د لاسرسۍ وړ لېنکونه

تازه خبر
دوشنبه ۷ تله ۱۳۹۹ کابل ۰۱:۴۳

خبرونه

'د ګردېز او پټان تر منځ لویه لار کې امنیتي ستونزې زیاتې شوي'

د ګردېز پټان لویه لار

د پکتیا د مرکز ګردېز ختیځ لور ته د پرتو نهو ولسوالیو احمدابا، میرزاکه، سیدکرم، احمدخېل، څمکني، لجه منګل، جاني خېل، ډنډ پټان او د اریوب ځاځیو اوسېدونکي چې د ګردېز پټان په لویه لاره تګ راتګ کوي، د لارې په اوږدو کې د ناامنیو له ډېرېدو او د طالبانو له خوا د چک پاېټونو جوړولو او تلاشیو اندېښمن کړي دي.

دوی وایي، وسله وال طالبان هره ورځ د دې لویې لارې په یو شمېر برخو کې راوځي، تلاشۍ کوي او هغه کسان چې له موټرو ښکته کوي، ځينې یې وژني خو خني بیا بېرته را خوشي کوي.

یوه تن وویل: " نوم مې لطف الله بېنوا دی، د ګردېز پټان لویه لاره امنیت بیخي خراب دی، زما ملګری یې له دې امله له موټر ښکته کړی چې موبایل کې یې سندرې وې، خلک ډيرو ستونزو کې دي دوی هلته دایمي پوستې جوړې کړي دي."

د پکتیا د ولایتي شورا غړي هم د دې لارې له امنیت اندېښمن دي او د دې شورا غړی تاج محمد منګل وایي، وسله والو طالبانو څو ورځې وړاندې په دې لویه لاره یو شمېر کسان له موټرو ښکته کړل، چې له ډلې یې یو کس وواژه او یو شمېر نور یې را خوشې کړل.

خو د پکتیا کې د ۲۰۳ تندر قول اردو ویاند ایمل مومند وایي، د دې لارې د امنیت لپاره یې تازه د نویو پوستو د جوړولو او د عملیاتو د ترسره کولو پلان جوړ کړی، چې په خبره یې ډېر ژر به یې عملي کړي.

خو د پکتیا کې د ۲۰۳ تندر قول اردو ویاند ایمل مومند وایي، د دې لارې د امنیت لپاره یې تازه د نویو پوستو د جوړولو او د عملیاتو د ترسره کولو پلان جوړ کړی، چې په خبره یې ډېر ژر به یې عملي کړي.

د وسله والو طالبانو ویاند ذبیح الله مجاهد ازادي راډیو ته وویل، چې د یادو پېښو په اړه به پلټنه وکړي.

د ورځې تازه خبرونه دلته ولولئ

عبدالله عبدالله سبا په درې ورځني سفر پاکستان ته ځي

د افغانستان د مصالحې عالي شورا مشر عبدالله عبدالله

د افغانستان د مصالحې عالي شورا مشر عبدالله عبدالله سبا په درې ورځني سفر پاکستان ته ځي.

د پاکستان د بهرنیو چارو وزارت په یوه بیان کې ویلي، د مصالحې عالي شورا لوړپوړي غړي دغه سفر کې د ښاغلي عبدالله ملګرتیا کوي.

نوموړی به دې سفر کې د پاکستان له صدر اعظم، ولسمشر، د سنا له رییس ،د ملي اسامبلې له مشر او بهرنیو چارو وزیر سره وګوري.

دا سفر داسې مهال کېږي چې د افغانستان د دولت مرکچیان په دوحه کې له طالبانو سره د سولې خبرو ته ناست دي، هغه خبرې چې په ظاهره لانجمنې شوي دي.

د حکومت مرکچي پلاوی: مونږ پر طالب مرکچي پلاوي ډېر بدګمانه نه یو

قطر کې د بین الافغاني خبرو پرانیستغونډې یو انځور

په قطر کې د دولت د مرکچي پلاوي یو غړی وایي، دواړه لوري هڅه کوي چې پر بنسټیزو بحثونو مخامخ خبرو ته ولاړ شي او دا کار وخت غواړي.

عطاالله لودین په هغو څرګندونو کې چې نن د سولې په چارو کې د دولت وزارت خپرې کړي وایي، اجنډا ته په داخلېدو به د دوی اصلي غوښتنه اوربند وي.

دی وایي، بحثونه یې پېچلي، خو دوی یې په اخلاص مخته بیایي او پر طالبانو هم بدګمانه نه دي.

هغه زیاته کړه: "مونږ چې له کوم فکر، ارادې او نظر سره راغلي یو، هغه کې ډېر صداقت دی، ډېر اخلاص دی، زمونږ هدف همدا دی هرڅومره ژر چې امکان وي، دې ملک کې جنګ ودرېږي او عادلانه سوله راشي، تر کومه چې په مقابل جانب اړه لري، مونږ پر هغوی هم ډېر بدګمانه نه یو"

ښاغلي لودین له طالبانو وغوښتل چې پر افغانانو ورحمېږي او جګړه ودروي.

بل لورته بیا د افغانستان د سولې لپاره د امریکا ځانګړي استازي زلمي خلیلزاد ویلي، طالبان به یوه سیاسي جوړجاړي ته تر رسېدو مخکې ممکن اوربند ونه کړي، خو اورکم عملي کولای شي.

اولادزیمېر: لویدیځ هېوادونه د بیلاروس په کورنیو چارو کې لاسوهنه کوي

اولادزیمېر مکي

د بیلاروس د بهرنیو چارو وزیر لویدیځ هېوادونه تورن کړل چې د دوی په کورنیو چارو کې لاسوهنه کوي.

اولادزیمېر مکي ویلي، دغه هېوادونه غواړي بیلاروس کې له ټاکنو وروسته رامنځ ته شوي اړودوړ او اعتراضونو ته لمن ووهي.

نوموړي پرون د ملګرو ملتونو عمومي اسامبلې ته د ویډیویي پیغام پر مهال وویل: "مونږ داسې هڅې ګورو چې په هېواد کې وضعیت کړکیچنوي."

ټاکل شوې متحده ایالات، اروپایي ټولنه، بریتانیا او کاناډا ژر پر بیلاروس د وروستیو مظاهرو د ځپلو په خاطر بندیزونه ولګوي.

دا مظاهرې د اګسټ د نهمې له انتخاباتو وروسته پيل شوي، هغه ټاکنې چې الکساندر لوکاشینکا یې د شپږم ځل لپاره ولسمشر اعلان کړ.

رومانیا کې د محلي ټاکنو د رایې ورکونې مرکزونه پرانیستل شول

په دغه اروپایي هېواد کې دا ټاکنې تېرې جون میاشتې ته پلان شوې وې، خو د کرونا وبا له کبله ځنډېدلې وې. 

په رومانیا کې د محلي ټاکنو د رایې ورکونې مرکزونه پرانیستل شوي دي.

شاوخوا ۱۹ میلیونه د رایې ورکونې وړ کسان دغلته د محلي چارواکو، د شورا د مشرانو او ښاروالانو څه باندې ۴۳ زره بستونو ته کسان ټاکي.

په دغه اروپایي هېواد کې دا ټاکنې تېرې جون میاشتې ته پلان شوې وې، خو د کرونا وبا له کبله ځنډېدلې وې.

داسې وېره شته چې د کرونا ویروس له ویرې به ټاکنو کې د خلکو ګډون هم کم وي، ځکه رومانیا کې د دغه ویروس څه باندې ۱۲۱۰۰۰ پېښې ثبت شوي او ۴۷۰۰ تنه ېې مړه کړي دي.

ارزګان کې د ماشومانو ژوند د ګوزڼ او شري ناروغیو له خطر سره مخ دی

ماشومانو ته د پولیو واکسین ورکول

ارزګان روغتیايي چارواکي وايي د طالبانو تر واک لاندې سیمو کې د ګڼو ماشومانو ژوند د شري او ګوزڼ د ناروغیو له خطر سره مخ دی.

د ارزګان ولایت روغتیايي چارواکي وايي، په هغو سیمو کې چې طالبان واکمن دي له تېرو دوه کلنو راهیسې یو لک او شپاړس زره ماشومان د ګوزڼ د ناروغۍ پر ضد له واکسینو بې برخې دي.

دوی وايي، وسله‌وال طالبان اجازه نه ورکوي چې په دې سیمو کې ماشومانو ته واکسین ورکړي.

د ارزګان د عامې روغتیا د ریاست د واکیسنو د برخې مسؤل سیف‌الدین بارک ازادي راډیو ته وویل، د وسله‌والو طالبانو تر واک لاندې سیمو کې دا مهال لسګونه ماشومان د ګوزڼ په ناروغۍ اخته دي، او که په دې سیمو کې د پولیو واکیسنو ته اجازه ورنه کړل شي، پر دې ناروغۍ د ګڼو نورو ماشومانو د اخته کیدو وېره شته.

روغتیايي چارواکي وايي،که چیرې په یوه سیمه کې د ګوزڼ یو مثبته پېښه رامنځته شي، او نور ماشومان واکسین شوي نه‌وي، نو په یو ورځ کې په ګوزڼ ناروغۍ د نورو ۲۵۰ ماشومانو د اخته کېدو احتمال شته.

خو وسله‌وال طالبان بیا دا نه مني چې ګني دوی د واکیسنونو مخه نیولي وي.

طالب ویاند قاري یوسف احمدي ازادي راډيو ته په یو استولي پیغام کې ویلي، واکسیناتوران کولی شي، چې د دوی تر واک لاندې سیمو کې جومات پر جومات ماشومان واکسین کړي.

پاکستان کې د موټر چپه کېدو او اور اخیستو په پېښه کې ۱۵ تنه مړه شوي

ارشیف

په پاکستان کې د یوه مسافر وړونکي موټر د چپه کېدو او اور اخیستو په پېښه کې د ماشومانو په ګډون ۱۵ تنه مړه شوي دي.

دغه پېښه پرون کراچۍ ښار ته نژدې شوې ده او موټر کې د پولیسو په وینا ټول ۲۵ تنه سپاره وو.

لس تنه سپرلۍ له پېښې روغ ژغورل شوي دي.

پاکستان کې په ځانګړې توګه غرنیو سیمو کې یې ترافیکي پېښې عادي دي چې لامل یې بې احتیاطي او د سړکونو خرابوالی ښودل شوی.

تېر کال پاکستان کې ۹ زره ترافیکي پېښې شوي چې ۴ زره کسانو په کې ژوند له لاسه ورکړی دی.

چارواکي: د کرنې او خوراکي خوندیتوب بېړنۍ پروژه پرانیستل شوه

ارشیف

د کرنې او خوراکي خوندیتوب بېړنۍ پروژه پرانیستل شوه.

د افغانستان د کرنې او مالدارۍ وزارت وايي، دغه پروژه د نړیوال بانک د ۱۰۰ میلیونه ډالرو په وړیا مرستو پلې کېږي.

د دغه وزارت ویاند اکبر رستمي نن ازادي راډيو ته وویل، چې دغه پروژه به په دوو کلونو کې په ۳۴ ولایتونو کې پلې شي.

هغه زیاته کړه: "د اوبولو لګولو د کانالونو بیاروغونې، د اوبو د مدیریت، د اصلاح شويو تخمونو د ویش او په ۳۴ ولایتونو کې د ښځو لپاره د کچالو، پیازو او سبزیو لپاره د سړو خونو په برخه کې عملي کېږي."

د افغانستان د کرنې او مالدارۍ وزارت وايي، د کرنې او خوراکي توکو د خوندیتوب دغه بېړنۍ پروژه به ۵ ميلیونه کاري ورځې رامنځ ته کړي او په مستقیم ډول به اووه لکه تنه له دې پروژې ګټه واخلي.

د بایسکل ځغلونې د ازاد سبک سیالۍ پیل شوي

ارشیف

د بایسکل ځغلونې د ازاد سبک سیالۍ تېره ورځ په کابل کې پیل شوي.

د افغانستان د ملي االمپيک کمېټې د مطبوعاتو کمېټې مسؤل مجیب قاري زاده نن ازادي راډيو ته وویل په یادو سیالیو کې په دوو برخو کې د کابل او هرات ولایت ۳۲ نارینه او ښځینه لوبغاړو ګډون کړی.

د ښاغلي قاري زاده لوبو نه به شپږ تنه چې څلور یې نارینه او دوه یې ښځینه وي، د بایسکل ځغلونې ملي لوبډلې ته انتخاب شي.

زابل کې د سولې جام فوټبال سیالۍ پيل شوي

ارشیف

په زابل ولایت کې د سولې جام فوټبال سیالۍ پيل شوې.

د زابل ولایت د المپیک امر محمد ویس عزیزي نن ازادي راډيو ته وویل، چې په دغو سیالیو کې د مرکز کلات لسو الف لوبډلو ګډون کړی.

ښاغلي عزیزي زیاته کړه، چې دغه لوبې تېره ورځ پیل شوې او شااوخوا شل ورځې به دوام وکړي.

د زابل د المپیک کمېټې امر وايي، چې د راتلونکې جمعې په ورځ به د نورو فدارسیونونو لوبې هم پيل شي.

د کرکټ ای پي ایل سیالیو کې نن د راجستان او پنجاب لوبډلې سیالي لري

ای پي ال سیالیو کې د راهول یو انځور

ټاکل شوې چې د هندوستان د کرکټ د غوره لیګ ای پي ایل سیالیو په نهمه لوبه کې راجستان رایلز او کینګز ایلیون پنجاب لوبډلې د یو بل پر وړاندې د سیالۍ ډګر ته ښکته شي.

دا لوبه نن ماښام د شارجه کرکټ په لوبغالي کې په ځای وخت شپږ نیمې بجې پیلېږي.

د دې سیالیو د تېرې شپې په لوبه کې بیا حیدر اباد لوبډلې خپله دوهمه لوبه هم وبایلله.

د کلکته کنګ رایډرز سره په لوبه کې سنرایز لومړی توپ وهنه وکړه او په ټاکلو شلو اورونو کې يې د پنځه لوبغاړو په سوځېدو ۱۴۳ منډې هدف وټاکه چې یاد هدف د کلکتې لوبډلې د دریو لوبغاړو په سوځېدو د سیالۍ په اتلسم اور کې پوره کړ.

دوه افغان لوبغاړي محمد نبي او راشد خان چې د حیدر اباد په لوبډله کې لوبېږي دواړو ته د تېرې شپې په لوبه کې چانس ورکړل شوی وو خو دواړو د پام وړ لاس ته راوړنه نه درلوده.

نبي یولس منډې کړې او راشد خان یوه ویکټه ترلاسه کړه.

پولیسو کابل کې له چاودېدونکو توکو ډک موټر نیولی

دغه موټر د کابل پلچرخي سیمه کې پر عمومي سړک نیول شوی او پولیسو یې چلوونکی توقیف کړی دی.

پولیسو کابل کې له چاودېدونکو توکو ډک مازدا ډوله موټر نیولی دی.

د کورنیو چارو وزارت ویاند طارق ارین رسنیو ته ویلي، دغه موټر کې څلور زره کیلو ګرامه سودیم نایټریټ مواد ځای په ځای شوي وو.

له دغو موادو د ماینونو او نورو چاودېدونکو توکو په جوړولو کې ګټه اخیستل کېږي.

دغه موټر د کابل پلچرخي سیمه کې پر عمومي سړک نیول شوی او پولیسو یې چلوونکی توقیف کړی دی.

طالب مرکچي پلاوی: ښځې دې د راتلونکې په اړه هېڅ ډول اندېښنه ونه لري

قطر کې د طالبانو د مرکچي پلاوي غړي

په قطر کې د طالبانو د مرکچي پلاوی یو غړی وایي، د افغانستان ښځې باید د خپلې راتلونکې په اړه هېڅ ډول اندېښنه ونه لري.

طالبانو په خپله واکمنۍ کې ښځې له زده کړو او کارونو منعه کړې وې.

اوس چې له دې ډلې سره د سولې خبرې روانې دي، د د بشري حقونو فعالان په افغانستان کې د ښځو راتلونکې ته اندېښمن دي.

مولوی عبدالسلام حنفي د طالبانو له الاماره ویبپاڼې سره مرکه کې ویلي د طالبانو د واکمنۍ پر مهال هم ښځو روغتونونو کې کار کاوه او د پولیسو لیکو کې یې د تالاشۍ دنده مخته وړه، خو په خبره یې دا چې حالات جنګي وو او دوی سره د اوس په نسبت امکانات کم وو، نورو برخو کې یې حقونه خوندي نه وو.

هغه زیاته کړه: "د افغانستان په اسلامي نظام کې د ټولنې د ټولو اقشارو حقونه خوندي دي، مونږ د افغانستان ټولو ښځو ته ډاډ ورکوو چې انشاالله د دوی ټول حقونه به په اسلامي نظام کې محفوظ وي."

افغان مېرمنې د طالبانو د نظام له ړنګېدو وروسته په تېرو ۱۹ کلونو کې د زده کړو او کار په برخه کې د پام وړ لاسته راوړنې لري.

دوی اندېښمنې دي چې د طالبانو سره د روغې جوړې په صورت کې د دوی پر حقونو جوړجاړی ونه شي.

په وروستیو کې د نړۍ یو شمېر پخوانیو او اوسنیو مشرانو او مخکښو نړیوالو څېرو هم په یو پرانیستې لیک کې د سولې په بین الافغاني خبرو کې د ښځو د حقونو پر بشپړ خوندیتوب ټینګار وکړ.

ټرمپ لانجمنه قاضي کاني برېټ د سترې محکمې د غړې په توګه ونوموله

ډونالد ټرمپ او کاني برېټ

د امریکا ولسمشر ډونالد ټرمپ لانجمنه قاضي کاني برېټ د سترې محکمې د غړې په توګه ونوموله.

کاني برېټ د امریکا د ولسمشرۍ تر انتخاباتو ۳۸ ورځې مخکې او د سترې محکمې د لبرال قاضي روت بیدر ګینزبرګ له مړینې ۸ ورځې وروسته ونومول شوه.

ولسمشر ټرمپ په سپینه ماڼۍ کې وویل، دا درېیم قاضي دی چې ده د ولسمشرۍ په څلور کلنه دوره کې د سترې محکمې غړیتوب ته وړاندیز کړی دی.

ده اټکل وکړ چې د امریکا سنا جرګه به بې‌جنجاله او ژر کاني برېټ تأیید کړي.

د امریکا د سنا جرګې په ۱۰۰ چوکیو کې ۵۳ د جمهوري‌پالو په لاس کې دي او تر اوسه د هغو ډېرو ویلي چې د کاني برېټ ملاتړ کوي.

بدخشان کې د ماشومانو ګوزڼ ۲ پېښې ثبت شوې

د پولیو یا ګوزڼ له امله فلج شوی ماشوم

په بدخشان ولایت کې د ماشومانو د ګوزڼ دوه پېښې ثبت شوې.

د بدخشان عامې روغتیا ریاست چارواکي وايي چې دا له ۱۴ کلونو وروسته لومړی ځل دی چې د ماشومانو د ګوزڼ پېښې په دې ولایت کې ثبت کېږي.

د بدخشان د عامې روغتیا ریاست مرستیالې نوشین ګهر ازادي راډیو ته وویل، په پولیو یا ګوزڼ دا دوه تر پنځو کلونو کوچني ماشومان د یمګان او کشم ولسوالیو اوسېدونکي دي.

د بدخشان د ولایتي شورا ځیني غړي وايي چې په وروستیو کې د طالبانو د مخالفت له کبله په دې ولایت کې سلګونه ماشومان د پولیو له واکسینه بې‌برخې شوي دي.

خو د طالبانو ویاند ذبیح‌الله مجاهد وايي چې ډله‌یې د پولیو واکسین د تطبیق مخه نه‌نیسي.

په وروستیو کلونو کې د ګوزڼ یا پولیو ناروغي د افغانستان په څو ختیځو او جنوبي ولایتونو پورې محدوده شوې وه.

بشري حقونو کمېسیون: کندهار کې پر ۳۴۰ تنو هدفي بریدونه شوي

ارشیف

په کندهار کې د بشري حقونو خپلواک کمېسیون وايي، په تېر یوه کال کې په دې ولایت کې پر ۳۴۰ تنو هدفي بریدونه شوي دي.

د راپورونو له مخې، د سږ کال د روژې له میاشتې را په دې خوا په کندهار کې هدفي بریدونه زیات شوي دي.

په دې بریدونو کې چې عموماً له موټرسایکل څخه په کار اخیستو کېږي، قومي مشران، د امنیتي ادارو کارکوونکي او پولیس په نښه کېږي.

د کندهار د بشري حقونو د خپلواک کمېسیون د معلوماتو پر اساس په هدفي بریدونو کې ۲۲۰ تنه وژل شوي او ۱۲۰ نور ټپیان شوي دي.

د کندهار د امنیه قوماندانۍ ویاند جمال ناصر بارکزی وايي چې امنیتي ځواکونو یو شمېر حمله کوونکي نیولي دي.

نور راوښيه

XS
SM
MD
LG