړ کړي.

په کابل کې د ملګرو ملتونو مرستندوی دفتر یا یوناما او د افغانستان د بشري حقونو خپلواک کمېسیون پر ټویټر په جلا بیانونو کې ویلي دي چې د دې ادعاوو په اړه‌یې پلټنې پیل کړې دي.

سټولټنبرګ: د سولې ټولو شرایطو په عملي کېدو سره به له افغانستانه ووځو

د ناټو عمومي منشي ینس سټولټنبرګ

د ناټو عمومي منشي ټینګار کوي چې د ناټو غړي به یوازې په هغه صورت کې له افغانستانه ووځي چې د امریکا او طالبانو د سولې ټول شرایط عملي شي.

ینس سټولټنبرګ د ناټو د دفاع وزیرانو د غونډې په درشل کې چې نن جمعه په پام کې ده، پرون په خپلو څرګندونو کې یادونه وکړه چې ناټو د افغانستان د سولې د خبرو ملاتړ کوي، خو په عین حال کې به تر ۲۰۲۴ کاله د افغانستان د ملي دفاعي ځواکونه مالي ملاتړ ته دوام ورکړي.

د ناټو د دفاع وزیرانو انلاین غونډه نن پیل شوه چې تر ډېره په فضا کې د ناټو د راتلونکو فعالیتونو په اړه خبرې په‌کې وشوې، خو تمه ده چې په نننۍ غونډه کې به بیا هم د افغانستان پر مسایلو بحث وکړي.

ښاغلي سټولټنبرګ په ډاګه کړه چې له افغانستانه د نړیوالو ځواکونو وتل له شرایطو سره تړلي دي، خو ده زیاته کړه چې ناټو، له نړیوالو ترورېستي ډلو سره د طالبانو د اړیکو د پرې کولو په ګډون دې شرایطو ته د امکاناتو له چمتو کولو سره مرستې ته چمتو ده.

د امریکا او طالبانو د موافقې له مخې چې د فبرورۍ په ۲۹مه نېټه لاسلیک شوه، د امریکا او ناټو ټول ځواکونه باید د بل کال تر مې میاشتې له افغانستانه ووځي.

له ستانکزي سره د امریکا نړیوالې پراختیا د مالي همکارۍ اجرائیه رئيس لیدنه

شېر محمد عباس ستانکزی

په قطر کې د طالبانو ویاند وايي، د امریکا د نړیوالې پراختیا لپاره د مالي همکارۍ اجرائیه رئيس اډم بولر د طالبانو د قطر د دفتر له مرستیال سره کتلي دي.

د طالبانو ویاند محمد نعیم وايي، اډم بولر له شېر محمد عباس ستانکزي سره په افغانستان کې د اقتصادي پانګونې پر فرصتونو خبرې کړې دي.

محمد نعیم نور جزئیات نه‌دي څرګند کړي.

بولر او نورو امریکايي چارواکو تر اوسه پورې په دې اړه څه نه‌دي ویلي.

د ولسي جرګې رئیس او یو شمېر غړي پاکستان ته ځي

د افغانستان ولسي جرګې رئیس

د افغانستان د ولسي جرګې رئيس سبا (جمعه) د یوه پلاوي په مشرۍ پاکستان ته ځي.

پاکستاني رسنۍ وايي چې میر رحمان رحماني او د ولسي جرګې ۱۷ غړي به چې د پاکستان د ملي اسامبلۍ د ريیس اسد قیصر په رسمي بلنه دغه هېواد ته شپږ ورځنی سفر کوي، د پاکستان د ولسمشر عارف علوي او صدراعظم عمران خان په ګډون له نورو چارواکو سره هم ویني.

افغان پلاوی به راتلونکې اوونۍ په اسلام‌اباد کې د افغانستان-پاکستان د سوداګرۍ په غونډه کې هم ګډون وکړي.

سرور دانش: ممکن په کرونا ویروس د اخته کسانو شمېر زیات شي

د افغانستان ولسمشر دوهم مرستیال سرور دانش

د افغانستان د ولسمشر دوهم مرستیال وايي، ممکن په کرونا ویروس د اخته کسانو شمېر په هېواد کې زیات شي.

سرور دانش دا خبره نن (پنجشنبه) د عامې روغتیا وزارت له چارواکو سره په یوه غونډه کې وکړه.

ده وویل، د کرونا ویروس له لومړي پړاو سره ښه مبارزه وشوه، خو که اوس بیا د کرونا مثبتې پېښې ډېرې شي، باید د مخنیوي لپاره‌یې تدابیر غوره شي.

په وروستیو ۲۴ ساعتونو کې په افغانستان کې د کرونا ویروس ۱۱۶ مثبتې پېښې ثبت شوي او ۴ تنه ورڅخه مړه شوي دي.

تر اوسه پورې په افغانستان کې د نږدې ۴۱ زره تنو د کرونا مثبتې پېښې ثبت شوي او څه باندې یو نیم زر تنه ورڅخه مړه شوي دي.

خو باور کېږي چې په افغانستان کې ښايي د کرونا مثبتې پېښې او ورڅخه د مړینو شمېر تر دې ډېر وي.

په کندهار کې دوه رومانیايي سرتېري ټپیان شوي

ارشیف، په ۲۰۱۷ کال کې پر رومانیايي سرتېرو حمله

د رومانیا دفاع وزارت وايي، دوه سرتېري یې په کندهار کې ټپیان شوي دي.

د دغه وزارت په وینا، پرون (چهارشنبه) د دوو رومانیايي سرتېرو په لاره کې هغه مهال چاودنه وشوه چې د کندهار د هوايي اډې په شاوخوا کې یې ګزمه کوله.

دا وزارت وايي، ائتلافي ځواکونه په منظم ډول په کندهار کې د خپلې اډې په شاوخوا کې ګزمه کوي.

دا له یوې اوږدې مودې وروسته لومړی ځل دی چې په افغانستان کې بهرني ځواکونه ټپیان کېږي.

چارواکي: تخار کې هوايي برید ۱۲ ماشومان وژلي

د تخار ولایت نقشه

راپورونه وايي چې د تخار ولایت د مرکز تالقان ښار ته نږدې په هزار قرلق سیمه کې په هوايي برید کې ۱۲ ملکي وګړي وژل شوي دي.

د تخار د والي ویاند محمد جواد هجري پېښه تأییدوي او وايي چې دا برید پرون ماسپښین ۳ بجې شوی دی.

ده وویل: "متأسفانه په دې هوايي برید کې ۱۲ ماشومان وژل شوي او ۱۴ نور ژوبل دي."

ده دا هم وویل چې بم د جومات پر انګړ لګېدلی دی.

خو د افغان ولسمشر لومړي مرستیال امرالله صالح پر خپل فېس‌بوک لیکلي چې په تخار کې په یوه جومات کې د ماشومانو د وژل کېدو خبر بې‌بنسټه دی، هغه کسان له‌منځه وړل شوي چې تېره ورځ‌یې زموږ ځواکونه ووژل او په دې اړه انکار نه‌کېدونکی ثبوت هم له موږ سره شته.

د تخار د ولایتي شورا منشي محمد اعظم افضلي بیا د ټپیانو شمېر ۱۸ تنه ښيي.

د افضلي په وینا په وژل شویو کې د جومات ملا امام هم شامل دی.

دفاع وزارت: پر امام صاحب ولسوالۍ حمله شنډه او تر ۲۰ ډېر طالبان ووژل شول

ارشیف، کندز کې د افغان ځواکونو عملیات

د افغانستان دفاع وزارت وايي، تېره شپه‌یې د کندز پر امام صاحب ولسوالۍ د طالبانو حمله شنډه کړه او تر ۲۰ ډېرو طالبانو ته‌یې مرګ‌ژوبله واړوله.

دې وزارت نن په یوه خبرپاڼه کې ویلي، طالبانو غوښتل چې د امام صاحب ولسوالۍ پر ځینو سیمو بریدونه وکړي، خو افغان امنیتي او دفاعي ځواکونو د هوايي ځواک په مرسته د دوی پلان ناکام کړ او درنه مرګ‌ژوبله یې ورواړوله.

وسله‌والو طالبانو په دې اړه تر دې دمه څه نه‌دي ویلي.

له بلې خوا راپورونه وايي چې دفاع وزارت کندز ته یو شمېر کمانډو ځواکونه لېږلي چې په دې ولایت کې د طالبانو د تحرکاتو مخه ونیسي.

چارواکي: د ارزګان په ګېزاب ولسوالۍ کې هوايي برید ۱۷ طالبان وژلي

ارشیف، د افغان ځواکونو هوايي حمله

په ارزګان ولایت کې امنیتي چارواکي وايي په ګېزاب ولسوالۍ کې ۱۷ وسله‌وال طالبان په هوايي برید کې وژل شوي دي.

د اتل قول اردو ویاند احمد صادق عیسی ازادي راډیو ته وویل، دا برید تېره شپه وشو.

هغه زیاته کړه: "په تېرو ۲۴ ساعتونو کې د ارزګان په ګېزاب ولسوالۍ کې د هوايي بريدونو پر وخت ۱۷ طالبان وژل شوي او ۱۰ نور ټپیان دي، وسله‌والو طالبانو پلان درلود چې پر امنيتي پوستو بريدونه وکړي، خو د هوايي بريدونو پر مهال د هغو دغه پلان شنډ شو."

افغان امنیتي چارواکي وايي، د دې برید هدف په دهراوود ولسوالۍ کې د هغه سیمو بېرته نیول دي چې طالبانو په وروستیو کې لاندې کړې دي.

په دې اړه طالبانو لا څه نه‌دي ویلي.

دفاع وزارت: د هلمند په نادعلي ولسوالۍ کې ۸ طالبان وژل شوي

ارشیف

دفاع وزارت په یوه خبر کې ویلي چې ځواکونو یې د هلمند په نادعلي ولسوالۍ کې ۸ طالبان وژلي دي.

د دغه وزارت په وینا امنیتي او دفاعي خواکونو پرون د هوايي ځواک په ملاتړ د نادعلي په چاه انجنیر سیمه کې پر هغو طالبانو برید وکړ چې غوښتل‌یې پر امنیتي خواکونو حمله وکړي.

د دفاع وزارت په خبرپاڼه کې ویل شوي چې په دې برید کې د طالبانو د عبرت شبکې د سرګروپ ملا سردار ولي په شمول ۸ تنه وژل شوي او ۳ نور ژوبل دي.

نور راوښيه

XS
SM
MD
LG